Read Southern Kisi Māa̍ti̍u̍ 5 Bible Online

Māa̍ti̍u̍ 5 - Southern Kisi bible

Māa̍ti̍u̍ 5

¹O̍ ko̍ŋ kɔ̍ɔ̍lī, mɛ̄ɛ̍ Chi̍i̍sū che᷅ wāŋnda̍ fāŋgā bɛ̍ndōo̍ tōlɔ̄ɔ̍ ndu̍ kɔ̄ɔ̄lī, mbo̍ hēl nāa̍ te̍māa̍ o̍ pēmbēi̍ hōlnɔ᷄ŋndo̍ mbo̍ chāl. Mi̍ bu̍ɛ̍i̍yāā ndūa̍a̍ hu᷄ŋ si᷅m ndu̍ īkɛ̄i̍.

²O̍ ko̍ŋ, mbo̍ kāndū nda̍ pɛ̄ɛ̄kōo̍ mɛ̄ɛ̍ nda̍ chō fa̍ū.

³Mi̍ Chi̍i̍sū di̍mūl nda̍ māā, wānāa̍ cho̍ ha̍ā ma̍ sīnā māā ā chō ā tāmbɛ̍i̍ o̍ nyi̍nāa̍ ni̍ŋ, ā nɔ̍ ti̍i̍nda᷄ŋ o̍ tīīnda᷄ŋ che᷅le̍ŋ te̍, mɛ̄ɛ̍ Mɛ̄lɛ̄ka̍ ma̍ tīīnda᷄ŋ nda̍, wānāā kāŋ ā pɛ̄l tɔ̄nɔ̄ɔ̍. Kāni̍ fo̍ndōle̍, ā kāndu̍ ni᷅ŋ bɛ̍ɛ̍ tɔ̍nɔ̄ɔ̍ sɔ̄lāa̍ le̍ mɛ̄ɛ̍ Mɛ̄lɛ̄ka̍ cho̍ nda̍ chōo̍ ma̍sāa̍ yɛ̍.

⁴Wānāa̍ cho̍ ha̍ā wā cha᷄ŋndo̍ le̍ Mɛ̄lɛ̄ka̍ wa̍ bɛ̍ɛ̍, ā pɛ̄l tɔ̄nɔ̄ɔ̍. Kāni̍ fo̍ndōle̍, Mɛ̄lɛ̄ka̍ chō tōsā mā wa̍ a̍ kɔ̄ltā kɛ̄ndɛ̄.

⁵Wānāa̍ cho̍ ha̍ā ā tīīnda̍ŋ kpa̍āya̍ nda̍ pi̍la̍a̍ le̍ wa̍, ā pɛ̄l tɔ̄nɔ̄ɔ̍. Kāni̍ fo̍ndōle̍, wānāā kāŋ Mɛ̄lɛ̄ka̍ chō nda̍ nyɛ̄ o̍ nyɛ̄ kɛ̄ndɛ̄ o̍ chu̍e̍l nda̍ būŋgɛ̄i̍ kē.

⁶Wānāa̍ la̍ndūŋ kɔ̍l māā wāŋnda̍ ā tōsa̍ nyɛ̄ Mɛ̄lɛ̄ka̍ hɛ̄na̍ŋ ndo̍ wa̍, ā pɛ̄l tɔ̄nɔ̄ɔ̍. Kāni̍ fo̍ndōle̍, Mɛ̄lɛ̄ka̍ chō tōsā mā hīni̍ kɔ̄l mɛ̍ɛ̄.

⁷Wānāa̍ tu̍i̍i̍nūŋ wāŋnda̍ īnyīɛ̍ɛ̍ wa̍, ā pɛ̄l tɔ̄nɔ̄ɔ̍. Kāni̍ fo̍ndōle̍, Mɛ̄lɛ̄ka̍ chō hūnɔ̄ɔ̄ nda̍ īnyīɛ̍ɛ̍ tūīīnɔ᷄ŋ.

⁸Wānāa̍ cho̍ ha̍ā ma̍ dūāū kɔ̄llo̍ kpo̍u̍ o̍ Mɛ̄lɛ̄ka̍ lo̍ wa̍, ā pɛ̄l tɔ̄nɔ̄ɔ̍. Kāni̍ fo̍ndōle̍, ā chō hūnɔ̄ɔ̄ wā nāa̍ pi᷅lɛ̍ nda̍ Mɛ̄lɛ̄ka̍ wa̍ā, ndu̍yɛ̍, mā chē ndu̍.

⁹Wānāa̍ to̍sā mī kɔ̄l nyūlōo̍ mīīŋgu̍ wāŋnda̍ tɛ̍ɛ̄ŋ nda̍, nda̍ bɛ̍ɛ̍ ā pɛ̄l tɔ̄nɔ̄ɔ̍. Kāni̍ fo̍ndōle̍, nda̍ Mɛ̄lɛ̄ka̍ chūā ni̍ŋ ni̍ māā chūāūwāā ndɔ̄.

¹⁰Wānāā wāŋnda̍ tūsī nyɛ̍ pālāa̍ chōo̍ le̍ mɛ̄ɛ̍ nda̍ chō nyɛ̄ Mɛ̄lɛ̄ka̍ hɛ̄na̍ŋ ndo̍ tōsāa̍ yɛ̍ wa̍, ā pɛ̄l tɔ̄nɔ̄ɔ̍. Kāni̍ fo̍ndōle̍, Mɛ̄lɛ̄ka̍ ndu̍ cho̍ ni᷅ŋ nda̍ chōo̍ Māsāa̍ ni̍.

¹¹Nya̍ wānāā wāŋnda̍ tɛ̄ɛ̄mbu̍u̍ tɔ̍ɔ̍ le̍ mɛ̄ɛ̍ nya̍ chō le̍ ya̍ yɛ̍ wa̍, o̍ ko̍ŋ kɔ̍ɔ̍lī, mā tūsi̍ nya̍ nyɛ̄ pālāa̍ chōo̍, ndu̍yɛ̍, mā dīmi̍ dīōmndā wɔ̄ɔ̍ŋndā fāŋgā a̍ nya̍ o̍kɔ̄ɔ̄ o̍ chōōla̍ŋ chōo̍ fo̍ndō fu̍u̍ wa̍, wānāā kāŋ lā pɛ̄l tɔ̄nɔ̄ɔ̍.

¹²Ndu̍yɛ̍, nya̍ wānāā wāā nu̍a̍ā, lā na᷄ŋ kɔ̍l bu̍tē. Kāni̍ fu̍u̍le̍, Mɛ̄lɛ̄ka̍ chō nya̍ nyɛ̄m kɛ̄ndɛ̄ŋ fāŋgā kɛ̄sūllo̍ o̍ fo̍ndāŋ ndɔ̄ɔ̍. Le̍nde̍ ko̍ni̍, nda̍ tōsa̍ a̍ wānāa̍ nda̍ a̍a̍ su̍a̍ā le̍ Mɛ̄lɛ̄ka̍ wa̍ a̍ hi᷅ŋ nya̍ tāse̍ wa̍ ni̍.

¹³O̍ ko̍ŋ kɔ̍ɔ̍lī, mi̍ Chi̍i̍sū di̍mī āā, “Mɛ̄ɛ̍ hɛ᷄lle̍ chō yɛ̍, le̍nde̍ nya̍ chō o̍ ŋ̄wāŋndā chīe̍e̍ lo̍ ni̍. Kɛ̍, tē hɛ᷄lle̍ ī ve̍ lɛ̍ nyɛ̄ i̍ nɔ̍ le̍ tōsāa̍ wo̍ tōsā le̍, wānā nɔ̍lā lɛ̍ ndi̍ mīŋgī mī ī tōsa̍ nyɛ̄ i̍ nɔ̍ le̍ tōsāa̍ wo̍ tōsā le̍. Vīōūwɔ̄ɔ̍ ko̍ni̍, nda̍ vīāū ni᷅ŋ ndi̍ ni̍. Tē ā vīōū yɛ̄ pɛ̍, wāŋnda̍ kēi̍ nīɔ̄ū lēchōo̍.

¹⁴“Lā chō vɛ̄lɛ̄ māchūāā māā nyɛ̄ wa̍wo̍ŋ le̍ wāŋnda̍ kpo̍u̍ o̍ chi̍e̍ēŋndo̍ chōo̍. Chi̍e̍e̍ wa᷅ ho̍ō ō tāŋgūlāā o̍ pēmbēi̍ chōo̍ te̍mā wo̍ o̍ vi̍ŋnūŋ te̍.

¹⁵Wānā mɛ̍ndūl la̍mbūi̍yo̍ mā ku̍u̍mbu̍u̍ hɛ̄ŋgɔ̍ɔ̍ lēchōo̍ le̍. Wānā mɛ̍ndu̍l la̍mbūi̍yo̍ pɛ̍, nāa̍ te̍māa̍ ŋ̄ kɛ̄sī ni̍. Lo̍ŋ o̍ wa᷅ ni̍ le̍ mī wānāa̍ cho̍ chīɛ̄ī ni̍ŋ nda̍ kpo̍u̍ mā wa̍ chɔ̄ɔ̍.

¹⁶Mɛ̄ɛ̍ le̍nde̍ ko̍ni̍, nyɛ̄ wa̍wo̍ŋ nya̍ nɔ̄ wo̍ ō nɔ̄ le̍ dīōndɔ̄ɔ̍ ni̍. Ko̍ŋ to̍sā ni̍, tē wāŋnda̍ chē pɛ̍ sɔ̍ɔ̍ŋ kɛ̍ndɛ̄ŋ nya̍ tōsa̍ wo̍ŋ, ā sāŋga̍la̍ Mɛ̄lɛ̄ka̍ Fi̍nyā nyā o̍ cho̍ o̍ fo̍nda᷄ŋ ndɔ̄ɔ̍ wo̍.”

¹⁷Mi̍ Chi̍i̍sū hi̍a̍ū lāchī a̍ pɛ̄ɛ̄kōo̍ māā, lā yi̍ya᷄ŋ māā I̍ hi᷅ŋ māhūnāā o̍ chi̍e̍ēŋndo̍ ni᷄ŋ le̍ nyɛ̄ sāwāla̍ Mɛ̄lɛ̄ka̍ ke̍ Mūu̍sē la̍ŋ lā dīmi̍ wo̍ fāŋā le̍. Ndu̍yɛ̍, I̍ hi̍ŋ le̍ sɔ̄ɔ̍ŋ tōnya᷅ŋ wānāa̍ su̍a̍ā le̍ Mɛ̄lɛ̄ka̍ wa̍ ā pōōnyi̍a̍a̍ wo̍ŋ fāŋā le̍. I̍ hi᷅ŋ māhūnāā le̍ tōsāa̍ mī nyɛ̄ sāwāla̍ŋ lā dīmi̍ wo̍ a̍ nyɛ̄ wānāa̍ su̍a̍ā le̍ Mɛ̄lɛ̄ka̍ wa̍ ā pōōnyi̍a̍a̍ wo̍ ō tōsa̍ŋ.

¹⁸Ndu̍yɛ̍, mī di̍mu̍l nya̍, tē chi̍e̍ēŋndo̍ a̍ fo̍nda᷄ŋ Mɛ̄lɛ̄ka̍a̍ lā chō wɔ̄, nyɛ̄ o̍ nyɛ̄ sāwāla̍ŋ lā dīmi̍ ō pɔ̄mbu̍ɛ̍i̍na̍a̍ wo̍ bɛ̍ɛ̍ ō fe̍ŋāŋ lēchōo̍ le̍. Ndu̍yɛ̍, nyɛ̄ o̍ nyɛ̄ sāwāla̍ŋ lā dīmi̍ māā ō nɔ̄ le̍ yɔ̄nɔ᷄ŋndo̍, mɛ̄ɛ̍ mbō yɔ̄nu̍ŋ.

¹⁹Le̍la̍ŋ, wānā o̍ wāna̍ tɛ̍ɛ̍mbu̍u̍ sāwāla̍ Mɛ̄lɛ̄ka̍la̍ŋ ō pɔ̄mbu̍ɛ̍i̍na̍a̍ wo̍ bɛ̍ɛ̍ pɛ̍, o̍ ko̍ŋ kɔ̍ɔ̍lī, mbō pɛ̄ɛ̄ku̍ wāŋnda̍ le̍ mā tɛ̄ɛ̄mbu̍u̍ la̍ŋ pɛ̍, wānā wa̍ā le̍nde̍, wānāā Mɛ̄lɛ̄ka̍ wā ni̍ŋ ma̍sāa̍ chōo̍ wa̍ ki̍nɛ̍i̍, ndu̍ cho̍ hūnɔ̄ɔ̄ dɔ̄ɔ̄na᷄ŋ mbō hīōū o̍ kɛ᷅ o̍ kɛ᷅ ni̍. Kɛ̍ ndu̍yɛ̍, wāna̍ to̍sa̍ pɛ̍ nyɛ᷅ sāwāla̍ŋ lā dīmi̍ wo̍, ndu̍yɛ̍, o̍ ko̍ŋ kɔ̍ɔ̍lī, mbō tōsa̍ mī wāŋnda̍ tōsa̍ nyɛ̄ la̍ di̍mi̍ wo̍ pɛ̍, wānā wa̍ā le̍nde̍ ō wā ni̍ŋ wa̍nā bɛ̍ndū wānāā Mɛ̄lɛ̄ka̍ wā ni̍ŋ ma̍sāa̍ chōo̍ wa̍ tɛ̄ɛ̄ŋ.

²⁰Mī di̍mu̍l nya̍ fa̍ū, nyɛ̄ Mɛ̄lɛ̄ka̍ hɛ̄na̍ŋ ndo̍ mɛ̄ɛ̍ mī lā wa̍ sa̍kpō o̍ ndu̍ tōsāa̍ ni᷄ŋ mbō hīōū wānāa̍ pɛ̍ɛ̍kū wa᷅ŋnda̍ sāwāla̍ Mɛ̄lɛ̄ka̍la̍ŋ nda̍ a̍ ku̍ndā Fālīsi̍īya̍. Tē lā ve̍ sa̍kpō o̍ ndu̍ tōsāa̍ ni᷄ŋ mbō hīōū mɛ̄ɛ̍ nda̍ chō yɛ̍ le̍, lā ve᷅ ni̍ŋ wa̍nāā Mɛ̄lɛ̄ka̍ wā ni̍ŋ ma̍sāa̍ chōo̍ wa̍ tɛ̄ɛ̄ŋ te̍.

²¹Mi̍ Chi̍i̍sū hi̍a̍ū lāchī a̍ pɛ̄ɛ̄kōo̍ āā, “Ā pɛ̄ɛ̄ku̍ nya̍ nyɛ̄ nda̍ pɛ̄ɛ̄ku̍ na̍a̍ Chu̍ūwa̍ fi̍nyāā nāā ma̍māa̍ wo̍ māā, wānā di̍ī wa᷅na̍ chi̍o̍o̍ le̍. Ndu̍yɛ̍, māā tē wānā di̍ī wāna̍ chi̍o̍o̍ pɛ̍ kpa̍li̍, ā kɔ̄ɔ̄sa̍ a̍ nūm.

²²Kɛ̍, ya̍ ya̍, I̍ cho̍ nya̍ dīmūllo̍ māā ō cho̍ wɔ̍ wa᷅na̍ chi̍o̍o̍ dīyɔ̄ɔ̍ le̍, kɛ̍, wānā o̍ wāna̍ tu̍u̍lu̍ kɔ̄l a̍ chāa̍ŋ ndɔ̄ pɛ̍, ā chō kɔ̍ɔ̍sɔ̍ a̍ ndu̍. Ndu̍yɛ̍, wānā o̍ wāna̍ di̍mu̍l chāa̍ŋ ndɔ̍ dīōm wɔ̄ɔ̍ŋndo̍ pɛ̍, kɔ̄la̍ŋ nda̍ kūā a̍ ndu̍ o̍ lāŋgba̍ā nāā ka̍lāa̍ ki̍a̍lū ya᷅ma̍ŋ nda̍ lo̍ ni̍, mā kɔ̄ɔ̄sa̍ a̍ ndu̍. Ndu̍yɛ̍, wānā o̍ wāna̍ ye̍i̍ chāa̍ŋ ndɔ̍ pɛ̍, mɛ̄ɛ̍ wānā ko̍ŋ tōsa̍ yɔ̄ŋ wɔ̄ɔ̍ŋ to̍sā mā dɔ̄ū wānā o̍ yīŋndē fɛ̍ɛ̍ŋ a̍ fɛ̍ɛ̍ŋ nde̍ŋ ni᷄ŋ ndo̍.

²³Le̍la̍ŋ, tē ō wa̍ pɛ̍ mā kūɛ̄ le̍ sa̍lāa̍ sōlīo̍o̍ nāa̍ Mɛ̄lɛ̄ka̍ chūā o̍ ma̍āŋndo̍ chōo̍, kɛ̍ ndu̍yɛ̍, mā lo̍o̍nu̍ŋ māā chāa̍ŋ nūm wa̍nā la̍a̍la᷄ŋndo̍ chō a̍ kɔ̄l nūm ta̍mbɛ̍i̍yo̍ le̍ nyɛ̄ ŋ̄ tōsa̍ a̍ ndu̍ wo̍,

²⁴mɛ̄ɛ̍ mɛ̍i̍ yɔ̍ sa̍lā kōŋ o̍ ma̍āŋndo̍ hɔ̄lndɔ̄ lo̍ŋ, mā mi̍i̍ŋgu̍ nāa̍ chāa̍ŋ nūm ko̍ŋ chūā mī lā kɔ̍ to̍ōsi̍āŋ tɛ̍ɛ̄ŋ. Tē lā tōōsi̍āŋ tɛ̍ɛ̄ŋ pɛ̍, a̍ hu̍ŋ so̍lī ni᷅ŋ sa̍lāa̍ o̍ Mɛ̄lɛ̄ka̍ lo̍.”

²⁵Mi̍ Chi̍i̍sū si̍lā vɛ̄lɛ̄ āā, “Tē a̍ to̍sa̍l wāŋndo̍ sūɛ̍i̍ wɔ̍ɔ̍ŋnde̍ pɛ̍, mbō chɛ᷄ŋ le̍ kɔ̄la̍ŋ se̍ī nūmndo̍ bīyɔ̄ɔ̍, di̍mu̍l ndu̍ mī lā tōōsi̍āŋ tɛ̍ɛ̄ŋ lɔ̍ɔ̍ o̍ ku̍e̍ wɔ̍ a̍ nūm o̍ māsāa̍ lo̍ le̍ wo̍. Tē a̍ to̍sa̍ le̍nde̍ le̍, mɛ̄ɛ̍ ō chō lākɔ̄ se̍ī nūmndo̍ bīyɔ̄ɔ̄. Tē ō bīī yɛ̄ se̍ī nūmndo̍ pɛ̍, māsāa̍ dīmu̍l pōli̍si̍i̍ya̍ ā dɔ̄ū nu̍m chīɛ̄ī ni̍ŋ.

²⁶Mi̍ di̍mu̍l nu̍m, tē ā dɔ̄ū yɛ̄ nu̍m chīɛ̄ī ni̍ŋ pɛ̍, lo̍ŋ ŋ̄ lō ni̍ ā so̍lī nu̍m te̍. Mɛ̄ɛ̍ mā chi̍i̍ nyɛ̄ o̍ nyɛ̄ nda̍ kēlū nu̍m chōo̍ pa̍a̍wā, mālāŋ nda̍ sōlī nu̍m.”

²⁷Mi̍ Chi̍i̍sū hi̍a̍ū lāchī a̍ wāŋnda̍ pɛ̄ɛ̄kōo̍. Mbo̍ sīlā nda̍ āā, “Ā dīmu̍l nya̍ āā, ‘Wānā su̍u̍ndā a̍ la̍nɔ̍ pi̍la̍ kɛ̄lɛ̄ŋgāā pɔ̍nɔ̍ pi̍la̍ le̍.’

²⁸Kɛ̍, ya̍ ya̍, I̍ cho̍ nya̍ ni̍ko̍ di̍mūllo̍ māā ō cho̍ wɔ̍ su̍u̍ndāa̍ le̍, kɛ̍, wānā o̍ wānā a̍ to̍fa̍ wānā la̍nɔ̍ɔ̍ pɛ̍, mbō lo̍ o̍ ko̍ŋ kɔ̍ɔ̍lī, mā de̍l kɔ̄l le̍ hīni̍la̍ŋ a̍ ndu̍ pɛ̍, mɛ̄ɛ̍ sāwa̍ di̍mi̍ māā wānā su̍u̍ndā a̍ la̍nɔ̍ pi̍la̍ le̍ wo̍, mɛ̄ɛ̍ a̍ chi̍i̍ ndu̍ tɛ̄ɛ̄mbūū o̍ kɔ̄l ni᷄ŋ.”

²⁹Mi̍ Chi̍i̍sū lo᷅ lo̍ŋ mbo̍ yɔ̄ŋgū sīlāa̍ o̍ lētāle̍ ni᷄ŋ āā, “Le̍la̍ŋ, tē hɔ̄ltē nūmnde̍ŋ lē wa̍ tōsāa̍ pɛ̍ mā tōsā yɔ᷅ŋ wɔ̄ɔ̍ŋndo̍, mɛ̄ɛ̍ ka̍la̍ le̍ŋ mā vīōū. Kāni̍ fu̍u̍le̍, ō bɛ̄nda̍ mā fu̍la̍ hɔ̄lte̍ŋ mbo̍ hīāū dīāllūŋ nūmndo̍ŋ wāa̍ ŋ̄ chīīŋīāā kpo̍u̍, kɛ̍ ndu̍yɛ̍, mā hu̍ŋ kɔ᷅ o̍ fo̍ndāŋ nyɛ̄ pālāa̍ nāa̍ Mɛ̄lɛ̄ka̍ dūāū wa̍nāā yɔ̄ŋ wɔ̄ɔ̍ŋnda̍ wa̍.

³⁰Ndu̍yɛ̍, tē bā nūmndo̍ wa̍ tōsāa̍ pɛ̍ mā tōsā yɔ᷅ŋ wɔ̄ɔ̍ŋndo̍, ki̍o̍lu̍ ndu̍ kpa̍li̍ mā vīōū. Kāni̍ fu̍u̍le̍, ō bɛ̄ndā mā fu̍la̍ bāa̍ ō pīlɛ̍ mbo̍ hīāū a̍ dīāllūŋ nūmndo̍ŋ wāa̍ ŋ̄ chīīŋīāā, kɛ̍ ndu̍yɛ̍, mā hu̍ŋ kɔ᷅ o̍ fo̍ndāŋ nyɛ̄ pālāa̍ nāa̍ Mɛ̄lɛ̄ka̍ dūāū ni̍ŋ wa̍nāā yɔ̄ŋ wɔ̄ɔ̍ŋnda̍ wa̍.”

³¹Mi̍ Chi̍i̍sū hi̍a̍ū lāchī a̍ sūɛ̍i̍ āā, “Ā dīmu̍l vɛ̄lɛ̄ wāŋnda̍ āā, ‘Tē wāŋndo̍ ō kɛ̄ɛ̍ pɛ̍ la̍a̍ ndɔ̄, māā ō ke̍ chu̍ā kōŋ yāu̍ ba̍ŋa᷄ŋndo̍, o̍ chɔ᷅m māā chūa̍a̍ cho̍ lɛ̍ la̍a̍ ndɔ̄ le̍ wo̍.’

³²Kɛ̍ ndu̍yɛ̍, ya̍ ya̍, I̍ cho̍ nya̍ dīmūllo̍ māā mɛ̄ɛ̍ mbō wa̍ le̍ sūūndāa̍, kɛ̍, wānā o̍ wānā, a̍ kɛ̍ɛ̍ la̍a̍ nu̍m le̍ sa̍bū chēle̍ŋ pɛ̍, mbō lo̍ o̍ ko̍ŋ mī chūā kōŋ ō cha᷄l wānā pɔ̍nɔ̍ che᷅le̍ŋ o̍ bā pɛ̍, mɛ̄ɛ̍ nu᷄m kɛ̍ɛ̍ ko̍ŋ ndu̍ wo̍, mɛ̄ɛ̍ nu᷄m to̍sa̍ ni̍ mi̍ chūā kōŋ tɛ̄ɛ̄mbūū sāwa̍ di̍mi̍ māā wānā su̍u̍ndā a̍ pɔ̍nɔ̍ pi̍la̍ le̍ wo̍. Ndu̍yɛ̍, wānā pɔ̍nɔ̍ chu̍ā wa̍nā la̍nɔ̍ nda̍ kɛ̄ɛ̍ ko̍ŋ ndo̍ wo̍, ndu̍ bɛ̍ɛ̍ mɛ̄ɛ̍ ō tɛ̄ɛ̄mbu̍u̍ sāwa̍ di̍mi̍ māā wānā su̍u̍ndā a̍ la̍nɔ̍ pi̍la̍ le̍ wo̍.”

³³Mi̍ Chi̍i̍sū hi̍a̍ū lāchī a̍ wāŋnda̍ pɛ̄ɛ̄kōo̍. Mbo̍ dīmī āā, “Lā tūēī vɛ̄lɛ̄ ma̍ pɛ̄ɛ̄kū na̍a̍ Chu̍ūwa̍ fi̍nyāā nāā ma̍māa̍ āā, ‘Būŋgɛ̄ī ŋ̄ chu̍a̍ ma̍ tīāŋnu᷄ŋ o̍ Māsānɔ̄ɔ̍ Mɛ̄lɛ̄ka̍ lo̍ ve̍, tɛ̍ɛ̍mbūū būŋgɛ̄ī kēŋ te̍. To̍sa̍ nyɛ᷅ ŋ̄ chu̍a̍ ko̍ŋ bu̍ŋgɛ̄i̍ o̍ Māsānɔ̄ɔ̍ Mɛ̄lɛ̄ka̍ lo̍ wo̍.’

³⁴Kɛ̍, ya̍ ya̍, I̍ cho̍ nya̍ dīmūllo̍ māā wānā wa̍ būŋgɛ̄i̍ chūa̍a̍ le̍ īsɔ̄ɔ̍ o̍ īsɔ̄ɔ̍ to̍sā pɛ̍, ti̍a̍ŋnu᷄ŋ kpo̍so̍ŋ te̍. Ti̍a̍nu᷄ŋ o̍ fo̍nda᷄ŋ Mɛ̄lɛ̄ka̍a̍ le̍. Kāni̍ fu̍u̍le̍, lo̍ŋ Mɛ̄lɛ̄ka̍ kpe̍ŋgbe̍i̍ ndɔ̍ lēmāsāa̍ chō ni̍.

³⁵Ti̍a̍nu᷄ŋ o̍ chi̍e̍ēŋndo̍ le̍. Kāni̍ fu̍u̍le̍, chi̍e̍ēŋndo̍ chō māchūāā māā fo̍ndāŋ ndɔ̄ ha̍ndāā ŋ̄pēlū. Ti̍a̍nu᷄ŋ o̍ Chūlu̍sɛ̄lɛ̄m te̍. Kāni̍ fu̍u̍le̍, Mɛ̄lɛ̄ka̍ o̍ cho̍ māsā bɛ̍ndōo̍ wo̍, chi̍e̍e̍ ndɔ̄ɔ̍ cho̍ ko̍ŋ ni̍.

³⁶Ndu̍yɛ̍, wānā ti̍a̍nu᷄ŋ bɛ̍ɛ̍ o̍ bōllē nūmnde̍ nūm pi̍la̍ le̍ŋ te̍. Kāni̍ fu̍u̍le̍, yīīŋnde̍ nu̍m o̍ lēbōl, tē ī hūmbū i̍ cho̍ ni̍, lē pīlɛ̍ bɛ̍ɛ̍ a̍ nɔ̍lā le̍ŋ sīīŋgūū lē tīŋī le̍, kɛ̄lɛ̄ŋgāā tē ī tīŋī i̍ cho̍ ni̍, lē pīlɛ̍ bɛ̍ɛ̍, a̍ nɔ̍la̍ le̍ŋ sīīŋgūū lē hūmbū le̍.

³⁷Le̍la̍ŋ, lā ti̍a̍nu᷄ŋ te̍. Wānā wa̍ sūɛ̍i̍ to̍sā pɛ̍ a̍ di̍mi̍ āā, ‘I̍ cho̍ he̍ī ndo̍ō to̍sā.’ Tē a̍ ve̍ to̍sā le̍, a̍ di̍mi̍ āā, ‘I̍ cho̍ he̍ī to̍sā le̍.’ Nyɛ̄ o̍ nyɛ̄ chēle̍ŋ a̍ ha̍ndu̍ lēchōo̍ pɛ̍, mɛ̄ɛ̍ Māsa̍ Nyi̍nāā Wɔ̄ɔ̍ŋnda̍ ō nda̍ vēēlū vɛ̍lɛ̄ āā, Wānā Wɔ̍ɔ̍ŋndo̍ wo̍, mɛ̄ɛ̍ ndu̍ dɔ̍ū nu̍m dīōmndā lāŋ o̍ sōndō ni̍.”

³⁸Mi̍ Chi̍i̍sū hi̍a̍ū lāchī a̍ wāŋnda̍ pɛ̄ɛ̄kōo̍. Mbo̍ dīmūl nda̍ āā, “Lā tūēī māā na̍a̍ Chu̍ūwa̍ ma̍ pɛ̄ɛ̄kū fi̍nyāā nāā ma̍māa̍ āā, ‘Tē wāŋndo̍ pɛ̄l chāa̍ŋ ndɔ̍ hɔ̄lte̍ŋ pɛ̍, ndu̍ bɛ̍ɛ̍ lā pīɔ̍l ndu̍ hɔ̄lte̍ŋ. Tē wāŋndo̍ bɛ̄ŋi̍ chāa̍ŋ ndɔ̍ chīŋnde̍ pɛ̍, ndu̍ bɛ̍ɛ̍ lā bɛ̄ŋi̍ ndu̍ chīŋnde̍.’

³⁹Kɛ̍, ya̍ ya̍, I̍ cho̍ nya̍ dīmūllo̍ māā tē wāŋndo̍ tōsa̍l nu̍m sūɛ̍i̍ wɔ̍ɔ̍ŋnde̍ pɛ̍, mi̍ŋgūl ndu̍ māa̍ le̍. Ndu̍yɛ̍, tē wāŋndo̍ lɔ̄ɔ̄ nu̍m kpa᷅ŋnde̍ pɛ̍, ma̍l ndu̍ ō lɔ̄ɔ̍ vɛ̍lɛ̄ ī pīlɛ̍ī.

⁴⁰Tē wāŋndo̍ bīī se̍ī nūmndo̍ o̍ māsāa̍ lo̍ pɛ̍ le̍ mbō bīī dōmā nu̍mndo̍ o̍ nɔ̍ ba̍ā bɔ̄ɔ̍ le̍ wo̍ pɛ̍, mɔ̍sɔ̍ŋa̍ ndu̍ kē a̍ o̍ hi̍o̍ū bɛ̍ɛ̍ ko̍ŋ ba̍ā wo̍ fa̍ū.

⁴¹Ndu̍yɛ̍, tē so̍vɛ̄i̍nɔ̍ɔ̍ dīmi̍ pɛ̍ māā mɛ̄ɛ̍ mā chu̍a̍ wōlɔ̄ɔ̄lā ndɔ̄la̍ŋ mā li̍i̍la̍ ndu̍ a̍ la̍ŋ mī lā kūɛ̄ le̍ ti᷅ŋndo̍ ō pīlɛ̍, kɔ̍ a̍ la̍ŋ le̍ ti᷅ŋnda̍ŋ lā tīɔ̍ɔ̍ŋ.

⁴²Tē wāŋndo̍ hāu̍ bā pɛ̍ mbō pīɛ̍i̍ nu̍m nyɔ̄ɔ̍, ke̍ ndu̍. Ndu̍yɛ̍, tē wāŋndo̍ nyūna̍ nu̍m le̍ kūo̍o̍ pɛ̍, ke̍ ndu̍.”

⁴³O̍ ko̍ŋ kɔ̍ɔ̍lī, mi̍ Chi̍i̍sū pɛ̍ɛ̍kū wāŋnda̍ āā, “Lā tūēī ma̍ dīmūl na̍a̍ Chu̍ūwa̍ fi̍nyāā nāā ma̍māa̍ āā, ‘Lā kāāla̍ wa̍nāa̍ ka̍a̍la̍ nya̍ wa̍, kɛ̍, mī lā tu᷄l wānāa̍ tu̍l nya̍ lēyɛ̄ wa̍ lēyɛ̄.’

⁴⁴Kɛ̍, ya̍ ya̍, I̍ cho̍ nya̍ dīmūllo̍ māā lā kāāla̍ wa̍nāa̍ tu̍l nya̍ lēyɛ̄ wa̍. Ndu̍yɛ̍, mī lā pīɛ̍i̍ Mɛ̍lɛ̄ka̍ le̍ mbō dɔ̄ū wānāa̍ tu̍sī nya̍ nyɛ̄ pālāa̍ chōo̍ wa̍ sa̍lā.

⁴⁵Lā tōsa̍ he̍ī le̍ mī lā nɔ̄ ka̍a̍ māā chūāūwāā Mɛ̄lɛ̄ka̍, ndu̍ yɔ̍nūŋ māā fi̍nyā nyā o̍ cho̍ o̍ fo̍ndāŋ ndɔ̄ɔ̍ wo̍ ni̍. Kāni̍ fo̍ndōle̍, Mɛ̄lɛ̄ka̍ ndu̍ ndu̍, ō wa̍ wa̍nā kɛ̍ndɛ̄, o̍ wa̍ wa̍nā wɔ̍ɔ̍ŋ, nda̍ fa̍ū yɔ̄ŋgōo̍ nda̍ pāa̍le̍ŋ. Ndu̍yɛ̍, wānāa̍ to̍sā to᷅nya̍a̍ wa̍ ni̍, a̍ wānāa̍ to̍sā dɛ̍nɛ̍ wɔ̍ɔ̍ŋndo̍ wa̍, mbō yɔ̄ŋgu̍ pīɔ̍ɔ̍ le̍ nda̍ kpo̍u̍.

⁴⁶Tē ō wa̍ pɛ̍ māā wānāa̍ ka̍a̍la̍ nu̍m nda̍ māā nda̍ ko̍ ŋ̄ kāālā ni̍, mɛ̄ɛ̍ Mɛ̄lɛ̄ka̍ pa̍a̍wā nu̍m le̍ ko̍ŋ te̍. Kāni̍ fu̍u̍le̍, kɔ̍sɔ̄ŋnda̍ bɛ̍ɛ̍ ā tōsā le̍nde̍.

⁴⁷Ndu̍yɛ̍, tē ō wa̍ pɛ̍ māā nāa̍ ndi̍a̍a̍mɔ̍ɔ̍wa̍a̍ nu̍mnda̍ chūā ko̍ni̍ ŋ̄ yāā na̍āŋa᷅ndo̍ ni̍, mɛ̄ɛ̍ a̍ to̍sa̍ wɔ̍ nyɛ᷅ mbō hīōū chāāŋnda̍ le̍. Kāni̍ fu̍u̍le̍, wānāa̍ la̍a̍la̍ŋ a̍ Mɛ̄lɛ̄ka̍ le̍ wa̍ bɛ̍ɛ̍ ā tōsā ke̍ŋ.

⁴⁸Le̍la̍ŋ, nya̍ nya̍, lā wa̍ a̍ bɛ̍ndāā o̍ nɛ̄ī o̍ nɛ̄ī ni̍ŋ mɛ̄ɛ̍ Mɛ̄lɛ̄ka̍ Fi̍nyā nyā o̍ cho̍ ɛ̄chɛ̍nɛ̄ wo̍ chō ō bɛ̄ndāā o̍ nɛ̄ī o̍ nɛ̄ī ni̍ŋ yɛ̍.”