Read Southern Kisi Ma̍kī 12 Bible Online

Ma̍kī 12 - Southern Kisi bible

Ma̍kī 12

¹Mi̍ Chi̍i̍sū ka̍ndū sūɛ̍i̍ nāa̍ nda̍ chūā o̍ tāle̍la̍ŋ ni᷄ŋ āā, “Po̍ pi᷅lɛ̍ chɛ̍ŋ ni̍ mbo̍ tōsā kpe̍lo̍o̍. Mbo̍ tūāl yɔ̄mīī pūm lēni᷄ŋ. Mɛ̄ɛ̍ o̍ to̍sa̍ kpe̍lo̍o̍ ho̍ō, mbo̍ mūli᷄ŋ mbo̍ tāŋgūl kpākīo̍o̍ a̍ pōūta̍ŋ mbo̍ bɔ̄ŋā ndu̍ nyɛ̄ kɛ̄ndɛ̄ kpɔ̍kɔ̍su̍. Mbo̍ tōōsīāā fo̍ndāŋ nda̍ wa̍a̍yīāā kɔ᷅mnde̍ yɔ̄mnde̍ he̍ī yo̍. Mbo̍ bīī mbo̍ tāŋgūl bāndu̍ vi̍lɛ̄ī kālā ka̍lāa̍ o̍ kpe̍lo̍o̍ ho̍ō ni᷄ŋ le̍ wāa̍ hēlɔ̄ɔ̍ lo̍ŋ le̍ kpe̍lo̍o̍ māndāa̍. Chīīyo̍ pa̍ku̍, ma̍ chɛ̄la᷅ŋ nda̍ wāŋnda̍ le̍ mā kōma̍ ma̍ndāl ndu̍ kpe̍le̍ ndɔ̄ɔ̍ ho̍ō. O̍ ko̍ŋ kɔ̍ɔ̍lī, mbo̍ kūānu᷄ŋ o̍ lɛ̄ŋndē chēle̍ŋ ni᷄ŋ.

²Mɛ̄ɛ̍ bōōnde̍i̍ ī fūūlu̍u̍ le̍ tɔ̄lɔ̄ɔ̍ ho̍ō kēndīo̍o̍, mi̍ wāna̍ tɔ̄lɔ̄ɔ̍ vīām bu̍ɛ̍ī ndɔ̄ɔ̍ nāa̍ wāŋnda̍ ha̍ā chūā le̍ mbō dīmu̍l nda̍ mā ke̍ ndu̍ tɔ̄lɔ̄ɔ̍ o̍ cho̍ le̍ ndu̍ wo̍.

³Kɛ̍ mɛ̄ɛ̍ bu̍ɛ̍īyo̍ kūɛ̄, ma̍ bīī ndu̍ ma̍ lūāā ndu̍. Ma̍ māl ndu̍ mbo̍ mīīŋgū bālā fo̍ndō.

⁴O̍ ko̍ŋ kɔ̍ɔ̍lī, mi̍ wāna̍ tɔ̄lɔ̄ɔ̍ vīām bu̍ɛ̍ī chēle̍ŋ. Ndu̍ bɛ̍ɛ̍, ma̍ lūāā ndu̍ bōlle̍ŋ ma̍ bōlī ndu̍. Ma̍ tɛ̄ɛ̄mbūū ndu̍ lābɛ̄ɛ̄.

⁵Mbo̍ vīām vɛ̄lɛ̄ ō chēle̍ŋ. Ko̍ŋ ndu̍, ma̍ dīī ndu̍. Mbo̍ vīām vɛ̄lɛ̄ ā chēle̍ŋ ta̍u̍. Ma̍ lūāā ā ti᷄ŋ, ndu̍yɛ̍ ma̍ dīū ā ti᷄ŋ.

⁶Wānā pi᷅lɛ̍ ko̍ni̍ ndu̍ o̍o̍ nɔ̄ ni᷅ŋ le̍ vīōmɔ̄ɔ̍ ni̍, po̍ ndɔ̄ ka̍a̍lāa̍. O̍ mɛ̄ɛ̄lu̍la̍ŋ kpɔ̍ŋ, mbo̍ vīām ndu̍. Mbo̍ yīya᷄ŋ māā wāŋnda̍ ha̍ā ā nɔ̄ ni̍ŋ bɛ̍ɛ̄le̍ŋ le̍ po̍ ndɔ̄ɔ̍.

⁷Kɛ̍, ma̍ dīmu̍la᷅ŋ nda̍ pi̍la̍ tɛ̍ɛ̄ŋ māā, ho̍ō cho̍ hūnɔ̄ɔ̄ nyɛ̄m ki̍ɔ̍ɔ̍ŋ lōō ni̍. Lā hu᷄ŋ ŋ̄ dīīnu᷅ŋ ndu̍ mī nyɛ̄m ki̍ɔ̍ɔ̍ŋ ŋ̄ lo̍ mīāl nāā.

⁸Ma̍ bīī po̍ ndɔ̄ɔ̍ ho̍ō ma̍ dīī ndu̍. Ma̍ sōlī ndu̍ o̍ kpe̍le̍ ka̍lāa̍ ni᷄ŋ.”

⁹“Tē wāna̍ tɔ̄lɔ̄ɔ̍ hīŋ pɛ̍, vɛ̄ɛ̍nɛ̍ o̍ to̍sā yɛ̍? Tē ō hīŋ pɛ̍, ō dīu̍ wānāā kāŋ. O̍ ko̍ŋ kɔ̍ɔ̍lī, ō ke̍ wānāā chēle̍ŋ kpe̍le̍ ndɔ̄ɔ̍ ā ma̍nda̍l ndu̍.

¹⁰Dīo̍m Mɛ̄lɛ̄ka̍ so̍o̍nu᷄ŋ o̍ Yāu̍ Mɛ̄lɛ̄ka̍a̍ ni᷄ŋ ndo̍, bāā lā tōfa̍ wɔ̍ le̍ni̍ŋ te̍?” Mi̍ Yāu̍ Mɛ̄lɛ̄ka̍a̍ dīmī lo̍ŋ āā, “Pōū wānāā tāŋgūlāa̍ kɛ̄ɛ̍ māā ō ni᷄ŋ te̍ wo̍, ndu̍ si̍mnu᷄ŋ ni᷅ŋ pōū kpe̍e̍kpe̍i̍ sa̍a̍ tāŋgūllo̍ wo̍ ni̍.

¹¹Māsānɔ̄ɔ̍ Mɛ̄lɛ̄ka̍ ndu̍ to̍sa̍ sūe̍i̍ he̍ī ni̍. Ndu̍yɛ̍, he̍ī chō sūɛ̍i̍ kɔ̄ndɔ̄fi̍li̍i̍ bɛ̄ndū na̍a̍ o̍ hɔ̄l.”

¹²Mi̍ wānāā Chi̍i̍sū wa̍ sūɛ̍i̍ nāa̍ nda̍ chūā wa̍ ā kīndī le̍ ndu̍ bīyɔ̄ɔ̍. Fo̍ndōle̍, ā sīna̍ māā le̍ nda̍ Chi̍i̍sū di̍mi̍ tālo̍o̍ ho̍ō ni̍. Kɛ̍, ma̍ wō fāŋgāa̍. Ma̍ māl ndu̍. Ma̍ kūānu᷄ŋ.

¹³O̍ ko̍ŋ kɔ̍ɔ̍lī, ma̍ vīām ku̍ndā Fālīsi̍īya̍ a̍ yu̍ŋgu̍ Hɛ̍lɔ̄ɔ̄ wo̍ nāa̍ Chi̍i̍sū chu̍a̍ le̍ ndu̍ yāŋɔ̄ɔ̄le̍ŋ yēŋndo̍ a̍ nyūūnīāāla̍ŋ.

¹⁴Ma̍ hūŋ nāa̍ ndu̍ chu̍a̍. Ma̍ dīmī āā, “Ti̍chā, ŋ̄ sīnā māā ā chō sa̍kpō. A̍ nɔ̍ si̍o̍o̍ŋīī wānā o̍ wānā le̍ ndu̍ tōnya̍a̍ dīmūl te̍. Kāni̍ fu̍u̍le̍, a̍ bu̍u̍la̍ŋ le̍ wānā bɛ̍ndūyɛ̍ī wānā le̍. Tōnya̍a̍ ndu̍ ŋ̄ pɛ̄ɛ̄kū a̍ nyɛ̄ Mɛ̄lɛ̄ka̍ hɛ̄na̍ŋ mī wāŋnda̍ tōsa̍ wo̍ ni̍. Kɛ̍ ndu̍yɛ̍, chɔ̍m ndɔ̍ na̍a̍, vɛ̄ɛ̍nɛ̍ sa̍wāla̍ Mɛ̄lɛ̄ka̍la̍ŋ lā dīmi̍ yɛ̄? Bāā ŋ̄ nɔ̄ mī ŋ̄ ma᷄l pāāwāa̍ māsā bɛ̍ndōo̍ o̍ cho̍ māsāa̍ kpe̍de̍ bo᷅lle̍ŋ le̍ lɛ̄ŋīī Lu̍o̍ma᷅ŋnde̍ wo̍ o̍ bā, bāā ŋ̄ nɔ̍ mī ŋ̄ ma᷄l te̍? Ŋ̄ ma᷄l pa̍a̍wāa̍ bāā ŋ̄ ma᷅l te̍?”

¹⁵Kɛ̍ mi̍ Chi̍i̍sū si̍nā māā sōndō yēēlɛ̍i̍yo̍ ko̍ni̍ ndā wa̍ ni̍. Mbo̍ nyūnā nda̍ āā, “Yāŋɔ̄ɔ̄le̍ŋ nya̍ chō yā yēŋndo̍ ni̍? Lā chūu̍ ya̍ ka̍ni̍e̍i̍ mī to̍fa̍.”

¹⁶Ma̍ chūū ndu̍ ka̍ni̍e̍i̍. Mbo̍ nyūnā nda̍ āā, “Ō nɛ̄ɛ̍nɛ̍ cho̍ yɛ̄ ō tūūlāā o̍ ka̍ni̍e̍i̍ he̍ī? Dīōla̍ nɛ̄ɛ̍nɛ̍ la̍ cho̍ yɛ̄ la᷅ŋ lā dūāūwāā lo̍ŋ?” Ma̍ mūlūl ndu̍ āā, “Māsā bɛ̍ndōo̍ le̍ lɛ̄ŋīī Lu̍o̍ma᷅ŋnde̍ o̍ cho̍ māsāa̍ kpe̍de̍ bo᷅lle̍ŋ ndo̍, ndu̍ cho̍ ō tūūlāā lēchōo̍ ni̍.”

¹⁷O̍ ko̍ŋ, mi̍ Chi̍i̍sū di̍mūl nda̍ āā, “Mɛ̄ɛ̍ lā pāāwa̍ ma̍sā bɛ̍ndōo̍ nyɛ᷄m cho̍ le̍ ndu̍ wo̍ŋ, mī lā pāāwa̍ Mɛ̄lɛ̄ka̍ nyɛ᷄m cho̍ le̍ Mɛ̄lɛ̄ka̍ wo̍ŋ.” Mi̍ kɔ̄ndɔ̄fi̍llo̍ bīī nda̍ a̍ Chi̍i̍sū.

¹⁸Mi̍ ku̍ndā Sādūsi̍īya̍ a̍ di̍mi̍ māā tē wānā vi᷅ pɛ̍ ā mi̍i̍ŋgū lɛ̍ yōōmū le̍ wa̍ ā pūm ā hūŋ nāa̍ Chi̍i̍sū chu̍a̍ a̍ nyūnāa̍.

¹⁹Ma̍ dīmūl ndu̍ āā, “Ti̍chā, Mūu̍sē po̍o̍nyi̍a̍a̍ le̍ na̍a̍ Chu̍ūwa̍ āā, ‘Tē ō wa̍ pɛ̍ mī wāŋndo̍ bɛ̄ ndɔ̄ vi᷅ mbō mɛ̄i̍ la̍nɔ̍ɔ̍, kɛ̍ mbō vīlu̍ ŋ̍chu̍a̍u̍ a̍ ndu̍ le̍, mɛ̄ɛ̍ pɔ̄mbɔ̄ ndɔ̄ nɔ̍ mbō chu̍a̍ chūā kōŋ mā vēlū chūāūwa̍ le̍ bɛ̄ ndɔ̄.’

²⁰Kɛ̍, pūa̍a̍ pi᷅lɛ̍ ā wa̍ nda̍ ŋɔ̍mmɛ̍ū. Ndu̍yɛ̍, ndi̍a̍ā pi᷄lla̍ nda̍ wa̍ ni̍. Mi̍ o̍ wa̍ wānā ba̍nāa̍ nda̍ chōo̍ kpo̍u̍ wo̍ chūā la̍nɔ̍ɔ̍. Kɛ̍ mbo̍ lō o̍ ko̍ŋ mbo̍ wū, ō vīlu̍ ŋ̍chu̍a̍u̍ a̍ ndu̍ le̍. Mi̍ o̍ wa̍ ndu̍ īkɛ̄i̍ yo̍ chūā chūa̍a̍ ho̍ō. Ndu̍ bɛ̍ɛ̍ mbo̍ wū, ō vīlu̍ ŋ̍chu̍a̍u̍ a̍ ndu̍ le̍.

²¹Yāa̍ ndɔ̄ɔ̍, ndu̍ bɛ̍ɛ̍ le̍nde̍ ko̍ni̍.

²²Mi̍ chūa̍a̍ ho̍ō kēēkū pūa̍a̍ ŋɔ̍mmɛ̍ūwa̍ ha̍ā kpo̍u̍ o̍ bā. Kɛ̍ nda̍ kpo̍u̍ ō pīlɛ̍ bɛ̍ɛ̍ vi̍lu̍ a̍ ndu̍ le̍. O̍ mɛ̄ɛ̄lu̍la̍ŋ kpɔ̍ŋ, mi̍ chūa̍a̍ bɛ̍ɛ̍ mbo̍ wū.

²³Tē ō wa̍ yɛ̄ mi̍ wānāā vīlɛ̍i̍ya̍ hu᷄ŋ mi̍i̍ŋgū yōōmū pɛ̍, mɛ̄ɛ̍ la̍nɔ̍ɔ̍ nɛ̄ɛ̍nɛ̍ chūa̍a̍ ho̍ō ō wā yɛ̍ ni̍ŋ, kāni̍ nda̍ ŋɔ̍mmɛ̍ū kpo̍u̍ ō kēēku̍ nda̍ o̍ bā o̍ nɔ̄ɔ̍ ni᷄ŋ?”

²⁴Mi̍ Chi̍i̍sū mu̍lī nda̍ dīōm āā, “Lā bēndū bɔ̄ɔ̍ nɛ̍īyo̍. Nyɛ̍ to̍sa̍ mi̍ lā bīāndū nɛ̄īyo̍ wo̍ cho̍ ni̍ māā lā si̍nā nyɛ᷅ Yāu̍ Mɛ̄lɛ̄ka̍a̍ dīmi̍ wo̍ pɛ̄ŋgu̍ le̍. Ndu̍yɛ̍, lā si̍nā kpa̍āya̍ Mɛ̄lɛ̄ka̍ nɔ̄ wo̍ pɛ̄ŋgu̍ le̍.

²⁵Tē wāŋnda̍ mīīŋgu̍ pɛ̍ yo̍o̍mū, ā chu̍ē lɛ̄ ŋ̄lāāndū kɛ̄lɛ̄ŋgāā ŋ̄pīāāndū le̍, mɛ̄ɛ̍ ki̍i̍la̍a̍ Mɛ̄lɛ̄ka̍a̍ chō yɛ̍, le̍nde̍ ko̍ni̍ nda̍ wā ni᷅ŋ ni̍.

²⁶I̍ mi̍ŋgī wɔ̍ sōndō a̍ mīīŋgōo̍ yōōmū o̍kɔ̄ɔ̄. Nya̍ pi̍la̍ lā chō dīōmndā Mɛ̄lɛ̄ka̍ sōō la᷅ŋ o̍ Yāu̍ Mūu̍sē wo̍ ni᷄ŋ nda̍ŋ tōfāa̍. Mi̍ Mɛ̄lɛ̄ka̍ dīmūl Mūu̍sē āā, ‘Ya̍ cho̍ Mɛ̄lɛ̄ka̍ E̍bīlāha᷅m, a̍ Āa̍se̍, a̍ Che̍kɔ̍pū a̍ pi̍ɛ̍ī yo̍ ni̍.’

²⁷Le̍la̍ŋ, Mɛ̄lɛ̄ka̍ cho̍ Mɛ̍lɛ̄ka̍ ŋ̄wāŋ vīlɛ̍i̍ le̍. Wānāa̍ cho̍ yōōmū wa̍, Mɛ̄lɛ̄ka̍ ndāa̍ o̍ cho̍ ni̍. Lā bēndū bɔ̄ɔ̍ nɛ̍īyo̍.”

²⁸Wānāa̍ pɛ̍ɛ̍kū wa᷅ŋnda̍ sāwāla̍ Mɛ̄lɛ̄ka̍la̍ŋ nda̍ ō pīlɛ̍ wa̍ lo̍ŋ mbo̍ tūɛ̄ī sūɛ̍i̍ nda̍ wa̍ ve̍. Mbo̍ chā māā Chi̍i̍sū mu̍li̍ nyūnā ndāa̍ ō kɛ̄ndɛ̄. Le̍ he̍ī, mbo̍ nyūnā Chi̍i̍sū āā, “O̍ sāwāla̍ Mɛ̄lɛ̄ka̍la̍ŋ ni᷄ŋ ki̍nɛ̍i̍, ɔ̍ɔ̄ sāwa̍ hi̍o̍ū kpo̍u̍ wo̍?”

²⁹Mi̍ Chi̍i̍sū mu̍lūl ndu̍ āā, “Sāwā bɛ̍ndu̍ hi̍o̍ū sāwāla̍ŋ kpo̍u̍ wo̍ cho̍ ni̍ āā, ‘I̍sɔ̄lūɛ̄ī, ya̍ŋ ni᷅la̍ŋ, Māsānɔ̄ɔ̍ Mɛ̄lɛ̄ka̍ nāa̍ ndu̍ pīlɛ̍ kpe̍ cho̍ Māsānɔ̄ɔ̍ ni̍.

³⁰Ka̍a̍la̍ Ma̍sānɔ̄ɔ̍ o̍ cho̍ Mɛ̄lɛ̄ka̍ ŋ̄ pīɛ̄īyo̍ wo̍ nyɛ̄ kɛ̄ndɛ̄ kɛ̍ndɛ̍ī. Ka̍a̍la̍ ndu̍ a̍ kɔ̄l nūmndo̍ kpo̍u̍, ndu̍yɛ̍ mā wa̍ yīya᷄ŋndo̍ a̍ ndu̍ o̍kɔ̄ɔ̄ te̍le̍ŋ o̍ te̍le̍ŋ fe̍e̍. Ka̍a̍la̍ ndu̍ a̍ kpāāyā nu̍mndo̍ kpo̍u̍.’

³¹Sāwāla̍ bɛ̍ndūla̍ŋ, tīɔ̍ɔ̍ŋ ndɔ̄ɔ̍ chō ho̍ō ni̍, ‘Ka̍a̍la̍ wāna̍ nya̍ chīɛ̄ɛ̄li̍āŋ ndo̍ mɛ̄ɛ̍ ŋ̄ kāāla̍ nūm pi̍la̍ yɛ̍.’ Sāwāla̍ che᷅le̍ŋ lā cho̍ la̍ bɛ̍ndū māā lā tīɔ̍ɔ̍ŋndā lāŋ te̍.”

³²O̍ ko̍ŋ, mi̍ wāna̍ pɛ̍ɛ̍kū wa᷅ŋnda̍ sāwāla̍ Mɛ̄lɛ̄ka̍la̍ŋ ndo̍ dīmūl Chi̍i̍sū āā, “Ti̍chā, tōnya̍a̍ ŋ̄ dīmi̍ ni̍. Mɛ̄lɛ̄ka̍ ndu̍ pīlɛ̍ kpe̍ cho̍ ni̍. Mɛ̄lɛ̄ka̍ chēle̍ŋ cho̍ le̍, mɛ̄ɛ̍ ndu̍.

³³Ndu̍yɛ̍, mɛ̄ɛ̍ mī wānā ka̍a̍la̍ Mɛ̄lɛ̄ka̍ a̍ kɔ̄l nūmndo̍ kpo̍u̍, mā yi̍ya̍ŋ a̍ ndu̍ o̍kɔ̄ɔ̄ te̍le̍ŋ o̍ te̍le̍ŋ, mā ka̍a̍lā ndu̍ a̍ kpāāyā nu̍mndo̍ kpo̍u̍, mā ka̍a̍la̍ wāna̍ nya̍ chīɛ̄ɛ̄li̍āŋ ndo̍ mɛ̄ɛ̍ ŋ̄ kāāla̍ nūm pi̍la̍ yɛ̍. Ke̍ŋ hi̍o̍ū nāŋɔ̄ɔ̄ a̍ vīsīa̍a̍ sa̍lāa̍ sōlīo̍o̍ a̍ sa̍lālā chēle̍ŋ sōlīo̍o̍ nāa̍ Mɛ̄lɛ̄ka̍ chūā.”

³⁴Mi̍ Chi̍i̍sū si̍nā māā pōo̍ ho̍ō mūli̍ ndu̍ dīōm a̍ kɔ̄l kālu̍. Le̍ he̍ī, mbo̍ dīmūl ndu̍ āā, “A̍ cho̍ le̍vi̍l a̍ Māsāle̍ Mɛ̄lɛ̄ka̍le̍ŋ te̍.” Ndu̍yɛ̍ o̍ ko̍ŋ kɔ̍ɔ̍lī, mi̍ wānā o̍ wānā wo᷅ le̍ ndu̍ nyūnāa̍.

³⁵Mɛ̄ɛ̍ Chi̍i̍sū wa̍ wāŋnda̍ pɛ̄ɛ̄kōo̍ o̍ chīɛ̍i̍ Mɛ̄lɛ̄ka̍a̍ ni᷄ŋ, mbo̍ nyūnā āā, “Le̍ yɛ̄ɛ̍nɛ̍ wa̍nāa̍ pɛ̍ɛ̍kū wa᷅ŋnda̍ sāwāla̍ Mɛ̄lɛ̄ka̍la̍ŋ nda̍ dīmi̍ yɛ̄ māā, Ki̍li̍tī, wāna̍ Mɛ̄lɛ̄ka̍ chu̍a̍ būŋgɛ̄i̍ māā ō chō vīōmɔ̄ɔ̄ le̍ wāŋnda̍ pīŋīo̍o̍ wo̍, māā po̍ Dēēvi̍o̍o̍ o̍ cho̍ ni̍?

³⁶Mɛ̄ɛ̍ nyi̍na̍ Mɛ̄lɛ̄ka̍a̍ tōl Dēēve̍ kɔ̄ɔ̄lī, mi̍ ndu̍ pi̍la̍ di̍mī māā, Māsānɔ̄ɔ̍ Mɛ̄lɛ̄ka̍ dīmu̍l Māsānɔ̍ nūu̍ āā, Cha̍l na̍nu᷄ŋ o̍ fo̍ndāŋ lēbīɔ̍ɔ̍ o̍ bā nī kɛ̍ndɔ̄ɔ̍ chōo̍ mbō lo̍ o̍ ko̍ŋ mī to̍sa̍ mā nɛ̍i̍ ya̍a̍mɔ̍ɔ̍wa̍a̍ nu̍mnda̍ a̍ bɛ̄ŋgu̍.

³⁷Tē Dēēve̍ pi̍la̍ ve̍e̍lu̍ pɛ̍ wa᷅ŋndo̍ ho̍ō āā, Māsānɔ̄ɔ̍, vɛ̄ɛ̍nɛ̍ wānā ko̍ŋ ō sīmnūŋ yɛ̍ vɛ̄lɛ̄ po̍ Dēēvi̍o̍o̍?” Wānāā fāŋgā fa̍ŋgā wa̍ a̍ kɔ̄l kɛ̄ndɛ̄ le̍ ndu̍ nīla̍ŋ yāŋɔ̄ɔ̍.

³⁸Mɛ̄ɛ̍ Chi̍i̍sū wa̍ nda̍ pɛ̄ɛ̄kōo̍, mbo̍ dīmī āā, “Lā mānda̍ŋ a̍ wānāa̍ pɛ̍ɛ̍kū wa᷅ŋnda̍ sāwāla̍ Mɛ̄lɛ̄ka̍la̍ŋ nda̍. Kāni̍, ā kāāla̍ kēlāa̍ o̍ dōmāla̍ vi̍lɛ̄īla̍ŋ ni᷄ŋ, le̍ chɔ̄mndo̍ māā ā chō wānāā bɛ̄ndū. Ā hɛ̄nāŋ tē wāŋnda̍ wa̍ nda̍ yīlɔ̄ɔ̍ o̍ lɔ̍ɔ̍la̍ŋ ni᷄ŋ fāŋgāa̍ o̍ hɔ̄l pɛ̍, ā sūŋgu᷄ŋ mɔ̍si̍lta̍ŋ o̍ lēbōl.

³⁹Ō chīɛ̄īlā Chu̍ūwa̍ pīɛ̄ī Mɛ̍lɛ̄ka̍ la̍ŋ ni᷄ŋ bɛ̍ɛ̍ ā kūɛ̄ pɛ̍, o̍ kpe̍ŋgbe̍i̍la̍ tāse̍la̍ŋ chōo̍ nda̍ hɛ̄nāŋ cha̍lle̍ ni̍. O̍ bɔ̄ŋa᷅ŋnda̍ŋ ni᷄ŋ bɛ̍ɛ̍ ā kūɛ̄ pɛ̍, o̍ kpe̍ŋgbe̍i̍la̍ tāse̍la̍ŋ nda̍ hɛ̄nāŋ cha̍lle̍ ni̍.

⁴⁰Wāŋnda̍ ha̍ā, wāŋ lāāndūāā pīāāndūāā ndāa̍ wū nu̍a̍ā wa̍, vīi̍ya̍a̍ ka̍ŋ, nyɛ̄m nda᷄ŋ dīo̍o̍. Ā chɛ᷄ŋ pɛ̍, ā tōl pīɛ̄īlē vīlɛ̄ī vīlɛ̄īle̍ŋ o̍ Mɛ̄lɛ̄ka̍ lo̍ le̍ chɔ̄mnɔ᷄ŋndo̍ wāŋnda̍ o̍ hɔ̄l. Kɛ̍ ndu̍yɛ̍, nda̍ hi̍a̍ū ni̍ŋ nyɛ̍ pālāa̍ sɔ̄lā a̍ wānā o̍ wānā.”

⁴¹Mi̍ Chi̍i̍sū cha᷅l o̍ fo̍ndāŋ wāŋnda̍ dūāū ka̍ni̍o̍ŋ o̍ chīɛ̍i̍ Mɛ̄lɛ̄ka̍a̍ wo̍ īkɛ̄i̍. Mbo̍ wā wāŋnda̍ mɛ̄ɛ̄nda᷄ŋndo̍ o̍ ka̍ni̍o̍ŋ dɔ̄wɔ̄ɔ̍. Mi̍ wānāā sūlāa̍ ā fāŋgā fa̍ŋgā ā dūāū ka̍ni̍o̍ŋ ta̍u̍.

⁴²Mbo̍ chā mi̍ chūā ta̍mbɛ̍i̍ pɔ̍nɔ̍ ndɔ̄ vi᷅ wo̍ hūŋ. Mbo̍ dūāū ka̍ni̍ŋ pɔ̍mbɔ᷄ŋ ŋ̄ mūu̍ŋ. Ŋ̄ wa̍ le̍ ka̍pāa̍ ō pīlɛ̍.

⁴³Mi̍ Chi̍i̍sū ve̍e̍lū bu̍ɛ̍i̍yāā ndūa̍a̍. Mbo̍ dīmūl nda̍ āā, “Mī di̍mu̍l nya̍, chūā vīi̍ ta̍mbɛ̍i̍yo̍ ho̍ō, ndu̍ hi̍o̍ū ka̍ni̍o̍ŋ dɔ̄wɔ̄ɔ̄ a̍ ha̍ā kpo̍u̍.

⁴⁴Wāŋnda̍ ha̍ā kpo̍u̍, ā nɔ̄ ta̍u̍. Ndu̍yɛ̍, nyɛ̄ nda̍ nɔ̄ wo̍, ō ti᷄ŋ ko̍ni̍ nda̍ dɔ̄ū ni̍. Kɛ̍ chūa̍a̍ ho̍ō ndu̍, a̍ bā ndɔ̄ ha̍vɛ̍i̍ ko̍ŋ kpo̍u̍, mbo̍ dūāū ka̍ni̍ŋ pɔ̍mbɔ̄ŋ o̍ ti̍i̍nda̍ŋ ndo̍ŋ fa̍ū.”