Read Southern Kisi Sɛ̄fāna̍yā 1 Bible Online

Sɛ̄fāna̍yā 1 - Southern Kisi bible

Sɛ̄fāna̍yā 1

¹Wɔ̄sī Chōōsa̍yā, po̍ A̍mɔ̄ŋ ndo̍ wa̍ māsāa̍ le̍ Chu̍dā wo̍, wɔ̄sī kōŋ Mɛ̄lɛ̄ka̍ Ya̍a̍wɛ̄ɛ̄ o̍ ka̍ndu̍ sūɛ̍i̍ nāa̍ ya̍ Sɛ̄fīna̍yā, po̍ Ku̍sī wo̍ chu̍a̍ ni̍. Ku̍sī ko̍ŋ yɛ̄, fi̍nyā ndɔ̍ wa̍ Kɛ̄dɛ̄la̍yā ni̍. Mi̍ Mɛ̄lɛ̄ka̍ Ya̍a̍wɛ̄ɛ̄ di̍mūl la̍ āā,

²“I̍ cho̍ hūnɔ̄ɔ̍ nyɛ̄ o̍ nyɛ̄ cho̍ o̍ chi̍e̍ēŋndo̍ ni᷄ŋ tɛ̄ɛ̄mbūū. Vīsī ni̍, wāna̍ chi̍e̍e̍ ni̍, a̍ nyɛ̄ o̍ nyɛ̄ fe̍e̍ yōōmu̍ fo̍kɛ̄, mī bāsu̍ ndu̍ tɛ̍ɛ̍.”

⁴Mī Mɛ̄lɛ̄ka̍ hīāū lāchī a̍ sūɛ̍i̍ nāa̍ ya̍ chu̍a̍ mbō dīmī āā, “I̍ cho̍ wāŋnda̍ Chu̍dā a̍ wānā o̍ wānā cho̍ īchāli̍ Chūlu̍sɛ̄lɛ̄m, o̍ wa̍ wānā chi̍e̍e̍ ɔ̄ɔ̄ chɔ̄lū ni̍, a̍ nyɛ̄ o̍ nyɛ̄ cho̍ nyɛ̄ yōōmāa̍ nyɛ̄ pālāa̍ tūsī chōo̍. Mi̍ tɛ̄ɛ̄mbu̍u̍ vɛ̄lɛ̄ wānā o̍ wānā sōōlūū Bāāl māā Mɛ̄lɛ̄ka̍ ndɔ̄, a̍ māsāā ndūāā so̍līāā lāsa̍lāa̍,

⁵ndūyɛ̍ mī I̍ tɛ̍ɛ̍mbu̍u̍ wānāa̍ he᷅l o̍ chīɛ̄īla̍ŋ tūllo̍ cho̍o̍ le̍ mɛ̄lɛ̄ka̍ nda̍ le̍pāa̍ wo̍, a̍ mɛ̄lɛ̄ka̍ nda̍ īpāŋgo̍o̍, a̍ mɛ̄lɛ̄ka̍a̍ nda̍ ŋ̄lōo̍ sōōlūūwo̍ wa̍. Wānā o̍ wānā chūā būŋgɛ̄i̍ le̍ ya̍ sōōlūū wo̍, kɛ̍ ndu̍yɛ̍ vɛ̄lɛ̄ mbo̍ sōōlūū mɛ̄lɛ̄ka̍ nda̍ vēēlu̍ a̍a̍ mɛ̄lɛ̄ka̍ mo̍lɛ̍kī ndo̍, Ī cho̍ nda̍ tɛ̄ɛ̄mbūū pa̍ku̍.

⁶Wānā o̍ wāna̍ mu̍li᷄ŋ ndu̍yɛ̍ ma̍ kɛ̄ɛ̄ le̍ ya̍ tōlɔ̄ɔ̍ kɔ̄ɔ̄lī, a̍ wānā o̍ wānā kɛ̍ɛ̍ le̍ hūnɔ̄ɔ̍ nāa̍ ya̍ chu̍a̍ mā nyūna̍ le̍ mī ma̍nda̍ nda̍, nda̍ bɛ̍ɛ̍ I̍ cho̍ nda̍ tɛ̄ɛ̄mbūū.

⁷“Lā mēi̍ do̍ŋdo̍ŋ Mɛ̄lɛ̄ka̍ Ya̍a̍wɛ̄ɛ̄ o̍ hɔ̄l, kāni̍ fo̍ndōle̍, pāa̍le̍ o̍ cho̍ hūnɔ̄ɔ̄ le̍ kɔ̍ɔ̍sɔ̍ɔ̍ a̍ wāŋnda̍ o̍ chi̍e̍ēŋndo̍ chōo̍ le̍ŋ, lē chō ni᷅ŋ kpɛ̍ɛ̍lūŋ. Mɛ̄lɛ̄ka̍ Ya̍a̍wɛ̄ɛ̄ o̍ bɛ̍ɛ̍ndi̍a̍ŋ le̍ mbō sōli̍ wānāā ndūa̍a̍ o̍ ve̍e̍lu̍, mbo̍ dīndī wa̍ sa̍lā.

⁸Ndu̍yɛ̍, o̍ pāa̍le̍ o̍ wa᷅ ni̍ŋ sa̍lā kōŋ sōlīo̍o̍ le̍ŋ chōo̍, mi̍ Mɛ̄lɛ̄ka̍ Ya̍a̍wɛ̄ɛ̄ di̍mī māā, o̍ cho̍ lāŋgba̍ā kāla̍ a̍ chūāūwāā pīāāndūa̍a̍ Māsā Bɛ̍ndōo̍, ndu̍yɛ̍ a̍ wānā o̍ wāna̍ to᷅l ka̍ālā lā sūmīālta̍ŋ kɔ̄ɔ̄lī ma̍ wā la̍ŋ tōsāa̍ wa̍ dɛ̍nɛ̍ pa̍lāa̍ tūsī chōo̍.

⁹O̍ pāa̍le̍ le̍ŋ chōo̍, I̍ cho̍ wānā o̍ wānā cho̍ mɛ̄lɛ̄ka̍ā chēle̍ŋ nda̍ sōōlūūwo̍, ndu̍yɛ̍ ma̍ wā kɔ̄la̍ŋ a̍ mɛ̄lɛ̄ka̍ā ndāā ka̍ŋ, a̍ nyɛ̄m nda̍ pūŋga̍ wo̍ŋ o̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ ni᷄ŋ nda̍, dɛ̍nɛ̍ pa̍lāa̍ tūsī chōo̍.”

¹⁰“Ya̍ Mɛ̄lɛ̄ka̍ Ya̍a̍wɛ̄ɛ̄ chu̍a̍ būŋgɛ̄i̍ māā, o̍ pāa̍le̍ le̍ŋ chōo̍, Lā chō wā cha᷄ŋnda̍ŋ tūēīyɔ̄ɔ̍ kpu̍ū fūlāa̍ o̍ dīō Sāāsa̍ Sūūwo̍ Chūlu̍sɛ̄lɛ̄m, a̍ o̍ fo̍ndāŋ sɛ̄nɛ̄īyo̍ o̍ chi̍e̍e̍ bɛ̍ndū kōŋ. Ndu̍yɛ̍ mī lā tūēī vɛ̄lɛ̄ cha᷄ŋnda̍ŋ kpu̍ū fūlāa̍ o̍ pēmbo᷄ŋ chōo̍.

¹¹Nya̍ cho̍ īchāli̍ o̍ chi̍e̍e̍ bɛ̍ndōo̍ bā tōūwo̍ wa̍, lā tūēī cha᷄ŋnda̍ kpu̍ū la̍ŋ la᷅ŋ pɛ̍, mɛ̄ɛ̍ lā cha᷄ŋ. Kāni̍ fu̍u̍le̍, wānāā nyāa̍ tu̍ū ka̍ni̍ŋ hu̍mbo᷄ŋ nda̍ ā chō pīɔ̍mnda̍ŋ sɔ̄lā kpo̍u̍.

¹²“A̍ te̍le̍ŋ ko̍ŋ, wānā o̍ wānā cho̍ Chūlu̍sɛ̄lɛ̄m ā nɔ̍ bu̍u̍la᷄ŋ te̍ wa̍, mā dīmī o̍ kɔ̄ltā ndāla̍ŋ ni᷄ŋ māā, Mɛ̄lɛ̄ka̍ Ya̍a̍wɛ̄ɛ̄ o̍ to̍sā ni̍ŋ nyɛ̍ ō nyɛ̄ kɛ̄ndɛ̄, kɛ̄lɛ̄ŋgāā mbō tōsa̍ nyɛ̄ o̍ nyɛ̄ wɔ̄ɔ̍ŋ te̍ wa̍, I̍ cho̍ la̍mūi̍la̍ŋ chūā mī nu̍u̍vi̍a̍a̍ nda̍ tɛ̍ɛ̍ tɛ̍ɛ̍, nāa̍ o̍ nāa̍ nda̍ chō wa̍ Chūlu̍sɛ̄lɛ̄m ndo̍ŋ.

¹³Wāŋnda̍ ha̍ā, nyɛ̄ o̍ nyɛ̄ nda̍ nɔ̄, I̍ cho̍ chūā. Ndu̍yɛ̍ mī I̍ tɛ̍ɛ̍mbu̍u̍ chīɛ̄īlā ndāla̍ŋ. Ā tāŋgu̍l bɛ̍ɛ̍ chi̍ɛ̍i̍la̍ŋ, ā che᷅l ni̍ŋ lēni᷄ŋ te̍. Ndu̍yɛ̍ Kpe̍le̍ la̍ ndāla̍ mākīle̍pīi̍la̍ŋ bɛ̍ɛ̍, ā to̍o̍sīāā ni̍ŋ ma̍mu̍ɛ̍i̍ lo̍ŋ mā ko̍l te̍.”

¹⁴Pāa̍le̍ Mɛ̄lɛ̄ka̍ Ya̍a̍wɛ̄ɛ̄ o̍ kɔ̍ɔ̍sā ni̍ŋ a̍ wāŋnda̍ le̍ŋ, lē chō ni᷅ŋ kpɛ̍ɛ̍lūŋ. Ndu̍yɛ̍ lē chō hūnɔ̄ɔ̄ chɔ̍chɔ̍. Kɛ̍, cha᷄ŋnda̍ fu̍lā ni̍ŋ o̍ pāa̍le̍ Mɛ̄lɛ̄ka̍ Ya̍a̍wɛ̄ɛ̄ kɔ̍ɔ̍sā ni̍ŋ le᷅ŋ a̍ wāŋnda̍ le̍ŋ, lē wā ni̍ŋ le̍ lo̍lɛ̍i̍ kpa̍li̍, kāni̍ fu̍u̍le̍ a̍ cha᷄ŋnda̍ ku̍u̍ba̍a̍ chɔ̄ūwa̍ ā wā lo̍ŋ nda̍ŋ.

¹⁵Pāa̍le̍ le̍ŋ lē wā ni̍ŋ pa̍a̍le̍ Mɛ̄lɛ̄ka̍ Ya̍a̍wɛ̄ɛ̄ o̍ du̍a̍u̍nūŋ ni̍ŋ tu̍mbe̍ le̍ŋ. Pāa̍le̍ lākpūndɔ̍ɔ̍ a̍ sāŋgāa̍, pāa̍le̍ nyɛ̄ o̍ nyɛ̄ fe̍e̍ o̍ ta̍mbū ni̍ŋ le̍ŋ, ndu̍yɛ̍ mī nyūmmā tīŋgīsi̍a̍ŋ, a̍ yu̍mbu̍ yu̍mbo̍o̍, ō tōl le̍ŋ chōo̍.

¹⁶Pāa̍le̍ le̍ŋ, mī bu̍lu̍la̍ lāchɔ̄ūla̍ŋ lā sōō o̍ chi̍e̍e̍ŋ bɛ̍ndu᷄ŋ cho̍ ŋ̄ bɛ̄ɛ̄ndīāā ŋ̄ kālā ka̍lā wo̍ŋ ni᷄ŋ, a̍ o̍ bāndu̍la̍ vi̍lɛ̄īlā wāŋnda̍ cha᷅l le̍cho̍o̍ le̍ mɛ̄ŋgɛ̄lāa̍ la̍ŋ.

¹⁷O̍ ko̍ŋ kɔ̍ɔ̍lī, Mi̍ Mɛ̄lɛ̄ka̍ Ya̍a̍wɛ̄ɛ̄ o̍ si̍lā wānā o̍ wānā to̍sa̍ yɔ̄ŋ wɔ̍ɔ̍ŋndo̍ ndu̍ o̍ hɔ̄l āā, “I̍ cho̍ nya̍ sūūmīāā. Ndu̍yɛ̍ ko̍o̍ma̍ nyāa̍ŋ ni̍, a̍ nyɛ̄ o̍ nyɛ̄ cho̍ nya̍ ni᷄ŋ, mī lā kūīsi̍ ndu̍. Ndu̍yɛ̍ mī dīāllūŋ nyāŋ vi̍lɛ̍i̍yo̍ŋ ŋ̄ sɛ̄ lɛ̄ŋ.”

¹⁸O̍ pāa̍le̍ Mɛ̄lɛ̄ka̍ Ya̍a̍wɛ̄ɛ̄ o̍ du̍a̍u̍nūŋ ni̍ŋ tu̍mbe̍ ko̍ŋ a̍ wāŋnda̍ le̍ŋ chōo̍, ka̍ni̍ŋ ndāŋ hu̍mbo᷄ŋ, a̍ ŋ̄ si̍a̍ŋa᷄ŋ ni̍, ŋ̄ nɔ̍lā ni̍ŋ nda̍ bāŋā ndu̍ o̍ bā le̍. Chi̍e̍ēŋndo̍ kpo̍u̍ o̍ cho̍ wā ō tɛ̄ɛ̄mbāā a̍ yīŋndē ndɔ̄le̍ kɔ̄l tūūlē le̍ŋ. Ndu̍yɛ̍, wānā o̍ wānā cho̍ o̍ chi̍e̍ēŋndo̍ chōo̍, nda̍ bɛ̍ɛ̍ mbō chīi̍ a̍ nda̍.