Read Southern Kisi Ha̍ba̍ku̍kū 3 Bible Online

Ha̍ba̍ku̍kū 3 - Southern Kisi bible

Ha̍ba̍ku̍kū 3

¹Pīɛ̄īlē wāna̍ su̍a̍ā le̍ Mɛ̄lɛ̄ka̍ wo̍ Ha̍ba̍ku̍kū o̍ pīɛ̍i̍ le̍ŋ le̍ cho̍ le᷅ŋ ni̍.

²O̍o̍ Mɛ̄lɛ̄ka̍ Ya̍a̍wɛ̄ɛ̄, I̍ tu̍e̍ī a̍ wa̍lta̍ ŋ̄ tōsa̍ la̍ŋ. Le̍ he̍ī, kɔ̄ndɔ̄fi̍llo̍ chō ya̍ bɔ̄ɔ̍ a̍ wa̍lta̍ nu̍mnda̍ŋ. Mi̍ŋgi̍ wa̍lta̍ la̍ŋ vɛ̄lɛ̄ tōsā o̍ pālɛ̍i̍ nɛ̄i̍ he̍ī ni᷄ŋ. To̍sa̍ la̍ŋ vɛ̄lɛ̄ o̍ te̍le̍ŋ nāa̍ ni᷄ŋ. Ā yɔ᷄ŋ bɛ̍ɛ̍ āā mī ŋ̄ tōsa̍ īsɔ̄ɔ̍ mā dɔ̄ɔ̄nu᷄ŋ tu̍mbe̍ a̍ na̍a̍, yāndi̍i̍ tūīīnu̍ŋ na̍a̍ īnyīɛ̍ɛ̍ fɔ̍.

³Mɛ̄lɛ̄ka̍ chō hūnɔ̄ɔ̍. Ō chō fūlāa̍ o̍ lɛ̄ŋndē I̍dɔ̄mnde̍ŋ ni᷄ŋ. Mɛ̄lɛ̄ka̍ kāsīo̍o̍ ō chō fūlāa̍ o̍ pēmbīī pa̍lūāŋnde̍ chōo̍. Nāŋɔ̄ɔ̄ ndɔ̄ bɛ̍ndōo̍ kūmbū ha̍la̍a̍ kpo̍u̍. Chi̍e̍ēŋndo̍ kpo̍u̍ ā chō ndu̍ sāŋgālāa̍.

⁴Wānā che᷅ yēlēŋ ye̍le̍ŋ ndɔ̄ɔ̍ pɛ̍ āā nyɛ̄ ŋūāla̍lɛ̍īyo̍ ni̍. Pa̍ŋgēle̍ bɛ̄ndōo̍ chō ndu̍ fūlāa̍ o̍ bā, lo̍ŋ o̍ ve᷅ŋ kpāāya̍ ndɔ̄ɔ̍ ni̍.

⁵Ō yɔ᷄ŋ nāāla̍ŋ mi̍ lā wā kɔ̄la̍ŋ ndu̍ lāchī, mbo̍ dīmūl pīɔ̍mndo̍ mi̍ ndu̍ wa᷅ hūnɔ̄ɔ̍ ndu̍ a̍ mākɔ̄ɔ̄.

⁶Tē ō sīm pɛ̍ chi̍e̍ēŋndo̍ hīīlu̍ŋ kpo̍u̍. Tē o̍ nu̍a̍ pɛ̍ nyɔ᷅ wāŋnda̍ ā nyīīya̍. Pēmbūŋ bɛ̄ndūŋ māsīndɛ̄ si̍ndɔ᷄ŋ kpo̍u̍ mī ŋ̄ tɛ̄ɛ̄ndi̍a̍a̍, mī pēmbūŋ pɔ̄mbɔ̄ŋ pāāndū pa̍a̍ndo᷄ŋ ŋ̄ lūɛ̄ī lɛ̄ŋ, pēmbūŋ pɔ̄mbɔ̄ŋ ndu̍ o̍o̍ ba̍lū si̍ndɛ̄ chōo̍ wo̍ŋ.

⁷I̍ che᷅ mi̍ wāŋnda̍ Ku̍sīāŋ a̍ pi̍ā a̍ sīōōŋīī bɛ̄ndūe̍i̍ o̍ tɛ̍ndīi̍la̍ ndāla̍ŋ ni᷄ŋ. Wāŋnda̍ Mi̍dīāŋ a̍ cho̍ nyīīyāa̍ o̍ fo̍ndāŋndā ndāla̍ŋ.

⁸Mɛ̄lɛ̄ka̍ Ya̍a̍wɛ̄ɛ̄, bāā a̍ pēēla̍ bɛ̄ndūla̍ŋ nūm o̍o̍ dɔ̍ɔ̍nu᷄ŋ tu̍mbe̍ ni̍, ɔ̄ɔ̄ a̍ pēēla̍ pɔ̍mbɔ̄la̍ŋ? Bāā a̍ Pēe̍ Mɛ̄ŋmā Īhɛ᷄llo̍ nūm o̍o̍ dɔ̍ɔ̍nu᷄ŋ tu̍mbe̍ ni̍, hūnɔ̄ɔ̄ ŋ̄ wa̍ o̍ ha̍la̍a̍ ni᷄ŋ le̍ wānāā nūmnda̍ bāŋāa̍ wo̍, wānāa̍ cha᷅ ko̍ bɛ̍ɛ̍ āā o̍ nyɛ̄lā su̍a̍a̍ ā nāŋnda̍ŋ chōo̍ ŋ̍ wa̍ ni̍?

⁹Ma̍ sōlī chīɔ̄ūwo̍ o̍ bōo̍ ndɔ̄ɔ̍ŋ ni᷄ŋ, ma̍ pēī chīŋɔ̍ma̍ nu̍mnda̍ŋ o̍ bɔ̄lɔ̍ māchīŋɔ̄ɔ̍ ni᷄ŋ le̍ sɔ̍ŋgɔ̄ɔ̍. Mā tōsā mi̍ mɛ̄ŋnda̍ŋ mā būlī lɛ̄ŋ mi̍ pēēla̍ŋ lā hīnī kpa̍la̍ŋ.

¹⁰Pēmbūŋ bɛ̄ndo᷄ŋ chɔ̄ɔ̍ nu̍m nyɔ᷅, mi̍ ŋ̄ nyīīyā. Mi̍ mɛ̄ŋnda̍ŋ mā wā hīōūwɔ̄ɔ̍ kpu̍ū o̍ pēēla̍ŋ. Mi̍ mɛ̄ŋnda̍ŋ o̍ Pēe̍ Mɛ̄ŋmā Īhɛ᷄llo̍ mā hēl ku̍lta̍ bɛ̄ndūla̍ŋ, mī mā dēl a̍ bɔ̄ɔ̄lūū bɛ̄ndōo̍.

¹¹Pāa̍le̍ŋ a̍ pāŋge̍i̍ ā si᷄m yi̍ o̍ ha̍la̍a̍ ni᷄ŋ a̍ īpi̍li̍kū pi̍li̍kūe̍i̍, a̍ īŋūāla̍lɛ̍ī ŋūāla̍lɛ̍ī chīŋɔ̍ma̍ nu̍mnda̍ŋ mā chō ve̍. Ā si̍m yi̍ a̍ īpi̍li̍kū pi̍li̍kūe̍i̍, a̍ īŋūāla̍lɛ̍ī ŋūāla̍lɛ̍ī ba̍lta̍ nu̍mnda̍ŋ lā chō ve̍.

¹²Mɛ̄ɛ̍ ŋ̄ dɔ̄ɔ̄nu᷄ŋ tu̍mbe̍ ma̍ kēēkū o̍ chi̍e̍ēŋndo̍ ni᷄ŋ, ma̍ tūsī lɛ̄ŋnde̍ nyɛ̄ pālāa̍ chōo̍ a̍ tu̍mbe̍ bɛ̍ndōo̍.

¹³Ā hīŋ le̍ wānāā nūmnda̍ bāŋāa̍, a̍ yu̍ŋgu̍ nu̍m ŋ̄ hɛ̄li̍ wo̍. A̍ tu̍si̍ wānāā cho̍ wānāā dɛ̍nɛ̍ wɔ̍ɔ̍ŋnda̍ bōlle̍ wa̍ nyɛ̄ pālāa̍ chōo̍, mā chīī a̍ nda̍, a̍ wānāa̍ wa̍ ndu̍ kɔ̄ɔ̄lī wa̍ kpo̍u̍.

¹⁴Ā vɛ̄ wāna̍ cho̍ so̍vɛ̄i̍ya̍a̍ ndūa̍a̍ bōlle̍ŋ ndo̍ a̍ ba̍l ndɔ̍ ndu̍ pi̍la̍a̍. So̍vɛ̄i̍ya̍a̍ ndūa̍a̍ nda̍ a̍a̍ hi᷅ŋ a̍ kpāāyā bɛ̍ndōo̍ le̍ na̍a̍ sɛ̄ŋīo̍o̍, ā wa̍ hūnɔ̄ɔ̍ a̍ nya̍a̍lo̍o̍ mɛ̄ɛ̍ wānāa̍ tu̍sī wa̍nāā tāmbɛ̍i̍ya̍ nyɛ̄ pālāa̍ chōo̍ sɔ̍ɔ̍ sɔ̍ɔ̍ wa̍ ā tōsā yɛ̍.

¹⁵Mɛ̄ɛ̍ ŋ̄ kēēku̍ o̍ Pēe̍ Mɛ̄ŋmā Īhɛ᷄llo̍ chōo̍ o̍ su̍a̍ā nūmnda̍ chōo̍, mi̍ mɛ̄ŋnda̍ŋ mā kpūlūŋīa̍ŋ, mi̍ mā hīīlu᷄ŋ yo̍kpa᷄ŋ yo̍kpa᷄ŋ.

¹⁶I̍ tu̍e̍ī bɔ̄ɔ̄lūū bɛ̄ndū kōŋ, ndu̍yɛ̍ mi̍ nyi̍i̍yā a̍ sīōōŋnde̍. Mi̍ chɔ̄chɔ᷄ŋ yā ya̍ kpe̍ kpe̍. Dīāllo̍ŋ kpo̍u̍ mi̍ ŋ̄ wū ya̍. Mi̍ pēlo̍ŋ yā ya̍ pi̍ā pīā. Kɛ̍ ndu̍yɛ̍, I̍ cho̍ bīu̍ŋ mī chu̍m wānāa̍ de̍l na̍a̍ chōo̍ a̍ sɔ̍ŋgɔ̄ɔ̍ wa̍ mī te̍le̍ŋ Mɛ̄lɛ̄ka̍ chō hūnɔ̄ɔ̄ nda̍ nyɛ̄ pālāa̍ tūsī chōo̍ wo̍ fūūlu̍u̍.

¹⁷Ā yɔ᷄ŋ bɛ̍ɛ̍ mī fi̍kīi̍ya̍ŋ mā ve̍ lɛ̍ kōmɔ̄ɔ̄ le̍, ɔ̄ɔ̄ mī kīle̍pīi̍ya̍ŋ mā pɛ̄ŋgi̍ kōmɔ̄ɔ̍, ā yɔ᷄ŋ bɛ̍ɛ̍ mī yɔ̄mīī ɔ̄li̍fīi̍ye̍ ī ve̍ lɛ̍ mā ɔ̄li̍fīi̍ kōmɔ̄ɔ̄ le̍, ndu̍yɛ̍, ā yɔ᷄ŋ bɛ̍ɛ̍ mī nyɛ̄ o̍ nyɛ̄ ve̍ lɛ̍ nāŋɔ̄ɔ̄ o̍ chīɔ̍ɔ̍ŋ te̍, sāa̍ chūu̍ bɛ̍ɛ̍ kpo̍u̍, kɛ̄lɛ̄ŋgāā mī chɔ̄lū o̍ chɔ̄lū ve̍ lɛ̍ o̍ nāa̍ ma̍ndāā lā chɔ̄lūa̍a̍ le̍,

¹⁸I̍ wa᷅ a̍ nya̍a̍lo̍o̍ a̍ Mɛ̄lɛ̄ka̍ Ya̍a̍wɛ̄ɛ̄, I̍ wa̍ a̍ kɔ̄l kɛ̄ndɛ̄ a̍ Mɛ̄lɛ̄ka̍ chi̍i̍ndi̍a̍a̍ ya̍ wo̍.

¹⁹Mɛ̄lɛ̄ka̍ Ya̍a̍wɛ̄ɛ̄ Kpu̍lu̍ŋgūma̍ Bɛ̄ndōo̍ ndu̍ ke̍ ya̍ dīāllūŋ kāla᷄ŋ ni̍. Mbō lūe̍i̍ ya̍ kpāāyāa̍ mɛ̄ɛ̍ kīa̍llo̍ wā nu̍a̍ā yɛ̍. I̍ he̍l bɛ̍ɛ̍ pēmbūŋ vīlɛ̄īyo̍ŋ, I̍ de᷅l te̍.