Read Southern Kisi Sɛ̄kāla̍yā 10 Bible Online

Sɛ̄kāla̍yā 10 - Southern Kisi bible

Sɛ̄kāla̍yā 10

¹Wāŋnda̍ I̍sɔ̄lūɛ̄ī, Mɛ̄lɛ̄ka̍ Ya̍a̍wɛ̄ɛ̄, ndu̍ nya̍ nɔ̄ ni̍ mī lā nyūna̍ le̍ mbō yɔ᷄ŋ nya̍ pīɔ̍ɔ̍, a̍ te̍le̍ŋ tɔ̄lɔ̄ɔ̄lā nyāla̍ŋ lā yēēmā pi̍ɔ̍ɔ̍ wo̍. Mɛ̄lɛ̄ka̍ Ya̍a̍wɛ̄ɛ̄ to̍sā ni̍, mī pīɔ̄ɔ̄ bɛ̄ndōo̍ ō he᷄l, mbō hīŋ a̍ hūēīyīī bɛ̄ndūe̍i̍ lātūlu̍. Ndu̍ yɔ̍ŋgū wa᷅ŋnda̍ pīɔ̍ɔ̍ ni̍, mbō tōsa̍ mī tɔ̄lɔ̄ɔ̄la̍ŋ o̍ chīɔ̄ɔ̄ŋ nda᷄ŋ ni̍ŋ la̍ pu̍i̍.

²Lā ti̍i̍nda᷄ŋ pi̍ɔ̍māā nyāa̍ lāyu̍ŋgu̍a̍a̍ le̍ nya̍ mālā le̍, kāni̍ fo̍ndōle̍, hūīyo̍ ko̍ni̍ nda̍ hūī nya̍ ni̍, ā nɔ̍lā mā ma̍la̍ nya̍ le̍. Wānāa̍ di̍mūl nya̍ sɔ̄ɔ̍ŋ wa̍ā lāchīo̍ŋ nda̍, chōōla̍ŋ ko̍ni̍ nda̍ dīmūl nya̍ ni̍. Wānāa̍ tɛ̍ɛ̍sīāl nya̍ lɔ̄mā sɔ̄la̍ŋ nda̍, ā di̍mūl nya̍ tōnya̍ o̍ tōnya̍ le̍, hūīyo̍ ko̍ni̍ nda̍ hūī nya̍ ni̍, mā dīmūl nya̍ dīōmnda̍ dɛ̍ɛ̍nīāā nya̍ kɔ̄lta̍ŋ nda̍ŋ. Nyɛ̄ ko̍ŋ to̍sa̍ ni̍, mi̍ wāŋnda̍ wā sāŋgāa̍, ma̍ wā bālɔ̄ɔ̍ mɛ̄ɛ̍ sāa̍ ā wā nu̍a̍ā, ā nɔ᷅ wa̍nā o̍ wānā ma̍ndāā le̍ yɛ̍.

³Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “I̍ dɔ̍u̍nu᷄ŋ tu̍mbe̍ o̍ ka̍lā ka̍lā a̍ wānāa̍ cho̍ wānāā nīa̍a̍ chīla̍ŋ, māā wānāā māndāā lāsāā wa̍. Ndu̍yɛ̍ wānāa̍ cho̍ wānāā nīa̍a̍ chīla̍ŋ nda̍ ki̍nɛ̍i̍, I̍ cho̍ nda̍ hūnɔ̄ɔ̄ nyɛ̄ pālāa̍ tūsī chōo̍. Ya̍ Mɛ̍lɛ̄ka̍ Ya̍a̍wɛ̄ɛ̄, o̍ nɔ̍ kpāāyāa̍ kpo̍u̍ wo̍, I̍ cho̍ wānāā nīa̍a̍ māndā, wānāā nīa̍a̍ cho̍ ha̍ā māā lāsāā wa̍, nda̍ yɔ̍nūŋ ni̍ māā wāŋnda̍ Chu̍dā. Ndu̍yɛ̍ I̍ cho̍ tōsā, mā sīmnu᷄ŋ mɛ̄ɛ̍ su̍a̍ā chɔ̄ūwāā kpāāyāā bɛ̄ndūa̍a̍ ā wā nu̍a̍ā o̍ chɔ̄ūwo̍ lāchī yɛ̍.

⁴Wāŋnda̍ ha̍ā, nda̍ tɛ̄ɛ̄ŋ māsāa̍, a̍ wānāa̍ wa᷅ wa᷅ŋnda̍ chīla̍ŋnda̍, a̍ bōlīī so̍vɛ̄i̍ya̍ ā fūlā ni̍ŋ ni̍, le̍ mā wa̍ wānāā nīa̍a̍ chōo̍.

⁵Wāŋnda̍ ha̍ā, nda̍ dūāūnūŋ ni̍ŋ di̍ōmndo̍ ō pīlɛ̍ le̍ sɔ̍ŋgɔ̄ɔ̍ a̍ ya̍a̍mɔ̍ɔ̍wa̍a̍ ndāa̍ ni̍, mā sīmnu᷄ŋ māā ku̍u̍ba̍a̍ chɔ̄ū wāā bɛ̄ndū, a̍ ya᷅m ha̍ā ya̍a̍mɔ̍ɔ̍wa̍a̍ ndāa̍, mā nīɔ̄ū ni̍ɔ̍u̍ nda̍ o̍ lōōlīo̍o̍ ni᷄ŋ a̍ lā bɛ̄ŋgu̍ wa̍. Wāŋnda̍ ha̍ā, ā chō hūnɔ̄ɔ̄ mā hu᷄ŋ sɔ̍ŋgā a̍ ya̍a̍mɔ̍ɔ̍wa̍a̍ ndāa̍. Ya̍a̍mɔ̍ɔ̍wa̍a̍ ndāa̍ sɔ̍ŋgā bɛ̍ɛ̍ o̍ su̍a̍ā chɔ̄ūwa̍ chōo̍ wa̍, wāŋnda̍ ha̍ā ā chīŋa̍la᷅ŋ ni̍ŋ nda̍ mā yēm nda̍. Kāni̍ fo̍ndōle̍, ya̍ Mɛ̍lɛ̄ka̍ Ya̍a̍wɛ̄ɛ̄, I̍ wa᷅ ni̍ŋ nda̍ kɔ̄ɔ̄lī.

⁶“I̍ cho̍ wāŋnda̍ Chu̍dā kpāāyāa̍ kē, ndu̍yɛ̍ o̍ ko̍ŋ kɔ̍ɔ̍lī, mī chi̍i̍ndi̍a̍a̍ wāŋnda̍ I̍sɔ̄lūɛ̄ī. I̍ cho̍ nda̍ hūnɔ̄ɔ̄ īnyīɛ̍ɛ̍ tūīīnɔ᷄ŋ, mī mi̍ŋgi̍ nda̍ o̍ lɛ̄ŋndē ndāle̍ŋ ni᷄ŋ. I̍ cho̍ tōsā mā mīīŋgu̍ māā pāāndū, wānā si̍nā ni̍ŋ bɛ̍ɛ̍ māā I̍ kɛ̍ɛ̍ wɔ̄ nda̍ pāa̍le̍ pi᷅lɛ̍ bɛ̍ɛ̍ le̍. Kāni̍ fo̍ndōle̍, ya̍ Mɛ̍lɛ̄ka̍ Ya̍a̍wɛ̄ɛ̄, ya̍ cho̍ Mɛ̄lɛ̄ka̍ ndāa̍ ni̍. Ndu̍yɛ̍ I̍ cho̍ pīɛ̄īlē ndāle̍ŋ mūlī.

⁷Wāŋnda̍ I̍sɔ̄lūɛ̄ī a̍ si̍mnūŋ ni̍ŋ mɛ̄ɛ̍ ku̍u̍ba̍a̍ dīāllūŋ kālāā bɛ̄ndūa̍a̍ ā wā nu̍a̍ā yɛ̍. Mɛ̄ɛ̍ pūa̍a̍ ā chīī nu̍a̍ā kōlɔ̄ɔ̍ mā wa̍ a̍ kɔ̄ltā kɛ̄ndɛ̄ la̍ŋ yɛ̄, le̍nde̍ nda̍ wā ni̍ŋ le̍ te̍le̍ŋ o̍ te̍le̍ŋ ni̍. Chūāūwāā ndāa̍ ā chā ni̍ŋ yōmɔ̄ɔ̄ fi̍nyāā ndāa̍ ā yēm ndo̍. O̍ ko̍ŋ, mā na᷄ŋ kɔ̄l ta̍u̍ ta̍u̍, a̍ nyɛ̄ ya̍ Mɛ̍lɛ̄ka̍ Ya̍a̍wɛ̄ɛ̄ I̍ to̍sa̍ le̍ nda̍ wo̍.

⁸“I̍ cho̍ hūnɔ̄ɔ̄ wānāā nīa̍a̍ vēēlū, mī lo̍ o̍ ko̍ŋ mī chu̍u̍ŋgi̍a̍a̍ nda̍, mī mi̍ŋgi̍ nda̍ nāa̍ pi᷅lɛ̍. I̍ cho̍ nda̍ hūnɔ̄ɔ̄ chīīndīāā, ndu̍yɛ̍ mī to̍sa̍ mā kūi̍ vɛ̄lɛ̄ ta̍u̍ ta̍u̍ māā pāāndū.

⁹Mi̍ chē bɛ̍ɛ̍ mi̍ to̍sā ma̍ sɛ̄ŋi᷄ŋ a̍ nda̍ o̍ lɛ̄ŋīī chēle̍ŋnde̍ ni᷄ŋ ni̍, kɛ̍ ā chō hūnɔ̄ɔ̄ lōōnɔ᷄ŋ a̍ ya̍ Mɛ̄lɛ̄ka̍ nāa̍ nda̍ chō o̍ lɛ̄ŋīī lēvīl ke̍ŋ ni᷄ŋ nda̍. Nda̍ ni̍, chūāūwāā ndāa̍ ni̍, I̍ cho̍ tōsā mā lo̍ yōōmū, ndu̍yɛ̍ mī to̍sa̍ mā mīīŋgu̍ o̍ lɛ̄ŋndē ndāle̍ŋ ni᷄ŋ.

¹⁰I̍ cho̍ nda̍ sōlī nāa̍ nda̍ chō o̍ I̍chi̍pī wa̍, a̍ o̍ lɛ̄ŋndē Āsi̍i̍līāāle̍ŋ ni᷄ŋ nda̍. Mī mi̍ŋgi̍ nda̍ o̍ lɛ̄ŋndē ndāle̍ŋ ni̍ŋ. Ndu̍yɛ̍ tē I̍ mi̍ŋgi̍ nda̍ pɛ̍, I̍ cho̍ tōsā mī ā ti᷄ŋ ā cha᷄l vɛ̄lɛ̄ o̍ lɛ̄ŋndē Ki̍li̍a̍a̍dīle̍ŋ ni᷄ŋ, a̍ o̍ lɛ̄ŋndē Le̍ba̍nɔ̄ŋnde̍ŋ ni᷄ŋ. Lɛ̄ŋndē I̍sɔ̄lūɛ̍i̍le̍ŋ kpo̍u̍, lē chō mīīŋgū mī lē pɛ̄ cha̍ cha̍ a̍ wāŋnda̍ chīe̍e̍ya̍.

¹¹Ā kēēkū ni̍ŋ o̍ pēe̍ mɛ̄ŋmā īhɛ᷄l kpūndɛ̍ bɛ̄ndōo̍ ni᷄ŋ mā ta᷄ŋ. Mɛ̄ŋmā īhɛ᷄lma̍ hu᷅ŋ a̍ kpāāyā bɛ̍ndōo̍ īkpōku̍ kpo᷅ku̍e̍i̍ ya̍ŋ, ya̍ Mɛ̍lɛ̄ka̍ Ya̍a̍wɛ̄ɛ̄, I̍ cho̍ tōsā mī mā pɛ̄ŋgi̍, le̍ mī wānāā nīa̍a̍ ta᷄ŋ. Ndu̍yɛ̍, lūmūŋ yīŋgi̍lɛ̍i̍ ŋ̍ bɛ̍ndo̍ŋ Na̍īl o̍ pēēlo̍ kpo̍u̍, ŋ̄ chō hūnɔ̄ɔ̄ vēlā sɛ̍ɛ̍ŋ. Yōŋgā bɛ̍ndū wāŋnda̍ Āsi̍i̍līāā a̍ nɔ̍ wo̍ ō cho̍ hūnɔ̄ɔ̄ chūwɔ̄ɔ̄, ndu̍yɛ̍ mī kpāāyāa̍ I̍chi̍pī o̍ mɛ̍ɛ̍lu̍.

¹²I̍ cho̍ tōsā mī wānāā nīa̍a̍ ā sīmnu᷄ŋ wa̍nāā kpāāyā bɛ̍ndu̍. Kāni̍ fo̍ndōle̍, le̍ mɛ̄ɛ̍ nda̍ dūāū ni̍ŋ ti̍i̍nda᷄ŋ ndāa̍ o̍ ya̍ Mɛ̍lɛ̄ka̍ Ya̍a̍wɛ̄ɛ̄ ni̍ŋ yɛ̍. Ndu̍yɛ̍, ā wā ni̍ŋ o̍ nɛ̄i̍ nūu̍ chōo̍, o̍ ko̍ŋ kɔ̍ɔ̍lī, mā tūēī ya̍ dīōm.”