Read Southern Kisi Māa̍ti̍u̍ 18 Bible Online

Māa̍ti̍u̍ 18 - Southern Kisi bible

Māa̍ti̍u̍ 18

¹Mɛ̄ɛ̍ te̍le̍ŋ ti̍ŋ hīōū, mi̍ Chi̍i̍sū bu̍ɛ̍i̍yāā ndūa̍a̍ ā hūŋ nāa̍ ndu̍ chu̍a̍. Ma̍ nyūnā ndu̍ āā, “Ō nɛ̄ɛ̍nɛ̍ cho̍ yɛ̄ wānā ba̍nāa̍ kpo̍u̍ o̍ māsāle̍ Mɛ̄lɛ̄ka̍le̍ŋ ni᷄ŋ?”

²Mi̍ Chi̍i̍sū lo᷅ lo̍ŋ mbo̍ vēēlū chūāāmbɔ̄ pɔ̄mbu̍ɛ̍i̍na̍a̍ mbo̍ sīmī ndu̍ nda̍ lāchī.

³Mbo̍ dīmī āā, “Mī di̍mu̍l nya̍ wānā o̍ wānā mɛ̄ɛ̍ mī lā māŋga̍la̍ ka̍ālā nyāla̍ŋ mī lā sīmnu᷄ŋ mɛ̄ɛ̍ chūāāmbūāā pɔ̄mbūa̍a̍ chō nu̍a̍ā yɛ̍. Tē ō cho̍ ko̍ŋ te̍, lā lu̍e̍ī o̍ māsāle̍ Mɛ̄lɛ̄ka̍le̍ŋ ni᷄ŋ te̍.

⁴Wāna̍ tu̍si̍ ndu̍ pi̍la̍ tōōlō mbō sīmnu᷄ŋ mɛ̄ɛ̍ chūāāmbɔ̄ pɔ̄mbɔ̄ɔ̍ ho̍ō chō yɛ̍ pɛ̍, wānā ko̍ŋ ndu̍ cho̍ wānā ba̍nāa̍ o̍ māsāle̍ Mɛ̄lɛ̄ka̍le̍ŋ ni᷄ŋ ni̍.

⁵Ndu̍yɛ̍, wānā o̍ wāna̍ chɛ̍l chūāāmbɔ̄ wāā nu̍a̍ā pɛ̍ le̍ mɛ̄ɛ̍ ŋ̄ cho̍ bu̍ɛ̍ī nī yɛ̍ pɛ̍, mɛ̄ɛ̍ ya̍ ŋ̄ chɛ᷄l ko̍ŋ ni̍.”

⁶Mi̍ Chi̍i̍sū hi̍a̍ū lāchī a̍ sūɛ̍i̍ āā, “Ō bɛ̄ndā bɛ̍ɛ̍ mā bāa̍ wāŋndo̍ pōū bɛ̄ndōo̍ o̍ lābo̍lō mā ma᷄l ndu̍ o̍ mɛ̄ŋmā yīŋgi̍lɛ̍i̍ya̍ŋ ni᷄ŋ, mbo̍ hīāū a̍ wānā wa̍ā le̍nde̍ to̍sāa̍ mī ā pɔ̄mbūa̍a̍ ha̍ā ō pīlɛ̍ bɛ̍ɛ̍ mbō ma᷄l lāāla᷄ŋ o̍ la̍a̍la̍ŋ a̍ ya̍ wo̍.

⁷Nyɛ̄ nɛ̄īyāa̍ chō le̍ chi̍e̍ēŋndo̍ ho̍ō. Kāni̍ fo̍ndōle̍, māā sɔ̄ɔ̍ŋ to̍sā mī wāŋnda̍ tōsa̍ yɔ̄ŋ wɔ̄ɔ̍ŋndo̍ wo̍ŋ, ŋ̄ nɔ̄ le̍ yɔ̄nɔ᷄ŋndo̍. Kɛ̍ ndu̍yɛ̍, nyɛ̄ nɛ̄īyāā bɛ̄ndōo̍ chō le̍ wāna̍ to̍sā mī sɔ̄ɔ̍ŋ wa̍ā le̍nde̍ ŋ̍ yɔ̍nu̍ŋ ndo̍.”

⁸Mbo̍ dīmī āā, “Tē bā nūmndo̍, kɛ̄lɛ̄ŋgāā pēlīī nūmnde̍ wa̍ to̍sāa̍ pɛ̍ mā tōsā yɔ᷅ŋ wɔ̄ɔ̍ŋndo̍, mɛ̄ɛ̍ ki̍o̍lu̍ ba̍ kōŋ, kɛ̄lɛ̄ŋgāā ki̍o̍lu̍ pēlīī kēŋ kpa̍li̍ mā vīōū. Ō bɛ̄nda̍ mā nɔ̄ bāa̍ ō pīlɛ̍ kɛ̄lɛ̄ŋgāā pēlēi̍ ī pīlɛ̍, kɛ̍ ndu̍yɛ̍, mā sɔ̍la̍ yōōmū kpe̍e̍kpe̍i̍yo̍. Ndu̍ hi̍a̍ū na̍ŋɔ̄ɔ̄ a̍ bāla̍ŋ nɔ̄ɔ̍ lā tīɔ̍ɔ̍ŋ kɛ̄lɛ̄ŋgāā a̍ pēlo᷄ŋ nɔ̄ɔ̍ ŋ̄ mūu̍ŋ, kɛ̍ ndu̍yɛ̍, mā wa̍ ō vīāūwāā o̍ yīŋndē fɛ̍ɛ̍ŋ fɛ̍ɛ̍ŋnde̍ŋ ni᷄ŋ.

⁹Ndu̍yɛ̍, tē hɔ̄ltē nūmnde̍ŋ lē wa̍ tōsāa̍ pɛ̍ mā tōsā yɔ᷅ŋ wɔ̄ɔ̍ŋndo̍, mɛ̄ɛ̍ ka̍la̍ le̍ŋ po̍ltɛ̄ mā vīōū. Ō bɛ̄nda̍ mā wa̍ a̍ hɔ̄lte̍ŋ lē pīlɛ̍, kɛ̍ ndu̍yɛ̍, mā sɔ̍la̍ yōōmū kpe̍e̍kpe̍i̍yo̍. Ndu̍ hi̍a̍ū na̍ŋɔ̄ɔ̄ a̍ hɔ̄lta̍ŋ nɔ̄ɔ̍ lā tīɔ̍ɔ̍ŋ fa̍ū, kɛ̍ ndu̍yɛ̍, mā wa̍ ō vīāūwāā o̍ yīŋnde̍ŋ ni᷄ŋ nāa̍ Mɛ̄lɛ̄ka̍ dūāū wa̍nāā wɔ̄ɔ̍ŋnda̍ wa̍.”

¹⁰Mi̍ Chi̍i̍sū di̍mī vɛ̄lɛ̄ āā, “Chūāāmbūāā pɔ̄mbūa̍a̍ ha̍ā ki̍nɛ̍i̍, ō pīlɛ̍ bɛ̍ɛ̍ lā chu̍ā ndu̍ māā ō chō wānā fo̍ndō fu̍u̍ le̍. Mī di̍mu̍l nya̍, ki̍i̍la̍a̍ Mɛ̄lɛ̄ka̍a̍ a̍ ma̍ndā nda̍ wa̍ īdīi̍ a̍ īchɔ̄l ā chō Fi̍nyā nūu̍ o̍ cho̍ o̍ fo̍ndāŋ ndɔ̄ɔ̍ wo̍ o̍ hɔ̄l le̍ nda̍. [

¹¹Wāna̍ nda̍ vēēlū āā, Po̍ Wānā Pɔ̍nɔ̍ɔ̍ wo̍ ō hīŋ māhūnāā le̍ mbō pīŋi̍ wānāa̍ cho̍ o̍ lōo̍ ni᷄ŋ nda̍.]”

¹²Mi̍ Chi̍i̍sū di̍mī tālo̍o̍ āā, “Tē wāŋndo̍ nɔ̄ pɛ̍ sa̍a̍ kɛ̄mɛ̄, kɛ̍ ndu̍yɛ̍, mī ō pīlɛ̍ lāāsi̍a̍ŋ pɛ̍, nyɛ̄ o̍ to̍sā wo̍ cho̍ ho̍ō ni̍. Mɛ̄īyo̍ o̍ mɛ̍ī a̍ be̍le̍-ŋɔ̍ma̍hīɔ̍ɔ̍lu̍ a̍ ā ŋɔ̄ma̍hīɔ̍ɔ̍lu̍a̍a̍ ha̍ā di̍o̍la̍ŋ o̍ fo̍ndāŋ nda̍ māndā chɔ̍lūa̍a̍ wo̍ ni̍ mbō kɔ̍ nu̍u̍vīāā sāa̍ la̍a̍si̍a̍ŋ ndo̍.

¹³Mī di̍mu̍l nya̍, tē ō sāālu̍ŋ ndu̍ pɛ̍, ō na᷄ŋ kɔ̄l le̍ sāā pi᷅lɔ̍ɔ̍ ho̍ō mbō hīōū bɛ̍ɛ̍ mɛ̄ɛ̍ o̍ na᷅ŋ kɔ̍l le̍ ā be̍le̍-ŋɔ̍ma̍hīɔ̍ɔ̍lu̍ a̍ ā ŋɔ̄ma̍hīɔ̍ɔ̍lu̍a̍a̍ la̍a̍si̍a̍ŋ te̍ wa̍ yɛ̍.

¹⁴Le̍nde̍ ko̍ni̍ Mɛ̄lɛ̄ka̍ fi̍nyā nyā o̍ cho̍ ho̍ō o̍ fo̍ndāŋ ndɔ̄ɔ̍ wo̍ ō chō ni̍. Ō hɛ̍nāŋ mī chūāāmbūāā pɔ̄mbūa̍a̍ ha̍ā mī ō pīlɛ̍ bɛ̍ɛ̍ la̍a̍si̍a̍ŋ te̍.”

¹⁵Mi̍ Chi̍i̍sū yɔ̍ŋgū sīlāa̍ āā, “Tē chāa̍ŋ nūm wa̍nā la̍a̍la᷄ŋndo̍ ō tōsa̍l nu̍m yɔ̄ŋ wɔ̍ɔ̍ŋndo̍ pɛ̍, ve̍e̍lu̍ ndu̍ nya̍ ŋi̍ɔ̍ɔ̍ŋ kpe̍ mā chɔ̍m ndu̍ nyɛ̄ o̍ to̍sa̍ wo̍. Tē ō sɔ̄lɔ̍la̍ŋ pɛ̍ māā yɔ̄ŋ wɔ̄ɔ̍ŋndo̍ o̍ to̍sa̍ ni̍, mɛ̄ɛ̍ a̍ mi̍i̍ŋgu̍ vɛ̄lɛ̄ ndu̍ sɔ̄lā māā chāa̍ŋ nūm wa̍nā la̍a̍la᷄ŋ.

¹⁶Kɛ̍ ndu̍yɛ̍, tē ō sɔ̄lɔ̍la̍ŋ ndi̍ māā yɔ̄ŋ wɔ̄ɔ̍ŋ te̍ o̍ to̍sa̍l nu̍m te̍, a̍ ve̍e̍lu̍ wānā pi᷅lɛ̍, kɛ̄lɛ̄ŋgāā wānāā ŋīɔ̍ɔ̍ŋ. Kāni̍ fo̍ndōle̍, dīo̍m Mɛ̄lɛ̄ka̍a̍ dīmi̍ āā, ‘Mɛ̄ɛ̍ mī se̍īya̍ ā wa̍ nu̍m īkɛ̄i̍ a̍ ŋi̍ɔ̍ɔ̍ŋ, kɛ̄lɛ̄ŋgāā mā hīōū bɛ̍ɛ̍ le̍nde̍, a̍ nɔ̍lā mā chɔ᷄m māā a̍ ki̍ndi̍ le̍ ndu̍ mīŋgīo̍o̍ o̍ nɛ̄i̍ ya̍.’ ”

¹⁷Mi̍ Chi̍i̍sū hi̍a̍ū lāchī a̍ sūɛ̍i̍ āā, “Tē ka̍ŋ a̍ nɔ̍la̍ to̍sā mbō sīna̍ māā yɔ̄ŋ wɔ̍ɔ̍ŋ te̍ o̍ to̍sa̍ le̍, o̍ ko̍ŋ kɔ̍ɔ̍lī, a̍ chɔ̍m ku̍ndā wānāā lāāla᷄ŋnda̍. Tē ō kɛ̄ɛ̍ ku̍ndā wānāā lāāla᷄ŋnda̍ dīōm pɛ̍, mɛ̄ɛ̍ lā chu̍ā ndu̍ māā wānā la̍a̍la᷄ŋ te̍. Lā chūā ni᷅ŋ ndu̍ māchūāā māā wāna̍ cho̍ wa̍nā la̍a̍la᷄ŋ te̍ wo̍. Lā chu̍a̍ ndu̍ māā wānā wɔ̄ɔ̍ŋ mɛ̄ɛ̍ kɔ̍sɔ̄ŋnda̍ chō yɛ̍.”

¹⁸Mbo̍ hīāū lāchī a̍ sūɛ̍i̍ āā, “Le̍la̍ŋ mī di̍mu̍l nya̍ kpe̍de̍, sāwā o̍ sāwā nya̍ dɔ̄ū pɛ̍ chi̍e̍ēŋ na̍nu᷄ŋ, mī sāwā ko̍ŋ dīmi̍ āā, ‘Wānā to̍sā he̍ī le̍,’ kɛ̄lɛ̄ŋgāā mbō dīmi̍ āā, ‘He̍ī ndo̍ō wānā to̍sā ni̍,’ mɛ̄ɛ̍ dīmi̍ Mɛ̄lɛ̄ka̍a̍ ni̍.

¹⁹“I̍ di̍mūl lɔ̍ nya̍ vɛ̄lɛ̄ ī chēle̍ŋ. Tē lā chɛ̄la᷅ŋ o̍ chi̍e̍ēŋndo̍ ho̍ō chōo̍ le̍ Mɛ̄lɛ̄ka̍ pīɛ̄īyo̍ le̍ nyɛ̄ o̍ nyɛ̄ pɛ̍, lā wa̍ bɛ̍ɛ̍ a̍ ŋi̍ɔ̍ɔ̍ŋ, fi̍nyā nūu̍ o̍ cho̍ o̍ fo̍ndāŋ ndɔ̄ɔ̍ wo̍ nɔ̄lā mbō tōsa̍l nya̍ ndu̍.

²⁰Kāni̍ fo̍ndōle̍, bā o̍ bā bu̍ɛ̍i̍yāā nīa̍a̍ chūūŋgi̍āŋ pɛ̍, ā wa̍ a̍ ŋi̍ɔ̍ɔ̍ŋ, ā wa̍ a̍ ya̍a̍, I̍ wa᷅ nda̍ tɛ̄ɛ̄ŋ.”

²¹O̍ ko̍ŋ kɔ̍ɔ̍lī, mi̍ Pītɛ̍ hu᷅ŋ nāa̍ Chi̍i̍sū chu̍a̍. Mbo̍ nyūnā ndu̍ āā, “Māsānɔ̄ɔ̍, tē chāa̍ŋ nī wa̍nā la̍a̍la᷄ŋndo̍ ō wa̍ lāmba᷄ŋndo̍ a̍ ya̍ sɔ̄ɔ̍ŋ wɔ̍ɔ̍ŋndo̍ŋ tōsāllo̍ pɛ̍, vɛ̄ɛ̍nɛ̍ kpɛ̍ ya̍ I̍ nɔ̍ yɛ̄ mī ma̍l ndu̍ le̍ mu̍ŋ? Bāā lē ŋɔ᷄mmɛ̍ū?”

²²Mi̍ Chi̍i̍sū lo᷅ lo̍ŋ mbo̍ mūlī āā, “Ɛ̄ ɛ̍, ō cho̍ le̍ ŋɔ̍mmɛ̍ū ko̍ni̍ le̍ ŋ̄ nɔ̄ mā ma̍l ndu̍ le̍. Ā nɔ̄ mā ma̍l ndu̍ mī nyɛ̄ kōŋ kūɛ̄ be̍le̍ ŋɔ̍mmɛ̍ūla̍ŋ sālā ŋɔ᷄mmɛ̍ū.

²³Le̍ sa̍bū ya̍ di̍mu̍l nya̍ le̍nde̍ wo̍ cho̍ ni̍ māā māsāle̍ Mɛ̄lɛ̄ka̍le̍ŋ lē chō māchūāā māā mɛ̄ɛ̍ i̍ yɔ̍nu̍ŋ o̍ tālo̍o̍ ho̍ō ni᷄ŋ yɛ̍. Māsā pi᷅lɛ̍ wa̍ ni̍ mbo̍ kɛ̄ɛ̄sīāā le̍ mbō vēēlu̍ wānāā ndūa̍a̍ wa̍lla̍ le̍ mā hu᷄ŋ dɔ̍u̍nu᷄ŋ nyɛ̍ ndɔ̄ sɔ̄lāā ko̍na̍.

²⁴O̍ ko̍ŋ, ma̍ hūŋ a̍ wānāā ndūa̍a̍ wa̍li̍a̍a̍ ka̍ŋ ō pīlɔ̍ɔ̄. Mi̍ nyɛ̄ sɔ̄lāa̍ bīī ndu̍ kɛ̄mɔ̄ɔ̍ kɛ̄mɔ̄ɔ̍ ni᷄ŋ kɛ̄mɛ̄ chu̍ū chɔ᷅m te̍.

²⁵Pōo̍ ho̍ō ndu̍ o̍o̍ nɔ̍ nyɛ̍ sɔ̄lāa̍ lētūu̍ mī ndu̍ o̍o̍ pa̍a̍wa̍ nyɛ̄ sɔ̄lāa̍ wa̍ ndu̍ kūēē wo̍ le̍. Le̍ he̍ī, mi̍ māsāa̍ ho̍ō dīmī māā ā pīsi̍ po̍o̍ ho̍ō nda̍ la̍a̍ ndɔ̄ a̍ chūāūwāā ndūa̍a̍ o̍ chɛ̄le̍ŋ ni᷄ŋ, ndu̍yɛ̍ māā mā pīsī nyɛ̄m ndɔ᷄ŋ le̍ hāli̍ kpe̍ŋ mī nyɛ̄ sɔ̄lāa̍ wa̍ ndu̍ kūēē wo̍ ō pāāwa̍ŋ.

²⁶Mi̍ pōo̍ ho̍ō dēl māsāa̍ ho̍ō o̍ lābɛ̄ŋgu̍ ni̍ŋ mbo̍ nyɔ̄ɔ̄lū ndu̍. Mbo̍ dīmī āā, ‘Yāndi̍i̍ fāllo̍, ke̍ ya̍ fo̍ndāa̍. I̍ cho̍ nyɛ̄ nūm sɔ̍lāa̍ nūūwā mī pa̍a̍wa̍ kpo̍u̍.’

²⁷O̍ ko̍ŋ, mi̍ nyīɛ̍ɛ̍ye̍ bīī ma̍sā ndɔ̄ɔ̍ ta̍u̍ le̍ ndu̍. Mbo̍ lō o̍ ko̍ŋ mbo̍ māl nyɛ̄ sɔ̄lāa̍ wa̍ ndu̍ kūēē wo̍ kpo̍u̍. Mbo̍ māl ndu̍ mbo̍ kūānu᷄ŋ.

²⁸“O̍ ko̍ŋ kɔ̍ɔ̍lī, mɛ̄ɛ̍ po̍ nda̍ ma᷄l ko̍ŋ ndo̍ ō ku̍ɛ̄, mbo̍ sāālu᷄ŋ cha̍a̍ŋ ndɔ̍ nda̍ chō wa̍llo̍ wo̍. Chāa̍ŋ ndɔ̄ ko̍ŋ ndu̍ o̍o̍ nɔ̍ nyɛ̄ sɔ̄lāā ndɔ̄ɔ̍ kūēē, ō ve̍ bɛ̍ɛ̍ nyɛ̍ sɔ̄lāā bɔ̄ɔ̍ le̍. Chɔ̄ɔ̍ ndu̍ dɔ̍ɔ̍, mbo̍ sāā ndu̍ dōmāa̍ o̍ lābo̍lō. Mbo̍ dīmūl ndu̍ āā, ‘Pa̍a̍wa̍ nyɛ̍ nī sɔ̍lāa̍ cho̍ nu̍m kūēē wo̍.’

²⁹Mi̍ chāa̍ŋ ndɔ̄ de᷅l ndu̍ o̍ lābɛ̄ŋgu̍ ni̍ŋ. Mbo̍ nyɔ̄ɔ̄lū ndu̍ āā, ‘Yāndi̍i̍, ke̍ ya̍ fo̍ndāa̍. I̍ cho̍ nyɛ̄ nūm sɔ̍lāa̍ nūūwā mī pa̍a̍wa̍.’

³⁰Kɛ̍, ō chɛ᷄l te̍. Mbo̍ tōsā ma̍ dūāū ndu̍ o̍ chīɛ̄ī mānyūmndo̍ ni᷄ŋ le̍ mbō lo̍ o̍ ko̍ŋ mbō pāāwa̍ nyɛ̄ ndɔ̄ sɔ̍lāa̍.

³¹Mɛ̄ɛ̍ chāāŋāā ndūa̍a̍ wa̍lla̍ tūēī nyɛ̄ pōo̍ ho̍ō tōsa̍ wo̍, ma̍ tāmbū kɔ̄l a̍ ndu̍ ta̍u̍. Ma̍ kūā ma̍ kɔ̍ chɔ᷅m ma̍sā ndāa̍ lēni᷄ŋ nu̍a̍ā kpo̍u̍.

³²Chɔ̄mndo̍ ndu̍ le̍nde̍, mi̍ māsāa̍ ho̍ō vēēlū pōo̍ ho̍ō. Mbo̍ dīmūl ndu̍ āā, ‘Nūm wānā wɔ̍ɔ̍ŋ wɔ̄ɔ̍ŋ bɛ̄ndū ŋ̄ chō ni̍. A̍ nyɔ̍ɔ̍lu̍ ya̍ le̍ nyɛ̄ nī sɔ̍lāa̍ wa̍ nu̍m kūēē wo̍ mi̍ ma᷅l nu̍m.

³³Nūm o̍o̍ nɔ̍ mā tūīīnu̍ŋ cha̍a̍ŋ nu᷄m nya̍ chō wa̍llo̍ wo̍ īnyīɛ̍ɛ̍ mɛ̄ɛ̍ ya̍ tūīīnu̍ŋ nu̍m īnyīɛ̍ɛ̍ yɛ̍.’

³⁴Mi̍ māsāa̍ tūūlū kɔ̄l a̍ ndu̍ ta̍u̍. Mbo̍ tōsā ma̍ kɔ̍ dɔ̍ū ndu̍ o̍ chīɛ̄ī mānyūmndo̍ ni᷄ŋ. Mbo̍ dīmī māā ō lo̍ lo̍ŋ ha̍a̍a̍ mɛ̄ɛ̍ mbō pāāwa̍ nyɛ̄ sɔ̄lāa̍ wa̍ ndu̍ kūēē wo̍ kpo̍u̍.”

³⁵Mi̍ Chi̍i̍sū mɛ̍ɛ̍lū dīmī āā, “Wānā o̍ wānā tē a̍ me̍l cha̍a̍ŋ nūm wa᷅na̍ chi̍o̍o̍ a̍ kɔ̄l kpo̍u̍ le̍ yɔ̄ŋ wɔ̄ɔ̍ŋ o̍ to̍sa̍l nu̍mndo̍ le̍, Fi̍nyā nūu̍ o̍ cho̍ ho̍ō o̍ fo̍ndāŋ ndɔ̄ɔ̍ wo̍ chō tōsā a̍ nūm mɛ̄ɛ̍ māsāa̍ ho̍ō tōsa̍ nu̍a̍ā a̍ wāna̍ ndɔ̍ wa̍llo̍ yɛ̍.”