Read Southern Kisi Sɛ̄kāla̍yā 14 Bible Online

Sɛ̄kāla̍yā 14 - Southern Kisi bible

Sɛ̄kāla̍yā 14

¹Pāa̍le̍ Mɛ̄lɛ̄ka̍ ya̍a̍wɛ̄ɛ̄ le̍ŋ lē chō o̍ nɛ̄ī. O̍ pāa̍le̍ le̍ŋ chōo̍, nyɛ̄m ya̍a̍mɔ̍ɔ̍wa̍a̍ nyāa̍ ā pūŋgā ni̍ŋ nya̍ o̍ lābā Chūlu̍sɛ̄lɛ̄m chi̍e̍e̍ wo̍ŋ, nya̍ pi̍la̍ o̍ hɔ̄l kpe̍e̍kpe̍i̍ nda̍ chō mu̍ŋ hūnɔ̄ɔ̄ pīɔ̄ūvi̍āŋ ni̍.

²Mɛ̄lɛ̄ka̍ Ya̍a̍wɛ̄ɛ̄ o̍ cho̍ hūnɔ̄ɔ̄ lɛ̄ŋnde̍ kpo̍u̍ chu̍u̍ŋgīāā nāa̍ pi᷅lɛ̍, le̍ mī ī hu᷄ŋ de᷅l Chūlu̍sɛ̄lɛ̄m chōo̍ a̍ sɔ̍ŋgɔ̄ɔ̍. Ā chō hūnɔ̄ɔ̄ Chūlu̍sɛ̄lɛ̄m bīyɔ̄ɔ̄, ndu̍yɛ̍ mā pūŋga̍ nyɛ̄ o̍ nyɛ̍ cho̍ chīɛ̄īla̍ŋ ni᷄ŋ. Wāŋ lāāndūa̍a̍ cho̍ Chūlu̍sɛ̄lɛ̄m nda̍, ā chō nda̍ hūnɔ̄ɔ̄ kpūūvīāā. Ndu̍yɛ̍ o̍ ko̍ŋ kɔ̍ɔ̍lī, wāŋnda̍ Chūlu̍sɛ̄lɛ̄m tɛ̄ndāa̍ tɛ̄ɛ̄ŋ ki̍nɛ̍i̍, a̍ chō nda̍ hūnɔ̄ɔ̄ bīū bīū mā kūɛ̄ a̍ nda̍ o̍ chɛ̄le̍ŋ ni᷄ŋ, o̍ ko̍ŋ kɔ̍ɔ̍lī, mī ku̍ndāa̍ ō pīlɔ̍ɔ̍ ki̍nɛ̍i̍ nda̍ lo᷄ Chūlu̍sɛ̄lɛ̄m.

³O̍ ko̍ŋ kɔ̍ɔ̍lī, Mɛ̄lɛ̄ka̍ Ya̍a̍wɛ̄ɛ̄ pi̍la̍ o̍ cho̍ lākɔ̄ mbō kɔ̍ sɔ̍ŋgā a̍ lɛ̄ŋnde̍ he̍ī, mɛ̄ɛ̍ o̍ sɔ̍ŋgā pāāndū a̍ ya̍a̍mɔ̍ɔ̍wa̍a̍ wānāā ndūa̍a̍ yɛ̍.

⁴O̍ pāa̍le̍ le̍ŋ chōo̍, ō chō lāsīsi̍ o̍ lūāŋīī ɔ̄li̍fīi̍ve̍ chōo̍, bā pāa̍le̍ŋ le̍ chāŋ Chūlu̍sɛ̄lɛ̄m ndo̍. Lūāŋīī ɔ̄li̍fīi̍ve̍ chō kīōlū tɛ̄ɛ̄ŋ kpa̍li̍, chɔ̍ŋ ba᷅ pāa̍le̍ŋ lē chāŋndo̍, mbō kūɛ̄ bā pāa̍le̍ŋ lē dēl lo̍, mī dɛ̍ŋgbɛ̍ bɛ̍ndōo̍ ō hīni̍ tɛ̄ɛ̄ŋ kpa̍la̍ŋ. Lūāŋnde̍ ī ti᷄ŋ ī chō lākɔ̄ bā lūāŋndo̍, mī ī ti᷄ŋ ī kūɛ̄ bā tōūwo̍.

⁵Dɛ̍ŋgbɛ̍ hi̍nī ni̍ŋ o̍ lūāŋnde̍ he̍ī tɛ̄ɛ̄ŋ ndo̍, o̍ dɛ̍ŋgbɛ̍ ko̍ŋ ni̍ŋ nya̍ kēēkū ni̍ŋ ni̍, mī lā nyāānu̍ŋ le̍ mī lā hɛ̄lu̍ŋ ya̍a̍mɔ̍ɔ̍wa̍a̍ nyāa̍. Bōōndi̍i̍ Yūsa̍yā o̍ wa̍ māsāa̍ Chu̍dā mi̍ lɛ̄ŋnde̍ŋ lē nyīīyā ve̍, mɛ̄ɛ̍ fi̍nyāā nyāā ma̍māa̍ ā nyāānu̍ŋ a̍ bōōndi̍i̍ ke̍ŋ yɛ̍, le̍nde̍ nya̍ nyāānūŋ ni̍ŋ ni̍. Tē ko̍ŋ o̍ hi̍o̍ū pɛ̍, Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nūu̍ ō hīŋ ni̍ko̍ a̍ ki̍i̍la̍a̍ ndūa̍a̍ kɔ̄ɔ̄lī.

⁶A̍ te̍le̍ŋ ko̍ŋ nyɛ̄ wa̍wo̍ŋ che̍le̍ŋ ō ve᷅m lɛ̍ ni᷄ŋ te̍, ndu̍yɛ̍ īhūēī bɛ̍ɛ̍ i̍ bi̍ī ni̍ŋ wa̍nā le̍.

⁷Mānyūm o̍ mānyūm mā ve᷅m ni̍ŋ te̍. Le̍ te̍le̍ŋ o̍ te̍le̍ŋ nyɛ̄ wa̍wo̍ŋndo̍ ō wā ni̍ŋ ni̍. Ndu̍yɛ̍ Mɛ̄lɛ̄ka̍ Ya̍a̍wɛ̄ɛ̄, ndu̍ pīlɛ̍ kpe̍ si̍nā bōōndi̍i̍ sūɛ̍i̍ he̍ī ī yɔ̄nūŋ ni̍ŋ nde̍ ni̍, wānā o̍ wānā che᷅le̍ŋ ō si̍nā le̍.

⁸A̍ te̍le̍ŋ ko̍ŋ, pēe̍ mɛ̄ŋma̍ yɔ̍ŋgū yo̍o̍mōo̍ wo̍ ō wā ni̍ŋ chɔ̍nɔ᷄ŋndo̍ Chūlu̍sɛ̄lɛ̄m, mbō hīāū ve̍llāa̍ vēllē. Pīo̍o̍ ho̍ō mɛ̄ŋmā ndūa̍ŋ, kpēŋgēi̍ ī pīlɛ̍i̍ ki̍nɛ̍i̍, ma᷅ŋ mā wā ni̍ŋ kɔ᷅la̍ŋ dēlɔ̄ɔ̍ o̍ pēe̍ mɛ̄ŋmā īhɛ᷄l nɔ̍ nya̍ā yōōmāā lēni᷄ŋ te̍ wo̍ chōo̍. Mī ma᷅ŋ mā kūā dēlɔ̄ɔ̍ o̍ Pēe̍ Mɛ̄ŋmā Īhɛ᷄llo̍ Mɛ̄dītālu̍e̍e̍nīāā cho̍o̍. Ndu̍yɛ̍ lēwɔ̄ɔ̄ ni̍, lēsīāl ni̍, pīo̍o̍ ho̍ō wā ni̍ŋ hi̍o̍u̍wɔ̄ɔ̍ ō ve̍lā le̍.

⁹Ndu̍yɛ̍ Mɛ̄lɛ̄ka̍ Ya̍a̍wɛ̄ɛ̄, ndu̍ pīlɛ̍ kpe̍ wa᷅ ni̍ŋ ma̍sāa̍ le̍ chi̍e̍ēŋndo̍ ho̍ō kpo̍u̍ ni̍. A̍ te̍le̍ŋ ko̍ŋ, Mɛ̄lɛ̄ka̍ Ya̍a̍wɛ̄ɛ̄, ndu̍ pīlɛ̍ kpe̍ wāŋnda̍ ā sōōlūū ni̍ŋ ni̍, ndu̍yɛ̍ a̍ dīōlā la̍ŋ ko̍ni̍ wāŋnda̍ ā sīnā ni̍ŋ ndu̍ ni̍.

¹⁰Lɛ̄ŋnde̍ŋ kpo̍u̍, chɔ̍ŋ Kɛ̍bā chi̍e̍e̍ bā lūāŋndo̍, mbō kūɛ̄ Lu̍i̍mɔ̄ŋ chi̍e̍e̍ bā tōūwo̍, lē chō hūnɔ̄ɔ̄ mūūli̍āŋ mī lē sīmnu᷄ŋ dɛ̍ŋgbɛ̍. Kɛ̍ Chūlu̍sɛ̄lɛ̄m ndu̍ cho̍ hūnɔ̄ɔ̄ hēlɔ̄ɔ̄ te̍mā lɛ̄ŋīi̍ ba̍lu̍ ndu̍ ve̍ tɛ̄ɛ̄ŋ, ndu̍yɛ̍ mbō lo̍ o̍ bā ndɔ̄ɔ̍ chōo̍. Chi̍o̍o̍ ō chāŋ ni̍ŋ o̍ dīō kpākīo̍o̍ Bɛ̍ŋnja̍mīŋ, mbō kūɛ̄ o̍ dīō kpākī lēsɔ̍ŋgi̍o̍o̍, nāa̍ dīō kpāki̍ tāso̍o̍ ō wa̍ wa̍, ndu̍yɛ̍ mbō chɛ᷄ŋ o̍ fo̍ndāŋ vīlɛ̄ī kālā ka̍la̍ nɔ̍ dīōla̍ŋ āā, Ha̍na̍nɛ̄l wo̍, mbō kūɛ̄ o̍ fo̍ndāŋ nda̍ wāāyīāā mu̍ɛ̍īmā māsāa̍ wo̍.

¹¹Chūlu̍sɛ̄lɛ̄m o̍ wa᷅ ni̍ŋ o̍ pi̍a̍ā a̍ wāŋndā chīe̍e̍ya̍, ndu̍yɛ̍ mī wānā o̍ wānā o̍ wa̍ŋnu̍ŋ o̍ bā ndɔ̄ɔ̍ chōo̍ yɛ̍lɛ̍kɛ̍lɛ̍ɛ̍. Ndu̍yɛ̍ le̍ fɛ̍ɛ̍ŋ a̍ fɛ̍ɛ̍ŋ I̍ tɛ̍ɛ̍mbūū lɛ̍ ndu̍ le̍.

¹²Lɛ̄ŋīi̍ de᷅l ni̍ŋ Chūlu̍sɛ̄lɛ̄m chōo̍ a̍ sɔ̍ŋgɔ̄ɔ̍ ve̍ Mɛ̄lɛ̄ka̍ Ya̍a̍wɛ̄ɛ̄ o̍ cho̍ to̍sā mī nāā wɔ̄ɔ̍ŋ wɔ̄ɔ̍ŋ bɛ̄ndōo̍ ō de᷄l nda̍ chōo̍. Wāŋnda̍ ha̍ā ā lō ni̍ŋ yōōmū mī dīāllūŋ nda᷄ŋ ŋ̄ sɛ̄. Hɔ̄lta̍ŋ lā chō nda̍ hūnɔ̄ɔ̄ sīɔ̄ lēni᷄ŋ, o̍ ko̍ŋ kɔ̍ɔ̍lī, mī dīɔ̄ɔ̄mūe̍i̍ nda̍ o̍ lāsōndō i̍ sɛ᷅.

¹³A̍ te̍le̍ŋ ko̍ŋ, Mɛ̄lɛ̄ka̍ Ya̍a̍wɛ̄ɛ̄ o̍ cho̍ tōsā mī sīōōŋīī bɛ̄ndūe̍i̍ ī bīī nda̍, ndu̍yɛ̍ o̍ ko̍ŋ kɔ̍ɔ̍lī, mbō tōsa̍ mī nda̍ pi̍la̍ ā sāāna᷅ŋ a̍ sɔ̍ŋgɔ̄ ŋ̄būŋndo̍ vēlāa̍ vēllē.

¹⁴Ndu̍yɛ̍, pūa̍a̍ Chu̍dā bɛ̍ɛ̍, ā sɔ̄ŋgā ni̍ŋ Chūlu̍sɛ̄lɛ̄m chi̍e̍e̍. Lɛ̄ŋīi̍ ba̍lu̍ Chūlu̍sɛ̄lɛ̄m nde̍, sūlta̍ cho̍ o̍ lɛ̄ŋīī kēŋ ni᷄ŋ nda̍ŋ ki̍nɛ̍i̍, wāŋnda̍ chō la̍ŋ hūnɔ̄ɔ̄ pūŋgā mā chūūŋgi̍a̍a̍ la̍ŋ nāa̍ pi᷅lɛ̍. Ā chūūŋgīāā ni̍ŋ ka̍ni̍ŋ si̍a̍ŋa᷄ŋ ta̍u̍ ta̍u̍, a̍ ka̍ni̍ŋ hu̍mbo᷄ŋ, o̍ ko̍ŋ kɔ̍ɔ̍lī a̍ kōlāla̍ŋ ta̍u̍ ta̍u̍.

¹⁵Ndu̍yɛ̍ nāā wɔ̄ɔ̍ŋ bɛ̄ndu̍ de᷅l ni̍ŋ lɛ᷅ŋnde̍ he̍ī chōo̍ wo̍, nāā pīlɛ̍ kōŋ ko̍ni̍ o̍ de᷅l ni̍ŋ vɛ̍lɛ̄ chɔ̄lūāā ndāa̍ chōo̍ kpo̍u̍, o̍ dɔ̍ɔ̍ŋgɔ̍la̍ ya̍a̍mɔ̍ɔ̍wa̍ ka̍ŋ ā chō a̍ chɔ̄lūāā ndāa̍ wa̍ ni̍. Su̍a̍a̍ ni̍, a̍ chɔ̄lūāā yɛ̄yi̍i̍ mu̍ūli̍āŋnda̍, a̍ nyɔ̍mi̍a̍a̍, a̍ sōfɛ̍li̍a̍a̍, o̍ ko̍ŋ kɔ̍ɔ̍lī, a̍ chɔ̄lūa̍a̍ ā pīli̍a̍a̍ kpo̍u̍, nāā kōŋ ko̍ni̍ cho̍ nda̍ dēlɔ̄ɔ̄ chōo̍ ni̍.

¹⁶Lɛ̄ŋīi̍ de᷅l ni̍ŋ Chūlu̍sɛ̄lɛ̄m chōo̍ a̍ sɔ̍ŋgɔ̄ɔ̍ ve̍, wānāā tūa̍a̍ lo᷅ ni̍ŋ yo̍o̍mū o̍ lɛ̄ŋīī kēŋ ni᷄ŋ nda̍, īwɔ̄sī o̍ īwɔ̄sī wānāā kāŋ ā wā ni̍ŋ hu̍nɔ̄ɔ̍ Chūlu̍sɛ̄lɛ̄m le̍ māsā bɛ̍ndōo̍ sōōlūūwo̍, ndu̍ yɔ̍nūŋ māā Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍ ni̍, ndu̍yɛ̍ a̍ le̍ bɔ̄ŋa᷅ŋ lābāfɛ̄i̍yo̍ bīyɔ̄ɔ̍.

¹⁷Lɛ̄ŋnde̍ o̍ chi̍e̍ēŋndo̍ ni᷄ŋ kpo̍u̍, lēlɛ̄ŋ o̍ lēlɛ᷄ŋ le̍ kɛ̍ɛ̍ le̍ kɔ̄la̍ŋ Chūlu̍sɛ̄lɛ̄m le̍ māsā bɛ̍ndōo̍ sōōlūūwo̍ pɛ̍, ndu̍ yɔ̍nūŋ māā Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍ ni̍, lɛ̄ŋndē lēŋ Mɛ̄lɛ̄ka̍ o̍ cho̍ tōsā pīɔ̄ɔ̄ o̍ pīɔ̄ɔ̄ ō se᷅ lo̍ŋ te̍.

¹⁸Ndu̍yɛ̍ wāŋnda̍ I̍chi̍pī bɛ̍ɛ̍, tē ā kɛ̄ɛ̍ le̍ kɔ̄la̍ŋ le̍ bɔ̄ŋa᷅ŋ lābāfɛ̄i̍yo̍ ho̍ō pɛ̍, dɛ̍nɛ̍ pa̍lāā Mɛ̄lɛ̄ka̍ Ya̍a̍wɛ̄ɛ̄ o̍ tu̍sī ni̍ŋ lɛ᷅ŋnde̍ ī pīlɛ̍i̍ chōo̍, a̍ kɛ̍ɛ̍ le̍ kɔ̄la̍ŋ le̍ bɔ̄ŋa᷅ŋ lābāfɛ̄i̍yo̍ ho̍ō wā wo̍, dɛ̍nɛ̍ pa̍lāā kōŋ ko̍ni̍ o̍ tu̍sī ni̍ŋ wa᷅ŋnda̍ I̍chi̍pi̍ chōo̍ ni̍.

¹⁹Wāŋnda̍ I̍chi̍pī a̍ lɛ̄ŋīī tūɛ̍i̍ kpo̍u̍, tē ā kɛ̄ɛ̍ le̍ kɔ̄la̍ŋ le̍ bɔ̄ŋa᷅ŋ lābāfɛ̄i̍yo̍ ho̍ō pɛ̍, dɛ̍nɛ̍ pa̍lāa̍ ko̍ŋ wa̍ ni᷄ŋ ko̍ŋ ni̍.

²⁰A̍ te̍le̍ŋ ko̍ŋ, nyɛ᷄m wa᷅ su̍a̍ā chɔ̄ūwa̍ ŋ̄ bāā māā ŋ̄ ba̍mbā wo̍ŋ bɛ̍ɛ̍, dīōmnda̍ŋ lā wā ni̍ŋ la̍ po̍o̍nyīāā lēchōo̍ āā, “Nyɛ᷄m cho̍ ŋ̄ yɔ̄ŋga᷄ŋ o̍ Mɛ̄lɛ̄ka̍ Ya̍a̍wɛ̄ɛ̄ lo̍ wo̍ŋ.” Ndu̍yɛ̍ o̍ ko̍ŋ kɔ̍ɔ̍lī, kɔ̄ɔ̄fɛ̍ɛ̄lā yāūwāāla̍ cho̍ o̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ la̍ŋ bɛ̍ɛ̍, mɛ̄ɛ̍ hɛ̄ŋgɛ̍i̍la̍ cho̍ lā kɛ̄sīāā ma̍āŋ Mɛ̄lɛ̄ka̍a̍ lāchī la̍ŋ lā chō lā dīāndāā Mɛ̄lɛ̄ka̍ o̍ hɔ̄l lɛ̍, le̍nde̍ kɔ̄ɔ̄fɛ̍ɛ̄lā lāŋ lā wā ni̍ŋ la̍ di̍a̍ndāā Mɛ̄lɛ̄ka̍ o̍ hɔ̄l ni̍.

²¹Ndu̍yɛ̍ kɔ̄ɔ̄fɛ̍ɛ̄ o̍ kɔ̄ɔ̄fɛ̍ɛ̄ yāūwāa̍ cho̍ Chūlu̍sɛ̄lɛ̄m chi̍e̍e̍, a̍ o̍ lɛ̄ŋndē Chu̍dāle̍ŋ ni̍ŋ kpo̍u̍, lā chō hūnɔ̄ɔ̄ sīmnɔ᷄ŋ la̍ di̍a̍ndāā Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍ o̍ hɔ̄l mī lā wa̍ lāyɔ̄ŋga᷄ŋ le̍ kpe̍ku̍ Mɛ̄lɛ̄ka̍a̍. Wānāa̍ hu᷅ŋ ni̍ŋ sa̍lāla̍ŋ sōlīo̍o̍ o̍ Mɛ̄lɛ̄ka̍ lo̍ wa̍, ā chūā ni̍ŋ kɔ̍ɔ̄fɛ̍ɛ̄ o̍ kɔ̄ɔ̄fɛ̍ɛ̄ nda̍ yēēma̍ le̍ vīsīŋ lāsa̍la᷄ŋ yāūwo̍ lēni᷄ŋ. A̍ te̍le̍ŋ ko̍ŋ, wānāā lēyākūa̍a̍ wa᷅ o̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍, Mɛ̄lɛ̄ka̍ nɔ̍ kpāāyāa̍ kpo̍u̍ wo̍ le̍ kɔ̄ɔ̄fɛ̍ɛ̄la̍ŋ pīsīo̍o̍ wa̍, ō pīlɛ̍ bɛ̍ɛ̍ ō ve᷅m lɛ̍ ni̍ŋ ndo̍ŋ te̍.