Read Southern Kisi Māa̍ti̍u̍ 21 Bible Online

Māa̍ti̍u̍ 21 - Southern Kisi bible

Māa̍ti̍u̍ 21

¹Mɛ̄ɛ̍ Chi̍i̍sū nda̍ bu̍ɛ̍i̍yāā ndūa̍a̍ ā wa̍ fūūlūūwo̍ Chūlu̍sɛ̄lɛ̄m i̍kɛ̍i̍, ma̍ hūŋ o̍ chi̍e̍e̍ pi᷅lɛ̍ dīōla̍ŋ Bɛ̍fe̍ē, o̍ pēmbēi̍ dīōla̍ŋ āā, Pēmbīī Yɔ̄mīī Ɔ̄li̍fīi̍ve̍. Lo̍ŋ nda̍ fūūlu̍u̍ ni̍, mi̍ Chi̍i̍sū vi̍ām bu̍ɛ̍i̍yāā ndūa̍a̍ ā ŋīɔ̍ɔ̍ŋ lāchī.

²Mbo̍ dīmūl nda̍ āā, “Lā kɔ̍ o̍ sɔ̄ndɔ̄kɔ̍lɔ̍ɔ̍ nya̍ lāchī. Tē lā fūūlu̍u̍ dɔ̍ɔ̍ pɛ̍, lā chō sōfɛ̍lɔ̍ɔ̍ kōmāl ō bāā a̍ chūālē ndɔ̄le̍ŋ ndu̍ īkɛ̄i̍. Lā tīmbi̍ mī lā chūu̍ ya̍ nda̍.

³Tē wānā nyu̍na̍ nya̍ pɛ̍, lā dīmu̍l ndu̍ āā, ‘Māsānɔ̄ɔ̍ ō nɔ̄ kpe̍ku̍ a̍ nda̍ āā, Ō chō nda̍ mīŋgī su̍ŋ su̍ŋ.’ ”

⁴He̍ī yɔ̄nu̍ŋ le̍ mī nyɛ̄ wāna̍ su̍a̍ā le̍ Mɛ̄lɛ̄ka̍ wo̍ ō dīmi̍ wo̍ yɔ̄nu̍ŋ. Mbo̍ dīmī āā,

⁵“Lā dīmu̍l wa᷅ŋnda̍ Sa̍a̍yɔ̄ŋ chi̍e̍e̍ āā, ‘Lā tōfa̍ wɔ̍, Māsā nya̍a̍ chō hūnɔ̄ɔ̍ nāa̍ nya̍ chūā. Ō chō wānā tu̍sīa̍ŋ bɛ̍ndū. Ō chō hūnɔ̄ɔ̍ o̍ sōfɛ̍lɔ̍ɔ̍ chōo̍. O̍ sōfɛ̍lɛ̍ fɔ̍ŋndɔ̍ɔ̍ chōo̍ o̍ cho̍ hūnɔ̄ɔ̍ ni̍.’ ”

⁶O̍ ko̍ŋ, mi̍ bu̍ɛ̍i̍yāā ndūa̍a̍ kūā, ma̍ kɔ̍ to̍sā nyɛ̄ Chi̍i̍sū di̍mu̍l nda̍ wo̍.

⁷Ma̍ hūŋ a̍ sōfɛ̍lɔ̍ɔ̍ a̍ chūālē ndɔ̄le̍ŋ. O̍ ko̍ŋ kɔ̍ɔ̍lī, ma̍ pɛ̄ŋgɛ̄lā dōmāla̍ ndāla̍ŋ nda̍ ō lākɔ̄ɔ̄. Mbo̍ hēl, mbo̍ chāl.

⁸Wāŋnda̍ ā wa̍ ndu̍ kɔ̄ɔ̄lī fāŋgā bɛ̍ndōo̍. Ndu̍yɛ̍, mi̍ ā pūm ā pɛ̄ŋgɛ̄lā dōmāla̍ ndāla̍ŋ o̍ nɛ̄ī Chi̍i̍su̍ lāchī. Ndu̍yɛ̍, mi̍ ā pūm ā kīlī lɛ̄ūwo̍ŋ o̍ yɔ̄mnde̍ a̍ pēi̍ ma̍ yɛ̄ɛ̄mbūū o̍ nɛ̄ī le̍ ndu̍ bɛ̄ɛ̄le̍ŋ kīo̍o̍.

⁹Mi̍ fāŋga̍ wa̍ ndu̍ kɔ̄la̍ŋ lāchī wo̍ a̍ ha̍ā ndu̍ kɔ̄ɔ̄lī ma̍ sa̍āŋ dēŋīo̍o̍ chōo̍ cho̍o̍, mā dīmī āā, “Sāŋgālāa̍ chō le̍ nūm, Po̍ Māsāa̍ Dēēvi̍o̍o̍. Nu᷄m hi᷅ŋ ho̍ō sɔ̍ŋgɔ̄ Māsānɔ̄ɔ̍ Mɛ̄lɛ̄ka̍a̍ wo̍, Mɛ̄lɛ̄ka̍ dɔ̄ū nu̍m sa̍lā bɔ̄ɔ̍. Lā ŋ̄ sāŋga̍la᷅ŋ Mɛ̄lɛ̄ka̍.”

¹⁰Mɛ̄ɛ̍ Chi̍i̍sū he̍l Chūlu̍sɛ̄lɛ̄m, mi̍ chi̍o̍o̍ yɔ̄nu᷄ŋ wo̍o̍lūŋ wo̍o̍lūŋ bɛ̄ndū. O̍ ko̍ŋ, mi̍ wāŋnda̍ nyūnā āā, “Ō nɛ̄ɛ̍nɛ̍ cho̍ yɛ̄ ko̍ŋ?”

¹¹Mi̍ wāŋnda̍ o̍ fāŋgāa̍ ho̍ō tɛ̄ɛ̄ŋ ā dīmī āā, “Wāna̍ su̍a̍ā le̍ Mɛ̄lɛ̄ka̍ wo̍ Chi̍i̍sū ho̍ō Na̍a̍sa̍lūɛ̄ī o̍ lɛ̄ŋndē Kāli̍līle̍ŋ ni᷄ŋ, ndu̍ cho̍ ko̍ŋ ni̍.”

¹²O̍ ko̍ŋ kɔ̍ɔ̍lī, mi̍ Chi̍i̍sū lu̍ɛ̍ī o̍ chīɛ̄ī Chu̍ūwa̍ sōlī sa̍lāa̍ wo̍ ni᷄ŋ. Mbo̍ tūāū wānāa̍ wa̍ nyɔ̄ɔ̍ŋ pīīndūūwo̍ wa̍ a̍ wānāa̍ wa̍ pīsīo̍o̍ lēni᷄ŋ nda̍. Mbo̍ nyīīndūū ti̍bīi̍la̍ wānāa̍ wa̍ ka̍ni̍o̍ŋ sīŋgāa̍ wa̍. Mbo̍ nyīīndūū kpe̍ŋgbe̍i̍la̍ wānāa̍ wa̍ ka᷅ŋgbu̍a̍a̍ pīsīo̍o̍ wa̍.

¹³Mbo̍ lō o̍ ko̍ŋ mbo̍ dīmī āā, “Ī chō ī pōōnyīāā o̍ Yāu̍ Mɛ̄lɛ̄ka̍a̍ ni᷄ŋ māā Mɛ̄lɛ̄ka̍ dīmi̍ āā, ‘Wāŋnda̍ vēēlū ni̍ŋ chi̍ɛ̍ī nūu̍ āā, chīɛ̄ī pīɛ̄īyāa̍ Mɛ̄lɛ̄ka̍a̍. Kɛ̍, mi̍ nya̍ sīīŋgu̍u̍ ndu̍ fo̍ndāŋ vīīya̍ vīāŋnūŋ ndo̍.’ ”

¹⁴O̍ ko̍ŋ kɔ̍ɔ̍lī, mi̍ wānāā sūmɛ̍i̍ya̍ hūŋ nāa̍ ndu̍ chu̍a̍. Mbo̍ sīŋgī nda̍. Mbo̍ sīŋgī vɛ̄lɛ̄ wānāā bɛ̄vɛ̍i̍ya̍.

¹⁵Ndu̍yɛ̍, mi̍ wānāā bɛ̄ndūa̍a̍ sōlīāā lāsa̍lāa̍ a̍ wānāa̍ pɛ̍ɛ̍kū wa᷅ŋnda̍ sāwāla̍ Mɛ̄lɛ̄ka̍la̍ŋ nda̍ ā chā wa̍lta̍ kɔ̄ndɔ̄fi̍ltā Chi̍i̍sū to̍sa̍ la̍ŋ. O̍ ko̍ŋ kɔ̍ɔ̍lī, ma̍ tūɛ̄ī chūāāmbūa̍a̍ dēŋīo̍o̍ o̍ chīɛ̄ī Chu̍ūwa̍ sōlī sa̍lāa̍ wo̍ mā dīmī āā, “Sāŋgālāa̍ chō le̍ nūm, Po̍ Māsāa̍ Dēēvi̍o̍o̍.” O̍ ko̍ŋ, mi̍ sūɛ̍i̍ nɛ̄ī wānāā bɛ̄ndūa̍a̍ ha̍ā.

¹⁶Ma̍ lō o̍ ko̍ŋ ma̍ nyūnā Chi̍i̍sū āā vɛ̄ɛ̄, “Ā chō pa̍ di̍ōmndā chūāāmbūa̍a̍ chō dīmīo̍o̍ la̍ŋ tūēīyɔ̄ɔ̍?” Mi̍ Chi̍i̍sū mu̍lī āā, “I̍ cho̍ tūēīyɔ̄ɔ̍.” Mbo̍ nyu̍nā nda̍ āā, “Dīo̍m Mɛ̄lɛ̄ka̍ so̍o̍nu᷄ŋ ho̍ō o̍ Yāu̍ Mɛ̄lɛ̄ka̍a̍ ni᷄ŋ ndo̍, bāā lē pīlɛ̍ bɛ̍ɛ̍ lā tōfa̍ wɔ̍ le̍ni̍ŋ te̍? Dīo̍m Mɛ̄lɛ̄ka̍a̍ dīmi̍ āā, ‘Nūm Mɛ̄lɛ̄ka̍, a̍ to̍sa̍ mi̍ chūāāmbūa̍a̍ a̍ chɛ̄lɛ̄kpi̍a̍a̍ mā sāŋgālā nu̍m.’ ”

¹⁷O̍ ko̍ŋ kɔ̍ɔ̍lī, mi̍ Chi̍i̍sū mɛ̍ī nda̍ mbo̍ fāŋa᷄ŋ Chūlu̍sɛ̄lɛ̄m mbo̍ kūānu᷄ŋ Bɛ̍ta̍nī. Mbo̍ lɔ̄l lo̍ŋ pi̍i̍ nyu̍mmā māŋ.

¹⁸Īdīi̍yo̍ pu̍u̍ŋ, di̍i̍māndɔ̄ɔ̍, mi̍ Chi̍i̍sū cha̍ŋ mi̍i̍ŋgōo̍ Chūlu̍sɛ̄lɛ̄m. Ndu̍yɛ̍, yīa̍a̍ŋ mā wa̍ ndu̍ nɛ̄īyo̍.

¹⁹Mbo̍ chā yɔ̄m fi̍kīi̍yo̍ o̍ nɛ̄īyo̍ da̍ŋga̍la̍. Mbo̍ sēī lēbɛ̄ŋgu̍. Kɛ̍, nyɛ̄ o̍ nyɛ̄ ō sēēlu̍ŋ le̍cho̍o̍ le̍, mɛ̄ɛ̍ pēi̍. O̍ ko̍ŋ, mi̍ Chi̍i̍sū di̍mūl yɔ̄mndo̍ ho̍ō āā, “Nūm fɛ̍ɛ̍ŋ a̍ fɛ̍ɛ̍ŋ a̍ ku᷅m ndɛ̍ le̍.” Mi̍ yɔ̄mndo̍ vēsā lē pīlɛ̍ sɛ̍ɛ̍ŋ.

²⁰Mi̍ bu̍ɛ̍i̍yāā ndūa̍a̍ chā nyɛ̍ yɔ̍nu̍ŋ ndo̍. Mi̍ kɔ̄ndɔ̄fi̍llo̍ bīī nda̍ ta̍u̍. Ma̍ nyūnā āā, “Vɛ̄ɛ̄ yɔ᷅mndo̍ ho̍ō lōōku̍ yɛ̄ vēsā nu̍a̍ā chɔ̍ chɔ̍?”

²¹Mi̍ Chi̍i̍sū mu̍lūl nda̍ āā, “I̍ di̍mūl lɔ̍ nya̍, tē lā nɔ̄ lāāla᷄ŋndo̍ pɛ̍, ndu̍yɛ̍, mī lā kīīsa̍ŋ te̍, lā nɔ̄lā mī lā tōsa̍ nyɛ̄ ya̍ to̍sa̍ a̍ yɔ̄mndo̍ ho̍ō wo̍. Ndu̍yɛ̍, ō fūla̍ wɔ̍ o̍ ko̍ŋ kɔ̍ɔ̍lī, lā nɔ̄lā mī lā dīmu̍l pēmbīī wāā nu̍a̍ā āā, ‘Kɔ̍ mā kɔ̍ de᷅l o̍ pēe̍ mɛ̄ŋmā īhɛ᷄llo̍ ni᷄ŋ,’ ndu̍yɛ̍, ō nɔ̄lā mbō yɔ̄nu̍ŋ.

²²Tē lā nyūna̍ Mɛ̄lɛ̄ka̍ o̍ pīɛ̄īle̍ŋ ni᷄ŋ le̍ nyɛ̄ o̍ nyɛ̄ pɛ̍, ndu̍yɛ̍, mī lā nɔ̄ lāāla᷄ŋndo̍ pɛ̍, tōsāa̍ o̍ to̍sā nyɛ᷅ nya̍ nyūna̍ ko̍ŋ le̍ ndu̍ wo̍ ni̍.”

²³O̍ ko̍ŋ kɔ̍ɔ̍lī, mi̍ Chi̍i̍sū mi̍i̍ŋgū o̍ chīɛ̄ī Chu̍ūwa̍ sōlī sa̍lāa̍ wo̍. Mɛ̄ɛ̍ o̍ wa̍ wāŋnda̍ pɛ̄ɛ̄kōo̍, mi̍ wānāā bɛ̄ndūa̍a̍ so̍lī sa̍lāa̍ le̍ Chu̍ūwa̍ wa̍ a̍ lāŋgba̍ā kālla̍ ā hūŋ nāa̍ ndu̍ chu̍a̍. Ma̍ nyūnā ndu̍ āā, “Di̍ yɛ̄ɛ̍nɛ̍ ŋ̄ nɔ̄ yɛ̄ le̍ sɔ̄ɔ̍ŋ ŋ̄ chō mu᷅ŋ tōsāa̍ wo̍ŋ? Nɛ̄ɛ̍nɛ̍ ke̍ yɛ̄ nu̍m di̍ ko̍ŋ?”

²⁴Mi̍ Chi̍i̍sū di̍mūl nda̍ āā, “Ya̍ bɛ̍ɛ̍ I̍ cho̍ nya̍ nyūnā pīlɛ̍. Tē lā mūlu̍l la̍ nyūnā kōŋ pɛ̍, ya̍ bɛ̍ɛ̍ I̍ chɔ̍m nya̍ di̍ ya̍ nɔ̍ le̍ sɔ̄ɔ̍ŋ mu᷅ŋ tōsāa̍ wo̍.

²⁵Ō nɛ̄ɛ̍nɛ̍ ke̍ yɛ̄ Chɔ᷄ŋ di̍o̍o̍ le̍ wāŋnda̍ yīŋɔ̄ɔ̍ Mɛ̄lɛ̄ka̍a̍? Bāā Mɛ̄lɛ̄ka̍ ni̍, bāā wāŋndā chīe̍e̍ya̍?” Mɛ̄ɛ̍ Chi̍i̍sū nyu̍na̍ nda̍ nyūnāa̍ ho̍ō, mi̍ nda̍ pi̍la̍ kāndū dīōmnda̍ŋ hīŋa᷅ŋndo̍ āā, “Vɛ̄ɛ̄ na̍a̍ ŋ̄ mūli̍ yɛ̍? Kāni̍, tē ŋ̄ dīmi̍ pɛ̍ āā, ‘Mɛ̄lɛ̄ka̍ ke̍ Chɔ᷄ŋ di̍ ko̍ŋ ni̍,’ ō chō na̍a̍ nyūnā āā, ‘Kɛ̍ vɛ᷅ lā lāāla̍ŋ a̍ nyɛ̄ Chɔ᷄ŋ di̍mi̍ wo̍ le̍?’

²⁶Ndu̍yɛ̍, ŋ̄ di̍mī yɛ̍ vɛ̄lɛ̄ māā wāŋndā chīe̍e̍ya̍ le̍ a̍ ke̍ Chɔ᷄ŋ di̍ ko̍ŋ ni̍ le̍, māā ō cho̍ Mɛ̍lɛ̄ka̍ le̍ le̍. Fo̍ndōle̍ sīōōŋnde̍ chō na̍a̍ yɔ̄ŋi̍ fāŋgāa̍ yɔ᷄ŋ na̍a̍ nyɛ̄. Kāni̍, wāŋnda̍ kpo̍u̍ ā lāāla̍ŋ māā wāna̍ su̍a̍ā le̍ Mɛ̄lɛ̄ka̍ wo̍ Chɔ᷄ŋ wa̍ ni̍.”

²⁷O̍ ko̍ŋ, ma̍ mūlūl Chi̍i̍sū āā, “Ŋ̄ si̍nā le̍.” Mi̍ Chi̍i̍sū lo᷅ o̍ ko̍ŋ mbo̍ dīmūl nda̍ āā, “Mɛ̄ɛ̍ ya̍ bɛ̍ɛ̍ I̍ chɔ᷅m nya̍ di̍ ya̍ nɔ̍ le̍ sɔ̄ɔ̍ŋ mu᷅ŋ tōsāa̍ wo̍ le̍.”

²⁸Mi̍ Chi̍i̍sū di̍mūl nda̍ āā, “Lā mūlu̍l lɔ̍ ya̍ nyūnāa̍ ho̍ō. Fi̍nyā pīlɛ̍ wa̍ ni̍, mbo̍ nɔ̄ pūa̍a̍ ā ŋīɔ̍ɔ̍ŋ. Mbo̍ kūā nāa̍ ō tāso̍o̍ chūā. Mbo̍ dīmūl ndu̍ āā, ‘Po̍ nūu̍, kɔ̍ ha̍ū o̍ kpe̍le̍ nūu̍ ni᷄ŋ mā kɔ̍ to̍sāl la̍ wa̍llo̍.’

²⁹Mi̍ pōo̍ ho̍ō kɛ̄ɛ̄. Mbo̍ dīmī āā, ‘I̍ cho̍ la̍kɔ̍ le̍.’ Kɛ̍ o̍ ko̍ŋ kɔ̍ɔ̍lī, mi̍ kɔ̍l ndɔ̄ɔ̍ mūli᷄ŋ, mbo̍ kūā.

³⁰Mi̍ fi̍nyāa̍ ho̍ō kūā vɛ̄lɛ̄ nāa̍ po̍ ndɔ̄ɔ̍ ō pīlɔ̍ɔ̄ chūā. Ndu̍ bɛ̍ɛ̍ mbo̍ dīmūl ndu̍ le̍ mbō kɔ̍ to̍sāl ndu̍ wa̍llo̍ o̍ kpe̍le̍ ndɔ̄ɔ̍ ni᷄ŋ. Mi̍ pōo̍ ho̍ō ndu̍ chɛ᷅l. Mbo̍ dīmī āā, ‘I̍ cho̍ lākɔ̄, kɛ̄kɛ̍.’ Kɛ̍, ō ku̍e̍ le̍.”

³¹Mi̍ Chi̍i̍sū nyu̍nā āā, “Pūa̍a̍ ŋi̍ɔ̍ɔ̍ŋnda̍ ha̍ā, o̍ kūɛ̍ɛ̍nɛ̍ to̍sa̍ yɛ̄ nyɛ̄ fi̍nyā ndɔ̄ hɛ̍na̍ŋ ndo̍?” Ma̍ mūlī āā, “Po̍ tāso̍o̍ ndu̍ to̍sa̍ nyɛ̄ fi̍nyā ndɔ̄ hɛ̍na̍ŋ ndo̍ ni̍.” O̍ ko̍ŋ, mi̍ Chi̍i̍sū dīmūl nda̍ āā, “Mī di̍mu̍l nya̍, kɔ̍sɔ̄ŋnda̍ ni̍ a̍ wāŋ lāāndūa̍a̍ ke̍ī ti̍ɔ̍mɔ̄ɔ̍ wa̍ ā lūɛ̄ī ni̍ŋ o̍ māsāle̍ Mɛ̄lɛ̄ka̍le̍ŋ ni᷄ŋ nya̍ tāse̍.

³²Kāni̍ fu̍u̍le̍, mi̍ Chɔ᷄ŋ Wānā Yi̍ŋāa̍ hūŋ nāa̍ nya̍ wāŋnda̍ I̍sɔ̄lūɛ̄ī chu̍a̍ le̍ mbō chɔ᷄m nya̍ nɛ̄i̍ Mɛ̄lɛ̄ka̍ hɛ̄na̍ŋ nya̍ mī lā wa̍ lēchōo̍ wo̍. Kɛ̍, lā lāāla̍ŋ nyɛ᷅ o̍ di̍mu̍l nya̍ wo̍ le̍. O̍ ko̍ŋ kɔ̍ɔ̍lī, kɔ̍sɔ̄ŋnda̍ ni̍ a̍ wāŋ lāāndūa̍a̍ ke̍ī ti̍ɔ̍mɔ̄ɔ̍ wa̍ mi̍ nda̍ nda̍ lāāla᷄ŋ mi̍ lā chā pɛ̍ɛ̍ŋ. Kɛ̍, o̍ ko̍ŋ ni̍ŋ fa̍ū, lā chɛ᷄l mī lā ma᷄l yɔ̄ŋndā nyāla̍ wɔ̍ɔ̍ŋnda̍ŋ, ndu̍yɛ̍, mī lā lāāla̍ŋ nyɛ᷅ Chɔ᷄ŋ di̍mi̍ wo̍ le̍.”

³³Mi̍ Chi̍i̍sū di̍mī āā, “Lā ya᷄ŋ vɛ̍lɛ̄ nīla̍ŋ ō tāle̍ chēle̍ŋ. Po̍ pi᷅lɛ̍ wa̍ ni̍, mbo̍ tōsā kpe̍lo̍o̍. Mbo̍ tūāl yɔ̄mīī kūāmɛ̄i̍ lēni᷄ŋ. Mɛ̄ɛ̍ o̍ to̍sa̍ kpe̍lo̍o̍ ho̍ō, mbo̍ mūli᷄ŋ mbo̍ tāŋgūl kpākīo̍o̍ a̍ pōūta̍ŋ mbo̍ bɔ̄ŋā ndu̍ nyɛ̄ kɛ̄ndɛ̄ kpɔ̍kɔ̍su̍. Mbo̍ tōōsīāā fo̍ndāŋ nda̍ wa̍a̍yīāā kɔ᷅mnde̍ yɔ̄mnde̍ he̍ī yo̍. Mbo̍ bīī mbo̍ tāŋgūl bāndu̍ vi̍lɛ̄ī kālā ka̍lāa̍ o̍ kpe̍lo̍o̍ ho̍ō ni᷄ŋ le̍ hēlɔ̄ɔ̍ lēchōo̍ le̍ ndu̍ wāa̍ lēhɔ̄l. Chīīyo̍ pa̍ku̍, ma̍ chɛ̄la᷅ŋ nda̍ wāŋnda̍ le̍ mā kōma̍ ma̍ndāl ndu̍ kpe̍le̍ ndɔ̄ɔ̍ ho̍ō. O̍ ko̍ŋ kɔ̍ɔ̍lī, mbo̍ kūānu᷄ŋ o̍ lɛ̄ŋndē chēle̍ŋ ni᷄ŋ.

³⁴Mɛ̄ɛ̍ bōōnde̍i̍ fūūlu̍u̍ le̍ tɔ̄lɔ̄ɔ̍ ho̍ō kēndīo̍o̍, mi̍ wāna̍ tɔ̄lɔ̄ɔ̍ vīām bu̍ɛ̍i̍yāā ndūa̍a̍ nāa̍ wāŋnda̍ ha̍ā chūā le̍ mā ke̍ ndu̍ kɔ̄mnde̍ŋ le̍ ndɔ̍le̍ŋ.

³⁵Kɛ̍, mɛ̄ɛ̍ bu̍ɛ̍īya̍ kūɛ̄, mi̍ wāŋnda̍ ha̍ā bīī nda̍ ma̍ lūāā ō pīlɔ̍ɔ̄. Ma̍ dīī ō pīlɔ̍ɔ̄. Ma̍ lō ō pīlɔ̍ɔ̄ vīīyo̍ a̍ pōūta̍ŋ ma̍ dīī ndu̍.

³⁶O̍ ko̍ŋ kɔ̍ɔ̍lī, mbo̍ vīām bu̍ɛ̍i̍yāā chēle̍ŋ. Nda̍ a̍a̍ hi̍o̍ū bɛ̍ɛ̍ a̍ tāsi̍a̍a̍ wā fāŋgā. Nda̍ bɛ̍ɛ̍ mɛ̄ɛ̍ nda̍ tōsa̍ a̍ ku̍ndā tāso̍o̍ yɛ̍ ko̍ni̍ nda̍ tōsa̍ a̍ nda̍ ni̍.

³⁷O̍ mɛ̄ɛ̄lu̍la̍ŋ kpɔ̍ŋ mbo̍ vīām po̍ ndɔ̍ ndu̍ pi̍la̍a̍. Mbo̍ yīya᷄ŋ māā wāŋnda̍ ha̍ā ā nɔ̄ ni̍ŋ bɛ̍ɛ̄le̍ŋ le̍ po̍ ndɔ̄ɔ̍.

³⁸Kɛ̍, mɛ̄ɛ̍ wānāā o̍ me̍l ha̍ā tɔ̄lɔ̄ɔ̍ wa̍ ā chē po̍ ndɔ̄ɔ̍, ma̍ dīmu̍la᷅ŋ āā, ‘Ho̍ō cho̍ hūnɔ̄ɔ̄ nyɛ̄m ki̍ɔ̍ɔ̍ŋ lōō ni̍. La̍ hu᷄ŋ ŋ̄ dīīnu᷅ŋ ndu̍ mī nyɛ̄m ki̍ɔ̍ɔ̍ŋ ŋ̄ lo̍ mīāl nāā.’

³⁹Ma̍ sōlī ndu̍ o̍ kpe̍le̍ ka̍lāa̍ ni᷄ŋ ma̍ dīī ndu̍.

⁴⁰“Tē wāna̍ tɔ̄lɔ̄ɔ̍ hīŋ pɛ̍, vɛ̄ɛ̍nɛ̍ o̍ to̍sā yɛ̍ a̍ wānāā o̍ me̍l ha̍ā tɔ̄lɔ̄ɔ̍ le̍ māndāa̍ wa̍?”

⁴¹Mi̍ wānāā sōlīāā lāsa̍lāa̍ a̍ lāŋgba̍ā kālla̍ mūlī āā, “Tē wāna̍ tɔ̄lɔ̄ɔ̍ hīŋ pɛ̍, dīūwo̍ o̍ di̍ū wa̍nāā kɔ̄l vēsɛ̍i̍ya̍a̍ ka̍ŋ ni̍. O̍ ko̍ŋ kɔ̍ɔ̍lī, mbō chu̍a̍ kpe̍le̍ ndɔ̄ɔ̍ mbō ke̍ wānāā chēle̍ŋ a̍ nɔ̍lā mā ke̍ ndu̍ kɔ̄mnde̍ŋ a̍ bōōndi̍i̍ nda̍ kēndī tɔ̍lɔ̄ɔ̍ ve̍ wa̍.”

⁴²Mi̍ Chi̍i̍sū nyu̍nā nda̍ āā, “Dīo̍m Mɛ̄lɛ̄ka̍ so̍o̍nu᷄ŋ o̍ Yāu̍ Mɛ̄lɛ̄ka̍a̍ ni᷄ŋ ndo̍, bāā lēpīlɛ̍ bɛ̍ɛ̍ lā tōfa̍ wɔ̍ le̍ni̍ŋ te̍? Mi̍ Yāu̍ Mɛ̄lɛ̄ka̍a̍ dīmī lo̍ŋ māā, pōū wānāā tāŋgūlāa̍ kɛ̄ɛ̍ māā ō ni᷄ŋ te̍ wo̍, ndu̍ si̍mnu᷄ŋ ni᷅ŋ pōū kpe̍e̍kpe̍i̍ sa̍a̍ tāŋgūllo̍ wo̍ ni̍. Māsānɔ̄ɔ̍ Mɛ̄lɛ̄ka̍ ndu̍ to̍sa̍ sūɛ̍i̍ he̍ī ni̍. Ndu̍yɛ̍, he̍ī chō sūɛ̍i̍ kɔ̄ndɔ̄fi̍li̍i̍ bɛ̄ndū na̍a̍ o̍ hɔ̄l.

⁴³“Le̍la̍ŋ, mī di̍mu̍l nya̍, fo̍nda᷄ŋ wa̍ le̍ nya̍ o̍ māsāle̍ Mɛ̄lɛ̄ka̍le̍ŋ ni᷄ŋ ndo̍, Mɛ̄lɛ̄ka̍ chō nya̍ fo̍ndāŋ kōŋ pōōndā o̍ bā. Ō pōōnda̍ pɛ̍, ō ke̍ wānāā chēle̍ŋ a̍ to̍sā ni̍ŋ ka̍ā ndu̍ Mɛ̄lɛ̄ka̍ hɛ̄na̍ŋ ndo̍ wa̍. [

⁴⁴Tē wānā de̍l o̍ pōūwo̍ ho̍ō chōo̍ pɛ̍, ō yīmi̍ nu̍m ŋu̍ɛ̍ ŋu̍ɛ̍. Tē ō de᷄l wānā cho̍o̍ pɛ̍ ō pēsi̍ pe̍si̍ nu̍m wɔ̍ wɔ̍.]”

⁴⁵Mɛ̄ɛ̍ wānāā bɛ̄ndūa̍a̍ so̍lī sa̍lāa̍ o̍ Mɛ̄lɛ̄ka̍ lo̍ wa̍ a̍ lāŋgba̍ā kālla̍ ā tūēī tāle̍ Chi̍i̍sū di̍mi̍ wo̍, ma̍ sīnā māā a̍ nda̍ o̍kɔ̄ɔ̄ o̍ wa̍ sūɛ̍i̍ ni̍.

⁴⁶O̍ ko̍ŋ kɔ̍ɔ̍lī, ma̍ kīndī le̍ ndu̍ bīyɔ̄ɔ̍. Kɛ̍ ndu̍yɛ̍, ma̍ wō fāŋgāa̍. Kāni̍, wāŋnda̍ nda̍ a̍a̍ chu̍a̍ Chi̍i̍sū māā wāna̍ su̍a̍ā le̍ Mɛ̄lɛ̄ka̍ wo̍ o̍ cho̍ ni̍.