Read Southern Kisi Māa̍ti̍u̍ 19 Bible Online

Māa̍ti̍u̍ 19 - Southern Kisi bible

Māa̍ti̍u̍ 19

¹Mɛ̄ɛ̍ Chi̍i̍sū chi̍i̍ dīōmnda̍ŋ nda᷅ŋ dīmī mbo̍ fāŋa᷄ŋ o̍ lɛ̄ŋndē Kāli̍līle̍ŋ ni᷄ŋ. Fāŋa᷄ŋndo̍ lo̍ŋ, mbo̍ tūndū mbo̍ tāŋ Pīo̍o̍ Chɔ̍ɔ̍dāŋ. Mbo̍ kūā o̍ lɛ̄ŋndē Chūdi̍a̍āle̍ŋ ni᷄ŋ Chɔ̍ɔ̍dāŋ le̍e̍lōo̍.

²Mi̍ fāŋgā bɛ̍ndōo̍ tūāl ndu̍ kɔ̄ɔ̄lī. Ndu̍yɛ̍, mbo̍ sīŋgī wānāa̍ wa̍ a̍ nāāla̍ŋ nda̍ lo̍ŋ.

³O̍ ko̍ŋ kɔ̍ɔ̍lī, mi̍ ku̍ndā Fālīsi̍īya̍ kīndī le̍ ndu̍ tɔ̄ɔ̄nda᷄ŋndo̍. Ma̍ lō o̍ ko̍ŋ ma̍ nyūnā ndu̍ āā, “Bāā sāwāla̍ Mɛ̄lɛ̄ka̍la̍ŋ lā chɛ̄l mī pōo̍ ō kɛ̄ɛ̍ la̍a̍ ndɔ̍ le̍ sa̍bū o̍ sa̍bū?”

⁴Mi̍ Chi̍i̍sū mu̍lūl nda̍ āā, “Dīo̍m Mɛ̄lɛ̄ka̍ di̍mi̍ŋ māā o̍ kāndɔ᷄ŋndo̍ mi̍ Mɛ̄lɛ̄ka̍ tōōsīāā wānā la̍nɔ̍ɔ̍ a̍ wānā pɔ̍nɔ̍ɔ̍ wo̍, bāā lā tūi̍i̍ yɔ̍ ndu̍ le̍?

⁵Mi̍ Mɛ̄lɛ̄ka̍ dīmī āā, ‘Le̍ sa̍bū kōŋ wānā pɔ̍nɔ̍ɔ̍ ō mɛ̄ī fi̍nyā ndɔ̍ a̍ kāla̍ ndɔ̄ ni̍ mā cha᷄l nda̍ la̍a̍ ndɔ̄. O̍ ko̍ŋ, mī nda̍ ŋi̍ɔ̍ɔ̍ŋ mā sīmnu᷄ŋ wa᷅ŋndo̍ ō pīlɛ̍ kpe̍.’

⁶Tē ō wa̍ le̍nde̍ pɛ̍, mɛ̄ɛ̍ wāŋnda̍ ha̍ā ā cho̍ lɛ̍ wānāā ŋīɔ̍ɔ̍ŋ te̍. Mɛ̄ɛ̍ ā chō ni᷅ŋ māchūāā wāŋndo̍ ō pīlɛ̍ kpe̍. Le̍la̍ŋ, tē Mɛ̄lɛ̄ka̍ mɔ̄ɔ̄sa̍ wānā la̍nɔ̍ɔ̍ nda̍ wānā pɔ̍nɔ̍ɔ̍ nāa̍ pi᷅lɛ̍ o̍ nɔ̄ɔ̍ ni᷄ŋ pɛ̍, mɛ̄ɛ̍ wāna̍ chi̍e̍e̍ pi̍ɔ̍ū nda̍ tɛ̄ɛ̄ŋ te̍.”

⁷Mi̍ ku̍ndā Fālīsi̍īya̍ ā lō lo̍ŋ ma̍ nyūnā Chi̍i̍sū āā, “Kɛ̍, vɛ᷅ ni᷅ŋ mi̍ Mūu̍sē po̍o̍nyīāā sāwāa̍ o̍ chɛ̍l mī pōo̍ ō ke̍ la̍a̍ ndɔ̍ yāu̍wo̍ le̍ ndu̍ kīɔ̍ɔ̍, ndu̍yɛ̍ o̍ ko̍ŋ kɔ̍ɔ̍lī, mbō ma᷄l ndu̍ wo̍?”

⁸Mi̍ Chi̍i̍sū mu̍lī āā, “Le̍ mɛ̄ɛ̍ nya̍ kēndū īsɔ̄ɔ̍ pɛ̄ɛ̄kū yɛ̍ le̍la̍ŋ Mūu̍sē chɛ̍l nya̍ ni̍ le̍ mī lā kɛ̄ɛ̍ lāāndāā nyāa̍. Kɛ̍, ī ve̍ le̍nde̍ bo̍o̍ndi̍i̍ Mɛ̄lɛ̄ka̍ tōōsi̍a̍a̍ wāŋndā chīe̍e̍ya̍ ve̍ le̍.

⁹Le̍la̍ŋ, mī dīmu̍l nya̍, mɛ̄ɛ̍ mī wānā la̍nɔ̍ɔ̍ ō wa̍ sūūndāa̍, kɛ̍, tē ō cho̍ ko̍ŋ te̍, wānā o̍ wāna̍ kɛ̍ɛ̍ la̍a̍ ndɔ̍ le̍ sa̍bū o̍ sa̍bū chēle̍ŋ pɛ̍, ndu̍yɛ̍, mbō chu̍a̍ wānā la̍nɔ̍ che᷅le̍ŋ pɛ̍, mɛ̄ɛ̍ ō tɛ̄ɛ̄mbu̍u̍ sāwa̍ di̍mi̍ māā wānā su̍u̍ndā le̍ wo̍.”

¹⁰Mi̍ bu̍ɛ̍i̍yāā ndūa̍a̍ dīmūl ndu̍ āā, “Tē le̍nde̍ i̍ cho̍ ni̍, mɛ̄ɛ̍ ō bɛ̄ndā bɛ̍ɛ̍ mī wānā wa̍nu̍ŋ ā chu̍ē la̍nɔ̍ le̍.”

¹¹Mi̍ Chi̍i̍sū lo᷅ lo̍ŋ mbo̍ mūlī āā, “Ō cho̍ wa᷅ŋnda̍ kpo̍u̍ le̍ a̍ nɔ̍lā mā wa̍ o̍ nɛ̄ī wa̍ā nu̍a̍ā chōo̍ le̍. Wānāā Mɛ̄lɛ̄ka̍ yūlū le̍ wāa̍ o̍ nɛ̄ī wa̍ā nu̍a̍ā chōo̍ wa̍ nda̍ ko̍ni̍ nɔ̍lā mā wa̍ le̍nde̍ ni̍.

¹²Sa̍būla̍ŋ lā chō le̍ mɛ̄ɛ̍ wāŋ pīāāndūa̍a̍ ā pūm ā chu̍ē ŋ̍la̍a̍ndū le̍ yɛ̍. Ā pūm le̍nde̍ nda̍ vēlū nda̍ a̍ lɛ̄mbɔ̄ɔ̍ ō vīlɛ̍i̍ ni̍. Ā pūm yɛ̍ ā chu̍ē ŋ̍la̍a̍ndū le̍, kāni̍ fo̍ndōle̍, wāŋnda̍ di̍ī nda̍ lɛ̄mbɛ̄ ni̍. Ā pūm ā chu̍ē ŋ̍la̍a̍ndū le̍, fo̍ndōle̍, nda̍ pi̍la̍ hɛ̍na̍ŋ ni̍. Ā hɛ̄na̍ŋ mā yɔ̄ŋgu̍ŋ kpo̍u̍ o̍ wa̍llo̍ tōsāa̍ ni᷄ŋ le̍ māsāle̍ Mɛ̄lɛ̄ka̍le̍ŋ. Le̍la̍ŋ, wāna̍ nɔ̍la̍ wāa̍ o̍ nɛ̄īyo̍ ho̍ō chōo̍ pɛ̍, mɛ̄ɛ̍ ō wānu̍ŋ le̍nde̍.”

¹³Mi̍ wānāā pūm ā hūŋ a̍ chūāāmbūāā pɔ̄mbūa̍a̍ nāa̍ Chi̍i̍sū chu̍a̍ lē mbō hāndu̍ nda̍ bāla̍ŋ chōo̍ mbō pīɛ̍i̍ Mɛ̄lɛ̄ka̍ le̍ nda̍. Kɛ̍, mi̍ bu̍ɛ̍i̍yāa̍ Chi̍i̍sūa̍a̍ ā dōōnu᷄ŋ wa᷅ŋnda̍ ha̍ā tu̍mbe̍.

¹⁴Mi̍ Chi̍i̍sū di̍mī āā, “Lā ma᷄l nda̍ mā hīŋ nāa̍ ya̍ chu̍a̍. Lā ku̍u̍nā nda̍ le̍. Kāni̍ fo̍ndōle̍, le̍ ha̍ā ndo̍ō māsāle̍ Mɛ̄lɛ̄ka̍le̍ŋ lē chō ni̍.”

¹⁵O̍ ko̍ŋ, mbo̍ hāndū nda̍ bāla̍ŋ chōo̍ mbo̍ pīɛ̄ī Mɛ̄lɛ̄ka̍ le̍ nda̍. O̍ ko̍ŋ kɔ̍ɔ̍lī, mbo̍ kūānu᷄ŋ.

¹⁶Bōōndi̍i̍ pi᷅lɛ̍ mi̍ po̍ chu̍a̍ pīāāndū pīlɛ̍ hūŋ nāa̍ Chi̍i̍sū chu̍a̍. Mbo̍ nyūnā Chi̍i̍sū āā, “Ti̍chā, sūɛ̍i̍ kɛ̍ndɛ̄ī māāvɛ̄ɛ̄ ya̍ I̍ to̍sa̍ yɛ̍ mī sɔ̍la̍ yōōmū kpe̍e̍kpe̍i̍yo̍ o̍ nɔ̍ la̍mɛ̍ɛ̍lu̍ le̍ wo̍?”

¹⁷Mi̍ Chi̍i̍sū di̍mūl ndu̍ āā, “Vɛ᷅ mā nyu̍na̍ ya̍ le̍ sūɛ̍i̍ kɛ̍ndɛ̄ī ŋ̄ tōsā ve̍? Mɛ̄lɛ̄ka̍ ndu̍ pīlɛ̍ kpe̍ cho̍ ō kɛ̄ndɛ̄ ni̍. Tē a̍ hɛ̍na̍ŋ pɛ̍ mā sɔ̍la̍ yōōmū kpe̍e̍kpe̍i̍ nɔ̍ la̍mɛ̍ɛ̍lu̍ le̍ wo̍ pɛ̍, mɛ̄ɛ̍ chu̍a̍ sa̍wāla̍ Mɛ̄lɛ̄ka̍la̍ŋ.”

¹⁸Mi̍ pōo̍ ho̍ō nyūnā ndu̍ āā, “Sāwāla̍ kūɛ̍ɛ̍nɛ̍?” Mi̍ Chi̍i̍sū mu̍lī āā, “Di̍ī wānā le̍. Su̍u̍ndā a̍ la̍nɔ̍ pi̍la̍ kɛ̄lɛ̄ŋgāā a̍ pɔ̍nɔ̍ pi̍la̍ le̍. Yɔ᷅ŋ lēvīī le̍. Tɛ̍ndā se̍īlē lāka̍fā le̍.

¹⁹Ke̍ fi̍nyā nu̍m bɛ̄ɛ̄le̍ŋ a̍ kālā nu̍m. Ndu̍yɛ̍, mā ka̍a̍la̍ chāa̍ŋ nūm wa᷅na̍ chi̍o̍o̍ mɛ̄ɛ̍ ŋ̄ kāāla̍ nūm pi̍la̍ yɛ̍.”

²⁰O̍ ko̍ŋ kɔ̍ɔ̍lī, mi̍ po̍ chu̍a̍ pīāāndōo̍ ho̍ō dīmī āā, “I̍ chu̍a̍ ni᷅ŋ sāwāla̍ŋ nda᷅ŋ kpo̍u̍. Bāā ō chēle̍ŋ chō ō ya̍ nɔ̍ mī to̍sa̍ wo̍?”

²¹Mi̍ Chi̍i̍sū di̍mūl ndu̍ āā, “Tē a̍ hɛ̍na̍ŋ mā wa̍ ō bɛ̄ndāā o̍ nɛ̄ī o̍ nɛ̄ī ni̍ŋ le̍ yōōmū kpe̍e̍kpe̍i̍yo̍ o̍ nɔ̍ la̍mɛ̍ɛ̍lu̍ le̍ wo̍ sɔ̄lāa̍ pɛ̍, mɛ̄ɛ̍ kɔ̍ mā kɔ̍ pi̍sī nyɛ̄ o̍ nyɛ̄ ŋ̄ nɔ̄ mā ke̍ wānāā tāmbɛ̍i̍ya̍ ka̍ni̍ŋ mu̍ŋ. Ā chō sūllo̍ sɔ̄lā o̍ Mɛ̄lɛ̄ka̍ lo̍. Tē a̍ to̍sa̍ he̍ī pɛ̍, ā hīŋ ā sīmnu᷄ŋ bu̍ɛ̍ī nī.”

²²Ndu̍yɛ̍, pōo̍ ho̍ō ndu̍ o̍o̍ su̍l ta̍u̍. Le̍ he̍ī, mɛ̄ɛ̍ Chi̍i̍sū di̍mi̍ māā ō pīsi̍ nyɛ᷅ o̍ nyɛ̄ o̍ nɔ̍, mbo̍ tāmbū kɔ̄l ta̍u̍. Mbo̍ mūli᷄ŋ kɔ᷄nda̍ŋ a̍ kɔ̄l tāmbɛ̍i̍ ko̍ŋ.

²³O̍ ko̍ŋ, mi̍ Chi̍i̍sū di̍mūl bu̍ɛ̍i̍yāā ndūa̍a̍ āā, “Mī di̍mu̍l nya̍, ī chō ī kālā mī wānā su̍lāa̍ lūɛ̄ī o̍ māsāle̍ Mɛ̄lɛ̄ka̍le̍ŋ ni᷄ŋ.

²⁴Mī chɔ̍ɔ̍lu̍ vɛ̄lɛ̄ dīmī, ī hīōū wā bɛ̍ɛ̍ŋ le̍ vīsī bānā bānāa̍ mɛ̄ɛ̍ nyɔ̍mi̍ɔ̍ɔ̍ chō nu̍a̍ā yɛ̍ mbō kēēku̍ o̍ tɛ̄ɛ̄ŋgū lēsīɛ̄ndīo̍o̍ ni᷄ŋ mbo̍ hīāū le̍ wānā su̍lāa̍ lūɛ̄īyɔ̄ɔ̍ o̍ māsāle̍ Mɛ̄lɛ̄ka̍le̍ŋ ni᷄ŋ.”

²⁵Mɛ̄ɛ̍ bu̍ɛ̍i̍yāā ndūa̍a̍ tūēī he̍ī, mi̍ kɔ̄ndɔ̄fi̍llo̍ bīī nda̍ ta̍u̍ ta̍u̍. Ma̍ nyūnā ndu̍ āā, “Mɛ̄ɛ̍ nɛ̄ɛ̍nɛ̍ pi̍āŋ yɛ̍ ni̍ŋ?”

²⁶O̍ ko̍ŋ kɔ̍ɔ̍lī, mi̍ Chi̍i̍sū to̍fā nda̍ mbo̍ dīmūl nda̍ āā, “O̍ nɛ̄i̍ īwāna̍ chi̍e̍e̍ya̍a̍ ni᷄ŋ, wāna̍ chi̍o̍o̍ ō nɔ̍lā mbō tōsa̍ he̍ī le̍. Mɛ̄lɛ̄ka̍ ko̍ nɔ̍lā mbō pīŋi̍ wāŋndo̍ ni̍. Kāni̍ fu̍u̍le̍, Mɛ̄lɛ̄ka̍ ndu̍ nɔ̍lā mbō tōsa̍ nyɛ̄ o̍ nyɛ̄.”

²⁷O̍ ko̍ŋ, mi̍ Pītɛ̍ nyu̍nā Chi̍i̍sū āā, “Mɛ̄ɛ̍ na̍a̍ ŋ̄ ma᷄l ni᷅ŋ nyɛ̄ o̍ nyɛ̄ na̍a̍ ŋ̄ nɔ̄ mi̍ ŋ̄ tūāl nu̍m kɔ̄ɔ̄lī, ō yɛ̄ɛ̍nɛ̍ Mɛ̄lɛ̄ka̍ chō yɛ̄ na̍a̍ kē sɔ̍ŋgɔ̍ ko̍ŋ?”

²⁸Mi̍ Chi̍i̍sū di̍mūl nda̍ āā, “Mī di̍mu̍l nya̍, wāna̍ nda̍ vēēlū āā, Po̍ Wānā Pɔ̍nɔ̍ɔ̍ wo̍ chō hūnɔ̄ɔ̄ īchāli̍ o̍ kpe̍ŋgbe̍i̍ ndɔ̍ lēmāsā lēbɛ̄ɛ̄ bɛ̄ndōo̍ chōo̍ o̍ chi̍e̍e̍ŋ wa᷅ ni̍ŋ fɛ̍lɛ̍ŋ ndo̍ ni᷄ŋ. Bōōndi̍i̍ ke̍ŋ, nya̍ bu̍ɛ̍i̍yāā nīa̍a̍ bɛ̍ɛ̍ lā chō hūnɔ̄ɔ̄ īchāli̍ o̍ kpe̍ŋgbe̍i̍la̍ lēmāsālā tɔ̍ a̍ lā tīɔ̍ɔ̍ŋ nda̍ŋ chōo̍, mī lā wa̍ māsāa̍ kāa̍la̍ tɔ̍ a̍ lā tīɔ̍ɔ̍ŋnda̍ŋ chōo̍ I̍sɔ̄lūɛ̄ī.

²⁹Ndu̍yɛ̍, wānā o̍ wāna̍ ma̍l chīɛ̄īlā ndɔ̄la̍ŋ, kɛ̄lɛ̄ŋgāā pɔ̄mbūāā ndūa̍a̍, kɛ̄lɛ̄ŋgāā bɛ̄ndāā ndūa̍a̍, kɛ̄lɛ̄ŋgāā yēmāa̍ ndūa̍a̍, kɛ̄lɛ̄ŋgāā fi̍nyā ndɔ̍, kɛ̄lɛ̄ŋgāā kāla̍ ndɔ̄, kɛ̄lɛ̄ŋgāā chūāūwāā ndūa̍a̍, kɛ̄lɛ̄ŋgāā chīɔ̄ɔ̄ŋ ndɔ᷄ŋ le̍ sa̍bū nūu̍ pɛ̍, wānā ko̍ŋ, nyɛ̄ o̍ nyɛ̄ ŋ̄ ma᷄l, kɛ̄mɔ̄ɔ̍ Mɛ̄lɛ̄ka̍ chō nu̍m hūnɔ̄ɔ̄ hēndūl lēchōo̍ ni̍. Ndu̍yɛ̍ o̍ ko̍ŋ kɔ̍ɔ̍lī, mbō ke̍ nu̍m vɛ̄lɛ̄ yōōmū kpe̍e̍kpe̍i̍yo̍ o̍ nɔ̍ la̍mɛ̍ɛ̍lu̍ le̍ wo̍.

³⁰Ndu̍yɛ̍, a̍ bōōndi̍i̍ ke̍ŋ wānāā bɛ̄ndūa̍a̍ pɛ̄ŋgo̍o̍ ho̍ō ā ka̍ ka̍ ā chō hūnɔ̄ɔ̄ sīmnɔ᷄ŋ wa̍nāā pɔ̄mbɔ̄, ndu̍yɛ̍, mī wānāā pɔ̄mbūa̍a̍ pɛ̄ŋgo̍o̍ ho̍ō ā ka̍ ka̍ a̍ hu̍ŋ si̍mnu᷄ŋ wa̍nāā bɛ̄ndū.”