Read Southern Kisi Māa̍ti̍u̍ 16 Bible Online

Māa̍ti̍u̍ 16 - Southern Kisi bible

Māa̍ti̍u̍ 16

¹Mi̍ ku̍ndā Fālīsi̍īya̍ a̍ ku̍ndā Sādūsi̍īya̍ kūā nāa̍ Chi̍i̍sū chu̍a̍ le̍ ndu̍ tɔ̄ɔ̄nda᷄ŋndo̍. Ma̍ nyūnā ndu̍ le̍ mī ndu̍ o̍o̍ to̍sa̍ ka̍a̍ma̍a̍ le̍ nda̍ chɔ̄mndo̍ māā kpāāya̍ Mɛ̄lɛ̄ka̍a̍ kpe̍e̍kpe̍i̍ o̍ nɔ̍ ni̍.

²Kɛ̍, mi̍ Chi̍i̍sū mu̍lūl nda̍ āā, “Tē lā chē pɛ̍ mī ha̍la̍a̍ ō yɔ̄nu̍ŋ o̍ si̍a̍ŋā a̍ pāa̍le̍ de̍lāāle̍ŋ do̍ŋ, lā dīmi̍ āā, ‘Wālōo̍ ō nāŋ ni̍ŋ bɔ̍ɔ̍ si̍ɔ̍dīi̍.’

³Ndu̍yɛ̍, tē lā chē pɛ̍ mī ha̍la̍a̍ yɔ̄nu̍ŋ o̍ si̍a̍ŋā īdīi̍ pu̍u̍ŋ, mī chōo̍ wa̍ yi̍sīmāā, lā dīmi̍ āā, ‘Pīɔ̍ɔ̍ chō hāū si̍ā.’ ” Mbo̍ dīmūl nda̍ āā, “Lā nɔ̄lā mī lā tōfa̍ o̍ ha̍la̍, ndu̍yɛ̍, mī lā chɔ᷄m tē pīɔ̍ɔ̍ si̍ā ni̍ŋ ni̍ ɔ̄ɔ̄, tē wālōo̍ wa᷅ ni̍ŋ ni̍. Kɛ̍ ndu̍yɛ̍, lā nɔ̍lā mī lā sīna̍ sɔ̄ɔ̍ŋ cho̍ yɔ̄nɔ᷄ŋndo̍ te̍le̍ŋndo̍ ho̍ō wo̍ŋ pɛ̄ŋgu̍ le̍.

⁴Wāŋnda̍ te̍le̍ŋndo̍ ho̍ō ā chō wānāā wɔ̄ɔ̍ŋāā bɛ̄ndū. Ā tu̍i̍ī Mɛ̍lɛ̄ka̍ dīōm te̍. Lā nyūna̍ ya̍ le̍ ka̍a̍ma̍a̍ tōsāa̍ le̍ wāa̍ māā tāāmāsi̍. Kɛ̍, ka̍a̍ma̍ā chēle̍ŋ bɛ̍ɛ̍ cho̍ to̍sa᷄ŋ le̍ nya̍ le̍, mɛ̄ɛ̍ ka̍a̍ma̍a̍ yɔ̍nu̍ŋ a̍ Cho̍nā wo̍.” O̍ ko̍ŋ, mi̍ Chi̍i̍sū fa̍ŋa᷄ŋ o̍ fo̍ndāŋ kōŋ.

⁵Mi̍ Chi̍i̍sū nda̍ bu̍ɛ̍i̍yāā ndūa̍a̍ ā tāŋ o̍ mɛ̄ŋmā ībūŋga᷄ŋ kɔ̄ŋgɔ̍ɔ̍ ō pīlɔ̍ɔ̄. Kɛ̍ ndu̍yɛ̍, mi̍ bu̍ɛ̍i̍yāā ndūa̍a̍ pūɛ̄ɛ̄nu᷄ŋ le̍ kɔ̄la̍ŋ a̍ bēe̍dīi̍yo̍ o̍ bā.

⁶Mi̍ Chi̍i̍sū di̍mu̍l nda̍ āā, “Lā mānda̍ŋ a̍ yi̍i̍sīi̍ ku̍ndā Fālīsi̍īya̍ a̍ ku̍ndā Sādūsi̍īya̍.”

⁷Mi̍ bu̍ɛ̍īya̍ kāndū sūūki̍āŋndo̍ nda̍ pi̍la̍ tɛ̄ɛ̄ŋ āā, “Le̍ mɛ̄ɛ̍ na̍a̍ ŋ̄ hi᷄ŋ a̍ bēe̍dīi̍ le̍ yɛ̍ o̍ di̍mi̍ dīōmnda̍ŋ nda᷅ŋ ni̍.”

⁸Chi̍i̍sū ndu̍ o̍o̍ si̍nā nyɛ᷅ nda̍ wa̍ dīmīo̍o̍ wo̍. Le̍ he̍ī, mbo̍ nyūnā nda̍ āā, “Le̍ yɛ̄ɛ̍nɛ̍ nya̍ chō yɛ̄ dīmu̍la᷅ŋndo̍ āā, ‘Ŋ̄ hi᷄ŋ a̍ bēe̍dīi̍ le̍ nɛ̍?’ Lā nɔ̍ la̍a̍la᷄ŋ bɔ̍ɔ̍ le̍ ma᷅.

⁹Pɛ̄ŋgo̍o̍ ho̍ō bɛ̍ɛ̍ lā sīna̍ wɔ̍ ndi̍ pɛ̄ŋgu̍ le̍? Lā pūɛ̄ɛ̄nu̍ŋ ni᷅ŋ bɛ̍ɛ̍ a̍ mɛ̄ɛ̍ ya̍ I̍ to̍sa̍ mi̍ wānāā wāa̍la̍ ŋu̍ɛ̍ɛ̍nu̍a̍a̍ dīā bēe̍dīi̍ kpūŋgbāŋ ŋūɛ̍ɛ̍no̍o̍ ma̍ pūm yɛ̍? Ō nda̍ dēma̍ wo̍, vɛ̄ɛ̍nɛ̍ o̍ pɛ᷅ yɛ̄ kāmbɛ̍i̍la̍ŋ?

¹⁰Lā pūɛ̄ɛ̄nu̍ŋ bɛ̍ɛ̍ vɛ̍lɛ̄ a̍ mɛ̄ɛ̍ ya̍ I̍ to̍sa̍ mi̍ wānāā wāa̍la̍ hi̍ɔ̍ɔ̍lu̍a̍a̍ dīā bēe̍dīi̍ kpūŋgbāŋ ŋɔ᷄mmɛ̍ūwo̍ŋ ma̍ pūm yɛ̍? Ō nda̍ dēma̍ wo̍, vɛ̄ɛ̍nɛ̍ o̍ pɛ᷅ yɛ̄ kāmbɛ̍i̍la̍ŋ?

¹¹Dīmūl ya̍ di̍mu̍l nya̍ māā lā mānda̍ŋ a̍ yi̍i̍sīi̍ ku̍ndā Fālīsi̍īya̍ a̍ Sādūsi̍īya̍ wo̍, ō cho̍ a̍ bēe̍dīi̍ o̍kɔ̄ɔ̄ le̍ ya̍ wa̍ īsɔ̄ɔ̍ le̍.” Mbo̍ nyūnā nda̍ āā, “Vɛ᷅ mi̍ lā būmbā he̍ī pɛ̄ŋgu̍ si̍nā?”

¹²O̍ ko̍ŋ, mi̍ bu̍ɛ̍īya̍ sīnā pɛ̄ŋgu̍ māā ō cho̍ a̍ yi̍i̍sīi̍ o̍kɔ̄ɔ̄ kpe̍e̍kpe̍i̍ le̍ o̍ wa̍ nda̍ sīlāa̍ māā ā mānda̍ŋ te̍. Nyɛ̄ ku̍ndā Fālīsi̍īya̍ a̍ Sādūsi̍īya̍ ā pɛ̄ɛ̄kū wa᷅ŋnda̍ wo̍ o̍ wa̍ dīmīo̍o̍ ni̍.

¹³Mi̍ Chi̍i̍sū nda̍ bu̍ɛ̍i̍yāā ndūa̍a̍ kūā o̍ būŋgɛ̄ī Sīsāli̍a̍ā Fi̍li̍pāīve̍ ni᷄ŋ. Lo̍ŋ o̍ nyu̍na̍ nda̍ ni̍ āā, “Wāna̍ māā vɛ̄ɛ̄ wa᷅ŋnda̍ dīmi̍ yɛ̄ māā wāna̍ nda̍ vēēlū āā, Po̍ Wānā Pɔ̍nɔ̍ɔ̍ wo̍ ō chō yɛ̄?”

¹⁴Mi̍ bu̍ɛ̍i̍yāā ndūa̍a̍ mūlī āā, “Wāŋnda̍ ā pūm dīmi̍ māā Chɔ᷄ŋ Wānā Pu̍lāa̍ ŋ̄ chō ni̍, ā pūm āā, Īla̍a̍chā, ā pūm yɛ̍ āā, Chɛ̄lūīma̍yā ŋ̄ chō ni̍, ā pūm āā, wāna̍ su̍a̍ā le̍ Mɛ̄lɛ̄ka̍ wo̍ ō pūm ŋ̄ chō ni̍.”

¹⁵Mi̍ Chi̍i̍sū nyu̍nā nda̍ āā, “Vɛ̄ɛ̄ nya̍ nya̍ dīmi̍ yɛ̄? Wāna̍ māā vɛ̄ɛ̄ ya̍ cho̍ yɛ̄?”

¹⁶Mi̍ Sa̍i̍mɔ̄ŋ Pītɛ̍ mu̍lī āā, “Nu᷄m cho̍ Ki̍li̍tī ni̍, wāna̍ Mɛ̄lɛ̄ka̍ chu̍a̍ būŋgɛ̄ī māā ō chō vīōmɔ̄ɔ̄ le̍ wāŋnda̍ pīŋīo̍o̍ wo̍, Mɛ̄lɛ̄ka̍ cho̍ le̍ fɛ̍ɛ̍ŋ a̍ fɛ̍ɛ̍ŋ ndo̍, Po̍ ndɔ̄ɔ̍.”

¹⁷Mi̍ Chi̍i̍sū di̍mī āā, “Ā pɛ̄l tɔ̄nɔ̄ɔ̍, Sa̍i̍mɔ̄ŋ, po̍ Chɔ᷄ŋ ndo̍. Kāni̍ fo̍ndōle̍, ō cho̍ wa᷅na̍ chi̍e̍e̍ le̍ chɔ̍m nu̍m sūɛ̍i̍ he̍ī le̍. Fi̍nyā nūu̍ o̍ cho̍ o̍ fo̍ndāŋ ndɔ̄ɔ̍ chōo̍ cho̍o̍ wo̍, ndu̍ kpe̍e̍kpe̍i̍ chɔ̍m nu̍m sūɛ̍i̍ he̍ī ni̍.

¹⁸Mī di̍mu̍l nu̍m, nu᷄m cho̍ Pītɛ̍ ni̍, ko̍ŋ cho̍ ni̍ pōūwo̍. Ndu̍yɛ̍, pōūwo̍ ho̍ō ndu̍ cho̍ chīīye̍ le̍ tāŋgūl nūu̍ ni̍. Lēchōo̍ ya̍ cho̍ ku̍ndā wānāā lāāla᷄ŋnda̍ tāŋgūl ni̍. Ndu̍yɛ̍, pīɔ̍mndo̍ bɛ̍ɛ̍ ō nɔ̍lā mbō tɛ̄ɛ̄mbu̍u̍ ndu̍ le̍.

¹⁹I̍ cho̍ nu̍m ki̍īyo̍ŋ kē, ŋ̍ cho̍ le̍ dīōla̍ŋ o̍ māsāle̍ Mɛ̄lɛ̄ka̍le̍ŋ kūmbīo̍o̍ a̍ kīndāa̍ wo̍ŋ. Sāwā o̍ sāwā ā dɔ̄ū pɛ̍ chi̍e̍e̍ŋ na̍nu᷄ŋ, mī sāwā ko̍ŋ dīmi̍ āā, ‘Wānā to̍sā he̍ī le̍,’ kɛ̄lɛ̄ŋgāā mbō dīmi̍ āā, ‘He̍ī ndo̍ō wānā to̍sā ni̍,’ mɛ̄ɛ̍ dīmi̍ Mɛ̄lɛ̄ka̍a̍ ni̍.”

²⁰O̍ ko̍ŋ kɔ̍ɔ̍lī, mi̍ Chi̍i̍sū si̍lā bu̍ɛ̍i̍yāā ndūa̍a̍ āā, “Lā di̍mūl wānā o̍ wānā māā ya̍ le̍ cho̍ Ki̍li̍tī, wāna̍ Mɛ̄lɛ̄ka̍ chu̍a̍ būŋgɛ̄ī māā ō chō vīōmɔ̄ɔ̄ le̍ wāŋnda̍ pīŋīo̍o̍ wo̍ le̍.”

²¹Chɔ̍ŋ a̍ bōōndi̍i̍ ke̍ŋ, mi̍ Chi̍i̍sū ka̍ndū bu̍ɛ̍i̍yāā ndūa̍a̍ dīmūllo̍ kpe̍nde̍ke̍le̍ āā, “I̍ nɔ̍ le̍ kɔ̄la̍ŋ Chūlu̍sɛ̄lɛ̄m. Lo̍ŋ lāŋgba̍ā kālla̍, a̍ wānāā bɛ̄ndūa̍a̍ so̍lī sa̍lāa̍ o̍ Mɛ̄lɛ̄ka̍ lo̍ wa̍, ā wānāa̍ pɛ̍ɛ̍kū wa᷅ŋnda̍ sāwāla̍ Mɛ̄lɛ̄ka̍la̍ŋ nda̍, ā tōsā ni̍ŋ ni̍ mī I̍ bi̍ī mɔ̍nɛ̍i̍ ta̍u̍. Ā chō ya̍ dīyɔ̄ɔ̄. Kɛ̍ ndu̍yɛ̍, tē pālɛ̍i̍ ī hīōū pɛ̍ i̍ ya̍a̍, Mɛ̄lɛ̄ka̍ mīŋgi̍ ya̍ yōōmū.”

²²O̍ ko̍ŋ kɔ̍ɔ̍lī, mi̍ Pītɛ̍ ve̍e̍lū ndu̍ nda̍ ŋi̍ɔ̍ɔ̍ŋ kpe̍. Mbo̍ dīmūl ndu̍ āā, “Yi̍ya᷄ŋ yi̍ya᷄ŋ wa̍ā le̍nde̍ mā tu̍u̍nu̍ŋ ke̍ŋ te̍. Mɛ̄lɛ̄ka̍ tu̍ɛ̍ī bɛ̍ɛ̍ nyɛ᷅ ŋ̄ dīmi̍ ho̍ō wo̍ le̍, Māsānɔ̄ɔ̍. Chɛ᷅l mī ī wāā le̍nde̍ i̍ yɔ̍nu̍ŋ a̍ nūm te̍.”

²³Mi̍ Chi̍i̍sū mu̍li᷄ŋ mbo̍ dīmūl Pītɛ̍ āā, “Fa̍ŋa̍ŋ ya̍ na̍nu᷄ŋ, nūm Sēta̍nā, māsa̍ nyi̍nāā wɔ̄ɔ̍ŋnda̍. Wa̍li̍ nūu̍ ŋ̄ yēēma̍ māā ō tāmbu̍ ni̍. Nyɛ̄ ŋ̄ yīya̍ŋ ho̍ō wo̍, ō cho̍ yi̍ya᷄ŋ Mɛ̄lɛ̄ka̍ le̍. Yīya᷄ŋ īwāna̍ chi̍e̍e̍ya̍a̍ ŋ̄ yīya̍ŋ ho̍ō ni̍.”

²⁴O̍ ko̍ŋ kɔ̍ɔ̍lī, mi̍ Chi̍i̍sū di̍mūl bu̍ɛ̍i̍yāā ndūa̍a̍ āā, “Wānā o̍ wāna̍ hɛ̍na̍ŋ le̍ wāa̍ wāna̍ nī pɛ̍, mɛ̄ɛ̄ wānā kōŋ ō to̍sā hɛ̄na᷄ŋ kɔ̄l ndɔ̄ɔ̍ le̍. Ndu̍yɛ̍, wānā ko̍ŋ nɔ̄ mbō wa̍ ō bɛ̄ɛ̄ndīa̍ŋ lēpāa̍ o̍ lēpāa̍ le̍ mā dīī ndu̍. Ndu̍yɛ̍ o̍ ko̍ŋ kɔ̄ɔ̄lī, mbō sīmnu᷄ŋ bu̍ɛ̍ī nī.

²⁵Kāni̍ fo̍ndōle̍, wānā o̍ wāna̍ ki̍ndi̍ le̍ yōōmū ndɔ̄ɔ̍ chīīndīa̍a̍ pɛ̍, mɛ̄ɛ̍ ō chō yōōmū kpe̍e̍kpe̍i̍yo̍ fūlā. Kɛ̍ ndu̍yɛ̍, wānā o̍ wānā yōōmū ndɔ̄ɔ̍ hɛ̄lu᷄ŋ ndu̍ le̍ ya̍ pɛ̍, mɛ̄ɛ̍ ō chō hūnɔ̄ɔ̄ yōōmū kpe̍e̍kpe̍i̍yo̍ sɔ̄lā.

²⁶Kāni̍ fo̍ndōle̍, tɔ̄nɔ̍ yɛ̄ɛ̍nɛ̍ wāŋndo̍ sɔ̄lā yɛ̍, tē ō wa̍ pɛ̍ mbō sɔ̄la̍ chi̍e̍ēŋndo̍ ho̍ō kpo̍u̍, kɛ̍ ndu̍yɛ̍ o̍ ko̍ŋ kɔ̍ɔ̍lī, mbō fūla̍ yōōmū kpe̍e̍kpe̍i̍yo̍? Ndu̍yɛ̍, tē yōōmū kpe̍e̍kpe̍i̍yo̍ hɛ̄lu᷄ŋ pɛ̍ wa᷅ŋndo̍, ō nɔ̄lā lɛ̍ pa̍ ndu̍ bāŋa᷄?

²⁷Wāna̍ nda̍ vēēlū āā, Po̍ Wānā Pɔ̍nɔ̍ɔ̍ wo̍ chō hūnɔ̄ɔ̄ o̍ kpāāya̍ Fi̍nyā ndɔ̄ɔ̍ ni᷄ŋ a̍ ki̍i̍la̍a̍ Mɛ̄lɛ̄ka̍a̍. Ndu̍yɛ̍, ō chō hūnɔ̄ɔ̄ wānā o̍ wānā pa̍a̍wā mɛ̄ɛ̍ kūɛ̍i̍la̍ nu̍mnda̍ŋ lā wā yɛ̍.

²⁸Mī di̍mu̍l nya̍ wānāā pūm ā chō na̍nu᷄ŋ, ā lō ni̍ŋ yo̍o̍mū mā chē wāna̍ nda̍ vēēlū āā, Po̍ Wānā Pɔ̍nɔ̍ɔ̍ wo̍ mbō hīŋ mbo̍ wa̍ Māsāa̍ le̍ ŋ̄wāŋndā chīe̍e̍ kpo̍u̍.”