Read Southern Kisi Sɛ̄kāla̍yā 4 Bible Online

Sɛ̄kāla̍yā 4 - Southern Kisi bible

Sɛ̄kāla̍yā 4

¹O̍ ko̍ŋ kɔ̍ɔ̍lī, o̍ yi̍lāŋndo̍ ho̍ō ni᷄ŋ, mi̍ ki̍i̍la̍nɔ̍ na̍a̍ ŋ̄ wa̍ sūūki̍āŋndo̍ wo̍ ō mīīŋgū nāa̍ ya̍ chu̍a̍, mbo̍ hu᷄ŋ hi̍i̍lūū ya̍, mɛ̄ɛ̍ wāŋndo̍ ō wā nu̍a̍ā o̍ lūa̍a̍ŋ mī wāŋndo̍ hīīlu̍u̍ ndu̍ le̍ ndu̍ tīndīo̍o̍ yɛ̍.

²Mbo̍ nyūnā ya̍ āā, “Ō yɛ̄ɛ̍nɛ̍ ŋ̄ chō yɛ̍ chɔ̄ɔ̍?” Mi̍ di̍mūl ndu̍ āā, “I̍ cho̍ chɔ̄ɔ̍ nyɛ̄ kɛ̄sīāālā la̍mbūi̍yo̍, ō tōōsīāā a̍ ko̍o̍līi̍yo̍ŋ kpo̍so̍ŋ. Hɛ̄ŋgɛ̍i̍ māchūɛ̄īyo̍ ō chō ō kɛ̄sīāā o̍ nyɔ̄ɔ̍ ho̍ō chōo̍. O̍ ko̍ŋ kɔ̍ɔ̍lī, la̍mbūi̍la̍ŋ lā chō lā kɛ̄sīāā o̍ nyɔ̄ɔ̍ ho̍ō chōo̍ lā ŋɔ᷄mmɛ̍ū. La̍mbūi̍la̍ ŋɔ̍mmɛ̍ūla̍ŋ nda᷅ŋ, ō kɛ᷅ o̍ kɛ᷅ ō nɔ̄ nāa̍ wo̍u̍wāā sāa̍bɛ̄i̍ya̍ le̍ ndu̍ mɛ̄ndūllo̍.

³Yɔ̄mīī ɔ̄li̍fīi̍ye̍ ī chō o̍ nyɛ̄ kɛ̄sīāālā la̍mbūi̍yo̍ ho̍ō īkɛ̄i̍ ī ŋīi̍ŋ, ho̍ō chō o̍ bā mīāllo̍ chōo̍ mi̍ ho̍ō wā o̍ bā kɛ̄ndɔ̄ɔ̍ chōo̍.”

⁴Mi̍ I̍ nyu̍nā ki̍i̍la̍nɔ̍ Mɛ̄lɛ̄ka̍a̍ ho̍ō āā, “Le̍ yɛ̄ɛ̍nɛ̍ nyɛ̄la̍ŋ nda᷅ŋ lā si᷄m yɛ̄?”

⁵Mbo̍ nyūnā ya̍ āā, “A̍ si̍nā le̍ sa̍bū la̍ si̍m ndo̍ le̍?” Mi̍ I̍ mu̍lī āā, “M̍m̄ māsānɔ̄ɔ̍ I̍ si̍nā le̍.”

⁶Mi̍ ki̍i̍la̍nɔ̍ Mɛ̄lɛ̄ka̍a̍ ho̍ō ō dīmūl la̍ māā, yōōŋgū Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, ō yɔ̄ŋgu̍ le̍ Sɛ̄lūba̍bɛ̄l wo̍ ndu̍ cho̍ ho̍ō ni̍. O̍ dīmi̍ āā, “Sɛ̄lūba̍bɛ̄l, ō cho̍ a̍ dīāllūŋ nūm ka̍lā le̍, ndu̍yɛ̍ ō cho̍ a̍ kpāāyā nu̍m te̍ ŋ̄ nɔ̄lā mā yēm te̍. Kɛ̍ Sa̍na̍a̍ a̍ nyi̍nā nūu̍, ā nɔ̄lā.

⁷Pēmbūŋ bɛ̄ndu᷄ŋ nɔ̍ mī ŋ̄ wa̍ nu̍m lāchī māā lākpɔ̍kɔ̍si̍ wo̍ŋ kpo̍u̍, ŋ̄ nɔ̍lā ni̍ŋ mī ŋ̄ si᷄m nu̍m lāchī le̍. I̍ cho̍ tōsā mī ŋ̄ pūūsi̍a̍ŋ, mī ŋ̄ sīmnu᷄ŋ la̍dɛ̍ŋgbɛ̍. Nūm Sɛ̄lūba̍bɛ̄l, nu᷄m cho̍ hūnɔ̄ɔ̄ chīɛ̄ī nūu̍ mīŋgī tāŋgūl ni̍. Bōōndi̍i̍ ŋ̄ hāndū ni̍ŋ po̍ū mɛ̄ɛ̄lāa̍ kpɔ̍ŋ le̍ chīyīī chīɛ̄ī nūu̍ sīōūwo̍ sīmīo̍o̍ ve̍, wāŋnda̍ ā dīmī ni̍ŋ cho̍o̍ cho̍o̍ māā, mbɔ̄ māa̍ Mɛ̄lɛ̄ka̍ dɔ̄u̍ chi̍ɛ̍īyo̍ ho̍ō sa̍lā fɔ̍. Mbɔ̄ māā Mɛ̄lɛ̄ka̍ dɔ̄u̍ chi̍ɛ̍īyo̍ ho̍ō sa̍lā fɔ̍!”

⁸O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ su̍a̍ā vɛ̄lɛ̄ nāa̍ ya̍ chu̍a̍. Mbo̍ dīmī āā,

⁹“Sɛ̄lūba̍bɛ̄l ki̍la̍ chīyīī chīɛ̄ī nūu̍ nɔ̄ mbō tāŋgu̍lu̍ŋ cho̍o̍ ve̍ ni̍. Ndu̍yɛ̍, ndu̍ Sɛ̄lūba̍bɛ̄l, ndu̍ cho̍ chīɛ̄ī kālāa̍ sīōū sīmī ni̍. Tē he̍ī ī yɔ̄nu̍ŋ pɛ̍, o̍ ko̍ŋ wānāā nīa̍a̍ chō sīnā ni̍ māā ya̍ Mɛ̍lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nɔ̍ kpāāyāa̍ kpo̍u̍ wo̍, māā ya̍ ve᷅mm nu̍m nāa̍ nda̍ chūā ni̍.

¹⁰Wānā o̍ wānā pɛ̍ɛ̍sā wa̍li̍ pɔ̍mbɔ̍ ka̍ndu̍ŋ ho̍ō wo̍ le̍. Wāŋnda̍ chō hūnɔ̄ɔ̄ Sɛ̄lūba̍bɛ̄l chɔ̄ a̍ yōōlē tūwāāle̍ŋ o̍ bā le̍ chīɛ̄īyo̍ ho̍ō tāŋgūllo̍, o̍ ko̍ŋ nda̍ kpo̍u̍ mā nāŋ kɔ̄l.” Mi̍ ki̍i̍la̍nɔ̍ Mɛ̄lɛ̄ka̍a̍ ō dīmūl la̍ vɛ̄lɛ̄ āā, “La̍mbūi̍la̍ ŋɔ̍mmɛ̍ūlā ŋ̄ chē la̍ŋ o̍ nyɛ̄ kɛ̄sīāālā la̍mbūi̍yo̍ chōo̍ la̍ŋ, la̍ŋ la̍ si̍m le̍ hɔ̄lta̍ Mɛ̄lɛ̄ka̍ Ya̍a̍wɛ̄ɛ̄ la̍ŋ ni̍. La̍ŋ la̍ chɔ̍m a̍ mɛ̄ɛ̍ hɔ̄lta̍ Mɛ̄lɛ̄ka̍ Ya̍a̍wɛ̄ɛ̄ la̍ŋ lā chō chɔ̄ɔ̍ bā o̍ bā fe̍e̍ o̍ chi̍e̍ēŋndo̍ chōo̍ yɛ̍ ni̍.”

¹¹O̍ ko̍ŋ kɔ̍ɔ̍lī, mi̍ nyu̍nā ki̍i̍la̍nɔ̍ Mɛ̄lɛ̄ka̍a̍ a̍a̍, “Yɔ̄mīī ɔ̄li̍fīi̍ ŋi̍i̍ŋ si̍m o̍ nyɛ̄ kɛ̄sīāālā la̍mbūi̍yo̍ īkɛ̄i̍, ho̍ō chō o̍ bā kɛ̄ndɔ̄ɔ̍ chōo̍, mi̍ ho̍ō wā o̍ bā mīāllo̍ chōo̍ ve̍, le̍ yɛ̄ɛ̍nɛ̍ ndi̍ ndi̍ si̍m yɛ̍?”

¹²Mi̍ nyu̍nā vɛ̄lɛ̄ ndu̍ āā, “I̍ cho̍ lɛ̄ūwūŋ yɔ̄m ɔ̄li̍fīi̍yo̍ŋ chɔ̄ɔ̍ ŋ̄ mūu̍ŋ o̍ nyɛ̄la̍ cho̍ lā tōōsīāā a̍ ko̍o̍līi̍yo̍ŋ māā ŋ̄chīli̍ŋ a̍ tɛ̄ɛ̄ŋgūla̍ŋ lēni᷄ŋ, mi̍ chūɛ̄īmā ŋ̄ko̍o̍līi̍ya̍ŋ mā wā fūlāa̍ lēni᷄ŋ mī mā tūāl lɛ᷅ŋ. Le̍ yɛ̄ɛ̍nɛ̍ ko̍ŋ ndu̍ si̍m yɛ̄?”

¹³Mbo̍ nyūnā ya̍ āā, “A̍ si̍nā le̍ nyɛ̄ mu̍ŋ si̍m ndo̍ le̍?” Mi̍ mu̍lūl ndu̍ āā, “I̍ si̍nā le̍ māsānɔ̄ɔ̍.”

¹⁴Mbo̍ lō o̍ ko̍ŋ mbo̍ dīmūl la̍ āā, “Nyɛ̄lā sālā tīɔ̍ɔ̍ŋndā la̍ŋ, la̍ŋ la̍ si̍m le̍ pūa̍a̍ ŋi̍ɔ̍ɔ̍ŋāā nda̍ sūu̍ chūɛ̄īya̍ŋ, ma̍ wā ā hɛ̄līāā le̍ Māsānɔ̄ɔ̍ Mɛ̄lɛ̄ka̍ nɔ̍ chi̍e̍ēŋndo̍ ho̍ō kpo̍u̍ wo̍ sāāŋgīāllo̍ wa̍.”