Read Southern Kisi Nāhu᷅m 2 Bible Online

Nāhu᷅m 2 - Southern Kisi bible

Nāhu᷅m 2

¹Wāŋnda̍ Ni̍ni̍vɛ̄ɛ̄, ya̍a̍mɔ̍ɔ̍wa̍a̍ cho̍ chi̍e̍e̍ nya̍a̍ pīɔ̄lɔ̄ɔ̄ wa̍ hīŋ. Lā kɛ̄si̍ so̍vɛ̄i̍ya̍ o̍ fo̍ndālā ndāla̍ŋ o̍ sāāsa̍ ba̍lu̍ chi̍o̍o̍ wo̍ chōo̍ mā wa̍ mɛ̄ŋgɛ̄lāa̍. Lā mānda̍ nɛ̍i̍ he̍l chi̍e̍e̍ wo̍. Lā bɛ̄ɛ̄ndi̍a̍ŋ. Lā chu̍u̍ŋgi̍a̍a̍ so̍vɛ̄i̍ya̍ le̍ chɔ̄ūwo̍. (

²Ya̍a̍mɔ̍ɔ̍wa̍ nda̍ a̍a̍ de̍l I̍sɔ̄lūɛ̍i̍ya̍ chōo̍ ma̍ pūŋgā nyɛ̄m ndāa̍ŋ a̍ wāŋta̍ndā. Kɛ̍ Mɛ̄lɛ̄ka̍ Ya̍a̍wɛ̄ɛ̄ ō cho̍ ni᷅ŋ tōsā mī I̍sɔ̄lūɛ̄ī mi̍i̍ŋgu̍ ō kɛ̄ndɛ̄ māā pāāndū.)

³So̍vɛ̄i̍ya̍a̍ ndūa̍a̍ hi᷅ŋ nda̍, nyɛ̄lā kālā ka̍lālā nda̍ bīī o̍ lābā le̍ nda̍ māndāa̍ la̍ŋ lā sīɔ̄ŋi̍. Nyɛ̄la̍ cho̍ nda̍ lēkɔ̄ɔ̍ la̍ŋ bɛ̍ɛ̍ lā sīāŋā. Ā bɛ̄ɛ̄ndi̍a̍ŋ le̍ sɔ̍ŋgɔ̄ɔ̍. Wānā che᷅ nyɛ̄lā ndāla̍ nya̍a̍na᷄ŋnda̍ŋ īyēlēŋgi̍ ye̍lēŋgi̍e̍i̍ pɛ̍ āā yīŋnde̍ŋ ni̍. Su̍a̍ā ndāa̍ chɔ̄ūwa̍ ā chō ni᷅ŋ ā bɛ̄ɛ̄ndīa̍ŋ le̍ sɔ̍ŋgɔ̄ɔ̍, īfi̍li̍mū fi̍li̍mūe̍i̍ tu̍ŋ nda̍ chō ni᷅ŋ ni̍.

⁴Nyɛ̄lā ndāla̍ nya̍a̍na᷄ŋnda̍ŋ lā chō nyāānɔ᷄ŋndo̍ o̍ nɛ̄īla̍ŋ. Lā chō hēēlōo̍ mī lā tūūsū o̍ fo̍ndāŋnda̍ ba̍lu̍ Ni̍ni̍vɛ̄ɛ̄ la̍ŋ. Wānā che᷅ la̍ŋ dīōndɔ̄ɔ̍ īyēlēŋgi̍ ye̍lēŋgi̍e̍i̍ pɛ̍ āā yīŋnde̍ŋ ni̍. Wānā che᷅ īfi̍li̍mū fi̍li̍mūī la̍ cho̍ ve̍ pɛ̍, āā nyɛ̄ ŋūāla̍lɛ̍ī lē ta᷅ŋ ndo̍ ni̍.

⁵Ā vēēlu̍ so̍vɛ̄i̍ya̍a̍ ndāa̍ nāa̍ pi᷅lɛ̍, ā chō kɔ̄la̍ŋ a̍ dēlīo̍o̍ mā chāŋ. Ā kūɛ̄ a̍ kīlta̍ŋ o̍ sāāsa̍ ba̍lu̍ chi̍o̍o̍ wo̍. Ā sīmi̍ nyɛ̄la̍ ma̍ndā sa̍a̍sāa̍ la̍ŋ o̍ sāāsāa̍.

⁶Ā kūūmbu̍u̍ fo̍ndāŋndā nda̍ kānda̍ mɛ̄ŋnda̍ŋ nda̍ŋ. Wānāa̍ cho̍ o̍ chīɛ̄ī māsā bɛ̍ndōo̍ ni᷄ŋ nda̍ ā pɛ̄ a̍ sīōōŋnde̍.

⁷Ā bīī la̍nɔ̍ɔ̍ māsāa̍, ā yūŋga̍ ndu̍ mā wā kɔ̄la̍ŋ a̍ ndu̍. Bu̍ɛ̍i̍yāā ndūāā la̍a̍ndūa̍a̍ ā chō cha᷄ŋnda̍ŋ, ā bīīnu᷄ŋ kɔ̍mɔ᷄ŋ a̍ mɔ̍nɛ̍i̍.

⁸Mɛ̄ɛ̍ mɛ̄ŋnda̍ŋ mā būlī nu̍a̍ā kāndāa̍ mī mā wa̍ hīōūwɔ̄ɔ̍ yɛ̍, le̍nde̍ wāŋnda̍ chō fūlāa̍ Ni̍ni̍vɛ̄ɛ̄ ni̍ mā nyāānūŋ. Wāŋnda̍ chō nda̍ vēēlōo̍ a̍ mākɔ̄ɔ̄ āā, “Lā si̍m! Lā si̍m” Kɛ̍ wānā o̍ wānā mu̍līŋ a̍ mākɔ̄ɔ̄ mbō si᷄m te̍.

⁹Lā pūŋga̍ ka̍ni̍ŋ hu̍mbo᷄ŋ! Lā pūŋga̍ ko̍o̍līi̍yo̍ŋ. Ni̍ni̍vɛ̄ɛ̄ cho̍ ō pīāā a̍ nyɛ̄m kɛ̄ndɔ᷄ŋ ta̍u̍ ta̍u̍. Ō nɔ̄ nyɛ̄m ba̍ā kāla᷄ŋ su̍u̍ o̍ su̍u̍.

¹⁰Ni̍ni̍vɛ̄ɛ̄ ta̍mbu̍, ō pīɔ̍l, ō lo̍ pɔ̄m. Kɔ̄lta̍ŋ lā lāāsi̍a̍ŋ wa᷅ŋnda̍ ni᷄ŋ. Wūla̍ŋ lā chō nda̍ nyīīyāa̍ pi̍ā pīā a̍ sīōōŋnde̍. Yōōmūa̍ŋ mā fūla̍ nda̍ po̍. Sīōōŋnde̍ bīī nda̍ bīyɔ̄ɔ̍ pīla̍.

¹¹Ni̍ni̍vɛ̄ɛ̄ a̍ wa̍ māwāā pāāndū māā būūlu̍ lākpɔ̍kūŋ. A̍ wa̍ māwāā māā būūlu̍ lākpɔ̍kūŋāā fɔ̍ŋndu̍a̍a̍ ā wa̍ wo̍. Tē kpɔ̍kūŋndo̍ bīī vīsīo̍o̍ pɛ̍, nāa̍ o̍ chu̍ū chu̍a̍u̍wāā ndūa̍a̍ wa̍. A̍ wa̍ māwāā māā nāa̍ kpɔ̍kūŋāā chūāūwa̍ ā wā nyɛ̄ o̍ nyɛ̄ yɔ̍nūŋ a̍ nda̍ le̍ wa̍. Kɛ̍ Ni̍ni̍vɛ̄ɛ̄, vɛ̄ɛ̍nɛ̍ ŋ̄ chō yɛ̄ ni᷅ŋ hāū?

¹²Lɔ̍ɔ̍ o̍ lɔ̍ɔ̍ kpɔ̍kūŋndo̍ vīsīa̍a̍ bīyɔ̄ɔ̍ mbō chūu̍ chūāūwāā ndūa̍a̍. Ō de᷄l pɛ̍ vi̍sīo̍o̍ chōo̍ ō yēm ndu̍ kɛ̄se̍i̍ ō chūu̍ la̍nɔ̍ɔ̍ a̍ chūāūwāā ndūa̍a̍. Mbō bīī mbō pēēlu̍l chūāā ndūa̍a̍ vīsīŋ vīsīāā o̍ bi̍ī ya̍ o̍ būūlōo̍ ni᷄ŋ cha̍.

¹³Kɛ̍ ndu̍yɛ̍, Mɛ̄lɛ̄ka̍ Ya̍a̍wɛ̄ɛ̄ Kpu̍lu̍ŋgūma̍ bɛ̄ndōo̍ dīmi̍ āā, “Wāŋnda̍ Ni̍ni̍vɛ̄ɛ̄, I̍ cho̍ sɔ̍ŋgā a̍ nya̍. I̍ cho̍ nyɛ̄lā nyāla̍ nya̍a̍na᷄ŋnda̍ŋ lūmī. I̍ cho̍ tōsā mā dīu̍ chūāūwāā nyāa̍ a̍ mɔ̄ɔ̄ŋ fāŋndo̍ŋ. Nyɛ̄ o̍ nyɛ̄ nya̍ pōōndi̍a̍a̍ wāŋnda̍ o̍ lābā, I̍ cho̍ tōsā mā pōōnda̍ nya̍ mu̍ŋ o̍ lābā kpo̍u̍. Ndu̍yɛ̍ fɛ̍ɛ̍ŋ a̍ fɛ̍ɛ̍ŋ bɛ̍ɛ̍ lā vi᷅m ndɛ̍ o̍ ki̍i̍la̍nɔ̍ o̍ lēlɛ̄ŋ ni᷄ŋ lē nyɛ̄ o̍ nyɛ̄ le̍.”