Read Southern Kisi Ma̍kāl 5 Bible Online

Ma̍kāl 5 - Southern Kisi bible

Ma̍kāl 5

¹Wāŋnda̍ Chūlu̍sɛ̄lɛ̄m, ya̍a̍mɔ̍ɔ̍wa̍ ā hu᷄ŋ dɔ̍ū na̍a̍ o̍ pi̍ŋndo̍ ni᷄ŋ kpɔ̍kɔ̍su̍. Ā bālu̍ na̍a̍. Ā chō māsa̍ nāa̍ I̍sɔ̄lūɛ̄ī kpa᷅ŋnde̍ lɔ̄ɔ̄ a̍ yɔ̄m bīŋgīo̍o̍.

²Mɛ̄lɛ̄ka̍ Ya̍a̍wɛ̄ɛ̄ di̍mi̍ āā, “Bɛ̍ti̍lɛ̍hɛ̄m E̍fi̍lu̍a̍tī,[1] nūm ā chō chi̍e̍e̍ pɔ̍mbɔ̄ ō pīlɛ̍ o̍ lɛ̄ŋndē Chu̍dāle̍ŋ ni᷄ŋ. Kɛ̍ I̍ cho̍ tōsā mī māsāa̍ fūla̍ o̍ nūm ni̍ŋ, o̍ wa᷅ ni̍ŋ ma̍sāa̍ le̍ I̍sɔ̄lūɛ̄ī wo̍. Ō fūlā ni̍ŋ o̍ yu̍ŋgu̍ nda̍ māsīndɛ̄ si̍ndɔ̄ɔ̍ chōo̍.”

³Le̍la̍ŋ, Mɛ̄lɛ̄ka̍ Ya̍a̍wɛ̄ɛ̄ cho̍ wānāā ndūa̍a̍ mālɔ̄ɔ̄ ya̍a̍mɔ̍ɔ̍wa̍a̍ ndāa̍ o̍ bā, mbō lo̍ o̍ ko̍ŋ ha̍a̍a̍ mī wānā la̍nɔ̍ nɔ̍ le̍ pōo̍ ho̍ō vīōlɔ̄ɔ̍ wo̍, ō vēlū ndu̍. O̍ ko̍ŋ kɔ̍ɔ̍lī, mī wānāā ndūa̍a̍ I̍sɔ̄lūɛ̄ī, a̍ cho̍ o̍ bīyɔ̄ɔ̍ ni᷄ŋ nda̍, ā mīīŋgu̍ o̍ lɛ̄ŋndē ndāle̍ŋ ni᷄ŋ wa̍nāā ndāa̍ chōo̍.

⁴Ndu̍yɛ̍ Mɛ̄lɛ̄ka̍ Ya̍a̍wɛ̄ɛ̄ o̍ cho̍ ndu̍ kpāāyāa̍ kē mbō wa̍ māsā kɛ̍ndɛ̄ wānāā ndūa̍a̍ chōo̍ māā wānā ma̍ndāā lāsāā. Ō tōsā ni̍ŋ he̍ī sa̍na̍a̍ o̍ kpāāya̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ ndɔ̄ɔ̍ ni᷄ŋ, ndu̍yɛ̍ a̍ o̍ dīōla̍ Mɛ̄lɛ̄ka̍ la̍ŋ ni᷄ŋ. Ō tōsā ni̍ŋ mī wānāā ndūa̍a̍ ā wānu̍ŋ o̍ bā ndāa̍ chōo̍ yɛ̍lɛ̍kɛ̍lɛ̍ɛ̍. Kāni̍ fo̍ndōle̍, wāŋnda̍ o̍ chi̍e̍ēŋndo̍ ni᷄ŋ kpo̍u̍, ā sīnā ni̍ŋ mɛ̄ɛ̍ o̍ cho̍ māsa̍ kpāāyā bɛ̍ndū yɛ̍.

⁵Ndu̍yɛ̍ ō hūŋ ni̍ŋ a̍ kɔ̄l nyūlōo̍ wānāā ndūa̍a̍ tɛ̄ɛ̄ŋ. Tē lɛ̄ŋndē Āsi̍i̍līāāle̍ŋ lē hu᷄ŋ pe̍sī sāāsāla̍ nāāla̍ ka̍lā ka̍lāla̍ŋ mā lūɛ̄ī o̍ lɛ̄ŋndē nāāle̍ŋ ni᷄ŋ le̍ na̍a̍ dēlɔ̄ɔ̍ chōo̍ pɛ̍, ŋ̄ hɛ̄li̍ māsāa̍ nāa̍ ā ŋɔ᷄mmɛ̍ū le̍ mā wa᷄ na̍a̍ hɔ̄lte̍ŋ chōo̍, ndu̍yɛ̍ mī ŋ̄ vēm wānāā nāā bɛ̍ndūa̍a̍ ā ŋɔ̄ma̍a̍ mā si᷄m na̍a̍ lāchī le̍ sɔ̍ŋgɔ̄ɔ̍ a̍ nda̍.

⁶Ndu̍yɛ̍ wānāā nāā bɛ̍ndūāā ā chō lɛ̄ŋndē Āsi̍i̍līāāle̍ŋ yōmɔ̄ɔ̄ a̍ mɔ̄ɔ̄ŋ nda̍ŋ fāŋndo̍ŋ, ā chō lɛ̄ŋndē Ni̍mi̍lɔ̍ɔ̍dī lēŋ bīyɔ̄ɔ̄ a̍ mɔ̄ɔ̄ŋ nda̍ŋ fāŋndo̍ŋ mā bāŋa̍ na̍a̍ Āsi̍i̍līāŋnda̍ o̍ bā tē ā hu᷄ŋ chi᷅ŋa̍la᷅ŋ na̍a̍ pɛ̍.

⁷O̍ ko̍ŋ kɔ̍ɔ̍lī, wāŋnda̍ I̍sɔ̄lūɛ̄ī, a̍ cho̍ lō yōōmū wa̍, ā wā ni̍ŋ wa᷅ŋnda̍ tɛ̄ɛ̄ŋ o̍ lɛ̄ŋnde̍ ni᷄ŋ. Ndu̍yɛ̍ ā wā ni̍ŋ o̍ lɛ̄ŋīī kēŋ ni᷄ŋ wa᷅ŋnda̍ tɛ̄ɛ̄ŋ mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ to̍sā nu̍a̍ā mī mɔ᷄mndo̍ ō chūchū, ɔ̄ɔ̄ mī pīɔ̍ɔ̍ ō sīa̍ o̍ tɔ̄lɔ̄ɔ̄la̍ŋ chōo̍ mī lā mīīŋgu̍ pīōŋɔ̄ɔ̍ yɛ̍. Ndu̍yɛ̍ tīīnda᷄ŋ ndāa̍ kpo̍u̍ o̍ Mɛ̄lɛ̄ka̍ ni᷄ŋ nda̍ dūāū ni̍ŋ ndu̍ ni̍, ō ve᷅ ni̍ŋ o̍ wāna̍ chi̍e̍e̍ ni̍ŋ te̍.

⁸Wānāa̍ cho̍ lō yōōmū mā wa̍ o̍ lɛ̄ŋnde̍ he̍ī ni᷄ŋ nda̍, ā wā ni̍ŋ vɛ̍lɛ̄ mɛ̄ɛ̍ kpɔ̍kūŋndo̍ ō wā nu̍a̍ā o̍ būndɔ̍ɔ̍ ni᷄ŋ vi̍sīa̍a̍ tɛ̄ɛ̄ŋ yɛ̍. Mɛ̄ɛ̍ kpɔ̍kūŋ fɔ̍ŋndɔ̍ɔ̍ ō lūɛ̄ī nu̍a̍ā sāā ku̍ndāa̍ tɛ̄ɛ̄ŋ, mbō de᷄l nda̍ chōo̍ mbō sɛ̄ɛ̄si̍a̍a̍ nda̍ wānā o̍ wānā ve᷅ le̍ sāā ka̍ŋ chīīndīāā le̍ yɛ̍, le̍nde̍ nda̍ chō wā o̍ lɛ̄ŋīī kēŋ ni᷄ŋ ni̍.

⁹I̍sɔ̄lūɛ̍i̍ya̍ ā dēl ni̍ŋ ya̍a̍mɔ̍ɔ̍wa̍a̍ ndāa̍ chōo̍, ā tɛ̄ɛ̄mbūū ni̍ŋ ya̍a̍mɔ̍ɔ̍wa̍a̍ ndāa̍ mā chīi̍ a̍ nda̍.

¹⁰Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “Tē pāa̍le̍ le̍ŋ lē fūūlu̍u̍ pɛ̍, I̍ cho̍ su̍a̍ā nyāa̍ dīū, ndu̍yɛ̍ mī tɛ̍ɛ̍mbu̍u̍ nyɛ̄lā nyāla̍ nya̍a̍na᷄ŋnda̍ su̍a̍a̍ ā nāŋnda̍ŋ.

¹¹I̍ cho̍ chi̍o̍o̍ŋ o̍ lɛ̄ŋndē nyāle̍ŋ ni᷄ŋ tɛ̍ɛ̍mbūū, ndu̍yɛ̍ mī tɛ̍ɛ̍mbu̍u̍ sāāsāla̍ nyāla̍ ka̍lā ka̍lā la̍ cho̍ le̍ nya̍ māndāa̍ la̍ŋ.

¹²I̍ cho̍ māndi̍a̍a̍ nyāa̍ tɛ̄ɛ̄mbūū, ndu̍yɛ̍ mī to̍sa̍ lā nɔ᷅ lɛ̍ wānāā vīāmāā lāyāwā le̍.

¹³Nyɛ̄lā nya̍ tōōsi̍a̍a̍ māā mɛ̄lɛ̄ka̍a̍ nyāla̍ŋ, I̍ cho̍ la̍ŋ tɛ̄ɛ̄mbūū, ndu̍yɛ̍ mī pe̍si̍ nyɛ̄lā nya̍ sīmi̍ māā māsūŋgbu̍ le̍ la̍ŋ sōōlūūwo̍ la̍ kpo̍u̍. O̍ ko̍ŋ, mī to̍sa̍ lā tu̍ndu᷄ŋ ndɛ̍ mī lā sōōlu̍u̍ nyɛ̄m nya̍ tōōsīāā a̍ bālā nyāla̍ŋ ndo̍ŋ te̍.

¹⁴I̍ cho̍ nyɛ̄lā nya̍ tōōsi̍a̍a̍ vēla᷄ŋ mɛ̄lɛ̄ka̍ nyāa̍ A̍si̍ɛ̍lūā wo̍ la̍ŋ tɛ̄ɛ̄mbūū, ndu̍yɛ̍ mī tɛ̍ɛ̍mbu̍u̍ chi̍e̍e̍ŋ nya̍ sōōlūū nyɔ̍ɔ̍ŋ mu᷅ŋ ndo̍ŋ kpo̍u̍.

¹⁵Ndu̍yɛ̍, nya̍ lɛ̄ŋīi̍ kɛ̍ɛ̍ le̍ sāwāla̍ nīla̍ŋ tōlɔ̄ɔ̍ kɔ̄ɔ̄lī ve̍, I̍ cho̍ tu̍mbe̍ dɔ̍u̍nɔ᷄ŋ a̍ nya̍ mī tu̍si̍ nya̍ nyɛ̄ pālāa̍ chōo̍.”