Read Southern Kisi Ma̍kāl 6 Bible Online

Ma̍kāl 6 - Southern Kisi bible

Ma̍kāl 6

¹Wāŋnda̍ I̍sɔ̄lūɛ̄ī, lā tūe̍i̍ nyɛ᷅ Mɛ̄lɛ̄ka̍ Ya̍a̍wɛ̄ɛ̄ di̍mi̍ wo̍. Lā si᷄m mī lā tīmbi̍ su̍ɛ̍i̍ nyɛ̄i̍ pēmbūŋ bɛ̄ndo᷄ŋ lāchī, mī pēmbo᷄ŋ ŋ̄ tūēī nyɛ̄ nya̍ chō dīmīo̍o̍ wo̍.

²Nya̍ pēmbūŋ bɛ̄ndo᷄ŋ, lā ya᷄ŋ ni᷅la̍ŋ o̍ nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ cho̍ dīmī wo̍, nya̍ chīyūŋ chi̍e̍ēŋndo̍ ō si᷄m chōo̍ le̍ fɛ̍ɛ̍ŋ a̍ fɛ̍ɛ̍ŋ ndo̍ŋ, lā ya̍ŋ Mɛ̄lɛ̄ka̍ Ya̍a̍wɛ̄ɛ̍ nīla̍ŋ. Mɛ̄lɛ̄ka̍ Ya̍a̍wɛ̄ɛ̄ o̍ nɔ̍ sūɛ̍i̍ nda̍ wānāā ndūa̍a̍ tɛ̄ɛ̄ŋ, ō chō kɔ̍ɔ̍sɔ̍ a̍ wānāā ndūa̍a̍ I̍sɔ̄lūɛ̄ī.

³Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “Wānāā nīa̍a̍, ō yɛ̄ɛ̍nɛ̍ ya̍ I̍ yɔ̍ŋ yɛ̄ nya̍? Vɛ̄ɛ̍nɛ̍ ya̍ si̍mnu᷄ŋ yɛ̍ wōlɔ̄ɔ̄lā lūsu̍lɛ̍i̍la̍ŋ le̍ nya̍? Lā mūli̍ wɔ̍ ya̍ dīōm.

⁴Ya̍ so̍lī nya̍ o̍ lɛ̄ŋndē I̍chi̍pīle̍ŋ ni᷄ŋ ni̍, mi̍ pi̍ŋī nya̍ nāa̍ nya̍ wa᷄ o̍ chɛ̄le̍ŋ ni᷄ŋ nda̍. Mi̍ vi̍ām Mūu̍sē nda̍ E̍lɔ̄ŋ, a̍ Me̍e̍līām le̍ mā si̍m nya̍ lāchī.

⁵Wānāā nīa̍a̍, lā lōōnu̍ŋ a̍ nyɛ̄ Māsā Bɛ̍ndōo̍ Be̍la̍kī o̍ wa̍ māsāa̍ le̍ lɛ̄ŋndē Mo̍wa̍bīle̍ŋ ndo̍, ndu̍ o̍o̍ kɛ̍ɛ̍si̍a̍a̍ le̍ tōsāa̍ a̍ nya̍ wo̍. Kɛ̍ ndu̍yɛ̍, mi̍ Be̍la᷅m po̍ Bi̍ɔ̍ɔ̍ wo̍ ō mūlūl ndu̍ mūlūl chēle̍ŋ. Ndu̍yɛ̍ lā lōōnu̍ŋ a̍ nyɛ̍ yɔ̍nu̍ŋ chɔ̍ŋ o̍ dɔ̍ɔ̍ŋgɔ̍ɔ̍ Āke̍e̍sīāā hu̍ŋ o̍ Ki̍lkāl wo̍. Lā lōōnu̍ŋ sɔ̍ɔ̍ŋ mu̍ŋ, o̍ ko̍ŋ, lā chō sīnā a̍ mɛ̄ɛ̍ ya̍ Mɛ̄lɛ̄ka̍ Ya̍a̍wɛ̄ɛ̄ lo̍o̍ku̍ nya̍ pīŋī yɛ̍.”

⁶Tē I̍ hi᷅ŋ le̍ Mɛ̄lɛ̄ka̍ Ya̍a̍wɛ̄ɛ̍, o̍ cho̍ ɛ̄chɛ̍nɛ̄ wo̍ tūndɔ᷄ŋndo̍ o̍ lābɛ̄ŋgu̍ ni᷄ŋ mī so̍o̍lu̍u̍ ndu̍ pɛ̍, ō yɛ̄ɛ̍nɛ̍ kpe̍e̍kpe̍i̍ ya̍ I̍ chu̍ū yɛ̍ ndu̍? Bāā I̍ hu̍ŋ a̍ nāūwāā fɔ̍ŋndu̍a̍a̍ a̍ chi̍i̍ wɔ̄sīo̍o̍ ō pīlɛ̍ wa̍ le̍ sa̍lālā lūāmāāla̍ŋ sōlīo̍o̍ nāa̍ ndu̍ chu̍a̍?

⁷Mɛ̄lɛ̄ka̍ Ya̍a̍wɛ̄ɛ̄ o̍ hi̍nī pa̍ kɔ̍l tē I̍ chu̍u̍ ndu̍ sāā ko̍ndu̍a̍a̍ wāa̍la̍ŋ, ɔ̄ɔ̄ chūɛ̄īmā ɔ̄li̍fīi̍ya̍ŋ mī mā wa̍ mɛ̄ɛ̍ pēēla̍ pɔ̍mbɔ̄la̍ŋ lā wā nu̍a̍ā hīōūwɔ̄ɔ̍ lā ki̍o̍lū kɔ̍ɔ̍lī le̍ yɛ̍? Bāā I̍ yɔ̍ŋgu̍ vi̍o̍lɔ̄ɔ̄ nī tāso̍o̍, o̍ fu̍la̍ ya̍ o̍ ŋ̄dīāllo̍, le̍ pāāwāa̍ le̍ ya̍ mālɔ̄ɔ̍ le̍ yɔ̄ŋndā nīla̍ wɔ̍ɔ̍ŋnda̍ŋ?

⁸Sāko̍, Mɛ̄lɛ̄ka̍ Ya̍a̍wɛ̄ɛ̄ o̍ chɔ̍m na̍a̍ nyɛ̍ cho̍ ō kɛ̄ndɛ̄ le̍ mī ŋ̄ tōsa̍ wo̍. Nyɛ̄ o̍ ye̍e̍ma̍ na̍a̍ mī ŋ̄ tōsa̍ wo̍ ndu̍ cho̍ ho̍ō ni̍. Ō yēēma̍ na̍a̍ mī ŋ̄ tōsa̍ nyɛ̍ cho̍ sa̍kpo̍ wo̍, mī ŋ̄ chɔ᷄m kāālā kpe̍e̍kpe̍i̍yo̍ le̍ te̍le̍ŋ o̍ te̍le̍ŋ, ndu̍yɛ̍ mī ŋ̄ wa̍ o̍ yōōmū tūsīa̍ŋndo̍ ni᷄ŋ nāa̍ ndu̍ Mɛ̍lɛ̄ka̍ nāa̍ chūa̍.

⁹Mɛ̄lɛ̄ka̍ Ya̍a̍wɛ̄ɛ̄ cho̍ sūɛ̍i̍ nāa̍ wāŋnda̍ Chūlu̍sɛ̄lɛ̄m chu̍a̍. Ndu̍yɛ̍ ī chō sūɛ̍i̍ tāāsi̍ le̍ mī wānā wo̍ Mɛ̄lɛ̄ka̍. Ō dīmi̍ āā, “Lā ya᷄ŋ ni᷅la̍ŋ, nya̍ chu̍u̍ŋgi̍āŋ o̍ chi̍e̍e̍ bɛ̍ndōo̍ ni᷄ŋ nda̍.

¹⁰Wānāā yɔ̄ŋndā wɔ̍ɔ̍ŋnda̍ ā bīī ma̍ pēī nyɔ̄ɔ̍ŋ o̍ chīɛ̄īlā ndāla̍ŋ ni᷄ŋ, nyɛ̄m nda̍ chō wāŋnda̍ bīyɔ̄ɔ̍ o̍ lābā o̍ ka̍fāla̍ŋ chōo̍ wo̍ŋ. Ā chō wāŋnda̍ nyɔ̄ɔ̍ŋ tūūlūl lāka̍fāa̍ mā kūānūŋ a̍ mu̍ŋ o̍ chīɛ̄īlā ndāla̍ŋ ni᷄ŋ, ndu̍yɛ̍ he̍ī ya̍ Mɛ̍lɛ̍ka̍ tu᷄l yɛ̄le̍ŋ ni̍.

¹¹Vɛ̄ɛ̍nɛ̍ ya̍ I̍ ma᷅l lɛ̍ wānāā dɛ̍nɛ̍ wɔ̍ɔ̍ŋnda̍ ha̍ā le̍ nyɛ̄ nda̍ tōsa̍ wo̍, wānāa̍ cho̍ ha̍ā wāŋnda̍ nyɔ̄ɔ̍ŋ tūūlūl lāka̍fāa̍ wa̍?

¹²Wānāā nyāā su̍lāa̍ ā chō wāŋnda̍ nyɔ̄ɔ̍ŋ pōōndīa̍a̍ o̍ lābā a̍ lāka̍fā, ndu̍yɛ̍ mī wānāā nyāa̍ ā dīmūl wa᷅ŋnda̍ chōōla̍ŋ, mā hūī wa᷅ŋnda̍ a̍ lēsōndō.

¹³Le̍la̍ŋ I̍ ka̍ndu̍ ni᷅ŋ bɛ̍ɛ̍ nya̍ tɛ̍ɛ̍mbūūwo̍. I̍ cho̍ nya̍ tɛ̄ɛ̄mbūū kpo̍u̍, mī to̍sa̍ mī lā lo᷄ pɔ̄m, fo̍ndōle̍, le̍ yɔ̄ŋndā nyāla̍ wɔ̍ɔ̍ŋnda̍.

¹⁴Lā wā ni̍ŋ nyɛ̍ dīa̍a̍ dīo̍o̍, kɛ̍ mɛ̄ɛ̍ mɛ̄ɛ̍ nya̍ dīo̍ lā pi᷅m ni̍ŋ te̍. Yīa̍a̍ŋ mā dēl ni̍ŋ nya̍ ni᷄ŋ. Lā kīndī ni̍ŋ le̍ nyɛ̄m nyāa̍ŋ māndāa̍, kɛ̍ lā nɔ̍lā ni̍ŋ mu̍ŋ māndā le̍. Ndu̍yɛ̍ nyɛ̄ o̍ nyɛ̄ nya̍ chō chu̍u̍ŋgi̍a̍a̍ I̍ cho̍ ya̍a̍mɔ̍ɔ̍wa̍a̍ nyāa̍ ya᷅m nya̍ ni̍ŋ nda̍ mu̍ŋ kē kpo̍u̍.

¹⁵Lā tōsā ni̍ŋ chi̍ɔ̍ɔ̍ŋ, kɛ̍ lā ku̍ī ni̍ŋ nyɛ᷅ o̍ nyɛ̄ le̍. Lā tōōsīāā ni̍ŋ chu̍ɛ̍i̍mā ɔ̄li̍fīi̍ya̍ŋ, kɛ̍ lā su̍u̍nūŋ ni̍ŋ ma̍ŋ te̍. Lā tōōsīāā ni̍ŋ mu̍ɛ̍īmā mākīle̍pīi̍ya̍ŋ, kɛ̍ lā ko᷅l ni̍ŋ ma̍ŋ te̍.

¹⁶Kāni̍ fo̍ndōle̍, le̍ mɛ̄ɛ̍ nya̍ tōl ka̍ālā wɔ̍ɔ̍ŋnda̍ Māsā Bɛ̍ndōo̍ O̍mi̍lī la̍ŋ kɔ̄ɔ̄lī, ndu̍yɛ̍ mi̍ lā tūāl vɛ̄lɛ̄ ka̍ālā E̍ha̍bī po̍ ndɔ̄ la̍ŋ kɔ̄ɔ̄lī yɛ̍. Mi̍ lā lō o̍ ko̍ŋ, mi̍ lā wā sɔ̍ɔ̍ŋ wɔ̍ɔ̍ŋ nda̍ wa̍ tōsāa̍ wo̍ŋ tōsāa̍. Le̍la̍ŋ, I̍ cho̍ nya̍ tɛ̄ɛ̄mbūū, mī mɛ̍i̍ nya̍ pɔ̄m. Ndu̍yɛ̍ mī wāŋnda̍ kpo̍u̍ a̍ ma̍m nya̍, mā sīɔ̄ɔ̄ndi̍a̍a̍ nya̍.”