Read Southern Kisi Ma̍kī 11 Bible Online

Ma̍kī 11 - Southern Kisi bible

Ma̍kī 11

¹Mɛ̄ɛ̍ Chi̍i̍sū nda̍ bu̍ɛ̍i̍yāā ndūa̍a̍ ā wa̍ fūūlūūwo̍ Chūlu̍sɛ̄lɛ̄m i̍kɛ̍i̍, ma̍ hūŋ Bɛ̍fēē chi̍e̍e̍ a̍ Bɛ̍ta̍nī chi̍e̍e̍, o̍ Pēmbīī Yɔ̄mīī Ɔ̄li̍fīi̍ve̍. Lo̍ŋ nda̍ fūūlu̍u̍ ni̍, mi̍ Chi̍i̍sū vi̍ām bu̍ɛ̍i̍yāā ndūa̍a̍ ā ŋīɔ̍ɔ̍ŋ lāchī.

²Mbo̍ dīmūl nda̍ āā, “Lā kɔ̍ o̍ sɔ̄ndɔ̄kɔ̍lɔ̍ɔ̍ nya̍ lāchī. Tē lā fūūlu̍u̍ dɔ̍ɔ̍ pɛ̍, lā chō sōfɛ̍lɛ̍ fɔ̍ŋndɔ̍ɔ̍ kōmāl ō bāā. Lē pīlɛ̍ bɛ̍ɛ̍ wānā ku̍e̍ wɔ̄ le̍cho̍o̍ le̍. Lā tīmbi̍ mī lā chūu̍ ya̍.

³Tē wānā o̍ wānā nyu̍na̍ nya̍ pɛ̍ āā, ‘Le̍ yɛ̄ɛ̍nɛ̍ nya̍ chō yɛ̄ ndu̍ tīmbīo̍o̍?’ Lā dīmu̍l ndu̍ āā, ‘Māsānɔ̄ɔ̍ nɔ̄ kpe̍ku̍ a̍ ndu̍.’ Āā, ‘Ō chō ndu̍ mīŋgī na̍nu᷄ŋ su̍ŋ su̍ŋ.’ ”

⁴O̍ ko̍ŋ kɔ̍ɔ̍lī, ma̍ kūā ma̍ sāālu᷄ŋ so᷅fɛ̍lɛ̍ fɔ̍ŋndɔ̍ɔ̍ ō bāā o̍ nɛ̄īyo̍ da̍ŋga̍la̍ o̍ chīɛ̄īyo̍ hɔ̄lndɔ̄.

⁵Mɛ̄ɛ̍ nda̍ wa̍ ndu̍ tīmbīo̍o̍, wānāā pūm ā wa̍ īsīsi̍ lo̍ŋ. Ma̍ nyūnā nda̍ āā, “Yɛ̄ɛ̍nɛ̍ nya̍ chō yɛ̄ ko̍ŋ to̍sā? Lā vɛ᷅ sōfɛ̍lɛ̍ ko̍ŋ tīmbīo̍o̍?”

⁶Ma̍ mūlūl nda̍ mɛ̄ɛ̍ Chi̍i̍sū di̍mu̍l nda̍ yɛ̍. Mi̍ wāŋnda̍ māl nda̍ ma̍ tīmbī ndu̍.

⁷Ma̍ hūŋ a̍ sōfɛ̍lɔ̍ɔ̍ nāa̍ Chi̍i̍sū chu̍a̍. Hūnɔ̄ɔ̍ a̍ ndu̍, ma̍ pɛ̄ŋgɛ̄līāā dōmāla̍ ndāla̍ŋ sōfɛ̍lɔ̍ɔ̍ o̍ kɔ̄ɔ̄. Mi̍ Chi̍i̍sū hēl mbo̍ chāl lēchōo̍.

⁸Mi̍ wānāā fāŋgā fa̍ŋgā ā pɛ̄ŋgɛ̄lā dōmāla̍ ndāla̍ŋ o̍ nɛ̄ī Chi̍i̍sū lāchī. Mi̍ ā pūm ā kīālū lɛ̄ūwo̍ŋ a̍ pēi̍ yōndōo̍ ni᷄ŋ ma̍ yɛ̄ɛ̄mbūū o̍ nɛ̄ī le̍ ndu̍ bɛ̄ɛ̄le̍ŋ kīo̍o̍.

⁹Mi̍ wānāa̍ wa̍ ndu̍ kɔ̄la̍ŋ lāchī wa̍ a̍ ha̍ā ndu̍ kɔ̄ɔ̄lī ā sa̍āŋ dēŋīo̍o̍ chōo̍ cho̍o̍. Ma̍ dīmī āā, “Lā ŋ̄ sāŋga̍la᷅ŋ Mɛ̄lɛ̄ka̍. Nu᷄m hi᷅ŋ ho̍ō sɔ̍ŋgɔ̄ Māsānɔ̄ɔ̍ Mɛ̄lɛ̄ka̍a̍ wo̍, Mɛ̄lɛ̄ka̍ dɔ̄ū nu̍m sa̍lā bɔ̄ɔ̍.

¹⁰Mɛ̄lɛ̄ka̍, dɔ̍u̍ ma̍sāle̍ cho̍ hūnɔ̄ɔ̍ le̍ŋ sa̍lā, māsāle̍ fi̍nyā nāa̍ Dēēve̍le̍ŋ. Lā ŋ̄ sāŋga̍la᷅ŋ Mɛ̄lɛ̄ka̍.”

¹¹Mi̍ Chi̍i̍sū fu̍u̍lūū Chūlu̍sɛ̄lɛ̄m. Mbo̍ lūɛ̄ī o̍ chīɛ̍i̍ Mɛ̄lɛ̄ka̍a̍ ni᷄ŋ. Mbo̍ mɛ̄ɛ̄ndīa̍ŋ nyɛ᷅ o̍ nyɛ̍ fe̍e̍. Mbo̍ kūānu᷄ŋ Bɛ̍ta̍nī chi̍e̍e̍ nda̍ bu̍ɛ̍i̍yāā tɔ̍ a̍ ā ŋīɔ̍ɔ̍ŋ ndā, kāni̍ fo̍ndōle̍, te̍le̍ŋndo̍ ve̍ lɛ̍ le̍.

¹²Dīi̍māndɔ̄ɔ̍ pīlɔ̍ɔ̄, ā wa̍ hūnɔ̄ɔ̍ chɔ̄nɔ᷄ŋndo̍ Bɛ̍ta̍nī. Ndu̍yɛ̍, yīa̍a̍ŋ mā wa̍ Chi̍i̍sū nɛ̄īyo̍.

¹³Ō lo̍ la̍nda̍ŋ mbo̍ chā yɔ̄m fi̍kīi̍yo̍. Ō wa̍ ō pūīyāā. Mbo̍ kūā le̍ tōfāa̍ tē nyɛ̄ chō lēchōo̍ pɛ̍. Mɛ̄ɛ̍ o̍ fu̍u̍lu̍u̍ lo̍ŋ, nyɛ̄ o̍ nyɛ̄ bɛ̍ɛ̍ ō sēēlu̍ŋ lēchōo̍ le̍, mɛ̄ɛ̍ pēi̍, kāni̍ fo̍ndōle̍, ō ve̍ te̍le̍ŋ ndɔ̄ ku̍a̍māā le̍.

¹⁴O̍ ko̍ŋ, mi̍ Chi̍i̍sū di̍mūl yɔ̄mndo̍ ho̍ō āā, “Wānā o̍ wānā di᷅ lɛ̍ kōmɔ̄ɔ̄ nūmndo̍ le̍.” Mi̍ bu̍ɛ̍īyāā ndūa̍a̍ tūɛ̄ī nyɛ̄ o̍ di̍mi̍ wo̍.

¹⁵Mɛ̄ɛ̍ nda̍ fūūlu̍u̍ Chūlu̍sɛ̄lɛ̄m, mi̍ Chi̍i̍sū lu̍ɛ̍ī o̍ chīɛ̍i̍ Mɛ̄lɛ̄ka̍a̍ ni᷄ŋ. Mbo̍ kāndū wānāa̍ wa̍ nyɔ̄ɔ̍ŋ pīīndūūwo̍ wa̍ a̍ wānāa̍ wa̍ pīsīo̍o̍ lēni᷄ŋ nda̍ tōūwɔ̄ɔ̍ lo̍ŋ. Mbo̍ nyīīndūū ti̍bīi̍la̍ wānāa̍ wa̍ ka̍ni̍o̍ŋ sīŋgāa̍ wa̍. Mbo̍ nyīīndūū kpe̍ŋgbe̍i̍la̍ wānāa̍ wa̍ ka᷅ŋgbu̍a̍a̍ pīsīo̍o̍ wa̍.

¹⁶Ndu̍yɛ̍, mbo̍ kūūnā wāŋnda̍ māā ā ke̍e̍kū a̍ nyɛ̄ o̍ nyɛ̄ o̍ bɛ̍ɛ̄ chīɛ̍i̍ Mɛ̄lɛ̄ka̍a̍ wo̍ le̍.

¹⁷Mbo̍ lō o̍ ko̍ŋ mbo̍ pɛ̄ɛ̄kū wāŋnda̍ āā, “Ī chō ī pōōnyīāā o̍ Yāu̍ Mɛ̄lɛ̄ka̍a̍ ni᷄ŋ māā Mɛ̄lɛ̄ka̍ dīmi̍ āā, ‘Wāŋnda̍ vēēlū ni̍ŋ chi̍ɛ̍ī nūu̍ āā, chīɛ̄ī pīɛ̄īyāa̍ Mɛ̄lɛ̄ka̍a̍ le̍ lēkāa̍ o̍ lēkāa̍.’ Kɛ̍ mi̍ nya̍ sīīŋgu̍u̍ ndu̍ fo̍ndāŋ vīīya̍ vīāŋnūŋ ndo̍.”

¹⁸Mɛ̄ɛ̍ wānā bɛ̍ndu̍ sōlīāā lāsa̍lāa̍ a̍ wānāa̍ pɛ̍ɛ̍kū wa᷅ŋnda̍ sāwāla̍ Mɛ̄lɛ̄ka̍la̍ŋ nda̍ ā tūēī nyɛ̄ Chi̍i̍sū di̍mi̍ wo̍, ma̍ kāndū nɛ̄īla̍ŋ nūūvīa̍a̍ le̍ mɛ̄ɛ̍ nda̍ lōōkū ma̍ dīī ndu̍ yɛ̍. Kɛ̍ ma̍ wō ndu̍, kāni̍ fo̍ndōle̍, kɔ̄ndɔ̄fi̍llo̍ wa̍ wāŋnda̍ kpo̍u̍ a̍ pɛ̄ɛ̄kū ndɔ̄ɔ̍.

¹⁹Mɛ̄ɛ̍ nyūmnda̍ŋ mā tōl, mi̍ Chi̍i̍sū nda̍ bu̍ɛ̍i̍yāā ndūa̍a̍ ā fāŋa᷄ŋ chi̍e̍e̍ ma̍ kūānu᷄ŋ.

²⁰Īdīi̍yo̍ mɛ̄ɛ̍ nda̍ wa̍ kɔ̄la̍ŋ o̍ nɛ̄ī, ma̍ chā yɔ̄m fi̍kīi̍yo̍ ō wa̍ ō vēsɛ̍i̍ chɔ̍ŋ o̍ pūūndo̍ŋ di̍.

²¹Mi̍ Pītɛ̍ lo̍o̍nu᷄ŋ a̍ sūɛ̍i̍ he̍ī o̍kɔ̄ɔ̄. Mbo̍ dīmūl Chi̍i̍sū āā, “Ti̍chā, to̍fa̍ wɔ̍ yɔ᷅m ŋ̄ dīmu̍l māā wānā di᷅ lɛ̍ kōmɔ̄ɔ̄ ndɔ̄ɔ̍ le̍ wo̍, ō vēsa̍.”

²²Mi̍ Chi̍i̍sū mu̍lī āā, “Lā nɔ̍ la̍a̍la᷄ŋndo̍ o̍ Mɛ̍lɛ̄ka̍ ni᷄ŋ.

²³Mī di̍mu̍l nya̍, wānā o̍ wāna̍ di̍mu̍l pɛ̍ pe̍mbīī wāā nu̍a̍ā āā, ‘Kɔ̍ mā kɔ̍ de᷅l o̍ pēe̍ mɛ̄ŋmā īhɛ᷄llo̍ ni᷄ŋ’ tē ō kīīsa̍ŋ o̍ kɔ̄l ndɔ̄ɔ̍ ni᷄ŋ te̍, mbō la̍a̍la̍ŋ pɛ̍ māā nyɛ̄ o̍ dīmi̍ wo̍ nɔ̄lā mbō yɔ̄nu̍ŋ, ō nɔ̄lā mbō yɔ̄nu̍ŋ le̍ ndu̍.

²⁴Le̍la̍ŋ mī di̍mu̍l nya̍, tē a̍ nyūna̍ Mɛ̄lɛ̄ka̍ o̍ pīɛ̄īle̍ŋ ni᷄ŋ le̍ nyɛ̄ o̍ nyɛ̄ pɛ̍, nɔ̍ la̍a̍la᷄ŋndo̍ māā ā sɔ̍la̍ ndu̍. Ndu̍yɛ̍, ā chō ndu̍ sɔ̄lā.

²⁵Tē a̍ si̍m pīɛ̄īle̍ŋ nāa̍ Mɛ̄lɛ̄ka̍ chūā pɛ̍, mā nɔ̄ nyɛ̄ o̍ nyɛ̄ o̍ kɔ̄l ō wāŋndo̍ tōsa̍l nu̍m ndo̍, ma̍l ndu̍ le̍ ndu̍. O̍ ko̍ŋ, mī Mɛ̄lɛ̄ka̍ Fi̍nyā nūm o̍ cho̍ ho̍ō o̍ fo̍ndāŋ ndɔ̄ɔ̍ wo̍ mbō ma᷄l nu̍m le̍ yɔ̄ŋndā nūmnda̍ wɔ̍ɔ̍ŋnda̍ŋ. [

²⁶Tē a̍ me̍l chāāŋnda̍ le̍ yɔ̄ŋndā wɔ̄ɔ̍ŋndā nda̍ tōsa̍l nu̍mnda̍ŋ te̍, Mɛ̄lɛ̄ka̍ Fi̍nyā nūm o̍ cho̍ ho̍ō o̍ fo̍ndāŋ ndɔ̄ɔ̍ wo̍, ō me᷅l nu̍m le̍ yɔ̄ŋndā wɔ̄ɔ̍ŋndā ŋ̄ tōsa̍la̍ŋ te̍.]”

²⁷Ma̍ mīīŋgū Chūlu̍sɛ̄lɛ̄m. Mɛ̄ɛ̍ Chi̍i̍sū wa̍ kɔ̄la̍ŋ o̍ bɛ̍ɛ̄ chīɛ̍i̍ Mɛ̄lɛ̄ka̍a̍, mi̍ wānāā bɛ̄ndūāā sōlīāā lāsa̍lāa̍, a̍ wānāa̍ pɛ̍ɛ̍kū wa᷅ŋnda̍ sāwāla̍ Mɛ̄lɛ̄ka̍la̍ŋ nda̍, a̍ lāŋgba̍ā kālla̍, ā hūŋ nāa̍ Chi̍i̍sū chu̍a̍.

²⁸Ma̍ nyūnā ndu̍ āā, “Di̍ yɛ̄ɛ̍nɛ̍ ŋ̄ nɔ̄ yɛ̄ le̍ sɔ̄ɔ̍ŋ ŋ̄ chō mu᷅ŋ tōsāa̍ wo̍ŋ? Nɛ̄ɛ̍nɛ̍ ke̍ yɛ̄ nu̍m di̍ le̍ mu̍ŋ tōsāa̍?”

²⁹Mi̍ Chi̍i̍sū mu̍lūl nda̍ āā, “I̍ cho̍ nya̍ nyūnā pīlɛ̍. Tē lā mūlu̍l la̍ nyūnā ko̍ŋ pɛ̍, ya̍ bɛ̍ɛ̍ I̍ chɔ̍m nya̍ di̍ ya̍ I̍ nɔ̍ le̍ sɔ̄ɔ̍ŋ mu᷅ŋ tōsāa̍ wo̍.

³⁰Nɛ̄ɛ̍nɛ̍ ke̍ yɛ̄ Chɔ᷄ŋ di̍o̍o̍ le̍ wāŋnda̍ pūlɔ̄ɔ̍ Mɛ̄lɛ̄ka̍a̍? Bāā Mɛ̄lɛ̄ka̍ ni̍, bāā wāŋndā chīe̍e̍ya̍? Lā chɔ᷄m ya̍.”

³¹Mɛ̄ɛ̍ Chi̍i̍sū nyu̍na̍ nda̍ nyūnāa̍ ho̍ō, mi̍ nda̍ pi̍la̍ kāndū dīmīo̍o̍ āā, “Vɛ̄ɛ̄ na̍a̍ ŋ̄ mūli̍ yɛ̍? Tē ŋ̄ dīmi̍ pɛ̍ āā, ‘Mɛ̄lɛ̄ka̍ ke̍ Chɔ᷄ŋ di̍ ko̍ŋ ni̍,’ ō chō na̍a̍ nyūnā āā, ‘Kɛ̍, vɛ᷅ lā lāāla̍ŋ a̍ nyɛ̄ Chɔ᷄ŋ di̍mi̍ wo̍ le̍?’

³²Kɛ̍, bāā ŋ̄ dīmi̍ nu̍a̍ā āā, ‘Wāŋndā chīe̍e̍ya̍ ke̍ Chɔ᷄ŋ di̍ ko̍ŋ ni̍, māā ō cho̍ Mɛ̄lɛ̄ka̍ le̍?’ ” Ma̍ wō wāŋnda̍, kāni̍, wāŋnda̍ kpo̍u̍ ā lāāla̍ŋ māā wāna̍ su̍a̍ā le̍ Mɛ̄lɛ̄ka̍ wo̍ kpe̍e̍kpe̍i̍ Chɔ᷄ŋ wa̍ ni̍.

³³O̍ ko̍ŋ, ma̍ mūlūl Chi̍i̍sū āā, “Ŋ̄ si̍nā le̍.” Mi̍ Chi̍i̍sū lo᷅ o̍ ko̍ŋ mbo̍ dīmūl nda̍ āā, “Mɛ̄ɛ̍ ya̍ bɛ̍ɛ̍ I̍ chɔ᷅m nya̍ di̍ ya̍ I̍ nɔ̍ le̍ sɔ̄ɔ̍ŋ mu᷅ŋ tōsāa̍ wo̍ le̍.”