Read Southern Kisi Ma̍kāl 7 Bible Online

Ma̍kāl 7 - Southern Kisi bible

Ma̍kāl 7

¹Mbɔ̄ ya̍ I̍ cho̍ŋnu̍ŋ ni᷅ŋ fo̍ndō fu̍u̍. I̍ si̍mnu᷄ŋ mɛ̄ɛ̍ nda̍ kēndī nu̍a̍ā tɔ̄lɔ̄ɔ̍ a̍ wɔ̄ɔ̄le̍ŋ mā dīndi̍ ndu̍ kēndīo̍o̍ fo̍ fo̍ yɛ̍. Mɛ̄ɛ̍ nda̍ kēndī nu̍a̍ā kīle̍pīi̍ma̍ tāsi̍a̍ŋ fo̍ fo̍ nyɛ᷅ o̍ nyɛ̄ lo᷅ lēchōo̍ le̍ yɛ̍, le̍nde̍ ya̍ I̍ yɔ̍nu̍ŋ ni̍.

²Wānāa̍ cho̍ sa̍kpō Mɛ̄lɛ̄ka̍ o̍ hɔ̄l la̍, ō pīlɛ̍ bɛ̍ɛ̍ cho̍ lɛ̍ o̍ chi̍e̍ēŋndo̍ chōo̍ le̍. Wānā pi᷅lɛ̍ bɛ̍ɛ̍ o̍ cho̍ lɛ̍ sa̍kpō le̍, nda̍ kpo̍u̍ ā chō nɛ̄īla̍ŋ nūūvīa̍a̍ le̍ mɛ̄ɛ̍ nda̍ dīū wa̍nāā ndāa̍ yɛ̍. Ā chō wānāā ndāa̍ yāŋɔ̄ɔ̄la̍ŋ yēŋndo̍ le̍ nda̍ dīūwo̍.

³Ā wōu̍ bāla̍ŋ o̍ yɔ̄ŋndā wɔ̍ɔ̍ŋnda̍ŋ tōsāa̍ ni᷄ŋ, ndu̍yɛ̍ ma̍ chāā la̍ŋ ni᷅ŋ tōsāa̍. Wānāā ndāā bɛ̍ndūa̍a̍ a̍ chɔ̍ɔ̍chi̍a̍a̍ ā chō wāŋnda̍ nyūnāa̍ le̍ nda̍ lūɛ̄īyɔ̄ɔ̄lā ni᷄ŋnda̍ŋ kīo̍o̍. Nyɛ̄ wānāā tɔ̍ɔ̍wa̍ ā dīmūl wa̍nāā bɛ̄ndūa̍a̍ a̍ chɔ̍ɔ̍chi̍a̍a̍ ha̍ā wo̍, ndu̍ ko̍ni̍ nda̍ tōsā ni̍.

⁴Wānāa̍ cho̍ kīndīo̍o̍ le̍ wāa̍ wānāā kɛ̄ndīa̍a̍ wānāā dɛ̍nɛ̍ wɔ̍ɔ̍ŋnda̍ ha̍ā tɛ̄ɛ̄ŋ nda̍, nda̍ bɛ̍ɛ̍ ā chō māchūāā mɛ̄ɛ̍ bīllo̍ ō chō nu̍a̍ā yɛ̍. Wānāa̍ cho̍ kīndīo̍o̍ le̍ wāa̍ sa̍kpō nda̍ tɛ̄ɛ̄ŋ nda̍, nda̍ bɛ̍ɛ̍ mɛ̄ɛ̍ bīl ŋ̄yɔ̄ fo̍ndōo̍ ō chō nu̍a̍ā yɛ̍, le̍nde̍ nda̍ chō ni̍. Kɛ̍ pāa̍le̍ wānāa̍ su̍a̍ā le̍ Mɛ̄lɛ̄ka̍ wa̍ ā dīmu̍l nda̍ a̍ le̍ŋ o̍kɔ̄ɔ̄ māā dɛ̍nɛ̍ pa̍lāa̍ ō chō nda̍ tōlɔ̄ɔ̄ chōo̍ le̍ŋ lē fūūlu̍u̍. Le̍la̍ŋ kɔ̄lta̍ŋ lā lāāsi̍a̍ŋ nda̍ kpo̍u̍.

⁵Le̍la̍ŋ du̍a̍ū tīīnda᷄ŋndo̍ o̍ wāna̍ nya̍ chīɛ̄ɛ̄li̍āŋndo̍ ni᷄ŋ te̍. Chāa̍ŋ nu̍m nya̍ nāāŋa᷅ŋndo̍ bɛ̍ɛ̍, ti̍i̍nda᷄ŋ ndu̍ le̍. La̍a̍ nu̍m bɛ̍ɛ̍, kɛ̄lɛ̄ŋgāā pɔ̍nɔ̍ nu̍m tē a̍ wa̍ sūɛ̍i̍ nāa̍ ndu̍ chu̍a̍ pɛ̍, ma̍nda̍ŋ le̍ nyɛ̄ ŋ̄ chō dīmi̍ wo̍.

⁶A̍ te̍le̍ŋ ko̍ŋ, chūāūwāā wāŋ pīāāndūa̍a̍ ā chi᷅ ni̍ŋ fi̍nyāā ndāa̍ nyɛ̄ o̍ nyɛ̄ le̍. Ndu̍yɛ̍ chūāūwāā wāŋ lāāndūa̍a̍ ā sīmu̍l kālāa̍ ndāa̍, a̍ kālālɛ̍ɛ̍ya̍a̍ ndāa̍. Wāŋndo̍ o̍ ndu̍ pi̍la̍ lo̍ chi̍ɛ̍ī ni̍ŋ kpe̍e̍kpe̍i̍ ya̍a̍mɔ̍ɔ̍nɔ̍ ndɔ̄ɔ̍ ō fūlā ni̍ŋ ni̍.

⁷Kɛ̍ ya̍ ya̍, I̍ cho̍ Mɛ̄lɛ̄ka̍ Ya̍a̍wɛ̄ɛ̄ tōfā. I̍ cho̍ Mɛ̄lɛ̄ka̍ chūm le̍ mbō bāŋa̍ ya̍. Mɛ̄lɛ̄ka̍ nūu̍ chō ya̍ dīōm tūēīyɔ̄ɔ̄.

⁸Ya̍a̍mɔ̍ɔ̍wa̍a̍ nāa̍, lā du̍a̍a̍ŋ nya̍a̍le̍ le̍ nyɛ̄ pālāa̍ ko̍ma̍l na̍a̍ wo̍ le̍. Mi̍ chē bɛ̍ɛ̍ mi̍ ŋ̄ dēl, kɛ̍ ŋ̄ chō vɛ̄lɛ̄ chɔ̄nɔ᷄ŋ. Mi̍ chē bɛ̍ɛ̍ mi̍ ŋ̄ wā o̍ nyūmnda̍ŋ ni᷄ŋ te̍le̍ŋndo̍ ho̍ō ni̍, kɛ̍ Mɛ̄lɛ̄ka̍ Ya̍a̍wɛ̄ɛ̄ o̍ cho̍ na̍a̍ vɛ̄lɛ̄ nyɛ̄ wa̍wo̍ŋndo̍ kē.

⁹Ŋ̄ tōsa̍ yɔ̄ŋ wɔ̄ɔ̍ŋndo̍ a̍ Mɛ̄lɛ̄ka̍ Ya̍a̍wɛ̄ɛ̄ mbo̍ dūāūnu᷄ŋ tu̍mbe̍ a̍ na̍a̍, le̍la̍ŋ ŋ̄ chō dɛ̍nɛ̍ pa̍lāā o̍ tu̍si̍ na̍a̍ chōo̍ wo̍ bīūnɔ᷄ŋ ha̍a̍a̍, mbō lo᷄ o̍ ko̍ŋ mbō sūŋgū le̍ na̍a̍, ndu̍yɛ̍ mbō kīlu̍l ya̍a̍mɔ̍ɔ̍wa̍a̍ nāa̍ yāmɛ̍i̍ mbō tūsi̍ nda̍ nyɛ̄ pālāa̍ chōo̍ le̍ nyɛ̄ nda̍ tōsa̍l na̍a̍ wo̍. Ō chō na̍a̍ bāŋā, mbō hīŋ a̍ na̍a̍ o̍ nyɛ̄ wa̍wo̍ŋndo̍ ni᷄ŋ.

¹⁰O̍ ko̍ŋ, ya̍a̍mɔ̍ɔ̍wa̍a̍ nāa̍ ā chō he̍ī chɔ̄ mī si̍ɔ̍mbu̍la̍ŋ lā bīī nda̍. Ya̍a̍mɔ̍ɔ̍wa̍a̍ nāa̍ ha̍ā ā chō na̍a̍ nyūnāa̍ āā, “Vɛ᷅ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ō ma̍lā nya̍ le̍?” Kɛ̍ ya̍a̍mɔ̍ɔ̍wa̍a̍ nāa̍ ha̍ā, ŋ̄ chō chɔ̄ a̍ hɔ̄ltā nāāla̍ŋ pɛ̍ɛ̍ŋ, mɛ̄ɛ̍ nda̍ yām ni̍ŋ nda̍, mā kpāāti̍a̍a̍ nda̍ mɛ̄ɛ̍ nda̍ kpāātīāā nu̍a̍ā lōōlīo̍o̍ o̍ nɛ̄īla̍ŋ yɛ̍.

¹¹Wāŋnda̍ Chūlu̍sɛ̄lɛ̄m, bōōndi̍i̍ sāāsāla̍ nyāla̍ŋ lā mīīŋgū ni̍ŋ tāŋgūlɔ᷄ŋnde̍ ī chō ni᷅ŋ fūūlūūwo̍. A̍ te̍le̍ŋ ko̍ŋ, pɛ̄ŋgu̍la̍ būŋgɛ̄ī nyɛ̄i̍ lā chō hīōūwɔ̄ɔ̄ lāchī a̍ chɔ̄ɔ̄lɔ᷄ŋndo̍.

¹²A̍ te̍le̍ŋ ko̍ŋ, wāŋnda̍ fūlā ni̍ŋ Āsi̍i̍līāā kūmbū pāa̍le̍ŋ lē chāŋ ndo̍, mi̍ ha̍ā fūla̍ I̍chi̍pī kūmbū pāa̍le̍ŋ lē dēl lo̍, mi̍ ha̍ā fūla̍ o̍ būŋgɛ̄i̍ ho̍lnu̍ŋ pi̍o̍o̍ Yūfi̍lu̍a̍tīī ve̍, mi̍ ha̍ā fūla̍ o̍ pēēla̍ mɛ̄ŋmā īhɛ᷄lla̍ cho̍ lēvīlta̍ŋ hōlnɔ᷄ŋndo̍, a̍ o̍ pēmbu᷄ŋ cho̍ la̍nda̍ŋ ndo̍ŋ, mā hīŋ le̍ nya̍ bɛ̄ɛ̄le̍ kīo̍o̍.

¹³Kɛ̍ chi̍e̍ēŋndo̍ ho̍ō ō chō ītāmu̍ mbō sīmnu᷄ŋ mɛ̄ɛ̍ po̍llo̍ ō wā nu̍a̍ā yɛ̍, kāni̍ fo̍ndōle̍, le̍ yɔ̄ŋndā wɔ̍ɔ̍ŋndā wāŋnda̍ o̍ chi̍e̍ēŋndo̍ chōo̍ a̍ cho̍ tōsāa̍ la̍ŋ, le̍ dɛ̍nɛ̍ wɔ̍ɔ̍ŋ nda̍ chō tōsāa̍ wo̍.

¹⁴Mɛ̄lɛ̄ka̍ Ya̍a̍wɛ̄ɛ̄, ma̍nda̍ wa̍nāā nūmnda̍, wānāā nūm pi̍la̍ hɛ̍li̍ wa̍, mɛ̄ɛ̍ wānā ma̍ndāā lāsāa̍ ō māndā nu̍a̍ā sāa̍ ndūa̍a̍ yɛ̍. Ā chō nda̍ pīlɛ̍ kpe̍e̍le̍ yo̍ndōo̍ ni᷄ŋ. Lɛ̄ŋndē tɔ̄lɔ̄ɔ̄la̍ŋ lā nāŋ nde̍ŋ lē chō nda̍ īkɛ̄i̍. To̍sa̍ mā mīīŋgu̍ mā kɔ̍ to̍sā wa̍lta̍ ndāla̍ īchīɛ̄ɛ̄la̍ŋ o̍ lɛ̄ŋndē kɛ̄ndɛ̄lē tɔ̄lɔ̄ɔ̄la̍ŋ lā nāŋ nde̍ŋ Ba̍sīāŋ a̍ Ki̍li̍a̍a̍dī māā pāāndū.

¹⁵Mɛ̄lɛ̄ka̍ Ya̍a̍wɛ̄ɛ̄, chɔ̍m ka̍a̍ma̍ālā nūmnda̍ŋ mɛ̄ɛ̍ ŋ̄ chɔ᷄m ka̍a̍ma̍āla̍ŋ sīndɛ̄ bōndi̍i̍ ŋ̄ sōli̍ na̍a̍ I̍chi̍pī ve̍ yɛ̍. To̍sa̍ kɔ̄ndɔ̄fi̍lta̍ŋ māā pāāndū.

¹⁶Tē lɛ̄ŋīī chēle̍ŋnde̍ ī chē he̍ī pɛ̍, mi̍ chē bɛ̍ɛ̍ mi̍ ī wā lɛ̄ŋīī kpāāyɛ̄ī bɛ̍ndū, kɛ̍ si̍ɔ̍mbu̍la̍ŋ lā chō nda̍ bīyɔ̄ɔ̄. Ā chō bāla̍ŋ hāndɔ᷄ŋ o̍ lāsōndō, ndu̍yɛ̍ mā kīnda̍ nīlā ndāla̍ŋ.

¹⁷Ā chō lōōlīo̍o̍ dīo̍ a̍ lāsōndō māā lākɛ̄ū, ā chō ndu̍ dīo̍ mɛ̄ɛ̍ nyāā yōōmāa̍ ku̍ā ha̍ā o̍ dēmbōo̍ chōo̍ wa̍ ā dīā ndu̍ nu̍a̍ā yɛ̍. Ā chō fūlā o̍ fo̍ndāŋndā nda̍ bɛ̄ɛ̄ndi̍a̍a̍ ō kālā ka̍lā le̍ nda̍ māndāa̍ la̍ŋ mā hīŋ a̍ nyīīyāa̍. Sīōōŋīī bɛ̄ndūe̍i̍ chō nda̍ bīyɔ̄ɔ̄ a̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nāa̍ mā hīŋ nāa̍ ndu̍ chu̍a̍.

¹⁸O̍o̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ kūɛ̍ɛ̍nɛ̍ cho̍ yɛ̄ māā nūm? Mā ma̍l wānāā nūmnda̍ le̍ yɔ̄ŋndā ndāla̍ wɔ̍ɔ̍ŋnda̍ŋ, nda̍ yɔ̍nūŋ māā wānāā nūm a̍ lo̍ ha̍ā yōōmū ma̍ wā māā nyɛ̄m ŋ̄kɛ̍ wa̍ ni̍. A̍ cho̍ wa᷅na̍ dɔ̍u̍nu᷄ŋ tu̍mbe̍, mī tu̍mbe̍ ko̍ŋ ō hīōū nu̍m o̍ kɔ̄l kɔ̄ɔ̄lī le̍ fɛ̍ɛ̍ŋ a̍ fɛ̍ɛ̍ŋ te̍. Kɛ̍ le̍ te̍le̍ŋ o̍ te̍le̍ŋ ā chō a̍ kɔ̄l kɛ̄ndɛ̄ le̍ na̍a̍ kāālā nūmndo̍ chɔ̄mndo̍.

¹⁹Ā chō vɛ̄lɛ̄ na̍a̍ īnyīɛ̍ɛ̍ tūīīnɔ᷄ŋ māā pāāndū. Ā chō yɔ̄ŋndā nāāla̍ wɔ̍ɔ̍ŋnda̍ŋ nɛ̄ī a̍ bɛ̄ŋgu̍, mā fa̍ŋa̍ na̍a̍ la̍ŋ chōo̍, mā vīōū la̍ŋ o̍ Pēe̍ Mɛ̄ŋmā Īhɛ᷄llo̍ ni᷄ŋ pɔ̍.

²⁰Ā lō ni̍ŋ o̍ lēdīōm a̍ wāŋnda̍ I̍sɔ̄lūɛ̄ī, mā hīōū lāchī a̍ wānāā nūmnda̍ kāālāa̍ le̍ te̍le̍ŋ o̍ te̍le̍ŋ, nda̍ yɔ̍nūŋ māā wānāa̍ fu̍la̍ o̍ pūlāle̍ E̍bīlāha᷅mnde̍ŋ chōo̍ wa̍ ni̍, mɛ̄ɛ̍ ŋ̄ chūe̍l fi̍nyāā nāā ma̍māa̍ būŋgɛ̄i̍ sīndɛ̄ yɛ̍.