Read Southern Kisi Sɛ̄fāna̍yā 3 Bible Online

Sɛ̄fāna̍yā 3 - Southern Kisi bible

Sɛ̄fāna̍yā 3

¹Chi̍e̍e̍ Bɛ̍ndōo̍ Chūlu̍sɛ̄lɛ̄m, Mɛ̄lɛ̄ka̍ pɛ̄ɛ̄sa̍ nu̍m. Nu̍m cho̍ ho̍ō ma̍ kɛ̄ɛ̄ Mɛ̄lɛ̄ka̍, ndu̍yɛ̍ ma̍ wā wānāā nūmnda̍ nyɛ̄ kīndīlāa̍ hāndɔ̄ɔ̍ chōo̍ wo̍.

²Ā bīī ma̍ kɛ̄ɛ̄ dīo̍m Mɛ̄lɛ̄ka̍ Ya̍a̍wɛ̄ɛ̄ wo̍ nīla̍ŋ yāŋɔ̄ɔ̍, ndu̍yɛ̍ ma̍ kɛ̄ɛ̄ le̍ŋ mbō mīŋgi̍ nu̍m o̍ nɛ̄i̍ tōnya̍a̍ chōo̍. Ma̍ kɛ̄ɛ̄ le̍ tīīnda᷄ŋndo̍ dɔ̄wɔ̄ɔ̍ o̍ Mɛ̄lɛ̄ka̍ Ya̍a̍wɛ̄ɛ̄ ni᷄ŋ. Ma̍ kɛ̄ɛ̄ le̍ hūnɔ̄ɔ̍ kpɛ̍ɛ̍lūŋ nāa̍ Mɛ̄lɛ̄ka̍ chūā.

³Wānāā ndūāā bɛ̍ndūa̍a̍ cho̍ īchāli̍ o̍ chi̍o̍o̍ ho̍ō ni᷄ŋ nda̍, mɛ̄ɛ̍ kpɔ̍kūŋnda̍ ā pɛ̄ɛ̄līāā nu̍a̍ā tē ā yēēma̍ le̍ vīsīo̍o̍ bīyɔ̄ɔ̍ pɛ̍, le̍nde̍ nda̍ chō ka̍ā ni̍. Chɔ̍ɔ̍chi̍a̍a̍ ndūa̍a̍ bɛ̍ɛ̍, mɛ̄ɛ̍ vīsīa̍a̍ cho̍ māā ā tūŋ, mā bālū nyɛ̍ ndīa̍a̍ nūūvīa̍a̍ īchɔ̄l, mā lo̍ ndu̍ dīo̍o̍ ha̍a̍a̍ mbō bīī dīi̍mā ndɔ̄ɔ̍ yɛ̍, nda̍ chō ni̍.

⁴Wānāā ndūa̍a̍ su̍a̍ā le̍ Mɛ̄lɛ̄ka̍ wa̍ bɛ̍ɛ̍, ā nɔ̍ la̍a̍la᷄ŋ o̍ Mɛ̄lɛ̄ka̍ ni᷄ŋ te̍. Ā bīī ma̍ tɛ̄ɛ̄mbūū fo̍ndāŋndā nda̍ sōōlūū Mɛ̍lɛ̄ka̍ la̍ŋ lābɛ̄ɛ̄, ndu̍yɛ̍ ma̍ mūlī sāwāla̍ Mɛ̄lɛ̄ka̍ la̍ŋ o̍ hɛ̄na᷄ŋ nda̍ nda̍ pi̍la̍a̍ ni᷄ŋ.

⁵Kɛ̍ ndu̍yɛ̍, Mɛ̄lɛ̄ka̍ Ya̍a̍wɛ̄ɛ̄ o̍ cho̍ o̍ chi̍e̍e̍ ko̍ŋ ni᷄ŋ ndo̍ ō chō sa̍kpo̍, ndu̍yɛ̍ ō to̍sā nyɛ᷅ wɔ̄ɔ̍ŋ te̍. Īdīi̍ o̍ īdīi̍, ō chō sa̍kpō a̍ wānāā ndūa̍a̍. Kɛ̍, wānāa̍ kɛ̍ɛ̍ le̍ wāa̍ sa̍kpo̍ a̍ Mɛ̄lɛ̄ka̍, ma̍ wā wɔ̄ o̍ chi̍e̍e̍ ko̍ŋ ni᷄ŋ nda̍, ā chō wɔ̄ hīōūwɔ̄ɔ̍ lāchī a̍ sɔ̄ɔ̍ŋ wɔ̍ɔ̍ŋ nda̍ wa̍ tōsāa̍ wo̍ŋ tōsāa̍. Ndu̍yɛ̍ ā nɔ̍ la̍ si̍ɔ̍mbu̍ tē ā wa̍ sɔ̄ɔ̍ŋ wɔ̍ɔ̄ŋ mu̍ŋ tōsāa̍ pɛ̍ le̍.

⁶Kɛ̍ Mɛ̄lɛ̄ka̍ Ya̍a̍wɛ̄ɛ̄ di̍mi̍ āā, “Lɛ̄ŋīi̍ cho̍ ya̍ lāchī, mi̍ ī wā sɔ̄ɔ̍ŋ wɔ̍ɔ̍ŋndo̍ŋ tōsāa̍ ve̍, I̍ chi̍i̍ ndi̍ bɛ̄ɛ̄sūū. I̍ chi̍i̍ chi̍e̍e̍ŋ ndāŋ bɛ̍ndo᷄ŋ tɛ̄ɛ̄mbūū. Kpākīla̍ ndāla̍ŋ, a̍ bāndu̍la̍ vi̍lɛ̄ī lā wāŋnda̍ ā sīm le̍cho̍o̍ le̍ mɛ̄ŋgɛ̄lāa̍ la̍ŋ bɛ̍ɛ̍, I̍ chi̍i̍ la̍ŋ tɛ̄ɛ̄mbūū. Chi̍e̍e̍ŋ ndāŋ bɛ̍ndo᷄ŋ ŋ̄ lo̍ fo̍ndō. Wānā o̍ wānā bɛ̍ɛ̍ lo̍ lɛ̍ o̍ mu̍ŋ ni̍ŋ te̍. Nɛ̄īla̍ŋ o̍ chi̍e̍e̍ŋ mu̍ŋ bɛ̍ɛ̍, lā lo̍ fo̍ndō.

⁷Kɛ̍, mi̍ di̍mī māā wānāā nīa̍a̍ a̍ chō sīōōŋnde̍ nɔ̄ le̍ ya̍, mā chɛ᷄l le̍ mī i̍ si̍mi̍ nda̍ o̍ nɛ̄i̍ tōnya̍a̍ chōo̍. Ndu̍yɛ̍ mā chɛ᷄l pɛ̄ɛ̄kūlā nīla̍ŋ, ā pu̍ɛ̍ɛ̄ŋ ni̍ŋ a̍ la̍ŋ te̍. O̍ ko̍ŋ, I̍ ki̍lū lɛ̍ cha᷄lta̍ ndāla̍ŋ, mī fa̍ŋa̍ nda̍ pɛ̄ɛ̄kūlā nīla̍ŋ chōo̍ le̍. Kɛ̍, le̍nde̍ ko̍ni̍ nda̍ wa̍ wɔ̄ hīōūwɔ̄ɔ̍ lāchī a̍ sɔ̄ɔ̍ŋ wɔ̍ɔ̍ŋndo̍ŋ tōsāa̍ ni̍. Ma̍ tōsā mi̍ ka̍ālā ndāla̍ŋ kpo̍u̍ la̍ wa᷅ ka̍ālā wɔ̄ɔ̍ŋ.”

⁸O̍ ko̍ŋ, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl nda̍ a̍a̍, “Lā chu᷄m ndɔ̍ kpɛ̍, pāa̍le̍ŋ lē chō fūūlūū. Pāa̍le̍ ya̍ cho̍ lɛ̄ŋnde̍ a̍ māsɛ̄i̍ chūūŋgīāā nāa̍ pi̍lɛ̍ mī tu̍si̍ nda̍ nyɛ̄ pa̍lāa̍ chōo̍ le̍ŋ. Kāni̍, le̍ tu̍mbe̍ ka̍lā ka̍lā ya̍ dɔ̍u̍nu᷄ŋ a̍ nda̍ wo̍. I̍ cho̍ hāŋgu̍l ni̍ tu̍mbo̍o̍, a̍ yīŋndē pāŋālāā le̍ŋ yɔ̄ŋ mī lē tɛ̄ɛ̄mbu̍u̍ chi̍e̍ēŋndo̍ kpo̍u̍.

⁹“A̍ te̍le̍ŋ ko̍ŋ, I̍ cho̍ sɔ̄ɔ̍ŋ wɔ̍ɔ̍ŋ wāŋnda̍ dīmī wo̍ŋ sīŋgāfīlā, mā dīmi̍ sɔ̄ɔ̍ŋ cho̍ wa̍la̍ŋ ndo̍ŋ. O̍ ko̍ŋ, mī nda̍ kpo̍u̍ mu̍li̍ŋ mā sāŋga̍la̍ ya̍ Mɛ̄lɛ̄ka̍ Ya̍a̍wɛ̄ɛ̄, ndu̍yɛ̍ mā sāāŋgi̍a̍lla̍ dīōmndo̍ pīlɛ̍.

¹⁰Wānāā nīa̍a̍ sɛ̍ŋi̍ŋ ma̍ wā o̍ Pīo̍o̍ Īto̍o̍pīāā le̍kɔ̍ɔ̍lī, mi̍ ya̍ i̍i̍ kɛ̍ɛ̄ nda̍ wa̍ bɛ̍ɛ̍, ā chō hūnɔ̄ɔ̄ a̍ kēla̍ŋ nāa̍ ya̍ chūā.

¹¹O̍ pāa̍le̍ le̍ŋ chōo̍, si̍ɔ̍mbu̍la̍ cho̍ lɛ̍ wa̍nāā nīa̍a̍ bīyɔ̄ɔ̄, le̍ ka̍ālā ndāla̍ wɔ̍ɔ̍ŋnda̍ nda̍ tōsa̍ ma̍ kɛ̄ɛ̍ ya̍ la̍ŋ te̍. Wānāā yōŋgāa̍, a̍ wānāā bōlīī kāla̍ cho̍ wānāā nīa̍a̍ tɛ̄ɛ̄ŋ nda̍, I̍ cho̍ nda̍ sōlī nda̍ tɛ̄ɛ̄ŋ. Ndu̍yɛ̍ fɛ̍ɛ̍ŋ a̍ fɛ̍ɛ̍ŋ ni᷅ŋ bɛ̍ɛ̍, ā si᷅m ndɛ̍ o̍ pēmbīī nīī di̍a̍ndɛ̄i̍ chōo̍ mā kɛ̄ɛ̍ ya̍ le̍.

¹²Kɛ̍, wānāa̍ tu̍si̍ŋ to̍o̍lō ma̍ wā wānāā nīa̍a̍ tɛ̄ɛ̄ŋ ma̍ hūŋ nāa̍ ya̍ chūā le̍ mī I̍ ma̍la̍ nda̍ wa̍, I̍ cho̍ nda̍ nya̍ sōlī tɛ̍ɛ̄ŋ te̍. Nda̍ nda̍ ā chō pɛ̄ŋgīo̍o̍ nūūvīāā o̍ dīōla̍ Mɛ̄lɛ̄ka̍ Ya̍a̍wɛ̄ɛ̄ la̍ŋ ni᷄ŋ.

¹³Wānāa̍ cho̍ I̍sɔ̄lūɛ̄ī ma̍ lō yōōmū wa̍, ā to̍sā lɛ̍ ni̍ŋ sɔ̍ɔ̍ŋ wɔ̍ɔ̍ŋ, mā dīmi̍ lāchōō le̍. Kɛ̄lɛ̄ŋgāā le̍, mā wa̍ wāŋnda̍ hūīyo̍ a̍ dīɔ̄ɔ̄mūīī ndɛ̄i̍. Wānāā kāŋ ā chō nyɛ̄ dīa̍a̍ sɔ̄lā mā dē, mā sɔ̄la̍ pɛ̄ŋgīo̍o̍. Ndu̍yɛ̍ a̍ ve᷅m lɛ̍ ni̍ŋ a̍ īsīōōŋ le̍ wānā o̍ wānā le̍.”

¹⁴Nya̍ wāŋnda̍ I̍sɔ̄lūɛ̄ī, lā sōli̍ cho̍ndi̍i̍ nya̍a̍le̍i̍ chōo̍ cho̍o̍ kpe̍le̍ŋ. Lā dɔ̄ɔ̄nu̍ŋ nya̍a̍le̍ a̍ kɔ̄ltā nyāla̍ŋ kpo̍u̍, nya̍ wāŋnda̍ Chūlu̍sɛ̄lɛ̄m.

¹⁵Mɛ̄lɛ̄ka̍ Ya̍a̍wɛ̄ɛ̄ o̍ mɛ̍ɛ̍lu̍ a̍ nya̍ nyɛ̄ pālāa̍ nya̍ tūsīo̍o̍ chōo̍, ndu̍yɛ̍ mbo̍ tūāū ya̍a̍mɔ̍ɔ̍wa̍a̍ wa̍ nya̍ chīŋa̍la᷅ŋndo̍ a̍ sɔ̍ŋgɔ̄ɔ̍ wa̍. Mɛ̄lɛ̄ka̍ Ya̍a̍wɛ̄ɛ̄, Māsā Bɛ̍ndōo̍ le̍ I̍sɔ̄lūɛ̄ī, ō chō a̍ nya̍ la̍tu̍lu̍. Lā nɔ̍ lɛ̍ mī lā wa̍ a̍ īsīōōŋ le̍ yɔ̄ŋ wɔ̍ɔ̍ŋ o̍ yɔ̄ŋ wɔ̄ɔ̍ŋ wāŋnda̍ ā tōsāl nya̍ ni̍ŋ ndo̍ le̍.

¹⁶O̍ pāa̍le̍ le̍ŋ chōo̍, ī wā ni̍ŋ i̍ di̍mīāā a̍ Chūlu̍sɛ̄lɛ̄m o̍kɔ̄ɔ̄ āā, “Yɔ᷅ŋ īsīōōŋ te̍, nūm chi̍e̍e̍ bɛ̍ndōo̍ Sa̍a̍yɔ̄ŋ. Lā wa᷅ a̍ īsīōōŋ mī dīāllo̍ŋ ŋ̄ vī nya̍ le̍.

¹⁷Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ō chō a̍ nya̍ la̍tu̍lu̍. Ndu̍ cho̍ Ku̍u̍ba̍nɔ̍ ke᷅ wa᷅ŋnda̍ kpāāyāa̍ mā yēm ndo̍ ni̍. Ō cho̍ wā a̍ nya̍a̍lo̍o̍ a̍ kɔ̄l kɛ̄ndɔ̄ɔ̍ le̍ nya̍. Ndu̍yɛ̍ o̍ kāālā ndɔ̄ɔ̍ ni᷄ŋ, mbō ke̍ nya̍ yōōmū sɛ̄nɛ̄īyo̍. Ō chō chōndi̍i̍ nya̍a̍le̍i̍ sōlī le̍ nya̍,

¹⁸mɛ̄ɛ̍ wāŋnda̍ ā sōlī nu̍a̍ā chōndi̍i̍ nya̍a̍le̍i̍ o̍ bɔ̄ŋa᷅ŋ bɛ̄ndōo̍ chōo̍ yɛ̍.” O̍ ko̍ŋ kɔ̍ɔ̍lī, Mɛ̄lɛ̄ka̍ Ya̍a̍wɛ̄ɛ̄ di̍mi̍ āā, “Nyɛ̄ o̍ nyɛ̄ pālāā ya̍ ha̍ndu̍ nya̍ chōo̍, I̍ cho̍ nya̍ ndu̍ fāŋā chōo̍. O̍ ko̍ŋ, si̍ɔ̍mbu̍la̍ nya̍a̍ sɔ̍lā ni̍ŋ nda̍ŋ, mī lā fāŋa̍ŋ nya̍ chōo̍.

¹⁹Mī di̍mu̍l nya̍, a̍ te̍le̍ŋ ko̍ŋ, I̍ cho̍ wānāa̍ cho̍ wānāā nīa̍a̍ nyɛ̄ pālāa̍ hāndɔ̄ɔ̍ chōo̍ wa̍, dɛ̍nɛ̍ pa̍lāa̍ tūsī chōo̍. Ndu̍yɛ̍, mī I̍ si̍ŋgi̍ wānāā bɛ̄vɛ̍i̍ya̍, mī chu̍u̍ŋgi̍a̍a̍ wānāa̍ wa̍ o̍ chɛ̄le̍ŋ ni᷄ŋ nda̍ nāa̍ pi᷅lɛ̍. Ndu̍yɛ̍, mī I̍ si̍i̍ŋgu̍u̍ si̍ɔ̍mbu̍la̍ ndāla̍ŋ, nyɛ̄ sāŋgālāā, ndu̍yɛ̍ mī chi̍e̍ēŋndo̍ kpo̍u̍ o̍ sa̍ŋga̍la̍ nda̍.

²⁰A̍ te̍le̍ŋ ko̍ŋ, I̍ cho̍ nya̍ chūūŋgīāā nāa̍ pi᷅lɛ̍, mī hi᷅ŋ a̍ nya̍ o̍ lā nya̍lo̍, ndu̍yɛ̍ mi̍ to̍sa̍ mī lā fūla̍ tɔ̍ɔ̍, mī wāŋnda̍ kpo̍u̍ o̍ chi̍e̍ēŋndo̍ mā sāŋga̍la̍ nya̍, ndu̍yɛ̍ mī to̍sa̍ mī lā mīīŋgu̍ o̍ dɛ̍nɛ̍ kɛ̍ndɔ̄ɔ̍ chōo̍ vɛ̍lɛ̄.” Ya̍ Mɛ̄lɛ̄ka̍ Ya̍a̍wɛ̄ɛ̄, ya̍ so̍ō ni̍.