Read Southern Kisi Māa̍ti̍u̍ 26 Bible Online

Māa̍ti̍u̍ 26 - Southern Kisi bible

Māa̍ti̍u̍ 26

¹Mɛ̄ɛ̍ Chi̍i̍sū chi̍i̍ dīōmnda̍ŋ nda᷅ŋ dīmī kpo̍u̍, mbo̍ dīmūl bu̍ɛ̍i̍yāā ndūa̍a̍ āā,

²“Lā sīnā māā ō lo̍ ni᷅ŋ pālɛ̍i̍ ī ŋīi̍ŋ le̍ mī bɔ̄ŋa᷅ŋ lōōna᷄ŋndo̍ a̍ hīōūwɔ̄ɔ̍ chōo̍ o̍kɔ̄ɔ̄ ō fūūlu̍u̍. A̍ bōōndi̍i̍ ke̍ŋ, ā māl ni̍ŋ wa᷅na̍ nda̍ vēēlū āā, Po̍ Wānā Pɔ̍nɔ̍ɔ̍ wo̍ wāŋnda̍ o̍ bā le̍ mā ba᷄ŋ ndu̍ o̍ yɔ̄m sīŋgāfīlāa̍ chōo̍ mā dīī ndu̍.”

³O̍ ko̍ŋ kɔ̍ɔ̍lī, mi̍ wānāā bɛ̄ndūa̍a̍ sōlīāā lāsa̍lāa̍ a̍ lāŋgba̍ā kālla̍ kūā ma̍ kɔ̍ bi̍ī bɔ̄ŋa᷅ŋndo̍ o̍ chīɛ̄ī māsa̍ wānāā sōlīāā lāsa̍lāa̍, dīōla̍ŋ āā, Ka̍ya̍fāā.

⁴Ma̍ kɛ̄ɛ̄sīāā le̍ Chi̍i̍su̍ bīyɔ̄ɔ̍ sɔ̍ɔ̍ sɔ̍ɔ̍ wāŋnda̍ si̍nā a̍ ndi̍ o̍kɔ̄ɔ̄ le̍, o̍ ko̍ŋ kɔ̍ɔ̍lī, mī nda̍ a̍a̍ di̍ī ndu̍.

⁵Ma̍ dīmī āā, “Kɛ̍, ŋ̄ to̍sāŋ sūɛ̍i̍ he̍ī a̍ te̍le̍ŋ bɔ̄ŋa᷅ŋ lōōna᷄ŋndo̍ ho̍ō le̍. Tē ŋ̄ tōsa̍ ndi̍ a̍ bōōnde̍i̍ he̍ī pɛ̍, wāŋnda̍ chō sɔ̍ŋgɔ̄ɔ̍ mālɔ̄ɔ̄.”

⁶Bōōndi̍i̍ pi᷅lɛ̍, Chi̍i̍sū wa̍ Bɛ̍ta̍nī chi̍e̍e̍ o̍ chīɛ̍i̍ Sa̍i̍mɔ̄ŋndo̍, ō ndu̍ o̍o̍ nɔ̍ pāāndū nāā wɔ̄ɔ̍ŋndo̍ ō pūm lēkɔ̄ɔ̍ wo̍.

⁷Mɛ̄ɛ̍ o̍ wa̍ īchāli̍ nyɛ̍ dīa̍a̍ dīo̍o̍, mi̍ chūā pīlɛ̍ hūŋ a̍ si̍ɛ̍ndīi̍ma̍ ba̍ā kālā ka̍lā mā pūm o̍ sānī pu̍m ni᷄ŋ māā bāābɔ̍ɔ̍ŋ. Hūnɔ̄ɔ̍ a̍ ma̍ŋ mbo̍ tālā ma̍ŋ Chi̍i̍sū o̍ lēbōl.

⁸Mɛ̄ɛ̍ bu̍ɛ̍i̍yāa̍ Chi̍i̍sūa̍a̍ chē nyɛ̄ chūa̍a̍ ho̍ō tōsa̍ wo̍, mi̍ sūɛ̍i̍ nɛ̄ī nda̍. Ma̍ dīmī āā, “Nu̍a̍ wɔ̍ nyɛ̍ tɛ̄ɛ̄mbāā.

⁹Wānā ndu̍ o̍o̍ pi̍sī si̍ɛ̍ndīi̍ya̍ŋ ma᷅ŋ a̍ nyɛ̄ sɔ̄lāā bānā ba̍na̍ mī wānā ndu̍ o̍o̍ ke̍ wānāā tāmbɛ̍i̍ya̍ ka̍ni̍ŋ mu̍ŋ.”

¹⁰O̍ ko̍ŋ kɔ̍ɔ̍lī, mi̍ Chi̍i̍sū si̍nā a̍ nyɛ̄ nda̍ wa̍ dīmīo̍o̍ wo̍ o̍kɔ̄ɔ̄. Mbo̍ dīmūl nda̍ āā, “Lā pɛ̍ɛ̍sā chūa̍a̍ ho̍ō le̍. Kāni̍ fu̍u̍le̍, sūɛ̍i̍ kɛ̍ndɛ̄ī bɛ̄ndūe̍i̍ pi̍la̍ o̍ to̍sa̍ a̍ ya̍ ni̍.

¹¹Wānāā tāmbɛ̍i̍ya̍ nda̍ nda̍ chō nya̍ tɛ̄ɛ̄ŋ le̍ lɔ̍ɔ̍ lɔ̍ɔ̍. Kɛ̍, ya̍ I̍ ve᷅ ni̍ŋ nya̍ tɛ̄ɛ̄ŋ lɔ̍ɔ̍ lɔ̍ɔ̍ le̍.

¹²Si̍ɛ̍ndīi̍ma̍ chūa̍a̍ ho̍ō tāla̍ ma᷅ŋ ya̍ chōo̍ wa̍ŋ, ō chō māchūāā dīāllūŋ nu᷄ŋ bɛ̄ɛ̄ndīāā le̍ mu̍ŋ hūnɔ̄ɔ̄ wōūwo̍ o̍ sɛ̄īyo̍ ni᷄ŋ.

¹³Ndu̍yɛ̍, lā sīna̍ pɛ̍ŋgu̍ māā bā o̍ bā fe̍e̍ Yōōŋgū Kɛ̄ndɛ̍ Mɛ̄lɛ̄ka̍a̍ ho̍ō dīmi̍ŋ o̍ chi̍e̍ēŋndo̍ ni᷄ŋ pɛ̍, wāŋnda̍ chō dīmī a̍ nyɛ̄ chūa̍a̍ ho̍ō tōsa̍ wo̍ o̍kɔ̄ɔ̄ le̍ ndu̍ lōōnɔ᷄ŋndo̍.”

¹⁴O̍ pāa̍le̍ pi᷅lɛ̍ lē le̍ŋ chōo̍ kpe̍, mi̍ bu̍ɛ̍i̍yāā ndūāā tɔ̍ a̍ ā ŋīɔ̍ɔ̍ŋnda̍ ō pīlɔ̍ɔ̄ ō nda̍ a̍a̍ ve̍e̍lū āā Chu̍dā Īsīka̍a̍līɔ̄ɔ̄ wo̍, mbo̍ kūā nāa̍ wānāā bɛ̄ndūāā sōlīāā lāsa̍lāa̍ chūā.

¹⁵Mbo̍ kɔ̍ nyu̍nā nda̍ āā, “Tē I̍ ma̍la̍ nya̍ Chi̍i̍su̍ bīyɔ̄ɔ̍ pɛ̍, ō yɛ̄ɛ̍nɛ̍ nya̍ kē yɛ̍ ya̍?” O̍ ko̍ŋ, ma̍ chɔ̄m ka̍ni̍ŋ hu̍mbo᷄ŋ be̍le̍-ya̍a̍ ma̍ kē ndu̍.

¹⁶Chɔ̍ŋ ni᷅ŋ a̍ bōōndi̍i̍ ke̍ŋ, mi̍ Chu̍dā sa̍ā nɛ̄īla̍ŋ nūūvīa̍a̍ le̍ mɛ̄ɛ̍ o̍ lo̍o̍kū mbō tōsa̍ mā tīu̍ Chi̍i̍sū bā yɛ̍.

¹⁷Pāa̍le̍ pi᷅lɛ̍ mi̍ Chi̍i̍sū bu̍ɛ̍i̍yāā ndūa̍a̍ hūŋ nāa̍ ndu̍ chu̍a̍ a̍ nyūnāa̍. Ma̍ nyūnā ndu̍ āā, “Kūɛ̍ɛ̍nɛ̍ na̍a̍ ŋ̄ bɛ̄ɛ̄ndi̍a̍a̍ yɛ̍ le̍ mā dē nyɛ̄ dīāā bɔ̄ŋa᷅ŋ lōōna᷄ŋndo̍ a̍ hīōūwɔ̄ɔ̍ chōo̍ o̍kɔ̄ɔ̄?” Ndu̍yɛ̍, pāa̍le̍ tāse̍le̍ wāŋnda̍ dīā bēe̍dīi̍yo̍ ō nda̍ do̍ū yi̍i̍sīi̍ le̍ wo̍, le̍ŋ le̍ wa̍ le̍ŋ ni̍.

¹⁸Mi̍ Chi̍i̍sū mu̍lī āā, “Lā kɔ̍ chi̍e̍e̍ mī lā kɔ̍ di̍mūl po̍ pi᷅lɛ̍ lo̍ŋ āā, ‘Ti̍chā dīmi̍ āā, Bōōndi̍i̍ nīi̍ fūūlu̍u̍. Ya̍ ni̍ a̍ bu̍ɛ̍i̍yāā nīa̍a̍ o̍ chīɛ̄ī nūmndo̍ na̍a̍ ŋ̄ chō bɔ̄ŋa᷅ŋ lōōna᷄ŋndo̍ bīyɔ̄ɔ̄ a̍ hīōūwɔ̄ɔ̍ chōo̍ o̍kɔ̄ɔ̄ ni̍.’ ”

¹⁹Mi̍ bu̍ɛ̍īya̍ tōsā mɛ̄ɛ̍ Chi̍i̍sū chɔ̍m nda̍ yɛ̍. Ma̍ kūā ma̍ tōōsīāā nyɛ̄ dīāā kōŋ.

²⁰Mɛ̄ɛ̍ nyūmnda̍ŋ mā to᷄l, mi̍ Chi̍i̍sū nda̍ bu̍ɛ̍i̍yāā ndūa̍a̍ chāl nyɛ̄ dīa̍a̍ dīo̍o̍.

²¹Mɛ̄ɛ̍ nda̍ wa̍ nyɛ̄ dīa̍a̍ ho̍ō dīo̍o̍, mbo̍ dīmūl bu̍ɛ̍i̍yāā ndūa̍a̍ āā, “Mī di̍mu̍l nya̍, nya̍ cha̍l ha̍ā wa̍, wānā pi᷅lɛ̍ chō nya̍ tɛ̄ɛ̄ŋ ō chō ya̍ hūnɔ̄ɔ̄ pīsī.”

²²Mi̍ mɔ̍nɛ̍i̍ bīī bu̍ɛ̍i̍yāā ndūa̍a̍ ta̍u̍. Ma̍ kāndū dīmīo̍o̍ ā pīlɛ̍ŋ pi̍lɛ̍ŋnda̍ āā, “Ya̍ ō cho̍ ya̍ le̍, Māsānɔ̄ɔ̍. Ya̍ ō cho̍ ya̍ le̍ Māsānɔ̄ɔ̍.”

²³Mi̍ Chi̍i̍sū di̍mūl nda̍ āā, “Wāna̍ na̍a̍ ŋ̄ dīā nyɛ̍ dīa̍a̍ o̍ hɛ̄ŋgɛ̍i̍ pi᷅lɔ̍ɔ̍ ni᷄ŋ na̍a̍ ndu̍ wo̍, ndu̍ kpe̍e̍kpe̍i̍ cho̍ ya̍ pīsī ni̍.

²⁴Ndu̍yɛ̍, wāna̍ nda̍ vēēlū āā, Po̍ Wānā Pɔ̍nɔ̍ɔ̍ wo̍ nɔ̄ le̍ pīɔ̍mndo̍ sɔ̄lāa̍, mɛ̄ɛ̍ i̍ di̍mi̍ŋ o̍ Yāu̍ Mɛ̄lɛ̄ka̍a̍ ni᷄ŋ māā ō chō wu̍ yɛ̍. Kɛ̍ ndu̍yɛ̍, wāna̍ cho̍ ndu̍ pīsī wo̍, nyɛ̄ pālāa̍ wā ni̍ŋ bɔ̍ɔ̍ le̍ ndu̍. Ndu̍ o̍o̍ na᷅ŋ bɛ̍ɛ̍ māā nda̍ a̍a̍ vi̍a̍lū bɛ̍ɛ̍ wa̍nā ko̍ŋ kpo̍so̍ŋ te̍.”

²⁵Mi̍ Chu̍dā, o̍ wa̍ ndu̍ hūnɔ̄ɔ̄ pīsī wo̍ lō o̍ ko̍ŋ, ndu̍ bɛ̍ɛ̍ mbo̍ dīmī āā, “Ya̍ ō cho̍ ya̍ le̍, Ti̍chā.” Mi̍ Chi̍i̍sū di̍mūl ndu̍ āā, “Nūm kpe̍e̍kpe̍i̍.”

²⁶Mɛ̄ɛ̍ nda̍ wa̍ nyɛ̄ dīa̍a̍ dīo̍o̍, mi̍ Chi̍i̍sū chu̍ā bēe̍dīi̍yo̍. Mbo̍ mēl Mɛ̄lɛ̄ka̍ ba̍li̍ka̍. Mbo̍ yīmī yīmī. Mbo̍ kē bu̍ɛ̍i̍yāā ndūa̍a̍. Mbo̍ dīmūl nda̍ āā, “Lā bīi̍ mī lā dē. Dīāllūŋ nu᷄ŋ cho̍ mu᷅ŋ ni̍.”

²⁷O̍ ko̍ŋ kɔ̍ɔ̍lī, mbo̍ chūā tāālāa̍ mbo̍ mēl Mɛ̄lɛ̄ka̍ ba̍li̍ka̍. Mbo̍ kē nda̍. Mbo̍ dīmūl nda̍ āā, “Nya̍ kpe̍de̍ lā ko᷄l.

²⁸Kōo̍ma̍ nīa̍ŋ ma̍ cho̍ ma᷅ŋ ni̍. A̍ kōo̍ma̍ nīa̍ŋ Mɛ̄lɛ̄ka̍ yīi̍ kpe̍ma̍a̍ nda̍ ŋ̄wāŋndā chīe̍e̍ ni̍. Ma̍ŋ ma̍ ta̍la̍ le̍ wānāā fāŋgā fa̍ŋgā ni̍, le̍ mī Mɛ̄lɛ̄ka̍ ma᷄l nda̍ le̍ yɔ̄ŋndā ndāla̍ wɔ̍ɔ̍ŋnda̍ŋ.

²⁹Mī di̍mu̍l nya̍ tōnya̍a̍, I̍ cho̍ lɛ̍ mūɛ̄īya̍ŋ ma᷅ŋ kōlɔ̄ɔ̄ le̍ ha̍a̍a̍ mbō lo̍ o̍ ko̍ŋ mbō fūūlu̍u̍ a̍ pāa̍le̍ ya̍ I̍ cho̍ mūɛ̄īmā sɛ̄nɛ̄īya̍ŋ kōlɔ̄ɔ̄ na̍a̍ nya̍ā o̍ Māsāle̍ Mɛ̄lɛ̄ka̍ Fi̍nyā nūu̍ le̍ŋ ni᷄ŋ ndo̍.”

³⁰O̍ ko̍ŋ kɔ̍ɔ̍lī, ma̍ sōlī chōndi̍i̍ bɔ̄ŋa᷅ŋ lōōna᷄ŋnde̍ a̍ hīōūwɔ̄ɔ̍ chōo̍ o̍kɔ̄ɔ̄. Ma̍ kūā o̍ Pēmbīī Yɔ̄mīī Ɔ̄li̍fīi̍ve̍ ve̍ chōo̍.

³¹Mi̍ Chi̍i̍sū di̍mūl bu̍ɛ̍i̍yāā ndūa̍a̍ āā, “Chūɛ̄llɛ̄ŋ nya̍ fa̍ū lā chō ya̍ mālɔ̄ɔ̄ mī lā nyāānu̍ŋ. Ka̍ni̍ fo̍ndōle̍, Yāu̍ Mɛ̄lɛ̄ka̍a̍ dīmi̍ āā, ‘I̍ cho̍ wāna̍ cho̍ sāa̍ māndāa̍ wo̍ dīyɔ̄ɔ̄, o̍ ko̍ŋ kɔ̍ɔ̍lī, mī sāā ku̍ndāa̍ ā sāŋnu̍ŋ.’ ”

³²Mi̍ Chi̍i̍sū hi̍a̍ū lāchī a̍ sūɛ̍i̍ āā, “Kɛ̍, tē I̍ mi̍i̍ŋgu̍ yōōmū pɛ̍, I̍ cho̍ lākɔ̄ nya̍ lāchī Kāli̍lī.”

³³Mi̍ Pītɛ̍ di̍mūl Chi̍i̍su̍ āā, “Ā yɔ᷄ŋ bɛ̍ɛ̍ mī bu̍ɛ̍īya̍ ā tūa̍a̍ kpo̍u̍ mā ma᷄l nu̍m mā nyāānu̍ŋ, kɛ̍ ya̍ ya̍, i̍ me᷅l nu̍m te̍.”

³⁴Mi̍ Chi̍i̍sū di̍mūl Pītɛ̍ āā, “Mī di̍mu̍l nu̍m, lɔ̍ɔ̍pa̍ sɔ̄ɔ̍ kōōwā si̍ɔ̍dīi̍ ā chō vīīnɔ᷄ŋ lē yāa̍ māā a̍ si̍nā ya̍ le̍.”

³⁵Mi̍ Pītɛ̍ mu̍lī āā, “Ŋ̄ wū ma̍wu̍a̍ā na̍a̍ nūm, kɛ̍, I̍ vi̍i̍nūŋ māā I̍ si̍nā nu̍m te̍ le̍.” Bu̍ɛ̍īya̍ a̍ pīli̍a̍a̍ kpo̍u̍ nda̍ bɛ̍ɛ̍, mɛ̄ɛ̍ Pītɛ̍ di̍mi̍ yɛ̍, le̍nde̍ ko̍ni̍ nda̍ dīmi̍ ni̍.

³⁶O̍ ko̍ŋ kɔ̍ɔ̍lī, mi̍ Chi̍i̍sū ku̍ā a̍ bu̍ɛ̍i̍yāā ndūa̍a̍ kɔ̄ɔ̄lī o̍ fo̍ndāŋ pīlɛ̍ dīōla̍ŋ āā, Kɛ̄sɛ̍ma̍nī. Mbo̍ dīmūl nda̍ āā, “Lā cha᷄l na̍nū. I̍ cho̍ lākɔ̄ nda̍ mī kɔ̍ pi̍ɛ̍ī Mɛ̄lɛ̄ka̍.”

³⁷Mbo̍ kūā a̍ Pītɛ̍ a̍ pūa̍a̍ ŋi̍ɔ̍ɔ̍ŋāa̍ Sɛ̍bɛ̍dīī. Mi̍ mɔ̍nɛ̍i̍ bɛ̍ndūe̍i̍ pīā o̍ kɔ̄l ndɔ̄ɔ̍ ni᷄ŋ. Mi̍ kɔ̄l ndɔ̄ɔ̍ tāmbū ta̍u̍.

³⁸Mbo̍ lō o̍ ko̍ŋ mbo̍ dīmūl nda̍ āā, “Mɔ̍nɛ̍i̍ cho̍ o̍ kɔ̄l nūu̍ ni᷄ŋ nde̍ ī chō fāŋgā. Ī lō ko̍ mī ī dīī ya̍. Lā lo̍ pɔ̍ɔ̍ na̍nu᷄ŋ, ndu̍yɛ̍, lā wa᷅ ā pūɛ̄ya᷄ŋ te̍.”

³⁹Mɛ̄ɛ̍ o̍ ku̍ɛ̄ ti᷄ŋ lāchī, mbo̍ hīnī lɛ̄ŋ sa̍na̍a̍ a̍ hɔ̄lla̍ ā kūūmbāā lɛ̄ŋ. Mbo̍ pīɛ̄ī Mɛ̄lɛ̄ka̍ āā, “Fi̍nyā nūu̍, tē ī yɔ̄nūŋ pɛ̍, mɛ̄ɛ̍ chɛ᷅l mī I̍ ko̍l a̍ tāāla̍ īmɔ̍nɔ̍ɔ̍ ho̍ō le̍. Kɛ̍ ndu̍yɛ̍, nyɛ̄ ŋ̄ hɛ̄na̍ŋ ndo̍ ndu̍ ŋ̄ tōsa̍ ni̍. Ō cho̍ nyɛ᷅ ya̍ ya̍ hɛ̍nāŋ ndo̍ le̍.”

⁴⁰Mbo̍ mīīŋgū nāa̍ bu̍ɛ̍i̍yāā ndūa̍a̍ chūā. Mīīŋgōo̍, mbo̍ kōmāl nda̍ o̍ mālɔ̄. Mbo̍ nyūnā Pītɛ̍ āā, “Vɛ᷅ lā nɔ̍lā mī lā wa̍ lāhɔ̄l, ndu̍yɛ̍, mī lā wa̍ ā bɛ̄ɛ̄ndīa̍ŋ a̍ ya̍ la̍tu̍lu̍ le̍ ha̍vɛ̄i̍yo̍ ō pīlɛ̍ bɛ̍ɛ̍ le̍?

⁴¹Lā wa᷅ ā pūɛ̄ya᷄ŋ te̍. Ndu̍yɛ̍, lā pīɛ̍i̍ Mɛ̄lɛ̄ka̍ māā tē nyi̍nā wɔ̄ɔ̍ŋndo̍ tɔ̄ɔ̄nda̍ŋ nya̍ pɛ̍, māā lā to̍sā yɔ᷅ŋ wɔ̄ɔ̍ŋ te̍. Lā chō ā chɛ̄lāā le̍ he̍ī tōsāa̍ o̍ kɔ̄lta̍ŋ ni᷄ŋ, kɛ̍, dīāllo̍ŋ mu̍ŋ cho̍ nya̍ ŋ̄ vīlɛ̍i̍ pɛ̍.”

⁴²Mi̍ Chi̍i̍sū ku̍ā vɛ̄lɛ̄ dīi̍ŋ ndɔ̄ɔ̍ mbo̍ pīɛ̄ī Mɛ̄lɛ̄ka̍ āā, “Fi̍nyā nūu̍, tē ō wa̍ pɛ̍ māā a̍ fe̍ŋā ya̍ tāāla̍ īmɔ̍nɔ̍ɔ̍ ho̍ō kūēē le̍, mɛ̄ɛ̍ mī ko̍l a̍ ndu̍, mɛ̄ɛ̍ to̍sa̍ nyɛ᷅ ŋ̄ hɛ̄na̍ŋ ndo̍.”

⁴³Mbo̍ mīīŋgū vɛ̄lɛ̄. Mbo̍ kōmāl nda̍ vɛ̄lɛ̄ o̍ lūa̍a̍ŋ. Le̍ hɔ̄lta̍ŋ kūmbīo̍o̍ bɛ̍ɛ̍, ō wa̍ nda̍ o̍ bā ō kālā.

⁴⁴Mi̍ Chi̍i̍sū mɛ̍ī nda̍ vɛ̄lɛ̄ mbo̍ kūā o̍ yāa̍ ndɔ̄ɔ̍. Mbo̍ kɔ̍ pi̍ɛ̍ī Mɛ̄lɛ̄ka̍ a̍ dīōmndā pīlɛ̍ lā lāŋ dīmīo̍o̍.

⁴⁵O̍ ko̍ŋ kɔ̍ɔ̍lī, mbo̍ mīīŋgū nāa̍ nda̍ chūā. Mbo̍ dīmūl nda̍ āā, “Lā chō wɔ̄ o̍ lūa̍a̍ŋ? Lā chō wɔ̄ pɛ̄ŋgīo̍o̍ kɛ᷅? Lā tōfa̍ wɔ̍. Bōōnde̍i̍ fūūlu̍u̍ le̍ mā ma᷄l wāna̍ nda̍ vēēlū āā Po̍ Wānā Pɔ̍nɔ̍ɔ̍ wo̍ wānāā yɔ̄ŋ wɔ̄ɔ̍ŋnda̍ o̍ bā.

⁴⁶Lā chɔ᷄ŋ ŋ̄ kɔ̄ŋnu᷅ŋ. Ā chē wāna̍ cho̍ ya̍ pīsīo̍o̍ wo̍ hūnɔ̄ɔ̍.”

⁴⁷Chi̍i̍sū lo̍ sūɛ̍i̍ mi̍ bu̍ɛ̍i̍yāā ndūāā tɔ̍ a̍ ā ŋīɔ̍ɔ̍ŋnda̍ ō pīlɔ̍ɔ̍ ndu̍ yɔ̍nūŋ māā Chu̍dā ni̍, mbo̍ hūŋ a̍ wāŋnda̍ fāŋgā bɛ̍ndōo̍. Mɔ̄ɔ̍ŋ wa̍ nda̍ o̍ lābā a̍ yɔ̄mīī bīŋgīe̍i̍. Ndu̍yɛ̍, wānāā bɛ̄ndūa̍a̍ so̍lī sa̍lāa̍ o̍ Mɛ̄lɛ̄ka̍ lo̍ wa̍ a̍ lāŋgba̍ā kālāā Chu̍ūwa̍ nda̍ ve᷅m nda̍ ni̍.

⁴⁸Mi̍ wāna̍ wa̍ Chi̍i̍su̍ pīsīo̍o̍ wo̍ chɔ̄m nda̍ māā tāāmāsi̍ āā, “Tē ŋ̄ kūɛ̄ pɛ̍, wāna̍ ya̍ I̍ cho̍ kɔ̄ma᷄ŋ mī sɔ̍sa̍ ndu̍ kūu̍wo̍ wo̍, mɛ̄ɛ̍ ndu̍ ni̍. Lā bīi̍ ndu̍.”

⁴⁹Mɛ̄ɛ̍ Chu̍dā hi᷅ŋ dɔ̍ɔ̍, mbo̍ kūā sa̍kpō nāa̍ Chi̍i̍sū chu̍a̍. Mbo̍ yīl ndu̍ āā, “Māsānɔ̄ɔ̍, i̍sɛ̄.” Mbo̍ kɔ̄ma᷄ŋ ndu̍ mbo̍ sɔ̄sā ndu̍ kūu̍wo̍.

⁵⁰Mi̍ Chi̍i̍sū mu̍lī āā, “Chāa̍ŋ nūu̍, to̍sa̍ nyɛ᷅ ŋ̄ hīŋ tōsā wo̍.” O̍ ko̍ŋ, mi̍ pūa̍a̍ fūlā ma̍ bīī Chi̍i̍sū. Ma̍ sāā ndu̍ mɔ̍ndɔ̍ mɔ̍ndɔ̍ bɛ̍ndū.

⁵¹Mi̍ wānāa̍ wa̍ Chi̍i̍su̍ kɔ̄ɔ̄lī wa̍ ō pīlɔ̍ɔ̄ nāŋ mūɛ̄ī ndūɛ̍i̍ ya̍ū. Mbo̍ lɔ̄wā chɛ̄ māsa̍ wānāā sōlīāā lāsa̍lāa̍. Mbo̍ kīālū ndu̍ nīle̍ŋ kpa̍li̍.

⁵²Mi̍ Chi̍i̍sū lo᷅ o̍ ko̍ŋ mbo̍ dīmūl ndu̍ āā, “Mi̍ŋgi̍ mu̍ɛ̍ī nūmnde̍ o̍ bōo̍ ni᷄ŋ. Kāni̍ fu̍u̍le̍, wānāa̍ sɔ̍ŋgā a̍ mūɛ̍i̍ ya̍, a̍ mūɛ̍i̍ nda̍ dīī nda̍ ni̍.

⁵³Si̍na̍ pɛ̍ŋgu̍ māā tē I̍ di̍mu̍l Fi̍nyā nūu̍ pɛ̍ le̍ mālāa̍, ō nɔ̄lā mbō māla̍ ya̍. Ō nɔ̄lā mbō yɔ᷄ŋ ki̍i̍la̍a̍ ndūa̍a̍ wāa̍la̍ fa̍ŋgā o̍ lēpīlɛ̍ ni᷄ŋ kpe̍.

⁵⁴Kɛ̍, tē I̍ to̍sa̍ le̍nde̍ pɛ̍, vɛ̄ɛ̍nɛ̍ nyɛ᷅ Yāu̍ Mɛ̄lɛ̄ka̍a̍ dīmi̍ māā ō chō yɔ̄nɔ᷄ŋndo̍ ō yɔ̄nūŋ yɛ̍? Ndu̍yɛ̍, māā nu̍a̍ā Yāu̍ Mɛ̄lɛ̄ka̍a̍ dīmi̍ ni̍ māā ī nɔ̄ le̍ yɔ̄nɔ᷄ŋndo̍.”

⁵⁵A̍ bōōndi̍i̍ ke̍ŋ, mi̍ Chi̍i̍sū di̍mūl fāŋgā ko̍ŋ āā, “Lā vɛ᷅ hūnɔ̄ɔ̍ a̍ mɔ̄ɔ̍ŋ a̍ yɔ̄mīī bīŋgīe̍i̍ le̍ ya̍ bīyɔ̄ɔ̍ mɛ̄ɛ̍ nda̍ yɔ̄ŋ ko̍ āā, vīīnɔ̄ɔ̍ ya̍ cho̍ ni̍? Lēpāa̍ o̍ lēpāa̍ I̍ cho̍ cha᷄lle̍ o̍ chīɛ̄ī na̍a̍ ŋ̄ sōlī sa̍lāa̍ wo̍ ni᷄ŋ mī pɛ̍ɛ̍kū wa᷅ŋnda̍. Lā bīi̍ ya̍ pɛ̄ŋgu̍ ko̍ŋ te̍.

⁵⁶Kɛ̍, he̍ī yɔ̄nu̍ŋ le̍ mī nyɛ̄ wānāa̍ su̍a̍ā le̍ Mɛ̄lɛ̄ka̍ wa̍ ā pōōnyi̍a̍a̍ wo̍ ō yɔ̄nu̍ŋ.” O̍ ko̍ŋ kɔ̍ɔ̍lī, mi̍ Chi̍i̍sū bu̍ɛ̍i̍yāā ndūa̍a̍ kpo̍u̍ a̍ ma᷅l ndu̍ ma̍ nyāānu᷄ŋ.

⁵⁷Mi̍ wānāa̍ bi̍ī Chi̍i̍sū wa̍ kūā a̍ ndu̍ nāa̍ māsa̍ wānāā sōlīāā lāsa̍lāa̍ chūā, dīōla̍ŋ āā, Ka̍ya̍fāā. Wānāa̍ pɛ̍ɛ̍kū wa᷅ŋnda̍ sāwāla̍ Mɛ̄lɛ̄ka̍la̍ŋ nda̍ a̍ lāŋgba̍ā kālla̍ ā wa̍ ā chūūŋgi̍āŋ lo̍ŋ.

⁵⁸Kɔ̄lā nda̍ wa̍ a̍ Chi̍i̍sū la̍ŋ, mi̍ Pītɛ̍ tu̍āl ndu̍ kɔ̄ɔ̄lī, kɛ̍, mbo̍ lōnu᷄ŋ ti̍ŋ kɔ̄ɔ̄lī. Ō lo̍ ndu̍ kɔ̄ɔ̄lī, ma̍ fūūlūū o̍ bɛ̍ɛ̄ chīɛ̄ī wānā bɛ̍ndu̍ so̍lī sa̍lāa̍ o̍ Mɛ̄lɛ̄ka̍ lo̍ wo̍. Pītɛ̍ ndu̍ o̍o̍ hɛ̍na̍ŋ mī ndu̍ o̍o̍ che᷅ nyɛ̄ nda̍ wa̍ Chi̍i̍su̍ yɔ̄ŋ ndo̍. O̍ ko̍ŋ, mbo̍ lūɛ̄ī o̍ bɛ̍ɛ̄ chīɛ̄ī wānā bɛ̍ndōo̍ ho̍ō mbo̍ chāl pūa̍a̍ so̍vɛ̄i̍ya̍ tɛ̄ɛ̄ŋ.

⁵⁹Mi̍ wānāā bɛ̄ndūāā sōlīāā lāsa̍lāa̍ wa̍ a̍ lāŋgba̍ā kālāa̍ ki̍a̍lū ya᷅ma̍ŋ nda̍ kpo̍u̍ a̍ sa̍āŋ nɛ̍īla̍ŋ nūūvīa̍a̍ le̍ Chi̍i̍su̍ sūɛ̍i̍ lāchōōvɛ̄i̍ hōlɔ̄ɔ̍, le̍ hāli̍ kpe̍ŋ mā dīī ndu̍.

⁶⁰Mi̍ se̍i̍yāā lāchōōwāā fāŋgā fa̍ŋgā fūlā ma̍ su̍a̍ā, kɛ̍, ā sēēlu̍ŋ su̍ɛ̍i̍ nda̍ nɔ̄lā mā dīī ndu̍ le̍ ndi̍ le̍. O̍ mɛ̄ɛ̄lu̍la̍ŋ kpɔ̍ŋ, mi̍ se̍īya̍ fūlā ā ŋīɔ̍ɔ̍ŋ.

⁶¹Ma̍ tɛ̄ndā se̍īle̍ŋ āā, “Mi̍ lāŋu̍nɔ̄ɔ̍ ho̍ō dīmī āā, ‘I̍ nɔ̍lā mī I̍ pɛ᷅l chīɛ̍i̍ Mɛ̄lɛ̄ka̍a̍ mī I̍ mi̍ŋgi̍ ndu̍ tāŋgūl o̍ pālɛ̍i̍ ya̍a̍ bɛ̍ŋgu̍.’ ”

⁶²Mi̍ māsa̍ wānāā sōlīāā lāsa̍lāa̍ ō sīm mbo̍ nyūnā Chi̍i̍su̍ āā, “A̍ nɔ̍ di̍ōm o̍ dīōm o̍ sōndō le̍ mūlī le̍? Ī māā vɛ̄ɛ̄ nda̍ chō yɛ̄ he̍ī dīmīo̍o̍ a̍ nūm o̍kɔ̄ɔ̄?”

⁶³Mi̍ Chi̍i̍sū me̍i̍nu᷄ŋ do̍ŋ. Mi̍ māsa̍ wānāā sōlīāā lāsa̍lāa̍ ō lō ko̍ŋ mbo̍ dīmūl vɛ̄lɛ̄ Chi̍i̍su̍ āā, “I̍ hɛ̍na̍ŋ nu̍m mā di̍mu̍l na̍a̍ le̍ Mɛ̄lɛ̄ka̍ bɛ̄ndōo̍, tē nu᷄m cho̍ Ki̍li̍tī ni̍, Po̍ Mɛ̄lɛ̄ka̍a̍, ndu̍ yɔ̍nūŋ ni̍, wāna̍ Mɛ̄lɛ̄ka̍ chu̍a̍ būŋgɛ̄i̍ māā ō chō vīōmɔ̄ɔ̄ le̍ wāŋnda̍ pīŋīo̍o̍ wo̍.”

⁶⁴Mi̍ Chi̍i̍sū mu̍lūl ndu̍ āā, “M̍m̄, nyɛ̄ ŋ̄ dīmi̍ wo̍ chō tōnya̍. Kɛ̍, mī di̍mu̍l nya̍ kpo̍u̍, chɔ̍ŋ a̍ te̍le̍ŋndo̍ ho̍ō lā chō wāna̍ nda̍ vēēlū āā, Po̍ Wānā Pɔ̍nɔ̍ɔ̍ wo̍ chɔ̄ īchāli̍ o̍ fo̍ndāŋ lēbīɔ̍ɔ̍ o̍ bā kɛ̄ndɛ̍ Mɛ̄lɛ̄ka̍ nɔ̍ kpāāyāa̍ wo̍ chōo̍. Ndu̍yɛ̍, o̍ ko̍ŋ kɔ̍ɔ̍lī, lā chā ni̍ŋ ndu̍ hūnɔ̄ɔ̍ o̍ ha̍la̍a̍ ni᷄ŋ cho̍o̍ cho̍o̍.”

⁶⁵Mɛ̄ɛ̍ Chi̍i̍sū di̍mi̍ dɔ̍ɔ̍ dīōmnda̍ŋ nda᷅ŋ, mi̍ māsa̍ wānāā sōlīāā lāsa̍lāa̍, ndu̍ pi̍la̍ sɛ̍ɛ̍sīa̍ŋ nyɛ᷅la̍ŋ lēkɔ̄ɔ̍. Mbo̍ dīmūl wānāā bɛ̄ndūa̍a̍ ha̍ā āā, “Ō tɛ̄ɛ̄mbu̍u̍ dīōla̍ Mɛ̄lɛ̄ka̍la̍ŋ. Se̍īyāā māāvɛ̄ɛ̄ na̍a̍ ŋ̄ yēēma̍ yɛ̄ vɛ̄lɛ̄? Nya̍ pi̍la̍ lā tūēī ni᷅ŋ mɛ̄ɛ̍ o̍ tɛ̍ɛ̍mbu̍u̍ dīōla̍ Mɛ̄lɛ̄ka̍la̍ŋ yɛ̍.

⁶⁶Le̍la̍ŋ, ɔ̍ɔ̄ yāmɛ̍i̍ cho̍ nya̍ o̍ sōndō ve̍?” Ma̍ mūlī āā, “Ō nɔ̄ mbō sɔ̄la̍ pīɔ̍mndo̍.”

⁶⁷O̍ ko̍ŋ kɔ̍ɔ̍lī, ma̍ tūfū ndu̍ lɔ̄lūa̍ŋ o̍ hɔ̄l. Ma̍ lūāā ndu̍.

⁶⁸Ā lɔ̄ɔ̄ pɛ̍, ā dīmu̍l ndu̍ āā, “Nūm Ki̍li̍tī, wāna̍ Mɛ̄lɛ̄ka̍ chu̍a̍ būŋgɛ̄i̍ māā ō chō vīōmɔ̄ɔ̄ le̍ wāŋnda̍ pīŋīo̍o̍ wo̍, tē wāna̍ su̍a̍ā le̍ Mɛ̄lɛ̄ka̍ wo̍ ŋ̄ chō ni̍, mɛ̄ɛ̍ chɔ̍m ndɔ̍ na̍a̍ wāna̍ lɔ̍ɔ̄ nu̍m ndo̍.”

⁶⁹Mɛ̄ɛ̍ Pītɛ̍ wa̍ īchāli̍ o̍ bɛ̍ɛ̄ chīɛ̄ī māsa̍ wānāā sōlīāā lāsa̍lāa̍, mi̍ māsā ko̍ŋ bu̍ɛ̍ī ndɔ̄ lāāndū pīlɛ̍ hūŋ nāa̍ Pītɛ̍ chu̍a̍. Mbo̍ dīmūl ndu̍ āā, “Nūm bɛ̍ɛ̍ a̍ wa̍ Chi̍i̍su̍ fu̍la̍ ho̍ō Kāli̍lī wo̍ kɔ̄ɔ̄lī.”

⁷⁰Kɛ̍, mi̍ Pītɛ̍ vi̍i̍nu᷄ŋ nda̍ kpo̍u̍ o̍ hɔ̄l. Mbo̍ dīmī āā, “I̍ si̍nā bɛ̍ɛ̍ nyɛ᷅ ŋ̄ chō dīmīo̍o̍ wo̍ pɛ̄ŋgu̍ le̍.”

⁷¹Mbo̍ fāŋa᷄ŋ mbo̍ kūānu᷄ŋ o̍ dīō kpāki̍ wa̍ bi̍ɔ̍ɔ̍ ō bālāā wo̍. Mi̍ bu̍ɛ̍ī lāāndū chēle̍ŋ chā ndu̍. Mbo̍ dīmūl pūa̍a̍ wa̍ lo̍ŋ nda̍ āā, “Pōo̍ ho̍ō wa̍ā, nda̍ wa̍ Chi̍i̍su̍ fu̍la̍ Na̍a̍sa̍lūɛ̄ī yo̍ kɔ̄ɔ̄lī ni̍.”

⁷²Mi̍ Pītɛ̍ vi̍i̍nu᷄ŋ vɛ̍lɛ̄ āā, “Le̍ Mɛ̄lɛ̄ka̍ fɔ̍, I̍ si̍nā ndu̍ le̍.”

⁷³Vīōūwɔ̄ɔ̍ vɛ̄lɛ̄ kpɛ̍ɛ̍, mi̍ pūa̍a̍ wa̍ īsīsi̍ lo̍ŋ nda̍ hūŋ nāa̍ Pītɛ̍ chu̍a̍. Ma̍ dīmī āā, “Nūm bɛ̍ɛ̍, bu̍ɛ̍ī ndɔ̄ɔ̍ kpe̍e̍kpe̍i̍ ŋ̄ chō ni̍. O̍ sūɛ̍i̍ ŋ̄ sūāā ve̍ ko̍ni̍ wānā si̍nā ni̍.”

⁷⁴O̍ ko̍ŋ, mi̍ Pītɛ̍ me̍na᷄ŋ āā, “Mɛ̄lɛ̄ka̍ tūsi̍ ya̍ nyɛ̄ pālāa̍ chōo̍, tē ō cho̍ to᷅nya̍a̍ le̍ ya̍ I̍ cho̍ dīmīo̍o̍ le̍. I̍ si̍nā la᷅ŋu̍nɔ̄ kōŋ te̍.” Dīmīo̍o̍ dɔ̍ɔ̍ le̍nde̍, mi̍ sɔ̄ɔ̍ kōōwā.

⁷⁵Mi̍ Pītɛ̍ lo̍o̍nu᷄ŋ nyɛ᷅ Chi̍i̍sū di̍mu̍l ndu̍ wo̍ āā, “Lɔ̍ɔ̍pa̍ sɔ̄ɔ̍ kōōwā, ā chō dīmī lēyāa̍ māā a̍ si̍nā ya̍ le̍.” Mbo̍ fūlā mbo̍ kɔ̍ cha᷅ŋ cha᷄ŋndo̍ pi̍la̍.