Read Southern Kisi Nāhu᷅m 3 Bible Online

Nāhu᷅m 3 - Southern Kisi bible

Nāhu᷅m 3

¹Kpūndɛ̍ bɛ̄ndōo̍ wā ni̍ŋ le̍ chi̍e̍e̍ di̍u̍ ho̍ō wāŋndā chīe̍e̍ya̍ dīū bɛ̄ndōo̍ wo̍, chi̍e̍e̍ cho̍ ho̍ō ō pīāā a̍ wānāā lāchōōwāa̍, ndu̍yɛ̍ mbo̍ wā ō pīāā a̍ nyɛ̄m ya̍a̍mɔ̍ɔ̍wa̍ ā pūŋgā ni̍ŋ mā kūɛ̄nu᷄ŋ a̍ mu̍ŋ ndo̍.

²Lā tūe̍i̍ yɔ̍ kpa̍tōōve̍ dēlɔ̄ɔ̍ īpākāŋ pākāŋnde̍. Nyɛ᷅lā ndāla̍ nya̍a̍na᷄ŋnda̍ŋ lā chō kɔ̄la̍ŋ a̍ īdīkī dīkīe̍i̍. Lā chō īkpa̍fō kpa᷅fu̍e̍i̍ a̍ wāŋnda̍. Su̍a̍a̍ chō hūūlōo̍ īkūbū kūbūe̍i̍.

³Pūa̍a̍ cho̍ o̍ su̍a̍a̍ chōo̍ wa̍ ā chō su̍a̍ā ndāa̍ kīndɔ̄ɔ̍ kpe̍e̍kpe̍i̍. Lā tōfa̍ wɔ̍ mɔ̍ɔ̄ŋ ya̍a̍mɔ̍ɔ̍wa̍ chō sɔ̍ŋgɔ̄ɔ̍ wo̍ŋ, a̍ ba̍lta̍ nda̍ chō wūūwo̍ la̍ŋ ī pi̍li̍kū pi̍li̍kūe̍i̍ o̍ pāa̍le̍ŋ. Wāŋ vīlɛ̍i̍ya̍ chō ni᷅ŋ be̍mbe̍la̍ bɛ̄ndūla̍ŋ. Wānā chi̍ī nda̍ chɔ̄m te̍. Ā chō kēīyo̍ bōŋī bōŋīo̍o̍ o̍ nda̍ mā hīāū.

⁴Ni̍ni̍vɛ̄ɛ̄, ka̍ālā nūmnda̍ŋ, lā chō māchūāā mɛ̄ɛ̍ wānā la̍nɔ̍ ti̍a̍māa̍ ō tōōsīāŋ nu̍a̍ā tōōsīa̍ŋ kɛ̍ndɔ̄ɔ̍, o̍ ko̍ŋ kɔ̍ɔ̍lī, mbō yīi̍ kōo̍wa̍ŋ le̍ mī pūa̍a̍ lūɛ̄ī ndu̍ hɔ̄lte̍ŋ yɛ̍. Ndu̍yɛ̍ le̍nde̍ ko̍ni̍ ŋ̄ tōsa̍ a̍ lɛ̄ŋīi̍ wa̍ nu̍m o̍ bā bɛ̄ŋgu̍ ve̍ ni̍. Mɛ̄ɛ̍ pūa̍a̍ wa᷅ ha̍ā a̍ wāŋ lāāndūāā tīāmāa̍ wa̍ ā fāŋāŋ nu̍a̍ā o̍ nɛ̄i̍ tōnya̍a̍ chōo̍ yɛ̍, le̍nde̍ ŋ̄ tōsa̍ ni̍, mi̍ lɛ̄ŋīī ŋ̄ wa̍ chōo̍ ve̍ ī fāŋa᷄ŋ o̍ nɛ̄i̍ tōnya̍a̍ chōo̍.

⁵Kɛ̍ ndu̍yɛ̍ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ ō dīmi̍ āā, “Ni̍ni̍vɛ̄ɛ̄, I̍ cho̍ sɔ̍ŋgā a̍ nūm. I̍ cho̍ nu̍m bīyɔ̄ɔ̄ mɛ̄ɛ̍ nda̍ bīī nu̍a̍ā wānā la̍nɔ̍ ti̍a̍māa̍ yɛ̍. I̍ cho̍ tōsa̍ mā tūl la̍si̍ɔ̍mbu̍ lɛ᷅ŋnde̍ kpo̍u̍ o̍ hɔ̄l mɛ̄ɛ̍ nda̍ yūŋgā nu̍a̍ā wānā la̍nɔ̍ ti̍a̍māa̍ wāŋnda̍ o̍ hɔ̄l lɛ̍.

⁶I̍ cho̍ nu̍m nyɛ̄m nɔ̄ɔ̄lɛ̍i̍yo̍ŋ wūū chōo̍, mī si̍ɔ̍mbu̍la̍ bɛ̄ndūla̍ŋ lā bīī nu̍m, mɛ̄ɛ̍ nda̍ wūū nu̍a̍ā wānā la̍nɔ̍ ti̍a̍māa̍ nyɛ̄m nɔ̄ɔ̄lɛ̍i̍yo̍ŋ chōo̍ le̍ ndu̍ si̍ɔ̍mbu̍la̍ŋ tūsīo̍o̍ yɛ̍. I̍ cho̍ tōsā mī wāŋnda̍ kpo̍u̍ a̍ hi᷅ŋ le̍ nu̍m nūa̍a̍.

⁷Wānā o̍ wāna̍ chɔ̍ nu̍m, fāŋa᷄ŋndo̍ o̍ fa̍ŋāŋ nu̍m īkɛ̄i̍ ni̍. Ā chō dīmī āā ‘Mbɔ̄ Ni̍ni̍vɛ̄ɛ̄ pi̍ɔ̍l. Nyīɛ̍ɛ̍yīī bi̍ī wa̍nā o̍ wānā le̍ nūm te̍ Ni̍ni̍vɛ̄ɛ̄. Wānā o̍ wānā cho̍ mbō nyɔ̄ɔ̄lu̍ nu̍m, kɔ̄llo̍ ni᷄ŋ te̍.’ ”

⁸Ni̍ni̍vɛ̄ɛ̄, ā nɔ̄ o̍ kɔ̄l māā a̍ bɛ̍nda̍ ma̍ hīāū Ti̍bi̍sī, o̍ wa̍ ō tāŋgūlāā Na̍īl kɔ̄ŋgɔ̍ wo̍? Chi̍o̍o̍ ho̍ō wa̍ ō bālāā a̍ mɛ̄ŋnda̍ŋ le̍ ndu̍ māndāa̍ le̍ ya̍a̍mɔ̍ɔ̍wa̍. Mɛ̄ɛ̍ nda̍ tāŋgūl nu̍a̍ā sāāsā ka̍lā ka̍lāa̍ le̍ chi̍o̍o̍ māndāa̍ yɛ̍, le̍nde̍ mɛ̄ŋnda̍ŋ mā wa̍ mā bālāā Ti̍bi̍sī ni̍.

⁹Ti̍bi̍sī o̍ bā bɛ̄ŋgu̍ lɛ̄ŋndē I̍chi̍pīle̍ŋ lē wa̍ ni̍. Ndu̍ o̍ bā bɛ̄ŋgu̍ Īto̍o̍pīāā o̍ wa̍ ni̍. Kpāāya̍ chi̍o̍o̍ ho̍ō ndu̍ o̍o̍ nɔ̍ la̍mɛ̍ɛ̍lu̍ le̍. Wānāā ndūāā ma̍lāa̍ wa̍ lɛ̄ŋndē Pu̍tīle̍ŋ a̍ lɛ̄ŋndē Li̍bīāāle̍ŋ ni̍.

¹⁰Kɛ̍ a̍ ko̍ŋ kpo̍u̍, mi̍ ya̍a̍mɔ̍ɔ̍wa̍ bīī wāŋnda̍ Ti̍bi̍sī, ma̍ kūā a̍ nda̍ o̍ bīyɔ̄ɔ̍ ni᷄ŋ. Ma̍ bālū chūāūwāā ndāa̍ dīūwo̍ o̍ bɛ̍ɛ̄la̍ŋ kpo̍u̍, ō nda̍ bīī ko̍ ā vīɔ̄l ndu̍ o̍ pōūwo̍. Mi̍ ya̍a̍mɔ̍ɔ̍wa̍ bīī wānāā ndāā ba̍nāa̍, ma̍ wūū kōo̍ŋ le̍ nda̍ pīɔ̄ūvi̍āŋ ndo̍. Ma̍ kūā a̍ nda̍ o̍ yɔ̄lɔ᷄ŋ.

¹¹Ni̍ni̍vɛ̄ɛ̄, nūm bɛ̍ɛ̍ ā chō hūnɔ̄ɔ̄ yɔ̄nɔ᷄ŋ mɛ̄ɛ̍ mūɛ̄īya̍ŋ mā bīī nu̍a̍ā wāŋndo̍ yɛ̍. Ā chō wo̍ū. Ā chō hūnɔ̄ɔ̄ fo̍ndāa̍ nūūvīāā le̍ mā vēŋnu᷄ŋ ya̍a̍mɔ̍ɔ̍wa̍a̍ nu̍mnda̍.

¹²Nūm Ni̍ni̍vɛ̄ɛ̄, sāāsāla̍ ba̍lu̍ nu̍m le̍ nu̍m māndāa̍ la̍ŋ, lā cho̍ nyɛ᷅ o̍ nyɛ̄ le̍ ya̍a̍mɔ̍ɔ̍wa̍a̍ cho̍ hūnɔ̄ɔ̍ wa̍ le̍. Ya̍a̍mɔ̍ɔ̍wa̍ chō la̍ŋ hūnɔ̄ɔ̄ pēsi̍ pēsī o̍ bɛ̍ɛ̍ bɛ̍ɛ̍ŋ ni᷄ŋ mɛ̄ɛ̍ yɔ̄m nda̍ vēēlū āā fi̍kīi̍yo̍ wo̍ ō dīū nu̍a̍ā tē ā hīīlu̍u̍ ndɔ̍ɔ̍ ndu̍ pɛ̍ mā chīɛ̄ɛ̄lu̍ŋ yɛ̍.

¹³Wāŋnda̍ Ni̍ni̍vɛ̄ɛ̄, so̍vɛ̄i̍ya̍a̍ nyāa̍, sɔ̍ŋgɔ̍ wāŋ lāāndūa̍a̍ ko̍ni̍ nda̍ chō ni᷅ŋ ni̍. Nyɛ̄ o̍ nyɛ̄ cho̍ mbō hāu̍ ya̍a̍mɔ̍ɔ̍wa̍a̍ nyāa̍ nɛ̄īyo̍ mā kɛ̄ɛ̍ lūɛ̄īyɔ̄ɔ̄ o̍ lɛ̄ŋndē nyāle̍ŋ ni᷄ŋ te̍. Ndu̍yɛ̍ su̍lu̍ku̍lā nya̍ kīīndīa̍a̍ dīōlā sāāsāla̍ nyāla̍ŋ nda̍ŋ lā chō hūnɔ̄ɔ̄ ŋɔ̄.

¹⁴Lā na᷄ŋ pɔ̍ɔ̍ mɛ̄ŋnda̍ŋ mī lā kɛ̄si̍, kāni̍ fo̍ndōle̍, ya̍a̍mɔ̍ɔ̍wa̍a̍ nyāa̍ ā chō nya̍ hūnɔ̄ɔ̄ dɔ̄wɔ̄ɔ̄ o̍ pi̍ŋndo̍ ni᷄ŋ. Lā līnda̍ pu̍u̍lōo̍, lā nīɔ̍u̍ ndu̍ mī lā lɔ̄ɔ̄ kpi̍līki̍o̍ŋ, mī lā tōōsi̍a̍a̍ sāāsāla̍ nyāla̍ ka̍lā ka̍lāla̍ŋ nyɛ̄ kɛ̄ndɛ̄ kɛ̍ndɛ̍ī.

¹⁵Kɛ̍ mɛ̄ɛ̍ mɛ̄ɛ̍ nya̍ tōsa̍, ya̍a̍mɔ̍ɔ̍wa̍ chō hūnɔ̄ɔ̄ Ni̍ni̍vɛ̄ɛ̍ lōmɔ̄ɔ̍ mā dīu̍ nya̍ o̍ sɔ̍ŋgɔ̄ɔ̍ ni᷄ŋ. Mɛ̄ɛ̍ so̍o̍nu̍a̍a̍ ā tɛ̄ɛ̄mbūū nu̍a̍ā tɔ̄lɔ̄ɔ̍ yɛ̍, le̍nde̍ ya̍a̍mɔ̍ɔ̍wa̍ chō nya̍ tɛ̄ɛ̄mbūū ni̍, mā chīi̍ nya̍ mɛ̍u̍. Le̍la̍ŋ, lā kūi̍i̍ mī lā wa̍ fāŋgā māā lāso̍o̍nɔ̍. Lā kūi̍i̍ māā lākāmbālā.

¹⁶Lā tōsa̍ mi̍ wānāā nyāa̍ lēyākūa̍a̍ ā kūī ma̍ hīāū lōo̍ŋ chōo̍ cho̍o̍. Kɛ̍ ā pūŋga̍ nya̍ ma̍ mɛ̄ī lɛ̄ŋnde̍ŋ fo̍ndō, mɛ̄ɛ̍ so̍o̍nu̍a̍a̍ ā chīī nu̍a̍ā tɔ̄lɔ̄ɔ̄la̍ŋ tɛ̄ɛ̄mbūū mā pīɔ̍l lɛ̍.

¹⁷So̍vɛ̄i̍ya̍a̍ nyāa̍ ā chō fāŋgā māā lāso̍o̍nɔ̍. Mɛ̄ɛ̍ so̍o̍nu̍a̍a̍ ku̍ndāa̍ ā chāl nu̍a̍ā o̍ sāāsāla̍ŋ chōo̍ a̍ te̍le̍ŋ hūēīye̍, kɛ̍ tē pāa̍le̍ŋ lē fūla̍ dɔ̍ɔ̍ pɛ̍ mī hūēīye̍ kīōlu̍ nda̍ kpo̍u̍ ā pīɔ̍l lɛ̍, le̍nde̍ nda̍ pīɔ̄l ni̍ŋ ni̍, wānā si̍nā ni̍ŋ ba᷅ nda̍ hīāū wo̍ le̍.

¹⁸Māsā bɛ̍ndōo̍ Āsi̍i̍līāā, māsāā nu̍m āā būŋgāa̍, a̍ wānāā nūm a̍a̍ bɛ̍ndūa̍a̍, ā lɔ᷄l lɔ̄mā fɛ̍ɛ̍ŋ a̍ fɛ̍ɛ̍ŋ nda̍ŋ. Le̍ he̍ī, wānāā nūmnda̍ sāŋnu̍ŋ o̍ pēmbo᷄ŋ chōo̍, mɛ̄ɛ̍ sāa̍ sāŋnūŋ nu̍a̍ā yɛ̍. Ndu̍yɛ̍ wānā o̍ wānā cho̍ lɛ̍ mbō mīŋgī nda̍ nāa̍ pi᷅lɛ̍ le̍.

¹⁹Mɛ̄ɛ̍ wāŋndo̍ nɔ̄ nu̍a̍ā pāūve̍ kōo̍ma̍ nɔ̍lā ndi̍ sīŋgī le̍ yɛ̍, le̍nde̍ dɛ̍nɛ̍ nu̍m pālāa̍ cho̍ ni̍. Wānā o̍ wānā tu̍e̍ī pɛ̍ a̍ nyɛ̍ yɔ̍nu̍ŋ a̍ nūm ndo̍, bāla̍ŋ nda̍ tīām a̍ kɔ̄l kɛ̄ndɔ̄ɔ̍ ni̍, kāni̍ fo̍ndōle̍, a̍ tu̍si̍ wānāā fāŋgā fa̍ŋgā nyɛ̄ pālāa̍ chōo̍.