Read Southern Kisi Ha̍ba̍ku̍kū 2 Bible Online

Ha̍ba̍ku̍kū 2 - Southern Kisi bible

Ha̍ba̍ku̍kū 2

¹I̍ cho̍ hēlɔ̄ɔ̄ o̍ bāndu̍ nūu̍ chōo̍ te̍mā, mī chu̍m mī tu̍e̍ī nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ cho̍ ya̍ dīmūl lo̍, ndu̍yɛ̍ mī tu̍e̍ī mɛ̄ɛ̍ o̍ cho̍ ya̍ dīōm mūlī a̍ ŋɔ̄ɔ̄chīa̍ŋ ya̍ I̍ ŋɔ̍ɔ̍chi̍a̍ŋ nāa̍ ndu̍ chu̍a̍ wo̍ yɛ̍.

²Mi̍ Mɛ̄lɛ̄ka̍ Ya̍a̍wɛ̄ɛ̄ o̍ mu̍lī ya̍ dīōm āā, “Po̍o̍nyi̍a̍a̍ sɔ̍ɔ̍ŋ ya̍ I̍ cho̍ nu̍m chɔ̄m o̍ yi̍lāŋndo̍ ni᷄ŋ ndo̍ŋ. Po̍o̍nyi̍a̍a̍ mu̍ŋ o̍ yɛ̍ndɛ̍la̍ŋ chōo̍ do̍kōlō dōkōlō, mī ŋ̄ wa̍ bɛ̍ɛ̍ŋ bɛ̍ɛ̍ŋ le̍ chɔ̄ɔ̍.

³Po̍o̍nyi̍a̍a̍ sɔ̍ɔ̍ŋ mu̍ŋ, kāni̍ fo̍ndōle̍, te̍le̍ŋ ŋ̍ nɔ̍ le̍ yɔ̄nɔ᷄ŋndo̍ wo̍ ō fūūlu̍u̍ wɔ̍ le̍. Kɛ̍ sɔ̄ɔ̍ŋ mu᷅ŋ chō yɔ̄nɔ᷄ŋ chɔ̍ chɔ̍. Nyɛ̄ ya̍ I̍ chɔ̍m nu̍m ho̍ō wo̍ chō yɔ̄nɔ᷄ŋ. Le̍la̍ŋ ā yɔ᷄ŋ bɛ̍ɛ̍ mī te̍le̍ŋ ko̍ŋ vīōū nūm o̍ hɔ̄l, bi̍u̍nu̍ŋ mā chu̍m. Ŋ̄ chō yɔ̄nɔ᷄ŋ, ŋ̄ do̍o̍nūŋ ni̍ŋ ta̍ma̍la̍ le̍ yɔ̄nɔ᷄ŋndo̍ le̍.

⁴Yōōŋgū ko᷄ŋ cho̍ ho̍ō ni̍. Wānāa̍ cho̍ sa̍kpō Mɛ̄lɛ̄ka̍ o̍ hɔ̄l te̍ wa̍, ā chō pīɔ̍mndo̍ sɔ̄lā. Kɛ̍ wānāa̍ cho̍ sa̍kpō Mɛ̄lɛ̄ka̍ o̍ hɔ̄l la̍, nda̍ chō wā yōōmū. Kāni̍ fo̍ndōle̍, le̍ mɛ̄ɛ̍ nda̍ dɔ̄ū tīīnda᷄ŋ ndāa̍ o̍ Mɛ̄lɛ̄ka̍ ni᷄ŋ yɛ̍.”

⁵Sūllo̍ chō nyɛ̍ hu̍i̍i̍ wānā. Wāŋnda̍ ha̍ā ā chō wānāā yōŋgāā bɛ̍ndū. Le̍la̍ŋ, ā vi̍ū a̍chāl te̍. Mɛ̄ɛ̍ chi̍e̍e̍ pīɔ̍m pe᷅ a̍ wāŋ vīlɛ̍i̍ya̍ le̍ yɛ̍, le̍nde̍ yēēma̍ŋ wāŋnda̍ ha̍ā ŋ̄ chō ni̍, ŋ̄ pe᷅ le̍. Le̍la̍ŋ nda̍ chō hīōūwɔ̄ɔ̍ lāchī a̍ lɛ̄ŋīī fāŋgā fa̍ŋgɛ̄i̍ dēlɔ̄ɔ̍ chōo̍ ni̍, mā yām ndi̍, mā sīīŋgūū wa̍nāā kāŋ kpo̍u̍ chi̍a̍ā ndā.

⁶Kɛ̍ ndu̍yɛ̍, wānāā nda̍ bīī ka̍ŋ o̍ chɔ̄ūwo̍ wa̍ ā chō nda̍ hūnɔ̄ɔ̄ mīīŋgū māmɔ̄ɔ̄, mā sīīŋgu̍u̍ nda̍ nyɛ̄ fo̍ndō fu̍u̍. Ā chō nda̍ hūnɔ̄ɔ̄ dīmūl āā, “Nyɛ̄ pālāa̍ chō le̍ nya̍, nya̍ wa̍ pāāndū nyɛ̄m pi̍la̍ŋ pūŋgāa̍ mī lā dēŋgēlā mu̍ŋ o̍ lā nya̍ lo̍ chi̍ɛ̍ī ni̍ŋ nda̍. Lā tōsa̍ mi̍ lā sūl a̍ nyɛ̄m sɔ̄lāŋ nya̍ kīndīlā wa᷅ŋnda̍, mī lā pōōndīāā nda̍ o̍ lābā wo̍ŋ. Kɛ̍ ke̍ŋ hi᷅ŋ mɛ̄ɛ̄lū.”

⁷Wānāā nya̍ pōōndi̍a̍a̍ ka̍ni̍o̍ŋ o̍ lābā wa̍ ā chō hūnɔ̄ɔ̄ nya̍ sīmūl o̍ lē pīlɛ̍ ni᷄ŋ kpe̍. Ā chō nyɛ̄ nya̍ wa̍ tōsāa̍ wo̍ tāāsi̍ dɔ̄wɔ̄ɔ̍ mā wōōlu̍ nya̍, mī lā nyīīya̍ a̍ sīōōŋnde̍. O̍ ko̍ŋ kɔ̍ɔ̍lī, ā chō hūnɔ̄ɔ̄ nyɛ̄m nyāa̍ŋ pūŋgā kpo̍u̍ mā kūɛ̄nu᷄ŋ a̍ mu̍ŋ.

⁸Lā pūŋga̍ lɛ̄ŋīī bɔ̄ɔ̍ bɔ̍ɔ̍, kɛ̍ nya̍ bɛ̍ɛ̍ wānāa̍ chi̍nda̍ o̍ lɛ̄ŋīī kēŋ ni᷄ŋ nda̍ ā chō nyɛ̄m nyāa̍ŋ pūŋgā. Sa̍bū ke̍ŋ cho̍ yɔ̄nɔ᷄ŋ a̍ nya̍ wo̍ cho̍ ni̍ māā, le̍ wāŋnda̍ chi̍e̍e̍ya̍a̍ nya̍ dīu̍ dīū bɛ̄ndōo̍ wa̍, a̍ le̍ sɔ̄ɔ̍ŋ wɔ̍ɔ̍ŋ nya̍ tōsa̍l wāŋnda̍ o̍ lɛ̄ŋīī bɔ̄ɔ̍ bɔ̍ɔ̍ ni̍ŋ a̍ o̍ chi̍e̍e̍ŋ bɔ̍ɔ̍ bɔ̍ɔ̍ wo̍ŋ.

⁹Nyɛ̄ pālāa̍ chō le̍ nya̍, nya̍ su̍li̍ ha̍ā yu̍ŋgu̍la̍ nyāla̍ŋ a̍ nyɛ̄m lāka̍fāŋ nya̍ pōōndīāā wa᷅ŋnda̍ o̍ lābā wo̍ŋ nda̍. Mɛ̄ɛ̍ kōya᷄ŋndo̍ tāŋgūl nu̍a̍ā wāa̍ŋndē ndɔ̄le̍ŋ o̍ pēmbīī bɛ̄ndūe̍i̍ chōo̍ yɔ̄ŋi̍ nyɛ̄ o̍ nyɛ̄ yɔ̄nu̍ŋ a̍ ndu̍ yɛ̍, le̍nde̍ nya̍ yīya̍ŋ ni̍ māā lā chō nya̍ pi̍la̍ māndāa̍, māā nyɛ̄ yɔ̍nūŋ a̍ nya̍ le̍.

¹⁰Kɛ̄ɛ̄sīāā wɔ̄ɔ̍ŋ nya̍ kɛ̄ɛ̄si̍a̍a̍ le̍ wāŋnda̍ tɛ̄ɛ̄mbūūwo̍ wo̍ tōsa̍, mi̍ si̍ɔ̍mbu̍la̍ŋ lā tūāl yu̍ŋgu̍la̍ nyāla̍ŋ chōo̍. Le̍ he̍ī, lā chō hūnɔ̄ɔ̄ pīɔ̍mndo̍ sɔ̄lā.

¹¹Kpi̍līki᷅ŋ nya̍ tāŋgu̍l chīɛ̄īlā nyāla̍ŋ ndo̍ŋ bɛ̍ɛ̍, ŋ̄ chō nya̍ hūnɔ̄ɔ̄ yāālā le̍ nyɛ̄ nya̍ tōsa̍ wo̍. Ndu̍yɛ̍ mī yɔ̄mīī nya̍ chu̍a̍ yīndɔ̄la̍ŋ nde̍, ī chɛ̄la᷅ŋ māā lā wɔ̄u̍.

¹²Nyɛ̄ pālāa̍ chō le̍ nya̍, nya̍ ki̍la̍ ha̍ā chi̍e̍e̍ŋ nyāa̍ŋ a̍ wāŋnda̍ sɔ̄ɔ̍ŋ wɔ̍ɔ̍ŋndo̍ŋ tōsāllo̍, mi̍ lā tāŋgūl mu̍ŋ a̍ wāŋndā chīe̍e̍ya̍ dīū wo̍ wa̍.

¹³Wānāā nya̍ bīī o̍ chɔ̄ūwo̍ wa̍ ā tōsa̍ wa̍li̍ fo̍ndō fu̍u̍. Ā sāāŋgi̍a̍a̍ nda̍ pi̍la̍ fu̍u̍. Nyɛ̄ o̍ nyɛ̄ nda̍ tēŋgu̍l nya̍ ŋ̄ chō hūnɔ̄ɔ̄ ŋɔ̄. Mɛ̄lɛ̄ka̍ Ya̍a̍wɛ̄ɛ̄ nɔ̍ kpāāyāa̍ kpo̍u̍ wo̍, ndu̍ cho̍ he̍ī tōsā ni̍.

¹⁴Mɛ̄ɛ̍ mɛ̄ŋnda̍ŋ mā chō nu̍a̍ā chō bɛ̄ndōo̍ o̍ pēe̍ mɛ̄ŋmā īhɛ᷄llo̍ yɛ̍, le̍nde̍ chi̍e̍ēŋndo̍ kpo̍u̍ a̍ si̍nā ni̍ŋ a̍ mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ cho̍ wāna̍ kpāāyā yɛ̍ ni̍.

¹⁵Nyɛ̄ pālāa̍ chō le̍ nya̍. Kāni̍ fo̍ndōle̍, le̍ mɛ̄ɛ̍ nya̍ kōsi̍ lɛ̄ŋīi̍ ba̍lu̍ nya̍ ve̍ mūɛ̄īmā nyā ma̍ ma̍ŋ yɛ̍. Ko̍ŋ cho̍ ni̍, kɔ̍l nyā tu̍ūwo̍. Lā tōsa̍ mi̍ mā bīī nda̍, mi̍ lā chā nda̍ tūmndā fo̍ndō, mi̍ si̍ɔ̍mbu̍la̍ŋ lā tūāl nda̍.

¹⁶Nya̍ bɛ̍ɛ̍ si̍ɔ̍mbu̍la̍ŋ lā chō nya̍ hūnɔ̄ɔ̄ tōlɔ̄ɔ̄. Bɛ̄ɛ̄le̍ nyāle̍ŋ lē chō chūwɔ̄ɔ̄. Nya̍ bɛ̍ɛ̍ lā chō mūɛ̄īmā māŋ kōlɔ̄ɔ̄ mī mā bīī nyā. Mɛ̄lɛ̄ka̍ Ya̍a̍wɛ̄ɛ̄ o̍ cho̍ nya̍ mūɛ̄īmā nyā ma̍ ma̍ŋ kōsī. Ko̍ŋ cho̍ ni̍, nyɛ̄ pālāā o̍ tu̍sī ni̍ŋ nya̍ chōo̍ wo̍. Bɛ̄ɛ̄le̍ wāŋnda̍ nda̍ a̍a̍ nɔ̍ le̍ nya̍ le̍ŋ, lē chō hūnɔ̄ɔ̄ chūwɔ̄ɔ̄. Si̍ɔ̍mbu̍la̍ŋ lā chō nya̍ hūnɔ̄ɔ̄ bīyɔ̄ɔ̄.

¹⁷Lā tɛ̄ɛ̄mbu̍u̍ būndɔ̍ɔ̍ Le̍ba̍nɔ̄ŋ, kɛ̍ nya̍ bɛ̍ɛ̍ wāŋnda̍ hīŋ nya̍ tɛ̄ɛ̄mbūū. Lā tɛ̄ɛ̄mbu̍u̍ vīsīa̍a̍ wa̍ lo̍ŋ nda̍, kɛ̍ vīsīa̍a̍ chō nya̍ sīōōŋnde̍ lūēī. Sa̍bū ke̍ŋ cho̍ yɔ̄nɔ᷄ŋ a̍ nya̍ wo̍ cho̍ ni̍, māā le̍ wāŋnda̍ chi̍e̍e̍ya̍a̍ nya̍ dīu̍ dīū bɛ̄ndōo̍ wa̍, a̍ le̍ sɔ̄ɔ̍ŋ wɔ̍ɔ̍ŋ nya̍ tōsa̍l wāŋnda̍ o̍ lɛ̄ŋīī bɔ̄ɔ̍ bɔ̍ɔ̍ ni᷄ŋ a̍ o̍ chi̍e̍e̍ŋ bɔ̍ɔ̍ bɔ̍ɔ̍ wo̍ŋ.

¹⁸Nyɛ̄m wāŋnda̍ sōōlūū māā Mɛ̄lɛ̄ka̍ ndā wo̍ŋ, tɔ̄nɔ̍ yɛ̄ɛ̍nɛ̍ ŋ̍ nɔ̍ yɛ̍? Ŋ̄ nɔ̍ tɔ̍nɔ̄ o̍ tɔ̄nɔ̄ le̍. Ŋ̄ chō māchūāā nyɛ̄m wāna̍ chīo̍o̍ tōōsi̍a̍a̍ wo̍ŋ. Chōōla̍ŋ ko̍ni̍ ŋ̍ di̍mūl wa̍nā ni̍. Wānāa̍ to̍o̍sīāā nyɛ᷅m mu᷅ŋ nda̍, tɔ̄nɔ̍ yɛ̄ɛ̍nɛ̍ nda̍ sɔ̄lā yɛ̍ o̍ mu᷅ŋ tīīnda᷄ŋndo̍ ni᷄ŋ? Tɔ̄nɔ̄ o̍ tɔ̄nɔ̄ ā sɔ̍lā o̍ mu̍ŋ ni᷄ŋ te̍. Kāni̍ fo̍ndōle̍, Mɛ̄lɛ̄ka̍ā su̍ū le̍ wa̍ nda̍ chō ni̍.

¹⁹Nyɛ̄ pālāa̍ chō le̍ nya̍, nya̍ di̍mūl ha̍ā nyɛ̄m nya̍ tōōsi̍a̍a̍ ā yɔ̄mndo̍ wo̍ŋ āā, “Ti̍o̍ndu̍,” mī lā dīmu̍l nyɛ̄m nya̍ tōōsi̍a̍a̍ a̍ pōūwo̍ wo̍ŋ, āā, “Chɔ̍ŋ,” nda̍. Lā nɔ̄ o̍ kɔ̄l nyɛ̄m mu᷅ŋ o̍ chɔ̄m wa̍nā nyɛ᷅ o̍ nyɛ̍? Mi̍ chē bɛ̍ɛ̍ tē ā tōōsi̍a̍a̍ mu᷅ŋ pɛ̍ ā tēēŋgi̍a̍a̍ ko̍o̍līi̍ye̍ ɔ̄ɔ̄ ka̍ni̍i̍ hu̍mbūe̍i̍ ā tāāli̍a̍a̍ mu̍ŋ chōo̍ kpo̍u̍, kɛ̍ ŋ̄ cho̍ yo̍o̍mū le̍.

²⁰Kɛ̍ ndu̍yɛ̍, Mɛ̄lɛ̄ka̍ Ya̍a̍wɛ̄ɛ̄ ndu̍ ndu̍, ō chō o̍ chīɛ̄ī ndɔ̍ kāsīo̍o̍ ni᷄ŋ ɛ̄chɛ̍nɛ̄. Le̍la̍ŋ nya̍ wāŋnda̍ chi̍e̍ēŋndo̍ kpo̍u̍, lā mēi̍ ndu̍ o̍ hɔ̄l, mī lā ya᷄ŋ ndu̍ nīla̍ŋ.