Read Southern Kisi Māa̍ti̍u̍ 2 Bible Online

Māa̍ti̍u̍ 2 - Southern Kisi bible

Māa̍ti̍u̍ 2

¹Bɛ̍ti̍lɛ̍hɛ̄m chi̍e̍e̍ Chi̍i̍sū ve̍lu᷄ŋ ni̍ o̍ lɛ̄ŋndē Chūdi̍a̍āle̍ŋ ni᷄ŋ. Bōōndi̍i̍ ke̍ŋ Hɛ̍lɔ̄ɔ̄ ndu̍ wa̍ māsā bɛ̍ndōo̍ le̍ lɛ̄ŋnde̍ Chūdi̍a̍āle̍ŋ ni̍. Mɛ̄ɛ̍ nda̍ vēlū ndu̍, mi̍ pūa̍a̍ pūm ā cha᷄ŋ o̍ lɛ̄ŋndē pūm bā pāa̍le̍ŋ lē chāŋ ndo̍, ma̍ hūŋ Chūlu̍sɛ̄lɛ̄m. Wānāa̍ pɛ̍ɛ̍ku̍ a̍ lōo̍ŋ o̍kɔ̄ɔ̄, o̍ ko̍ŋ kɔ̍ɔ̍lī, mā chɔ̄m sɔ̍ɔ̍ŋ wa᷅ hu̍nɔ̄ɔ̄ yɔ̄nɔ᷄ŋndo̍ wo̍ŋ nda̍ pūa̍a̍ ha̍ā ā wa̍ ni̍.

²Mɛ̄ɛ̍ nda̍ fūūlu̍u̍ Chūlu̍sɛ̄lɛ̄m, ma̍ nyūnā āā, “Kūɛ̍ɛ̍nɛ̍ chɛ̄lɛ̄kpɛ̍ nda̍ vēlū wo̍ chō yɛ̄, o̍ cho̍ māsāa̍ lē Chu̍ūwa̍ wo̍? Kāni̍, ŋ̄ chē lūe̍i̍ chɔ̍m a̍ vīōlɔ᷄ŋ ndɔ̄ɔ̍ o̍kɔ̄ɔ̄ ve̍ chɔ̄nɔ᷄ŋndo̍ bā pāa̍le̍ŋ lē chāŋ ndo̍. Ndu̍yɛ̍ ŋ̄ hīŋ mī ŋ̄ hu᷄ŋ yi᷅l ndu̍.”

³Mɛ̄ɛ̍ Māsā Bɛ̍ndōo̍ Hɛ̍lɔ̄ɔ̄ tu̍e̍ī sūɛ̍i̍ he̍ī, ndu̍ ni̍ a̍ wāŋnda̍ Chūlu̍sɛ̄lɛ̄m kpo̍u̍ ma̍ tāmbū kɔ̄l ta̍u̍.

⁴Mi̍ Māsāa̍ Hɛ̍lɔ̄ɔ̄ lo᷅ o̍ ko̍ŋ mbo̍ chūūŋgīāā wānāā bɛ̄ndūa̍a̍ so̍lī sa̍lāa̍ o̍ Mɛ̄lɛ̄ka̍ lo̍ wa̍ a̍ wānāa̍ pɛ̍ɛ̍kū wa᷅ŋnda̍ sāwāla̍ Mɛ̄lɛ̄ka̍la̍ŋ nda̍. Mbo̍ nyūnā nda̍ āā vɛ̄ɛ̄, “Kūɛ̍ɛ̍nɛ̍ i̍ cho̍ yɛ̍ ī dīmīa̍ŋ māā Ki̍li̍tī, wāna̍ Mɛ̄lɛ̄ka̍ chu̍a̍ būŋgɛ̄i̍ māā ō chō vīōmɔ̄ɔ̄ le̍ wāŋnda̍ pīŋīo̍o̍ wo̍, ō nɔ̄ yɛ̄ le̍ vīōlɔ᷄ŋndo̍?”

⁵Ma̍ lō o̍ ko̍ŋ ma̍ dīmūl ndu̍ āā, “Bɛ̍ti̍lɛ̍hɛ̄m chi̍e̍e̍ o̍ lɛ̄ŋndē Chūdi̍a̍āle̍ŋ ni᷄ŋ, lo̍ŋ o̍ nɔ̍ le̍ vīōlɔ᷄ŋndo̍ ni̍. Kāni̍, le̍nde̍ wāna̍ su̍a̍ā le̍ Mɛ̄lɛ̄ka̍ wo̍ ō pūm pōōnyi̍a̍a̍ ni̍ āā,

⁶‘Mɛ̄lɛ̄ka̍ dīmi̍ āā, Bɛ̍ti̍lɛ̍hɛ̄m Chu̍dā, chi̍e̍e̍ŋ lēmāsa᷄ŋ lɛ̄ŋndē Chu̍dāle̍ŋ ki̍nɛ̍i̍, nūm Bɛ̍ti̍lɛ̍hɛ̄m ā chō chi̍e̍e̍ le̍bo᷅llo̍ ō pīlɛ̍. Kāni̍ fo̍ndōle̍, māsāa̍ pūm ō vīālūŋ ni̍ŋ Bɛ̍ti̍lɛ̍hɛ̄m, māsā ko̍ŋ ndu̍ ma̍ndā ni̍ŋ wa̍nāā nīa̍a̍ I̍sɔ̄lūɛ̄ī ni̍.’ ”

⁷Mɛ̄ɛ̍ Māsāa̍ Hɛ̍lɔ̄ɔ̄ tu̍e̍ī dīōmnda̍ŋ nda᷅ŋ, mbo̍ vēēlū wānāa̍ chɛ̍ŋ ka̍ŋ o̍ lɛ̄ŋnde̍ŋ bā pāa̍le̍ŋ lē chāŋ ndo̍ wa̍. Mɛ̄ɛ̍ o̍ ve̍e̍lu̍ nda̍ sɔ̍ɔ̍ sɔ̍ɔ̍, mbo̍ lō o̍ ko̍ŋ mbo̍ nyūūnīāā nda̍. Mbo̍ sāālu᷄ŋ bo̍o̍ndi̍i̍ kpe̍e̍kpe̍i̍ lūe̍i̍ he̍ī ī chɔ̄mnu̍ŋ o̍ ha̍la̍a̍ ni᷄ŋ nde̍.

⁸O̍ ko̍ŋ kɔ̍ɔ̍lī, mbo̍ vīām nda̍ Bɛ̍ti̍lɛ̍hɛ̄m āā, “Lā kɔ̍. Tē lā kūɛ̄ pɛ̍, lā kɔ̍ nu̍u̍vīāā nyɛ̄ kɛ̄ndɛ̄ kɛ̍ndɛ̄ ha̍a̍a̍ mī lā lo̍ o̍ ko̍ŋ mī lā sāālu̍ŋ chɛ̍lɛ̄kpɛ̍ nda̍ vēlū ko̍ŋ ndo̍. Tē lā sāālu̍ŋ ndu̍ dɔ̍ɔ̍ pɛ̍, lā mīīŋgu̍ na̍nu᷄ŋ mī lā hu᷄ŋ di̍mūl la̍, ya̍ bɛ̍ɛ̍ mī kɔ̍ yi᷅l ndu̍.”

⁹Mɛ̄ɛ̍ o̍ di̍mu̍l nda̍ le̍nde̍, ma̍ cha᷄ŋ ma̍ kūā. Wāa̍ kɔ̄la̍ŋ, ma̍ chā vɛ̄lɛ̄ lūe̍i̍ nda̍ chē o̍ lɛ̄ŋnde̍ŋ bā pāa̍le̍ŋ lē chāŋ ndo̍ ve̍. Mɛ̄ɛ̍ nda̍ chē ndi̍, ma̍ nāŋ kɔ̄l ta̍u̍ ta̍u̍ bɛ̍ndū. Mi̍ lūe̍i̍ he̍ī lō kɔ̄la̍ŋ ha̍a̍a̍ mi̍ ī kɔ̍ fu̍u̍lūū nāa̍ chɛ̄lɛ̄kpɔ̍ɔ̍ ō wa̍ wa̍. Mi̍ ī sīm o̍ fo̍ndāŋ kōŋ chōo̍ kpe̍e̍kpe̍i̍.

¹⁰

¹¹Mɛ̄ɛ̍ nda̍ fūūlu̍u̍ o̍ chīɛ̄ī o̍ wa̍ wo̍, ma̍ lūɛ̄ī. Ma̍ chā Mēēle̍ ka᷅la̍ ndɔ̄ a̍ chɛ̄lɛ̄kpɔ̍ɔ̍ ho̍ō. Ma̍ bāŋ wūla̍ŋ ndu̍ o̍ lā bɛ̄ŋgu̍ ni̍ŋ ma̍ yīl ndu̍. O̍ ko̍ŋ kɔ̍ɔ̍lī, ma̍ kūmbī bɔ̄lɔ̄la̍ ndāla̍ŋ, ma̍ sōlī ko̍o̍līi̍yo̍ŋ a̍ nyɛ̄m ba̍ā kālāŋ pūm mā vēēlū o̍ pi᷅lɔ̍ɔ̄ dīōla̍ŋ āā fīla̍ki̍ŋsɛ̄ŋ a̍ ō pīlɔ̍ɔ̄ mā vēēlū ndu̍ āā mɔ̍ɔ̄. Ma̍ kē ndu̍.

¹²Lɔ̍ɔ̍pa̍ mā mīīŋgu̍, mi̍ Mɛ̄lɛ̄ka̍ lūɛ̄ī o̍ lɔ̄mā sɔ̄lāā mbo̍ sīlā nda̍ māā ā mi̍i̍ŋgū lɛ̄ nāa̍ Māsāa̍ Hɛ̍lɔ̄ɔ̄ chu̍a̍ le̍. Nda̍ bɛ̍ɛ̍ wāa̍ kɔ̄la̍ŋ, ma̍ kēēku᷄ŋ a̍ nɛ̄ī che᷅le̍ŋ ma̍ kūānu᷄ŋ o̍ lɛ̄ŋndē ndāle̍ŋ ni᷄ŋ.

¹³Mɛ̄ɛ̍ wānāa̍ pɛ̍ɛ̍ku̍ ka̍ŋ a̍ lōo̍ŋ o̍kɔ̄ɔ̄ wa̍ kūɛ̄nu᷄ŋ, mi̍ ki̍i̍la̍nɔ̍ Māsānɔ̄ɔ̍ Mɛ̄lɛ̄ka̍a̍ chɔ̄mnu᷄ŋ Cho̍o̍sɛ̍ o̍ lɔ̄mā sɔ̄lāā. Mbo̍ dīmūl ndu̍ āā, “Chōo̍sɛ̍, chɔ̍ŋ mā chu̍a̍ chɛ̄lɛ̄kpɔ̍ɔ̍ a̍ kāla̍ ndɔ̄ mī lā nyāānu̍ŋ I̍chi̍pī. Lā kūɛ̄ pɛ̍, lā lo̍ lo̍ŋ ha̍a̍a̍ mɛ̄ɛ̍ mī I̍ di̍mu̍l nya̍ le̍ fāŋa᷄ŋndo̍ lo̍ŋ. Kāni̍ fu̍u̍le̍, Māsāa̍ Hɛ̍lɔ̄ɔ̄ cho̍ chɔ̄nɔ᷄ŋ chɛ̄lɛ̄kpɔ̍ɔ̍ ho̍ō nūūvīa̍a̍ le̍ ndu̍ dīyɔ̄ɔ̍.”

¹⁴O̍ ko̍ŋ kɔ̍ɔ̍lī, mi̍ Chōo̍sɛ̍ cha̍ŋ mbo̍ chūā chɛ̄lɛ̄kpɔ̍ɔ̍ nda̍ kāla̍ ndɔ̄ ma̍ cha᷄ŋ kɔ᷅la̍ŋ I̍chi̍pī a̍ nyūmnda̍ŋ.

¹⁵I̍chi̍pī lo̍ŋ nda̍ lo̍ ha̍a̍a̍ ni̍, mbo̍ lō o̍ ko̍ŋ mi̍ Hɛ̍lɔ̄ɔ̄ wu᷅. Sɔ̄ɔ̍ŋ mu᷅ŋ ŋ̄ yɔ̄nu̍ŋ le̍ mī nyɛ̄ Māsānɔ̄ɔ̍ Mɛ̄lɛ̄ka̍ dɔ̄ū sīndɛ̄ wāna̍ su̍a̍ā le̍ ndu̍ wo̍ o̍ sōndō mbo̍ dīmī wo̍ ō yɔ̄nu̍ŋ. Māā Mɛ̄lɛ̄ka̍ dīmī āā, “I̍ ve̍e̍lu̍ po̍ nūu̍ le̍ mbō fāŋa̍ŋ I̍chi̍pī.”

¹⁶Mɛ̄ɛ̍ Māsāa̍ Hɛ̍lɔ̄ɔ̄ sa̍a̍lu̍ŋ māā wānāa̍ pɛ̍ɛ̍ku̍ a̍ lōo̍ŋ o̍kɔ̄ɔ̄ wa̍ ā hūi̍ ndu̍, mbo̍ dūāūnu᷄ŋ tu̍mbe̍ ta̍u̍. O̍ ko̍ŋ kɔ̍ɔ̍lī, mbo̍ vīām wāŋnda̍ māā ā dīu̍ pu̍a̍a̍mbūāā pɔ̄mbūa̍a̍ kpo̍u̍ Bɛ̍ti̍lɛ̍hɛ̄m a̍ o̍ tāndā kōŋ ni᷄ŋ fa̍ū, kāndɔ᷄ŋndo̍ a̍ chɛ̄lɛ̄kpi̍a̍a̍ nda̍ vēlū sɛ̄nɛ̄ī ya̍ mbo̍ kūā le̍nde̍ a̍ pūa̍a̍mbūa̍a̍ cho̍ wɔ̄sīla̍ŋ lā tīɔ̍ɔ̍ŋ nda̍. Kāni̍, bōōndi̍i̍ ke̍ŋ wānāa̍ pɛ̍ɛ̍ku̍ a̍ lōo̍ŋ o̍kɔ̄ɔ̄ wa̍ ā chɔ᷄m ndu̍ a̍ lūe̍i̍ nda̍ chē ve̍ ni̍.

¹⁷O̍ he̍ī ni᷄ŋ, wāna̍ su̍a̍ā le̍ Mɛ̄lɛ̄ka̍ wo̍ Chɛ̄lūīma̍yā, dīōmndā Mɛ̄lɛ̄ka̍ dɔ̄ū ndu̍ o̍ sōndō mbo̍ dīmī sīndɛ̄ la̍ŋ māā nyɛ̄ ko᷄ŋ yɔ̍nu̍ŋ ko̍ŋ ni̍. Dīōmndā la᷄ŋ la̍ cho̍ yɛ̄ la᷅ŋ ni̍ āā,

¹⁸“Bɔ̄ɔ̄lūū bɛ̄ndōo̍ chō sūɛ̍i̍ Lu̍a̍mā. Cha᷄ŋnda̍ŋ lā chō sūɛ̍i̍ kpu̍ū bɛ̄ndū. Lu̍e̍chɛ̄l cho̍ cha᷄ŋndo̍ le̍ chūāūwāā ndūa̍a̍. Ō chō cha᷄ŋndo̍, ndu̍yɛ̍ ō nyɔ̍ɔ̍lūŋ kpo̍so̍ŋ te̍, kāni̍ fo̍ndōle̍, chūāūwāā ndūa̍a̍ chūu̍ pa̍ku̍.”

¹⁹Mɛ̄ɛ̍ Māsāa̍ Hɛ̍lɔ̄ɔ̄ vi᷅, mi̍ ki̍i̍la̍nɔ̍ Māsānɔ̄ɔ̍ Mɛ̄lɛ̄ka̍a̍ chɔ̄mnu᷄ŋ Chōo̍sɛ̍ o̍ lɔ̄mā sɔ̄la᷄ŋ ni᷄ŋ I̍chi̍pī.

²⁰Mbo̍ dīmūl ndu̍ āā, “Chɔ̍ŋ mā chu̍a̍ pōo̍mbɔ̄ɔ̍ nda̍ kāla̍ ndɔ̄ mī lā mīīŋgu̍ o̍ lɛ̄ŋndē I̍sɔ̄lūɛ̄īle̍ŋ ni᷄ŋ. Kāni̍ fu̍u̍le̍, wānāa̍ nda̍ a̍a̍ ye̍e̍ma̍ le̍ ndu̍ dīyɔ̄ɔ̍ wa̍ ā vī.”

²¹O̍ ko̍ŋ kɔ̍ɔ̍lī, mi̍ Chōo̍sɛ̍ chu̍ā pōo̍mbɔ̄ɔ̍ a̍ kāla̍ ndɔ̄ ma̍ mīīŋgū o̍ lɛ̄ŋndē I̍sɔ̄lūɛ̄īle̍ŋ ni᷄ŋ.

²²Kɛ̍ mɛ̄ɛ̍ Chōo̍sɛ̍ tu̍e̍ī māā po̍ Hɛ̍lɔ̄ɔ̄ wo̍ dīōla̍ŋ Āke̍lɔ̄ɔ̄ māā ndu̍ cho̍ māsāa̍ o̍ fōōfo̍ fi̍nyā ndɔ̄ɔ̍ le̍ lɛ̄ŋndē Chūdi̍a̍āle̍ŋ ni̍, mi̍ sīōōŋnde̍ bīī ndu̍ le̍ kɔ̄la̍ŋ ndo̍ŋ. O̍ ko̍ŋ kɔ̍ɔ̍lī, mɛ̄ɛ̍ o̍ sɔ̍la̍ vɛ̄lɛ̄ sīlāa̍ o̍ lūa̍a̍ŋ ni᷄ŋ a̍ ndi̍ o̍kɔ̄ɔ̄, mbo̍ kūānu᷄ŋ o̍ lɛ̄ŋndē Kāli̍līle̍ŋ ni᷄ŋ.

²³Mbo̍ kūā mbo̍ kɔ̍ cha᷅l Na̍a̍sa̍lūɛ̄ī chi̍e̍e̍. Mɛ̄ɛ̍ o̍ he̍ī ni᷄ŋ, mi̍ nyɛ̄ wānāa̍ su̍a̍ā le̍ Mɛ̄lɛ̄ka̍ wa̍ ā dīmi̍ a̍ Ki̍li̍tī o̍kɔ̄ɔ̄, wāna̍ Mɛ̄lɛ̄ka̍ chu̍a̍ būŋgɛ̄i̍ māā ō chō vīōmɔ̄ɔ̄ le̍ wāŋnda̍ pīŋīo̍o̍ wo̍, ō yɔ̄nu᷄ŋ. Kāni̍ fo̍ndōle̍, ma̍ dīmī sīndɛ̄ āā, “Ā vēēlū ni̍ŋ ndu̍ āā, ‘Na̍a̍sa̍lūɛ̍i̍nɔ̍ɔ̍.’ ”