Read Southern Kisi Māa̍ti̍u̍ 4 Bible Online

Māa̍ti̍u̍ 4 - Southern Kisi bible

Māa̍ti̍u̍ 4

¹O̍ ko̍ŋ kɔ̍ɔ̍lī, mi̍ Nyi̍na̍ Mɛ̄lɛ̄ka̍a̍ tōsā mi̍ Chi̍i̍sū ku̍ā o̍ po̍llo̍ ni᷄ŋ le̍ mī Māsa̍ Nyi̍nāā Wɔ̄ɔ̍ŋnda̍ dɛ̄ɛ̄ni̍a̍a̍ ndu̍ le̍ mbō tōsa̍ yɔ̄ŋ wɔ̄ɔ̍ŋndo̍.

²Ndu̍yɛ̍ mi̍ Chi̍i̍sū bi̍ī su᷅mndo̍ le̍ pālɛ̍i̍ be̍le̍-hi̍ɔ̍ɔ̍lu̍ a̍ nyūmnda̍ŋ be̍le̍-hi̍ɔ̍ɔ̍lu̍. O̍ ko̍ŋ kɔ̍ɔ̍lī, yīa̍a̍ŋ mā wa̍ ni᷅ŋ ndu̍ nɛ̄īyo̍.

³Mi̍ Māsa̍ Nyi̍nāā Wɔ̄ɔ̍ŋnda̍ hūŋ nāa̍ ndu̍ chu̍a̍. Mbo̍ dīmu̍l ndu̍ āā, “Tē Po̍ Mɛ̄lɛ̄ka̍a̍ ŋ̄ chō ni̍, mɛ̄ɛ̍ di̍mu̍l lɔ̍ po̍ūta̍ŋ nda᷅ŋ lā sīmnu̍ŋ be̍e̍dīi̍.”

⁴Mi̍ Chi̍i̍sū lo᷅ lo̍ŋ mbo̍ mūlūl ndu̍ āā, “Ī chō ī pōōnyīāā o̍ Yāu̍ Mɛ̄lɛ̄ka̍a̍ ni᷄ŋ āā, ‘Ō cho̍ nyɛ̍ dīa̍a̍ ko̍ni̍ le̍ to̍sā mī wāna̍ chi̍o̍o̍ wa̍ yōōmū le̍. Le̍ mī wāna̍ chi̍o̍o̍ sɔ̄la̍ yōōmū kpe̍e̍kpe̍i̍yo̍, mɛ̄ɛ̍ mbō chu̍a̍ nyɛ̄ dīo̍m Mɛ̄lɛ̄ka̍a̍ dīmūl ndu̍ wo̍.’ ”

⁵Mi̍ Māsa̍ Nyi̍nāā Wɔ̄ɔ̍ŋnda̍ kūā vɛ̄lɛ̄ a̍ ndu̍ o̍ chi̍e̍e̍ cho̍ le̍ Mɛ̄lɛ̄ka̍ wo̍, ndu̍ yɔ̍nūŋ māā Chūlu̍sɛ̄lɛ̄m ni̍. Mbo̍ kɔ̍ he̍e̍lū ndu̍ o̍ chīɛ̄ī Chu̍ūwa̍ sōlī sa̍lāa̍ wo̍ tūllo̍ pɔ̍ pɔ̍.

⁶Hēēlōo̍ ndu̍ lo̍ŋ, mbo̍ dīmūl ndu̍ āā, “Tē Po̍ Mɛ̄lɛ̄ka̍a̍ ŋ̄ chō ni̍, mɛ̄ɛ̍ fu̍la̍ wɔ̍ mā chi̍cha̍ lɛ̄ŋ. Kāni̍ fu̍u̍le̍, ī chō ī pōōnyīāā o̍ Yāu̍ Mɛ̄lɛ̄ka̍a̍ ni᷄ŋ āā, ‘Mɛ̄lɛ̄ka̍ chō ki̍i̍la̍a̍ ndūa̍a̍ dīmūl mā mānda̍ nu̍m.’ Ndu̍yɛ̍ ī chō ī pōōnyīāā vɛ̍lɛ̄ māā, ā chō bāla̍ŋ hāū mā sāāla̍ nu̍m. Ko̍ŋ to̍sā pēlēi̍ bɛ̍ɛ̍ a̍ lo̍ō o̍ pōūwo̍ mā yɔ̍ŋu̍lu̍ŋ te̍.”

⁷Mi̍ Chi̍i̍sū lo᷅ o̍ ko̍ŋ mbo̍ mūlūl ndu̍ āā, “Ī chō vɛ̄lɛ̄ ī pōōnyīāā o̍ Yāu̍ Mɛ̄lɛ̄ka̍a̍ ni᷄ŋ āā, ‘Wānā tɔ̍ɔ̍ndāŋ Ma̍sānɔ̄ɔ̍ Mɛ̄lɛ̄ka̍ ŋ̄ chō pīɛ̄īyo̍ wo̍ le̍.’ ”

⁸Mi̍ Māsa̍ Nyi̍nāā Wɔ̄ɔ̍ŋnda̍ hēl vɛ̄lɛ̄ a̍ ndu̍ o̍ pēmbīī bɛ̄ndūe̍i̍ chōo̍. Mbo̍ chɔ̄m ndu̍ lɛ̄ŋnde̍ o̍ chi̍e̍ēŋndo̍ chōo̍ a̍ sūltā lāŋ kpo̍u̍.

⁹Mbo̍ dīmūl ndu̍ āā, “Tē a̍ ba̍ŋ wūla̍ŋ mā so̍o̍lu̍u̍ ya̍ pɛ̍, mu᷅ŋ kpo̍u̍ I̍ ke̍ nu̍m.”

¹⁰Mi̍ Chi̍i̍sū di̍mūl ndu̍ āā, “Hi̍o̍u̍ mā kūɛ̄, Sēta̍nā. Ī chō ī pōōnyīāā o̍ Yāu̍ Mɛ̄lɛ̄ka̍a̍ ni᷄ŋ āā, ‘Māsānɔ̄ɔ̍ Mɛ̄lɛ̄ka̍, ndu̍ wānā so̍o̍lūū ni̍. Ndu̍yɛ̍ ndu̍ pīlɛ̍ kpe̍ wānā sa̍a̍ŋgīāl ni̍.’ ”

¹¹O̍ ko̍ŋ kɔ̍ɔ̍lī, mi̍ Māsa̍ Nyi̍nāā Wɔ̄ɔ̍ŋnda̍ kūānu᷄ŋ. Mɛ̄ɛ̍ o̍ ku̍ɛ̍nu᷄ŋ, mi̍ ki̍i̍la̍a̍ Mɛ̄lɛ̄ka̍a̍ hūŋ ma̍ kē Chi̍i̍su̍ nyɛ̄ ndu̍ o̍o̍ ye̍e̍ma̍ wo̍.

¹²Mi̍ Chi̍i̍sū tu̍ɛ̍ī māā ā dɔ̄ū Chɔ᷄ŋ Wānā Pu̍lāa̍ o̍ chīɛ̄ī mānyūmndo̍ ni᷄ŋ. Mɛ̄ɛ̍ o̍ tu̍e̍ī le̍nde̍, mbo̍ mīīŋgū o̍ lɛ̄ŋndē Kāli̍līle̍ŋ ni᷄ŋ.

¹³Kɛ̍, ō che᷄l Na̍a̍sa̍lūɛ̄ī le̍. O̍ ko̍ŋ kɔ̍ɔ̍lī, mbo̍ kūānu᷄ŋ Kēpa̍a̍nīɔ̄m. Kēpa̍a̍nīɔ̄m ndu̍ wa̍ māwāā chi̍o̍o̍ o̍ Mɛ̄ŋmā Ībūŋga᷄ŋ Kāli̍lī i̍kɛ̍i̍ o̍ tāndā Sɛ̍bu̍lɔ̄ŋndo̍ ni᷄ŋ a̍ tāndā Nāfi̍ta̍līīyo̍.

¹⁴Kɔ̄lā ndɔ̄la̍ŋ lo̍ŋ la̍ yɔ̍nu̍ŋ ma̍yɔ̍ŋna᷄ŋ le̍ mī nyɛ̄ wāna̍ su̍a̍ā le̍ Mɛ̄lɛ̄ka̍ wo̍ ō dīmi̍ wo̍ yɔ̄nu̍ŋ, ndu̍ yɔ̍nūŋ māā Āīsa̍yā ni̍. Dīōmndā la᷄ŋ la̍ cho̍ la᷅ŋ ni̍ āā,

¹⁵“Nya̍ wāŋnda̍ o̍ lɛ̄ŋndē Sɛ̍bu̍lɔ̄ŋnde̍ŋ ni᷄ŋ, a̍ lɛ̄ŋndē Nāfi̍ta̍līīle̍ŋ, nya̍ cho̍ ha̍ā Chɔ̍ɔ̍dāŋ kɔ̍ŋgɔ̍ o̍ nɛ̄i̍ ku̍ɛ̄ o̍ mɛ̄ŋmā ībūŋga᷄ŋ ndo̍ wa̍, ndu̍ yɔ̍nūŋ ni̍ māā nya̍ wāŋnda̍ lɛ̄ŋndē Kāli̍līle̍ŋ, nya̍ cho̍ ha̍ā ā Chu̍ū le̍ wa̍,

¹⁶nya̍ cho̍ ha̍ā o̍ nyūmnda̍ŋ ni᷄ŋ nda̍, lā chō nyɛ̄ wa̍wo̍ŋ bɛ̍ndōo̍ chɔ̄. Nya̍ cho̍ ha̍ā o̍ nyūmnda̍ŋ ni᷄ŋ mi̍ pīɔ̍mndo̍ wā nya̍ bɛ̄lū bɛ̄lūūwo̍ wa̍, nyɛ̄ wa̍wo̍ŋndo̍ chō tēŋgā nya̍ chōo̍.”

¹⁷Chɔ̍ŋ ni᷅ŋ a̍ bōōndi̍i̍ ke̍ŋ, mi̍ Chi̍i̍su̍ ka̍ndū sūɛ̍i̍ Mɛ̄lɛ̄kɛ̍i̍ dīmīo̍o̍ āā, “Lā ma᷄l yɔ᷅ŋndā nyāla̍ wɔ̍ɔ̍ŋnda̍ŋ. Kāni̍ fu̍u̍le̍, te̍le̍ŋ Mɛ̄lɛ̄ka̍ chō wā ma̍sāa̍ wāŋnda̍ chōo̍ wo̍ chō ni᷅ŋ kpɛ̍ɛ̍lūŋ.”

¹⁸Mɛ̄ɛ̍ Chi̍i̍sū wa̍ kɔ̄ŋgɔ̍ Mɛ̄ŋmā Ībūŋga᷄ŋ Kāli̍lī dēmūllo̍, mbo̍ kōmāl pūa̍a̍ nda̍ ŋi̍ɔ̍ɔ̍ŋ, ndi̍a̍ā pi᷄lla̍. Ō pīlɔ̍ɔ̄ dīōlā ndɔ̄la̍ŋ āā, Sa̍i̍mɔ̄ŋ, mā vēēlū ndu̍ vɛ̄lɛ̄ āā, Pītɛ̍. Ō pīlɔ̍ɔ̄ dīōlā ndɔ̄ la̍ŋ āā, A̍ndūlū. Nda̍ ŋi̍ɔ̍ɔ̍ŋ ā wa̍ yālāa̍ wūūwo̍ o̍ mɛ̄ŋmā ībūŋga᷄ŋ ni᷄ŋ, kāni̍ fo̍ndōle̍, yɔ̄ɔ̄yāa̍ wa̍ wa̍li̍ ndāa̍ ni̍.

¹⁹Mi̍ Chi̍i̍sū di̍mūl nda̍ āā, “Lā hu᷄ŋ mī lā sīmnu᷄ŋ bu̍ɛ̍i̍yāā nī, mī pɛ̍ɛ̍ku̍ nya̍ yɔ̄ɔ̄yā chēle̍ŋ. Ndu̍ cho̍ ni̍, mī lā tōsa̍ mī wāŋnda̍ sīmnu᷄ŋ bu̍ɛ̍i̍yāā nī.”

²⁰Ma̍ māl yālāla̍ nda̍la̍ŋ o̍ lē pīlɛ̍ ni᷄ŋ kpe̍ ma̍ tūāl ndu̍ kɔ̄ɔ̄lī.

²¹Mɛ̄ɛ̍ o̍ hi̍o̍ū lāchī, mbo̍ kōmāl vɛ̄lɛ̄ pūa̍a̍ ā ŋīɔ̍ɔ̍ŋ. Nda̍ bɛ̍ɛ̍ ndi̍a̍ā pi᷄lla̍ nda̍ wa̍ ni̍. Ō pīlɔ̍ɔ̄ dīōlā ndɔ̄la̍ŋ āā, Chēmi̍si̍, ō pīlɔ̍ɔ̄ dīōla̍ŋ āā, Chɔ᷄ŋ. Nda̍ ŋi̍ɔ̍ɔ̍ŋ ā wa̍ o̍ dɛ̄ndɔ̄ɔ̍ ni᷄ŋ nda̍ Sɛ̍bɛ̍dīī fi̍nyā ndā wa̍ā. Ā wa̍ yālāla̍ nda̍la̍ŋ tōōsīa̍a̍. Mi̍ Chi̍i̍sū ve̍e̍lū nda̍ le̍ mā tōl ndu̍ kɔ̍ɔ̍lī.

²²Dīmīo̍o̍ nu̍a̍ā āā ō vēēlu̍ nda̍, ma̍ mɛ̄ī bɛ̍ɛ̍ fi̍nyā nda̍ a̍ dɛ̄ndɛ̄ nda̍a̍ ma̍ tūāl Chi̍i̍su̍ kɔ̄ɔ̄lī.

²³Mi̍ Chi̍i̍sū ba̍lū bā o̍ bā fe̍e̍ o̍ lɛ̄ŋndē Kāli̍līle̍ŋ ni᷄ŋ. Mbo̍ pɛ̄ɛ̄kū wāŋnda̍ o̍ chīɛ̄īlā Chu̍ūwa̍ pīɛ̄ī Mɛ̍lɛ̄ka̍ la̍ŋ ni᷄ŋ. Mbo̍ dīmūl nda̍ yōōŋgū kɛ̄ndɔ̄ɔ̍ a̍ mɛ̄ɛ̍ Mɛ̄lɛ̄ka̍ chō hūnɔ̄ɔ̄ wā wāŋnda̍ chōo̍ ma̍sāa̍ yɛ̍. O̍ ko̍ŋ kɔ̍ɔ̍lī, mbo̍ sīŋgī wānāa̍ wa̍ a̍ nāālā ŋ̄kɔ̄ŋnja̍la̍ŋ nda̍ a̍ wānāa̍ wa̍ a̍ nāālā yɔ̄ŋāā la̍ŋ nda̍.

²⁴O̍ ko̍ŋ, mi̍ tɔ̍ɔ̍ ndɔ̄ɔ̍ tīū o̍ lɛ̄ŋndē Si̍i̍lūīāle̍ŋ ni᷄ŋ kpo̍u̍. Mi̍ wāŋnda̍ hūŋ a̍ wānāā lānāāwa̍ kpe̍de̍ nāa̍ ndu̍ chu̍a̍. Īdīālū o̍ dīālīī nāā, nyi̍nāā wɔ̄ɔ̍ŋāa̍ wa᷅ bɛ̍ɛ̍ wa᷅ŋnda̍ kɔ̄ɔ̄lī wa̍ ni̍, nāā wōūvɛ̍i̍yo̍ ni̍, a̍ nāā bɛ̄vɛ̍i̍yo̍, la̍ŋ kpo̍u̍ mi̍ Chi̍i̍sū si̍ŋgī.

²⁵Mi̍ wāŋnda̍ cha᷄ŋ fa̍ŋgā bɛ̍ndōo̍ o̍ lɛ̄ŋndē Kāli̍līle̍ŋ ni᷄ŋ a̍ lɛ̄ŋndē Dɛ̄ka̍pɔ̍līīle̍ŋ, ko̍ŋ cho̍ ni̍, lɛ̄ŋndē chi̍e̍e̍ŋ bɛ̍ndūŋ tɔ̍le̍ŋ. Ma̍ cha᷄ŋ Chūlu̍sɛ̄lɛ̄m chi̍e̍e̍, a̍ lɛ̄ŋndē Chūdi̍a̍āle̍ŋ, a̍ Chɔ̍ɔ̍dāŋ le̍e̍lōo̍, ma̍ tūāl ndu̍ kɔ̄ɔ̄lī kpɔ̍lɔ̄ kpɔ̄lɔ̄ bɛ̄ndū.