Read Southern Kisi Ma̍kī 10 Bible Online

Ma̍kī 10 - Southern Kisi bible

Ma̍kī 10

¹Mi̍ Chi̍i̍sū ma᷅l lo̍ŋ. Mbo̍ tūndū mbo̍ tāŋ Pīo̍o̍ Chɔ̍ɔ̍dāŋ. Mbo̍ kūā o̍ lɛ̄ŋndē Chūdi̍a̍āle̍ŋ ni᷄ŋ. Mi̍ wāŋnda̍ chūūŋgi̍āŋ vɛ̍lɛ̄ fāŋgā bɛ̍ndōo̍ nāa̍ ndu̍ chu̍a̍. Mbo̍ pɛ̄ɛ̄kū nda̍ māā pāāndū.

²O̍ ko̍ŋ kɔ̍ɔ̍lī, mi̍ ku̍ndā Fālīsi̍īya̍ hūŋ nāa̍ Chi̍i̍sū chu̍a̍ le̍ ndu̍ tɔ̄ɔ̄nda᷄ŋndo̍. Ma̍ nyūnā ndu̍ āā, “Bāā sāwāla̍ Mɛ̄lɛ̄ka̍la̍ŋ lā chɛ̄l mī pōo̍ ō kɛ̄ɛ̍ la̍a̍ ndɔ̍?”

³Mi̍ Chi̍i̍sū nyu̍nā nda̍ āā, “Vɛ̄ɛ̍nɛ̍ Mūu̍sē do̍u̍ yɛ̄ nya̍ sāwāa̍?”

⁴Ma̍ dīmūl ndu̍ āā, “Mūu̍sē chɛ̍l mī pōo̍ tōōsi̍a̍a̍ yāu̍ ba̍ŋa᷄ŋndo̍ le̍ mbō kɛ̄ɛ̍ la̍a̍ ndɔ̄.”

⁵Kɛ̍ mi̍ Chi̍i̍sū di̍mūl nda̍ āā, “Le̍ mɛ̄ɛ̍ nya̍ kēndū īsɔ̄ɔ̍ pɛ̍ɛ̍kū yɛ̍, le̍la̍ŋ Mūu̍sē do̍u̍ nya̍ sāwāa̍ ho̍ō ni̍.

⁶Dīo̍m Mɛ̄lɛ̄ka̍a̍ di̍mi̍ māā o̍ kāndɔ᷄ŋndo̍ lɔ̍ɔ̍ yōōmōo̍ ō ka̍ndu̍ŋ ndo̍, mi̍ Mɛ̄lɛ̄ka̍ tōōsīāā wānā pɔ̍nɔ̍ɔ̍ a̍ wānā la̍nɔ̍ɔ̍.

⁷Mi̍ Yāu̍ Mɛ̄lɛ̄ka̍a̍ dīmī āā, ‘Le̍ sa̍bōo̍ ho̍ō wānā pɔ̍nɔ̍ɔ̍ ō mɛ̄ī fi̍nyā ndɔ̍ a̍ kāla̍ ndɔ̄ ni̍ mā chālnu̍ŋ nda̍ la̍a̍ ndɔ̄.

⁸O̍ ko̍ŋ, mī nda̍ ŋi̍ɔ̍ɔ̍ŋ mā sīmnu᷄ŋ wa᷅ŋndo̍ ō pīlɛ̍ kpe̍.’ Le̍la̍ŋ, wāŋnda̍ ha̍ā ā cho̍ lɛ̍ wānāā ŋīɔ̍ɔ̍ŋ tē. Mɛ̄ɛ̍ ā chō ni᷅ŋ māchūāā wāŋndo̍ ō pīlɛ̍ kpe̍.

⁹Le̍la̍ŋ, tē Mɛ̄lɛ̄ka̍ ō mɔ̄ɔ̄sa̍ wānā la̍nɔ̍ɔ̍ nda̍ wānā pɔ̍nɔ̍ɔ̍ nāa̍ pi᷅lɛ̍ o̍ nɔ̄ɔ̍ ni᷄ŋ pɛ̍, mɛ̄ɛ̍ wānā chi̍o̍o̍ nūm pi̍ɔ̍ū nda̍ tɛ̄ɛ̄ŋ te̍.”

¹⁰Mɛ̄ɛ̍ nda̍ mīīŋgu̍ chīɛ̄ī ni̍ŋ, mi̍ bu̍ɛ̍i̍yāā ndūa̍a̍ nyūnā ndu̍ a̍ sūɛ̍i̍ pi᷅lɛ̍i̍ he̍ī o̍kɔ̄ɔ̄.

¹¹Mi̍ Chi̍i̍sū di̍mūl nda̍ āā, “Wānā o̍ wāna̍ kɛ̍ɛ̍ la̍a̍ ndɔ̄ mbō chu̍a̍ wānā la̍nɔ̍ che᷅le̍ŋ pɛ̍, mɛ̄ɛ̍ ō tōsa̍ yɔ̄ŋ wɔ̄ɔ̍ŋndo̍ a̍ la̍a̍ ndɔ̍ tāso̍o̍, ndu̍yɛ̍ mɛ̄ɛ̍ ō tɛ̄ɛ̄mbu̍u̍ sāwa̍ di̍mi̍ māā wānā su̍u̍ndā le̍ wo̍.

¹²Ndu̍yɛ̍, tē wānā la̍nɔ̍ɔ̍ kɛ̄ɛ̍ pɔ̍nɔ̍ ndɔ̍ mbō chu̍a̍ po̍ che᷅le̍ŋ pɛ̍, mɛ̄ɛ̍ ō tɛ̄ɛ̄mbu̍u̍ sāwa̍ di̍mi̍ māā wānā su̍u̍ndā le̍ wo̍.”

¹³Mi̍ wāŋnda̍ a̍ pūm ā hūŋ a̍ chūāāmbūāā pɔ̄mbūa̍a̍ nāa̍ Chi̍i̍sū chu̍a̍ le̍ mbō hāndu̍ nda̍ bāla̍ŋ chōo̍. Kɛ̍ mi̍ bu̍ɛ̍i̍yāā ndūa̍a̍ dōōnu᷄ŋ nda̍ tu̍mbe̍.

¹⁴Mɛ̄ɛ̍ Chi̍i̍sū che᷅ nda̍ o̍ he̍ī tōsāa̍, mbo̍ tāmbū kɔ̄l a̍ nda̍. Mbo̍ dīmūl nda̍ āā, “Lā ma᷄l chu̍a̍a̍mbūa̍a̍ mā hīŋ nāa̍ ya̍ chu̍a̍. Lā ku̍u̍nā nda̍ le̍. Kāni̍ fo̍ndōle̍, le̍ ha̍ā ndo̍ō māsāle̍ Mɛ̄lɛ̄ka̍le̍ŋ lē chō ni̍.

¹⁵Mī di̍mu̍l nya̍, wānā o̍ wāna̍ chɛ̍l mī Mɛ̄lɛ̄ka̍ wa̍ ndu̍ chōo̍ Māsāa̍ māā chūāāmbɔ̄ le̍, ō lu̍e̍ī o̍ māsāle̍ Mɛ̄lɛ̄ka̍le̍ŋ ni᷄ŋ te̍.”

¹⁶Mi̍ Chi̍i̍sū chu̍ā chūāāmbūa̍a̍ mbo̍ hāndū nda̍ bāla̍ŋ chōo̍ mbo̍ dūāū nda̍ sa̍lā.

¹⁷Mɛ̄ɛ̍ Chi̍i̍sū bi̍ī nɛ̄īyo̍ le̍ kɔ̄la̍ŋ, mi̍ pōo̍ hūŋ a̍ kīlta̍ŋ nāa̍ ndu̍ chu̍a̍. Mbo̍ dēl ndu̍ o̍ lābɛ̄ŋgu̍ ni̍ŋ. Mbo̍ nyūnā Chi̍i̍su̍ āā, “Ti̍chɛ̄i̍nɔ̄ kɛ̄ndɔ̄ɔ̍, ō yɛ̄ɛ̍nɛ̍ ya̍ I̍ to̍sa̍ yɛ̍ mī sɔ̍la̍ yōōmū kpe̍e̍kpe̍i̍yo̍ o̍ nɔ̍ la̍mɛ̍ɛ̍lu̍ le̍ wo̍?”

¹⁸Mi̍ Chi̍i̍sū nyu̍nā ndu̍ āā, “Le̍ yɛ̄ɛ̍nɛ̍ ŋ̄ vēēlu̍ yɛ̄ ya̍ āā, ti̍chɛ̄i̍nɔ̄ kɛ̄ndɔ̄ɔ̍? Wānā o̍ wāna̍ cho̍ o̍ kɛ̍ndɛ̄ le̍ mɛ̄ɛ̍ Mɛ̄lɛ̄ka̍ ndu̍ pīlɛ̍ kpe̍.

¹⁹Ā sīnā sa̍wāla̍ Mɛ̄lɛ̄ka̍la̍ŋ. Di̍ī wānā le̍. Su̍u̍ndā a̍ la̍nɔ̍ pi̍la̍ kɛ̄lɛ̄ŋgāā a̍ pɔ̍nɔ̍ pi̍la̍ le̍. Yɔ᷅ŋ lēvīī le̍. Tɛ̍ndā se̍īlē lāka̍fā le̍. Chu̍ā nyɛ̄ pi̍la̍ a̍ lāka̍fā le̍. Ke̍ fi̍nyā nu̍m bɛ̄ɛ̄le̍ŋ ma̍ ke̍ kālā nu̍m bɛ̄ɛ̄le̍ŋ.”

²⁰Mi̍ pōo̍ mūlūl ndu̍ āā, “Ti̍chā, I̍ lo̍ ō pɔ̄mbɔ̄ mi̍ ka̍ndū sāwāla̍ŋ nda᷅ŋ kpe̍de̍ chu̍a̍a̍.”

²¹Mi̍ Chi̍i̍sū nu̍ā ndu̍ chi̍ŋ o̍ kāālāa̍ ni᷄ŋ. Mbo̍ dīmūl ndu̍ āā, “Mɛ̄ɛ̍ ō lo̍ wɔ̄ nu̍m nyɔ̄ɔ̍ ō pīlɛ̍ le̍ tōsāa̍. Kɔ̍ mā kɔ̍ pi̍sī nyɛ̄ o̍ nyɛ̄ ŋ̄ nɔ̄ mā ke̍ wānāā tāmbɛ̍i̍ya̍ ka̍ni̍ŋ mu̍ŋ. Ā chō sūllo̍ sɔ̄lā o̍ Mɛ̄lɛ̄ka̍ lo̍. Tē a̍ to̍sa̍ he̍ī pɛ̍, ā hīŋ ā sīmnu᷄ŋ bu̍ɛ̍ī nī.”

²²Ndu̍yɛ̍ pōo̍ ho̍ō yɛ̍ ndu̍ o̍o̍ su̍l ta̍u̍. Le̍ he̍ī, mɛ̄ɛ̍ o̍ tu̍e̍ī sūɛ̍i̍ he̍ī, mi̍ hɔ̄lla̍ tāmbū ndu̍ pɛ̍. Mbo̍ mūli᷄ŋ kɔ᷄nda̍ŋ a̍ kɔ̄llo̍ ō tāmbɛ̍i̍.

²³Mi̍ Chi̍i̍sū nu̍ā bu̍ɛ̍i̍yāā ndūa̍a̍, mbo̍ dīmūl nda̍ āā, “Ī chō ī kālā mī wānā su̍lāa̍ lūɛ̄ī o̍ māsāle̍ Mɛ̄lɛ̄ka̍le̍ŋ ni᷄ŋ.”

²⁴Mi̍ kɔ̄ndɔ̄fi̍llo̍ bīī bu̍ɛ̍i̍yāā ndūa̍a̍ a̍ dīōmndā o̍ di̍mi̍ la̍ŋ. Kɛ̍ mi̍ Chi̍i̍sū chɔ̍ɔ̍lū vɛ̄lɛ̄ dīmī āā, “Chūāā nīāā, ī chō ī kālā kpo᷅ke̍ le̍ lūɛ̄īyɔ̄ɔ̍ o̍ māsāle̍ Mɛ̄lɛ̄ka̍le̍ŋ ni᷄ŋ.

²⁵Ī hīōū wā bɛ̍ɛ̍ŋ le̍ vīsī bānā bānāa̍ mɛ̄ɛ̍ nyɔ̍mi̍ɔ̍ɔ̍ chō nu̍a̍ā yɛ̍ mbō kēēku̍ o̍ tɛ̄ɛ̄ŋgū lēsīɛ̄ndīo̍o̍ ni᷄ŋ, mbo̍ hīāū a̍ wānā su̍lāa̍ lūɛ̄īyɔ̄ɔ̍ o̍ māsāle̍ Mɛ̄lɛ̄ka̍le̍ŋ ni᷄ŋ.”

²⁶Mi̍ kɔ̄ndɔ̄fi̍llo̍ bīī nda̍ ta̍u̍ ta̍u̍. Ma̍ nyūūni̍āŋ āā, “Mɛ̄ɛ̍ nɛ̄ɛ̍nɛ̍ pi̍āŋ yɛ̍ ni̍ŋ nɛ̍?”

²⁷Mi̍ Chi̍i̍sū to̍fā nda̍ mbo̍ dīmūl nda̍ āā, “O̍ nɛ̄i̍ īwāna̍ chi̍e̍e̍ya̍a̍ ni᷄ŋ, wāna̍ chi̍o̍o̍ ō nɔ̍lā mbō tōsa̍ he̍ī le̍. Kɛ̍ Mɛ̄lɛ̄ka̍ ndu̍ nɔ̍lā mbō pīŋi̍ wāŋndo̍. Kāni̍ fu̍u̍le̍ Mɛ̄lɛ̄ka̍ ndu̍ nɔ̍lā mbō tōsa̍ nyɛ̄ o̍ nyɛ̄.”

²⁸O̍ ko̍ŋ, mi̍ Pītɛ̍ ka̍ndū dīmīo̍o̍ āā, “Ŋ̄ ma᷄l ni᷅ŋ nyɛ̄ o̍ nyɛ̄ nāā fe̍e̍ na̍a̍ ŋ̄ nɔ̄ mī ŋ̄ tūāl nu̍m kɔ̄ɔ̄lī.”

²⁹Mi̍ Chi̍i̍sū di̍mī āā, “Mī di̍mu̍l nya̍, wānā o̍ wāna̍ ma̍l chīɛ̄ī ndɔ̄ɔ̍ kɛ̄lɛ̄ŋgāā pɔ̄mbūa̍a̍ ndūa̍a̍, kɛ̄lɛ̄ŋgāā bɛ̄ndāā ndūa̍a̍, kɛ̄lɛ̄ŋgāā yēmāa̍ ndūa̍a̍ kɛ̄lɛ̄ŋgāā fi̍nyā ndɔ̄, kɛ̄lɛ̄ŋgāā kāla̍ ndɔ̄, kɛ̄lɛ̄ŋgāā chūāūwāā ndūa̍a̍, kɛ̄lɛ̄ŋgāā chīɔ̄ɔ̄ŋ ndɔ᷄ŋ le̍ sa̍bū nūu̍ a̍ Yōōŋgū Kɛ̄ndɛ̍ Mɛ̄lɛ̄ka̍a̍ pɛ̍,

³⁰wānā ko̍ŋ chō hūnɔ̄ɔ̄ nyɛ̄ sɔ̄lā o̍ te̍le̍ŋndo̍ ho̍ō ni᷄ŋ mbō hīōū nyɛ̄ o̍ nyɛ̄ ndu̍ o̍o̍ nɔ̍. Kɛ̄mɔ̄ɔ̍ Mɛ̄lɛ̄ka̍ chō ndu̍ hūnɔ̄ɔ̄ hēndūl lēchōo̍ ni̍, chīɛ̄īla̍ŋ, a̍ bɛ̄ndūa̍a̍, a̍ pɔ̄mbūa̍a̍, a̍ yēmāa̍, a̍ kālla̍, a̍ chūāūwa̍, a̍ lɛ̄ŋnde̍ŋ. O̍ ko̍ŋ kɔ̍ɔ̍lī vɛ̍lɛ̄, ō chō yɛ̄lē tūlāāle̍ŋ sɔ̄la̍, ndu̍yɛ̍ mbō hu᷄ŋ sɔ̍lā yōōmū kpe̍e̍kpe̍i̍yo̍ o̍ nɔ̍ la̍mɛ̍ɛ̍lu̍ le̍ wo̍ fɛ̍lɛ̍ŋ.

³¹Ndu̍yɛ̍, wānāā bɛ̄ndūa̍a̍ pɛ̄ŋgo̍o̍ ho̍ō ā ka̍ ka̍ ā chō hūnɔ̄ɔ̄ sīmnɔ᷄ŋ wa̍nāā pɔ̄mbɔ̄, ndu̍yɛ̍ mī wānāā pɔ̄mbūa̍a̍ pɛ̄ŋgo̍o̍ ho̍ō ā ka̍ ka̍ a̍ hu̍ŋ si̍mnu᷄ŋ wa̍nāā bɛ̄ndū.”

³²Chi̍i̍sū nda̍ wānāa̍ wa̍ lātūlu̍ a̍ ndu̍ wa̍ ā wa̍ kɔ̄la̍ŋ Chūlu̍sɛ̄lɛ̄m, mi̍ Chi̍i̍sū wa᷅ kɔ̄la̍ŋ nda̍ lāchī. Mi̍ kɔ̄ndɔ̄fi̍llo̍ bīī bu̍ɛ̍i̍yāā ndūa̍a̍. Mi̍ sīōōŋnde̍ bīī wānāa̍ to᷅l nda̍ kɔ̄ɔ̄lī wa̍. Mbo̍ sēī a̍ bu̍ɛ̍i̍yāā ndūa̍a̍ o̍ nɛ̄īyo̍ chōo̍. Mbo̍ chɔ̄ɔ̄lū nda̍ dīmūl māā nyɛ̄ chō hūnɔ̄ɔ̄ ndu̍ yɔ̄nɔ᷄ŋ.

³³Mbo̍ dīmūl nda̍ āā, “Ŋ̄ chō la̍ŋ Chūlu̍sɛ̄lɛ̄m. Lo̍ŋ nda̍ chō wāna̍ nda̍ vēēlu̍ āā, Po̍ Wānā Pɔ̍nɔ̍ɔ̍ wo̍ mālɔ̄ɔ̄ wānāā bɛ̄ndūāā sōlīāā lāsa̍lāa̍ o̍ bā ni̍, nda̍ wānāa̍ pɛ̍ɛ̍kū wa᷅ŋnda̍ sāwāla̍ Mɛ̄lɛ̄ka̍la̍ŋ nda̍. Ndu̍yɛ̍ o̍ ko̍ŋ kɔ̍ɔ̍lī, ā chō ndu̍ yāmɛ̍i̍ kīlūl le̍ mā dīī ndu̍. O̍ ko̍ŋ kɔ̍ɔ̍lī, ā chō ndu̍ mālɔ̄ɔ̄ wānāa̍ cho̍ a̍ Chu̍ū le̍ wa̍ o̍ bā,

³⁴mā ma᷄m ndu̍, mā tūfū ndu̍ lɔ̄lūa̍ŋ chōo̍, mā lɔ̄ɔ̄ ndu̍ lɔ̄ɔ̍ pi̍la̍, o̍ ko̍ŋ kɔ̍ɔ̍lī, mā dīī ndu̍. Kɛ̍ tē pālɛ̍i̍ hīōū pɛ̍ ī yāa̍, ō mīīŋgu̍ vɛ̄lɛ̄ yōōmū.”

³⁵Mi̍ Chūāūwāa̍ Sɛ̍bɛ̍dīī Chēmi̍si̍ nda̍ Chɔ᷄ŋ a̍ hu᷅ŋ nāa̍ Chi̍i̍sū chu̍a̍. Ma̍ dīmūl ndu̍ āā, “Ti̍chā, ŋ̄ hɛ̄na̍ŋ nu̍m mā to̍sa̍l na̍a̍ nyɛ̄ o̍ nyɛ̄ na̍a̍ ŋ̄ nyūna̍ nu̍m le̍ tōsāa̍.”

³⁶Mbo̍ nyūnā nda̍ āā, “Yɛ̄ɛ̍nɛ̍ nya̍ yēēma̍ yɛ̄ mī Ī to̍sa̍l nya̍?”

³⁷Ma̍ dīmūl ndu̍ āā, “Tē a̍ wa̍ o̍ māsāle̍ nu̍mndē kɔ̄ndɔ̄fi̍li̍le̍ŋ ni᷄ŋ pɛ̍, to̍sa̍ mī ŋ̄ cha᷄l o̍ fo̍ndāŋndā lēbɛ̄ɛ̄la̍ŋ nūm īkɛ̄i̍. Wāŋndo̍ ō pīlɔ̍ɔ̄ o̍ bā nūm kɛ̍ndɔ̄ɔ̍ chōo̍, ō pīlɔ̍ɔ̄ o̍ bā nūm mi̍āllo̍ chōo̍.”

³⁸Kɛ̍ mi̍ Chi̍i̍sū di̍mūl nda̍ āā, “Lā si̍nā nyɛ᷅ nya̍ chō ho̍ō dīmīo̍o̍ wo̍ pɛ̄ŋgu̍ le̍.” Mbo̍ nyūnā nda̍ o̍ lētāle̍ ni᷄ŋ āā, “Lā nɔ̄lā pa̍ mī lā ko᷄l o̍ tāāla̍ nyɛ̄ pālāā ya̍ I̍ nɔ̍ le̍ kōlɔ̄ɔ̍ wo̍ ni᷄ŋ? Lā bīūnūŋ pa̍ yīŋɔ̄ɔ̍ nyɛ̄ kīndīlāā ya̍ I̍ nɔ̍ kūēē mī bi̍u̍nu̍ŋ ndo̍?”

³⁹Ma̍ chɛ̄l āā, “E̍ī ŋ̄ nɔ̄lā.” Mi̍ Chi̍i̍sū di̍mūl nda̍ āā, “Tōnya̍, lā chō kōlɔ̄ɔ̄ o̍ tāāla̍ ya̍ I̍ cho̍ kōlɔ̄ɔ̄ wo̍ ni᷄ŋ. Ndu̍yɛ̍, mī lā sɔ̄la̍ pūlɔ̄ɔ̍ Mɛ̄lɛ̄ka̍ ya̍ I̍ nɔ̍ kūēē mī sɔ̍la̍ wo̍.

⁴⁰Kɛ̍ tē ō wa̍ lē cha᷄lle̍ o̍ bā nī kɛ̍ndɔ̄ɔ̍ chōo̍ a̍ o̍ bā nī mi̍āllo̍ chōo̍ pɛ̍, ō cho̍ ya̍ le̍ chu̍ā wānāā kāŋ te̍. Fo̍ndāŋndā lāŋ lā chō māchūāā le̍ wānāā nda̍ bɛ̄ɛ̄ndi̍a̍a̍ la̍ŋ nda̍.”

⁴¹Mɛ̄ɛ̍ bu̍ɛ̍i̍yāā ŋ̄wāŋ tɔ̍ wa̍ a̍ tūa̍a̍ ā tūēī a̍ ndi̍ o̍kɔ̄ɔ̄, ma̍ dūāūnu᷄ŋ tu̍mbe̍ a̍ Chēmi̍si̍ nda̍ Chɔ᷄ŋ.

⁴²O̍ ko̍ŋ kɔ̍ɔ̍lī, mi̍ Chi̍i̍sū ve̍e̍lū nda̍ kpo̍u̍ na̍a̍ pi᷅lɛ̍. Mbo̍ dīmūl nda̍ āā, “Lā sīnā mɛ̄ɛ̍ wānāa̍ cho̍ a̍ Chu̍ū le̍ wa̍ ā kīndīlā wa̍nāā ndāa̍ nda̍ chō chōo̍ wa̍ yɛ̄. Ndu̍yɛ̍, wānāā bɛ̄ndūa̍a̍ ha̍ā ā kūūmba᷄ŋ nda̍ chōo̍ kpu̍lu̍ nda̍ chō ni̍.

⁴³Kɛ̍ nya̍ nya̍, ī wāā le̍nde̍ ī nɔ̍ mī ī yɔ̄nu̍ŋ nya̍ tɛ̄ɛ̄ŋ te̍. Wāna̍ wa̍ nya̍ tɛ̄ɛ̄ŋ pɛ̍ mbō yēēma̍ le̍ wāa̍ wānā bɛ̍ndū, mɛ̄ɛ̍ wānā ko̍ŋ ō wa̍ bu̍ɛ̍īyo̍.

⁴⁴Ndu̍yɛ̍, wāna̍ ye̍e̍ma̍ le̍ wāa̍ wāna̍ tāso̍o̍ pɛ̍, mɛ̄ɛ̍ mā wa̍ māā chɛ̄ le̍ ā tūa̍a̍ kpo̍u̍.

⁴⁵Fo̍ndōle̍, wāna̍ nda̍ vēēlū āā, Po̍ Wānā Pɔ̍nɔ̍ɔ̍ wo̍ bɛ̍ɛ̍ ō hi᷄ŋ le̍ mī wānā sa̍a̍ŋgi̍a̍l ndu̍ le̍. Ō hīŋ māhūnāā le̍ mbō sa̍a̍ŋgi̍a̍l wāŋnda̍, o̍ ko̍ŋ kɔ̍ɔ̍lī, mbō yɔ̄ŋgu̍ yōōmū ndɔ̄ɔ̍ le̍ wānāā fāŋgā fa̍ŋgā bāŋāa̍.”

⁴⁶Mi̍ Chi̍i̍sū nda̍ bu̍ɛ̍i̍yāā ndūa̍a̍ a̍ fāŋgā bɛ̍ndōo̍ ā fūūlūū Chɛ̄lu̍i̍kō chi̍e̍e̍. Mɛ̄ɛ̍ nda̍ wa̍ chi̍o̍o̍ chīīyo̍, ma̍ kōmāl po̍ su̍mɛ̍i̍yo̍, dīōla̍ŋ āā, Bātīma̍yɔ̄ɔ̄, po̍ Ti̍mīɔ̄ɔ̄wo̍, ō ndu̍ o̍o̍ ke̍ī pi̍ɛ̍īle̍ŋ ndo̍. Ō wa̍ īchāli̍ o̍ nɛ̄īyo̍ da̍ŋga̍la̍.

⁴⁷Mbo̍ tūɛ̄ī māā Chi̍i̍sū o̍ fu̍la̍ Na̍a̍sa̍lūɛ̄ī chi̍e̍e̍ wo̍ chō hīōūwɔ̄ɔ̍. Mbo̍ kāndū dēŋīo̍o̍ āā, “Chi̍i̍sū, nu̍m Po̍ Dēēvi̍o̍o̍, tūīīnu̍ŋ ya̍ īnyīɛ̍ɛ̍ fɔ̍.”

⁴⁸Kɛ̍ mi̍ wānāā fāŋgā fa̍ŋgā kpāā ndu̍ āā, “Pɛ̍ŋgi̍ bɔ̍ɔ̍lūūwo̍.” Kɛ̍ mbo̍ chɔ̄ɔ̄lū dēŋī āā, “Nu̍m Po̍ Dēēvi̍o̍o̍, tūīīnu̍ŋ ya̍ īnyīɛ̍ɛ̍ fɔ̍.”

⁴⁹Mi̍ Chi̍i̍sū si᷅m. Mbo̍ dīmī āā, “Lā vēēlu̍ ndu̍.” Ma̍ vēēlū po̍ su̍mɛ̍i̍yo̍. Ma̍ dīmūl ndu̍ āā, “Ta̍mbū kɔ̄l te̍. Chɔ̍ŋ mā si̍m. Ō chō nu̍m vēēlōo̍.”

⁵⁰Mbo̍ vīāū dōma̍ ndɔ̄ɔ̍ īkɛ̄i̍. Mbo̍ hūūlū chōo̍. Mbo̍ hūŋ nāa̍ Chi̍i̍sū chu̍a̍.

⁵¹Mi̍ Chi̍i̍sū nyu̍nā ndu̍ āā, “Ō yɛ̄ɛ̍nɛ̍ ŋ̄ hɛ̄na̍ŋ yɛ̍ mī to̍sa̍l nu̍m?” Mi̍ po̍ su̍mɛ̍i̍yo̍ dīmūl ndu̍ āā, “Ti̍chā, I̍ hɛ̍na̍ŋ mī che᷅.”

⁵²O̍ ko̍ŋ mi̍ Chi̍i̍sū di̍mūl ndu̍ āā, “Kɔ̄nu̍ŋ. Lāāla᷄ŋ ŋ̄ nɔ̄ wo̍ tōsa̍ ma̍ sīāŋgū.” O̍ lē pīlɛ̍ ni᷄ŋ kpe̍, mbo̍ chā wa̍la̍ŋ. Mbo̍ tūāl Chi̍i̍su̍ kɔ̄ɔ̄lī o̍ nɛ̄ī.