Read Southern Kisi Sɛ̄kāla̍yā 12 Bible Online

Sɛ̄kāla̍yā 12 - Southern Kisi bible

Sɛ̄kāla̍yā 12

¹O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ ke᷅ ya̍ yōōŋgōo̍ ho̍ō a̍ I̍sɔ̄lūɛ̄ī o̍kɔ̄ɔ̄. Mi̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ to̍o̍si̍a̍a̍ ha̍la̍a̍ chōo̍ cho̍o̍ a̍ chi̍e̍ēŋndo̍, o̍ ko̍ŋ kɔ̍ɔ̍lī, mbo̍ dūāū wāna̍ chi̍o̍o̍ yōōmōo̍ o̍ mīli̍ŋ ndo̍, ō dīmī āā,

²“I̍ cho̍ to̍sā mī Chūlu̍sɛ̄lɛ̄m o̍ si̍mnu᷄ŋ māā mūɛ̄īmā tāāla᷄ŋ, le̍ ya̍a̍mɔ̍ɔ̍wa̍a̍ ndūa̍a̍. Chūlu̍sɛ̄lɛ̄m cho̍ to̍sā mī lɛ̄ŋīi̍ ba̍lu̍ ndu̍ ve̍ ī yɔ̄nu̍ŋ mɛ̄ɛ̍ wāŋndo̍ ō kōl nu̍a̍ā mūɛ̄īya̍ŋ mī mā bīī ndu̍ yɛ̍. Ya̍a̍mɔ̍ɔ̍wa̍ chō hūnɔ̄ɔ̄ Chūlu̍sɛ̄lɛ̄m dɔ̄wɔ̄ɔ̄ o̍ pi̍ŋndo̍ ni̍ŋ, o̍ ko̍ŋ kɔ̍ɔ̍lī, mā dɔ̄ū vɛ̄lɛ̄ chi̍o̍o̍ŋ ŋ̄pīlɔ̍ŋ o̍ lɛ̄ŋndē Chu̍dāle̍ŋ ni᷄ŋ o̍ pi̍ŋndo̍ ni᷄ŋ kpɔ̍kɔ̍su̍.

³Lɛ̄ŋnde̍ o̍ chi̍e̍ēŋndo̍ ni᷄ŋ kpo̍u̍, Ī cho̍ hūnɔ̄ɔ̄ chūūŋgi̍āŋ na̍a̍ pi᷅lɛ̍ le̍ sɔ̍ŋgɔ̍ɔ̍ a̍ Chūlu̍sɛ̄lɛ̄m. Kɛ̍ a̍ te̍le̍ŋ ko̍ŋ, I̍ cho̍ tōsā mī Chūlu̍sɛ̄lɛ̄m o̍ si̍mnu᷄ŋ mɛ̄ɛ̍ pōū lūsu̍lɛ̍i̍ bɛ̄ndōo̍ ō wā nu̍a̍ā yɛ̍. Lēlɛ̄ŋ o̍ lēlɛ᷄ŋ le̍ chīŋa̍la᷅ŋ ndu̍ le̍ ndu̍ fāŋāa̍ o̍ fo̍ndāŋ ndɔ̄ɔ̍ pɛ̍, lɛ̄ŋndē lēŋ lē būwa̍ īkpɛ̄ndɛ̍.

⁴Tē te̍le̍ŋ ko̍ŋ ō fūūlu̍u̍ pɛ̍, ya̍a̍mɔ̍ɔ̍wa̍a̍ chi̍ŋa̍la᷅ŋ ni̍ŋ Chūlu̍sɛ̄lɛ̄m nda̍, I̍ cho̍ tōsā mī sīōōŋīī bɛ̄ndūe̍i̍ bīī su̍a̍ā ndāa̍ chɔ̄ūwa̍, ndu̍yɛ̍ mī to̍sa̍, mī pūa̍a̍ chɔ̄ūwāa̍ cho̍ o̍ su̍a̍ā kāŋ chōo̍ wa̍ ā yɔ̄nu̍ŋ māā wānāā sēēmɛ̍i̍ a̍ sīōōŋnde̍. I̍ cho̍ wāŋnda̍ Chu̍dā hɔ̄lte̍ŋ hāndɔ̄ɔ̄ chōo̍, mī wa̍ nda̍ māndāa̍. Kɛ̍ ya̍a̍mɔ̍ɔ̍wa̍a̍ ndāa̍ nda̍ nda̍, mī su̍u̍mi̍a̍a̍ su̍a̍ā ndāa̍ chɔ̄ūwa̍ kpu̍lūku̍.

⁵A̍ bōōndi̍i̍ ke̍ŋ, wānāa̍ cho̍ o̍ būŋgāŋ yɛ̍ yi̍ɔ̍ɔ̍ŋ ni̍ŋ o̍ lɛ̄ŋndē Chu̍dāle̍ŋ ni᷄ŋ nda̍ kpo̍u̍, ā chō dīmu̍la᷅ŋ māā, Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍, ndu̍ ke̍ wānāā ndūa̍a̍ cho̍ Chūlu̍sɛ̄lɛ̄m nda̍ kpāāyāa̍ ho̍ō ni̍.”

⁶A̍ te̍le̍ŋ ko̍ŋ, I̍ cho̍ tōsā mī Chu̍dā o̍ wa̍ a̍ ya̍a̍mɔ̍ɔ̍wa̍a̍ ndūa̍a̍ mɛ̄ɛ̍ yīŋnde̍ŋ lē chō nu̍a̍ā a̍ yɔ̄mīī ku̍ndɛ̄ī vēsɛ̍i̍ye̍ yɛ̍. Ā wā ni̍ŋ vɛ̍lɛ̄ māwāā a̍ ya̍a̍mɔ̍ɔ̍wa̍a̍ ndāa̍ mɛ̄ɛ̍ nda̍ kīālū nu̍a̍ā māālo̍ŋ, mā yīū yi̍u̍ mu̍ŋ, mī yīŋnde̍ŋ lē lōm mu̍ŋ yɛ̍, le̍nde̍ I̍sɔ̄lūɛ̄ī o̍ wa̍ ni᷄ŋ a̍ lɛ̄ŋīi̍ ba̍lu̍ ndu̍ ve̍ ni̍. Lɛ̄ŋīi̍ ba̍lu̍ ndu̍ ve̍ kpo̍u̍, ō chō ndi̍ hūnɔ̄ɔ̄ tɛ̄ɛ̄mbūū, mɛ̄ɛ̍ yīŋnde̍ŋ lē kēlēŋā nu̍a̍ā nyɔ̄ɔ̍ tɛ̄ɛ̄mbūū yɛ̍. Kɛ̍ mī Chūlu̍sɛ̄lɛ̄m ndu̍ wa̍ŋnu̍ŋ o̍ bā ndɔ̄ɔ̍ chōo̍ yɛ̍lɛ̍kɛ̍lɛ̍ɛ̍, nyɛ̄ o̍ nyɛ̄ yɔ̄nūŋ ndu̍ le̍.

⁷Wāŋnda̍ Chu̍dā, nda̍ fɛ̍lɛ̍ŋ ya̍ Mɛ̍lɛ̄ka̍ Ya̍a̍wɛ̄ɛ̄ I̍ ke᷅ ni̍ŋ kpa̍a̍yāa̍ le̍ mā yēm ya̍a̍mɔ̍ɔ̍wa̍a̍ ndāa̍. Ko̍ŋ to̍sā ni̍ wānāa̍ fu̍la̍ o̍ pūlāle̍ Dēēve̍le̍ŋ chōo̍ wa̍, a̍ wānāa̍ cho̍ Chūlu̍sɛ̄lɛ̄m chi̍e̍e̍ wa̍, bɛ̄ɛ̄le̍ ndā nɔ̄ le̍ sɔ̄lāa̍ le̍ŋ, lē hi̍ū bɛ̄ɛ̄le̍ wāŋnda̍ Chu̍dā a̍ nɔ̍ le̍ sɔ̄lāa̍ le̍ŋ te̍.

⁸Ndu̍yɛ̍ a̍ te̍le̍ŋ ko̍ŋ, ya̍ Mɛ̄lɛ̄ka̍ Ya̍a̍wɛ̄ɛ̄, I̍ cho̍ wāŋnda̍ Chūlu̍sɛ̄lɛ̄m chi̍e̍e̍ ma̍ndā. Wānāa̍ cho̍ bɛ̍ɛ̍ nda̍ tɛ̄ɛ̄ŋ ma̍ wū dīāllo̍ŋ ma̍ hīāū ā pīli̍a̍a̍ kpo̍u̍ wa̍, I̍ cho̍ tōsā mā sīmnu᷄ŋ wa̍nāā kpāāyāā bɛ̍ndū, mā wa̍ mɛ̄ɛ̍ Dēēve̍ wa̍ yɛ̍. Ndu̍yɛ̍ wānāa̍ fu̍la̍ o̍ pūlāle̍ Dēēve̍le̍ŋ chōo̍ wa̍, māsāle̍ ndāle̍ŋ lē wā ni̍ŋ ko̍ mɛ̄ɛ̍ māsāle̍ ya̍ Mɛ̍lɛ̄ka̍le̍ŋ lē chō yɛ̍. Wāŋnda̍ chūā ni̍ŋ yu̍ŋgu̍ Dēēve̍ wo̍, a̍ wa᷅ ni̍ŋ wa᷅ŋnda̍ chīla̍ŋ nda̍ mɛ̄ɛ̍ ki̍i̍la̍a̍ ya̍ Mɛ̍lɛ̄ka̍ Ya̍a̍wɛ̄ɛ̄ wa̍ ā chō yɛ̍.

⁹A̍ te̍le̍ŋ ko̍ŋ, lēlɛ̄ŋ o̍ lēlɛ᷄ŋ le̍ chīŋa̍la᷅ŋ Chūlu̍sɛ̄lɛ̄m a̍ sɔ̍ŋgɔ̄ɔ̍ pɛ̍, lɛ̄ŋndē lēŋ ya̍ Mɛ̍lɛ̄ka̍ I̍ tɛ̍ɛ̍mbu̍u̍ le̍ŋ.

¹⁰Wānāa̍ fu̍la̍ o̍ pūlāle̍ Dēēve̍le̍ŋ chōo̍ wa̍ ni̍, a̍ wānāā tūa̍a̍ cho̍ Chūlu̍sɛ̄lɛ̄m chi̍e̍e̍ wa̍, I̍ cho̍ tōsā mā nɔ̄ kɔ̄ltā īnyīɛ̍ɛ̍ la̍ŋ, ndu̍yɛ̍ o̍ ko̍ŋ kɔ̍ɔ̍lī, mī to̍sa̍ mā nɔ̄ kɔ̄ltā pīɛ̄īyāā ya̍ Mɛ̄lɛ̄ka̍ la̍ŋ. Ā mɛ̄ɛ̄ndāŋ ni̍ŋ wa᷅na̍ nda̍ chūkū a̍ ba̍llo̍ wo̍, mī nyīɛ̍ɛ̍ye̍ bīī nda̍ le̍ ndu̍, mā cha᷄ŋ cha᷄ŋ īmɔ̍nɔ̍ɔ̍. Mɛ̄ɛ̍ wāŋndo̍ chūālē ndɔ̄le̍ pi᷅lɛ̍ le̍ŋ lē wū nu̍a̍ā mbō wa̍ cha᷄ŋ īmɔ̍nɛ̍ ko̍ŋ yɛ̍, le̍nde̍ nda̍ wā ni̍ŋ cha̍ŋndo̍ le̍ ndu̍ ni̍. Mɛ̄ɛ̍ wāŋndo̍ po̍ ndɔ̍ tāso̍o̍ ō wū nu̍a̍ā mī mɔ̍nɛ̍i̍ bɛ̍ndūī kēŋ ī wa̍ o̍ kɔ̄l ndɔ̄ɔ̍ ni᷄ŋ yɛ̍, le̍nde̍ mɔ̍nɛ̍i̍ wa̍ ni̍ŋ o̍ kɔ̄ltā ndāla̍ŋ ni᷄ŋ le̍ wānā ko̍ŋ ni̍.

¹¹Tē te̍le̍ŋ ko̍ŋ ō fūūlu̍u̍ pɛ̍, cha᷄ŋnda̍ŋ lā tīū ni̍ŋ Chūlu̍sɛ̄lɛ̄m chi̍e̍e̍ kpo̍u̍. Ī yɔ̄nūŋ ni̍ŋ ko̍ a̍ te̍le̍ŋ ko̍ŋ, mɛ̄ɛ̍ I̍ yɔ̍nu̍ŋ o̍ lɛ̄ŋndē dɛ̍ŋgbɛ̍le̍ŋ Mɛ̍ki̍dɔ̄ɔ̄, bōōndi̍i̍ wāŋnda̍ ā wa̍ cha̍ŋnda̍ŋ le̍ Hādādī Lu̍i̍mɔ̄ŋ nde̍ yɛ̍.

¹²Yu̍ŋgu̍ o̍ yu̍ŋgu̍ cho̍ o̍ lɛ̄ŋnde̍ŋ nde᷅ŋ ni᷄ŋ, ā chō hūnɔ̄ɔ̍ mɔ̍nɛ̍i̍ bīyɔ̄ɔ̄ o̍ kɔ̄ltā ndāla̍ŋ ni᷄ŋ, ndu̍yɛ̍ mā cha᷄ŋ. Tē te̍le̍ŋ ko̍ŋ ō fūūlu̍u̍ pɛ̍, wāŋnda̍ a̍ yu̍ŋgu̍la̍ŋ nda̍ wā ni̍ŋ cha̍ŋnda̍ŋ ni̍. Yu̍ŋgu̍ wa᷅ ko̍ cha̍ŋndo̍, tē pūa̍a̍ ā dīīnu᷄ŋ pɛ̍ ku̍ndā, lāāndāā ndāa̍ ā dīīnu᷄ŋ ku̍ndā. Yu̍ŋgu̍ fu̍la̍ o̍ pūlāle̍ Dēēve̍le̍ŋ chōo̍ wo̍, ā wā ni̍ŋ cha̍ŋndo̍ ku̍ndā, mī yu̍ŋgu̍ fu̍la̍ o̍ pūlāle̍ Ne̍tāŋ nde̍ŋ chōo̍ wo̍, nda̍ wa̍ cha᷄ŋndo̍ ku̍ndā, mī yu̍ŋgu̍ fu̍la̍ o̍ pūlāle̍ Li̍va̍īle̍ŋ chōo̍ wo̍, nda̍ wa̍ cha᷄ŋndo̍ ku̍ndā, mi̍ yu̍ŋgu̍ fu̍la̍ o̍ pūlāle̍ Si̍mɛ̄īle̍ŋ chōo̍ wo̍, nda̍ wa̍ cha᷄ŋndo̍ ku̍ndā ndā. O̍ ko̍ŋ kɔ̍ɔ̍lī, yu̍ŋgu̍la̍ŋ lā pīlɛ̍ la̍ŋ bɛ̍ɛ̍ kpo̍u̍ mī la̍ dīīnu᷄ŋ a̍ ku̍ndāla̍ŋ le̍nde̍ yɛ̍ yɛ̍ le̍ cha᷄ŋndo̍.