Read Southern Kisi Māa̍ti̍u̍ 11 Bible Online

Māa̍ti̍u̍ 11 - Southern Kisi bible

Māa̍ti̍u̍ 11

¹Mɛ̄ɛ̍ Chi̍i̍sū chi̍i̍ bu̍ɛ̍i̍yāā ndūāā tɔ̍ a̍ ā ŋīɔ̍ɔ̍ŋnda̍ sīlāla̍ŋ nda᷅ŋ, mbo̍ fāŋa᷄ŋ o̍ fo̍ndāŋ kōŋ. Mbo̍ kūā o̍ chi̍o̍o̍ŋ o̍ būŋgɛ̄ī Kāli̍līve̍ ni᷄ŋ le̍ wāŋnda̍ pɛ̄ɛ̄kōo̍ a̍ nda̍ sūɛ̍i̍ Mɛ̄lɛ̄kɛ̍i̍ dīmūllo̍.

²Chɔ᷄ŋ Wānā Yi̍ŋāa̍ lo̍ o̍ chīɛ̄ī mānyūmndo̍ ni᷄ŋ mbo̍ tūɛ̄ī tɔ̍ɔ̍ a̍ wa̍lta̍ Ki̍li̍tī wa̍ tōsāa̍ la̍ŋ o̍kɔ̄ɔ̄. O̍ ko̍ŋ, mbo̍ vi̍ām bu̍ɛ̍i̍yāā ndūa̍a̍ ā pūm nāa̍ ndu̍ chu̍a̍.

³Ma̍ kɔ̍ nyu̍nā Chi̍i̍sū āā, “Chɔ᷄ŋ āā na̍a̍ ŋ̄ nyūna̍ nu̍m āā vɛ̄ɛ̄, ‘Nu᷄m cho̍ wāna̍ wāŋnda̍ chō lēhɔ̄l o̍ nɛ̄ī le̍ ndu̍ wo̍ ni̍?’ Āā, ‘Bāā ŋ̄ chu᷄m wa̍nā che᷅le̍ŋ?’ ”

⁴Mi̍ Chi̍i̍sū mu̍lūl nda̍ āā, “Lā kɔ̍ di̍mūl Chɔ᷄ŋ nyɛ̄ o̍ nyɛ̄ nya̍ chō tūēīyɔ̄ɔ̍, ndu̍yɛ̍, mi̍ lā wā chɔ̄ɔ̍.

⁵Wānāā sūmɛ̍i̍ya̍ chō ni᷅ŋ chɔ̄ɔ̍ mi̍ wānāā bɛ̄vɛ̍i̍ya̍ wā kɔ̄la̍ŋ. Wānāā nɔ̍ nāā wɔ̄ɔ̍ŋndo̍ lēkɔ̄ɔ̍ wa̍ ā sɔ̄la̍ sīōŋgɔ̄ɔ̍, mi̍ wānāā nīlā bāŋu̍lɛ̍i̍ya̍ wā ni᷅ŋ tūēīyɔ̄ɔ̍. Ndu̍yɛ̍, wānāā vīlɛ̍i̍ya̍ chō mīīŋgōo̍ yōōmū. O̍ ko̍ŋ kɔ̍ɔ̍lī, Yōōŋgū Kɛ̄ndɛ̍ Mɛ̄lɛ̄ka̍a̍ chō dīmi᷄ŋndo̍ nāa̍ wānāā tāmbɛ̍i̍ya̍ chūā.”

⁶Mi̍ Chi̍i̍sū hi̍a̍ū lāchī a̍ sūɛ̍i̍ āā, “Wānā o̍ wāna̍ vi̍ ŋ̍di̍a̍l o̍ la̍a̍la᷄ŋ o̍ nɔ̍ o̍ ya̍ ni̍ŋ ndo̍ le̍, mɛ̄ɛ̍ ō pɛ̄l tɔ̄nɔ̄ɔ̍.”

⁷Mɛ̄ɛ̍ bu̍ɛ̍i̍yāa̍ Chɔ᷄ŋ nda̍ ā wa̍ mīīŋgōo̍, mi̍ Chi̍i̍sū ka̍ndū sūɛ̍i̍ nāa̍ fāŋgāa̍ chūā a̍ Chɔ᷄ŋ o̍kɔ̄ɔ̄. Mbo̍ nyūnā nda̍ āā, “Kɔ̄lā nya̍ a̍a̍ ku̍ɛ̄ nāa̍ Chɔ᷄ŋ chu̍a̍ o̍ po̍llo̍ ni᷄ŋ nda̍ŋ, wāna̍ māā vɛ̄ɛ̄ nya̍ a̍a̍ nɔ̍ yɛ̄ o̍ kɔ̄l māā lā chō lākɔ̄ chɔ̄? Bāā wāna̍ cho̍ bɛ̍ɛ̍ŋ le̍ mūlīo̍o̍ wo̍, mɛ̄ɛ̍ hūēīye̍ ī mūūlūū sa̍ya̍a̍ nu̍a̍ā yɛ̍, ndu̍ nya̍ a̍a̍ nɔ̍ o̍ kɔ̄l māā lā chō lākɔ̄ chɔ̄ ni̍? Sāko̍.

⁸Wāna̍ māā vɛ̄ɛ̄ nya̍ a̍a̍ nɔ̍ yɛ̄ o̍ kɔ̄l māā lā chō lākɔ̄ chɔ̄? Bāā wāŋndo̍ ō dōvīa̍ŋ o̍ nyɛ̄lā kɛ̄ndɛ̄ kɛ̍ndɛ̄la̍ŋ ni᷄ŋ ni̍? Ō cho̍ wa̍nā wa̍ā le̍nde̍ le̍. O̍ chīɛ̄īlā māsāa̍ wānā sa̍a̍lūŋ wa̍nāa̍ do̍vīŋ do̍vi᷄ŋ wa̍ā le̍nde̍ wa̍ ni̍.

⁹Mɛ̄ɛ̍ wāna̍ māā vɛ̄ɛ̄ nya̍ a̍a̍ nɔ̍ yɛ̄ ni᷅ŋ o̍ kɔ̄l māā lā chō lākɔ̄ chɔ̄? Bāā wāna̍ su̍a̍ā le̍ Mɛ̄lɛ̄ka̍ wo̍ ō pu᷄m? Tōnya̍. Mī di̍mu̍l nya̍, ō hīōū bɛ̍ɛ̍ wa᷅na̍ su̍a̍ā le̍ Mɛ̄lɛ̄ka̍.

¹⁰A̍ Chɔ᷄ŋ o̍kɔ̄ɔ̄ nda̍ pōōnyi̍a̍a̍ dīōmnda̍ŋ nda᷅ŋ ni̍ āā, ‘Ya̍ Mɛ̍lɛ̄ka̍ I̍ cho̍ bu̍ɛ̍ī nūu̍ vīōmɔ̄ɔ̄ nu̍m lāchī mbō kɔ̍ to̍o̍sīāā pɔ̄ɔ̄ nɛ̄īyo̍ nu̍m lāchī.’ ”

¹¹Mi̍ Chi̍i̍sū hi̍a̍ū lāchī a̍ sūɛ̍i̍ āā, “Mī di̍mu̍l nya̍, wānā o̍ wāna̍ fu̍la̍ wānā la̍nɔ̍ɔ̍ o̍ īpūlu̍, Chɔ᷄ŋ hi̍o̍ū kpo̍u̍. Kɛ̍ ndu̍yɛ̍, wāna̍ cho̍ ō pɔ̄mbɔ̄ mbo̍ hīāū wāŋnda̍ kpo̍u̍ o̍ māsāle̍ Mɛ̄lɛ̄ka̍le̍ŋ ni᷄ŋ ndo̍ bɛ̍ɛ̍ ō hīōū Chɔ᷄ŋ.

¹²Kāndɔ᷄ŋndo̍ a̍ bōōndi̍i̍ Chɔ᷄ŋ wa̍ wāŋnda̍ sūɛ̍i̍ Mɛ̄lɛ̄kɛ̍i̍ dīmūllo̍ ve̍ mbo̍ fūūlūū a̍ pāa̍le̍ hāūle̍ŋ, wāŋnda̍ ā sīmu̍l māsāle̍ Mɛ̄lɛ̄ka̍le̍ŋ. Ndu̍yɛ̍, wānāā wɔ̄ɔ̍ŋnda̍ chō kīndīo̍o̍ le̍ le̍ŋ pūūwo̍.

¹³Wānāa̍ su̍a̍ā le̍ Mɛ̄lɛ̄ka̍ wa̍ kpo̍u̍ ma̍ dīmī a̍ hūnɔ̄ɔ̍ Chɔ᷄ŋ ndo̍ o̍kɔ̄ɔ̄. Yāu̍ lāsāwa̍ Mɛ̄lɛ̄ka̍a̍ bɛ̍ɛ̍, mbo̍ dīmī a̍ hūnɔ̄ɔ̄ ndɔ̄ɔ̍ o̍kɔ̄ɔ̄. O̍ ko̍ŋ kɔ̍ɔ̍lī, mbo̍ hūŋ.

¹⁴Ndu̍yɛ̍, tē lā chɛ᷄l le̍ mī lā sɔ̄la̍ dɔ̍ɔ̍ sīnā pɛ̄ŋgo̍o̍ a̍ nyɛ̄ nda̍ dīmi̍ wo̍ o̍kɔ̄ɔ̄ pɛ̍, mɛ̄ɛ̍ lā sīna̍ pɛ̍ŋgu̍ māā dīōm wāna̍ su̍a̍ā le̍ Mɛ̄lɛ̄ka̍ wo̍ dīmi̍ māā Īla̍a̍chā cho̍ vɛ̄lɛ̄ mīīŋgū wo̍, māā a̍ Chɔ᷄ŋ o̍kɔ̄ɔ̄ o̍ wa̍ dīmīo̍o̍ ni̍.

¹⁵Le̍la̍ŋ, wānā o̍ wāna̍ nɔ̍ nīlā tūɛ̄īyāā īsɔ̄ɔ̍ pɛ̍, lā ya᷄ŋ ni᷅la̍ŋ, mī lā tūēī, mī lā sīna̍ pɛ̄ŋgu̍.”

¹⁶Mi̍ Chi̍i̍sū hi̍a̍ū lāchī a̍ sūɛ̍i̍ āā, “I̍ chɔ᷅m ndɔ̍ nya̍ mɛ̄ɛ̍ wāŋndā chīe̍e̍ya̍ te̍le̍ŋndo̍ ho̍ō ā chō yɛ̍. Wāŋnda̍ te̍le̍ŋndo̍ ho̍ō ā chō māchūāā māā chūāāmbūa̍a̍ a̍ cha̍l pīsu̍lta̍ŋ o̍ lu᷅ŋ nda̍. Mɛ̄ɛ̍ nda̍ cha᷄l pīsu̍lta̍ŋ, mi̍ ku̍ndāa̍ ō pīlɔ̍ɔ̄ dīmūl ha̍ā āā,

¹⁷‘Ŋ̄ lōo̍ nya̍ nyɛ̄ chāā kɔ̄l kɛ̄ndɔ̄ɔ̍, kɛ̍, lā yi̍ le̍. Mi̍ ŋ̄ sōlī chōndu̍ŋ nda̍ sōlī wa̍nāā vīlɛ̍i̍ya̍ chōo̍ wo̍ŋ, kɛ̍, lā che᷄ŋ te̍.’

¹⁸Kāni̍ fo̍ndōle̍, hūnɔ̄ɔ̄ Chɔ᷄ŋ hi᷅ŋ ndo̍, ō wa̍ su᷅mndo̍ bīyɔ̄ɔ̍, ndu̍yɛ̍, ndu̍ o̍o̍ ko᷅l ma̍mu̍ɛ̍i̍ le̍. O̍ ko̍ŋ, mi̍ wāŋnda̍ dīmī āā, ‘Nyi̍nā wɔ̄ɔ̍ŋndo̍ cho̍ ndu̍ kɔ̄ɔ̄lī ni̍.’

¹⁹Kɛ̍, mɛ̄ɛ̍ wāna̍ nda̍ vēēlū āā, Po̍ Wānā Pɔ̍nɔ̍ɔ̍ wo̍ hīŋ, mbo̍ wā nyɛ̄ dīa̍a̍ dīo̍o̍, ndu̍yɛ̍, mbo̍ kōl. O̍ ko̍ŋ, mi̍ wāŋnda̍ dīmī āā, ‘Lāŋu̍nɔ̄ɔ̍ ho̍ō chō wāna̍ lēpūlu̍. Ō chō wānā ko̍lāā. Kɔ̍sɔ̄ŋnda̍ a̍ wānāā yɔ̄ŋ wɔ̄ɔ̍ŋnda̍ ndi̍a̍a̍mɔ̍ɔ̍ ndāa̍ o̍ cho̍ ni̍.’ ” Mi̍ Chi̍i̍sū hi̍a̍ū lāchī a̍ dīmīo̍o̍ āā, “Kɛ̍ ndu̍yɛ̍, wānāa̍ to᷅l kɔ̄l kālu̍ Mɛ̄lɛ̄ka̍a̍ kɔ̄ɔ̄lī wa̍ ka̍wa᷅ltā nda̍ tōsā la̍ŋ, la̍ŋ la̍ chɔ᷅m ni̍ māā ndu̍ cho̍ kɔ̄l kālu̍ kpe̍e̍kpe̍i̍yo̍ ni̍.”

²⁰Mi̍ wāŋnda̍ o̍ chi̍e̍e̍ŋ Chi̍i̍sū to̍sa̍ kɔ̄ndɔ̄fi̍ltā bɛ̄ndūla̍ŋ ndo̍ŋ ā kɛ̄ɛ̄ le̍ yɔ̄ŋndā ndāla̍ wɔ̍ɔ̍ŋnda̍ŋ mālɔ̄ɔ̍. Le̍ he̍ī mbo̍ pɛ̄ɛ̄sā nda̍.

²¹Mbo̍ dīmī āā, “Nyɛ̄ pālāa̍ chō le̍ nya̍ wāŋnda̍ Cho̍lu̍a̍sīŋ chi̍e̍e̍. Nyɛ̄ pālāa̍ chō le̍ nya̍ wāŋnda̍ Bɛ̄tīsa̍i̍dā chi̍e̍e̍. Kāni̍ fo̍ndōle̍, wa̍lta̍ ka̍a̍ma̍ālā ya̍ to̍sa̍ nya̍ tɛ̄ɛ̄ŋ nda̍ŋ, tē la̍ a̍a̍ to̍sa̍ŋ Ta̍a̍yā chi̍e̍e̍ a̍ Sa̍i̍dɔ̄ŋ chi̍e̍e̍ pɛ̍, ā wa̍ nyɛ̄lā lābɛ̍kīla̍ŋ wōūnɔ᷄ŋ mī nda̍ a̍a̍ dɔ̍ɔ̍ŋ pu᷅lta̍ŋ chōo̍ si̍ndɛ̄ pa̍ le̍ chɔ̄mndo̍ māā ā ma᷄l yɔ̄ŋndā ndāla̍ wɔ̍ɔ̍ŋnda̍ŋ.

²²Mī di̍mu̍l nya̍ tōnya̍a̍, tē pāa̍le̍ Mɛ̄lɛ̄ka̍ kɔ̄ɔ̄sā ni̍ŋ a̍ wāŋnda̍ le̍ŋ lē fūūlu̍u̍ pɛ̍, nya̍ hi̍a̍ū ni̍ŋ nyɛ̍ pālāa̍ sɔ̄lā a̍ wāŋnda̍ Ta̍a̍yā a̍ Sa̍i̍dɔ̄ŋ.

²³Nya̍ wāŋnda̍ Kēpa̍a̍nīɔ̄m yɛ̍, nya̍ a̍a̍ hɛ̍na̍ŋ ma̍hɛ̍na᷄ŋ le̍ wāa̍ ā bɛ̄ndū mī nya̍ a̍a̍ hi̍o̍ū nyɛ̄ o̍ nyɛ̄. Kɛ̍, Mɛ̄lɛ̄ka̍ chō nya̍ hūnɔ̄ɔ̄ tɛ̄ɛ̄mbūū kpo̍u̍. Kāni̍ fo̍ndōle̍, tē wa̍lta̍ kɔ̄ndɔ̄fi̍lta̍ to̍sa̍ŋ o̍ nya̍ lo̍ chi̍e̍e̍ la̍ŋ la̍ a̍a̍ to̍sa̍ŋ So̍dɔ̄m pɛ̍, māā chi̍e̍e̍ ko̍ŋ ndu̍ o̍o̍ cho̍ wɔ̄ pāa̍le̍ hāūle᷅ŋ.

²⁴Mī di̍mu̍l nya̍ tōnya̍a̍, tē pāa̍le̍ Mɛ̄lɛ̄ka̍ kɔ̄ɔ̄sā ni̍ŋ a̍ wāŋnda̍ kpo̍u̍ le̍ŋ lē fūūlu̍u̍ pɛ̍, nya̍ hi̍a̍ū ni̍ŋ nyɛ̍ pālāa̍ sɔ̄lā a̍ wāŋnda̍ So̍dɔ̄m.”

²⁵A̍ bōōndi̍i̍ ke̍ŋ mi̍ Chi̍i̍sū di̍mī āā, “Fi̍nyā nūu̍, nu᷄m cho̍ ho̍ō Māsānɔ̄ɔ̍ Mɛ̄lɛ̄ka̍ le̍ chōo̍ cho̍o̍ a̍ chi̍e̍ēŋndo̍ kpo̍u̍ wo̍, I̍ me̍l nu̍m ba̍li̍ka̍ le̍ mɛ̄ɛ̍ ŋ̄ vi᷄ŋ wānāā kɔ̄l kālu̍a̍a̍ a̍ wānāā sīnāā dɛ̍ni̍a̍a̍ sɔ̄ɔ̍ŋ mu᷅ŋ yɛ̍. Kɛ̍ o̍ ko̍ŋ kɔ̍ɔ̍lī, ma̍ chɔ̄m wānāa̍ si̍nā nyɛ̍ le̍ wa̍.

²⁶Kɛ̍ ndu̍yɛ̍, nyɛ̄ ŋ̄ hīni̍ kɔ̄l lo̍ ndu̍ to̍sa̍ŋ ho̍ō ni̍, Fi̍nyā nūu̍.”

²⁷Mi̍ Chi̍i̍sū di̍mī āā, “Fi̍nyā nūu̍ chu̍a̍ nyɔ̄ɔ̍ŋ kpo̍u̍ mbo̍ kē ya̍. Ndu̍yɛ̍, wānā o̍ wānā nɔ̍lā mbō sīna̍ wāna̍ Po̍ Mɛ̄lɛ̄ka̍a̍ ō chō wo̍ le̍, mɛ̄ɛ̍ Mɛ̄lɛ̄ka̍ Fi̍nyāa̍. Ndu̍yɛ̍ vɛ̍lɛ̄, wānā o̍ wānā nɔ̍lā mbō sīna̍ wāna̍ Mɛ̄lɛ̄ka̍ Fi̍nyāa̍ ō chō wo̍ le̍, mɛ̄ɛ̍ Po̍ Mɛ̄lɛ̄ka̍a̍ a̍ wānāā Po̍ Mɛ̄lɛ̄ka̍a̍ hɛ̄li̍ le̍ mbō chɔ᷄m nda̍ wāna̍ Mɛ̄lɛ̄ka̍ Fi̍nyāa̍ ō chō wo̍ wa̍.”

²⁸Mi̍ Chi̍i̍sū lo᷅ o̍ ko̍ŋ mbo̍ dīmī āā, “Wānā o̍ wāna̍ cho̍ ō yɔ̄kpāā a̍ nyɛ̄ pālāa̍, lā hu᷄ŋ nāa̍ ya̍ chu̍a̍. I̍ nɔ̍lā mī so̍li̍ nya̍ o̍ dɛ̍nɛ̍la̍ pa̍lāāla̍ŋ ni᷄ŋ.

²⁹Lā sīmnu̍ŋ bu̍ɛ̍i̍yāā nī, mī lā sɔ̄la̍ pɛ̄ɛ̄kōo̍ ya̍ o̍ bā bɛ̄ŋgu̍. Kāni̍ fo̍ndōle̍, I̍ cho̍ wāna̍ cha̍ā ŋ̍wa᷅ŋndā chīe̍e̍ bi̍yɔ̄ɔ̄. Ndu̍yɛ̍ wānā tu̍sīa̍ŋndo̍ ya̍ cho̍ ni̍. Ndu̍yɛ̍, lā nɔ̄lā mī lā sɔ̄la̍ pɛ̄ŋgīo̍o̍ o̍ kɔ̄ltā nyāla̍ŋ ni᷄ŋ.

³⁰Kāni̍ fo̍ndōle̍, pɛ̄ɛ̄kūlā nīla̍ŋ lā kīndu̍ chu̍ā le̍. Ndu̍yɛ̍, wa̍lta̍ ya̍ I̍ ke᷅ nya̍ la̍ŋ, lā pa̍lā to̍sā le̍.”