Read Southern Kisi Sɛ̄kāla̍yā 6 Bible Online

Sɛ̄kāla̍yā 6 - Southern Kisi bible

Sɛ̄kāla̍yā 6

¹O̍ ko̍ŋ kɔ̍ɔ̍lī, mi̍ cha᷅ vɛ̄lɛ̄ yi̍lāŋ chēle̍ŋ. O̍ yi̍lāŋndo̍ ho̍ō ni᷄ŋ, mi̍ cha᷅ nyɛ̄lā su̍a̍a̍ ā nāŋ nda̍ŋ lā hīɔ̍ɔ̍lu̍, lā wa̍ fūlāa̍ o̍ lūāŋndo̍ŋ tɛ̄ɛ̄ŋ ŋ̄ mūu̍ŋ. Lūāŋndo̍ŋ mu̍ŋ yɛ̍, lūāŋūŋ chīli̍ŋu̍ŋ būlɔ̍ŋsīi̍yo̍ŋ ŋ̍ wa̍ ni̍.

²Nyɛ̄la̍ŋ nda᷅ŋ ō tāso̍o̍, su̍a̍a̍ wa̍ ndu̍ nānɔ̄ɔ̍ wa̍, ā sīāŋā nda̍ wa̍ ni̍, ō dīi̍ŋ ndɔ̄ɔ̍, a̍ wa̍ ndu̍ nānɔ̄ɔ̍ wa̍ ā wa̍ ā tīŋī,

³ō yāa̍ ndɔ̄ɔ̍, a̍ wa̍ ndu̍ nānɔ̄ɔ̍ wa̍ ā wa̍ ā hūmbū, ō hīɔ̍ɔ̍lo̍o̍, a̍ wa̍ ndu̍ nānɔ̄ɔ̍ wa̍ kɔ̄ɔ̍le̍ po̍nyɛ̍i̍le̍ŋ nda̍ a̍a̍ nɔ̍ ni̍. Ndu̍yɛ̍ su̍a̍a̍ ha̍ā kpo̍u̍, su̍a̍ā kpāāyāā bɛ̍ndūa̍a̍ pi̍la̍ nda̍ wa̍ ni̍.

⁴O̍ ko̍ŋ kɔ̍ɔ̍lī, mi̍ nyu̍nā ki̍i̍la̍nɔ̍ Mɛ̄lɛ̄ka̍ wa̍ ho̍ō sūɛ̍i̍ nāa̍ ya̍ chu̍a̍ wo̍ a̍a̍, “Māsānɔ̄ɔ̍, le̍ yɛ̄ɛ̍nɛ̍ nyɛ̄la̍ŋ nda᷅ŋ lā si᷄m yɛ̄?”

⁵Mi̍ ki̍i̍la̍nɔ̍ Mɛ̄lɛ̄ka̍a̍ ho̍ō mūlūl la̍ āā, “Nyi̍nāā hīɔ̍ɔ̍lu̍a̍a̍ o̍ fo̍nda᷄ŋ Mɛ̄lɛ̄ka̍a̍ a̍ cho̍ ha̍ā ni̍. Ā chō chɔ̄nɔ᷄ŋndo̍ nāa̍ nda̍ wa̍ īsīsi̍ Mɛ̍lɛ̄ka̍ nɔ̍ chi̍e̍ēŋndo̍ ho̍ō kpo̍u̍ wo̍ o̍ hɔ̄l la̍.

⁶“Nyɛ̄ nyāāna᷄ŋ su̍a̍ā tīŋīa̍a̍ ā chō nānɔ̄ɔ̍ wo̍, ndu̍ cho̍ kɔ̄la̍ŋ kūmbū lɛ̄ŋnde̍ cho̍ bā lūāŋndo̍ le̍ŋ, ō su̍a̍ā hūmbūa̍a̍ ā chō nānɔ̄ɔ̍ wo̍, ndu̍ cho̍ kɔ̄la̍ŋ kūmbū pāa̍le̍ŋ lē dēl lo̍, ō su̍a̍ā nɔ̍ kɔ̄ɔ̍le̍ po̍nyɛ̍i̍le̍ŋ nda̍ ā chō nānɔ̄ɔ̍ wo̍, ndu̍ cho̍ kɔ̄la̍ŋ kūmbū bā tōūwo̍.”

⁷Mɛ̄ɛ̍ su̍a̍a̍ wa̍ nyɛ̄la̍ŋ nda᷅ŋ nānɔ̄ɔ̍ wa̍ ā fūla̍ le̍ kɔ̄la̍ŋ, ā wa̍ lāūwo̍ kpe̍e̍kpe̍i̍ le̍ mā kēle̍ŋa̍ lākɔ̄ mā kɔ̍ ba̍lu̍ o̍ chi̍e̍ēŋndo̍ ni᷄ŋ kpo̍u̍. Mi̍ Mɛ̄lɛ̄ka̍ ō dīmūl su̍a̍a̍ ha̍ā āā, “Lā kɔ̍ mī lā kɔ̍ ba̍lū o̍ chi̍e̍ēŋndo̍ ni᷄ŋ kpo̍u̍, mī lā mɛ̄ɛ̄nda̍ŋ ndu̍.” O̍ ko̍ŋ, mi̍ su̍a̍a̍ wa̍ nyɛ̄la̍ŋ nda᷅ŋ nānɔ̄ɔ̍ wa̍ ā mālnu᷄ŋ ma̍ kɔ̍ ba̍lū o̍ chi̍e̍ēŋndo̍ ni᷄ŋ kpo̍u̍, le̍ mā mɛ̄ɛ̄nda̍ŋ chi̍e̍ēŋndo̍.

⁸Mi̍ Mɛ̄lɛ̄ka̍ Ya̍a̍wɛ̄ɛ̄ ō dīmūl la̍ chōo̍ cho̍o̍ āā, “Su̍a̍a̍ ku̍ɛ̄ kūmbū lɛ̄ŋnde̍ cho̍ bā lūāŋndo̍ le̍ŋ nda̍, ā tōsa̍ mi̍ tu̍mbe̍ ya̍ Mɛ̄lɛ̄ka̍ Ya̍a̍wɛ̄ɛ̄ o̍ dɔ̍u̍nu᷄ŋ a̍ lɛ̄ŋnde̍ŋ bā lūāŋndo̍ wo̍ ō pɔ̄lūl.”

⁹O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ ke᷅ ya̍ vɛ̄lɛ̄ yōōŋgōo̍.

¹⁰Mbo̍ dīmūl la̍ āā, “Di̍mu̍l wa̍nāa̍ fu̍la̍ o̍ bīyɔ̄ɔ̍ ni̍ŋ Ba̍bi̍lɔ̄ŋ ma̍ hūŋ nda̍, nda̍ yɔ̍nūŋ māā Hɛ̍li̍dāī ni̍, a̍ Tōbi̍chā, a̍ Chɛ̄da̍yāā, mā ke̍ nu̍m ka̍ni̍ŋ hu̍mbo᷄ŋ, a̍ ka̍ni̍ŋ si̍a̍ŋa᷄ŋ ŋ̄ ti᷄ŋ. Tē ā ke̍ nu᷅m ka̍ni̍o̍ŋ mu᷅ŋ pɛ̍, a̍ ma̍lnu̍ŋ pa̍a̍le̍ le̍ŋ ā kūɛ̄ sa̍kpō o̍ chīɛ̍i̍ Chōōsa̍yā, po̍ Sɛ̄fāna̍yā wo̍.

¹¹Ka̍ni̍ŋ hu̍mbūŋ nda̍ chō nu̍m mu̍ŋ ke᷅ wo̍ŋ ni̍, ka̍ni̍ŋ si̍a̍ŋāŋ mu᷅ŋ ni̍, a̍ chu̍a̍ mu̍ŋ a̍ to̍o̍si̍a̍a̍ mɔ̍si̍l lēmāsāa̍ a̍ mu̍ŋ. O̍ ko̍ŋ kɔ̍ɔ̍lī, mī lā chu̍a̍ mɔ̍si̍l lēmāsā kōŋ mī lā wōu̍ Chɔ̄ɔ̍sūāā po̍ Chɛ̄hōsa̍da̍kī wo̍ māā māsā.

¹²O̍ ko̍ŋ kɔ̍ɔ̍lī, mī lā dīmu̍l ndu̍ māā Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍ ō dīmi̍ āā, ‘Po̍ nɔ̍ dīōla̍ŋ āā, Lɛ̄ūve̍ wo̍, o̍ cho̍ fūlā o̍ fo̍ndā ndɔ̄ɔ̍ mbō hu᷄ŋ mi̍ŋgī chīɛ̍i̍ cho̍ le̍ ya̍ Mɛ̍lɛ̄ka̍ Ya̍a̍wɛ̄ɛ̄ wo̍ tāŋgūllo̍, ndu̍ cho̍ ho̍ō ni̍.

¹³Ndu̍ cho̍ chīɛ̍i̍ cho̍ le̍ ya̍ Mɛ̍lɛ̄ka̍ Ya̍a̍wɛ̄ɛ̄ wo̍ mīŋgī tāŋgūl ni̍, mbō sɔ̄la̍ bɛ̄ɛ̄le̍ māsā bɛ̍ndōo̍ ō nɔ̄ le̍ sɔ̄lāa̍ le̍ŋ. Ndu̍yɛ̍ ndu̍ wa᷅ ni̍ŋ māsāa̍ wānāā ndūa̍a̍ chōo̍ ni̍. O̍ ko̍ŋ kɔ̍ɔ̍lī, ndu̍ cho̍ wa᷄ vɛ̄lɛ̄ wāna̍ so̍lī sa̍lāa̍ o̍ Mɛ̄lɛ̄ka̍ lo̍ wo̍, o̍ māsāle̍ ndɔ̄le̍ŋ ni᷄ŋ ni̍, ndu̍yɛ̍, mī kɔ̄l nyūlōo̍, a̍ dīōm pīlɔ̍ɔ̍ o̍ wa̍ o̍ māsɛ̄i̍ ndūɛ̄ī ŋi̍i̍ŋnde̍ he̍ī ni᷄ŋ.

¹⁴Mɔ̍si̍l lēmāsāa̍ ho̍ō, ō nɔ̄ mbō wa̍ ō kɛ̄sīāā o̍ chīɛ̍i̍ cho̍ le̍ ya̍ Mɛ̍lɛ̄ka̍ Ya̍a̍wɛ̄ɛ̄ wo̍ ni᷄ŋ, le̍ wāa̍ lōōnɔ᷄ŋndo̍ a̍ Hɛ̍li̍dāī, a̍ Tōbi̍chā, a̍ Chɛ̄da̍yāā, a̍ Chōōsa̍yā, po̍ Sɛ̄fāna̍yā wo̍ o̍kɔ̄ɔ̄.’ ”

¹⁵Wāŋnda̍ ā fūlā ni̍ŋ o̍ fo̍ndāŋndā lēvīlta̍ŋ mā hīŋ, le̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ mālāa̍ mīŋgī tāŋgūllo̍. O̍ ko̍ŋ, mī lā sīna̍ māā Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, māā ndu̍ ve᷅mm ya̍ sa̍kāla̍yā nāa̍ nya̍ chūā ni̍. Nyɛ̄ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ō di̍mu̍l nya̍ wo̍, tē lā tūsi̍ŋ o̍ ndu̍ bɛ̍ŋgu̍ pɛ̍, mu᷅ŋ kpo̍u̍ ŋ̄ chō yɔ̄nɔ᷄ŋ mɛ̄ɛ̍ o̍ di̍mi̍ yɛ̍.