Read Southern Kisi Ma̍kī 1 Bible Online

Ma̍kī 1 - Southern Kisi bible

Ma̍kī 1

¹Yōōŋgū kɛ̄ndɔ̄ɔ̍ cho̍ ho̍ō a̍ Chi̍i̍sū Ki̍li̍tī o̍kɔ̄ɔ̄ ni̍, o̍ cho̍ Po̍ Mɛ̄lɛ̄ka̍a̍ wo̍.

²Ō kāndu̍ŋ a̍ mɛ̄ɛ̍ wāna̍ su̍a̍ā le̍ Mɛ̄lɛ̄ka̍ wo̍ Āīsa̍yā o̍ po̍o̍nyi̍a̍a̍ yɛ̍. Mbo̍ dīmī āā, “Ya̍ Mɛ̍lɛ̄ka̍, I̍ cho̍ bu̍ɛ̍ī nūu̍ vīōmɔ̄ɔ̄ nu̍m lāchī mbō kɔ̍ to̍o̍sīāā pɔ̄ɔ̄ nɛ̄īyo̍ nu̍m lāchī.

³Wāŋndo̍ chō yōndāa̍ o̍ po̍llo̍ ni᷄ŋ. Ō chō dīmīo̍o̍ āā, ‘Lā tōōsi̍a̍a̍ nɛ̍īyo̍ Māsānɔ̄ɔ̍ Mɛ̄lɛ̄ka̍ lāchī. Lā tōōsi̍a̍a̍ ndu̍ mbō wa̍ nyɛ̄ kɛ̄ndɛ̄ sa̍kpō.’ ”

⁴Ndu̍yɛ̍, mi̍ Chɔ᷄ŋ hūŋ mbo̍ wā wāŋnda̍ yīŋɔ̄ɔ̍ a̍ sūɛ̍i̍ Mɛ̄lɛ̄kɛ̍i̍ dīmīo̍o̍ o̍ po̍llo̍ ni᷄ŋ. Mbo̍ dīmī āā, “Lā ma᷄l yɔ̍ŋndā nyāla̍ wɔ̍ɔ̍ŋnda̍ŋ mī lā sɔ̄la̍ yīŋɔ̄ɔ̍. Ko̍ŋ to̍sā ni̍, mī Mɛ̄lɛ̄ka̍ ma᷄l nya̍ le̍ yɔ̄ŋndā nyāla̍ wɔ̍ɔ̍ŋnda̍ŋ.”

⁵Mi̍ wānāa̍ chɛ̍ŋ o̍ lɛ̄ŋndē Chūdi̍a̍āle̍ŋ ni᷄ŋ ki̍nɛ̍i̍ ya̍, a̍ Chūlu̍sɛ̄lɛ̄m chi̍e̍e̍ ya̍, ā ka̍ ka̍ ku̍ā nāa̍ ndu̍ chu̍a̍. Mɛ̄ɛ̍ nda̍ chɔ̄ɔ̄mu̍u̍ yɔ̄ŋndā ndāla̍ wɔ̍ɔ̍ŋnda̍ŋ, mbo̍ yīŋ nda̍ o̍ Pīo̍o̍ Chɔ̍ɔ̍dāŋ.

⁶Nyɛ̄lā nda̍ tōōsīāā a̍ yīīŋīī nyɔ̍mi̍a̍a̍ la̍ŋ Chɔ᷄ŋ ndu̍ o̍o̍ wo̍u̍nūŋ ni̍. Ndu̍yɛ̍, yāu̍le̍ yāu̍ vīsīo̍o̍ ndu̍ o̍o̍ yi̍i̍nūŋ o̍ chāŋ ni̍. Nyɛ̄ ndɔ̄ di̍a̍a̍ wa̍ so̍o̍nu̍a̍a̍ a̍ līa̍a̍ŋ ni̍.

⁷Mbo̍ dīmūl wāŋnda̍ āā, “Wāna̍ cho̍ hūnɔ̄ɔ̄ ya̍ kɔ̄ɔ̄lī wo̍ nɔ̄ kpāāyāa̍ ō hīōū ya̍. I̍ cho̍ o̍ sɔ᷅vɛ̍ mī na̍ŋgu̍ŋ mī I̍ ti̍mbi̍ yūēī ndūɛ̍i̍ lākɔ̄ɔ̄vɛ̄i̍ye̍ le̍.

⁸Ya̍ ya̍ I̍ pu̍lū nya̍ pūlɔ̄ɔ̍ Mɛ̄lɛ̄ka̍a̍ a̍ mɛ̄ŋnda̍ŋ, kɛ̍, ndu̍ cho̍ nya̍ yīŋɔ̄ɔ̄ a̍ Nyi̍nā Mɛ̄lɛ̄ka̍a̍.”

⁹O̍ te̍le̍ŋ Chɔ᷄ŋ wa̍ wāŋnda̍ yīŋɔ̄ɔ̍ wo̍, mi̍ Chi̍i̍sū cha̍ŋ Na̍a̍sa̍lūɛ̄ī chi̍e̍e̍ o̍ būŋgɛ̄ī Kāli̍līle̍ŋ ni᷄ŋ. Mi̍ Chɔ᷄ŋ yīŋ Chɔ̍ɔ̍dāŋ o̍ pēēlo̍.

¹⁰Mɛ̄ɛ̍ Chi̍i̍sū fu̍la̍ o̍ mɛ̄ŋnda̍ŋ ni᷄ŋ, mbo̍ chā ha̍la̍a̍ ō kūmbīa̍ŋ. Ndu̍yɛ̍, mi̍ Nyi̍na̍ Mɛ̄lɛ̄ka̍a̍ tūāl ndu̍ chōo̍ o̍ īka᷅ŋgbo̍.

¹¹Mi̍ dīōmndo̍ sūāā ɛ̄chɛ̍nɛ̄ āā, “Nu᷄m cho̍ Po̍ nūu̍ ni̍. I̍ ka̍a̍la̍ nu̍m. Ndu̍yɛ̍ I̍ hi̍ni̍ kɔ̄l a̍ nūm.”

¹²O̍ ko̍ŋ kɔ̍ɔ̍lī, mi̍ Nyi̍na̍ Mɛ̄lɛ̄ka̍a̍ tōsā mi̍ Chi̍i̍sū ku̍ā o̍ po̍llo̍ ni᷄ŋ.

¹³Lo̍ŋ o̍ lo̍ ni̍ le̍ pālɛ̍i̍ be̍le̍-hi̍ɔ̍ɔ̍lu̍. Mi̍ Sēta̍nā, māsa̍ nyi̍nāā wɔ̄ɔ̍ŋnda̍, tɔ̄ɔ̄nda᷄ŋ ndu̍ le̍ hāli̍ kpe̍ŋ mī ndu̍ o̍o̍ to̍sa̍ yɔ̄ŋ wɔ̄ɔ̍ŋndo̍. Chi̍i̍sū wa̍ nāa̍ vīsīāā yōndūa̍a̍ wa̍ wā. Mi̍ ki̍i̍la̍a̍ Mɛ̄lɛ̄ka̍a̍ hūŋ ma̍ kē ndu̍ nyɛ̄ ndu̍ o̍o̍ ye̍e̍ma̍ wo̍.

¹⁴O̍ kōŋ kɔ̍ɔ̍lī, mi̍ Chi̍i̍sū ku̍ā Kāli̍lī. Mbo̍ kɔ̍ di̍mī Yōōŋgū Kɛ̄ndɛ̍ Mɛ̄lɛ̄ka̍a̍ lo̍ŋ. Lɔ̍ɔ̍ pa̍ he̍ī yɔ̄nūŋ, nda̍ a̍a̍ bi̍ī ni᷅ŋ Chɔ᷄ŋ ma̍ dūāū ndu̍ o̍ chīɛ̄ī mānyūmndo̍ ni᷄ŋ.

¹⁵Mi̍ Chi̍i̍sū ba̍lū a̍ dīmīo̍o̍ āā, “Bōōnde̍i̍ fu̍u̍lu̍u̍ he̍ī ni̍. Te̍le̍ŋ Mɛ̄lɛ̄ka̍ chō wā māsāa̍ wāŋnda̍ chōo̍ wo̍ chō ni᷅ŋ kpɛ̍ɛ̍lūŋ. Le̍la̍ŋ, lā ma᷄l yɔ̍ŋndā nyāla̍ wɔ̍ɔ̍ŋnda̍ŋ mī lā lāāla̍ŋ a̍ Yōōŋgū Kɛ̄ndɛ̍ Mɛ̄lɛ̄ka̍a̍.”

¹⁶Mɛ̄ɛ̍ Chi̍i̍sū wa̍ kɔ̄la̍ŋ a̍ kɔ̄ŋgɔ̍ Mɛ̄ŋmā Ībūŋga᷄ŋ Kāli̍lī dēmūllo̍, mbo̍ kōmāl pūa̍a̍ nda̍ ŋi̍ɔ̍ɔ̍ŋ, Sa̍i̍mɔ̄ŋ nda̍ A̍ndūlū pɔ̍mbɔ̄ ndɔ̄. Ā wa̍ yālāla̍ŋ wūūwo̍ o̍ mɛ̄ŋmā ībūŋga᷄ŋ ni᷄ŋ. Pūa̍a̍ ha̍ā yɔ̄ɔ̄yāa̍ wa̍ wa̍li̍ ndāa̍ ni̍.

¹⁷Mbo̍ dīmūl nda̍ āā, “Lā hu᷄ŋ mī lā sīmnu᷄ŋ bu̍ɛ̍i̍yāā nī mī pɛ̍ɛ̍kū nya̍ a̍ yɔ̄ɔ̄yā chēle̍ŋ. Ndu̍ cho̍ ni̍ mī lā tōsa̍ mī wāŋnda̍ sīmnu᷄ŋ bu̍ɛ̍i̍yāā nī.”

¹⁸Ma̍ māl yālāla̍ ndāla̍ŋ o̍ lē pīlɛ̍ ni᷄ŋ kpe̍, ma̍ tūāl ndu̍ kɔ̄ɔ̄lī.

¹⁹Mɛ̄ɛ̍ Chi̍i̍sū hi̍o̍ū lāchī ti᷄ŋ, mbo̍ kōmāl vɛ̄lɛ̄ pūa̍a̍ nda̍ ŋi̍ɔ̍ɔ̍ŋ. Pūa̍a̍ ha̍ā bɛ̍ɛ̍ pɔ̄mbɔ̄ɔ̍ a̍ bɛ̄ndōo̍ nda̍ wa̍ ni̍. Ā wa̍ hɔ̄lāā tūlu̍ nda̍ fi̍nyā nda̍ā o̍ dɛ̄ndɔ̄ɔ̍ ni᷄ŋ, ya̍lāla̍ nda̍la̍ŋ sūēndīo̍o̍. Dīōlā ndāla̍ŋ la̍ wa̍ ni̍ āā, Chēmi̍si̍, a̍ Chɔ᷄ŋ, a̍ Sɛ̍bɛ̍dīī fi̍nyā ndā.

²⁰Mbo̍ dīmūl nda̍ āā, “Lā hu᷄ŋ nāa̍ ya̍ chu̍a̍.” Mi̍ pūa̍a̍ ha̍ā mɛ̄ī fi̍nyā nda̍ a̍ pūa̍a̍ ndāa̍ wa̍lla̍ o̍ dɛ̄ndɔ̄ɔ̍ ni᷄ŋ ma̍ tūāl Chi̍i̍su̍ kɔ̄ɔ̄lī.

²¹Ma̍ fūūlūū Kēpa̍a̍nīɔ̄m chi̍e̍e̍. Mɛ̄ɛ̍ pāa̍le̍ pɛ̍ŋgīāālē Chu̍ūwa̍ lē fūūlu̍u̍, mi̍ Chi̍i̍sū ku̍ā o̍ chīɛ̄ī Chu̍ūwa̍ pīɛ̄ī Mɛ̍lɛ̄ka̍ wo̍ ni᷄ŋ. Mbo̍ kāndū wāŋnda̍ pɛ̄ɛ̄kōo̍ o̍ pāa̍le̍ŋ nde᷅ŋ chōo̍.

²²Wānāa̍ wa̍ o̍ chīɛ̄īyo̍ ho̍ō ni᷄ŋ ma̍ tūɛ̄ī Chi̍i̍su̍ pɛ̄ɛ̄kōo̍ wa̍, mi̍ kɔ̄ndɔ̄fi̍llo̍ bīī nda̍ ta̍u̍ ta̍u̍ a̍ mɛ̄ɛ̍ o̍ pɛ̍ɛ̍kū wa᷅ŋnda̍ yɛ̍. Kāni̍ ndu̍ ndu̍, pɛ̄ɛ̄kū ndɔ̄ɔ̍ ō ve̍ mɛ̄ɛ̍ wānāa̍ pɛ̍ɛ̍kū wa᷅ŋnda̍ sāwāla̍ Mɛ̄lɛ̄ka̍la̍ŋ nda̍ ā pɛ̄ɛ̄kū wa᷅ŋnda̍ yɛ̍ le̍. Ndu̍ ndu̍, pɛ̄ɛ̄kū ndɔ̄ɔ̍ ō wa̍ māwāā māā wāna̍ kpāāyā bɛ̍ndū.

²³O̍ pɛ̄ɛ̄kōo̍ ho̍ō ni᷄ŋ, mi̍ pōo̍ pūm lūɛ̄ī nda̍ tɛ̄ɛ̄ŋ. Pōo̍ ho̍ō yɛ̍, nyi̍nā wɔ̄ɔ̍ŋndo̍ wa̍ ndu̍ kɔ̄ɔ̄lī.

²⁴Mbo̍ dēŋī. Mi̍ nyi̍nā wɔ̄ɔ̍ŋ wa̍ ndu̍ kɔ̄ɔ̄lī wo̍ nyūnā Chi̍i̍sū āā, “Vɛ᷅ sōndōo̍ wōūwo̍ o̍ sūɛ̍i̍ nyi̍nāā wɔ̄ɔ̍ŋnda̍ ni᷄ŋ mɛ̄ɛ̍ yā cho̍ nu̍a̍ā yɛ̍, nūm Chi̍i̍su̍ fu̍la̍ Na̍a̍sa̍lūɛ̄ī yo̍? Le̍ na̍a̍ tɛ̄ɛ̄mbūūwo̍ ŋ̄ hīŋ ni̍? I̍ si̍nā wāna̍ ŋ̄ chō wo̍. Wāna̍ cho̍ le̍ Mɛ̄lɛ̄ka̍ wo̍ ŋ̄ chō ni̍.”

²⁵Mi̍ Chi̍i̍sū kpa̍ā nyi̍nā wɔ̄ɔ̍ŋ wa̍ pōo̍ ho̍ō kɔ̄ɔ̄lī wo̍ āā, “Me̍i̍, mā fa̍ŋa̍ŋ po̍o̍ ho̍ō kɔ̄ɔ̄lī.”

²⁶Mi̍ nyi̍nā wɔ̄ɔ̍ŋ kōŋ chūā pōo̍. Mbo̍ dēŋī chōo̍ cho̍o̍ kpe̍le̍ŋ. Mbo̍ fāŋa᷄ŋ ndu̍ kɔ̄ɔ̄lī.

²⁷Mi̍ kɔ̄ndɔ̄fi̍llo̍ bīī vɛ̄lɛ̄ wāŋnda̍. Ma̍ kāndū nyūūni̍āŋndo̍ nda̍ pi̍la̍ tɛ̄ɛ̄ŋ āā, “Ī māā vɛ̄ɛ̍nɛ̍ I̍ cho̍ yɛ̄ he̍ī? Bāā pɛ̄ɛ̄kū sɛ̄nɛ̄īyo̍ ni̍? Ye̍ē pōo̍ ho̍ō nɔ̄ kpāāyāa̍ mbō sōō bɛ̍ɛ̍ nāa̍ nyi̍nāā wɔ̄ɔ̍ŋnda̍ chūā, ndu̍yɛ̍, mā tūēī ndu̍ dīōm.”

²⁸Mi̍ tɔ̍ɔ̍ Chi̍i̍sōo̍ tīū si̍lɔ̍ o̍ lɛ̄ŋndē Kāli̍līle̍ŋ ni᷄ŋ.

²⁹Mɛ̄ɛ̍ Chi̍i̍sū nda̍ Chēmi̍si̍, a̍ Chɔ᷄ŋ, a̍ bu̍ɛ̍i̍yāā ndūa̍a̍ ā pīli̍a̍ā fūlā o̍ chīɛ̄ī Chu̍ūwa̍ pīɛ̄ī Mɛ̍lɛ̄ka̍ wo̍ ni᷄ŋ, ma̍ kūā sa̍kpō o̍ chīɛ̍i̍ Sa̍i̍mɔ̄ŋ a̍ A̍ndūlū wo̍.

³⁰La̍nɔ̍ɔ̍ Sa̍i̍mɔ̄ŋ kāla̍ ndɔ̄ wa̍ īhīni̍ o̍ kpēlē chīɛ̄ī ni̍ŋ a̍ dīāllūŋ tūūwo̍ŋ. Mɛ̄ɛ̍ Chi̍i̍sū fu̍u̍lu̍u̍ lo̍ŋ, ma̍ dīmūl ndu̍ a̍ ndu̍ o̍kɔ̄ɔ̄.

³¹Mi̍ Chi̍i̍sū ku̍ā nāa̍ ndu̍ chu̍a̍. Mbo̍ sāā ndu̍ bāa̍. Mbo̍ chūā ndu̍ īhīni̍ o̍ kpēlē. Mi̍ dīāllūŋ tūūwo̍ŋ ŋ̄ pɛ̄ŋgī. O̍ ko̍ŋ kɔ̍ɔ̍lī mbo̍ tōōsīāl nda̍ nyɛ̄ dīa̍a̍.

³²Mɛ̄ɛ̍ pāa̍le̍ŋ lē de᷄l mi̍ nyūmnda̍ŋ mā tūāl, mi̍ wāŋnda̍ hūŋ a̍ wānāā lānāāwa̍ a̍ wānāā nyi̍nāā wɔ̄ɔ̍ŋndā wa̍ kɔ̄ɔ̄lī wa̍ kpo̍u̍ nāa̍ Chi̍i̍sū chu̍a̍.

³³Mi̍ wāŋnda̍ o̍ chi̍o̍o̍ ho̍ō ni᷄ŋ kpo̍u̍ a̍ chu̍ūŋgi̍āŋ na̍a̍ pi᷅lɛ̍ o̍ chīɛ̄ī Chi̍i̍sū wa̍ ni᷄ŋ ndo̍ dīō.

³⁴Mi̍ Chi̍i̍sū si̍ŋgī wānāa̍ wa̍ a̍ nāālā yɛ̍ yɛ̍la̍ŋ nda̍. Mbo̍ tūāū nyi̍nāā wɔ̄ɔ̍ŋnda̍ ta̍u̍ wa̍nāā nyi̍nāa̍ wa̍ kɔ̄ɔ̄lī wa̍ kɔ̄ɔ̄lī. Chi̍i̍sū ndu̍ o̍o̍ chɛ᷅l mī nyi̍nāā kāŋ nda̍ a̍a̍ so̍ō nyɛ̄ o̍ nyɛ̄ le̍. Fo̍ndōle̍, nyi̍nāa̍ nda̍ a̍a̍ si̍nā wa᷅na̍ ndu̍ o̍o̍ wa̍ wo̍.

³⁵Dīi̍māndɔ̄ɔ̍ a̍ dītɛ̍ɛ̄ŋ pāa̍le̍ si̍a̍a̍, mi̍ Chi̍i̍sū ti̍a̍ndū o̍ lūa̍a̍ŋ. Mbo̍ māl chi̍o̍o̍. Mbo̍ kūā nāa̍ yo̍lo̍līa̍a̍. Mbo̍ pīɛ̄ī Mɛ̄lɛ̄ka̍ lo̍ŋ.

³⁶Mi̍ Sa̍i̍mɔ̄ŋ nda̍ chāāŋāā ndūa̍a̍ ā kūā ndu̍ nūūvīa̍a̍.

³⁷Mɛ̄ɛ̍ nda̍ kūɛ̄, ma̍ sāālu᷄ŋ ndu̍. Ma̍ dīmūl ndu̍ āā, “Wānā o̍ wānā fe̍e̍ cho̍ nu̍m ni᷅ŋ hāū nu̍u̍vīa̍a̍.”

³⁸Kɛ̍ mi̍ Chi̍i̍sū dīmūl nda̍ āā, “Ŋ̄ kɔ̄nu᷅ŋ o̍ chi̍o̍o̍ŋ ŋ̄ pīlɔ᷅ŋ mī I̍ kɔ̍ di̍mī Yōōŋgū Kɛ̄ndɛ̍ Mɛ̄lɛ̄ka̍a̍ lo̍ŋ. Le̍ sa̍bōo̍ ho̍ō ya̍ I̍ hi᷅ŋ ni̍.”

³⁹Mi̍ Chi̍i̍sū ku̍ā o̍ lɛ̄ŋndē Kāli̍līle̍ŋ ni᷄ŋ. Mbo̍ kɔ̍ di̍mī Yōōŋgū Kɛ̄ndɛ̍ Mɛ̄lɛ̄ka̍a̍ o̍ chīɛ̄īlā Chu̍ūwa̍ pīɛ̄ī Mɛ̍lɛ̄ka̍ la̍ŋ ni᷄ŋ. Mbo̍ tūāū nyi̍nāā wɔ̄ɔ̍ŋnda̍ wāŋnda̍ kɔ̄ɔ̄lī.

⁴⁰Mi̍ po̍ pi᷅lɛ̍ hūŋ nāa̍ Chi̍i̍sū chu̍a̍ a̍ nāā wɔ̄ɔ̍ŋ pūm ndu̍ lēkɔ̄ɔ̍. Mbo̍ bāŋ wūla̍ŋ, mbo̍ nyɔ̄ɔ̄lū ndu̍. Mbo̍ dīmūl ndu̍ āā, “Fāllo̍, si̍ŋgi̍ ya̍ fɔ̍ mī si̍mnu᷄ŋ o̍ di̍a̍ndāā Mɛ̄lɛ̄ka̍ o̍ hɔ̄l. Ā nɔ̄lā mā si̍ŋgi̍ ya̍, tē ō wa̍ pɛ̍ mā chɛ̍l.”

⁴¹Mi̍ nyīɛ̍ɛ̍ye̍ bīī Chi̍i̍su̍ ta̍u̍ le̍ pōo̍ ho̍ō. Mbo̍ sīɛ̄ndī bā ndɔ̄ɔ̍ mbo̍ pīla᷄ŋ po̍o̍ ho̍ō. Mbo̍ dīmūl ndu̍ āā, “I̍ chɛ̍l mī si̍ŋgi̍ nūm. Le̍la̍ŋ, si̍o̍ŋgu̍ mā sīmnu᷄ŋ vɛ̍lɛ̄ ō dīāndāā.”

⁴²Mi̍ nāā wɔ̄ɔ̍ŋ kōŋ fāŋa᷄ŋ po̍o̍ ho̍ō lēkɔ̄ɔ̍ o̍ lē pīlɛ̍ ni᷄ŋ kpe̍.

⁴³Mbo̍ sīlā ndu̍ ō kālā ka̍lā.

⁴⁴Mbo̍ dīmūl ndu̍ āā, “Pōo̍, do̍u̍nu᷄ŋ wa̍nā su̍ɛ̍i̍ he̍ī ko̍na̍ le̍. Kɔ̄la̍ŋ ko̍ni̍ ŋ̄ kūā sa̍kpō nāa̍ wāna̍ so̍lī sa̍lāa̍ o̍ Mɛ̄lɛ̄ka̍ lo̍ wo̍ chūā ni̍ mbō kɔ̍ to̍fā nu̍m. Ndu̍yɛ̍, mā yɔ̍ŋgu̍ kīo̍o̍ le̍ mɛ̄ɛ̍ ŋ̄ sēŋgū yɛ̍, ō Mūu̍sē di̍mi̍ le̍ yɔ̄ŋgōo̍ wo̍. Fo̍ndōle̍, ko̍ŋ chɔ᷅m wa᷅ŋnda̍ ni̍ māā ā sēŋgū.” Mi̍ Chi̍i̍sū di̍mūl ndu̍ māā ō kɔ̍ chɔ̍ chɔ̍.

⁴⁵Kɛ̍, mɛ̄ɛ̍ pōo̍ ho̍ō kūɛ̄, mbo̍ kɔ̍ ka̍ndū wāŋnda̍ dīmūllo̍. Mbo̍ tīū ndi̍ si̍lɔ̍. Le̍la̍ŋ, Chi̍i̍sū ndu̍ o̍o̍ nɔ̍ lɛ̍ fo̍ndāŋ le̍ lākɔ̄ o̍ chi̍e̍e̍ kpe̍nde̍ke̍le̍ lɛ̍ le̍. Mbo̍ chālnu᷄ŋ na̍a̍ yo̍lo̍līa̍a̍. Mi̍ wāŋndā māl o̍ fo̍ndāŋndā yɛ̍ yɛ̍la̍ŋ ma̍ kōmāl ndu̍ lo̍ŋ.