Read Southern Kisi Ma̍kāl 4 Bible Online

Ma̍kāl 4 - Southern Kisi bible

Ma̍kāl 4

¹Te̍le̍ŋ cho̍ fūūlūū, pēmbīī chi̍ɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ ō chō ō tāŋgūlāā lēchōo̍ ve̍, ī bāndū ni̍ŋ mī ī hīōū lūāŋūŋ bɛ̄ndo᷄ŋ kpo̍u̍. Pēmbūŋ pɔ̄mbɔ̍ŋ kpo̍u̍, ŋ̄ wā ni̍ŋ le̍bɛ̍ŋgu̍ pɔ̍pɔ̍. Wāŋnda̍ o̍ lɛ̄ŋnde̍ ni᷄ŋ kpo̍u̍, ā wā ni̍ŋ kɔ᷅la̍ŋ ndo̍ŋ i̍kpɔ̍lɔ̄ kpɔ̄lūɛ̍i̍.

²Ndu̍yɛ̍ wāŋnda̍ o̍ lɛ̄ŋīī bɔ̍ɔ̍ bɔ̍ɔ̍ ni̍ŋ, ā wā ni̍ŋ di᷅mu̍la᷅ŋndo̍ āā, “Lā hu̍ŋ ŋ̄ kɔ̄nu᷅ŋ o̍ lūāŋīi̍ Mɛ̄lɛ̄ka̍ Ya̍a̍wɛ̄ɛ̄ ve̍ chōo̍, ŋ̄ kɔ̄nu᷅ŋ o̍ chīɛ̍i̍ Mɛ̄lɛ̄ka̍ I̍sɔ̄lūɛ̍i̍ya̍, ō chō lākɔ̄ na̍a̍ pɛ̄ɛ̄kū nyɛ̄ o̍ ye̍e̍ma̍ na̍a̍ mī ŋ̄ tōsa̍ wo̍, mī ŋ̄ wa̍ o̍ nɛ̄i̍ ndɔ̄ɔ̍ chōo̍ sa̍kpō. Kāni̍ fo̍ndōle̍, Sa̍a̍yɔ̄ŋ chi̍e̍e̍ Mɛ̄lɛ̄ka̍ Ya̍a̍wɛ̄ɛ̄ o̍ wa᷅ ni̍ŋ wa᷅ŋnda̍ sāwāla̍ ndɔ̄la̍ŋ pɛ̄ɛ̄kōo̍ ni̍. Ndu̍yɛ̍ Chūlu̍sɛ̄lɛ̄m chi̍e̍e̍ o̍ wa᷅ ni̍ŋ su̍ɛ̍i̍ nāa̍ wānāā ndūa̍a̍ chūā ni̍.”

³Mɛ̄lɛ̄ka̍ dīmī ni̍ŋ sɔ̍ɔ̍ŋ lɛ̄ŋīi̍ bɔ̄ɔ̍ bɔ̄ɔ̍ tɛ̍ɛ̄ŋ, ndu̍yɛ̍ mbō chīi̍ sɔ̍ŋgɔ̄la̍ŋ lɛ̄ŋīī kpāāyɛ̄i̍ i̍ cho̍ la̍nda̍ŋ la̍nda̍ŋ nde̍ tɛ̄ɛ̄ŋ. Wāŋnda̍ ā chūāū ni̍ŋ mɔ̍ɔ̄ŋ nda̍ŋ fāŋndo̍ŋ dɛ̍ndɛ̄la̍ŋ, ndu̍yɛ̍ mā chɔ̄ū ba̍lta̍ ndāla̍ŋ mɔ̄ɔ̄ŋ nda̍ bɛ̄ɛ̄ndīāā tɔ̍lɔ̄ɔ̄la̍ŋ ndo̍ŋ. A̍ te̍le̍ŋ ko̍ŋ, lēlɛ̄ŋ o̍ lēlɛ̄ŋ lē me᷅l lɛ̍ ni̍ŋ mī lē kɔ̍ sa̍ā chāa̍ŋ ndɔ̄ a̍ sɔ̍ŋgɔ̄ɔ̍ le̍. Lēlɛ̄ŋ o̍ lēlɛ̄ŋ lē pɛ̍ɛ̍kū lɛ̍ ni̍ŋ sɔ̍ŋgɔ̄ le̍ chāa̍ŋ ndɔ̄ lākɔ̄ dēlɔ̄ɔ̄ chōo̍ le̍.

⁴Tē pa̍a̍le̍ le̍ŋ lē fūūlu̍u̍ pɛ̍, wānā o̍ wānā o̍ wa̍ŋnūŋ ni̍ŋ a̍ kɔ̄l nyūlū mbō dē kpe̍le̍ ndɔ̍ mākīle̍pīi̍yo̍ a̍ kpe̍le̍ ndɔ̍ māfi̍kīi̍yo̍ tɔ̄nɔ̄. Wānā o̍ wānā o̍ do̍ū lɛ̍ ni̍ŋ wa̍nā i̍si̍o̍ōŋ te̍. Nyɛ̄ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̍ndōo̍ ō di̍mi̍ wo̍, ndu̍ cho̍ ko̍ŋ ni̍.

⁵Lɛ̄ŋīī chēle̍ŋnde̍ ī nɔ̄ mɛ̄lɛ̄ka̍a̍ ndāā yɛ̍ yi̍a̍a̍ nda̍ sōōlūū, ndu̍yɛ̍ mā tūɛ̄ī nda̍ dīōm nda̍. Kɛ̍ na̍a̍ na̍a̍, ŋ̄ chō wā Mɛ̍lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nāa̍ sōōlūūwo̍, ndu̍yɛ̍ mī ŋ̄ tūēī ndu̍ dīōm le̍ fɛ̍ɛ̍ŋ a̍ fɛ̍ɛ̍ŋ.

⁶Mɛ̄lɛ̄ka̍ Ya̍a̍wɛ̄ɛ̄ di̍mi̍ āā, “Te̍le̍ŋ cho̍ fūūlūū, wānāā ya̍ tu̍si̍ ha̍ā dɛ̍nɛ̍ pa̍lāa̍ chōo̍ ma̍ sāāŋgīāā nda̍ o̍ lɛ̄ŋndē chēle̍ŋnde̍ŋ ni᷄ŋ nda̍, I̍ cho̍ nda̍ chūūŋgīāā nāa̍ pi᷅lɛ̍.

⁷Mi̍ chē bɛ̍ɛ̍ ma̍ wā māā wānā bɛ̄vɛ̍i̍ ā nɔ̍ kpa̍a̍yā le̍, ndu̍yɛ̍ ma̍ wā la̍nda̍ŋ a̍ lɛ̄ŋndē ndāle̍ŋ ni̍, kɛ̍ ā tūa̍a̍ lo᷅ ni̍ŋ ka̍ŋ yo̍o̍mū wa̍, I̍ cho̍ nda̍ mīŋgī sīmī, mā sīmnu᷄ŋ vɛ̍lɛ̄ lɛ̄ŋndē kpāāyāle̍ bɛ̄ndū. Ndu̍yɛ̍ ya̍ Mɛ̍lɛ̄ka̍ Ya̍a̍wɛ̄ɛ̄, mī wa̍ nda̍ māsāa̍ chōo̍ o̍ Pēmbīī Sa̍a̍yɔ̄ŋnde̍ chōo̍, chɔ̍ŋ a̍ te̍le̍ŋndo̍ ho̍ō mbō kūɛ̄ a̍ le̍ fɛ̍ɛ̍ŋ a̍ fɛ̍ɛ̍ŋ.”

⁸Ndu̍yɛ̍ nūm Chūlu̍sɛ̄lɛ̄m, chi̍e̍e̍ Mɛ̄lɛ̄ka̍ chō ho̍ō māā wānā ma̍ndāā lāsāa̍, ma̍ wā o̍ fo̍ndā vīlɛ̄ī kālā ka̍lāa̍ le̍ wānāā nūmnda̍ māndāa̍ wo̍, kpāāyā nu̍m lēmāsāa̍ ō chō vɛ̄lɛ̄ nu̍m mīīŋgū o̍ bā. Chūlu̍sɛ̄lɛ̄m, ā chō vɛ̄lɛ̄ mīīŋgū chi̍e̍e̍ le̍bo᷅llo̍ mɛ̄ɛ̍ o̍ wa̍ pāāndū yɛ̍.

⁹Le̍ sa̍bū yɛ̄ɛ̍nɛ̍ nya̍ chō yɛ̄ cha᷄ŋndo̍ chōo̍ cho̍o̍ kpe̍le̍ŋ? Bāā lā nɔ̍ lɛ̍ māsā bɛ̍ndū le̍? Vɛ᷅ mi̍ lā wā sāŋgāa̍ mɛ̄ɛ̍ wānā la̍nɔ̍ɔ̍ te̍le̍ŋ ndɔ̄ vi̍a̍lāa̍ ō fūūlūū nu̍a̍ā yɛ̍? Bāā wānāā nyāā bɛ̍ndūa̍a̍ ā chūū kpo̍u̍?

¹⁰Nya̍ wāŋnda̍ Chūlu̍sɛ̄lɛ̄m, lā cha᷄ŋ mī lā nyūūmbu̍ŋ a̍ kūŋnda̍ŋ, mɛ̄ɛ̍ wānā la̍nɔ̍ɔ̍ te̍le̍ŋ ndɔ̄ vi̍a̍lāa̍ ō fūūlūū nu̍a̍ā yɛ̍. Kāni̍ fo̍ndōle̍, lā chō hūnɔ̄ɔ̄ chi̍e̍e̍ bɛ̍ndōo̍ ho̍ō mālɔ̄ɔ̄ mī lā kɔ̍ wa᷅ yōndōo̍ ni᷄ŋ. A̍ chō lākɔ̄ a̍ nya̍ o̍ bīyɔ̄ɔ̍ ni᷄ŋ o̍ lɛ̄ŋndē Ba̍bi̍lɔ̄ŋnde̍ŋ ni᷄ŋ pɔ̍ɔ̍li̍. Kɛ̍ ndu̍yɛ̍, o̍ lɛ̄ŋndē lēŋ ni᷄ŋ nya̍ chō lākɔ̄ bāŋa᷄ŋndo̍ sɔ̄lā ni̍. Lo̍ŋ Mɛ̄lɛ̄ka̍ Ya̍a̍wɛ̄ɛ̄ o̍ cho̍ lākɔ̄ nya̍ chīīndīāā ya̍a̍mɔ̍ɔ̍wa̍a̍ nyāa̍ o̍ bā ni̍.

¹¹Chūlu̍sɛ̄lɛ̄m, Lɛ̄ŋīī bɔ̄ɔ̍ bɔ̍ɔ̍ i̍ chu̍u̍ŋgi̍āŋ le̍ nu̍m chīŋa̍la᷅ŋndo̍ a̍ sɔ̍ŋgɔ̄ɔ̍. Ā chō dīmīo̍o̍ āā, “Mɛ̄ɛ̍ mī Chūlu̍sɛ̄lɛ̄m o̍ sɔ̍la̍ tɛ̄ɛ̄mbūūwo̍! Mɛ̄ɛ̍ mī ŋ̄ chē māā chi̍e̍e̍ bɛ̍ndōo̍ ho̍ō ō lo̍ pɔ̄m!”

¹²Kɛ̍ ndu̍yɛ̍ ā si̍nā nyɛ᷅ Mɛ̄lɛ̄ka̍ yīya̍ŋ le̍ tōsāa̍ a̍ nda̍ wo̍ le̍. Ā si̍nā nu̍a̍ā māā chūūŋgi̍a̍a̍ le̍ Mɛ̄lɛ̄ka̍ cho̍ nda̍ nāa̍ pi᷅lɛ̍ le̍ nda̍ kpāātīa̍a̍, mɛ̄ɛ̍ nda̍ chūūŋgīāā nu̍a̍ā wi̍tīi̍yo̍ŋ le̍ mu̍ŋ nīɔ̄ūwo̍ mā lūāā yɛ̍ le̍.

¹³Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “Wāŋnda̍ Chūlu̍sɛ̄lɛ̄m, lā chɔ̍ŋ mī lā kɔ̍ kpa̍a̍tīāā ya̍a̍mɔ̍ɔ̍wa̍a̍ nyāa̍. I̍ cho̍ nya̍ lēēlā ŋ̄chīli̍ŋnda̍ŋ kē, a̍ būūkūla̍ ŋ̄būlɔ̍ŋsīi̍la̍ŋ. Lā chō lɛ̄ŋīī fāŋgā fa̍ŋgā tɛ̄ɛ̄mbūū, ndu̍yɛ̍ sūltā nda̍ pōōndi̍a̍a̍ wāŋnda̍ o̍ lābā a̍ ka̍ka̍ la̍ŋ, mī lā chūa̍ la̍ŋ, mī lā yɔ̄ŋgu̍ la̍ŋ nāa̍ ya̍ Mɛ̄lɛ̄ka̍ chūā māā kē, ya̍ Mɛ̄lɛ̄ka̍ nɔ̍ chi̍e̍ēŋndo̍ ho̍ō kpo̍u̍ wo̍.”