Read Southern Kisi Sɛ̄kāla̍yā 5 Bible Online

Sɛ̄kāla̍yā 5 - Southern Kisi bible

Sɛ̄kāla̍yā 5

¹O̍ ko̍ŋ kɔ̍ɔ̍lī, mi̍ cha᷅ vɛ̄lɛ̄ yi̍lāŋ chēle̍ŋ. O̍ yi̍lāŋndo̍ ho̍ō ni᷄ŋ, mi̍ cha᷅ yāu̍ si̍mbūlāa̍ o̍ hūēīye̍ ni᷅ŋ.

²O̍ ko̍ŋ mi̍ ki̍i̍la̍nɔ̍ Mɛ̄lɛ̄ka̍a̍ nyūnā ya̍ āā, “Ō yɛ̄ɛ̍nɛ̍ ŋ̄ chō yɛ̄ chɔ̄ɔ̍?” Mi̍ I̍ mu̍lī āā, “I̍ cho̍ chɔ̄ɔ̍ yāu̍ si̍mbūlāa̍ hīŋnɔ᷄ŋndo̍ o̍ hūēīye̍ ni᷄ŋ cho̍o̍ cho̍o̍. Yāu̍wo̍ ho̍ō bāndi̍i̍ ndūɛ̍i̍ ī chō nɛ̄īyo̍ be̍le̍-ya̍a̍, bu̍o̍o̍ nɛ̄īyo̍ tɔ̍, a̍ lē ŋūɛ̍ɛ̍nu̍.”

³O̍ ko̍ŋ kɔ̍ɔ̍lī, mbo̍ dīmūl la̍ āā, “Kpūndɛ̍ cho̍ tōlɔ̄ɔ̄ o̍ lɛ̄ŋnde̍ŋ nde᷅ŋ ni᷄ŋ kpo̍u̍ wo̍, ndu̍ cho̍ ō pōōnyīāā o̍ yāu̍ ko̍ŋ ni᷄ŋ ni̍. Yāu̍wo̍ ho̍ō, ō chō ō pōōnyīāā lēni᷄ŋ māā wānā o̍ wāna̍ to̍sa̍ vīīle̍ŋ pɛ̍, wānā ko̍ŋ ō nɔ̄ mbō wa̍ ō sōlīāā o̍ lɛ̄ŋnde̍ŋ nde᷅ŋ ni᷄ŋ po̍. O̍ ko̍ŋ kɔ̍ɔ̍lī o̍ yāu̍wo̍ ho̍ō kūmbūe̍i̍ pīlɛ̍i̍ ō chō ō pōōnyīāā lo̍ŋ māā wānā o̍ wāna̍ me̍na̍ŋ se᷅ndi̍ sɔ̄ŋ chōo̍ wo̍ pɛ̍, māā wānā ko̍ŋ bɛ̍ɛ̍ ō nɔ̄ mbō sɔ̄la̍ sōlīo̍o̍ o̍ lɛ̄ŋnde̍ŋ nde᷅ŋ ni᷄ŋ.”

⁴Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍ ō dīmi̍ āā, “I̍ cho̍ yāu̍wo̍ ho̍ō yɔ̄ŋ o̍ chīɛ̄īlā vīīya̍ ni᷄ŋ, a̍ o̍ chīɛ̄īlā wānāa̍ me̍nāŋ se᷅ndi̍lā sɔ̄ŋ chōo̍ la̍ŋ a̍ dīōlā nīla̍ŋ nda̍ ni᷄ŋ. Yāu̍wo̍ ho̍ō, ō chō lākɔ̄ lūɛ̄īyɔ̄ɔ̄ o̍ chīɛ̄īlā ndāla̍ŋ ni̍ŋ a̍ pi̍lɛ̍ŋ pi̍lɛ̍ŋnda̍ tu᷅. Ndu̍yɛ̍ chīɛ̄ī o̍ lu̍ɛ̍ī ko̍, ō lō o̍ chīɛ̄ī kōŋ ni᷄ŋ ha̍a̍a̍ mī chīɛ̄ī kōŋ ō pīɔ̍l, nyɛ̄ o̍ nyɛ̄ nda̍ tāŋgu̍l chīɛ̄ī kōŋ, ŋ̄pɛ̄ŋgɛ̍, lāpōū ni̍, kpo̍u̍ mī lā tāmbu̍.”

⁵O̍ ko̍ŋ kɔ̍ɔ̍lī, mi̍ ki̍i̍la̍nɔ̍ Mɛ̄lɛ̄ka̍ na̍a̍ ŋ̄ wa̍ sūūki̍āŋndo̍ wo̍ ō chɔ̄mnu̍ŋ vɛ̄lɛ̄ ya̍ mbo̍ dīmūl la̍ āā, “To̍fa̍ wɔ̍ cho̍o̍ cho̍o̍ mā chē nyɛ̍ cho̍ hūnɔ̄ɔ̍ wo̍.”

⁶Mi̍ I̍ nyu̍nā ndu̍ āā, “Ō yɛ̄ɛ̍nɛ̍ cho̍ yɛ̄ ko̍ŋ?” Mbo̍ mūlī āā, “Kāmbɛ̍i̍ nda̍ tūū nyɔ̍ɔ̍ŋ lēni᷄ŋ ndo̍, ndu̍ ŋ̄ chō ko̍ŋ chɔ̍ɔ̍ ni̍. Ndu̍yɛ̍, ō si᷄m le̍ yɔ̄ŋndā wɔ̄ɔ̍ŋndā wāŋnda̍ o̍ lɛ̄ŋnde̍ŋ nde᷅ŋ ni᷄ŋ kpo̍u̍ a̍ to̍sā la̍ŋ.

⁷“Kāmbɛ̍i̍yo̍ ho̍ō yɛ̍, a̍ li̍īye̍ nda̍ tōōsi̍a̍a̍ kūmbū ndɔ̄ɔ̍ ni̍. Mi̍ cha᷅ ma̍ hēēlū kūmbū kāmbɛ̍i̍yo̍ ho̍ō. Mɛ̄ɛ̍ nda̍ hēēlu̍, mi̍ cha᷅ wānā la̍nɔ̍ɔ̍ īchāli̍ o̍ kāmbɛ̍i̍yo̍ ho̍ō ni᷄ŋ.”

⁸Mi̍ ki̍i̍la̍nɔ̍ Mɛ̄lɛ̄ka̍a̍ ho̍ō dīmūl la̍ āā, “Chūa̍a̍ ho̍ō ndu̍ si̍m le̍ dɛ̍nɛ̍ wɔ̍ɔ̍ŋndo̍ ni̍.” O̍ ko̍ŋ, mi̍ ki̍i̍la̍nɔ̍ Mɛ̄lɛ̄ka̍a̍ mīŋgī chūa̍a̍ ho̍ō nyīndɔ̄ɔ̄ o̍ kāmbɛ̍i̍yo̍ ni᷄ŋ mbo̍ mīŋgī kīndā.

⁹Mɛ̄ɛ̍ ya̍ I̍ to̍fa̍ chōo̍ cho̍o̍, mi̍ cha᷅ wāŋ lāāndūa̍a̍ nda̍ ŋi̍ɔ̍ɔ̍ŋ a̍ kūmba᷅ŋnda̍ŋ, ā wa̍ hūnɔ̄ɔ̍ o̍ hūēīye̍ ni᷄ŋ. Wāna̍ a̍a̍ che᷅ nda̍ kūmba᷅ŋnda̍ŋ pɛ̍, nu̍a̍ wɔ̍ ko̍ mɛ̄ɛ̍ kūmba᷅ŋndā kōwɔ̍ɔ̍ lā chō nu̍a̍ā yɛ̍. O̍ ko̍ŋ kɔ̍ɔ̍lī, mi̍ cha᷅ mi̍ wāŋ lāāndūa̍a̍ ha̍ā ā hu᷄ŋ chu̍ā kāmbɛ̍i̍yo̍ ho̍ō ma̍ hēlnu᷄ŋ a̍ ndu̍ cho̍o̍ cho̍o̍.

¹⁰Mi̍ I̍ nyu̍nā ki̍i̍la̍nɔ̍ɔ̍ ho̍ō āā, “Kūɛ̍ɛ̍nɛ̍ nda̍ chō yɛ̄ kɔ̄la̍ŋ a̍ kāmbɛ̍i̍yo̍ ho̍ō?”

¹¹Mbo̍ dīmūl la̍ āā, “O̍ lɛ̄ŋndē Ba̍bi̍lɔ̄ŋnde̍ŋ ni᷄ŋ nda̍ chō kɔ̄la̍ŋ a̍ ndu̍ ni̍, mā kɔ̍ te̍ŋgūl ndu̍ chīɛ̄īyo̍ mā lūe̍i̍ ndu̍ lēni᷄ŋ. Tē ā chīi̍ chīɛ̄īyo̍ bɛ̄ɛ̄ndīāā le̍ ndu̍ pɛ̍, o̍ chīɛ̄ī kōŋ ni᷄ŋ nda̍ chō ndu̍ lūēī ni̍, mbō wa̍ lo̍ŋ.”