Read Southern Kisi Sɛ̄kāla̍yā 2 Bible Online

Sɛ̄kāla̍yā 2 - Southern Kisi bible

Sɛ̄kāla̍yā 2

¹O̍ ko̍ŋ kɔ̍ɔ̍lī, mi̍ cha᷅ vɛ̄lɛ̄ yi̍lāŋ chēle̍ŋ. O̍ yi̍lāŋndo̍ ho̍ō ni᷄ŋ, mi̍ cha᷅ pōo̍ a̍ yōōlē tūwāāle̍ŋ ndu̍ o̍ bā. Mi̍ I̍ nyu̍nā ndu̍ āā,

²“Kūɛ̍ɛ̍nɛ̍ ŋ̄ chō yɛ̄ kɔ̄la̍ŋ?” Mbo̍ mūlī āā, “I̍ cho̍ kɔ̄la̍ŋ le̍ Chūlu̍sɛ̄lɛ̄m tūūwo̍, le̍ mī si̍na̍ bu̍ ndɔ̄ɔ̍, a̍ bāndi̍i̍ ndūɛ̍i̍.”

³O̍ ko̍ŋ kɔ̍ɔ̍lī, mi̍ ki̍i̍la̍nɔ̍ Mɛ̄lɛ̄ka̍ wa̍ sūɛ̍i̍ nāa̍ ya̍ chu̍a̍ wo̍ ō bīī kɔ̄la̍ŋ. Mi̍ cha᷅ mi̍ ki̍i̍la̍nɔ̍ Mɛ̄lɛ̄ka̍ chēle̍ŋ wā ndu̍ hūnɔ̄ɔ̍ o̍ ībūŋ le̍ mā bɔ̄ŋgāŋ.

⁴Mi̍ ki̍i̍la̍nɔ̍ Mɛ̄lɛ̄ka̍ tāso̍o̍ ō dīmūl ki̍i̍la̍nɔ̍ɔ̍ Mɛ̄lɛ̄ka̍a̍ ho̍ō āā, “Nya̍a̍nu̍ŋ mā kɔ̍ di̍mūl po̍ chu̍a̍ pīāāndu̍ cho̍ ko̍ŋ a̍ yōōlē tūwāāle̍ŋ ndu̍ o̍ bā wo̍ māā, te̍le̍ŋ cho̍ fūūlūū mī wāŋndā chīe̍e̍ya̍, a̍ chɔ̄lūa̍a̍ ā kūi̍ kūīyo̍ pi̍la̍ Chūlu̍sɛ̄lɛ̄m. O̍ ko̍ŋ, Chūlu̍sɛ̄lɛ̄m o̍ cho̍ ku̍mbi᷄ŋ mbō wa̍ ha̍a̍a̍, wānā nɔ̍lā ni̍ŋ mā dɔ̄ū ndu̍ o̍ kpākī ni̍ŋ te̍.”

⁵Mɛ̄lɛ̄ka̍ Ya̍a̍wɛ̄ɛ̄ o̍ di̍mī āā, “Ya̍ pi̍la̍ wa᷅ ni̍ŋ sa̍āsa̍ lēyīŋ bɛ̄ndōo̍ Chūlu̍sɛ̄lɛ̄m ō bālāā ni̍. Ndu̍yɛ̍, ya̍ pi̍la̍ yɔ̍ŋgū ni̍ŋ na̍ŋɔ̄ɔ̄ bɛ̄ndōo̍ Chūlu̍sɛ̄lɛ̄m chi̍e̍e̍ ni̍.”

⁶Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “Wāŋnda̍ I̍sɔ̄lūɛ̄ī, nya̍ ya̍ I̍ sɛ̍ŋi̍ ha̍ā o̍ chi̍e̍ēŋndo̍ ni᷄ŋ kpo̍u̍ o̍ chɛ̄le̍ŋ ni᷄ŋ nda̍, lā hīɔ̄lu̍ŋ mī lā nyāānu̍ŋ. Lā fūla̍ nāa̍ nya̍ chō o̍ chɛ̄le̍ŋ ni᷄ŋ o̍ lɛ̄ŋnde̍ŋ bā lūāŋndo̍ wa̍, mī lā mīīŋgu᷄ŋ o̍ lɛ̄ŋndē nyāle̍ŋ ni᷄ŋ.

⁷Lā fūla̍ mī lā mīīŋgu᷄ŋ Sa̍a̍yɔ̄ŋ chi̍e̍e̍. Lā hīɔ̄lu̍ŋ mī lā nyāānu̍ŋ, nya̍ cho̍ o̍ chɛ̄le̍ŋ ni᷄ŋ o̍ lɛ̄ŋndē Ba̍bi̍lɔ̄ŋnde̍ŋ ni᷄ŋ nda̍.”

⁸O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍, ō dīmūl la̍ āā, “Di̍mu̍l lɛ̍ŋīi̍ de̍l wānāā nīa̍a̍ chōo̍ ma̍ pūŋgā nyɛ̄m nda᷄ŋ kpo̍u̍ ve̍ māā, wāŋnda̍ Sa̍a̍yɔ̄ŋ, wānāā nīa̍a̍ ya̍ I̍ hi̍ni̍ kɔ̄l la̍ nda̍ chō ni̍. “Wānā o̍ wāna̍ pi̍la̍ŋ nda̍ pɛ̍, mɛ̄ɛ̍ a̍ pi̍la̍ŋ ya̍ tānā.

⁹Nya̍ wānā o̍ wa᷅na̍ de̍l nda̍ chōo̍, I̍ cho̍ hūnɔ̄ɔ̄ sɔ̍ŋgā a̍ nya̍, ndu̍yɛ̍ mī to̍sa̍ mī wānāā nīāā ka̍ŋ a̍ cho̍ ha̍ā nya̍ o̍ lābā o̍ chɛ̄le̍ŋ ni̍ŋ nda̍, ā pūŋga̍ nyɛ̄m nya̍ŋ kpo̍u̍.” Tē he̍ī ī yɔ̄nu᷄ŋ pɛ̍, o̍ ko̍ŋ nya̍ chō sīnā māā Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍, māā ndu̍ ve᷅m ya̍ Sɛ̄kāla̍yā ni̍.

¹⁰Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “Wāŋnda̍ Chūlu̍sɛ̄lɛ̄m, lā sōli̍ cho̍ndu̍ŋ kɔ̄l kɛ̄ndɔ᷄ŋ. Kāni̍ fu̍u̍le̍, ya̍ Mɛ̍lɛ̄ka̍ I̍ cho̍ hūnɔ̄ɔ̄ mī hu̍ŋ wa᷅ nya̍ tɛ̄ɛ̄ŋ.”

¹¹A̍ te̍le̍ŋ ko̍ŋ, lɛ̄ŋīī ka̍ka̍ i̍ cho̍ hūnɔ̄ɔ̄ nāa̍ Mɛ̄lɛ̄ka̍ Ya̍a̍wɛ̄ɛ̄ chu̍a̍ mī ī sīmnu᷄ŋ wa̍nāā ndɔ̄, ō chō hūnɔ̄ɔ̄ mbō wa̍ nya̍ tɛ̄ɛ̄ŋ. Tē ke̍ŋ i̍ yɔ̍nu̍ŋ pɛ̍, o̍ ko̍ŋ nya̍ cho̍ sīnā ni̍, māā ndu̍ Mɛ̍lɛ̄ka̍ Ya̍a̍wɛ̄ɛ̄, o̍ nɔ̍ kpāāyāa̍ kpo̍u̍ wo̍, māā ndu̍ ve᷅mm ya̍ ni̍.

¹²Mɛ̄lɛ̄ka̍ Ya̍a̍wɛ̄ɛ̄ o̍ cho̍ vɛ̄lɛ̄ hūnɔ̄ɔ̄ Chu̍dā sīīŋgūū māā nyɛ̄ ndɔ̄ o̍ lɛ̄ŋndē ndɔ̄le̍ di̍a̍ndāā le̍ŋ ni᷄ŋ, ndu̍yɛ̍ mbō chūa̍ vɛ̄lɛ̄ Chūlu̍sɛ̄lɛ̄m māā chi̍e̍e̍ cho̍ le̍ ndu̍ wo̍.

¹³Wānā o̍ wānā lā mēi̍ do̍ŋ do̍ŋ Mɛ̄lɛ̄ka̍ Ya̍a̍wɛ̄ɛ̄ lāchī, fo̍ndōle̍, ō chō chɔ̄nɔ᷄ŋndo̍ o̍ fo̍ndāŋ ndɔ̄ di̍a̍ndāa̍ mbo̍ wā hūnɔ̄ɔ̍.