Read Southern Kisi Māa̍ti̍u̍ 15 Bible Online

Māa̍ti̍u̍ 15 - Southern Kisi bible

Māa̍ti̍u̍ 15

¹O̍ ko̍ŋ kɔ̍ɔ̍lī, mi̍ ku̍ndā Fālīsi̍īya̍ a̍ wānāa̍ pɛ̍ɛ̍kū wa᷅ŋnda̍ sāwāla̍ Mɛ̄lɛ̄ka̍la̍ŋ nda̍ ā cha᷄ŋ Chūlu̍sɛ̄lɛ̄m ma̍ hūŋ nāa̍ Chi̍i̍sū chu̍a̍.

²O̍ ko̍ŋ kɔ̍ɔ̍lī, ma̍ nyūnā ndu̍ āā, “Vɛ᷅ nūm nūm bu̍ɛ̍i̍yāā nūmnda̍ ā chu̍ē pɛ̍ɛ̍kū na̍a̍ ŋ̄ sɔ̄la̍ fi̍nyāā nāā ma̍māa̍ o̍ bā wo̍ le̍? Vɛ᷅ ā pu̍lū fɛ̍ɛ̍ŋ ba᷅la̍ŋ mɛ̄ɛ̍ fi̍nyāā nāā ma̍māa̍ ā pɛ̄ɛ̄ku̍ na̍a̍ yɛ̍ mālāŋ nda̍ dīā nyɛ̍ dīa̍a̍ le̍?”

³O̍ ko̍ŋ kɔ̍ɔ̍lī, mi̍ Chi̍i̍sū lo᷅ lo̍ŋ mbo̍ nyūnā nda̍ āā, “Vɛ᷅ mī lā kɛ̄ɛ̍ le̍ nyɛ̄ Mɛ̄lɛ̄ka̍ dīmī wo̍ tōsāa̍ le̍ pɛ̄ɛ̄kū nya̍ nya̍ pi̍la̍a̍ chūa̍a̍?”

⁴Mbo̍ dīmūl nda̍ āā, “Kāni̍ fu̍u̍le̍, Mɛ̄lɛ̄ka̍ dīmi̍ māā, ke̍ fi̍nyā nu̍m bɛ̄ɛ̄le̍ŋ a̍ kālā nu̍m. Mbo̍ dīmī vɛ̄lɛ̄ māā, wānā o̍ wāna̍ ye̍i̍ fi̍nyā ndɔ̍ kɛ̄lɛ̄ŋgāā kāla̍ ndɔ̍ pɛ̍, wānā ko̍ŋ ā dīi̍ ndu̍.

⁵Kɛ̍ ndu̍yɛ̍, nya̍ nya̍ dīmi̍ māā ā yɔ᷄ŋ bɛ̍ɛ̍ mī wāŋndo̍ nɔ̄ nyɔ̄ɔ̍ ō ndu̍ o̍o̍ ke᷅ ni̍ŋ fi̍nyā ndɔ̄ kɛ̄lɛ̄ŋgāā kāla̍ ndɔ̍ le̍ nda̍ mālāa̍ wo̍, kɛ̍, tē ō dīmi̍ ni᷅ŋ pɛ̍ māā ō chu̍a̍ ni᷅ŋ bu̍ŋgɛ̄i̍ le̍ mbō ke̍ Mɛ̄lɛ̄ka̍ ndu̍, māā mbō ke̍ lɛ̍ bɛ̍ɛ̍ nda̍ nyɛ̄ kōŋ te̍, māā ō nɔ̄ di̍.

⁶Nyɛ̄ nya̍ dīmi̍ ko̍ŋ ndo̍ ndu̍ chɔ̍m ni̍ māā lā dīmi̍ mādīmīāā māā mī wāŋndo̍ ō ke̍ bɛ̍ɛ̍ fi̍nyā ndɔ̍ lēbɛ̄ɛ̄ le̍, ō cho̍ i̍sɔ̍ɔ̍ le̍. He̍ī chɔ̍m ni̍ māā lā būūla̍ŋ a̍ dīōm Mɛ̄lɛ̄ka̍ dīmi̍ wo̍ le̍, hāli̍ kpe̍ŋ lā mānda̍ ka̍ālā nyāla̍ŋ.

⁷Lā chō fāŋgā wānāā sōndō yēēlɛ̍i̍. Dīōmndā wāna̍ su̍a̍ā le̍ Mɛ̄lɛ̄ka̍ wo̍ Āīsa̍yā so̍ō a̍ nya̍ o̍kɔ̄ɔ̄ la̍ŋ, tōnya̍ kpe̍e̍kpe̍i̍ la̍ cho̍ ni̍.” Mi̍ Āīsa̍yā di̍mī āā,

⁸“Mɛ̄lɛ̄ka̍ dīmi̍ āā, Wāŋnda̍ ha̍ā dīmi̍ a̍ sōndō māā ā ke̍ ya̍ bɛ̄ɛ̄le̍ŋ. Kɛ̍ ndu̍yɛ̍, ā hɛ̄na̍ŋ mā tōsa̍ nyɛ̄ ya̍ di̍mūl nda̍ le̍ tōsāa̍ wo̍ le̍.

⁹Ō bɛ̄nda̍ bɛ̍ɛ̍ mā pɛ̄ŋgi̍ a̍ ya̍ pīɛ̄īyo̍. Kāni̍ fu̍u̍le̍, sāwāla̍ nda̍ pi̍la̍ tōōsi̍a̍a̍ la̍ŋ, la̍ŋ nda̍ pɛ̄ɛ̄kū wa᷅ŋnda̍ ni̍, mā dīmī māā sāwāla̍ nīla̍ŋ ni̍.”

¹⁰O̍ ko̍ŋ kɔ̍ɔ̍lī, mi̍ Chi̍i̍sū ve̍e̍lū wāŋnda̍ ma̍ hūŋ nāa̍ ndu̍ chu̍a̍. Mbo̍ dīmūl nda̍ āā, “Lā ya᷄ŋ ni᷅la̍ŋ o̍ nyɛ̄ ya̍ cho̍ nya̍ dīmūl lo̍ le̍ mī lā sɔ̄la̍ sīnā pɛ̄ŋgo̍o̍.

¹¹Ō cho̍ nyɛ̄ dīāā wāŋndo̍ dīā wo̍ le̍ to̍sā mbō wā ō nɔ̄ɔ̄lɛ̍i̍ Mɛ̍lɛ̄ka̍ o̍ hɔ̄l te̍. Dīōmndā wɔ̄ɔ̍ŋnda̍ fu̍lā wa᷅ŋndo̍ o̍ sōndō la̍ŋ, la̍ŋ la̍ to̍sā ni̍ mbō wa̍ o̍ nɔ̄ɔ̄lɛ̍i̍ Mɛ̍lɛ̄ka̍ o̍ hɔ̄l.”

¹²O̍ ko̍ŋ kɔ̍ɔ̍lī, mi̍ bu̍ɛ̍i̍yāā ndūa̍a̍ hūŋ nāa̍ ndu̍ chu̍a̍. Ma̍ hu᷄ŋ di̍mūl ndu̍ āā, “Ku̍ndā Fālīsi̍īya̍ tāmbu̍ kɔ̄l a̍ nūm māā dīōmndā ŋ̄ wa̍ la̍ŋ di̍mīo̍o̍ la̍ŋ māā yīēīyo̍ ŋ̄ yīe̍i̍ nda̍ ko̍ŋ ni̍.”

¹³Mi̍ Chi̍i̍sū mu̍lī āā, “Fi̍nyā nūu̍ o̍ cho̍ o̍ fo̍ndāŋ ndɔ̄ɔ̍ wo̍, tɔ̄lɔ̄ɔ̄ o̍ tɔ̄lɔ̄ɔ̍ cho̍ tɔ̍lɔ̄ɔ̄ o̍ tɔ᷅l te̍, ō chō hūnɔ̄ɔ̄ ndu̍ sūŋgɔ̄ɔ̄.

¹⁴Le̍la̍ŋ, lā sa̍a̍la᷄ŋ nda̍ le̍. Kāni̍, nda̍ chō māchūāā wānāā sūmɛ̍i̍ya̍ a̍ ki̍ndī le̍ chāāŋāā ndāā wa̍nāā sūmɛ̍i̍ya̍ tīnda̍a̍ sēēlāl lo̍ wa̍.”

¹⁵Mi̍ Pītɛ̍ lo᷅ lo̍ŋ mbo̍ dīmūl Chi̍i̍sū āā, “Tɛ̍ɛ̍si̍a̍l na̍a̍ tālo̍o̍ ho̍ō, Māsānɔ̄ɔ̍.”

¹⁶Mi̍ Chi̍i̍sū nyu̍nā bu̍ɛ̍i̍yāā ndūa̍a̍ āā, “Bāā nya̍ bɛ̍ɛ̍ lā sīna̍ wɔ̍ ndi̍ pɛ̄ŋgu̍ le̍?

¹⁷Bāā lā si̍nā i̍sɔ̍ɔ̍ pɛ̍ŋgu̍ le̍? Nyɛ̄ o̍ nyɛ̄ wāŋndo̍ chō di̍o̍, ndu̍ o̍ dēmbē o̍ ku̍ā ni̍. Ō chɛ᷄ŋ ndu̍ o̍ dēmbē pɛ̍, ō kūɛ̄ ō kɔ̍ sɔ̍nda᷄ŋ ndu̍.

¹⁸Kɛ̍, nyɛ̄ o̍ nyɛ̄ wāŋndo̍ chō sōli᷄ŋ o̍ sōndō, ndu̍ o̍ kɔ̄l di̍ o̍ ka̍ndūŋ ni̍. Ndu̍yɛ̍, sɔ̄ɔ̍ŋ wɔ̍ɔ̍ŋ mu᷅ŋ, mu̍ŋ to̍sā ni̍ wāŋndo̍ ve᷅ o̍ bɛ̍ndāā le̍ Mɛ̄lɛ̄ka̍ pīɛ̄īyo̍ le̍.

¹⁹Kāni̍ fu̍u̍le̍, yīya᷄ŋnda̍ to̍sāā sɔ̄ɔ̍ŋ wɔ̍ɔ̍ŋnda̍ŋ kpo̍u̍ wāŋndo̍ o̍ kɔ̄llo̍ ni᷄ŋ ko̍ni̍ la̍ cha᷅ŋ ni̍. Kɔ̍ bi̍ī a̍ yīya᷄ŋ di̍yāā wāna̍ chi̍o̍o̍, a̍ sūūndāa̍ a̍ la̍nɔ̍ pi̍la̍a̍ kɛ̄lɛ̄ŋgāā pɔ̍nɔ̍ pi̍la̍a̍, a̍ sūūndāa̍ a̍ wāna̍ nya̍ cho̍ o̍ nɔ̄ ni̍ŋ nya̍ ndu̍ le̍ wo̍, a̍ vīīle̍ŋ, a̍ chōōla̍ŋ, a̍ dīōmndā wɔ̄ɔ̍ŋnda̍ŋ dīmīo̍o̍ a̍ chāāŋnda̍ o̍kɔ̄ɔ̄. Mu̍ŋ kpo̍u̍ o̍ kɔ̄llo̍ ni᷄ŋ ŋ̍ cha᷅ŋ ni̍.

²⁰Nyɛ᷄m to̍sā wāŋndo̍ ve᷅ o̍ bɛ̍ndāā le̍ Mɛ̄lɛ̄ka̍ pīɛ̄īyo̍ le̍ wo̍ŋ, mu̍ŋ cho̍ mu̍ŋ ni̍. Mī wāŋndo̍ ō pūlu̍ bɛ̍ɛ̍ fɛ̍ɛ̍ŋ ba᷅la̍ŋ mɛ̄ɛ̍ ku̍ndā Fālīsi̍īya̍ ā dīmi̍ yɛ̍ mālāŋ o̍ di̍ā nyɛ̍ dīa̍a̍ le̍, ko̍ŋ ku̍u̍nā ndu̍ wāa̍ ō bɛ̄ndāā le̍ Mɛ̄lɛ̄ka̍ pīɛ̄īyo̍ le̍.”

²¹Mi̍ Chi̍i̍sū fa̍ŋa᷄ŋ o̍ fo̍ndāŋ kōŋ. Mbo̍ kūā o̍ būŋgɛ̄ī chi̍o̍o̍ŋ Ta̍a̍yā a̍ Sa̍i̍dɔ̄ŋ cho̍ ni᷄ŋ nde̍.

²²Chūā wāā lɛ̄ŋndē Ke̍nāŋnde̍ŋ ō wa̍ lo̍ŋ. Mbo̍ hūŋ nāa̍ ndu̍ chu̍a̍. Mbo̍ hu᷄ŋ di̍mūl Chi̍i̍sū āā, “Nūm Po̍ Dēēvi̍o̍o̍, yāndi̍i̍, tūīīnu̍ŋ ya̍ īnyīɛ̍ɛ̍ fɔ̍. Nyi̍nā wɔ̄ɔ̍ŋndo̍ chō chūā nūu̍ kɔ̄ɔ̄lī. O̍ fo̍ndāŋ bɛ̍ɛ̍ ō cho̍ le̍.”

²³Kɛ̍, Chi̍i̍sū mu̍lu̍l ndu̍ nyɛ̍ o̍ nyɛ̍ le̍. O̍ ko̍ŋ kɔ̍ɔ̍lī, mi̍ Chi̍i̍sū bu̍ɛ̍i̍yāā ndūa̍a̍ hu᷄ŋ di̍mūl ndu̍ āā, “Māsānɔ̄ɔ̍, chūa̍a̍ ho̍ō chō wɔ̄ na̍a̍ kɔ̄ɔ̄lī kɛ᷅. Ō chō na̍a̍ dēŋīo̍o̍ kɔ̄ɔ̄lī kpe̍e̍kpe̍i̍. Fa̍ŋa̍ ndu̍ na̍a̍ kɔ̄ɔ̄lī mbɔ̄.”

²⁴Mi̍ Chi̍i̍sū mu̍lī āā, “Nāa̍ wāŋnda̍ I̍sɔ̄lūɛ̄ī chu̍a̍ ko̍ni̍ Mɛ̄lɛ̄ka̍ vēm ya̍ ni̍, a̍ cho̍ ha̍ā māā sāā la̍a̍sīa̍ŋ nda̍.”

²⁵Mɛ̄ɛ̍ Chi̍i̍sū di̍mi̍ dīōmndo̍ ho̍ō, mi̍ chūa̍a̍ hu᷄ŋ tu̍ndu᷄ŋ ndu̍ o̍ lābɛ̄ŋgu̍ ni̍ŋ. Mbo̍ dīmūl ndu̍ āā, “Yāndi̍i̍ fāllo̍, ma̍la̍ ya̍ fɔ̍.”

²⁶Mi̍ Chi̍i̍sū di̍mūl ndu̍ āā, “Ō bɛ̍ndā mī wānā chu̍a̍ nyɛ̄ dīa̍a̍ cho̍ le̍ chūāāmbūa̍a̍ wo̍ mā do̍u̍ tūŋnda̍ le̍.”

²⁷Mi̍ chūa̍a̍ lō lo̍ŋ mbo̍ dīmī āā, “Tōnya̍ i̍ cho̍ ni̍, fāllo̍, kɛ̍ ndu̍yɛ̍, tūŋnda̍ bɛ̍ɛ̍ tē wāna̍ nɔ̍ nda̍ wo̍ ō wa̍ nyɛ̄ dīa̍a̍ dīo̍o̍ pɛ̍, kūwu̍ŋ de̍lī lɛ᷅ŋ ndo̍ŋ, mu̍ŋ nda̍ bɛ̍ɛ̍ nda̍ dīā ni̍.”

²⁸Mɛ̄ɛ̍ chūa̍a̍ sōō le̍nde̍, mi̍ Chi̍i̍sū lo᷅ o̍ ko̍ŋ mbo̍ dīmūl ndu̍ āā, “Nūm ā chō wānā la̍a̍la᷄ŋ bɛ̍ndū. Nyɛ̄ ŋ̄ yēēma̍ wo̍ chō yɔ̄nɔ᷄ŋ.” A̍ bōōndi̍i̍ ke̍ŋ kpe̍e̍kpe̍i̍, mi̍ chūā ndɔ̄ɔ̍ sīāŋgū.

²⁹Mi̍ Chi̍i̍sū ma᷅l lo̍ŋ. Mbo̍ kūā a̍ kɔ̄ŋgɔ̍ Mɛ̄ŋmā Ībūŋga᷄ŋ Kāli̍lī dēmūllo̍. Mbo̍ kɔ̍ he᷅l o̍ pēmbēi̍ chōo̍ mbo̍ chāl.

³⁰O̍ ko̍ŋ kɔ̍ɔ̍lī, mi̍ wāŋnda̍ hūŋ nāa̍ ndu̍ chu̍a̍ fāŋgā bɛ̍ndōo̍. Ma̍ hūŋ a̍ wānāā bɛ̄vɛ̍i̍ya̍, a̍ wānāā sūmɛ̍i̍ya̍, a̍ wānāā yōmi̍ɛ̍i̍ya̍, a̍ bo̍bu̍a̍a̍, a̍ wānāa̍ nɔ̍ nāālā chēle̍ŋ nda̍ŋ nda̍ nāa̍ ndu̍ chu̍a̍. Mi̍ Chi̍i̍sū si̍ŋgī nda̍.

³¹Mɛ̄ɛ̍ wāŋnda̍ chē mi̍ bo̍bu̍a̍a̍ wā sūɛ̍i̍, mi̍ wānāā yōmi̍ɛ̍i̍ya̍ wā sīōŋgɔ̄ɔ̍, mi̍ ā bɛ̄vɛ̍i̍ya̍ wā kɔ̄la̍ŋ, ndu̍yɛ̍, mi̍ wānāā sūmɛ̍i̍ya̍ wā chɔ̄ɔ̍, mi̍ kɔ̄ndɔ̄fi̍llo̍ bīī nda̍. Ndu̍yɛ̍, ma̍ sāŋgālā Mɛ̄lɛ̄ka̍ wāŋnda̍ I̍sɔ̄lūɛ̄ī a̍ pi̍ɛ̍ī yo̍.

³²Mi̍ Chi̍i̍sū ve̍e̍lū bu̍ɛ̍i̍yāā ndūa̍a̍, mbo̍ dīmūl nda̍ āā, “Nyīɛ̍ɛ̍ye̍ chō ya̍ le̍ fāŋgāa̍ ho̍ō. Pālɛ̍i̍ ī yāa̍ ni᷅ŋ kpu̍lu̍ku̍u̍ ā chō ya̍ kɔ̄ɔ̄lī. Ndu̍yɛ̍, nyɛ̄ dīāā bɛ̍ɛ̍ ā nɔ̍ lɛ̍ le̍. I̍ hɛ̍na̍ŋ mī ma̍l nda̍ mā kūɛ̄ o̍ lā nda̍ lo̍ a̍ yīa̍a̍ŋ te̍, yɔ̄ŋi̍ nda̍ kēi̍ wo̍ū o̍ nɛ̄ī tɛ̍ɛ̄ŋ.”

³³Mi̍ bu̍ɛ̍i̍yāā ndūa̍a̍ nyūnā ndu̍ āā, “Kɛ̍, mī kūɛ̍ɛ̍nɛ̍ na̍a̍ ŋ̄ sɔ̄la̍ yɛ̄ nyɛ̄ dīa̍a̍ o̍ po̍llo̍ ho̍ō ni᷄ŋ le̍ fāŋgā ka̍āku̍u̍ wo̍ ho̍ō?”

³⁴Mi̍ Chi̍i̍sū nyu̍nā nda̍ āā, “Vɛ̄ɛ̍nɛ̍ nya̍ nɔ̄ yɛ̄ bēe̍dīi̍yo̍ kpūŋgba᷄ŋ?” Ma̍ dīmī āā, “Ō chō kpūŋgba᷄ŋ ŋ̄ ŋɔ᷄mmɛ̍ū a̍ sūūwa̍ nyɛ̄ pɔ̄mbɔ̄.”

³⁵Mi̍ Chi̍i̍sū di̍mūl wāŋnda̍ ma̍ chāl.

³⁶Mbo̍ chūā bēe̍dīi̍ kpūŋgbāŋ ŋɔ᷄mmɛ̍ū kōŋ a̍ sūūwāā kāŋ. Mbo̍ mēl Mɛ̄lɛ̄ka̍ ba̍li̍ka̍. Mbo̍ yīmī yīmī mbo̍ kē bu̍ɛ̍i̍yāā ndūa̍a̍. Mi̍ bu̍ɛ̍i̍yāā ndūa̍a̍ pīɔ̄ū wāŋnda̍.

³⁷Wāŋnda̍ kpo̍u̍ ma̍ dīā ma̍ pūm. Mi̍ bu̍ɛ̍i̍yāā ndūa̍a̍ chɔ̄ɔ̄vīāā ō nda̍ dēma̍ wo̍ ma̍ dūāū o̍ kāmbɛ̍i̍la̍ŋ ni᷄ŋ. Mbo̍ pīā kāmbɛ̍i̍la̍ŋ lā ŋɔ᷄mmɛ̍ū.

³⁸Wāŋ lāāndūa̍a̍ a̍ chūāāmbūa̍a̍ ā cho̍ le̍cho̍o̍ le̍. Kɛ̍, pūa̍a̍ su̍e̍e̍ a̍ de᷅ nyɛ̄ dīa̍a̍ ho̍ō wa̍, ā wa̍ wāa̍la̍ŋ lā hīɔ̍ɔ̍lu̍.

³⁹O̍ ko̍ŋ kɔ̍ɔ̍lī, mi̍ Chi̍i̍sū to̍sā ma̍ mīīŋgū o̍ lā nda̍ lo̍. Mbo̍ lūɛ̄ī o̍ dɛ̄ndɔ̄ɔ̍ ni᷄ŋ mbo̍ kūā o̍ lɛ̄ŋndē Ma̍ka̍dāŋnde̍ŋ ni᷄ŋ.