Read Southern Kisi Sɛ̄kāla̍yā 7 Bible Online

Sɛ̄kāla̍yā 7 - Southern Kisi bible

Sɛ̄kāla̍yā 7

¹Wɔ̄sī Māsāa̍ Da̍līɔ̄ɔ̄ o̍ chi̍ŋa̍ wɔ̄sīla̍ŋ lā hīɔ̍ɔ̍lu̍ o̍ māsāle̍ŋ chōo̍ wo̍, mi̍ Mɛ̄lɛ̄ka̍ Ya̍a̍wɛ̄ɛ̄ o̍ ke᷅ ya̍ Sɛ̄kāla̍yā yōōŋgōo̍. Pāŋgi̍i̍ ŋɔ̍ma̍hīɔ̍ɔ̍lu̍e̍i̍ o̍ wɔ̄sī kōŋ ni᷄ŋ, pāŋgi̍i̍ nda̍ vēēlū o̍ Hi̍būlūi̍ye̍ ni᷄ŋ āā Ki̍si̍līve̍ ve̍, o̍ lɔ̄mā lē hīɔ̍ɔ̍lu̍a̍ŋ o̍ pāŋgi̍i̍ ke̍ŋ ni᷄ŋ sūɛ̍i̍ he̍ī ī yɔ̄nu̍ŋ ni̍.

²A̍ te̍le̍ŋ ko̍ŋ, mi̍ wāŋnda̍ Bɛ̍tɛ̄ɛ̄l a̍ vi̍ām Sīālu̍ɛ̍sā, nda̍ Lūɛ̄chīmmɛ̍lɛ̍kī, nda̍ pūa̍a̍ ndāa̍ wa̍ nda̍ kɔ̄ɔ̄lī wa̍ o̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍, le̍ mā kɔ̍ nyu̍nā Mɛ̄lɛ̄ka̍ dīōm le̍ mbō dɔ̄ū nda̍ sa̍lā.

³Ndu̍yɛ̍ nda̍ a̍a̍ ku̍ɛ̄ vɛ̄lɛ̄, le̍ mā kɔ̍ nyu̍nā wānāa̍ so̍lī sa̍lāa̍ o̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ wa̍, Mɛ̄lɛ̄ka̍ nɔ̍ kpāāyāa̍ kpo̍u̍ wo̍, a̍ wānāa̍ su̍a̍ā le̍ Mɛ̄lɛ̄ka̍ wa̍ āā, “Bāā ŋ̄ hīo̍u̍ la̍chi̍ a̍ mɔ̍nɛ̍i̍ bīyɔ̄ɔ̍, ndu̍yɛ̍ o̍ ko̍ŋ kɔ̍ɔ̍lī a̍ su᷅mndo̍ bīyɔ̄ɔ̍ o̍ pāŋgi̍i̍ ŋu̍ɛ̍ɛ̍nu̍ o̍ pāŋgi̍i̍ ŋu̍ɛ̍ɛ̍nu̍ ni̍ŋ o̍ wɔ̄sīo̍o̍ ni᷄ŋ, le̍ tɛ̄ɛ̄mbūū nda̍ tɛ̄ɛ̄mbu̍u̍ chīɛ̍i̍ Mɛ̄lɛ̄ka̍a̍ wo̍, mɛ̄ɛ̍ na̍a̍ ŋ̍ to̍sā pa̍a̍ndū o̍ wɔ̄sīlā fāŋgāla̍ hi̍o̍ū la᷅ŋ nda᷅ŋ ni᷄ŋ yɛ̍?”

⁴O̍ ko̍ŋ, mi̍ Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍, ō kē ya̍ yōōŋgōo̍ ho̍ō.

⁵Mbo̍ dīmūl la̍ āā, “Di̍mu̍l wa̍nā o̍ wāna̍ cho̍ o̍ lɛ̄ŋnde̍ŋ nde᷅ŋ ni᷄ŋ a̍ wānāā sōlīāā lāsa̍lāa̍ māā ya̍ Mɛ̍lɛ̄ka̍ dīmi̍ māā, su᷅mndā nya̍ wa̍ bīyɔ̄ɔ̍, ndu̍yɛ̍ mī lā bīī mɔ̍nɛ̍i̍ o̍ pāŋgi̍i̍ ŋu̍ɛ̍ɛ̍nu̍ o̍ pāŋgi̍i̍ ŋu̍ɛ̍ɛ̍nu̍ ni᷄ŋ, a̍ o̍ pāŋgi̍i̍ ŋɔ̍mmɛ̍ū o̍ pāŋgi̍i̍ ŋɔ̍mmɛ̍ū ni᷄ŋ o̍ wɔ̄sīo̍o̍ ni᷄ŋ le̍ wɔ̄sīla̍ŋ be̍le̍-ŋɔ̍mmɛ̍ū la̍ŋ, lā nɔ̄ o̍ kɔ̄l māā le̍ ya̍ Mɛ̍lɛ̄ka̍ nya̍ wa̍ su᷅mndālāŋ bīyɔ̄ɔ̍ ni̍? Ō cho̍ le̍ ya̍ le̍.

⁶Bɔ̄ŋa᷅ŋndā dīāā nyɛ̄ dīāālā nya̍ wa̍ bīyɔ̄ɔ̍ mī lā dīā di̍o̍la̍ bɛ̍ndūla̍ŋ, o̍ ko̍ŋ kɔ̍ɔ̍lī, mī lā kōlī kōlī mu̍ɛ̍īmā nya᷄ŋ nda̍ŋ, ō cho̍ le̍ yā le̍ nya̍ wa̍ la̍ŋ bīyɔ̄ɔ̍ le̍, le̍ nya̍ pi̍la̍ kɔ̄lta̍ŋ nɛ̄ŋīo̍o̍ ko̍ni̍ nya̍ wa̍ la̍ŋ bīyɔ̄ɔ̍ ni̍.

⁷“Yōōŋgū pīlɔ̍ɔ̍ ho̍ō, ndu̍ ko̍ni̍ Mɛ̄lɛ̄ka̍ Ya̍a̍wɛ̄ɛ̄ o̍ dɔ̍ū sīndɛ̄ wānāā ā tāsi̍a̍a̍ nda̍ a̍a̍ su̍a̍ā le̍ ndu̍ wa̍ o̍ sōndō ma̍ dīmūl wāŋnda̍ ndu̍ ni̍. A̍ te̍le̍ŋ ko̍ŋ, Chūlu̍sɛ̄lɛ̄m ni̍, chi̍e̍e̍ŋ ba̍lu̍ ndu̍ wo̍ŋ ni̍, ŋ̄ wa̍ ŋ̄ pīāā a̍ wāŋndā chīe̍e̍ya̍, ndu̍yɛ̍ nyɛ̄ o̍ nyɛ̄ ō wa̍ ō kɛ̄ndɛ̄ a̍ wānā o̍ wānā. Būŋgɛ̄i̍ cho̍ o̍ lɛ̄ŋnde̍ŋ bā tōūwo̍ ve̍ ni̍, a̍ lɛ̄ŋnde̍ cho̍ o̍ pēmbo᷄ŋ hōlnɔ᷄ŋndo̍ le̍ŋ, lo̍ŋ kpo̍u̍ wāŋnda̍ wa̍ ā pīāā.”

⁸O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ ke᷅ ya̍ Sɛ̄kāla̍yā yōōŋgū chēle̍ŋ, mbo̍ dīmūl la̍ āā,

⁹“Nyɛ̄ ya̍ Mɛ̍lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nɔ̍ kpāāyāa̍ kpo̍u̍ wo̍, ya̍ I̍ dīmu̍l wānāā nīa̍a̍ wo̍ ndu̍ wa̍ ho̍ō ni̍, mi̍ di̍mūl nda̍ māā, lā wa̍ sa̍kpō o̍ wāŋnda̍ yāma̍ŋ kīlūllo̍ ni᷄ŋ, ndu̍yɛ̍ mī lā tōsa̍la᷅ŋ kɛ̍ndɔ᷄ŋ vēllāa̍ vēllē, o̍ ko̍ŋ kɔ̍ɔ̍lī, mī wānā o̍ wānā o̍ nɔ̍ nyīɛ̍ɛ̍ye̍ le̍ chāa̍ŋ ndɔ̄.

¹⁰Wāŋ lāāndūāā pīāāndūāā ndāa̍ vī ma̍ wā nya̍ tɛ̄ɛ̄ŋ nda̍ ni̍, vīi̍ya̍a̍ nɔ̍ lɛ̍ ŋ̄ fi̍nyā le̍ wa̍ ni̍, wānāā lēkāa̍wa̍a̍ cho̍ nya̍ tɛ̄ɛ̄ŋ nda̍ ni̍, wānāā tāmbɛ̍i̍ya̍ ni̍, lā bi̍ī nda̍ bīyɔ̄ɔ̄ wɔ̄ɔ̍ŋ mī lā tūsi̍ nda̍ nyɛ̄ pālāā chōo̍ le̍. Ndu̍yɛ̍ o̍ ko̍ŋ kɔ̍ɔ̍lī, wānā o̍ wānā o̍ tu̍u̍nu᷄ŋ i̍sɔ̍ɔ̍ o̍ īsɔ̄ɔ̍ wɔ̍ɔ̍ŋ o̍ kɔ̄l a̍ chāa̍ŋ ndɔ̄ le̍.

¹¹“Kɛ̍ wānāā nīa̍a̍ ā ye᷄ŋ ya̍ lānī le̍. Ma̍ tōsā bōllē kālāle̍ŋ a̍ ya̍ Mɛ̄lɛ̄ka̍ ma̍ mūlūl la̍ kɔ̄ɔ̍, ndu̍yɛ̍ ma̍ kīndā nīlā ndāla̍ŋ kpi̍ŋ kpi̍ŋ, yɔ̍ŋi̍ bɛ̍ɛ̍ nda̍ tūe̍i̍ nyɛ᷅ ya̍ I̍ di̍mi̍ wo̍.

¹²Mi̍ kɔ̄ltā ndāla̍ŋ lā kīāndū, mɛ̄ɛ̍ pōūwo̍ ō chō nu̍a̍ā yɛ̍. Sāwāla̍ ya̍ Mɛ̍lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nɔ̍ kpāāyāa̍ kpo̍u̍ wo̍ ya̍ I̍ ke̍ nda̍ la̍ŋ, o̍ ko̍ŋ kɔ̍ɔ̍lī, a̍ nyɛ̄ o̍ nyɛ̄ ya̍ I̍ dɔ̍ū wānāā tāsi̍a̍a̍ nda̍ a̍a̍ su̍a̍ā le̍ ya̍ wa̍ o̍ lāsōndō ma̍ dīmūl nda̍ ndu̍ wo̍, ā chɛ᷄l mā tūsi̍ŋ o̍ ndu̍ bɛ̍ŋgu̍ le̍. Le̍ he̍ī, mi̍ ya̍ Mɛ̍lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nɔ̍ kpāāyāa̍ kpo̍u̍ wo̍, mi̍ du̍a̍u̍nu᷄ŋ tu̍mbe̍ a̍ nda̍ o̍ ka̍lā ka̍lā.”

¹³Mi̍ Mɛ̄lɛ̄ka̍ Ya̍a̍wɛ̄ɛ̄ o̍ hi̍a̍ū lāchī a̍ sūɛ̍i̍, mbo̍ dīmī āā, “I̍ ve̍e̍lu̍ nda̍ ma̍ kɛ̄ɛ̄ le̍ ya̍ nīla̍ŋ yāŋɔ̄ɔ̍. Ya̍ bɛ̍ɛ̍ mɛ̄ɛ̍ nda̍ vēēlu̍ ya̍ ō pīɛ̄īle̍ŋ ni̍ŋ, I̍ ye̍ŋ nda̍ lānī le̍.

¹⁴O̍ ko̍ŋ, mi̍ ba̍su̍ nda̍ tɛ̍ɛ̍, mɛ̄ɛ̍ hūēīyīī bɛ̄ndūe̍i̍ ī bāsū nu̍a̍ā nyɔ̄ɔ̍ yɛ̍, mi̍ sɛ̍ŋī nda̍ o̍ lɛ̄ŋīī sūmīālle̍ ni᷄ŋ. Mi̍ lɛ̄ŋndē ndāle̍ŋ lē kōma̍ ta̍mbu̍, mī lē sīmnu᷄ŋ māā nāa̍ wāna̍ chi̍e̍e̍ o̍ ve᷅m bɛ̍ɛ̍ le̍ wa̍. Lɛ̄ŋndē kɛ̄ndɛ̄ kɛ̍ndɛ̄ le̍ŋ, mi̍ to̍sā mi̍ lē lō fo̍ndō fu̍u̍ wa̍.”