Read Southern Kisi Māa̍ti̍u̍ 25 Bible Online

Māa̍ti̍u̍ 25 - Southern Kisi bible

Māa̍ti̍u̍ 25

¹Mi̍ Chi̍i̍sū di̍mī āā, “A̍ bōōndi̍i̍ wāna̍ nda̍ vēēlū āā, Po̍ Wānā Pɔ̍nɔ̍ɔ̍ wo̍ ō chō hūnɔ̄ɔ̄ ve̍, nyɛ̍ yɔ̍nūŋ ni̍ŋ o̍ māsāle̍ Mɛ̄lɛ̄ka̍le̍ŋ ni᷄ŋ ndo̍, ō wā ni̍ŋ ma̍wa̍ā mɛ̄ɛ̍ i̍ yɔ̍nu̍ŋ o̍ tālo̍o̍ ho̍ō ni᷄ŋ yɛ̍. Chūāā lāāndūa̍a̍ wa̍ ni̍, ā wa̍ ŋ̄wāŋ tɔ̍. Ma̍ kūā wāna̍ wa̍ hūnɔ̄ɔ̄ la̍nɔ̍ɔ̍ chūa̍a̍ wo̍ bɔ̄ŋāa̍. Wāa̍ kɔ̄la̍ŋ, ma̍ chūā la̍mbūi̍la̍ ndāla̍ŋ.

²Chūāā lāāndūāā ŋ̄wāŋ tɔ̍ wa̍ ha̍ā ā ŋūɛ̍ɛ̍nu̍a̍a̍ nda̍ a̍a̍ ki̍ndu̍ kɔ̍l te̍, ā ŋūɛ̍ɛ̍nu̍a̍a̍ ha̍ā yɛ̍ kɔ̄l kālo̍o̍ pi̍la̍.

³Mɛ̄ɛ̍ ā ŋūɛ̍ɛ̍nu̍a̍a̍ ki̍ndu̍ kɔ̍l te̍ wa̍ ā wa̍ kɔ̄la̍ŋ, ma̍ chūā la̍mbūi̍la̍ŋ, kɛ̍, ā chu̍e̍ chu̍ɛ̍i̍mā chēle̍ŋ le̍ dɔ̄wɔ̄ɔ̍ lēni᷄ŋ te̍.

⁴Kɛ̍, ā kɔ̄l kālu̍a̍a̍ nda̍ nda̍ mɛ̄ɛ̍ nda̍ wa̍ kɔ̄la̍ŋ, ma̍ chūā la̍mbūi̍la̍ ndāla̍ŋ a̍ chūɛ̄īmā chēle̍ŋ o̍ sānīla̍ŋ ni᷄ŋ.

⁵Wāna̍ wa̍ hūnɔ̄ɔ̄ la̍nɔ̍ɔ̍ chūa̍a̍ wo̍ ō yāla̍ hu̍nɔ̄ɔ̄ le̍. O̍ ko̍ŋ, mi̍ lūa̍a̍ŋ mā kāndū nda̍ hūnɔ̄ɔ̄ o̍ hɔ̄l. Nda̍ kpe̍de̍ ma̍ hīāūnu᷄ŋ o̍ lūa̍a̍ŋ.

⁶“A̍ dītɛ̍ɛ̄ŋndo̍ ki̍nɛ̍i̍ mi̍ yōndāa̍ sūāā āā, ‘Mi̍ lā chē mɛ̄ɛ̍ wāna̍ cho̍ la̍nɔ̍ɔ̍ chūa̍a̍ wo̍ hīŋ. Lā kɔ̍ mī lā kɔ̍ ba̍ŋā ndu̍.’

⁷Mi̍ chūāā lāāndūa̍a̍ ha̍ā kpo̍u̍ a̍ ti̍a̍ndū. Tīōndɔ̄ɔ̍, ma̍ bɛ̄ɛ̄ndīāā la̍mbūi̍la̍ ndāla̍ŋ.

⁸Mi̍ a̍ ki̍ndu̍ kɔ̍l te̍ wa̍ lō o̍ ko̍ŋ ma̍ dīmūl ā kɔ̄l kālu̍a̍a̍ āā, ‘La̍mbūi̍la̍ nāāla̍ŋ lā chō nyūmndo̍. Yāndi̍i̍, lā ke̍ na̍a̍ chūɛ̄īya̍ŋ fɔ̍.’

⁹O̍ ko̍ŋ, mi̍ ā kɔ̄l kālu̍a̍a̍ dīmūl nda̍ āā, ‘Ɛ̄ ɛ̍. Mā cho̍ le̍tu̍u̍ le̍, mā ti̍ū na̍a̍ na̍a̍ nya̍ā le̍. Lā kɔ̍ mī lā kɔ̍ pi̍o̍ndū wānāa̍ pi̍sī chu̍ɛ̍īya̍ŋ nda̍ o̍ bā.’

¹⁰Kɛ̍, mɛ̄ɛ̍ nda̍ kūɛ̄ chūɛ̄īya̍ŋ pīōndɔ̄ɔ̄, mi̍ wāna̍ wa̍ la̍nɔ̍ɔ̍ chūa̍a̍ wo̍ kōma̍ hu᷅ŋ. Mi̍ chūāā lāāndūa̍a̍ wa̍ ā bɛ̄ɛ̄ndīa̍ŋ nda̍ lūɛ̄ī nda̍ nda̍ā le̍ nyɛ̄ dīāā nɔ̄ kɛ̍sīa̍a̍ dīo̍o̍. Ma̍ kīndā dīo̍o̍.

¹¹“Te̍le̍ŋ ti̍ŋ hīōūwɔ̄ɔ̍, mi̍ a̍ ku̍ɛ̄ chūɛ̄īya̍ŋ pīōndɔ̄ɔ̍ wa̍ hūŋ. Mɛ̄ɛ̍ nda̍ hīŋ, ma̍ sa̍āŋ ve̍e̍lōo̍ o̍ dīō āā, ‘Fāllo̍, fāllo̍, ku̍mbu̍l na̍a̍ dīo̍o̍ fɔ̍.’

¹²Kɛ̍, mi̍ wāna̍ wa̍ la̍nɔ̍ɔ̍ chūa̍a̍ wo̍ mūlūl nda̍ āā, ‘Mī di̍mu̍l nya̍, I̍ si̍nā nya̍ le̍.’ ”

¹³Mi̍ Chi̍i̍sū mɛ̍ɛ̍lū sīlāa̍ yɔ̄ŋgū āā, “Le̍la̍ŋ, lā wa᷅ ā pūɛ̄ya᷄ŋ te̍. Fo̍ndōle̍, lā si̍nā pa̍a̍le̍ŋ ɔ̄ɔ̄ ha̍vɛ̄i̍ Po̍ Wānā Pɔ̍nɔ̍ɔ̍ chō hūnɔ̄ɔ̄ wo̍ le̍.”

¹⁴Mi̍ Chi̍i̍sū hi̍a̍ū lāchī a̍ sūɛ̍i̍ āā, “A̍ bōōndi̍i̍ ke̍ŋ, ī wā ni̍ŋ ma̍wa̍ā mɛ̄ɛ̍ i̍ yɔ̍nu̍ŋ o̍ tālo̍o̍ ho̍ō ni᷄ŋ yɛ̍. Pōo̍ chɛ̍ŋ ni̍ mbo̍ wā kɔ̄la̍ŋ o̍ kēlāa̍ ni᷄ŋ. Lɔ̍ɔ̍pa̍ o̍ bi̍ī nɛ̍īyo̍, mbo̍ vēēlū bu̍ɛ̍i̍yāā ndūa̍a̍. Mbo̍ hāndū nda̍ nyɛ̄m ndɔ᷄ŋ bōlle̍ŋ.

¹⁵Mbo̍ chūā ka̍ni̍ŋ ŋ̄ko̍o̍līi̍yo̍ŋ[1] ŋ̄ ŋūɛ̍ɛ̍nu̍ mbo̍ kē bu̍ɛ̍īyo̍ ō pīlɔ̍ɔ̄. Mbo̍ kē ō pīlɔ̍ɔ̍ ŋ̄ mūu̍ŋ. Mbo̍ kē ho̍ō ī pīlɛ̍. Mɛ̄ɛ̍ wāŋndo̍ nɔ̄lā wa̍llo̍ a̍ mu̍ŋ yɛ̍, le̍nde̍ o̍ ke̍ ndu̍ ni̍. O̍ ko̍ŋ kɔ̍ɔ̍lī, mbo̍ māl mbo̍ kūā o̍ kēlāa̍ ni᷄ŋ.

¹⁶Mɛ̄ɛ̍ o̍ ku̍ɛ̍nu᷄ŋ, mi̍ bu̍ɛ̍ī nda̍ ke̍ ka̍ni̍ŋ ŋ̄ko̍o̍līi̍yo̍ŋ ŋ̄ ŋūɛ̍ɛ̍nu̍ wo̍ ō kūā lēpīlɛ̍ kpe̍, mbo̍ kɔ̍ ka̍ndū hīŋnɔ᷄ŋndo̍ a̍ mu̍ŋ. Ō lo̍ hīŋnɔ᷄ŋndo̍, mbo̍ sɔ̄lā ka̍ni̍o̍ŋ lēchōo̍ ŋ̄ ŋūɛ̍ɛ̍nu̍.

¹⁷Wāna̍ nda̍ ke̍ ŋ̄ mūu̍ŋ ndo̍ bɛ̍ɛ̍, mbo̍ lō hīŋnɔ᷄ŋndo̍ mbo̍ sɔ̄lā lēchōo̍ ŋ̍ mūu̍ŋ.

¹⁸Kɛ̍, po̍ o̍ ke̍ ka̍ni̍e̍i̍ ī pīlɛ̍ wo̍ ndu̍ ndu̍, kɔ̄la̍ŋ mbo̍ kɔ̍ to̍ū so̍o̍ŋndo̍ mbo̍ vīāŋ nyɛ̄ sɔ̄lāa̍ ma̍sānɔ̄ ndɔ̄ɔ̍ lēni᷄ŋ.

¹⁹“Vīōūwɔ̄ɔ̍ te̍i̍, mi̍ bu̍ɛ̍īya̍ ha̍ā ma̍sānɔ̄ ndāa̍ hūŋ. Mɛ̄ɛ̍ o̍ hi᷅ŋ, mbo̍ vēēlū nda̍ le̍ mā hu᷄ŋ dɔ̍ɔ̍nu᷄ŋ ko̍na̍.

²⁰Mi̍ bu̍ɛ̍ī nda̍ ke̍ ka̍ni̍ŋ ŋ̄ko̍o̍līi̍yo̍ŋ ŋ̄ ŋūɛ̍ɛ̍nu̍ wo̍ ō hūŋ a̍ ka̍ni̍ŋ nda̍ ke̍ ndu̍ wo̍ŋ. Mbo̍ sōlī vɛ̄lɛ̄ ka̍ni̍o̍ŋ ŋ̄ ŋūɛ̍ɛ̍nu̍ mbo̍ hāndū lēchōo̍. Mbo̍ dīmūl ma̍sānɔ̄ ndɔ̄ɔ̍ āā, ‘Fāllo̍, a̍ ke̍ ya̍ ka̍ni̍o̍ŋ ŋ̄ ŋūɛ̍ɛ̍nu̍. Kɛ̍ I̍ sɔ̍la̍ lēchōo̍ ŋ̍ ŋu̍ɛ̍ɛ̍nu̍. Ā chē mu̍ŋ.’

²¹Mi̍ ma̍sānɔ̄ ndɔ̄ɔ̍ yīl ndu̍ āā, ‘Ni̍wa̍li̍. Ā chō bɔ̄ɔ̍ bu̍ɛ̍ī kɛ̄ndɛ̄, ndu̍yɛ̍, ā chō sa̍na̍a̍. Mɛ̄ɛ̍ ŋ̄ chō nu̍a̍ā sa̍na̍a̍ o̍ nyɛ̄m pɔ̄mbɔ᷄ŋ chōo̍ yɛ̍, I̍ cho̍ nu̍m hāndɔ̄ɔ̄ nyɛ̄m bānā ba̍na᷄ŋ bōlle̍ŋ. Sɔ̍ɔ̍ŋgu̍u̍ ni̍ko̍ ŋ̄ tōsa᷅ŋ kɔ̄l kɛ̄ndɔ̄ɔ̍ lātūlu̍.’

²²O̍ ko̍ŋ kɔ̍ɔ̍lī, mi̍ bu̍ɛ̍ī nda̍ ke̍ ŋ̄ mūu̍ŋ ndo̍ ndu̍ bɛ̍ɛ̍ mbo̍ hu̍ŋ a̍ ka̍ni̍ŋ nda̍ ke̍ ndu̍ wo̍ŋ. Mbo̍ sōlī vɛ̄lɛ̄ ka̍ni̍o̍ŋ ŋ̄ mūu̍ŋ mbo̍ hāndū lēchōo̍. Mbo̍ dīmūl ma̍sānɔ̄ ndɔ̄ɔ̍ āā, ‘Fāllo̍, a̍ ke̍ ya̍ ka̍ni̍o̍ŋ ŋ̄ mūu̍ŋ. Kɛ̍, I̍ sɔ̍la̍ lēchōo̍ ŋ̍ mūu̍ŋ. Ā chē mu̍ŋ.’

²³Mi̍ ma̍sānɔ̄ ndɔ̄ɔ̍ yīl ndu̍ āā, ‘Ni̍wa̍li̍. Ā chō bɔ̄ɔ̍ bu̍ɛ̍ī kɛ̄ndɛ̄, ndu̍yɛ̍, ā chō sa̍na̍a̍. Mɛ̄ɛ̍ ŋ̄ chō nu̍a̍ā sa̍na̍a̍ o̍ nyɛ̄m pɔ̄mbɔ᷄ŋ chōo̍ yɛ̍, I̍ cho̍ nu̍m hāndɔ̄ɔ̄ nyɛ̄m bānā ba̍na᷄ŋ bōlle̍ŋ. Hu̍ŋ ni̍ko̍ ŋ̄ tōsa᷅ŋ kɔ̄l kɛ̄ndɔ̄ɔ̍ lātūlu̍.’

²⁴O̍ ko̍ŋ kɔ̍ɔ̍lī, mi̍ bu̍ɛ̍i̍ nda̍ ke̍ ka̍ni̍e̍i̍ ī pīlɛ̍ wo̍, ndu̍ bɛ̍ɛ̍ mbo̍ hūŋ. Hūnɔ̄ɔ̍, mbo̍ dīmūl ma̍sānɔ̄ ndɔ̄ɔ̍ āā, ‘Fāllo̍, i̍ si̍nā māā wānā ka̍lā ka̍lā bɛ̄ndū ŋ̄ chō ni̍. Tɔ̄lɔ̄ɔ̄ ŋ̄ to᷅l te̍ wo̍, ndu̍ ŋ̄ kēndī a̍ ka̍ka̍ ni̍. Chīɛ̍i̍ cho̍ chi̍ɛ̍ī nūm te̍ ve̍, ndi̍ ŋ̄ kūāū a̍ ka̍ka̍ ni̍.

²⁵Sīōōŋnde̍ ī wa̍ ya̍. Le̍ he̍ī, mi̍ tu̍a̍ū so̍o̍ŋndo̍ mi̍ vi̍āŋ nyɛ̄ sɔ̄lāā nūmndo̍ lēni᷄ŋ.’

²⁶Mi̍ ma̍sānɔ̄ ndɔ̄ɔ̍ lō o̍ ko̍ŋ mbo̍ dīmūl ndu̍ āā, ‘Nūm bu̍ɛ̍ī kɔ̄l vēsɛ̍i̍ bɛ̍ndū ŋ̄ chō ni̍. Ndu̍yɛ̍, ā chō wāna̍ sīɛ̄lɛ̍i̍ bɛ̍ndū. Ā sīnā pa̍ cha̍la̍ŋ māā tɔ̄lɔ̄ɔ̄ ya̍ I̍ to᷅l tē wo̍ māā ndu̍ ya̍ ke̍ndī a̍ ka̍ka̍ ni̍, ndu̍yɛ̍ māā chīɛ̍i̍ cho̍ chi̍ɛ̍ī ni̍ le̍ ve̍, ndi̍ ya̍ I̍ ku̍a̍ū a̍ ka̍ka̍ ni̍.

²⁷Vɛ᷅ ni᷅ŋ a̍ do̍u̍ nyɛ̍ nī sɔ̍lāa̍ nāa̍ nda̍ māndā nyɛ̍ sɔ̄lāa̍ wa̍ le̍? Tē lo̍ŋ ko̍ni̍ nūm o̍o̍ dɔ̍ū ni̍, mɛ̄ɛ̍ ya̍ i̍i̍ hi᷅ŋ nu̍a̍ā yɛ̍, chūa̍a̍ ko̍ni̍ ya̍ i̍i̍ chu̍ā ni᷅ŋ mu̍ŋ a̍ ba̍na̍sīi̍yo̍ lēchōo̍ ni̍.’

²⁸Mi̍ ma̍sānɔ̄ ndɔ̄ɔ̍ dīmūl bu̍ɛ̍īya̍ ā pīli̍a̍ā āā, ‘Lā pūu̍ ndu̍ nyɛ̄ sɔ̄lāā kōŋ o̍ bā, mī lā ke̍ wāna̍ nɔ̍ ho̍ō ka̍ni̍ŋ ŋ̄ko̍o̍līi̍yo̍ŋ tɔ̍ wo̍.

²⁹Kāni̍, wānā o̍ wāna̍ nɔ̍ o̍ bā Mɛ̄lɛ̄ka̍ chō ndu̍ chɔ̄ɔ̄lū kē mbō sɔ̄la̍ ta̍u̍ ta̍u̍. Kɛ̍, wāna̍ nɔ̍ o̍ bā le̍ wo̍, ō pɔ̄mbɔ̄ o̍ nɔ̍ o̍ bā wo̍ bɛ̍ɛ̍, Mɛ̄lɛ̄ka̍ chō ndu̍ pōōndā o̍ bā.

³⁰Lāŋu̍nɔ̄ fo̍ndōo̍ ho̍ō ndu̍ ndu̍, lā vīo̍u̍ ndu̍ o̍ fo̍ndāŋ nyɛ̄ pālāa̍ nāa̍ Mɛ̄lɛ̄ka̍ dūāū wa̍nāā yɔ̄ŋ wɔ̄ɔ̍ŋnda̍ wa̍. Lo̍ŋ wāŋnda̍ chō wā kōŋu̍llo̍ ni̍ mā sūām chi᷅ŋndo̍ŋ a̍ nyɛ̄ nɛ̄īyāa̍.’ ”

³¹“Tē wāna̍ nda̍ vēēlū āā, Po̍ Wānā Pɔ̍nɔ̍ɔ̍ wo̍ hīŋ hūnɔ̄ɔ̄ lēmāsāa̍ lātūlu̍ a̍ ki̍i̍la̍a̍ Mɛ̄lɛ̄ka̍a̍ kpo̍u̍ pɛ̍, ō chō hūnɔ̄ɔ̄ īchāli̍ o̍ kpe̍ŋgbe̍i̍ ndɔ̍ lēmāsā kɛ̄ndɛ̄ bɛ̄ndōo̍ chōo̍.

³²O̍ ko̍ŋ, mī ki̍i̍la̍a̍ Mɛ̄lɛ̄ka̍a̍ chūūŋgi̍a̍a̍ wāŋnda̍ kpo̍u̍ o̍ chi̍e̍ēŋndo̍ ni᷄ŋ ndu̍ o̍ hɔ̄l. Tē ā chūūŋgi̍a̍a̍ nda̍ nāa̍ pi᷅lɛ̍ pɛ̍, ō lo̍ o̍ ko̍ŋ ō pīɔ̍u̍ nda̍ tɛ̄ɛ̄ŋ, mɛ̄ɛ̍ wānā ma̍ndāā lāsāa̍ pīɔ̄ū sa̍a̍ a̍ chūīŋnda̍ tɛ̄ɛ̄ŋ yɛ̍.

³³Wānāā sa̍kpūa̍a̍ ki̍nɛ̍i̍ mbō hīvi̍ nda̍ o̍ bā ndɔ̄ kɛ̍ndɔ̄ɔ̍ chōo̍. Mbō hīvi̍ ā tūa̍a̍ o̍ bā ndɔ̄ mi̍āllo̍ chōo̍.

³⁴O̍ ko̍ŋ, mī Māsā bɛ̍ndōo̍ dīmu̍l wāŋnda̍ o̍ bā ndɔ̄ kɛ̍ndɔ̄ɔ̍ chōo̍ āā, ‘Lā hu᷄ŋ. Nya̍ Fi̍nyā nūu̍ dɔ̄ū sa̍lā ni̍. Lā hu᷄ŋ mī lā hu᷄ŋ wa᷅ o̍ māsāle̍ ndɔ̄le̍ŋ bɛ̄ŋgu̍, māsāle̍ o̍ bɛ̍ɛ̍ndi̍a̍a̍ le̍ nya̍ bōōndi̍i̍ o̍ to̍sa̍ chi̍e̍ēŋndo̍ ve̍.

³⁵Kāni̍ fo̍ndōle̍, I̍ wa̍ a̍ yīa̍a̍ŋ, mi̍ lā kē ya̍ nyɛ̄ dīa̍a̍. I̍ wa̍ a̍ bo̍lōlā vēsɛ̍i̍la̍ŋ, mi̍ lā kē ya̍ mɛ̄ŋnda̍ŋ. I̍ wa̍ mīāllo̍ nya̍ tɛ̄ɛ̄ŋ, mi̍ lā yīyā ya̍.

³⁶I̍ wa̍ a̍ fɛ̍li̍o̍o̍, mī lā kē ya̍ nyɛ̄ chūɛ̄ɛ̄na᷄ŋndo̍. I̍ wa̍ a̍ nāa̍, mi̍ lā māndā ya̍. I̍ wa̍ o̍ chīɛ̄ī mānyūmndo̍ ni᷄ŋ, mi̍ lā mālā ya̍.’

³⁷O̍ ko̍ŋ, mī wānāā sa̍kpūa̍a̍ lo̍ lo̍ŋ mā nyūna̍ ndu̍ āā, ‘Māsānɔ̄ɔ̍ Mɛ̄lɛ̄ka̍, lɔ̍ɔ̍ kūɛ̍ɛ̍nɛ̍ na̍a̍ ŋ̄ chē yɛ̄ nu̍m a̍ yīa̍a̍ŋ mi̍ ŋ̄ kē nu̍m nyɛ̄ dīa̍a̍? Kɛ̄lɛ̄ŋgāā mi̍ ŋ̄ chā nu̍m a̍ bo̍lōlā vēsɛ̍i̍la̍ŋ mi̍ ŋ̄ kē nu̍m ma̍ kōl?

³⁸Ɔ̍ɔ̄ te̍le̍ŋ ŋ̄ wa̍ mīāllo̍ mi̍ ŋ̄ yīyā nu̍m ndo̍? Kɛ̄lɛ̄ŋgāā ma̍ wā a̍ fɛ̍li̍o̍o̍ mi̍ ŋ̄ kē nu̍m nyɛ̄ chūɛ̄ɛ̄na᷄ŋndo̍ wo̍?

³⁹Te̍le̍ŋ kūɛ̍ɛ̍nɛ̍ na̍a̍ ŋ̄ chē yɛ̄ nu̍m a̍ nāa̍, kɛ̄lɛ̄ŋgāā ma̍ wā o̍ chīɛ̄ī mānyūmndo̍ ni᷄ŋ mi̍ ŋ̄ mālā nu̍m?’

⁴⁰O̍ ko̍ŋ, mī Māsā bɛ̍ndōo̍ lo̍ o̍ ko̍ŋ mbō mūli̍ āā, ‘Mī di̍mu̍l nya̍, pɔ̄mbūāā nīa̍a̍ cho̍ ha̍ā wāŋnda̍ o̍ hɔ̄l māā wānāā fo̍ndō fu̍u̍ wa̍, nyɛ̄ o̍ nyɛ̄ lā tōsa̍l nda̍ pɛ̍, mɛ̄ɛ̍ ya̍ nya̍ tōsa̍l ni̍.’

⁴¹“O̍ ko̍ŋ kɔ̍ɔ̍lī, mbō dīmu̍l wānāa̍ cho̍ o̍ bā ndɔ̄ mi̍āllo̍ chōo̍ wa̍ āā, ‘Lā fāŋa̍ŋ ya̍ na̍nu᷄ŋ. Nya̍ bɛ̍nda̍ le̍ mī Mɛ̄lɛ̄ka̍ tūsi̍ nya̍ nyɛ̄ pālāa̍ chōo̍ ni̍. Lā kɔ̍ o̍ fo̍ndāŋ yīŋnde̍ŋ lē chō wā sānde̍i̍ le̍ fɛ̍ɛ̍ŋ a̍ fɛ̍ɛ̍ŋ ndo̍, nāa̍ Mɛ̄lɛ̄ka̍ bɛ̄ɛ̄ndi̍a̍a̍ le̍ māsa̍ nyi̍nāā wɔ̄ɔ̍ŋnda̍ nda̍ ki̍i̍la̍a̍ ndūa̍a̍ mā wa̍ wa̍.

⁴²Kāni̍, I̍ wa̍ a̍ yīa̍a̍ŋ, kɛ̍ lā ke̍ ya̍ nyɛ̄ dīāā le̍. I̍ wa̍ a̍ bo̍lōlā vēsɛ̍i̍la̍ŋ, kɛ̍ lā ke̍ ya̍ māmɛ̄ŋ te̍.

⁴³I̍ wa̍ mīāllo̍ nya̍ tɛ̄ɛ̄ŋ, kɛ̍ lā yīya̍ ya̍ le̍. I̍ wa̍ a̍ fɛ̍li̍o̍o̍, kɛ̍, lā ke̍ ya̍ nyɛ̄ chūɛ̄ɛ̄na᷄ŋ te̍. I̍ wa̍ a̍ nāa̍, ndu̍yɛ̍, mi̍ wa᷅ o̍ chīɛ̄ī mānyūmndo̍ ni᷄ŋ, kɛ̍ lā māla̍ ya̍ le̍.’

⁴⁴O̍ ko̍ŋ, nda̍ bɛ̍ɛ̍ mā nyūna̍ ndu̍ āā, ‘Māsānɔ̄ɔ̍ Mɛ̄lɛ̄ka̍, ɔ̍ɔ̄ te̍le̍ŋ na̍a̍ ŋ̄ chē nu̍m a̍ yīa̍a̍ŋ, kɛ̄lɛ̄ŋgāā ma̍ wā a̍ bo̍lōlā vēsɛ̍i̍la̍ŋ, kɛ̄lɛ̄ŋgāā ma̍ wā mīāllo̍, kɛ̄lɛ̄ŋgāā ma̍ wā a̍ fɛ̍li̍o̍o̍, kɛ̄lɛ̄ŋgāā ma̍ wā a̍ nāa̍, ɔ̄ɔ̄ ma̍ wā o̍ chīɛ̄ī mānyūmndo̍ ni᷄ŋ, ŋ̄ māla̍ nu̍m te̍ wo̍?’

⁴⁵O̍ ko̍ŋ mī Māsānɔ̄ɔ̍ ho̍ō mūlu̍l nda̍ āā, ‘Mī di̍mu̍l nya̍, tē ō wa̍ pɛ̍, pɔ̄mbūāā nīa̍a̍ cho̍ ha̍ā wāŋnda̍ o̍ hɔ̄l māā wānāā fo̍ndō fu̍u̍ wa̍ mī lā kɛ̄ɛ̍ le̍ nda̍ mālāa̍ pɛ̍, mɛ̄ɛ̍ ya̍ nya̍ kɛ̄ɛ̍ ko̍ŋ le̍ mālāa̍ ni̍.’

⁴⁶O̍ ko̍ŋ kɔ̍ɔ̍lī, mī wānāa̍ cho̍ Māsānɔ̄ɔ̍ ho̍ō o̍ bā mīāllo̍ chōo̍ wa̍, ā kūɛ̄ o̍ nyɛ̄ pālāā fɛ̍ɛ̍ŋ fɛ̍ɛ̍ŋndo̍ ni᷄ŋ. Kɛ̍, wānāa̍ cho̍ sa̍kpō Mɛ̄lɛ̄ka̍ o̍ hɔ̄l la̍, nda̍ nda̍ mā sɔ̄la̍ yōōmū kpe̍e̍kpe̍i̍yo̍ o̍ nɔ̍ la̍mɛ̍ɛ̍lu̍ le̍ wo̍.”