Read Southern Kisi Sɛ̄kāla̍yā 8 Bible Online

Sɛ̄kāla̍yā 8 - Southern Kisi bible

Sɛ̄kāla̍yā 8

¹O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍ ō kē ya̍ vɛ̄lɛ̄ yōōŋgū chēle̍ŋ. Mbo̍ dīmūl la̍ āā,

²“Ya̍ Mɛ̍lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nɔ̍ kpāāyāa̍ kpo̍u̍ wo̍, nyɛ̄ ya̍ I̍ di̍mi̍ wo̍ cho̍ ho̍ō ni̍. I̍ ka̍a̍la̍ Sa̍a̍yɔ᷄ŋ ō bɔ̄ɔ̍. I̍ ka̍a̍la̍ ndu̍ ha̍a̍a̍, nyɛ̄ kōŋ ya̍ I̍ cho̍ pāŋālāa̍ le̍ ndu̍ ni̍, mi̍ kɔ̄llo̍ wā ya̍ ŋɔ̄ɔ̍ ni᷄ŋ.

³Le̍la̍ŋ I̍ cho̍ mīīŋgū Sa̍a̍yɔ̄ŋ, ndu̍ yɔ̍nūŋ māā Chūlu̍sɛ̄lɛ̄m chi̍e̍e̍ ni̍ mī kɔ̍ cha᷅l lo̍ŋ. A̍ te̍le̍ŋ ko̍ŋ, wāŋnda̍ vēēlū ni̍ŋ Chūlu̍sɛ̄lɛ̄m āā, chi̍e̍e̍ cho̍ Mɛ̄lɛ̄ka̍ o̍ hɔ̄l sa̍kpō wo̍, o̍ ko̍ŋ kɔ̍ɔ̍lī, mā vēēlu̍ lūāŋīi̍ Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍ ve̍ āā, lūāŋīī Dīāndɛ̄i̍.”

⁴O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍ ō dīmī āā, “I̍ cho̍ tōsā mī Chūlu̍sɛ̄lɛ̄m o̍ wa̍nu̍ŋ vɛ̍lɛ̄ o̍ bā ndɔ̄ɔ̍ chōo̍ yɛ̍lɛ̍kɛ̍lɛ̍ɛ̍ māā pāāndū. Bɛ̄ndūāā wāŋ pīāāndūa̍a̍, a̍ bɛ̄ndūāā wāŋ lāāndūa̍a̍, a̍ yu̍wa̍ ni᷅ŋ nu̍a̍ā ku̍ndɛ̄ɛ̄ bɛ̄ndū mā bālū a̍ tīnda̍la̍ŋ nda̍ ā wānūŋ ni̍ŋ vɛ̍lɛ̄ cha᷄lle̍ o̍ bɛ̍ɛ̄la̍ŋ Chūlu̍sɛ̄lɛ̄m māā pāāndū.

⁵O̍ ko̍ŋ kɔ̍ɔ̍lī, nɛ̄īla̍ŋ Chūlu̍sɛ̄lɛ̄m chi̍e̍e̍ kpo̍u̍, lā wā ni̍ŋ vɛ̍lɛ̄ lā pīāā a̍ chūāāmbūāā pūa̍a̍mbūa̍a̍, o̍ ko̍ŋ kɔ̍ɔ̍lī a̍ chūāāmbūāā lāāndūa̍a̍ mā wa̍ pīsu̍lta̍ŋ, ndu̍yɛ̍ mā wa̍ ā tīūwāā kpo̍u̍.”

⁶Mi̍ Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍ ō dīmī āā, “Wānāā tūa̍a̍ lo᷅ ni̍ŋ yo̍o̍mū a̍ te̍le̍ŋ dɛ̍nɛ̍ pa̍lāa̍ kōŋ nda̍, ā yīyāŋ ni̍ŋ mā dīmi̍ māā, Ī chō ī kālā le̍ mī nyɛ̄ ya̍ I̍ di̍mi̍ ho̍ō wo̍ ō yɔ̄nu̍ŋ. Kɛ̍ a̍ ya̍ Mɛ̍lɛ̄ka̍, he̍ī cho̍ i̍ ka̍lā le̍.”

⁷Mi̍ Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍, ō hīāū lāchī a̍ sūɛ̍i̍, mbo̍ dīmī āā, “Wānāā nīa̍a̍ cho̍ o̍ chɛ̄le̍ŋ ni᷄ŋ o̍ lɛ̄ŋnde̍ŋ bā pāa̍le̍ŋ lē chāŋndo̍ wa̍ ni̍, a̍ cho̍ o̍ chɛ̄le̍ŋ ni᷄ŋ o̍ lɛ̄ŋnde̍ŋ bā pāa̍le̍ŋ lē dēllo̍ wa̍ ni̍, I̍ cho̍ nda̍ hūnɔ̄ɔ̄ chīīndīāā.

⁸O̍ ko̍ŋ mī I̍ sōlī lo̍ŋ, mī mi̍ŋgī nda̍ Chūlu̍sɛ̄lɛ̄m chi̍e̍e̍ mā hu᷄ŋ wa᷅ īchāli̍ lo̍ŋ. Ā chō hūnɔ̄ɔ̄ sīmnɔ᷄ŋ wa̍nāā nī, ndu̍yɛ̍, ya̍ bɛ̍ɛ̍ mī I̍ si̍mnu᷄ŋ Mɛ̍lɛ̄ka̍ ndā. I̍ wa᷅ ni̍ŋ sa̍kpō a̍ nda̍, ndu̍yɛ̍ mī wa̍ wānā tōnya̍ a̍ nda̍.”

⁹Mi̍ Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍ ō dīmī āā, “Bōōndi̍i̍ nda̍ wa̍ chīīye̍ kīlāa̍ le̍ chīɛ̍i̍ cho̍ le̍ ya̍ Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍ tāŋgūllo̍ ve̍, mi̍ wānāa̍ su̍a̍ā le̍ ya̍ Mɛ̄lɛ̄ka̍ wa̍ ā dīmī dīōmndā pīlɛ̍ la̍ŋ nda᷅ŋ kpe̍. Le̍la̍ŋ nya̍ tu̍e̍ī dīōmnda̍ŋ ndāŋ nda̍, lā ma᷅l te̍. Lā hīo̍u̍ la̍chi̍ a̍ si᷄mda̍ŋ a̍ dīāllūŋ kālā ha̍a̍a̍, mbō lo̍ o̍ ko̍ŋ mī chīɛ̄ī nūu̍ ō chūū tāŋgūl.

¹⁰Lɔ̍ɔ̍pa̍ bɛ̍ɛ̍ mi̍ te̍le̍ŋ ya̍ I̍ cho̍ ho̍ō dīmīo̍o̍ wo̍ ō fūūlūū, pāāwā o̍ pāāwā ve̍ le̍ wa̍li̍ o̍ wa̍li̍ le̍, ndu̍ o̍o̍ wa̍ wa̍li̍ wāna̍ chi̍e̍e̍ to̍sa̍, ndu̍ o̍o̍ wa̍ wa̍li̍ chɔ̄lū tōsa̍. A̍ te̍le̍ŋ ko̍ŋ, wānā o̍ wānā ndu̍ o̍o̍ be̍lū mɛ̄ɛ̍ ndu̍ o̍o̍ ye̍e̍mā le̍ bālɔ̄ɔ̄ yɛ̍ le̍, a̍ sīōōŋnde̍ le̍ ya̍a̍mɔ̍ɔ̍wa̍. Mi̍ to̍sā mi̍ wānā o̍ wānā o̍ si̍mnu᷄ŋ ya̍a̍mɔ̍ɔ̍nɔ̍ɔ̍ le̍ chāa̍ŋ ndɔ̍ nda̍ chīɛ̄ɛ̄li̍āŋndo̍.

¹¹Kɛ̍ wānāā nīa̍a̍ lo̍ yōōmū a̍ te̍le̍ŋndo̍ ho̍ō wa̍ nda̍, I̍ bi̍ī ni̍ŋ nda̍ mɛ̄ɛ̍ ya̍ I̍ bi̍ī wāŋnda̍ a̍ te̍le̍ŋ ko̍ŋ yɛ̍ le̍.

¹²Wāŋnda̍ ha̍ā ā wā ni̍ŋ wa̍lta̍ ndāla̍ ŋ̄chīɛ̄ɛ̄la̍ŋ tōsāa̍ a̍ kɔ̄ltā nyūlū. Yɔ̄mīī ndɛ̄i̍ ku̍a̍mɛ̄i̍ ī wā ni̍ŋ ko̍mɔ̍ɔ̍ ta̍u̍ ta̍u̍, o̍ ko̍ŋ kɔ̍ɔ̍lī, mī nyɛ̄ dīa̍a̍ wa̍ fūlāa̍ o̍ chīɔ̄ɔ̄ŋ nda᷄ŋ ni᷄ŋ ta̍u̍, fo̍ndōle̍, le̍ te̍le̍ŋ o̍ te̍le̍ŋ I̍ wa᷅ ni̍ŋ nda̍ pīɔ̍ɔ̍ kīo̍o̍ ta̍u̍ ta̍u̍. Wānāa̍ lo̍ yōōmū o̍ lɛ̄ŋnde̍ŋ nde᷅ŋ ni᷄ŋ nda̍, sa̍lālā ya̍ I̍ du̍a̍ū nda̍ ni̍ŋ nda̍ŋ, la̍ŋ la̍ wa̍ ni̍ŋ la᷅ŋ ni̍.

¹³Wāŋnda̍ Chu̍dā, a̍ wāŋnda̍ I̍sɔ̄lūɛ̄ī, wāŋnda̍ o̍ lɛ̄ŋnde̍ ni̍ŋ nda̍ a̍a̍ chu̍a̍ nyɛ̄ pālāa̍ to᷅l nya̍ chōo̍ wo̍ māā tāāmāsi̍ le̍ mēēni̍āŋndo̍. Kɛ̍ I̍ cho̍ nya̍ chīīndīāā mī dɔ̍ū nya̍ sa̍lā. A̍ nya̍ wāŋnda̍ ā dūāūnūŋ ni̍ŋ la̍sa̍lā ni̍. Le̍la̍ŋ sīōōŋīī bi̍ī nya̍ le̍. Lā sīmu̍l kɔ᷅lta̍ŋ mī lā wa̍ a̍ dīāllūŋ kālā.”

¹⁴O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍ ō dīmī āā, “Bōōndi̍i̍ fi̍nyāā nyāā ma̍māa̍ ā tōsa̍ mi̍ du̍a̍u̍nu᷄ŋ tu̍mbe̍ a̍ nda̍ ve̍, mi̍ kɛ̄ɛ̄sīāā le̍ nda̍ nyɛ̄ pālāa̍ tūsīo̍o̍ chōo̍. Ndu̍yɛ̍ I̍ fe̍ŋa̍ŋ o̍ dīōm kōŋ chōo̍ le̍, mi̍ to̍sā mɛ̄ɛ̍ ya̍ I̍ kɛ̍ɛ̍si̍a̍a̍ le̍ tōsāa̍ yɛ̍.

¹⁵Kɛ̍ I̍ kɛ̍ɛ̍si̍a̍a̍ ni᷅ŋ su̍ŋ su̍ŋ le̍ nya̍ wāŋnda̍ Chu̍dā, a̍ nya̍ wāŋnda̍ Chūlu̍sɛ̄lɛ̄m wāŋnda̍ te̍le̍ŋndo̍ ho̍ō sa̍lāa̍ dɔ̄wɔ̄ɔ̍. Le̍la̍ŋ sīōōŋīī bi̍ī nya̍ le̍.

¹⁶Kɛ̍ ndu̍yɛ̍ sɔ̄ɔ̍ŋ nya̍ nɔ̄ mī lā tōsa̍ wo̍ŋ, mu̍ŋ cho̍ mu᷅ŋ ni̍. Lā dīmu̍la᷅ŋ to᷅nya̍la̍ŋ vēllāa̍ vēllē, ndu̍yɛ̍ mī lā kēlū yāma̍ŋ wāŋnda̍ tɛ̄ɛ̄ŋ, o̍ tōŋgōla̍ nyāla̍ kɔ̍ɔ̍sɔ̍la̍ŋ ni᷄ŋ o̍ nɛ̄ī sa̍kpōo̍ chōo̍, yāma᷅ŋ to̍sā mī kɔ̄l nyūlōo̍ ō mīīŋgu̍ wāŋnda̍ tɛ̄ɛ̄ŋ ndo̍ŋ.

¹⁷Wānā o̍ wānā tu̍u̍nu᷄ŋ sɔ̍ɔ̍ŋ wɔ̍ɔ̍ŋndo̍ŋ o̍ kɔ̄l a̍ chāa̍ŋ nūm le̍. Lā me̍na᷄ŋ se᷅ndi̍ sɔ̄ŋ chōo̍ mī lā tɛ̄nda̍ se̍īlē lāka̍fā le̍. Kāni̍ fo̍ndōle̍, sɔ̄ɔ̍ŋ ya̍ Mɛ̍lɛ̄ka̍ tu᷄l yɛ̄le̍ŋ ndo̍ŋ, mu̍ŋ cho̍ mu᷅ŋ ni̍.”

¹⁸O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍, ō kē ya̍ Sɛ̄kāla̍yā yōōŋgū chēle̍ŋ. Mbo̍ dīmūl la̍ āā,

¹⁹“Nyɛ̄ ya̍ Mɛ̍lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nɔ̍ kpāāyāa̍ kpo̍u̍ wo̍ dīmi̍ wo̍ cho̍ ho̍ō ni̍. Su᷅mndā nya̍ chō bīyɔ̄ɔ̍ wɔ̄sī o̍ wɔ̄sī, o̍ pāŋgi̍i̍ hi̍ɔ̍ɔ̍lu̍ ni̍ŋ, a̍ o̍ pāŋgi̍i̍ ŋu̍ɛ̍ɛ̍nu̍ ni̍ŋ, a̍ o̍ pāŋgi̍i̍ ŋɔ̍mmɛ̍ū ni̍ŋ, a̍ o̍ pāŋgi̍i̍ tɔ̍ o̍ pāŋgi̍i̍ tɔ̍ ni̍ŋ nda̍ŋ, lā wā ni̍ŋ bo̍o̍ndu̍ŋ di̍a̍ā nyɛ̄ dīāā kɔ̄l kɛ̄ndɛ̄ bɛ̄ndū, ndu̍yɛ̍ mī lā wa̍ bɔ̄ŋa᷅ŋnda̍ nya̍a̍le̍ la̍ bɛ̍ndū le̍ wāŋnda̍ Chu̍dā. Le̍la̍ŋ lā kāāla̍ to᷅nya̍a̍ tōsāa̍, ndu̍yɛ̍ mī lā kāāla̍ wāa̍ a̍ kɔ̄l nyūlū.”

²⁰Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍ ō dīmi̍ āā, “Te̍le̍ŋ cho̍ fūūlūū wāŋnda̍ wā ni̍ŋ fu̍lāa̍ bā o̍ bā, a̍ o̍ chi̍e̍e̍ŋ bɛ̍ndūŋ bɔ̄ɔ̍ bɔ̍ɔ̍ mā hūŋ Chūlu̍sɛ̄lɛ̄m kpɔ̍lɔ̄kpɔ̄lɔ̄.

²¹Wāŋnda̍ wā ni̍ŋ ma̍lɔ̄ɔ̍ o̍ chi̍o̍o̍ŋ, mā kūā ha̍ā o̍ chi̍o̍o̍ŋ ŋ̄pīlɔ̍ŋ dīmūllo̍ āā, ‘Ŋ̄ chō kɔ̄la̍ŋ le̍ Mɛ̄lɛ̄ka̍ Ya̍a̍wɛ̄ɛ̄, o̍ nɔ̍ kpāāyāa̍ kpo̍u̍ sōōlūūwo̍, ndu̍yɛ̍ mī ŋ̄ nyūna̍ ndu̍ le̍ mbō māla̍ na̍a̍.’ Le̍la̍ŋ lā ŋ̄ kɔ̄ŋnu᷅ŋ.

²²Wānāā bɔ̄ɔ̍ bɔ̍ɔ̍, a̍ lɛ̄ŋīī kpāāyɛ̄ī bɛ̄ndūī bɔ̄ɔ̍ bɔ̍ɔ̍ ā hūŋ ni̍ŋ Chūlu̍sɛ̄lɛ̄m le̍ mā hu᷄ŋ so̍o̍lūū Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍, a̍ le̍ ndu̍ nyūnāa̍ mbō māla̍ nda̍.

²³A̍ te̍le̍ŋ ko̍ŋ, wāŋnda̍ ā fūlā ni̍ŋ ŋ̍wa᷅ŋ tɔ̍ a̍ si̍m le̍ lɛ̄ŋnde̍ kpo̍u̍ a̍ kāa̍la̍ŋ kpo̍u̍ wa̍, mā hu᷄ŋ sa̍ā Chu̍ūnɔ̄ɔ̍ ō pīlɛ̍ dōmāa̍ a̍ mākɔ̄ɔ̍, mā dīmu̍l ndu̍ āā, ‘Yāndi̍i̍, ŋ̄ kɔ̄ŋnu᷅ŋ lātūlu̍ na̍a̍ nya̍ā nāa̍ ŋ̄ chō kɔ̄la̍ŋ nda̍, fo̍ndōle̍, ŋ̄ tūēī māā Mɛ̄lɛ̄ka̍ chō nya̍ Chu̍ūwa̍ kɔ̄ɔ̄lī.’ ”