Read Southern Kisi Sɛ̄kāla̍yā 9 Bible Online

Sɛ̄kāla̍yā 9 - Southern Kisi bible

Sɛ̄kāla̍yā 9

¹O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ ke᷅ ya̍ vɛ̄lɛ̄ yōōŋgū chēle̍ŋ. Nyɛ̄ o̍ di̍mu̍l la̍ wo̍ cho̍ ho̍ō ni̍. Mbo̍ dīmūl la̍ māā ō chō lɛ̄ŋndē Hādīlu̍a̍kīle̍ŋ nyɛ̄ pālāa̍ tūsī chōo̍, a̍ chi̍e̍e̍ bɛ̍ndōo̍ Dāma̍si̍kɔ̍ɔ̄. Ndu̍yɛ̍ mɛ̄ɛ̍ yu̍ŋgu̍la̍ŋ I̍sɔ̄lūɛ̄ī kpo̍u̍ la̍ cho̍ ndu̍ Mɛ̍lɛ̄ka̍ Ya̍a̍wɛ̄ɛ̄ o̍ bā bɛ̄ŋgu̍ yɛ̍, le̍nde̍ ko̍ni̍ wāŋnda̍ o̍ chi̍e̍ēŋndo̍ chōo̍ a̍ cho̍ ndu̍ o̍ bā bɛ̄ŋgu̍ ni̍.

²Ndu̍yɛ̍ o̍ ko̍ŋ kɔ̍ɔ̍lī, chi̍e̍e̍ bɛ̍ndōo̍ Ha̍ma̍tī, o̍ chi̍ɛ̍ɛ̍li̍āŋ a̍ lɛ̄ŋndē Hādīlu̍a̍kī le̍ŋ ndo̍ bɛ̍ɛ̍, ō chō hūnɔ̄ɔ̄ nyɛ̄ pālāa̍ bɛ̍ndōo̍ sɔ̄lā. Ndu̍yɛ̍, chi̍e̍e̍ bɛ̍ndōo̍ Ta̍a̍yā a̍ Sa̍i̍dɔ̄ŋ bɛ̍ɛ̍, dɛ̍nɛ̍ pa̍lāā bɛ̄ndōo̍ ō chō mu᷅ŋ hūnɔ̄ɔ̄ tōlɔ̄ɔ̄ chōo̍, mi̍ chē bɛ̍ɛ̍ mi̍ wāŋnda̍ o̍ chi̍o̍o̍ŋ mu᷅ŋ ni᷄ŋ, a̍ nɔ᷅ kɔ̄l kālo̍o̍ a̍ tāāsi̍o̍o̍.

³Wāŋnda̍ Ta̍a̍yā a̍ lo̍ o̍ ko̍ŋ, ma̍ tāŋgūl fo̍ndāŋndā kālā ka̍lāla̍ŋ le̍ nda̍ pi̍la̍ māndāa̍, ndu̍yɛ̍ ma̍ sūl sūllo̍ pīla̍ a̍ ka̍ni̍ŋ hu̍mbo̍ŋ, o̍ ko̍ŋ kɔ̍ɔ̍lī, a̍ ka̍ni̍ŋ si̍a̍ŋa᷄ŋ. Mɛ̄ɛ̍ chu̍ndo̍o̍ ō wā nu̍a̍ā lɛ̄ŋ mī wāŋnda̍ nīɔ̄ū le̍cho̍o̍ yɛ̍, le̍nde̍ ka̍ni̍ŋ hu̍mbo᷄ŋ a̍ ka̍ni̍ŋ si̍a̍ŋa᷄ŋ ŋ̄ chō Ta̍a̍yā chi̍e̍e̍ ni̍.

⁴Kɛ̍ ndu̍yɛ̍ nyɛ̄ o̍ nyɛ̄ nda̍ nɔ̄, Māsānɔ̄ɔ̍ Mɛ̄lɛ̄ka̍ cho̍ nda̍ mu̍ŋ hūnɔ̄ɔ̄ pōōndīāā o̍ bā kpo̍u̍. Sūltā ndāla̍ŋ kpo̍u̍, ō chō la̍ŋ hūnɔ̄ɔ̄ vīī vīī o̍ Pēe̍ Mɛ̄ŋmā Īhɛ᷄llo̍ ni᷄ŋ, o̍ ko̍ŋ kɔ̍ɔ̍lī, mbō tōsa̍ mī chi̍e̍e̍ bɛ̍ndōo̍ Ta̍a̍yā o̍ ŋu̍ɛ̄ mbō sīmnu᷄ŋ pu᷅lta̍ŋ.

⁵Wāŋnda̍ A̍si̍kɛ̍lɔ̄ŋ, a̍ cho̍ hūnɔ̄ɔ̄ chɔ̄ nyɛ̍ yɔ̍nūŋ ni̍ŋ a̍ wāŋnda̍ Ta̍a̍yā chi̍e̍e̍ wo̍, mī sīōōŋīī bɛ̄ndūe̍i̍ ī bīī nda̍. Wāŋnda̍ Ka̍a̍sā bɛ̍ɛ̍, tē ā hu᷄ŋ chɔ᷅ nyɛ̍ yɔ̍nūŋ ni̍ŋ a̍ Ta̍a̍yā wo̍ pɛ̍, kɔ̄lta̍ŋ lā chō nda̍ hūnɔ̄ɔ̄ lāāsīa̍ŋ ni̍ŋ. Wāŋnda̍ Ɛ̍ki̍lɔ̄ŋ bɛ̍ɛ̍, sīōōŋīī bɛ̄ndūe̍i̍ chō nda̍ hūnɔ̄ɔ̄ bīyɔ̄ɔ̄, kāni̍ fo̍ndōle̍, ā nɔ᷅ lɛ̍ ni̍ŋ ti̍i̍nda᷄ŋ o̍ tīīnda᷄ŋ te̍. Māsā bɛ̍ndōo̍ Ka̍a̍sā o̍ cho̍ hūnɔ̄ɔ̄ pīɔ̍mndo̍ sɔ̄lā, ndu̍yɛ̍ o̍ ko̍ŋ kɔ̍ɔ̍lī, mi̍ A̍si̍kɛ̍lɔ̄ŋ chi̍e̍e̍ o̍ hu̍ŋ pi̍ɔ̍l, mbō sīmnu᷄ŋ pɔ᷅mndo̍.

⁶Wānāā kāa̍la̍ yɛ̍ yi̍a̍a̍ nda̍ wa᷅ ni̍ŋ A̍si̍dɔ̍dī chi̍e̍e̍ ni̍. Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “I̍ cho̍ tōsā mī yōŋga̍ wāŋnda̍ Fīli̍i̍tīāŋ o̍ mɛ̍ɛ̍lu̍.

⁷Te̍le̍ŋ cho̍ hūnɔ̄ɔ̄ fūūlūū, wāŋnda̍ Fīli̍i̍tīāŋ a̍ di᷅ lɛ̍ ni̍ŋ ŋ̍vi̍sī o̍ ŋ̄vīsī a̍ kōo̍wa̍ŋ lēni᷄ŋ te̍, kɛ̄lɛ̄ŋgāā ni᷅ŋ te̍, mā dē nyɛ̄ dīāā ya̍ Mɛ̍lɛ̄ka̍ kɛ̄ɛ̍ māā wānā di̍ā le̍ wo̍. Wānāa̍ lo᷅ ni̍ŋ yo̍o̍mū Fīli̍i̍tīāŋnda̍ tɛ̄ɛ̄ŋ nda̍, ā chō hūnɔ̄ɔ̄ wā le̍ ya̍ Mɛ̍lɛ̄ka̍. I̍ cho̍ nda̍ hūnɔ̄ɔ̄ chūā, mɛ̄ɛ̍ ya̍ I̍ chu̍a̍ wāŋnda̍ o̍ būŋgāŋ yɛ̍ yi̍ɔ̍ɔ̍ŋ ni᷄ŋ o̍ lɛ̄ŋndē Chu̍dāle̍ŋ ni̍ŋ yɛ̍. Wāŋnda̍ Ɛ̍ki̍lɔ̄ŋ chi̍e̍e̍ a̍ cho̍ hūnɔ̄ɔ̄ sīmnɔ᷄ŋ wānāā nī, mɛ̄ɛ̍ Chɛ̄bu̍sa̍i̍tīi̍ya̍ ā sīmnu᷄ŋ wa̍nāā nī yɛ̍.

⁸I̍ cho̍ hūnɔ̄ɔ̄ chīɛ̄ī nūu̍ māndā, ndu̍yɛ̍ mī to̍sa̍ wānā o̍ wānā o̍ hi᷅ŋ ndɛ̍ mbō hu᷄ŋ chi᷅ŋa̍la᷅ŋ wa̍nāā nīa̍a̍ le̍. Wānāā nda̍ a̍a̍ tu̍sī wa̍nāā nīa̍a̍ nyɛ̄ pālāa̍ chōo̍ wa̍, Ī cho̍ tōsā ā ve᷅m lɛ̍ ni̍ŋ wa̍nāā nīa̍a̍ nyɛ̄ pālāā tūsī chōo̍ le̍, kāni̍ fo̍ndōle̍, hɔ̄ltē nīle̍ŋ lē chō ni᷅ŋ nda̍ wā chōo̍ le̍ te̍le̍ŋ o̍ te̍le̍ŋ.”

⁹Wāŋnda̍ Sa̍a̍yɔ̄ŋ,[1] lā dɔ̄ɔ̄nu̍ŋ nya̍a̍le̍! Lā dɔ̄ɔ̄nu̍ŋ nya̍a̍le̍ kpe̍e̍kpe̍i̍! Lā dēŋi̍ cho̍o̍ cho̍o̍ a̍ kɔ̄l kɛ̄ndɛ̄ bɛ̄ndōo̍ nya̍, wāŋnda̍ Chūlu̍sɛ̄lɛ̄m. Lā tōfa̍ wɔ̍ māsa̍ nyā bɛ̍ndōo̍, ō chō hūnɔ̄ɔ̍ nāa̍ ya̍ chūā. Ndu̍ cho̍ wāna̍ chi̍i̍ndīāā ni̍ŋ ŋ̍wāŋndā chīe̍e̍ wo̍ ni̍. Ō chō wānā sa̍kpo̍. Ndu̍yɛ̍ ō chō wānā tu̍sīa̍ŋ bɛ̍ndū. Ō chō hūnɔ̄ɔ̍ o̍ sōfɛ̍lɛ̍ pi̍a̍a̍ndū fɔ̍ŋndɔ̍ɔ̍ chōo̍.

¹⁰Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “I̍ cho̍ nyɛ̄lā chɔ̄ūlā su̍a̍a̍ ā nāŋ nda̍ŋ sōlī o̍ lɛ̄ŋndē I̍sɔ̄lūɛ̍i̍le̍ŋ ni̍ŋ kpo̍u̍, ndu̍yɛ̍ o̍ ko̍ŋ kɔ̍ɔ̍lī, mī fa̍a̍ŋi̍a̍a̍ su̍a̍ā chɔ̄ūwāa̍ cho̍ Chūlu̍sɛ̄lɛ̄m chi̍e̍e̍ wa̍. Chīɔ̄ūlā wāŋnda̍ ā chūā a̍ la̍ŋ nda̍ŋ kpo̍u̍, lā chō hūnɔ̄ɔ̄ wā lā yīmī yīmīāā. Māsa̍ nyā bɛ̍ndōo̍, ndu̍ hu᷅ŋ ni̍ŋ a̍ kɔ̄l nyūlōo̍ o̍ lɛ̄ŋnde̍ ni᷄ŋ ni̍. Ndu̍yɛ̍ ndu̍ wa᷅ ni̍ŋ ma̍sāa̍ le̍ chi̍e̍ēŋndo̍ kpo̍u̍ ni̍.”

¹¹O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mī āā, “Kɛ̍ nya̍ nya̍ le̍ kpe̍ma̍ cho̍ na̍a̍ tɛ̄ɛ̄ŋ na̍a̍ nya̍ā mi̍ kōo̍wa̍ŋ mā tālā le̍ kpe̍ma̍ ko̍ŋ yīīyo̍ wo̍, I̍ cho̍ wānāā nyāa̍ cho̍ o̍ chɛ̄le̍ŋ ni᷄ŋ nda̍ bāŋā, mī so̍li̍ nda̍ nāa̍ nda̍ dɔ̄ū nda̍ o̍ so̍o̍ŋ yi̍ŋgi̍lɛ̍i̍ bɛ̍ndu̍ nɔ̍ ma̍mɛ᷅ŋ lēni᷄ŋ te̍ wo̍ ni᷄ŋ nda̍.

¹²Nya̍ cho̍ o̍ bīyɔ̄ɔ̍ ni᷄ŋ o̍ chɛ̄le̍ŋ ni᷄ŋ nda̍, lā mīīŋgu̍ o̍ lɛ̄ŋndē nyāle̍ nɔ̍ kpākīla̍ ka̍lā ka̍lā la̍ŋ le̍ nya̍ māndāa̍ le̍ŋ ni᷄ŋ. Lā mīīŋgu̍, fo̍ndōle̍, lā nɔ̄ ni᷅ŋ tīīnda᷄ŋndo̍. Kāni̍ fu̍u̍le̍, I̍ chu̍e̍l nya̍ būŋgɛ̄i̍ pāa̍le̍ hāūle̍ŋ nde᷅ŋ, māā dɛ̍nɛ̍ pa̍lāā o̍ dɛ̍nɛ̍ pa̍lāa̍ ke̍e̍ku̍ nya̍ chōo̍, I̍ cho̍ nya̍ sa̍lā dɔ̄wɔ̄ɔ̄ le̍ ndu̍ bɛ̄mbɔ̄ɔ̍ lēdīi̍ŋ.

¹³Chu̍dā o̍ cho̍ māchūāā māā chīɔ̄ū nī, o̍ ko̍ŋ kɔ̍ɔ̍lī, mi̍ I̍sɔ̄lūɛ̄ī ndu̍ wā māā chīŋɔ̍le̍ ni̍. Sa̍a̍yɔ̄ŋ, ndu̍ yɔ̍nūŋ māā Chūlu̍sɛ̄lɛ̄m ni̍, ndu̍ cho̍ māchūāā māā mūɛ̄ī ni̍i̍ fāŋ, le̍ sɔ̍ŋgɔ̄ɔ̍ a̍ so̍vɛ̄i̍ya̍ Ki̍li̍sī.”

¹⁴Mɛ̄lɛ̄ka̍ Ya̍a̍wɛ̄ɛ̄ o̍ cho̍ hūnɔ̄ɔ̄ fūlā, mbō wa̍ bālɔ̄ɔ̍ chōo̍ cho̍o̍ wa̍nāā ndūa̍a̍ chōo̍. Chīŋɔ̍ma̍ ndūa̍ŋ mā wā ni̍ŋ fu̍lāa̍ īfīāŋ fīāŋnde̍ o̍ hūēīye̍ ni᷄ŋ, nu̍a̍ wɔ̍ ko̍ mɛ̄ɛ̍ nyɛ̄ ŋūāla̍lɛ̍ī ŋūāla̍lɛ̍īyo̍ ō wā nu̍a̍ā kīōlōo̍ o̍ ha̍lāa̍ ni᷄ŋ yɛ̍. Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ kpu̍lu̍ŋgūma̍ bɛ̄ndōo̍, ō chō hūnɔ̄ɔ̄ bu̍lu̍ ndɔ̄ɔ̍ hɔ̄ŋ, mbō de᷄l a̍ ya̍a̍mɔ̍ɔ̍wa̍a̍ ndūa̍a̍ chōo̍ o̍ hūēīyīī tɔ̍ɔ̍mɛ̍i̍ bɛ̄ndūi̍ cha᷅ŋ ba᷅ tōūwo̍ ve̍ ni᷄ŋ.

¹⁵Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nɔ̍ kpāāyāa̍ kpo̍u̍ wo̍, ō chō hūnɔ̄ɔ̄ wānāā ndūa̍a̍ māndā. Wānāā ndūa̍a̍ ā chō hūnɔ̄ɔ̄ ya̍a̍mɔ̍ɔ̍wa̍a̍ ndāa̍ chīŋa̍la᷅ŋ a̍ pōūtā fa̍ānda̍la̍ŋ mā yēm nda̍, ndu̍yɛ̍ mā tɛ̄ɛ̄mbu̍u̍ nda̍. Ā wā ni̍ŋ de̍ŋīo̍o̍ ya̍a̍mɔ̍ɔ̍wa̍a̍ ndāa̍ chōo̍ o̍ chɔ̄ūwo̍ ni᷄ŋ, wānā cha᷅ ni̍ŋ ko̍ bɛ̍ɛ̍ āā mūɛ̄īya̍ŋ nda̍ ko᷄l ni̍. Kōo̍ma̍ ya̍a̍mɔ̍ɔ̍wa̍a̍ ndāa̍, mā wā ni̍ŋ kɔ̍la̍ŋ kōŋgi̍la̍ŋ lɛ̄ŋ. Mɛ̄ɛ̍ nda̍ pēī nu̍a̍ā kōo̍ma̍ chɔ̄lū nda̍ dīī le̍ sa̍lāa̍ wo̍ o̍ hɛ̄ŋgɔ̍ɔ̍ ni̍ŋ, mā hūlū ma̍ŋ o̍ ma̍āŋndo̍ chōo̍ mī mā kūɛ̄ kōŋgi̍o̍o̍ yɛ̍, le̍nde̍ kōo̍ma̍ nda᷄ŋ mā wā ni̍ŋ kɔ᷅la̍ŋ kōŋgi̍la̍ŋ ni̍.

¹⁶Tē te̍le̍ŋ ko̍ŋ ō fūūlu̍u̍ pɛ̍, mɛ̄ɛ̍ wānā ma̍ndāā lāsāa̍ ō chīɔ̄ū nu̍a̍ā sāa̍ ndūa̍a̍ o̍ kpūndɔ̍ɔ̍ ni᷄ŋ yɛ̍, le̍nde̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ ndāa̍ ō chīīndīāā ni̍ŋ nda̍ ni̍. Ndu̍yɛ̍ mɛ̄ɛ̍ nda̍ bɛ̄ɛ̄ndīāā nu̍a̍ā mɔ̍si̍l lēmāsāa̍, a̍ pōūtā ba̍ā kālālā bɛ̄ndūla̍ŋ, mbō wa̍ dēŋīo̍o̍ a̍ nāŋɔ̄ɔ̍ yɛ̍, le̍nde̍ wāŋnda̍ I̍sɔ̄lūɛ̄ī a̍ wā ni̍ŋ o̍ lɛ̄ŋndē ndɔ̄le̍ŋ ni᷄ŋ ni̍.

¹⁷Lɛ̄ŋndē ndāle̍ŋ lē wā ni̍ŋ lɛ᷅ŋndē kɛ̄ndɛ̄lē bɛ̄ndū, lē wā ni̍ŋ lɛ᷅ŋndē wāŋnda̍ ā kāa̍la̍ ni̍ŋ le̍ cha᷄lle̍. Lɛ̄ŋndē ndāle̍ŋ lē nɔ̄ ni̍ŋ nyɛ̍ dīa̍a̍ a̍ mūɛ̄īmā sɛ̄nɛ̄īya̍ŋ ta̍u̍ ta̍u̍. Le̍ he̍ī, chūāā ndāā pi̍a̍a̍ndūa̍a̍, a̍ chūāā ndāā la̍a̍ndūa̍a̍, ā sīmnūŋ ni̍ŋ wa̍nāā kpāāyāā bɛ̍ndū.