Read Southern Kisi Māa̍ti̍u̍ 24 Bible Online

Māa̍ti̍u̍ 24 - Southern Kisi bible

Māa̍ti̍u̍ 24

¹Mɛ̄ɛ̍ Chi̍i̍sū fa̍ŋa̍ŋ o̍ chīɛ̄ī Chu̍ūwa̍ sōlī sa̍lāa̍ wo̍ mbo̍ wā kɔ̄la̍ŋ, mi̍ bu̍ɛ̍i̍yāā ndūa̍a̍ hūŋ nāa̍ ndu̍ chu̍a̍. Ma̍ chɔ̄m ndu̍ tāŋgūltā yɛ̍ yɛ̍la̍ŋ o̍ chīɛ̄ī Chu̍ūwa̍ sōlī sa̍lāa̍ wo̍.

²Mi̍ Chi̍i̍sū di̍mī āā, “Nya̍ bɛ̍ɛ̍ lā tōfa̍ ta̍ŋgūlta̍ŋ nda᷅ŋ. Mi̍ di̍mu̍l nya̍, la᷅ŋ kpo̍u̍ lā chō pīɔ̄l. Pōū tāŋgūlāa̍ ō pīlɛ̍ bɛ̍ɛ̍ lo᷅ ni̍ŋ o̍ chāa̍ŋ ndɔ̄ cho̍o̍ le̍.”

³Mɛ̄ɛ̍ Chi̍i̍sū cha̍l o̍ Pēmbīī Yɔ̄mīī Ɔ̄li̍fīi̍ve̍ chōo̍, mi̍ bu̍ɛ̍i̍yāā ndūa̍a̍ hūŋ nāa̍ ndu̍ chu̍a̍ nda̍ kpe̍e̍le̍. Ma̍ dīmūl ndu̍ āā, “Chɔ̍m ndɔ̍ na̍a̍ bōōndi̍i̍ sɔ̄ɔ̍ŋ mu᷅ŋ ŋ̄ chō hūnɔ̄ɔ̄ yɔ̄nɔ᷄ŋ nde̍. Ndu̍yɛ̍, tāāmāsi̍ yɛ̄ɛ̍nɛ̍ cho̍ yɛ̄ yɔ̄nɔ᷄ŋ le̍ chɔ̄mndo̍ māā bōōndi̍i̍ nu̍m ŋ̄ chō hūnɔ̄ɔ̄ ve̍ chō ni᷅ŋ fūūlūūwo̍? Tāāmāsi̍ yɛ̄ɛ̍nɛ̍ yɔ̍nūŋ yɛ̍ ni̍ŋ le̍ sīnāa̍ māā mɛ̄ɛ̄lu̍la̍ chi̍e̍ēŋndo̍ lā fūūlu̍u̍?”

⁴Mi̍ Chi̍i̍sū mu̍lī āā, “Lā mānda̍ŋ yɔ̄ŋi̍ wānā o̍ wānā hu̍i̍ nya̍ mbō fāŋa̍ nya̍ o̍ nɛ̄i̍ tōnya̍a̍ chōo̍.

⁵Kāni̍, wānāā fāŋgā fa̍ŋgā ā hūŋ ni̍ŋ mā chu̍a̍ dīōlā nīla̍ŋ, mā dīmi̍ māā nda̍ cho̍ Ki̍li̍tī ni̍, wāna̍ Mɛ̄lɛ̄ka̍ chu̍a̍ būŋgɛ̄i̍ māā ō chō vīōmɔ̄ɔ̄ le̍ wāŋnda̍ pīŋīo̍o̍ wo̍. O̍ ko̍ŋ, mā hūi̍ wānāā fāŋgā fa̍ŋgā mā fāŋa̍ nda̍ o̍ nɛ̄i̍ tōnya̍a̍ chōo̍.

⁶Lā tūɛ̄ī ni̍ŋ a̍ chɔ̄ūla̍ŋ o̍kɔ̄ɔ̄ nya̍ īkɛ̄i̍, o̍ ko̍ŋ kɔ̍ɔ̍lī, mī lā tūēī a̍ chɔ̄ūla̍ŋ o̍kɔ̄ɔ̄ la̍nda̍ŋ a̍ nya̍. Kɛ̍ o̍ ko̍ŋ ni̍ŋ kpo̍u̍, lā bu̍u̍la᷄ŋ te̍, kāni̍ fo̍ndōle̍, sɔ̄ɔ̍ŋ mu᷅ŋ nɔ̄ mī ŋ̄ yɔ̄nu̍ŋ. Kɛ̍ mu̍ŋ yɔ̄nu̍ŋ bɛ̍ɛ̍, ko̍ŋ chɔ᷅m ma̍chɔ̍māā māā mɛ̄ɛ̄lu̍la̍ chi̍e̍ēŋndo̍ le̍ la̍ fu̍u̍lu̍u̍ wɔ̄ la̍ŋ te̍.

⁷Māsāa̍ a̍ māsāa̍ ā sɔ̄ŋgā ni̍ŋ, mī lɛ̄ŋnde̍ŋ a̍ lɛ̄ŋnde̍ŋ mā sɔ̄ŋga̍. Ndu̍yɛ̍ o̍ ko̍ŋ kɔ̍ɔ̍lī, mī yīa̍a̍ŋ mā de᷄l bā o̍ bā fe̍e̍ o̍ chi̍e̍ēŋndo̍ chōo̍. Lɛ̄ŋnde̍ŋ lē nyīīyā ni̍ŋ o̍ fo̍ndāŋndā fāŋgā fa̍ŋgā o̍ chi̍e̍ēŋndo̍ chōo̍.

⁸Sɔ̄ɔ̍ŋ mu᷅ŋ kpo̍u̍ ŋ̄ wā ni̍ŋ ma̍wa̍ā nyɛ̄ pālāa̍ kāndɔ᷄ŋndo̍, mɛ̄ɛ̍ pūli̍i̍ vi̍a̍lɛ̄i̍ ī kāndū wa᷅na̍ yo᷄llo̍ nɛ̄īyo̍ sɛ̄nɛ̄ī yɛ̍.

⁹“A̍ bōōndi̍i̍ ke̍ŋ, ā bīī ni̍ŋ nya̍ mā tūsi̍ nya̍ nyɛ̄ pālāa̍ chōo̍ mā dīī nya̍. Ā chō nya̍ yɛ̄le̍ŋ tūl bā o̍ bā fe̍e̍ le̍ mɛ̄ɛ̍ nya̍ lāāla̍ŋ a̍ ya̍ yɛ̍.

¹⁰A̍ bōōndi̍i̍ ke̍ŋ, wāŋnda̍ ta̍u̍ ta̍u̍ a̍ la̍a̍la̍ŋ a̍ ya̍ wa̍, ā māl ni̍ŋ la̍a̍la᷄ŋ nda̍ nɔ̄ wo̍. Ndu̍yɛ̍, nda̍ pi̍la̍ ā pīīsi̍āŋ ni̍ŋ o̍ wāŋnda̍ lo̍, o̍ ko̍ŋ kɔ̍ɔ̍lī, mā tūlna᷅ŋ yɛ᷅le̍ŋ vēllāa̍ vēllē.

¹¹Wānāā lāchōōwāa̍ ā hūŋ ni̍ŋ mā dīmī māā Mɛ̄lɛ̄ka̍ ve᷅m nda̍ ni̍. Ā chō hūnɔ̄ɔ̄ wānāā fāŋgā fa̍ŋgā hūī mā fāŋa̍ nda̍ o̍ nɛ̄i̍ tōnya̍a̍ chōo̍.

¹²Dɛ̍nɛ̍ wɔ̍ɔ̍ŋndo̍ ō wā ni̍ŋ bɔ̍ɔ̍. Le̍ he̍ī, mī kāālā wāŋnda̍ nɔ̄ le̍ Mɛ̄lɛ̄ka̍ wo̍ ō tōl tōōlō.

¹³Kɛ̍ ndu̍yɛ̍, wānā o̍ wāna̍ hi̍o̍ū lāchī a̍ bīūwɔ᷄ŋndo̍ pɛ̍ ha̍a̍a̍ mbō lo̍ o̍ ko̍ŋ mbō fūūlu̍u̍ o̍ mɛ̄ɛ̄lu̍la̍ŋ pɛ̍, Mɛ̄lɛ̄ka̍ pīŋi̍ ndu̍.

¹⁴Ndu̍yɛ̍, o̍ ko̍ŋ kɔ̍ɔ̍lī, wāŋnda̍ chō yōōŋgū kɛ̄ndɔ̄ɔ̍ ho̍ō dīmī a̍ māsāle̍ Mɛ̄lɛ̄ka̍le̍ŋ o̍kɔ̄ɔ̄ bā o̍ bā fe̍e̍ o̍ chi̍e̍ēŋndo̍ chōo̍, le̍ mī wāŋnda̍ kpo̍u̍ a̍ tu̍e̍ī. Tē ke̍ŋ yɔ̍nu̍ŋ pɛ̍, o̍ ko̍ŋ kɔ̍ɔ̍lī, mɛ̄ɛ̄lu̍la̍ chi̍e̍ēŋndo̍ lā fūūlu̍u̍.”

¹⁵Wāna̍ cho̍ tōfāa̍ o̍ yāu̍wo̍ ho̍ō ni᷄ŋ ndo̍ ō sīna̍ nyɛ᷅ Chi̍i̍sū di̍mi̍ ho̍ō wo̍ pɛ̍ŋgu̍ nyɛ̍ kɛ̄ndɛ̄ kɛ̍ndɛ̍ī. Mi̍ Chi̍i̍sū di̍mī āā, “Lā chā ni̍ŋ mī nyɛ̄ wɔ̄ɔ̍ŋ wɔ̄ɔ̍ŋ bɛ̄ndu̍ tɛ̍ɛ̍mbūū ni̍ŋ chi̍ɛ̍i̍ Mɛ̄lɛ̄ka̍a̍ mbō sōli̍ ndu̍ o̍ ba̍a̍ ni᷄ŋ ndo̍, ō wāna̍ su̍a̍ā le̍ Mɛ̄lɛ̄ka̍ wo̍ Da̍a̍ni̍ɛ̍ɛ̄ so̍ō a̍ ndu̍ o̍kɔ̄ɔ̄ wo̍ mbō si᷄m o̍ chīɛ̍i̍ Mɛ̄lɛ̄ka̍a̍ ni᷄ŋ.

¹⁶Tē he̍ī yɔ̄nu̍ŋ pɛ̍, mɛ̄ɛ̍ wānāa̍ cho̍ o̍ lɛ̄ŋndē Chūdi̍a̍āle̍ŋ ni᷄ŋ nda̍, ā nyāānu̍ŋ o̍ pēmbo᷄ŋ.

¹⁷Ndu̍yɛ̍, a̍ bōōndi̍i̍ ke̍ŋ, wāna̍ cho̍ wā īchāli̍ o̍ chīɛ̄īyo̍ chōo̍ wo̍, tē ō tōl pɛ̍, ō ku̍ā lɛ̄ le̍ nyɛ̄m ndɔ᷄ŋ chūā chīɛ̄ī ni᷄ŋ te̍.

¹⁸Wāna̍ cho̍ wā o̍ chīɛ̍i̍ ni᷄ŋ ndo̍, ō mi̍i̍ŋgū lɛ̄ dōmā che᷅le̍ŋ chūā chi̍e̍e̍ le̍.

¹⁹Nyɛ̄ pālāa̍ wā ni̍ŋ bɔ̍ɔ̍ le̍ wānāā lāyo᷄lla̍ a̍ ko̍msa̍a̍ o̍ pālɛ̍i̍ ke̍ŋ ni᷄ŋ.

²⁰Lā pīɛ̍i̍ Mɛ̍lɛ̄ka̍ yɔ̄ŋi̍ kīlta̍ ka̍lāla̍ŋ lā kōma̍l nya̍ a̍ te̍le̍ŋ sīāltē wɔ̄ɔ̍ŋnde̍ŋ, ɔ̄ɔ̄ yɔ̄ŋi̍ la̍ ko̍ma̍l nya̍ o̍ pāa̍le̍ nāāle̍ pɛ̍ŋgīāāle̍ŋ chōo̍.

²¹Nyɛ̄ pālāa̍ wa᷅ ni̍ŋ te̍le̍ŋ ko̍ŋ ndo̍, vēla᷅ŋ ndɔ̄ bɛ̍ɛ̍ ve᷅ ni̍ŋ te̍. Chɔ̍ŋ bɛ̍ɛ̍ a̍ chi̍e̍ēŋndo̍ kāndɔ᷄ŋndo̍ mbo̍ fūūlūū a̍ pāa̍le̍ hāūle̍ŋ, nyɛ̄ pālāā wāā le̍nde̍ o̍ yɔ̍nu̍ŋ ndɔ̍ le̍. Ndu̍yɛ̍, mbō kūɛ̄ a̍ lāchī vēla᷅ŋ ndɔ̄ ve᷅ lɛ̍ ni̍ŋ te̍.

²²Kɛ̍, Mɛ̄lɛ̄ka̍ fāŋa̍ pālɛ̍i̍ nyɛ̄ pālɛ̄ī kēŋ ī ti᷄ŋ lēchōo̍. Tē ndu̍ o̍o̍ ve̍ ko̍ŋ te̍, wānā o̍ wānā bɛ̍ɛ̍ ve̍ lo᷅ yōōmū le̍. Mɛ̄lɛ̄ka̍ chō pālɛ̍i̍ ke̍ŋ fāŋā lēchōo̍ i̍ ti᷄ŋ le̍ wānāā ndūa̍a̍ o̍ hɛ̍li̍ wa̍.

²³“Wāŋndo̍ ō dīmu̍l nu̍m bɛ̍ɛ̍ āā, ‘Mi̍ che᷄ŋ Ki̍li̍tī na̍nu᷄ŋ, wāna̍ Mɛ̄lɛ̄ka̍ chu̍a̍ būŋgɛ̄i̍ māā ō chō vīōmɔ̄ɔ̄ le̍ wāŋnda̍ pīŋīo̍o̍ wo̍.’ Ɔ̄ɔ̄ mbō dīmi̍ āā, ‘Mi̍ che᷄ŋ ndu̍ ba̍ā nda̍.’ Lā la̍a̍la᷄ŋ a̍ ndu̍ le̍.

²⁴Kāni̍ fo̍ndōle̍, wānāā lāchōōwāa̍ chō hūnɔ̄ɔ̄ tīsā. Ā pūm dīmī ni̍ŋ māā nda̍ cho̍ Ki̍li̍tī ni̍. Mī ā pūm ā dīmi̍ māā wānāa̍ su̍a̍ā le̍ Mɛ̄lɛ̄ka̍ wa̍ nda̍ chō ni̍. Ndu̍yɛ̍, ā tōsā ni̍ŋ ka̍a̍ma̍āla̍ŋ, a̍ sɔ̄ɔ̍ŋ kɔ̄ndɔ̄fi̍llo̍ŋ, le̍ māā tē ā nɔ̄la̍ pɛ̍, ā yɔ᷄ŋ bɛ̍ɛ̍ āā wānāā Mɛ̄lɛ̄ka̍ hɛ̄li̍ wa̍ ni̍ mā hūi̍ nda̍ mā fāŋa̍ nda̍ o̍ nɛ̄i̍ tōnya̍a̍ chōo̍.

²⁵Lā pu̍ɛ̍ɛ̍nu᷄ŋ te̍. Kāni̍, I̍ di̍mu̍l nya̍ a̍ ndi̍ o̍kɔ̄ɔ̄ lɔ̍ɔ̍ pa̍ i̍ yɔ̍nūŋ.

²⁶“Ā yɔ᷄ŋ bɛ̍ɛ̍ mā dīmu̍l nya̍ āā, ‘Ō chō o̍ po̍llo̍ ni᷄ŋ nda̍.’ Lā ku̍ā lo̍ŋ te̍. Ā dīmi̍ bɛ̍ɛ̍ āā, ‘Ō chō chīɛ̄ī ni̍ŋ nda̍.’ Lā la̍a̍la᷄ŋ te̍.

²⁷Mɛ̄ɛ̍ nyɔ̄ɔ̍ tōsā nu̍a̍ā ŋu̍āla̍lɛ̍ī o̍ ha̍la̍ mī pa̍ŋgēlo̍o̍ tīu̍ o̍ ha̍la̍ si̍lɔ̍ yɛ̍, le̍nde̍ hūnɔ̄ɔ̄ wāna̍ nda̍ vēēlū āā, Po̍ Wānā Pɔ̍nɔ̍ɔ̍ wo̍ wā ni̍ŋ ni̍.”

²⁸Mi̍ Chi̍i̍sū hi̍a̍ū lāchī a̍ sūɛ̍i̍ nāa̍ nda̍ chūā o̍ lētāle̍ ni᷄ŋ āā, “Nāa̍ vīsī vīlɛ̍i̍yo̍ wā wa̍ lo̍ŋ yi̍bɛ̍i̍ya̍ wa̍ ā chūūŋgi̍āŋ ni̍.”

²⁹Mi̍ Chi̍i̍sū di̍mī āā, “O̍ pālɛ̍i̍ ke̍ŋ ni᷄ŋ, tē te̍le̍ŋ nyɛ̄ pālāā kōŋ hīōū pɛ̍, o̍ ko̍ŋ kɔ̍ɔ̍lī, nyūmnda̍ŋ mā kūmbū ni̍ŋ pa̍a̍le̍ŋ kpu̍. Pāŋge̍i̍ bɛ̍ɛ̍ mī ī pɛ̄ŋgi̍ dīōndɔ̄ɔ̍. Lōo̍ŋ nɔ̍ dīōndɔ̄ɔ̍ o̍ ha̍la̍ wo̍ŋ mī ŋ̄ fūla̍ mī ŋ̄ dēli̍. Mī kpāāyāla̍ cho̍ chōo̍ la̍ŋ lā hīīlu̍ŋ wo᷅ku̍ wo᷅ku̍ bɛ̍ndū.

³⁰“O̍ ko̍ŋ kɔ̍ɔ̍lī, tē mu̍ŋ yɔ̍nu̍ŋ pɛ̍, tāāmāsi̍o̍o̍ chɔ̄mnu̍ŋ o̍ ha̍la̍ le̍ sīnāa̍ māā wāna̍ nda̍ vēēlū āā, Po̍ Wānā Pɔ̍nɔ̍ɔ̍ wo̍ chɛ᷄ŋ hu̍nɔ̄ɔ̍. Tē he̍ī yɔ̄nu̍ŋ pɛ̍, wāŋnda̍ kpo̍u̍ o̍ chi̍e̍ēŋndo̍ chōo̍ ā chāŋ ni̍ŋ. Ndu̍yɛ̍, o̍ ko̍ŋ wāŋnda̍ kpo̍u̍ mā chē Po̍ Wānā Pɔ̍nɔ̍ɔ̍ mbō chɛ᷄ŋ o̍ ha̍la̍, mbō wa̍ hūnɔ̄ɔ̍ o̍ yu̍mbu̍ yu̍mbo̍o̍ ni᷄ŋ a̍ kpāāyāa̍ a̍ nāŋɔ̄ɔ̄ bɛ̄ndōo̍.

³¹O̍ ko̍ŋ kɔ̍ɔ̍lī, tē bu̍lu̍ bɛ̍ndōo̍ sōō pɛ̍, ō vēm ki̍i̍la̍a̍ ndūa̍a̍ ā kūɛ̄ bā o̍ bā fe̍e̍ o̍ chi̍e̍ēŋndo̍ chōo̍ ā kɔ̍ chu̍u̍ŋgīāā wānāā ndūa̍a̍ o̍ hɛ̍li̍ wa̍.”

³²“Lā pɛ̄ɛ̄ku̍ a̍ yɔ̄m tūālāā nda̍ vēēlū āā, fi̍kīi̍yo̍ wo̍ o̍kɔ̄ɔ̄. Tē lɛ̄ūwūŋ yɔ̄mndo̍ ho̍ō ŋ̄ kāndu̍ dɔ̍ɔ̍ pēī sɛ̍nɛ̄īye̍ sōlīo̍o̍ pɛ̍, lā sīna̍ dɔ̍ɔ̍ māā sīālte̍ŋ lē chō ni᷅ŋ kpɛ̍ɛ̍lūŋ le̍ fūūlūūwo̍.

³³Mɛ̄ɛ̍ le̍nde̍ ko̍ni̍ i̍ cho̍ ni̍. Tē lā chē pɛ̍ mī sɔ̄ɔ̍ŋ mu᷅ŋ ŋ̄ yɔ̄nu̍ŋ, lā sīna̍ dɔ̍ɔ̍ māā te̍le̍ŋndo̍ chō ni᷅ŋ kpɛ̍ɛ̍lūŋ māā ō chō ni᷅ŋ kpɛ̍ɛ̍lūŋ bɛ̄ndū.

³⁴Mī di̍mu̍l nya̍, wānāa̍ cho̍ yōōmū te̍le̍ŋndo̍ ho̍ō wa̍ ā cho̍ chu̍ū wu̍ le̍ ha̍a̍a̍, mī sɔ̄ɔ̍ŋ mu᷅ŋ kpe̍de̍ ŋ̍ yɔ̍nu̍ŋ.

³⁵Ha̍la̍a̍ a̍ chi̍e̍ēŋndo̍ ā fāŋāŋ, kɛ̍, dīōmndā nīla̍ŋ lā fe̍ŋāŋ le̍cho̍o̍ le̍.”

³⁶“Wānā o̍ wānā si̍nā pa̍a̍le̍ wāna̍ nda̍ vēēlū āā, Po̍ Wānā Pɔ̍nɔ̍ɔ̍ wo̍ ō chō hūnɔ̄ɔ̄ le̍, kɛ̄lɛ̄ŋgāā ni᷅ŋ te̍ ha̍vɛ̄i̍ ko̍ŋ. Ki̍i̍la̍a̍ Mɛ̄lɛ̄ka̍a̍ bɛ̍ɛ̍, ā si̍nā le̍. Po̍ Mɛ̄lɛ̄ka̍a̍ pi̍la̍ bɛ̍ɛ̍, ō si̍nā le̍. Mɛ̄lɛ̄ka̍ fi̍nyā nāa̍, ndu̍ pīlɛ̍ kpe̍ si̍nā ni̍.

³⁷Ndu̍yɛ̍, bōōndi̍i̍ No̍wā wa̍ o̍ chi̍e̍ēŋndo̍ chōo̍ ve̍, mɛ̄ɛ̍ wāŋnda̍ ā wa̍ sɔ̄ɔ̍ŋ tōsāa̍ yɛ̍, le̍nde̍ ko̍ni̍ wāŋnda̍ lō ni̍ŋ sɔ̍ɔ̍ŋ tōsāa̍ ni̍ mbō lo̍ o̍ ko̍ŋ mī bōōndi̍i̍ Po̍ Wānā Pɔ̍nɔ̍ɔ̍ ō hūŋ ni̍ŋ nde̍ ī fūūlu̍u̍.

³⁸Ndu̍yɛ̍, le̍nde̍ ko̍ni̍ i̍ wa̍ o̍ pālɛ̍i̍ ke̍ŋ ni᷄ŋ ni̍ lɔ̍ɔ̍ pa̍ pīɔ̄ɔ̄ bɛ̄ndū kōŋ ō sīā, wāŋnda̍ wa̍ di̍o̍la̍ ndā. Wāŋ lāāndūa̍a̍ ā wa̍ pīāāndūa̍a̍ chūa̍a̍, mi̍ pūa̍a̍ bɛ̍ɛ̍ a̍ wa᷅ hīōūwɔ̄ɔ̍ lāchī a̍ lāāndūa̍a̍ pūwɔ̄ɔ̍. Ā lo̍ mu᷅ŋ tōsāa̍ ha̍a̍a̍ mbo̍ fūūlūū a̍ bōōndi̍i̍ No̍wā lu̍ɛ̍ī o̍ dɛ̄ndɛ̄ bɛ̍ndōo̍ ni᷄ŋ nde̍.

³⁹Wāŋnda̍ ha̍ā ā ve̍ kɔ̍l māā pīɔ̄ɔ̄ bɛ̄ndū chō hūnɔ̄ɔ̄ le̍. Mbo̍ lō o̍ ko̍ŋ mi̍ mɛ̄ŋnda̍ŋ mā hūŋ, mi̍ mā hu᷄ŋ di̍ū nda̍ kpo̍u̍. Tē wāna̍ nda̍ vēēlū āā, Po̍ Wānā Pɔ̍nɔ̍ɔ̍ wo̍ ō wa̍ hūnɔ̄ɔ̍ pɛ̍, le̍nde̍ i̍ wa᷅ ni̍ŋ ni̍.

⁴⁰Pūa̍a̍ nda̍ ŋi̍ɔ̍ɔ̍ŋ ā wā ni̍ŋ wa̍llo̍ o̍ chīɛ̍i̍ ni᷄ŋ, mā chu̍a̍ ō pīlɛ̍, mī ō pīlɔ̍ɔ̍ lo̍.

⁴¹Wāŋ lāāndūa̍a̍ nda̍ nda̍ ŋi̍ɔ̍ɔ̍ŋ ā wā ni̍ŋ chu̍o̍o̍ o̍ chīe̍i̍ pi᷅lɛ̍i̍ ni᷄ŋ, mā chu̍a̍ ō pīlɛ̍, mī ō pīlɔ̍ɔ̍ lo̍.

⁴²“Le̍la̍ŋ, lā wa᷅ ā pūɛ̄ya᷄ŋ te̍. Kāni̍ fo̍ndōle̍, lā si̍nā pa̍a̍le̍ Ma̍sānɔ̄ɔ̍ Mɛ̄lɛ̄ka̍ nyāa̍ chō hūnɔ̄ɔ̄ lēchōo̍ le̍ŋ te̍.

⁴³Lā kɛ̄si̍ŋ o̍ lākɔ̄l māā tē wāna̍ chīɛ̄īyo̍ ndu̍ o̍o̍ si̍nā bo̍o̍ndi̍i̍ vīīnɔ̄ɔ̍ wā hu̍nɔ̄ɔ̍ a̍ nyūmnda̍ŋ le̍ ndu̍ chīīmbūūwo̍ ve̍ pɛ̍, ndu̍ o̍o̍ lɔ᷅l bo̍o̍ndi̍i̍ ke̍ŋ te̍. Ndu̍ o̍o̍ lɔ᷅l mī vīīnɔ̄ɔ̍ ndu̍ o̍o̍ hu̍ŋ pi̍ɔ̄l dīō ndɔ̄ɔ̍ mī ndu̍ o̍o̍ chi̍i̍mbu̍u̍ nyɛ̄m ndɔ᷄ŋ te̍. Kɛ̍, wānā si̍nā le̍.

⁴⁴Le̍la̍ŋ, le̍nde̍ nya̍ wa̍ a̍ bɛ̍ɛ̍ndīa̍ŋ ni̍. Kāni̍, bōōndi̍i̍ nya̍ ve᷅ ni̍ŋ wa᷅na̍ nda̍ vēēlū āā, Po̍ Wānā Pɔ̍nɔ̍ɔ̍ wo̍ kɔ̄l te̍ ve̍, bōōndi̍i̍ ke̍ŋ o̍ hu᷅ŋ ni̍ŋ ni̍.”

⁴⁵Mi̍ Chi̍i̍sū hi̍a̍ū lāchī a̍ sūɛ̍i̍. Mbo̍ dīmī āā, “I̍ chɔ᷅m ndɔ̍ nya̍ bu̍ɛ̍i̍ cho̍ sa̍kpō, ndu̍yɛ̍, mbo̍ wā bu̍ɛ̍ī kɔ̄l kālu̍ wo̍, mɛ̄ɛ̍ o̍ nɔ̍ le̍ wāa̍ yɛ̍. Bu̍ɛ̍ī kɔ̄l kālo̍o̍ ndu̍ cho̍ bu̍ɛ̍ī ma̍sānɔ̄ ndɔ̄ɔ̍ hāndū ho̍ō chāāŋāā ndūāā bu̍ɛ̍īya̍ lāchī wo̍ ni̍, le̍ mbō wa̍ nda̍ nyɛ̄ dīāā nda̍ nɔ̄ le̍ sɔ̄lāa̍ wo̍ kīo̍o̍ o̍ te̍le̍ŋ nda̍ nɔ̄ le̍ nyɛ̄ dīa̍a̍ dīo̍o̍ wo̍.”

⁴⁶Mi̍ Chi̍i̍sū hi̍a̍ū lāchī a̍ sūɛ̍i̍ āā, “Tē bu̍ɛ̍īyo̍ ho̍ō ma̍sānɔ̄ ndɔ̄ɔ̍ hīŋ pɛ̍ mbō kōma̍l ndu̍ he̍ī tōsāa̍ pɛ̍, ō wā su̍ɛ̍i̍ kɔ̄l kɛ̄ndɛ̄ bɛ̄ndū le̍ ndu̍.

⁴⁷Mī di̍mu̍l nya̍, tē ma̍sānɔ̄ ndɔ̄ɔ̍ hīŋ pɛ̍, hāndɔ̄ɔ̍ o̍ ha̍ndū bu̍ɛ̍īyo̍ ho̍ō mbō wa̍ nyɛ̄m ndɔ᷄ŋ o̍ nɔ̍ wo̍ŋ kpe̍de̍ la̍chi̍ ni̍.

⁴⁸Kɛ̍, tē bu̍ɛ̍ī kōŋ ō wa̍ bu̍ɛ̍ī wɔ̄ɔ̍ŋ pɛ̍, dīmīo̍o̍ ko̍ni̍ o̍ di̍mī ni̍ āā, ‘Ma̍sānɔ̄ nūu̍ cho̍ ya̍lā hūnɔ̄ɔ̄ le̍.’

⁴⁹O̍ ko̍ŋ, mbō kāndu̍ chāāŋāā ndūāā bu̍ɛ̍īya̍ lɔ̄ɔ̍, ndu̍yɛ̍, mbo̍ kāndu̍ di̍o̍la̍ ndɔ̄ a̍ mūɛ̄īmā ndɔ̄ ko̍lī kōlī nda̍ wānāā kōlāa̍.

⁵⁰Bu̍ɛ̍ī wāā nu̍a̍ā, pāa̍le̍ o̍ ve᷅ ma̍sānɔ̄ ndɔ̄ɔ̍ kɔ̄l le̍ hūnɔ̄ɔ̄ kpo̍so̍ŋ te̍ le̍ŋ, pāa̍le̍ le̍ŋ o̍ ko̍māl ndu̍ ni̍. Bōōndi̍i̍ o̍ wa᷅ ni̍ŋ o̍ pu̍ɛ̍ya᷄ŋ pɔ̍lī ve̍ ma̍sānɔ̄ ndɔ̄ɔ̍ chō ndu̍ kōmāl ni̍.

⁵¹O̍ ko̍ŋ, mī ma̍sānɔ̄ ndɔ̄ɔ̍ bīī ndu̍ mbō kōŋ ndu̍ kōŋɔ̄ɔ̍ pi̍la̍. O̍ ko̍ŋ kɔ̍ɔ̍lī, mbō nyīndū ndu̍ kūmbū pīlɛ̍ nda̍ wānāā sōndō yēēlɛ̍i̍ya̍. Lo̍ŋ nda̍ wā ni̍ŋ ko̍ŋu̍llo̍ ni̍ mā sūām chi᷅ŋndo̍ŋ a̍ nyɛ̄ nɛ̄īyāa̍.”