Read Southern Kisi Sɛ̄fāna̍yā 2 Bible Online

Sɛ̄fāna̍yā 2 - Southern Kisi bible

Sɛ̄fāna̍yā 2

¹Nya̍ wāŋnda̍ Chu̍dā, nya̍ cho̍ ha̍ā lā nɔ̍ la̍si̍ɔ̍mbu̍ le̍ wa̍, lā chūūŋgi̍a̍a̍ na̍a̍ pi᷅lɛ̍ Mɛ̄lɛ̄ka̍ Ya̍a̍wɛ̄ɛ̄ o̍ hɔ̄l,

²yɔ̍ŋi̍ o̍ tu̍si̍ nya̍ yīŋndē ndɔ̄le̍ kɔ̄l tūūle̍ŋ chōo̍, ndu̍yɛ̍ mbō tōū nya̍ ndu̍ o̍ hɔ̄l mɛ̄ɛ̍ hūēīye̍ hɔ̄ŋ nu̍a̍ā tɛ̄fɛ̍la̍ŋ mī lā sɛ̄ŋi̍ŋ yɛ̍.

³Nya̍ wānāa̍ cho̍ o̍ lɛ̄ŋndē I̍sɔ̄lūɛ̍i̍le̍ŋ ni᷄ŋ mi̍ lā tūsi᷄ŋ, mi̍ lā tōsā nyɛ̄ Mɛ̄lɛ̄ka̍ o̍ di̍mu̍l nya̍ le̍ tōsāa̍ wo̍ wa̍, lā nūūvi̍a̍a̍ Mɛ̄lɛ̄ka̍ Ya̍a̍wɛ̄ɛ̄. Lā wa̍ sa̍kpō ndu̍ o̍ hɔ̄l, mī lā tūsi̍ŋ. Kɛ̄lɛ̄ŋgāā ndɔ̍ɔ̍ le̍, mbō ma᷄l nya̍ le̍ yɔ̄ŋndā nyāla̍ wɔ̍ɔ̍ŋnda̍ŋ o̍ pāa̍le̍ o̍ du̍a̍u̍nūŋ ni̍ŋ nde̍ŋ tu̍mbe̍ a̍ wāŋnda̍ mbō tūsi̍ nda̍ dɛ̍nɛ̍ pālāa̍ le̍ŋ chōo̍.

⁴Ka̍a̍sā a̍ A̍si̍kɛ̍lɔ̄ŋ chi̍e̍e̍ ŋ̄ chō wā ŋ̄ tɛ̄ɛ̄mbāā, ndu̍yɛ̍ nyɛ̄ o̍ nyɛ̄ o̍ lo᷅ ni̍ŋ o̍ mu̍ŋ ni̍ŋ te̍. O̍ ko̍ŋ kɔ̍ɔ̍lī, a̍ te̍le̍ŋ pāa̍le̍ŋ lē sīm o̍ bōlle̍ŋ chōo̍ le̍ŋ, wāŋnda̍ A̍si̍dɔ̍dī ni̍, a̍ wāŋnda̍ Ɛ̍ki̍lɔ̄ŋ, Mɛ̄lɛ̄ka̍ chō nda̍ tōūwɔ̄ɔ̄ mbō sōli̍ nda̍ o̍ chi̍e̍e̍ŋ mu̍ŋ ni᷄ŋ.

⁵Nya̍ wāŋnda̍ Fīli̍i̍tīāŋ, mi̍ lā wā īchāli̍ o̍ pēe̍ mɛ̄ŋmā īhɛ᷄llo̍ da̍ŋga̍la̍, Mɛ̄lɛ̄ka̍ Ya̍a̍wɛ̄ɛ̄ o̍ chi̍i̍ ni᷅ŋ nya̍ yāmɛ̍i̍ ki̍lu̍l. Ō cho̍ nya̍ dɛ̍nɛ̍ pa̍lāa̍ tūsī chōo̍, ō wāŋndo̍ ō pīlɛ̍ bɛ̍ɛ̍ o̍ nɔ̍lā ni̍ŋ mbō fūla̍ lēbɛ̄ŋgu̍ le̍ wo̍.

⁶Mī lɛ̄ŋīī nyɛ̄i̍ cho̍ o̍ pēe̍ mɛ̄ŋmā īhɛ᷄llo̍ da̍ŋga̍la̍ ve̍ ī sīmnu᷄ŋ nāa̍ wānāā māndāā lāsāa̍ ā tāŋgu̍l būu̍ŋnda̍ ndāla̍ŋ a̍ kpākīla̍ ndāla̍ ma̍ndāā lāsāa̍ la̍ŋ.

⁷Ndu̍yɛ̍, mī wānāa̍ lo̍ yōōmū o̍ yu̍ŋgu̍ Chu̍dā wo̍ chōo̍ wa̍, ā kɔ̍ cha᷅l o̍ ndi̍ ni̍ŋ, mī lɛ̄ŋīī kēŋ ī sīmnu᷄ŋ lɛ̍ŋīī nda̍. Lo̍ŋ nda̍ wā ni̍ŋ a̍ chɔ̄lūāā ndāa̍ māndāa̍ ni̍. Ndu̍yɛ̍ mā wa̍ lūa̍a̍ŋ o̍ chīɛ̄īlā A̍si̍kɛ̍lɔ̄ŋ nda̍ŋ ni᷄ŋ. Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ ndāa̍, ō chō wā lātūlu̍ a̍ nda̍, ndu̍yɛ̍ mbō tōsa̍ mā hīōū lāchī o̍ dɛ̍nɛ̍ kɛ̍ndɔ̄ɔ̍ ni᷄ŋ.

⁸O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mī āā, “I̍ tu̍e̍ī a̍ mɛ̄ɛ̍ wāŋnda̍ Mo̍wa̍bī a̍ wāŋnda̍ A̍mɔ̄ŋ a̍ cho̍ wānāā nīa̍a̍ yīōūla̍ŋ, ndu̍yɛ̍ ma̍ wā nda̍ kɔ̄ŋgɔ̄la᷄ŋndo̍ le̍ nda̍ lɛ̄ŋndē ndāle̍ŋ pōōndāa̍ o̍ bā yɛ̍.

⁹Kɛ̍, ya̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ I̍sɔ̄lūɛ̍i̍ya̍, O̍ cho̍ yōōmū wo̍, I̍ cho̍ Mo̍wa̍bī a̍ A̍mɔ̄ŋ tɛ̄ɛ̄mbūū mɛ̄ɛ̍ ya̍ tɛ̍ɛ̍mbu̍u̍ So̍dɔ̄m a̍ Kōmo̍o̍lūā yɛ̍. Ndu̍yɛ̍ mī si̍i̍ŋgu̍u̍ mu̍ŋ fo̍ndāŋndā wāŋnda̍ ā kālā hɛ̍lle̍ la̍ŋ. Ndu̍yɛ̍ mī bīllo̍ vīl o̍ mu̍ŋ ni̍ŋ wūlɔ̄ɔ̍ pīla̍. O̍ ko̍ŋ kɔ̍ɔ̍lī, mī wānāā nīa̍a̍ cho̍ lō yōōmū wa̍, ā chūa̍ lɛ̄ŋīī ndɛ̄i̍.”

¹⁰Na̍ā nyɛ̄ pālāa̍ ō wā ni̍ŋ wāŋnda̍ Mo̍wa̍bī a̍ wāŋnda̍ A̍mɔ̄ŋ chōo̍ ni̍. Pāāwā nda̍ sɔ̄lā ni̍ŋ le̍ yōŋgāla̍ ndāla̍ nda̍ wa̍ kīōlɔ̄ɔ̍, ma̍ wā wānāa̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ Kpu̍lu̍ŋgūma̍a̍ yīōūla̍ŋ ndo̍, ndu̍ wa᷅ ni̍ŋ ko̍ŋ ni̍.

¹¹Mɛ̄lɛ̄ka̍ Ya̍a̍wɛ̄ɛ̄ cho̍ nda̍ sīōōŋīī bɛ̄ndūe̍i̍ dɔ̄wɔ̄ɔ̄. Ndu̍yɛ̍ mɛ̄lɛ̄ka̍a̍ chēle̍ŋāā wāŋnda̍ ā sōōlūū o̍ chi̍e̍ēŋndo̍ chōo̍ wa̍, mbō tɛ̄ɛ̄mbu̍u̍ nda̍ lābɛ̄ɛ̄, mbō sīīŋgu̍u̍ nda̍ nyɛ̄m fo̍ndō fu̍u̍. O̍ ko̍ŋ, mī wāŋnda̍ o̍ lēlɛ̄ŋ o̍ lēlɛ̄ŋ ni᷄ŋ a̍ mu̍li̍ŋ mā sōōlu̍u̍ ndu̍.

¹²O̍ ko̍ŋ kɔ̍ɔ̍lī, mī Mɛ̄lɛ̄ka̍ Ya̍a̍wɛ̄ɛ̄ o̍ di̍u̍ vɛ̄lɛ̄ wāŋnda̍ Īto̍o̍pīāā a̍ mūɛ̄ī ndūɛ̍i̍ fāŋnde̍.

¹³Ndu̍yɛ̍, ō chō tu̍mbe̍ dɔ̍u̍nɔ᷄ŋ a̍ Āsi̍i̍līāā mbō tūsi̍ ndu̍ dɛ̍nɛ̍ pa̍lāa̍ chōo̍. Ndu̍yɛ̍ mbō tɛ̄ɛ̄mbu̍u̍ Ni̍ni̍vɛ̄ɛ̄, mbō mūli̍ po̍llo̍, ō mɛ̄ŋmā che᷅l ni̍ŋ le̍ni̍ŋ te̍ wo̍.

¹⁴Ndu̍yɛ̍, mbō sīīŋgu̍u̍ mu̍ŋ chi̍e̍e̍ŋ sāa̍, a̍ chūīŋnda̍, a̍ chɔ̄lūāā su̍u̍la̍ yɛ̍ yi̍a̍a̍ ā wā ni̍ŋ lu̍a̍a̍ŋ nda̍. Mī yi̍bɛ̍i̍ya̍, a̍ hu̍a̍ā po̍lla̍, ā su̍u̍la̍ yɛ̍i̍ yi̍a̍a̍ ā wa̍ kēēku̍la̍ŋ o̍ wu̍ndɛ̄i̍la̍ chīɛ̄īlā nda̍ tɛ̄ɛ̄mbu̍u̍ la̍ŋ, mā lɔ̄l o̍ chīɛ̄īlā fōndo̍ fo̍ndo̍ lāŋ ni᷄ŋ. Mī bāsa̍bāsa̍kūēndo̍o̍ nda̍ bɛ̍ɛ̍ a̍ wa̍ bɔ̄ɔ̄lūūwo̍ o̍ chīɛ̄īlā fōndō fōndo̍la̍ la̍ŋ ni᷄ŋ. Mī yɔ̄mīī si̍dāā nda̍ tāŋgu̍l chīɛ̄īlā lāŋ nde̍ ī tāmbu̍.

¹⁵Nyɛ̍ yɔ̍nūŋ ni̍ŋ a̍ chi̍e̍e̍ bɛ̍ndū he̍e̍lu̍ŋ ndu̍ pi̍la̍, mbo̍ chɔ̄m māā ō nɔ̄lā mbō pi̍ŋī ndu̍ pi̍la̍ wo̍. Chi̍e̍e̍ wānāā ndūa̍a̍ ā dūāūnūŋ ni̍ŋ yo̍ŋgāa̍, mā dīmi̍ māā, “Chi̍e̍e̍ o̍ chi̍e̍e̍ che̍le̍ŋ cho̍ māā chi̍e̍e̍ ndāa̍ le̍.” Nyɛ̍ yɔ̍nūŋ ni̍ŋ a̍ chi̍e̍e̍ ko̍ŋ ndo̍, ndu̍ wa᷅ ni̍ŋ ko̍ŋ ni̍. Mī vīsīāā yōndūa̍a̍ bīī mā pɛ̄ o̍ chi̍e̍e̍ ko̍ŋ ni᷄ŋ. Wānā o̍ wānā wa̍ hīōūwɔ̄ɔ̍ mbō chē ndu̍ pɛ̍, ō pɛ̄ɛ̄sa̍ ndu̍ ō hīīlu̍u̍ bōlle̍ŋ.