Read Southern Kisi Māa̍ti̍u̍ 7 Bible Online

Māa̍ti̍u̍ 7 - Southern Kisi bible

Māa̍ti̍u̍ 7

¹Mi̍ Chi̍i̍sū si̍lā āā, “Wānā o̍ wānā lā ki̍lūl wānā i̍ya᷅ma̍ le̍. Ko̍ŋ to̍sā ni̍, Mɛ̄lɛ̄ka̍ ki̍lūl nya̍ īyāma̍ le̍.

²Kāni̍ fo̍ndōle̍, mɛ̄ɛ̍ nya̍ kīlūl chāāŋnda̍ yāma̍ŋ yɛ̍, le̍nde̍ ko̍ni̍ Mɛ̄lɛ̄ka̍ kīlūl nya̍ yāmɛ̍i̍ ni̍. Ndu̍yɛ̍, dīōmndā nya̍ dīmī o̍ wāŋndo̍ yāmɛ̍i̍ kīlūllo̍ ni᷄ŋ nda̍ŋ, a̍ la̍ŋ ko̍ni̍ Mɛ̄lɛ̄ka̍ chō nya̍ yāmɛ̍i̍ kīlūl ni̍.

³Vɛ᷅ mā bu̍u̍lāŋ a̍ bīlte̍ŋ chāa̍ŋ nu᷄m o̍ lēhɔ̄l, kɛ̍ ndu̍yɛ̍, a̍ bu̍u̍lāŋ a̍ yɔ̄m bɛ̄ndu̍ cho̍ nūm pi̍la̍ o̍ lēhɔ̄l lo̍ le̍?

⁴Kɛ̄lɛ̄ŋgāā le̍, vɛ̄ɛ̍nɛ̍ ŋ̄ lōōkū yɛ̍ chāa̍ŋ nu᷄m dīmūl āā, ‘Hu̍ŋ I̍ hu᷅l nu̍m bīlte̍ŋ o̍ lēhɔ̄l’ nūm pi̍la̍ nɔ̍ pɛ̍ yɔ᷅m bɛ̄ndōo̍ o̍ lēhɔ̄l?

⁵Ā chō wāna̍ sōndō yēēlɛ̍i̍ bɛ̍ndū. So̍li̍ wɔ̍ fɛ̍lɛ̍ŋ yɔ᷅m bɛ̄ndu̍ cho̍ nūm pi̍la̍ o̍ lēhɔ̄l lo̍. O̍ ko̍ŋ, ā nɔ̄lā mā so̍li̍ bīlte̍ŋ chāa̍ŋ nu᷄m o̍ lēhɔ̄l, kāni̍ fo̍ndōle̍, ā wā ni᷅ŋ chɔ̄ɔ̍ nyɛ̄ kɛ̄ndɛ̄ wa̍la̍ŋ.”

⁶Mi̍ Chi̍i̍sū si̍lā vɛ̄lɛ̄ o̍ lētāle̍ ni᷄ŋ āā, “Lā ke᷅ tūŋnda̍ nyɛ᷄m cho̍ le̍ wa̍li̍ Mɛ̄lɛ̄ka̍a̍ wo̍ŋ te̍. Tē lā ke̍ nda̍ pɛ̍, o̍ ko̍ŋ kɔ̍ɔ̍lī, ā mūlu̍lu̍ŋ nya̍. Ndu̍yɛ̍, lā ke᷅ pēūwa̍ nyɛ̄m nyāŋ kɛ̍ndɛ̄ kɛ̍ndɔ᷄ŋ te̍. Tē lā ke̍ nda̍ mu̍ŋ pɛ̍, nīɔ̄ūwo̍ ko̍ni̍ nda̍ nīɔ̄ū mu̍ŋ ni̍.”

⁷“Lā nyūna̍ Mɛ̍lɛ̄ka̍ dīōm le̍ nyɛ̄ nya̍ hāu̍ bā wo̍. Ō nɔ̄lā mbō ke̍ nya̍ ndu̍. Ndu̍yɛ̍, lā nūūwa̍, lā chō sɔ̄lā. Lā kūndu̍ di̍o̍o̍, Mɛ̄lɛ̄ka̍ nɔ̄lā mbō kūmbu̍l nya̍.

⁸Kāni̍ fo̍ndōle̍, wānā o̍ wānā tē a̍ nyu̍na̍ Mɛ̄lɛ̄ka̍ dīōm le̍ nyɛ̄ ŋ̄ hāu̍ bā wo̍ pɛ̍, ō nɔ̄lā mbō ke̍ nu̍m ndu̍. Wānā o̍ wānā a̍ nu̍u̍va̍ pɛ̍, a̍ sɔ̍la̍. Ndu̍yɛ̍, wāna̍ ku̍ndū dīo̍o̍ pɛ̍, Mɛ̄lɛ̄ka̍ kūmbu̍l nu̍m.

⁹Nya̍ cho̍ fi̍nyāa̍ mi̍ lā nɔ̄ chūāūwa̍ wa̍ ki̍nɛ̍i̍, ɔ̍ɔ̄ wāna̍ cho̍ nya̍ tɛ̄ɛ̄ŋ, tē po̍ ndɔ̄ɔ̍ ō pīɛ̍i̍ ndu̍ bēe̍dīi̍yo̍ pɛ̍, ō ke̍ ndu̍ pōūwo̍ wo̍?

¹⁰Kɛ̄lɛ̄ŋgāā ɔ̍ɔ̄ wāna̍ cho̍ nya̍ tɛ̄ɛ̄ŋ, tē po̍ ndɔ̄ɔ̍ pīɛ̍i̍ ndu̍ sūūwo̍ pɛ̍, ō ke̍ ndu̍ kɛ̄ūwo̍ wo̍? Wānā bɛ̍ɛ̍.

¹¹Nāa̍ nya̍ wānāā yɔ̄ŋ wɔ̄ɔ̍ŋnda̍ sīna̍ wɔ̄ le̍ chūāūwāā nyāa̍ nyɛ̄m kɛ̄ndɔ᷄ŋ kīo̍o̍, lā ke᷅ nda̍ ŋ̄ wɔ̄ɔ̍ŋndo̍ŋ te̍, Mɛ̄lɛ̄ka̍ Fi̍nyā nyā o̍ cho̍ chōo̍ cho̍o̍ wo̍ yɛ̄? Kīo̍o̍ o̍ ke᷅ wānāa̍ pi̍ɛ̍ī ndu̍ wa̍ nyɛ̄m kɛ̄ndɔ᷄ŋ ni̍.

¹²“Ka̍ā ŋ̄ hɛ̄nāŋ māā chāa̍ŋ nūm to̍sa̍l nu̍m ndo̍, nūm bɛ̍ɛ̍ to̍sa̍l chāāŋnda̍ ka̍ā kōŋ. Kāni̍ fo̍ndōle̍, sāwāla̍ Mɛ̄lɛ̄ka̍ ke̍ Mūu̍sē la̍ŋ nyɛ̄ la̍ di̍mi̍ wo̍, a̍ nyɛ̄ wānāa̍ su̍a̍ā le̍ Mɛ̄lɛ̄ka̍ wa̍ ā pɛ̄ɛ̄ku̍ wāŋnda̍ wo̍, tɛ̄ɛ̄sīāā ndɔ̄ɔ̍ cho̍ ko̍ŋ ni̍.”

¹³Mi̍ Chi̍i̍sū hi̍a̍ū lāchī a̍ pɛ̄ɛ̄kōo̍ āā, “Lā kēēku̍ o̍ dīō sɔ̍ɔ̍kɛ̍nyɛ̍ɛ̍ wo̍. Kāni̍ fo̍ndōle̍, dīo̍o̍ le̍ lūɛ̄īyɔ̄ɔ̍ o̍ fo̍ndāŋ nyɛ̄ pālāa̍ nāa̍ Mɛ̄lɛ̄ka̍ dūāū wa̍nāā yɔ̄ŋ wɔ̄ɔ̍ŋnda̍ wa̍, ndu̍ ndu̍ ō tūāŋgāā o̍ cho̍ ni̍. Ndu̍yɛ̍, nɛ̄īyo̍ le̍ kɔ̄la̍ŋ lo̍ŋ, ndu̍ ndu̍ bɛ̍ɛ̍ŋ bɛ̍ɛ̍ŋ o̍ cho̍ le̍ kɔ̄la̍ŋ ni̍. Ndu̍yɛ̍, wānāa̍ cho̍ kɔ̄la̍ŋ a̍ nɛ̄ī ko̍ŋ nda̍, ā chō bɔ̄ɔ̍ fa̍ŋgā.

¹⁴Kɛ̍, dīo̍o̍ le̍ lūɛ̄īyɔ̄ɔ̍ o̍ yōōmū kpe̍e̍kpe̍i̍yo̍ ni᷄ŋ, ndu̍ sɔ̍ɔ̍kɛ̍nyɛ̍ɛ̍ bɛ̍ndū o̍ cho̍ ni̍. Ndu̍yɛ̍ nɛ̄i̍ ku̍ɛ̄ lo̍ŋ ndo̍, ō kēndū lākɔ̄ bɔ̄ɔ̍. Ndu̍yɛ̍, wānāa̍ ku̍ā lo̍ŋ nda̍, ā cho̍ a̍ bɔ̍ɔ̍ le̍.”

¹⁵“Wānāā lāchōōwāa̍ a̍ ba̍lū di̍mīo̍o̍ māā wānāa̍ su̍a̍ā le̍ Mɛ̄lɛ̄ka̍ wa̍ nda̍ chō ni̍, kɛ̍ ndu̍yɛ̍, ā cho̍ yɛ̍ wānāā wāā le̍nde̍ le̍ wa̍, lā mānda̍ŋ a̍ nda̍. Tē ā kōma̍l nya̍ pɛ̍ ā bīī ā mɔ̄ɔ̄vi̍a̍a̍ yɛ̍mbɔ᷄ŋ, ā chɔ᷄m o̍ hɔ̄lla̍ māā wānāā kɛ̄ndɛ̄. Kɛ̍ ndu̍yɛ̍, mɛ̄ɛ̍ vīsīāā bīyāa̍ lūɛ̄ī nu̍a̍ā sāā ku̍ndāa̍ tɛ̄ɛ̄ŋ yɛ̍, le̍nde̍ nda̍ chō o̍ kɔ̄lta̍ŋ ni᷄ŋ ni̍.

¹⁶O̍ kēlālā ndāla̍ŋ nya̍ lōōkū ni̍ŋ nda̍ pɛ̄ŋgu̍ si̍nā ni̍. Yɔ̄m ŋ̄yɔ̄ɔ̍ ō ku᷅m kīle̍pīi̍ya̍ŋ te̍. Le̍nde̍ ko̍ni̍, yɔ̄m ŋ̄yɔ̄ɔ̍ ō ku᷅m fi̍kīi̍ya̍ŋ te̍.

¹⁷Yɔ᷄m cho̍ yɔ̄m kɛ̄ndɔ̄ɔ̍ wo̍, ndu̍ ku̍ām ko̍mɔ̄ɔ̄ kɛ̄ndɔ̄ɔ̍ ni̍. Ndu̍yɛ̍, yɔ᷄m cho̍ yɔ᷅m kɛ̄ndɛ̄ le̍ wo̍, ndu̍ ku̍ām ko̍mɔ̄ɔ̄ wɔ̄ɔ̍ŋndo̍ ni̍.

¹⁸Yɔ᷄m cho̍ yɔ̄m kɛ̄ndɔ̄ɔ̍ wo̍, ō ku᷅m ko̍mɔ̄ɔ̄ wɔ̄ɔ̍ŋ te̍. Ndu̍yɛ̍ vɛ̄lɛ̄, yɔ᷄m cho̍ yɔ᷅m kɛ̄ndɛ̄ le̍ wo̍, ō ku᷅m ko̍mɔ̄ɔ̄ kɛ̄ndɛ̄ le̍.

¹⁹Ndu̍yɛ̍, yɔ̄m o̍ yɔ᷄m ku̍m yɛ̍ kōmɔ̄ɔ̄ kɛ̄ndɛ̄ le̍, mɛ̄ɛ̍ ā chō ndu̍ kīo̍ŋ mā dɔ̄ū ndu̍ o̍ yīŋ.

²⁰Le̍la̍ŋ, o̍ kēlālā ndāla̍ŋ nya̍ lōōkū wānāā lāchōōwāa̍ ha̍ā pɛ̄ŋgu̍ si̍nā ni̍.”

²¹Mi̍ Chi̍i̍sū di̍mī āā, “Wānāa̍ cho̍ ha̍ā dīmīo̍o̍ te̍le̍ŋ o̍ te̍le̍ŋ āā, ‘Nu᷄m cho̍ Ma̍sānɔ̄ nūu̍ ni̍, nu᷄m cho̍ Ma̍sānɔ̄ nūu̍ ni̍,’ ō cho̍ nda̍ fa̍ū le̍ a̍ ku̍ā ni̍ŋ o̍ māsāle̍ Mɛ̄lɛ̄ka̍le̍ŋ ni᷄ŋ te̍. Fi̍nyā nūu̍ o̍ cho̍ ɛ̄chɛ̍nɛ̄ wo̍, wānāa̍ to̍sā nyɛ᷅ o̍ hɛ̍na̍ŋ ndo̍ wa̍, nda̍ ko̍ni̍ ku̍ā ni̍ŋ lo̍ŋ ni̍.

²²Ndu̍yɛ̍, tē pāa̍le̍ Mɛ̄lɛ̄ka̍ kɔ̄ɔ̄sā ni̍ŋ a̍ wāŋndā chīe̍e̍ya̍ le̍ŋ lē fūūlu̍u̍ pɛ̍, wāŋnda̍ ta̍u̍ a̍ di̍mūl la̍ ni̍ŋ āā, ‘Māsānɔ̄ɔ̍, na̍a̍ ŋ̍ wa̍ wāŋnda̍ sūɛ̍i̍ Mɛ̄lɛ̄kɛ̍i̍ dīmūllo̍ a̍ kpāāyā nu̍mndo̍ ni̍. Ndu̍yɛ̍, ŋ̄ wa̍ dīōlā nūm nda̍ŋ pīɔ̄lɔ̄ɔ̍ o̍ nyi̍nāā wɔ̄ɔ̍ŋnda̍ tōūwɔ̄ɔ̍ ni᷄ŋ, a̍ wa̍lta̍ kɔ̄ndɔ̄fi̍ltā ka̍ ka̍ to̍sāa̍.’

²³Ndu̍yɛ̍, mī I̍ lo̍ o̍ ko̍ŋ mī di̍mu̍l nda̍ kpe̍nde̍ke̍le̍ a̍a̍, ‘Lā cho̍ bu̍ɛ̍i̍yāā nī kpo̍so̍ŋ te̍. Lā fāŋa̍ŋ ya̍ na̍nu᷄ŋ. Lā chō wānāā kɔ̄l vēsɛ̍i̍ya̍a̍ bɛ̍ndū.’ ”

²⁴“Dīōmndā nīla̍ŋ nda᷅ŋ, wāna̍ tu̍e̍ī la̍ŋ pɛ̍, o̍ ko̍ŋ kɔ̍ɔ̍lī, mbō tōsa̍ nyɛ̄ la̍ di̍mi̍ wo̍ pɛ̍, mɛ̄ɛ̍ ō chō māchūāā māā wāna̍ kɔ̄l kālu̍ pi᷅lɛ̍ o̍ ta̍ŋgu̍l chīɛ̄ī ndɔ̄ɔ̍ o̍ lɛ̄ŋndē wɔ̄sɔ̄kɔ̍le̍ŋ chōo̍ wo̍.

²⁵Mɛ̄ɛ̍ o̍ chi̍i̍ ndu̍ tāŋgūl, mi̍ pīɔ̄ɔ̄ bɛ̄ndōo̍ tūāl. O̍ ko̍ŋ kɔ̍ɔ̍lī, mi̍ mɛ̄ŋnda̍ŋ mā hūŋ hūnɔ̄ɔ̍ pi̍la̍. Mi̍ hūēīye̍ hūāŋ hɔ̄ŋndo̍ pi̍la̍. Mi̍ ī kūāŋ chīɛ̄īyo̍ ho̍ō kpe̍e̍kpe̍i̍. Kɛ̍, ō kōmba̍ le̍, kāni̍ fu̍u̍le̍, ō tāŋgu̍l ndu̍ o̍ lɛ̄ŋndē wɔ̄sɔ̄kɔ̍le̍ŋ chōo̍.

²⁶“Kɛ̍, dīōmndā nīla̍ŋ nda᷅ŋ, wāna̍ tu̍e̍ī lāŋ pɛ̍, kɛ̍ ndu̍yɛ̍, mbō tōsa̍ nyɛ᷅ la̍ di̍mi̍ wo̍ le̍, mɛ̄ɛ̍ ō chō māchūāā māā dīɔ̄mndo̍ o̍ ta̍ŋgu̍l chīɛ̄ī ndɔ̄ɔ̍ o̍ si̍o̍ōŋnde̍ chōo̍ wo̍.

²⁷Mɛ̄ɛ̍ o̍ ta̍ŋgu̍l, mi̍ pīɔ̄ɔ̄ bɛ̄ndōo̍ tūāl. O̍ ko̍ŋ kɔ̍ɔ̍lī, mi̍ mɛ̄ŋnda̍ŋ mā hūŋ hūnɔ̄ɔ̍ pi̍la̍. Mi̍ hūēīye̍ ī hūāŋ hɔ̄ŋndo̍ pi̍la̍. Mi̍ ī kūāŋ chīɛ̄īyo̍ ho̍ō kpe̍e̍kpe̍i̍. Mi̍ chīɛ̄ī kālāa̍ kōmbā wɔ̍lɔ̄wɔ̄lɔ̄. O̍ ko̍ŋ kɔ̍ɔ̍lī, mi̍ nyɛ̄ o̍ nyɛ̄ tāmbū fa̍u̍.”

²⁸Mɛ̄ɛ̍ Chi̍i̍sū chi̍i̍ sɔ̄ɔ̍ŋ mu᷅ŋ dīmī, mi̍ kɔ̄ndɔ̄fi̍llo̍ bīī fāŋgāa̍ kpo̍u̍ a̍ mɛ̄ɛ̍ Chi̍i̍sū pɛ̍ɛ̍kū wa᷅ŋnda̍ yɛ̍.

²⁹Kāni̍ fo̍ndōle̍, ndu̍ ndu̍, pɛ̄ɛ̄kū ndɔ̄ɔ̍ ō ve̍ mɛ̄ɛ̍ wānāa̍ pɛ̍ɛ̍kū wa᷅ŋnda̍ sāwāla̍ Mɛ̄lɛ̄ka̍la̍ŋ nda̍ ā pɛ̄ɛ̄kū wa᷅ŋnda̍ yɛ̍ le̍. Ndu̍ ndu̍, pɛ̄ɛ̄kū ndɔ̄ɔ̍ ō wa̍ māwāā māā wāna̍ kpāāyā bɛ̍ndū.