Read Southern Kisi Sɛ̄kāla̍yā 3 Bible Online

Sɛ̄kāla̍yā 3 - Southern Kisi bible

Sɛ̄kāla̍yā 3

¹O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ chɔ᷅m ya̍ vɛ̄lɛ̄ yi̍lāŋ chēle̍ŋ. O̍ yi̍lāŋndo̍ ho̍ō ni᷄ŋ, mi̍ cha᷅ māsa̍ wānāā sōlīāā lāsa̍lāa̍ ndu̍ yɔ̍nūŋ ni̍ māā Chɔ̄ɔ̍sūāā. Ō wa̍ īsīsi̍ ki̍i̍la̍nɔ̍ Mɛ̄lɛ̄ka̍ Ya̍a̍wɛ̄ɛ̄ wo̍ lāchī. Sēta̍nā wa̍ īsīsi̍ Chɔ̄ɔ̍sūāā o̍ bā kɛ̄ndɔ̄ɔ̍ chōo̍ le̍ ndu̍ sūɛ̍i̍ hōlɔ̄ɔ̍.

²O̍ ko̍ŋ, mi̍ Mɛ̄lɛ̄ka̍ Ya̍a̍wɛ̄ɛ̄ ō di̍mūl Sēta̍nā āā, “Nūm Sēta̍nā, ya̍ Mɛ̄lɛ̄ka̍ Ya̍a̍wɛ̄ɛ̄ ya̍ hɛ̍li̍ Chūlu̍sɛ̄lɛ̄m māā chi̍e̍e̍ nī wo̍, I̍ pɛ̍ɛ̍sa̍ nu̍m. I̍ pɛ̄ɛ̄sā nu̍m le̍ nyɛ̄ ŋ̄ tōsa̍ wo̍. Po̍ si̍m ho̍ō wo̍, mɛ̄ɛ̍ kīlī lēyīŋndo̍ ō hūŋ ni᷅ŋ nu̍a̍ā le̍ chūwɔ̄ɔ̍ ŋɔ̄ɔ̍ mī wāŋndo̍ ō sōli̍ ndu̍ o̍ yīŋ yɛ̍, le̍nde̍ nda̍ sōli̍ ndu̍ pīɔ̍mndo̍ o̍ bā ni̍.

³“Chɔ̄ɔ̍sūāā wa̍ īsīsi̍ ki̍i̍la̍nɔ̍ Mɛ̄lɛ̄ka̍a̍ lāchī, a̍ nyɛ̄lā nɔ̄ɔ̄lɛ̍i̍la̍ŋ ndu̍ le̍kɔ̄ɔ̍.

⁴O̍ ko̍ŋ, mi̍ ki̍i̍la̍nɔ̍ Mɛ̄lɛ̄ka̍a̍ ō dīmūl wānāa̍ wa̍ ndu̍ īsīsi̍ la̍chi̍ wa̍ māā, lā sōli̍ ndu̍ nyɛ̄lā nɔ̄ɔ̄lɛ̍i̍la̍ la̍ŋ lēkɔ̄ɔ̍.” O̍ ko̍ŋ kɔ̍ɔ̍lī, mbo̍ dīmūl Chɔ̄ɔ̍sūāā āā, “Ho̍ō chɔ᷄m ni̍ māā I̍ fa̍ŋa̍ nu̍m yɔ̄ŋndā nūmnda̍ wɔ̍ɔ̍ŋnda̍ŋ chōo̍. Le̍la̍ŋ ya̍ I̍ cho̍ nu̍m nyɛ̄lā tɔ̍ɔ̍la̍ŋ ndāŋ mīŋgīo̍o̍ lēkɔ̄ɔ̍ ni̍.”

⁵O̍ ko̍ŋ kɔ̍ɔ̍lī, mbo̍ dīmūl wānāā o̍ di̍mu̍l māā ā sōli̍ Chɔ̄ɔ̍sūāā nyɛ̄la̍ŋ lēkɔ̄ɔ̍ wa̍ āā, “Lā chu̍a̍ mɔ̍si̍l vi̍lɛ̄ī di̍a̍ndāā fo̍fo̍o̍ mī lā wōu̍ Chɔ̄ɔ̍sūāā.” O̍ ko̍ŋ, mi̍ wānāā kāŋ ā chūā mɔ̍si̍l vi̍lɛ̄ī kōŋ ma̍ wōū ndu̍ o̍ lēbōl. O̍ ko̍ŋ kɔ̍ɔ̍lī, ma̍ wōū ndu̍ vɛ̄lɛ̄ nyɛ̄lā sɛ̄nɛ̄īla̍ŋ. Ki̍i̍la̍nɔ̍ Mɛ̄lɛ̄ka̍ Ya̍a̍wɛ̄ɛ̄ wo̍ ō lo̍ īsīsi̍ ma̍ dōvī Chɔ̄ɔ̍sūāā kpo̍u̍.

⁶O̍ ko̍ŋ kɔ̍ɔ̍lī, mi̍ ki̍i̍la̍nɔ̍ Mɛ̄lɛ̄ka̍ Ya̍a̍wɛ̄ɛ̄ wo̍ ō kē Chɔ̄ɔ̍sūāā sīlāa̍ ho̍ō. Mbo̍ dīmūl ndu̍ āā,

⁷“Nyɛ̄ Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍ ō dīmi̍ wo̍ ndu̍ cho̍ ho̍ō ni̍, ō dīmī āā, ‘Tē a̍ chu̍a̍ pɛ̄ɛ̄kūlā nīla̍ŋ pɛ̍, o̍ ko̍ŋ kɔ̍ɔ̍lī, a̍ nyɛ̄ o̍ nyɛ̄ ya̍ I̍ di̍mu̍l nu̍m le̍ tōsāa̍ mā to̍sa̍ ndu̍ pɛ̍, I̍ cho̍ tōsā chīɛ̄ī nūu̍ ni̍, la̍u̍ ba̍lu̍ ndu̍ wo̍ ni̍, mā wa̍ la̍ŋ chīla̍ŋ, ndu̍yɛ̍ mī to̍sa̍ nūm bɛ̍ɛ̍ mā wa̍ ya̍ hūnɔ̄ɔ̍ o̍ hɔ̄l, mɛ̄ɛ̍ ku̍nda̍ si̍m ho̍ō wo̍ ā hūŋ ya̍ o̍ hɔ̄l lɛ̍.

⁸Nūm Chɔ̄ɔ̍sūāā māsa̍ wānāa̍ so̍lī sa̍lāa̍ o̍ ya̍ Mɛ̄lɛ̄ka̍ lo̍ wo̍, a̍ chāāŋāā nu̍m a̍a̍ wānāā sōlīāā lāsa̍lāa̍ ā pīli̍a̍a̍ lā ya᷄ŋ ya̍ nīla̍ŋ. Lā chō māchūāā tāāmāsi̍o̍o̍, le̍ dɛ̍nɛ̍ kɛ̍ndɛ̍ cho̍ hūnɔ̄ɔ̄ yɔ̄nɔ᷄ŋ o̍ sīɔ̄dīi̍ lāchīo̍o̍ ni᷄ŋ ndo̍. I̍ cho̍ hūnɔ̄ɔ̄ a̍ bu̍ɛ̍ī ni̍ ya̍ I̍ hɛ̍li̍ wo̍, o̍ nɔ̍ dīōla̍ŋ āā Lɛ̄ūve̍ wo̍.

⁹Chɔ̄ɔ̍sūāā, I̍ ha̍ndu̍ nu̍m pōūwo̍ lāchī ō pīlɛ̍. Kɛ̍ pōū pīlɔ̍ɔ̍ ho̍ō ō nɔ̄ hɔ̄lla̍ sālā ŋɔ᷄mmɛ̍ū. Ndu̍yɛ̍ I̍ cho̍ pōōnyīāā pu̍m tūūli̍a̍a̍ o̍ pōūwo̍ ho̍ō chōo̍. Yɔ̄ŋ wɔ̄ɔ̍ŋ o̍ yɔ̄ŋ wɔ̄ɔ̍ŋ to̍sa̍ŋ o̍ lɛ̄ŋnde̍ŋ nde᷅ŋ ni᷄ŋ, I̍ cho̍ ndu̍ hūnɔ̄ɔ̄ fāŋā o̍ pāa̍le̍ŋ lē pīlɛ̍ ni᷄ŋ kpe̍.

¹⁰Tē pāa̍le̍ le̍ŋ lē fūūlu̍u̍ pɛ̍, nya̍ kpo̍u̍ wānā o̍ wānā o̍ ve̍e̍lū ni̍ŋ chāa̍ŋ ndɔ̍ nda̍ chīɛ̄ɛ̄li̍āŋndo̍, mā chālnu̍ŋ ba̍ltā kɛ̄ndɛ̄la̍ŋ o̍ yɔ̄mīī ndɛ̄i̍ mākīle̍pīi̍ye̍ bɛ̄ŋgu̍, a̍ yɔ̄mīī ndɛ̄i̍ māfi̍kīi̍ye̍. Kāni̍ fo̍ndōle̍, wānā o̍ wānā wa̍ŋnūŋ ni̍ŋ a̍ kɔ̄l nyūlū, ndu̍yɛ̍ mbō wānu̍ŋ o̍ bā ndɔ̄ɔ̍ chōo̍ yɛ̍lɛ̍kɛ̍lɛ̍ɛ̍.’ ”