Read Southern Kisi Sɛ̄kāla̍yā 11 Bible Online

Sɛ̄kāla̍yā 11 - Southern Kisi bible

Sɛ̄kāla̍yā 11

¹Le̍ba̍nɔ̄ŋ, ku̍mbi̍ di̍o̍lā nūmnda̍ kpāāyāla̍ŋ le̍ mī yīŋnde̍ŋ lē hu᷄ŋ ba̍su̍ yɔ̄mīī nu̍m ī si̍dāāve̍ kpo̍u̍!

²Nya̍ yɔ̄mīī sa̍i̍pu̍lūɛ̄ɛ̄ve̍, lā cha᷄ŋ mī lā kōŋu̍l chōo̍ cho̍o̍ kpe̍le̍ŋ kpe̍le̍ŋ, kāni̍ fu̍u̍le̍, yɔ̄mīī si̍dāā kɛ̄ndɛ̄i̍ ndi̍ chu̍ū ni᷅ŋ tɛ̄ɛ̄mbūū. Yɔ̄mīī lēbɛ̄ɛ̄ kɛ̄ndɛ̄ kɛ̍ndɛ̄ī bɛ̄ndūe̍i̍ kpo̍u̍, ī chūū kīīŋūū. Lā cha᷄ŋ mī lā kōŋu̍l, nya̍ yɔ̄mīī ɔ̍kūve̍ Ba̍sīāŋ, kāni̍ fo̍ndōle̍, būndɛ̍ che̍lu̍lɛ̍i̍ bɛ̍ndōo̍ ō chūū ni᷅ŋ kīo̍ŋ.

³Wānāā māndāā lāsāa̍ ā chō cha᷄ŋnda̍ kɔ̄ltā tāmbɛ̍i̍la̍ŋ kpe̍e̍kpe̍i̍, kāni̍ fo̍ndōle̍, fo̍ndāŋndā kɛ̄ndɛ̄ kɛ̍ndɛ̄lā chɔ̄lūāā ndāa̍ ā kūā di̍o̍la̍ŋ nda̍ŋ kpo̍u̍, lā chūū tɛ̄ɛ̄mbūū. Lā ya᷄ŋ ndɔ̍ ni᷅la̍ŋ mī lā tūēī kpɔ̍kūŋnda̍ pɛ̄ɛ̄līa̍a̍. Būndɛ̍ bɛ̍ndū ho̍lnu̍ŋ Chɔ̍ɔ̍dāŋ nda̍ŋ, mī kpɔ̍kūŋāā kāŋ nda̍ a̍a̍ hi̍nī le̍ni̍ŋ ndo̍ kpo̍u̍, ā chīi̍ ndu̍ pīɔ̄lɔ̄ɔ̍!

⁴O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nūu̍ ō dīmūl la̍ āā, “Kɔ̍ mā kɔ̍ nyu̍nā le̍ sāa̍ nda̍ pēndū ni᷅ŋ, ma̍ wā ni᷅ŋ ā kɛ̄sīāā le̍ dīyɔ̄ɔ̍ wa̍, mā bīī nda̍ le̍ māndāa̍.

⁵Sāa̍ ha̍ā, wānāa̍ pi̍a̍ndū nda̍ le̍ dīyɔ̄ɔ̍ wa̍, ā dīi̍ nda̍ bɛ̍ɛ̍, ā sɔ̍lā i̍sɔ̍ɔ̍ o̍ īsɔ̄ɔ̍ le̍. Wānāa̍ pi̍sī sāa̍ ha̍ā wāŋndā o̍ lābā wa̍, mā na᷄ŋ lākɔ̄l, mā dīmi̍ āā Mɛ̄lɛ̄ka̍ Ya̍a̍wɛ̄ɛ̄ ba̍li̍ka̍, a̍ to̍sa̍ mi̍ ŋ̄ sūl o̍ sāa̍ nāa̍ ni᷄ŋ. Wānāa̍ cho̍ bɛ̍ɛ̍ sa̍a̍ ha̍ā, māndāa̍ wa̍, īnyīɛ̍ɛ̍ bɛ̍ɛ̍ i̍ bi̍ī nda̍ le̍ sāa̍ ha̍ā mā chīēī chi̍e̍i̍ le̍ nda̍ pīŋī le̍.”

⁶Mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mī āā, “Nu̍a̍ā ko̍ni̍ i̍ yɔ̍nūŋ ni̍ŋ a̍ wāŋnda̍ o̍ lɛ̄ŋndē I̍sɔ̄lūɛ̍i̍le̍ŋ ni᷄ŋ ni̍. Īnyīɛ̍ɛ̍ bɛ̍ɛ̍ ya̍ Mɛ̍lɛ̄ka̍ I̍ nɔ᷅ lɛ̍ ni̍ŋ le̍ ŋ̄wāŋnda̍ chīe̍e̍ le̍. I̍ cho̍ tōsā mī wānā o̍ wānā si̍mnu᷄ŋ ya̍a̍mɔ̍ɔ̍nɔ̍ɔ̍ le̍ chāa̍ŋ ndɔ̍ nda̍ chīɛ̄ɛ̄li̍āŋ ndo̍, ndu̍yɛ̍ mī to̍sa̍ mī māsāa̍ cho̍ wāŋnda̍ chōo̍ wa̍, ā bīī wānāā nda̍ chō chōo̍ wa̍ māā lāchɛ̄. Māsāa̍ ha̍ā ā hūŋ ni̍ŋ a̍ dɛ̍nɛ̍ pa̍lāā bɛ̄ndōo̍ lɛ̄ŋndē I̍sɔ̄lūɛ̍i̍le̍ŋ ni̍ŋ. Ndu̍yɛ̍ īnyīɛ̍ɛ̍ bɛ̍ɛ̍ i̍ bi̍ī ya̍ ni̍ŋ le̍ wānā o̍ wānā mī chi̍i̍ndi̍a̍a̍ ndu̍ mī so̍li̍ ndu̍ māsāa̍ ha̍ā o̍ bā le̍.”

⁷O̍ ko̍ŋ, mi̍ ku̍ā nāa̍ wānāa̍ pi̍a̍ndū sa̍a̍ le̍ dīyɔ̄ɔ̍ wa̍ chūā. Ma̍ chūā ya̍ le̍ sāa̍ ndāa̍ wa̍ ni᷅ŋ ā kɛ̄sīāā le̍ dīyɔ̄ɔ̍ wa̍ māndāa̍. O̍ ko̍ŋ kɔ̍ɔ̍lī, mi̍ nu̍u̍wā yɔ̄mnde̍ ī ŋīi̍ŋ māā lātīnda̍, le̍ sāa̍ ha̍ā māndāa̍. Yɔ̄mīī ŋīi̍ŋnde̍ he̍ī, mi̍ ke̍ ō pīlɔ̄ɔ̍ dīōla̍ŋ āā, “Nyīnā Cha̍a̍,” mi̍ ke᷅ ō pīlɔ̍ɔ̍ dīōla̍ŋ āā, “Dīōm Pīlɔ̍ɔ̍.” O̍ ko̍ŋ kɔ̍ɔ̍lī, mi̍ ka̍ndū sāa̍ ha̍ā māndāa̍.

⁸Mɛ̄ɛ̍ ya̍ I̍ ka̍ndu̍ sāa̍ ha̍ā māndāa̍, o̍ pāŋge̍i̍ ī pīlɛ̍ ni᷄ŋ kpe̍, mi̍ di̍ī wānāā māndāā lāsāa̍ ā pīli̍a̍a̍ ā yāa̍. O̍ ko̍ŋ kɔ̍ɔ̍lī, I̍ ta̍mbū kɔ̄l a̍ sāa̍ ha̍ā. Mi̍ sāa̍ ha̍ā tūl la̍ yɛ̄le̍ŋ.

⁹Mi̍ di̍mūl nda̍ āā, “I̍ cho̍ lɛ̍ hīōūwɔ̄ɔ̍ lāchī a̍ nya̍ māndā le̍. A̍ nɔ̍ le̍ pīɔ̍mndo̍ sɔ̄lāa̍ wa̍, ā sɔ̄la̍ pi̍ɔ̍mndo̍. Ā nda̍ nɔ̄ mā tɛ̄ɛ̄mbu̍u̍ wa̍, ā tɛ̄ɛ̄mbu̍u̍ nda̍. A̍ cho̍ lō yōōmū wa̍, nda̍ pi̍la̍ ā dīūwa᷅ŋ mā dīāŋna᷅ŋ.”

¹⁰O̍ ko̍ŋ, mi̍ chu̍ā tīnda̍ ya̍ I̍ ke̍ dīōla̍ŋ āā Nyīnā Cha̍a̍ wo̍, mi̍ ya᷅m. Le̍ chɔ̄mndo̍ māā kpe̍ma̍ Mɛ̄lɛ̄ka̍ Ya̍a̍wɛ̄ɛ̄ o̍ yi̍i̍ a̍ wāŋnda̍ o̍ chi̍e̍ēŋndo̍ ni᷄ŋ kpo̍u̍ wo̍, māā kpe̍ma̍ ko̍ŋ ō tāmbu̍.

¹¹Ndu̍yɛ̍ mi̍ kpe̍ma̍ ko̍ŋ ō tāmbū pāa̍le̍ le̍ŋ. Wānāa̍ pi̍a̍ndū sa̍a̍ le̍ pīsīo̍o̍ wa̍, ā ya̍ I̍ wa̍ sāa̍ ndāa̍ māndāa̍ wa̍, ā wa̍ ya̍ mɛ̄ɛ̄nda᷄ŋndo̍ o̍ nyɛ̄ o̍ nyɛ̄ ya̍ I̍ wa̍ tōsāa̍. O̍ ko̍ŋ, ma̍ sīnā māā Mɛ̄lɛ̄ka̍ Ya̍a̍wɛ̄ɛ̍ wa̍ sūɛ̍i̍ nāa̍ ya̍ chu̍a̍ ni̍.

¹²Mi̍ lo᷅ o̍ ko̍ŋ mi̍ di̍mūl nda̍ a̍a̍, “Tē lā yīya̍ŋ pɛ̍ māā, I̍ nɔ̍ mī sɔ̍la̍ pāāwā nūu̍ le̍ sāa̍ nya̍a̍ ya̍ I̍ wa̍ māndāa̍ wa̍, mɛ̄ɛ̍ lā ke̍ ya̍. Kɛ̍ tē lā yīya̍ŋ pɛ̍ māā I̍ nɔ̍ mī sɔ̍la̍ pāāwā le̍, mɛ̄ɛ̍ ō wa̍ le̍nde̍.” O̍ ko̍ŋ, ma̍ pāāwā ya̍ ka̍ni̍ŋ hu̍mbo᷄ŋ be̍le̍-ya̍a̍, le̍ sāa̍ ndāa̍ ya̍ I̍ wa̍ māndāa̍ wa̍.

¹³O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl la̍ āā, “Chu̍a̍ nyɛ᷅ sɔ̄lāā ko̍ŋ, mā kɔ̍ kɛ̍sī ndu̍ o̍ fo̍ndāŋ kɛ̄sīāā nyɛ̄ sɔ̄lāa̍ o̍ chīɛ̄ī nī so̍līāā lāsa̍lāa̍. O̍ ko̍ŋ, mi̍ chu̍ā ka̍ni̍ŋ hu̍mbūŋ be̍le̍-ya̍a̍ mu̍ŋ, ka̍ni̍ŋ nda̍ chu̍a̍ mu̍ŋ māā ŋ̄ chō ka̍ni̍ŋ bɛ̍ndū le̍ ya̍ pāāwāa̍ wo̍ŋ, mi̍ kɔ̍ kɛ̍sī mu̍ŋ o̍ fo̍ndāŋ kɛ̄sīāā nyɛ̄ sɔ̄lāa̍ o̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍.”

¹⁴O̍ ko̍ŋ kɔ̍ɔ̍lī, mi̍ chu̍ā tīnda̍ ya̍ I̍ ke̍ dīōla̍ŋ āā, “Dīōm Pīlɔ̍ɔ̍ wo̍,” mi̍ ya᷅m. Le̍ chɔ̄mndo̍ māā dīōm pīlɛ̍ īwānāya̍ wa̍ Chu̍dā tɛ̍ɛ̄ŋ nda̍ I̍sɔ̄lūɛ̄ī yo̍ ō tāmbu̍.

¹⁵O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl la̍ āā, “Kɔ̍ mā kɔ̍ si̍mnu᷄ŋ vɛ̍lɛ̄ wānā ma̍ndāā lāsāā. Kɛ̍ te̍le̍ŋndo̍ ho̍ō ndu̍, ā nɔ̄ mā wa̍ wānā ma̍ndāā lāsāa̍, o̍ cho̍ŋnu̍ŋ fo̍ndō fu̍u̍, ō būūla̍ŋ le̍ sāa̍ ndūa̍a̍ le̍ wo̍.

¹⁶Nyɛ̄ ko̍ŋ si̍m le̍ ndu̍ wo̍ cho̍ ni̍, māā le̍ chɔ̄mndo̍ a̍ mɛ̄ɛ̍ wāna̍ ya̍ I̍ hɛ̍lī ni̍ŋ mī kɛ̍si̍ ndu̍ lɛ᷅ŋnde̍ŋ nde᷅ŋ chīla̍ŋ ndo̍, ō bīī ni̍ŋ lɛ̄ŋnde̍ŋ nde᷅ŋ yɛ̍. Wāŋndo̍ ho̍ō, ō wā ni̍ŋ ma̍wa̍ā mɛ̄ɛ̍ wānā ma̍ndāā lāsāa̍ o̍ bu̍u̍lāŋ ho̍ō le̍ sāa̍ ndūa̍a̍ le̍ wo̍ ō wā yɛ̄. Wānā ma̍ndāā lāsāā wāā nu̍a̍ā, sāa̍ ndūa̍a̍ ā lāāsi̍a̍ŋ bɛ̍ɛ̍, ō bu̍u̍lāŋ le̍ nda̍ nūūwā le̍, ō he̍ndū sa̍a̍ ndūāā chu̍a̍ūwa̍ hɔ̄lte̍ŋ kɔ̄ɔ̄lī le̍. Sāa̍ ndūa̍a̍ ō pīlɛ̍ yɔ̄ŋu̍lu̍ŋ bɛ̍ɛ̍ ō chi̍ɔ̍u̍ ndu̍ le̍, ndu̍yɛ̍ a̍ cho̍ kɛ̍ndi̍a̍a̍ wa̍ bɛ̍ɛ̍, ō bu̍u̍lāŋ le̍ nda̍ yɔ̄ɔ̄, le̍ lādīo̍ le̍. Nyɛ̄ o̍ ha̍ū ba̍ su̍e̍e̍ wo̍, mɛ̄ɛ̍ le̍ sāā che̍lu̍lɛ̍i̍ya̍a̍ kɛ̍ndɛ̄ kɛ̍ndīa̍a̍ dīūwo̍ mbō dīā. Tē ō chīi̍ pɛ̍ vi̍sīo̍ŋ sōōlūū kpo̍u̍, ō mɛ̄i̍ pāāla̍ŋ wa̍ŋgi̍li̍nya̍ŋ.

¹⁷Nyɛ̄ pālāā bɛ̄ndōo̍ ō wā ni̍ŋ le̍ wānā ma̍ndāā lāsāā fo̍ndō fu̍u̍wo̍ ho̍ō, o̍ ma̍l ho̍ō sāa̍ nīa̍a̍ ma̍ chūū lāāsīa̍ŋ ndo̍. Mūɛ̄ī fāŋīī ya̍a̍mɔ̍ɔ̍wa̍ ī chō ndu̍ hūnɔ̄ɔ̄ bāa̍ kōŋɔ̄ɔ̄, o̍ ko̍ŋ kɔ̍ɔ̍lī, mī ī sōŋ ndu̍ hɔ̄ltē bā kɛ̄ndɛ̄le̍ŋ. Bāa̍ chō ndu̍ hūnɔ̄ɔ̄ vēsā, o̍ ko̍ŋ kɔ̍ɔ̍lī, mī hɔ̄ltē ndɔ̄le̍ bā kɛ̄ndɛ̄ le̍ŋ lē tāmbu̍.”