Read Southern Kisi Sɛ̄kāla̍yā 13 Bible Online

Sɛ̄kāla̍yā 13 - Southern Kisi bible

Sɛ̄kāla̍yā 13

¹O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ hi̍a̍ū lāchī a̍ sūɛ̍i̍, mbo̍ dīmī āā, “Te̍le̍ŋ cho̍ hūnɔ̄ɔ̄ fūūlūū, mɛ̄ŋnda̍ŋ mā chō būlī lɛ̄ŋ, le̍ yu̍ŋgu̍ Dēēve̍ wo̍, a̍ wānāā tūa̍a̍ cho̍ Chūlu̍sɛ̄lɛ̄m nda̍, le̍ yɔ̄ŋndā ndāla̍ wɔ̍ɔ̍ŋnda̍ŋ tɔ̄ɔ̍, a̍ nīīlūlā ndāla̍ nɔ̍ɔ̍lɛ̍i̍la̍ŋ.”

²Mi̍ Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍, ō hīāū lāchī a̍ sūɛ̍i̍, mbo̍ dīmī āā, “Tē te̍le̍ŋ ko̍ŋ ō fūūlu̍u̍ pɛ̍, I̍ cho̍ chīī a̍ pīɔ̄mnda̍ o̍ lɛ̄ŋnde̍ŋ nde᷅ŋ ni᷄ŋ kpo̍u̍, ndu̍yɛ̍ mī to̍sa̍ wānā o̍ wānā o̍ yi̍yāŋ ndɛ̍ bɛ̍ɛ̍ a̍ nda̍ o̍kɔ̄ɔ̄ le̍. O̍ ko̍ŋ kɔ̍ɔ̍lī, wānāa̍ di̍mi̍ māā wānāa̍ su̍a̍ā le̍ ya̍ Mɛ̄lɛ̄ka̍ wa̍ nda̍ chō ni̍ wa̍, I̍ cho̍ hūnɔ̄ɔ̄ chīī a̍ nda̍, ndu̍yɛ̍ mī to̍sa̍, wānā o̍ wānā o̍ nɔ᷅ lɛ̍ īyēēma̍ le̍ pīɔ̄m sōōlūū le̍.

³Tē te̍le̍ŋ ko̍ŋ ō fūūlu̍u̍ pɛ̍, mī chi̍i̍ a̍ wānāā kāŋ, wāŋndo̍ ō hūŋ ni̍ŋ mbō hīōū lāchī a̍ wāŋnda̍ yōōŋgūla̍ŋ dīmūllo̍ māā wāna̍ su̍a̍ā le̍ ya̍ Mɛ̄lɛ̄ka̍ wo̍ o̍ cho̍ ni̍. O̍ ko̍ŋ, mī fi̍nyā ndɔ̄ nda̍ kāla̍ ndɔ̄ a̍ di̍mu̍l ndu̍ āā, ‘Ā chō pīɔ̍mndo̍ sɔ̄lā le̍ nyɛ̄ ŋ̄ chō ko̍ŋ di̍mīo̍o̍ wo̍, fo̍ndōle̍, nyɛ̄ o̍ nyɛ̄ ŋ̄ chō dīmīo̍o̍ chōōla̍ŋ ko̍ni̍ ŋ̄ chō dīmīo̍o̍ ni̍, ō cho̍ Mɛ̍lɛ̄ka̍ Ya̍a̍wɛ̄ɛ̄ le̍ o̍ ve᷅mm nu̍m te̍.’ Tē wānā ko̍ŋ ō ba̍ŋ pɛ̍ ka̍ŋga̍la̍ŋ, mbō hīōū lāchī a̍ wāŋnda̍ yōōŋgūla̍ŋ dīmūllo̍, wānā ko̍ŋ, fi̍nyā ndɔ̄ nda̍ kāla̍ ndɔ̄, nda̍ kɛ̍sɛ̍ kɛ̍sɛ̍ cho̍ ndu̍ dīyɔ̄ɔ̄ a̍ mūɛ̄ī fāŋnde̍ ni̍.

⁴Tē te̍le̍ŋ ko̍ŋ ō fūūlu̍u̍ pɛ̍, wānāa̍ di̍mi̍ māā wānāa̍ su̍a̍ā le̍ ya̍ Mɛ̄lɛ̄ka̍ wa̍ nda̍ chō ni̍ wa̍, si̍ɔ̍mbu̍la̍ŋ lā chō nda̍ hūnɔ̄ɔ̄ bīyɔ̄ɔ̄ a̍ yi̍lāŋndā ndāla̍ŋ. Dōmāla̍ yu̍fɛ̄lɛ̄ yūfɛ̄lɛ̄lā nda̍ a̍a̍ wo̍u̍nūŋ pa̍a̍ndū le̍ wāŋnda̍ hūīyo̍ la̍ŋ, ā chō la̍ŋ hūnɔ̄ɔ̄ kɛ̄ɛ̄, ā nɔ̍lā lɛ̍ ni̍ŋ mā wōūnu̍ŋ nda̍ŋ te̍.

⁵Wāŋndo̍ chō hūnɔ̄ɔ̄ vīīnɔ᷄ŋ mbō dīmi̍ āā, ‘I̍ cho̍ wa᷅na̍ su̍a̍ā le̍ Mɛ̄lɛ̄ka̍ le̍, wāna̍ wa̍li̍ yōndōo̍ ya̍ I̍ cho̍ ni̍. Kāni̍ ya̍ I̍ chɛ̍ŋ wa̍li̍ īchīɔ̍ɔ̍ ko̍ni̍ ya̍ I̍ to̍sā ni̍.’

⁶O̍ ko̍ŋ, tē wāŋndo̍ nyūna̍ ndu̍ pɛ̍ māā, pāūvīī yɛ̄ɛ̍nɛ̍ i̍ cho̍ yɛ̄ ni᷅ŋ he̍ī nu̍m lēkɔ̄ɔ̍? Ō dīmi̍ māā, o̍ chāa̍ŋ nūu̍ lo̍ chi̍ɛ̍ī ni̍ŋ nda̍ bōōlu̍u̍ ya̍ ni̍.”

⁷O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍ ō dīmi̍ āā, “Mūɛ̄ī fāŋnde̍, chɔ̍ŋ mā chīŋa̍la᷅ŋ wa᷅na̍ nī ma̍ndāā lāsāa̍, wāna̍ cho̍ ya̍ īkɛ̄i̍ yo̍. So̍ŋ wāna̍ cho̍ sāa̍ māndāa̍ wo̍, mī sāa̍ o̍ cho̍ māndāa̍ wa̍ ā sɛ̄ŋi̍ŋ. I̍ cho̍ hūnɔ̄ɔ̄ sāā chu̍a̍u̍wāā cho̍ nda̍ tɛ̄ɛ̄ŋ nda̍ chīŋa̍la᷅ŋ, mī tɛ̍ɛ̍mbu̍u̍ nda̍.”

⁸Mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mī āā, “Tē wāŋnda̍ o̍ lɛ̄ŋnde̍ŋ nde᷅ŋ ni᷄ŋ kpo̍u̍, nda̍ a̍a̍ wa̍ ā dīyāā pīɔ̄ūwāā sālā yāa̍ pɛ̍, ku̍ndālā tīɔ̍ɔ̍ŋnda̍ŋ ki̍nɛ̍i̍, I̍ cho̍ tōsā mā hu᷄ŋ wa᷅ ā tɛ̄ɛ̄mbāā kpo̍u̍, ō pīlɛ̍ bɛ̍ɛ̍ ō lo᷅ ni᷅ŋ yo̍o̍mū le̍. O̍ ko̍ŋ kɔ̍ɔ̍lī, mī to̍sa̍ mī ku̍ndāa̍ ō pīlɔ̍ɔ̍ ndu̍ lo̍ yōōmū.

⁹I̍ cho̍ nda̍ hūnɔ̄ɔ̄ tōfāa̍ kē, ndu̍yɛ̍ mī lo̍ o̍ ko̍ŋ mī di̍ndi̍ nda̍, mɛ̄ɛ̍ nda̍ dīndī nu̍a̍ā ka̍ni̍i̍ hu̍mbūe̍i̍ a̍ yīŋnde̍ŋ yɛ̍, mā sīmnu᷄ŋ a̍ di̍a̍ndāā. Mɛ̄ɛ̍ nda̍ tōfā nu̍a̍ā ka̍ni̍i̍ si̍a̍ŋɛ̄i̍ a̍ yīŋnde̍ŋ yɛ̍, le̍nde̍ ya̍ I̍ to̍fā ni̍ŋ nda̍ ni̍. Ā chō ya̍ hūnɔ̄ɔ̄ dīōm nyūnā le̍ nyɛ̄ nda̍ hāu̍ bā wo̍, ndu̍yɛ̍ mī mu̍li̍ nda̍ dīōm. I̍ cho̍ nda̍ hūnɔ̄ɔ̄ dīmūl māā wānāā nīa̍a̍ nda̍ chō ni̍, ndu̍yɛ̍ mī nda̍ bɛ̍ɛ̍ a̍ sɔ̍lɔ̍la̍ŋ wa᷅ŋnda̍ o̍ hɔ̄l māā ya̍ Mɛ̄lɛ̄ka̍ Ya̍a̍wɛ̄ɛ̄, ya̍ cho̍ Mɛ̄lɛ̄ka̍ ndāa̍ ni̍.”