Read Southern Kisi Māa̍ti̍u̍ 10 Bible Online

Māa̍ti̍u̍ 10 - Southern Kisi bible

Māa̍ti̍u̍ 10

¹O̍ ko̍ŋ kɔ̍ɔ̍lī, mi̍ Chi̍i̍sū ve̍e̍lū bu̍ɛ̍i̍yāā ndūāā ŋ̍wa᷅ŋ tɔ̍ a̍ wānāā ŋīɔ̍ɔ̍ŋnda̍ nāa̍ pi᷅lɛ̍. Mbo̍ kē nda̍ kpāāyāa̍ le̍ nyi̍nāā wɔ̄ɔ̍ŋnda̍ tōūwɔ̄ɔ̍ wāŋnda̍ kɔ̄ɔ̄lī a̍ nāālā yɛ̍ yɛ̍la̍ŋ kpo̍u̍ si̍ŋgīo̍o̍.

²Ŋ̄wāŋ tɔ̍ a̍ wānāā ŋīɔ̍ɔ̍ŋāā kāŋ dīōlā ndāla̍ŋ la̍ cho̍ la᷅ŋ ni̍. Ō tāso̍o̍ cho̍ Sa̍i̍mɔ̄ŋ ni̍, mā vēēlū ndu̍ vɛ̄lɛ̄ āā, Pītɛ̍, nda̍ A̍ndūlū pɔ̍mbɔ̄ ndɔ̄, a̍ pūa̍a̍ Sɛ̍bɛ̍dīī, Chēmi̍si̍ nda̍ Chɔ᷄ŋ pɔ̍mbɔ̄ ndɔ̄,

³a̍ Fi̍li̍pī nda̍ Bātɔ̄lɔ̍mīū, a̍ Tɔ̄mɔ̍si̍ nda̍ Māa̍ti̍u̍ kɔ̍sɔ̄ŋnɔ̄, a̍ Chēmi̍si̍, po̍ A̍fa̍a̍sī wo̍, nda̍ Ta̍a̍dīɔ̄ɔ̄,

⁴a̍ Sa̍i̍mɔ̄ŋ wāna̍ sɔ̍ŋgā le̍ lɛ̄ŋndē ndɔ̄la̍ŋ bāŋāa̍ wo̍, a̍ Chu̍dā Īsīka̍a̍līɔ̄ɔ̄ o̍ pi̍si̍ Chi̍i̍su̍ wo̍.

⁵Mi̍ Chi̍i̍sū chɔ᷅m pūa̍a̍ tɔ̍ a̍ ā ŋīɔ̍ɔ̍ŋnda̍ ha̍ā nyɛ̄ nda̍ nɔ̄ le̍ tōsāa̍ wo̍. Mbo̍ vīām nda̍. Mbo̍ dīmūl nda̍ āā, “Lā ku̍ā o̍ fo̍ndāŋndā wānāa̍ cho̍ a̍ Chu̍ū le̍ wa̍ le̍. Ndu̍yɛ̍, lā ku̍ā o̍ chi̍e̍e̍ŋ Sāme̍e̍līāāŋnda̍ le̍.

⁶O̍ wāŋnda̍ I̍sɔ̄lūɛ̄ī lo̍ nya̍ kūā ni̍, a̍ cho̍ ha̍ā māā sāā la̍a̍sīa̍ŋ nda̍.

⁷Lā kɔ̍ mī lā kɔ̍ di̍mūl wāŋnda̍ sūɛ̍i̍ Mɛ̄lɛ̄kɛ̍i̍ āā, ‘Pāa̍le̍ Mɛ̄lɛ̄ka̍ chō wā māsāa̍ wāŋnda̍ chōo̍ le̍ŋ lē chō ni᷅ŋ a̍ nya̍ kpɛ̍ɛ̍lūŋ.’

⁸Lā sīŋgi̍ wa̍nāā lānāāwa̍ mī lā mīŋgi̍ wānāā vīlɛ̍i̍ya̍ yōōmū. Ndu̍yɛ̍, lā sīŋgi̍ wa̍nāa̍ nɔ̍ nāā wɔ̄ɔ̍ŋndo̍ lēkɔ̄ɔ̍ wa̍ mī lā tōū nyi̍nāā wɔ̄ɔ̍ŋnda̍ wāŋnda̍ kɔ̄ɔ̄lī. Fo̍ndō Mɛ̄lɛ̄ka̍ ke̍ nya̍ kpāāyāa̍ ho̍ō ni̍. Le̍la̍ŋ, tē lā tōsa̍l wāŋnda̍ sɔ̄ɔ̍ŋ mu᷅ŋ pɛ̍, lā bi̍ī nda̍ nyɛ̄ o̍ nyɛ̄ o̍ bā sɔ̍ŋgɔ̍ ko̍ŋ te̍.

⁹Lā ku̍ā a̍ nyɛ̄ sɔ̄lāā le̍.

¹⁰Lā ku̍ā a̍ lāwōlɔ̄ɔ̄ le̍. Ko̍ŋ cho̍ ni̍, lā ku̍ā a̍ dōmāla̍ ti̍ɔ̍ɔ̍ŋ te̍. Ndu̍yɛ̍, lā ku̍ā a̍ kɔ̄ɔ̄vɛ̄i̍la̍ ku̍ndālā tīɔ̍ɔ̍ŋ te̍. Lā chu̍ā bɛ̍ɛ̍ lātīnda̍ le̍. Lā ku̍ā a̍ nyɔ̄ɔ̍ŋ mu᷅ŋ te̍. Kāni̍ fu̍u̍le̍, wāna̍ wa̍llo̍ nɔ̄ mbō sɔ̄la̍ nyɛ̄ o̍ ha̍u̍ bā le̍ ndu̍ wo̍.

¹¹“Tē lā fūūlu̍u̍ o̍ chi̍e̍e̍ o̍ chi̍e̍e̍ pɛ̍, lā nūūvi̍a̍a̍ le̍ wāna̍ ka̍ā kɛ̄ndɔ̄ɔ̍, o̍ wa᷅ o̍ chɛ̍lāā le̍ nya̍ yīyāa̍ wo̍. Lā sāālu̍ŋ wa̍nā wa̍ā le̍nde̍ pɛ̍, lā wa̍ ndu̍ o̍ bɛ̄ŋgu̍ cho̍o̍ ha̍a̍a̍ mbō lo̍ o̍ ko̍ŋ mī lā fāŋa̍ŋ o̍ chi̍e̍e̍ ko̍ŋ ni᷄ŋ.

¹²Chīɛ̄ī o̍ chīɛ̄ī nya̍ lūɛ̄ī pɛ̍, lā dīmi̍ nu̍a̍ā āā, ‘Dɛ̍nɛ̍ kɛ̍ndɛ̄ wa̍ chi̍ɛ̍ī ni̍ŋ na̍ŋnu᷄ŋ.’

¹³Tē wānāa̍ cho̍ chīɛ̄ī ni̍ŋ lo̍ŋ nda̍ ā chāa̍ nya̍ bīyɔ̄ɔ̄ pɛ̍, ā nɔ̄lā mā sɔ̄la̍ dɛ̍nɛ̍ kɛ̍ndɛ̄ nya̍ pīɛ̍i̍ Mɛ̍lɛ̄ka̍ le̍ ndu̍ wo̍. Kɛ̍ ndu̍yɛ̍, tē ā chīe̍e̍ nya̍ bīyɔ̄ɔ̄ le̍, dɛ̍nɛ̍ kɛ̍ndɛ̄ nya̍ pīɛ̍i̍ Mɛ̄lɛ̄ka̍ māā ā sɔ̄la̍ wo̍ ō mīīŋgu̍ŋ o̍ nya̍ pi̍la̍ lo̍.

¹⁴Tē wāŋnda̍ o̍ chīɛ̄ī o̍ chīɛ̄ī kɛ̄lɛ̄ŋgāā o̍ chi̍e̍e̍ o̍ chi̍e̍e̍ a̍ bi̍i̍ nya̍ bīyɔ̄ɔ̄ kɛ̄ndɛ̄ le̍, kɛ̄lɛ̄ŋgāā tē ā kɛ̄ɛ̍ le̍ nya̍ nīla̍ŋ yāŋɔ̄ɔ̍ pɛ̍, lā fāŋa̍ŋ ndo̍ŋ. Ndu̍yɛ̍, tē lā wa̍ fāŋa᷄ŋndo̍ pɛ̍, lā ko᷄ŋ chu̍ndo̍o̍ nya̍ o̍ ŋ̄pēlū le̍ nda̍ chɔ̄mndo̍ māā ā tōsa̍ su̍ɛ̍i̍ kɛ̍ndɛ̄ le̍.

¹⁵Mī di̍mu̍l nya̍, tē pāa̍le̍ Mɛ̄lɛ̄ka̍ kɔ̄ɔ̄sā ni̍ŋ a̍ wāŋnda̍ kpo̍u̍ le̍ŋ lē fūūlu̍u̍ pɛ̍, wāŋnda̍ o̍ chi̍e̍e̍ wa̍ā le̍ndo̍o̍ ni᷄ŋ, nda̍ hi̍a̍ū ni̍ŋ nyɛ᷅ pālāa̍ sɔ̄lā a̍ wāŋnda̍ So̍dɔ̄m chi̍e̍e̍ a̍ Kōmo̍o̍lūā chi̍e̍e̍.”

¹⁶Mi̍ Chi̍i̍sū hi̍a̍ū lāchī a̍ sūɛ̍i̍ āā, “Lā ya᷄ŋ ni᷅la̍ŋ. I̍ cho̍ māchūāā nya̍ vīōmɔ̄ɔ̍ māā lāsāā vīsīāā bīyāa̍ tɛ̄ɛ̄ŋ. Le̍la̍ŋ, lā wa̍ wa̍nāā mānda᷄ŋ o̍ nyɛ̄ o̍ nyɛ̄ nya̍ wa̍ to̍sāa̍ ni᷄ŋ. Ndu̍yɛ̍, lā wa̍ wa̍nāa̍ cha̍ā ŋ̍wa᷅ŋndā chīe̍e̍ bi̍yɔ̄ɔ̄.

¹⁷Lā mānda̍ŋ. Kāni̍ fo̍ndōle̍, wāŋnda̍ chō hūnɔ̄ɔ̄ mā kūɛ̄ a̍ nya̍ o̍ tōŋgōla̍ kɔ̍ɔ̍sāāla̍ŋ ni᷄ŋ, ndu̍yɛ̍, mā lɔ̄ɔ̄ nya̍ o̍ chīɛ̄īlā Chu̍ūwa̍ pīɛ̄ī Mɛ̍lɛ̄ka̍ la̍ŋ ni᷄ŋ.

¹⁸Ā kūā ni̍ŋ a̍ nya̍ o̍ wānāā bɛ̄ndūa̍a̍ lo̍ mā kɔ̄ɔ̄sa̍ a̍ nya̍ le̍ mɛ̄ɛ̍ nya̍ chō bu̍ɛ̍i̍yāā nīa̍a̍ yɛ̍. A̍ bōōndi̍i̍ ke̍ŋ nya̍ dīmūl nda̍ ni̍ŋ Yo̍o̍ŋgū Kɛ̄ndɛ̍ Mɛ̄lɛ̄ka̍a̍ ni̍, nda̍ ni̍ a̍ wānāa̍ cho̍ a̍ Chu̍ū le̍ wa̍.

¹⁹Ndu̍yɛ̍, tē ā wa̍ kɔ̍ɔ̍sɔ̍ɔ̍ a̍ nya̍ pɛ̍, lā bu̍u̍la᷄ŋ le̍ nyɛ̄ nya̍ dīmī wo̍ kɛ̄lɛ̄ŋgāā mɛ̄ɛ̍ nya̍ sūāā yɛ̍ le̍. Tē bōōndi̍i̍ ke̍ŋ ī fūūlu̍u̍ pɛ̍, lā chō nyɛ̄ nya̍ dīmī wo̍ sɔ̄lā.

²⁰Kāni̍ fo̍ndōle̍ dīōmndā nya̍ nɔ̄ le̍ dīmīo̍o̍ la̍ŋ lā ve᷅ ni̍ŋ di̍ōmndā nyāla̍ nya̍ pi̍la̍ le̍. Nyi̍na̍ Mɛ̄lɛ̄ka̍ Fi̍nyā nyā wo̍, ndu̍ cho̍ nya̍ dīōmndā nya̍ nɔ̄ le̍ dīmīo̍o̍ la̍ŋ dɔ̄wɔ̄ɔ̄ o̍ sōndō ni̍.

²¹“Wāŋnda̍ ā pūm ā māl ni̍ŋ pɔ̍mbūāā ndāa̍ kɛ̄lɛ̄ŋgāā bɛ̄ndāā ndāa̍ wāŋnda̍ o̍ bā le̍ mā kɔ̄ɔ̄sa̍ a̍ nda̍ mā dīī nda̍. Fi̍nyāa̍ ā pūm bɛ̍ɛ̍ ā tōsā ni̍ŋ le̍nde̍ a̍ chūāūwāā ndāa̍. Ndu̍yɛ̍, chūāūwa̍ ā pūm ā sīmūl ni̍ŋ wa̍nāa̍ ve̍lū nda̍ wa̍, ndu̍yɛ̍, mā tōsa̍ mī wānāa̍ ve̍lū nda̍ wa̍ ā sɔ̄la̍ pīɔ̍mndo̍.

²²Wāŋnda̍ kpo̍u̍ ā tūl nya̍ ni̍ŋ le̍yɛ̍ le̍ mɛ̄ɛ̍ nya̍ chō bu̍ɛ̍i̍yāā nīa̍a̍ yɛ̍. Kɛ̍ ndu̍yɛ̍, wānā o̍ wāna̍ hi̍o̍ū la̍chi̍ a̍ bīūwɔ᷄ŋndo̍ pɛ̍ ha̍a̍a̍ mbō lo̍ o̍ ko̍ŋ mbō fūūlu̍u̍ o̍ mɛ̄ɛ̄lu̍la̍ nyɛ̄ pālāā kōŋ pɛ̍, Mɛ̄lɛ̄ka̍ pīŋi̍ ndu̍.

²³Ndu̍yɛ̍, tē wāŋnda̍ tūsi̍ nya̍ nyɛ̄ pālāa̍ chōo̍ o̍ chi̍e̍e̍ o̍ chi̍e̍e̍ pɛ̍, lā kɔ̄ŋnu̍ŋ o̍ chi̍e̍e̍ che᷅le̍ŋ. Ndu̍yɛ̍, mī di̍mu̍l nya̍, lā cho̍ chi̍ī chi̍o̍o̍ŋ kpo̍u̍ o̍ lɛ̄ŋndē I̍sɔ̄lūɛ̄īle̍ŋ ni᷄ŋ bɔ̍ŋā a̍ wa̍llo̍ le̍ mbō lo̍ o̍ ko̍ŋ mī wāna̍ nda̍ vēēlū āā, Po̍ Wānā Pɔ̍nɔ̍ɔ̍ wo̍ ō hīŋ.”

²⁴Mi̍ Chi̍i̍sū hi̍a̍ū lāchī a̍ nda̍ pɛ̄ɛ̄kōo̍ āā, “Nūm wāna̍ nda̍ chō pɛ̄ɛ̄kōo̍ wo̍, a̍ cho̍ o̍ bɛ̍ndū mā hīōū wāna̍ cho̍ nu̍m pɛ̄ɛ̄kōo̍ wo̍ le̍. Ndu̍yɛ̍, chīɔ̍ɔ̍ cho̍ o̍ bɛ̍ndū mbō hīōū ma̍sānɔ̄ ndɔ̄ɔ̍ le̍.

²⁵Le̍la̍ŋ, tē wāna̍ nda̍ chō pɛ̄ɛ̄kōo̍ wo̍ ō sīmnu᷄ŋ mɛ̄ɛ̍ wāna̍ cho̍ ndu̍ pɛ̄ɛ̄kōo̍ wo̍ chō yɛ̍ pɛ̍, ō nɔ̄ mbō na᷄ŋ kɔ̄l. Ndu̍yɛ̍, tē chīɔ̍ɔ̍ ō sīmnu᷄ŋ mɛ̄ɛ̍ ma̍sānɔ̄ ndɔ̄ɔ̍ chō yɛ̍ pɛ̍, ō nɔ̄ mbō na᷄ŋ kɔ̄l. Le̍la̍ŋ, tē wāŋnda̍ ā nɔ̄la̍ pɛ̍, mā dīmu̍l wāna̍ cho̍ yu̍ŋgo̍o̍ bōlle̍ŋ ndo̍ māā māsa̍ nyi̍nāā wɔ̄ɔ̍ŋnda̍, Bɛ̄ɛ̍si̍bɔ̄ɔ̄, māā ndu̍ cho̍ ndu̍ kɔ̄ɔ̄lī ni̍, mɛ̄ɛ̍ ā nɔ̄lā mā dīmu̍l wānāa̍ cho̍ ndu̍ o̍ bā bɛ̄ŋgu̍ wa̍ dīōmndā wɔ̄ɔ̍ŋnda̍ŋ mbō hīōū bɛ̍ɛ̍ le̍nde̍.”

²⁶Mi̍ Chi̍i̍sū hi̍a̍ū lāchī a̍ sūɛ̍i̍ āā, “Le̍la̍ŋ, lā wo᷅ wāŋndā ha̍ā le̍. Kāni̍ fo̍ndōle̍, nyɛ̄ o̍ nyɛ̍ cho̍ ō kūmbāā ō pīlɛ̍ bɛ̍ɛ̍ cho̍ lo᷅ mbō kɛ̄ɛ̍ fūlā kpe̍nde̍ke̍le̍ le̍. Ndu̍yɛ̍, nyɛ̄ o̍ nyɛ̍ cho̍ ō vīāŋāā ō pīlɛ̍ bɛ̍ɛ̍ cho̍ lo᷅ mī wāŋnda̍ kɛ̄ɛ̍ sīnā a̍ ndu̍ o̍kɔ̄ɔ̄ le̍.

²⁷Le̍la̍ŋ, nyɛ̄ ya̍ cho̍ nya̍ dīmūllo̍ na̍a̍ nya̍ā kpe̍e̍le̍ wo̍, lā dīmi̍ ndu̍ wāŋnda̍ o̍ hɔ̄l kpe̍nde̍ke̍le̍. Ndu̍yɛ̍, nyɛ̄ o̍ nyɛ̄ nya̍ tūēī ma̍ dīmī ndu̍ tōōlō, lā hēēlu̍ ndu̍ chōo̍ cho̍o̍ o̍ lu᷅ŋ.

²⁸Lā wo᷅ wānāa̍ nɔ̍lā mā dīī nya̍ chi̍e̍ēŋ na̍ŋnu᷄ŋ, kɛ̍ ndu̍yɛ̍, ā nɔ̍lā nyɛ̍ yɔ̄ŋ a̍ nyi̍nāā nyāa̍ le̍ wa̍ le̍. Wāna̍ nya̍ wō wo̍, ndu̍ cho̍ Mɛ̄lɛ̄ka̍ ni̍. Ndu̍ ndu̍ nɔ̍lā tē ō dīī nu̍m pɛ̍ chi̍e̍ēŋ na̍ŋnu᷄ŋ, ō yɔ᷄ŋ vɛ̄lɛ̄ nyi̍nā nūmndo̍ o̍ fo̍ndāŋ nyɛ̄ pālāa̍ nāa̍ ndu̍ Mɛ̍lɛ̄ka̍ dūāū wa̍nāā yɔ̄ŋ wɔ̄ɔ̍ŋnda̍ wa̍.”

²⁹Mi̍ Chi̍i̍sū hi̍a̍ū lāchī a̍ sūɛ̍i̍ āā, “Ni᷄ŋnda̍ ā cho̍ yo̍u̍wāa̍ nɔ̍ ba̍ā bɔ̄ɔ̍ le̍. Ā ŋīɔ̍ɔ̍ŋ ka̍pā nda̍ pīsī nda̍ ni̍. Kɛ̍ ndu̍yɛ̍, mɛ̄ɛ̍ mī Mɛ̄lɛ̄ka̍ Fi̍nyā nyā chɛ̍l mālāŋ ō pīlɛ̍ bɛ̍ɛ̍ o̍ wu᷅,

³⁰kɛ̄lɛ̄ŋgāā ni᷅ŋ te̍ nya̍, yīīŋīī yi̍īŋnde̍ nya̍ o̍ lēbōl bɛ̍ɛ̍, Mɛ̄lɛ̄ka̍ sīnā mɛ̄ɛ̍ i̍ cho̍ bōllē pīlɛ̍ yɛ̍.

³¹Le̍la̍ŋ, lā yɔ᷅ŋ īsīōōŋ te̍. Kāni̍ fo̍ndōle̍, wāŋndo̍ ō pīlɛ̍ bɛ̍ɛ̍ nya̍ tɛ̄ɛ̄ŋ ō hīōū a̍ ni᷄ŋnda̍, mɛ̄ɛ̍ o̍ mɛ̄ɛ̍ nda̍ wa̍ fa̍ŋgā.”

³²Mi̍ Chi̍i̍sū di̍mī āā, “Wānā o̍ wāna̍ sɔ̍lɔ̍la̍ŋ pɛ̍ wa᷅ŋnda̍ o̍ hɔ̄l kpe̍nde̍ke̍le̍ māā le̍ ya̍ o̍ cho̍ ni̍, ya̍ bɛ̍ɛ̍ I̍ cho̍ hūnɔ̄ɔ̄ sɔ̄lɔ̄la᷄ŋ Mɛ̄lɛ̄ka̍ Fi̍nyā nūu̍ o̍ hɔ̄l o̍ cho̍ o̍ fo̍ndāŋ ndɔ̄ɔ̍ wo̍ māā le̍ ya̍ wānā ko̍ŋ chō ni̍.

³³Kɛ̍ ndu̍yɛ̍, wānā o̍ wāna̍ di̍mi̍ pɛ̍ wa᷅ŋnda̍ o̍ hɔ̄l kpe̍nde̍ke̍le̍ māā ō cho̍ wa᷅na̍ nī le̍, ya̍ bɛ̍ɛ̍ I̍ cho̍ hūnɔ̄ɔ̄ dīmī Mɛ̄lɛ̄ka̍ Fi̍nyā nūu̍ o̍ hɔ̄l o̍ cho̍ o̍ fo̍ndāŋ ndɔ̄ɔ̍ wo̍ māā wānā ko̍ŋ ō cho̍ wa᷅na̍ nī le̍.”

³⁴Mi̍ Chi̍i̍sū hi̍a̍ū lāchī a̍ sūɛ̍i̍ āā, “Lā yi̍ya᷄ŋ māā kɔ̄l nyūlū le̍ ya̍ hi᷅ŋ lūēī o̍ chi̍e̍ēŋndo̍ ni᷄ŋ te̍. Ō cho̍ kɔ᷅l nyūlū kpo̍so̍ŋ te̍ ya̍ hi᷅ŋ lūēī le̍. I̍ hi᷅ŋ māhūnāā le̍ tōsāa̍ mī pīɔ̄ūvi̍āŋndo̍ de᷄l wāŋnda̍ tɛ̄ɛ̄ŋ.

³⁵I̍ hi᷅ŋ le̍ mī to̍sa̍ mī pūa̍a̍ ā chīe̍i̍ fi̍nyāā ndāa̍, ndu̍yɛ̍, mī chūāūwāā lāāndūa̍a̍ ā chīe̍i̍ kālāa̍ ndāa̍ ndu̍yɛ̍, mī lāāndūa̍a̍ ā chīe̍i̍ kālā lɛ̍i̍ya̍a̍ ndāa̍.

³⁶Ndu̍yɛ̍, wāŋndo̍ o̍ ndu̍ pi̍la̍ lo̍ chi̍ɛ̍ī ni̍ŋ ya̍a̍mɔ̍ɔ̍wa̍a̍ ndūa̍a̍ ā chāŋ ni̍ŋ ni̍.

³⁷“Wāna̍ ka̍a̍la̍ fi̍nyā ndɔ̄ kɛ̄lɛ̄ŋgāā kāla̍ ndɔ̄ mbō hīōū mɛ̄ɛ̍ o̍ ka̍a̍la̍ ya̍ yɛ̍ pɛ̍, mɛ̄ɛ̍ ō bɛ̄nda̍ mbō wa̍ bu̍ɛ̍ī nī le̍. Ndu̍yɛ̍, wāna̍ ka̍a̍la̍ po̍ ndɔ̄ɔ̍ kɛ̄lɛ̄ŋgāā chūā ndɔ̄ɔ̍ mbō hīōū mɛ̄ɛ̍ o̍ ka̍a̍la̍ ya̍ yɛ̍ pɛ̍, mɛ̄ɛ̍ ō bɛ̄nda̍ mbō wa̍ bu̍ɛ̍ī nī le̍.

³⁸O̍ ko̍ŋ kɔ̍ɔ̍lī, wāna̍ ve̍ o̍ bɛ̍ɛ̍ndīa̍ŋ le̍ mā dīī ndu̍ o̍ yɔ̄m sīŋgāfīlāa̍ chōo̍ le̍ sa̍bū nūu̍, ndu̍yɛ̍, mbō tōl la̍ kɔ̄ɔ̄lī le̍, mɛ̄ɛ̍ wānā ko̍ŋ ō bɛ̄nda̍ mbō wa̍ bu̍ɛ̍ī nī le̍.

³⁹Wānā o̍ wāna̍ ki̍ndi̍ le̍ yōōmū ndɔ̄ɔ̍ chīīndīa̍a̍ pɛ̍, mɛ̄ɛ̍ ō chō yōōmū kpe̍e̍kpe̍i̍yo̍ fūlā. Kɛ̍ ndu̍yɛ̍, wānā o̍ wāna̍ yōōmū ndɔ̄ɔ̍ hɛ̍lu᷄ŋ ndu̍ le̍ ya̍ pɛ̍, mɛ̄ɛ̍ ō chō hūnɔ̄ɔ̄ yōōmū kpe̍e̍kpe̍i̍yo̍ sɔ̄lā.”

⁴⁰Mi̍ Chi̍i̍sū di̍mī āā, “Wāna̍ chɛ̍l nya̍ pɛ̍, mɛ̄ɛ̍ ya̍ o̍ chɛ̍l ko̍ŋ ni̍. Ndu̍yɛ̍, wāna̍ chɛ̍l la̍ pɛ̍, mɛ̄ɛ̍ wāna̍ ve᷅m ya̍ wo̍, ndu̍ o̍ chɛ̍l ko̍ŋ ni̍.

⁴¹Wāna̍ chɛ̍l wāna̍ su̍a̍ā le̍ Mɛ̄lɛ̄ka̍ wo̍ le̍ mɛ̄ɛ̍ o̍ cho̍ wāna̍ su̍a̍ā le̍ Mɛ̄lɛ̄ka̍ wo̍ yɛ̍ pɛ̍, wānā ko̍ŋ Mɛ̄lɛ̄ka̍ chō ndu̍ hūnɔ̄ɔ̄ nyɛ̄ kɛ̄ndɛ̄ kē mɛ̄ɛ̍ o̍ ke᷅ ni̍ŋ wa᷅na̍ su̍a̍ā le̍ Mɛ̄lɛ̄ka̍ wo̍ yɛ̍. Ndu̍yɛ̍, wāna̍ chɛ̍l wānā sa̍kpōo̍ le̍ mɛ̄ɛ̍ o̍ cho̍ sa̍kpō yɛ̍ pɛ̍, wānā ko̍ŋ Mɛ̄lɛ̄ka̍ chō ndu̍ hūnɔ̄ɔ̄ nyɛ̄ kɛ̄ndɛ̄ kē mɛ̄ɛ̍ o̍ ke᷅ ni̍ŋ wa̍nā sa̍kpōo̍ yɛ̍.

⁴²Mī di̍mu̍l nya̍, ā yɔ᷄ŋ bɛ̍ɛ̍ āā, mɛ̄ŋmā kōla᷄ŋ ni̍, wānā ke̍ bu̍ɛ̍ī nūu̍ le̍ mɛ̄ɛ̍ o̍ cho̍ bu̍ɛ̍ī nī yɛ̍ pɛ̍, ō wa̍ bɛ̍ɛ̍ bu̍ɛ̍ī pɔ̄mbu̍ɛ̍i̍na̍a̍ wo̍ ni̍, mɛ̄ɛ̍ mī Mɛ̄lɛ̄ka̍ hu᷄ŋ ke᷅ wānā ko̍ŋ nyɛ̄ kɛ̄ndɛ̄.”