Read Southern Kisi Ha̍ba̍ku̍kū 1 Bible Online

Ha̍ba̍ku̍kū 1 - Southern Kisi bible

Ha̍ba̍ku̍kū 1

¹Yōōŋgū Mɛ̄lɛ̄ka̍ Ya̍a̍wɛ̄ɛ̄ o̍ chɔ̍ɔ̍mu̍u̍ nāa̍ Wāna̍ Su̍a̍ā le̍ Mɛ̄lɛ̄ka̍ wo̍ Ha̍ba̍ku̍kū chu̍a̍.

²Mi̍ Ha̍ba̍ku̍kū di̍mī āā, “O̍o̍ Mɛ̍lɛ̍ka̍ Ya̍a̍wɛ̄ɛ̄, vɛ᷅ le̍ te̍le̍ŋ vi̍lɛ̄ī ni᷅ŋ I̍ cho̍ nu̍m nyūnāa̍ le̍ ya̍ mālāa̍ kɛ̍ a̍ mu̍lī ya̍ dīōm te̍? Lɔ̍ɔ̍ le̍vi᷅l ni᷅ŋ I̍ cho̍ nu̍m dīmūllo̍ a̍ sɔ̄ɔ̍ŋ wɔ̍ɔ̍ŋ wānāā lāsɔ̍ŋgūa̍a̍ ha̍ā ā chō tōsāa̍ wo̍ŋ o̍kɔ̄ɔ̄, kɛ̍ a̍ ba̍ŋā na̍a̍ nda̍ o̍ bā le̍.

³Vɛ᷅ ma̍ chɛ̄l mi̍ nyɛ̄ pālāā su̍u̍ wa̍ā nu̍a̍ā ō tūāl la̍ chōo̍? Vɛ̍ mi̍ wāŋnda̍ wā sɔ̄ɔ̍ŋ wa̍ā nu̍a̍ā tōsāa̍ a̍ to̍sā i̍sɔ̍ɔ̍ a̍ ndi̍ o̍kɔ̄ɔ̄ le̍? Bā o̍ bā ya̍ nu̍a̍, wāŋnda̍ chō nyɔ̄ɔ̍ŋ tɛ̄ɛ̄mbūūwo̍ ma̍ wā chīēīyo̍. Sɔ̍ŋgɔ̄la̍ŋ a̍ sɛ̄ɛ̄ŋgi̍āŋnda̍ŋ lā chō lā tīūwāā bā o̍ bā.

⁴Le̍la̍ŋ, wānā o̍ wānā cho̍ lɛ̍ o̍ sāwa̍ bɛ̍ŋgu̍ le̍. Ndu̍yɛ̍, wānāa̍ kɔ̍ɔ̍sā a̍ wāŋnda̍ wa̍ ā cho̍ lɛ̍ kɔ̍ɔ̍sɔ̍ a̍ wāŋnda̍ a̍ mɛ̄ɛ̍ sāwāa̍ dīmi̍ yɛ̍ le̍. Lɔ̍ɔ̍ o̍ lɔ̍ɔ̍ wānāā wɔ̄ɔ̍ŋnda̍ ko̍ni̍ nda̍ kē di̍la̍ŋ ni̍, mā yāālā wa̍nāā kɛ̄ndīa̍a̍. Tōnya̍ o̍ tōnya̍ cho̍ lɛ̍ dīmi᷄ŋ wa᷅ŋnda̍ tɛ̄ɛ̄ŋ te̍.”

⁵O̍ ko̍ŋ kɔ̍ɔ̍lī mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl wānāā ndūa̍a̍ āā, “Lā mɛ̄ɛ̄ndi̍a̍ŋ ndɔ̍ lɛ̍ŋīi̍ ba̍lu̍ nya̍ ve̍. Tē lā chē nyɛ̍ cho̍ yɔ̄nɔ᷄ŋndo̍ wo̍ pɛ̍, kɔ̄ndɔ̄fi̍llo̍ bi̍ī nya̍ ni̍. I̍ cho̍ hūnɔ̄ɔ̄ īsɔ̄ɔ̍ tōsā o̍ te̍le̍ŋ nyāa̍ ni᷄ŋ, ā dīmūl ni̍ŋ nya̍ a̍ ndi̍ o̍kɔ̄ɔ̄ lā la̍a̍lāŋ ni̍ŋ te̍.

⁶Le̍la̍ŋ, lā ya᷄ŋ ndɔ̍ ni᷅la̍ŋ. I̍ cho̍ hūnɔ̄ɔ̄ wāŋnda̍ Ba̍bi̍lɔ̄ŋ kpāāyāa̍ kē. Ā vēsa̍ kɔ̄l. Ā chō chɔ̍ chɔ̍ le̍ lɛ̄ŋnde̍ŋ dēlɔ̄ɔ̍ chōo̍. So̍vɛ̄i̍ya̍a̍ ndāa̍ ā chō kɔ̄la̍ŋ o̍ chi̍e̍ēŋndo̍ ni᷄ŋ kpo̍u̍, mā bi̍ū fo̍ndāŋndā pi̍la̍la̍ŋ.

⁷“Wānāa̍ cho̍ o̍ lɛ̄ŋīī chēle̍ŋnde̍ ni᷄ŋ nda̍ pɛ̄ a̍ sīōōŋīī bɛ̄ndūe̍i̍ le̍ nda̍. Ā chūāŋnu̍ŋ nda̍ pi̍la̍ ā bɛ̄ndū. Ā yīya̍ŋ māā nyɛ̄ o̍ nyɛ̄ nda̍ tōsa̍ ō chō ō kɛ̄ndɛ̄.

⁸“Su̍a̍ā ndāa̍ chɔ̄ūwa̍ ā nyāānūŋ ā hīōū tāmbi̍llo̍. Ā nɔ̄ yōlɛ̄i̍ ā hīōū vīsī bīyāā yīa̍a̍ŋ mā wā ho̍ō nɛ̄īyo̍ wo̍. So̍vɛ̄i̍ya̍a̍ ndāa̍ cho̍ o̍ su̍a̍a̍ chōo̍ wa̍ ā fūla̍ o̍ lɛ̄ŋīī lēvīlle̍ ni᷄ŋ a̍ kīlta̍ bɛ̍ndūla̍ŋ, le̍ kɔ̄la̍ŋ lɛ̄ŋnde̍ dēlɔ̄ɔ̍ chōo̍. Ā chē nda̍ kīlta̍ŋ le̍ wāŋnda̍ kɔ̄la̍ŋ dēlɔ̄ɔ̍ chōo̍ pɛ̍, āā si̍a̍āŋndo̍ cho̍ tōlɔ̄ɔ̍ le̍ sɔ̄ɔ̍ chūa̍a̍ ni̍.

⁹“Nda̍ kpo̍u̍ ā chō kɔ̄la̍ŋ ā mīāā ku̍ū a̍ kɔ̄l sɔ̍ŋgɔ̄ɔ̍. Wāŋnda̍ tūēīyɔ̄ɔ̍ nda̍ tɔ̍ɔ̍ la̍nda̍ŋ, mi̍ sīōōŋīī bɛ̄ndūe̍i̍ bīī nda̍. Wānāā nda̍ bīī o̍ chɔ̄ūwo̍ wa̍, ā chu̍ū chɔ᷅m te̍.

¹⁰Māsāā bɛ̍ndūa̍a̍ bɛ̍ɛ̍ ā cho̍ nda̍ o̍ hɔ̄l nyɛ̄ o̍ nyɛ̄ le̍. Wānāa̍ cho̍ lɛ̄ŋnde̍ bōlle̍ wa̍, nda̍ bɛ̍ɛ̍ pɛ̄ɛ̄sāa̍ nda̍, mā ma᷄m nda̍. Ā yɔ᷄ŋ bɛ̍ɛ̍ āā chi̍e̍e̍ cho̍ ō bɔ̄ŋāā a̍ sāāsā ka̍lā ka̍lāa̍ wo̍, ō cho̍ nda̍ o̍ hɔ̄l nyɛ̄ o̍ nyɛ̄ le̍ bīyɔ̄ɔ̍ le̍. Pūūlōo̍ ko̍ni̍ nda̍ dēŋgēlā o̍ sāāsāla̍ŋ hōlnɔ᷄ŋndo̍ ni̍, mā kēi̍ lēchōo̍ mā kɔ̍ bi̍ī chi̍o̍o̍.

¹¹Chīīyo̍ ko̍ni̍ mā hīōū vɛ̄lɛ̄ lāchī fo̍kpī, mɛ̄ɛ̍ hūēīye̍ hīāū nu̍a̍ā yɛ̍. Kpāāya̍ ndāa̍ nda̍ tīīnda̍ŋ ni̍. Ma̍ chūā ndu̍ māā Mɛ̄lɛ̄ka̍ ndā.”

¹²Mɛ̄lɛ̄ka̍ Ya̍a̍wɛ̄ɛ̄, kāni̍ bɛ̍ɛ̍ nūm ko̍ni̍ cho̍ Mɛ̄lɛ̄ka̍ ni̍. Nu᷄m cho̍ Mɛ̄lɛ̄ka̍ nūu̍ ni̍. Nūm Mɛ̄lɛ̄ka̍ ni̍ Kāsīo̍o̍. A̍ cho̍ Mɛ̍lɛ̄ka̍ vi᷅ le̍. O̍o̍ Mɛ̄lɛ̄ka̍ Ya̍a̍wɛ̄ɛ̄, nu̍m hɛ̍li̍ wāŋnda̍ Ba̍bi̍lɔ̄ŋ ni̍, ma̍ kē nda̍ kpāāyāa̍ le̍ mā tūsi̍ na̍a̍ nyɛ̄ pālāa̍ chōo̍. Nūm na̍a̍ ŋ̄ tīīnda̍ŋ māā pōū kpo̍o̍wa̍ le̍ na̍a̍ māndāa̍ wo̍, nu᷄m ke̍ wāŋnda̍ ha̍ā kpāāyāa̍ le̍ na̍a̍ nyɛ̄ pālāa̍ tūsīo̍o̍ chōo̍ ni̍.

¹³Nūm Mɛ̄lɛ̄ka̍ cho̍ sa̍kpō wo̍, a̍ chɛ᷅l mā chē yɔ̄ŋ wɔ̄ɔ̍ŋndo̍ a̍ lēhɔ̄l te̍. A̍ nu̍ē wa᷅ŋndo̍ o̍ sɔ̄ɔ̍ŋ wɔ̍ɔ̍ŋndo̍ŋ tōsāa̍ le̍. Kɛ̍, vɛ᷅ ma̍ wā nūa̍a̍ mi̍ wānāā dɛ̍nɛ̍ wɔ̍ɔ̍ŋnda̍ ha̍ā ā wā sɔ̄ɔ̍ŋ wɔ̍ɔ̍ŋndo̍ŋ tōsāa̍? Vɛ᷅ mi̍ wānāā dɛ̍nɛ̍ wɔ̍ɔ̍ŋnda̍ ha̍ā ā wā wānāa̍ cho̍ sa̍kpō ma̍ hīāū nda̍ wa̍ tɛ̄ɛ̄mbūūwo̍, a̍ to̍sā i̍sɔ̍ɔ̍ a̍ ndi̍ o̍kɔ̄ɔ̄ le̍?

¹⁴A̍ to̍sa̍ wāŋnda̍ yɔ̄nu̍ŋ ni᷅ŋ mɛ̄ɛ̍ sūūwa̍ chō nu̍a̍ā o̍ pēēlo̍ yɛ̍, ɔ̄ɔ̄ mɛ̄ɛ̍ nyāā yōōmāā pɔ̄mbūa̍a̍ ā chō nu̍a̍ā lɛ̄ŋ yɛ̍, ā nɔ̍ māsā o̍ māsā la̍chi̍ le̍.

¹⁵Mɛ̄ɛ̍ nda̍ chūā nu̍a̍ā sūūwa̍ a̍ do̍li̍ŋnde̍ yɛ̍, le̍nde̍ Ba̍bi̍lɔ̄ŋnda̍ ha̍ā ā chō wāŋnda̍ bīūwo̍ ni̍. Ā chō nda̍ sɛ̄ɛ̄sūūwo̍, mɛ̄ɛ̍ nda̍ nāŋ nu̍a̍ā sūūwa̍ a̍ yāla̍ ŋ̄li̍īyo̍ yɛ̍. Ā chō kɔ̄l kɛ̄ndɔ̄ɔ̍ ma̍ wā kūūlīāāla̍ŋ.

¹⁶Ā chō sa̍lāla̍ŋ sōlīo̍o̍ o̍ yālāla̍ la̍ŋ mā lūām nyɛ᷅m chūŋ kɛ̄ndɔ̍ŋ o̍ la̍ŋ. Kāni̍ fo̍ndōle̍, yālāla̍ la̍ŋ la̍ ke̍ nda̍ sūllo̍ ni̍, la̍ŋ la̍ to̍sa̍ ni̍ ma̍ wā di̍o̍ kɛ̍ndɔ̄ɔ̍.

¹⁷Bāā Ba̍bi̍lɔ̄ŋnda̍ ha̍ā ā chō hīōūwɔ̄ɔ̍ lāchī a̍ wāŋnda̍ bīūwo̍ ndu̍yɛ̍ mā tɛ̄ɛ̄mbūū lɛ᷅ŋnde̍ tɛ̄ɛ̄mbūū kɔ̄l vēsɛ̍i̍ wa̍ā le̍nde̍ le̍ fɛ̍ɛ̍ŋ a̍ fɛ̍ɛ̍ŋ?