Read Southern Kisi Ma̍kī 13 Bible Online

Ma̍kī 13 - Southern Kisi bible

Ma̍kī 13

¹Mɛ̄ɛ̍ Chi̍i̍sū wa̍ fūlāa̍ o̍ chīɛ̍i̍ Mɛ̄lɛ̄ka̍a̍ ni᷄ŋ, mi̍ bu̍ɛ̍ī ndɔ̄ɔ̍ ō pīlɔ̍ɔ̄ dīmūl ndu̍ āā, “To̍fa̍ wɔ̍ pōūtā kɔ̄ndɔ̄fi̍ltā bɛ̄ndū, Ti̍chā. To̍fa̍ tāŋgūltā kɔ̄ndɔ̄fi̍ltā bɛ̄ndū se᷅.”

²Mi̍ Chi̍i̍sū di̍mūl ndu̍ āā, “Nya̍ bɛ̍ɛ̍, lā tōfa̍ tāŋgūlta̍ŋ nda᷅ŋ. La᷅ŋ kpo̍u̍ lā chō pīɔ̄l. Pōū tāŋgūlāa̍ ō pīlɛ̍ bɛ̍ɛ̍ lo᷅ ni̍ŋ o̍ chāa̍ŋ ndɔ̍ cho̍o̍ le̍.”

³Mɛ̄ɛ̍ Chi̍i̍sū cha̍l o̍ Pēmbīī Yɔ̄mīī Ɔ̄li̍fīi̍ve̍ chōo̍, kūmbū chīɛ̍i̍ Mɛ̄lɛ̄ka̍a̍ wo̍, mi̍ Pītɛ̍, a̍ Chēmi̍si̍ a̍ Chɔ᷄ŋ, a̍ A̍ndūlū, a̍ hūŋ nāa̍ ndu̍ chu̍a̍ nda̍ kpe̍e̍le̍.

⁴Ma̍ dīmūl ndu̍ āā, “Chɔ̍m ndɔ̍ na̍a̍ bōōndi̍i̍ sɔ̄ɔ̍ŋ mu᷅ŋ ŋ̄ chō hūnɔ̄ɔ̄ yɔ̄nɔ᷄ŋ nde̍. Ɔ̍ɔ̄ tāāmāsi̍ yɔ̍nu̍ŋ ni̍ŋ le̍ sīnāa̍ māā te̍le̍ŋndo̍ fūūlu̍u̍ le̍ mi̍ sūɛ̍i̍ he̍ī ī yɔ̄nu̍ŋ ndo̍?”

⁵Mi̍ Chi̍i̍sū dīmūl nda̍ āā, “Lā mānda̍ŋ yɔ̍ŋi̍ wānā o̍ wānā hu̍i̍ nya̍ mbō fāŋa̍ nya̍ o̍ nɛ̄i̍ tōnya̍a̍ chōo̍.

⁶Wānāā fāŋgā fa̍ŋgā ā hūŋ ni̍ŋ mā chu̍a̍ dīōlā nīla̍ŋ, mā dīmi̍ māā nda̍ cho̍ Ki̍li̍tī ni̍, wāna̍ Mɛ̄lɛ̄ka̍ chu̍a̍ būŋgɛ̄i̍ māā ō chō vīōmɔ̄ɔ̄ le̍ wāŋnda̍ pīŋīo̍o̍ wo̍. O̍ ko̍ŋ, mā hūi̍ wānāā fāŋgā fa̍ŋgā ma̍ fāŋa̍ nda̍ o̍ nɛ̄i̍ tōnya̍a̍ chōo̍.

⁷Tē lā tūēī pɛ̍, a̍ chɔ̄ūla̍ŋ o̍kɔ̄ɔ̄ nya̍ īkɛ̄i̍, ndu̍yɛ̍, mī lā tūēī a̍ chɔ̄ūla̍ŋ o̍kɔ̄ɔ̄ la̍nda̍ŋ a̍ nya̍, lā bu̍u̍la᷄ŋ te̍. Sɔ̄ɔ̍ŋ mu᷅ŋ ŋ̄ nɔ̄ mī ŋ̄ yɔ̄nu̍ŋ. Kɛ̍ mu̍ŋ ŋ̍ yɔ̍nu̍ŋ bɛ̍ɛ̍, ko̍ŋ chɔ᷅m ma̍chɔ̍māā māā mɛ̄ɛ̄lu̍la̍ chi̍e̍ēŋndo̍ le̍ la̍ fu̍u̍lu̍u̍ wɔ̄ la̍ŋ te̍.

⁸Māsāa̍ a̍ māsāa̍ ā sɔ̄ŋgā ni̍ŋ, mī lɛ̄ŋnde̍ŋ a̍ lɛ̄ŋnde̍ŋ mā sɔ̄ŋga̍. Ndu̍yɛ̍ o̍ ko̍ŋ kɔ̍ɔ̍lī, lɛ̄ŋnde̍ŋ lē nyīīyā ni̍ŋ o̍ fo̍ndāŋndā fāŋgā fa̍ŋgā o̍ chi̍e̍ēŋndo̍ chōo̍. Ndu̍yɛ̍, mī yīa̍a̍ŋ mā de᷄l bā o̍ bā fe̍e̍ o̍ chi̍e̍ēŋndo̍ chōo̍. Sɔ̄ɔ̍ŋ mu᷅ŋ kpo̍u̍ ŋ̄ wā ni̍ŋ ma̍wa̍ā nyɛ̄ pālāa̍ kāndɔ᷄ŋndo̍, mɛ̄ɛ̍ pūli̍i̍ vi̍a̍lɛ̄i̍ ī kāndū wa᷅na̍ yo᷄llo̍ nɛ̄īyo̍ sɛ̄nɛ̄ī yɛ̍.

⁹“Ndu̍yɛ̍, lā mānda̍ŋ le̍ kpūndɛ̍ cho̍ nya̍ kōmāl lo̍. Ā chō nya̍ bīyɔ̄ɔ̄ mā kūɛ̄ a̍ nya̍ o̍ tōŋgōla̍ kɔ̍ɔ̍sāāla̍ŋ ni᷄ŋ, ndu̍yɛ̍ mā lɔ̄ɔ̄ nya̍ o̍ chīɛ̄īlā Chu̍ūwa̍ pīɛ̄ī Mɛ̄lɛ̄ka̍ la̍ŋ ni᷄ŋ le̍ mɛ̄ɛ̍ nya̍ chō bu̍ɛ̍i̍yāā nīa̍a̍ yɛ̍. Ndu̍yɛ̍, ā chō lākɔ̄ a̍ nya̍ o̍ māsāā bɛ̍ndūa̍a̍ lo̍ a̍ wānāa̍ cho̍ lɛ̄ŋnde̍ŋ bōlle̍ŋ nda̍ le̍ sa̍bū nūu̍. Tē ā kūɛ̄ a̍ nya̍ pɛ̍, o̍ ko̍ŋ nya̍ sɔ̄lā ni᷅ŋ fo̍ndāa̍ le̍ nda̍ nyɛ̄ nya̍ sīnā a̍ ya̍ o̍kɔ̄ɔ̄ wo̍ dīmūllo̍ ni̍.

¹⁰Ndu̍yɛ̍, mɛ̄ɛ̍ mī Yōōŋgū Kɛ̄ndɛ̍ Mɛ̄lɛ̄ka̍a̍ ō wa̍ fɛ̍lɛ̍ŋ o̍ di̍mīa̍ŋ bā o̍ bā fe̍e̍ o̍ chi̍e̍ēŋndo̍ chōo̍.

¹¹Tē ā bīī nya̍ pɛ̍ mā kūɛ̄ a̍ nya̍ o̍ tōŋgōla̍ kɔ̍ɔ̍sāāla̍ŋ ni᷄ŋ, lā bu̍u̍la᷄ŋ le̍ nyɛ̄ nya̍ chō dīmī wo̍ lɔ̍ɔ̍pa̍ te̍le̍ŋndo̍ ō fūūlūū le̍. Kɛ̍ tē te̍le̍ŋndo̍ fūūlu̍u̍ pɛ̍, lā dīmi̍ nyɛ᷅ Mɛ̄lɛ̄ka̍ chō nya̍ kē o̍ te̍le̍ŋ ko̍ŋ ni᷄ŋ ndo̍. Fo̍ndōle̍, ō cho̍ nya̍ le̍ cho̍ īsɔ̄ɔ̍ le̍, Nyi̍na̍ Mɛ̄lɛ̄ka̍a̍ cho̍ īsɔ̄ɔ̍ ni̍.

¹²Wāŋnda̍ ā pūm ā māl ni̍ŋ pɔ̍mbūāā ndāa̍ kɛ̄lɛ̄ŋgāā bɛ̄ndāā ndāa̍ wāŋnda̍ o̍ bā le̍ mā kɔ̄ɔ̄sa̍ a̍ nda̍ mā dīī nda̍. Fi̍nyāa̍ ā pūm bɛ̍ɛ̍ ā tōsā ni̍ŋ le̍nde̍ a̍ chūāūwāā ndāa̍. Ndu̍yɛ̍, chūāūwa̍ ā pūm ā sīmūl ni̍ŋ wa̍nāa̍ ve̍lū nda̍ wa̍, ndu̍yɛ̍ mā tōsa̍ mī wānāa̍ ve̍lū nda̍ wa̍ ā sɔ̄la̍ pīɔ̍mndo̍.

¹³Wāŋnda̍ kpo̍u̍ ā tūl nya̍ ni̍ŋ le̍yɛ̍ le̍ mɛ̄ɛ̍ nya̍ chō bu̍ɛ̍i̍yāā nīa̍a̍ yɛ̍. Kɛ̍ ndu̍yɛ̍, wānā o̍ wāna̍ hi̍o̍ū la̍chi̍ a̍ bīūwɔ᷄ŋndo̍ pɛ̍ ha̍a̍a̍ mbō lo̍ o̍ ko̍ŋ mbō fūūlu̍u̍ o̍ mɛ̄ɛ̄lu̍la̍ nyɛ̄ pālāā kōŋ pɛ̍, Mɛ̄lɛ̄ka̍ pīŋi̍ ndu̍.”

¹⁴Wāna̍ cho̍ tōfāa̍ o̍ yāu̍wo̍ ho̍ō ni᷄ŋ ndo̍ ō sīna̍ nyɛ᷅ Chi̍i̍sū di̍mi̍ ho̍ō wo̍ pɛ̍ŋgu̍ nyɛ̍ kɛ̄ndɛ̄ kɛ̍ndɛ̍ī. Mi̍ Chi̍i̍sū hi̍a̍ū lāchī a̍ sūɛ̍i̍ āā, “Tē lā chē nyɛ̄ wɔ̄ɔ̍ŋ wɔ̄ɔ̍ŋ bɛ̄ndu̍ tɛ̍ɛ̍mbūū wo̍, mbō si᷄m nāa̍ o̍ nɔ̍ le̍ lāsīsi̍ le̍ wa̍ pɛ̍, mɛ̄ɛ̍ wānāa̍ cho̍ o̍ lɛ̄ŋndē Chūdi̍a̍āle̍ŋ ni᷄ŋ nda̍ ā nyāānu̍ŋ o̍ pēmbo᷄ŋ.

¹⁵Ndu̍yɛ̍, wāna̍ cho̍ wā īchāli̍ o̍ chīɛ̄īyo̍ chōo̍ wo̍, tē ō tōl pɛ̍, ō ku̍ā lɛ̄ le̍ nyɛ̄m ndɔ᷄ŋ chūā chīɛ̄ī ni̍ŋ te̍.

¹⁶Wāna̍ cho̍ wā o̍ chīɛ̍i̍ ni᷄ŋ ndo̍ ō mi̍i̍ŋgū lɛ̄ dōma̍ ndɔ̄ che᷅le̍ŋ chūā chīe̍e̍ le̍.

¹⁷Nyɛ̄ pālāa̍ wā ni̍ŋ bɔ̍ɔ̍ le̍ wānāā lāyo᷄lla̍ a̍ ko̍msa̍a̍ o̍ pālɛ̍i̍ ke̍ŋ ni᷄ŋ.

¹⁸Lā pīɛ̍i̍ Mɛ̍lɛ̄ka̍ māā sɔ̄ɔ̍ŋ mu᷅ŋ ŋ̄ yɔ̄nu᷄ŋ a̍ te̍le̍ŋ sīāltē wɔ̄ɔ̍ŋnde̍ŋ tē.

¹⁹Nyɛ̄ pālāa̍ wa᷅ ni̍ŋ o̍ pālɛ̍i̍ ke̍ŋ ni᷄ŋ ndo̍ vēla᷅ŋ ndɔ̄ bɛ̍ɛ̍ ve᷅ ni̍ŋ te̍. Chɔ̍ŋ bɛ̍ɛ̍ a̍ te̍le̍ŋ Mɛ̄lɛ̄ka̍ tōōsi̍a̍a̍ chi̍e̍ēŋndo̍ wo̍ mbo̍ fūūlūū a̍ pāa̍le̍ hāūle̍ŋ, nyɛ̄ pālāā wāā le̍nde̍ o̍ yɔ̍nu̍ŋ ndɔ̍ le̍. Ndu̍yɛ̍, mbō kūɛ̄ a̍ lāchī vēla᷅ŋ ndɔ̄ ve᷅ lɛ̍ ni̍ŋ te̍.

²⁰Kɛ̍, Māsānɔ̄ɔ̍ Mɛ̄lɛ̄ka̍ fāŋa̍ pālɛ̍i̍ nyɛ̄ pālɛ̄ī kēŋ ī ti᷄ŋ lē chōo̍. Tē ndu̍ o̍o̍ ve̍ ko̍ŋ te̍, wānā o̍ wānā bɛ̍ɛ̍ ndu̍ o̍o̍ lo᷅ ni̍ŋ yo̍o̍mū le̍. Kɛ̍ ndu̍yɛ̍, Mɛ̄lɛ̄ka̍ chō pālɛ̍i̍ ke̍ŋ fāŋā lēchōo̍ i̍ ti᷄ŋ le̍ wānāā ndūa̍a̍ o̍ hɛ̍li̍ wa̍.

²¹“Ndu̍yɛ̍, wāŋndo̍ ō dīmu̍l nu̍m bɛ̍ɛ̍ āā, ‘Mi̍ che᷄ŋ Ki̍li̍ti̍, wa᷅na̍ Mɛ̄lɛ̄ka̍ chu̍a̍ būŋgɛ̄i̍ māā ō chō vīōmɔ̄ɔ̄ le̍ wāŋnda̍ pīŋīo̍o̍ wo̍ na̍nu᷄ŋ.’ Ɔ̄ɔ̄ mbō dīmī āā, ‘Mi̍ che᷄ŋ ndu̍ ba̍ā nda̍.’ Lā la̍a̍la᷄ŋ a̍ ndu̍ le̍.

²²Kāni̍ fo̍ndōle̍, wānāā lāchōōwāa̍ chō hūnɔ̄ɔ̄ tīsā. Ā pūm ā dīmī ni̍ŋ māā nda̍ cho̍ Ki̍li̍tī ni̍. Mī ā pūm ā dīmi̍ māā wānāa̍ su̍a̍ā le̍ Mɛ̄lɛ̄ka̍ wa̍ nda̍ chō ni̍. Ndu̍yɛ̍, ā tōsā ni̍ŋ ka̍a̍ma̍āla̍ŋ a̍ sɔ̄ɔ̍ŋ kɔ̄ndɔ̄fi̍llo̍ŋ le̍ māā tē ā nɔ̄la̍ pɛ̍, mā hūi̍ wānāā Mɛ̄lɛ̄ka̍ hɛ̄li̍ wa̍ mā fāŋa̍ nda̍ o̍ nɛ̄i̍ tōnya̍a̍ chōo̍.

²³Lā pu̍ɛ̍ɛ̍nu᷄ŋ te̍. Kāni̍, I̍ di̍mu̍l nya̍ a̍ ndi̍ o̍kɔ̄ɔ̄ kpo̍u̍ lɔ̍ɔ̍ pa̍ i̍ yɔ̍nūŋ.”

²⁴Mi̍ Chi̍i̍sū hi̍a̍ū lāchī ā dīmīo̍o̍ āā, “O̍ pālɛ̍i̍ ke̍ŋ ni᷄ŋ, tē te̍le̍ŋ nyɛ̄ pālāā kōŋ hīōū pɛ̍, nyūmnda̍ŋ mā kūmbū ni̍ŋ pāa̍le̍ŋ kpu̍. Pāŋge̍i̍ bɛ̍ɛ̍ mī ī pɛ̄ŋgi̍ dīōndɔ̄ɔ̍.

²⁵Lōo̍ŋ nɔ̍ dīōndɔ̄ɔ̍ o̍ ha̍la̍ wo̍ŋ mī ŋ̄ fūla̍ mī ŋ̄ dēli̍. Mī kpāāyāla̍ cho̍ chōo̍ cho̍o̍ la̍ŋ lā hīīlu̍ŋ wo̍kūu̍ wo̍kūu̍ bɛ̍ndū.

²⁶O̍ ko̍ŋ, mī wāŋnda̍ chē wāna̍ nda̍ vēēlū āā, Po̍ Wānā Pɔ̍nɔ̍ɔ̍ wo̍ hūnɔ̄ɔ̍ o̍ yu̍mbu̍ yu̍mbo̍o̍ ni᷄ŋ a̍ kpāāyā bɛ̍ndōo̍ a̍ nāŋɔ̄ɔ̍.

²⁷Ō ko̍ŋ kɔ̍ɔ̍lī, ō chō ki̍i̍la̍a̍ Mɛ̄lɛ̄ka̍a̍ vīōmɔ̄ɔ̄ bā o̍ bā fe̍e̍ o̍ chi̍e̍ēŋndo̍ chōo̍ mā kɔ̍ chu̍u̍ŋgīāā wānāā ndūa̍a̍ o̍ hɛ̍li̍ wa̍.”

²⁸Mi̍ Chi̍i̍sū hi̍a̍ū lāchī a̍ sūɛ̍i̍ āā, “Lā nɔ̄ mī lā sɔ̄la̍ tāāsi̍o̍o̍ a̍ yɔ̄m fi̍kīi̍yo̍ o̍kɔ̄ɔ̄. Tē lɛ̄ūwūŋ yɔ̄mndo̍ ho̍ō ŋ̄ kāndu̍ dɔ̍ɔ̍ pēī sɛ̍nɛ̄īye̍ sōlīo̍o̍ pɛ̍, lā sīna̍ dɔ̍ɔ̍ māā sīālte̍ŋ lē chō ni᷅ŋ kpɛ̍ɛ̍lūŋ le̍ fūūlūūwo̍.

²⁹Mɛ̄ɛ̍ le̍nde̍ ko̍ni̍ i̍ cho̍ ni̍. Tē lā chē pɛ̍ mī sɔ̄ɔ̍ŋ mu᷅ŋ ŋ̄ yɔ̄nu̍ŋ, lā sīna̍ dɔ̍ɔ̍ māā te̍le̍ŋndo̍ chō ni᷅ŋ kpɛ̍ɛ̍lūŋ māā ō chō ni᷅ŋ kpɛ̍ɛ̍lūŋ bɛ̄ndū.

³⁰Mī di̍mu̍l nya̍, wānāa̍ cho̍ yōōmū te̍le̍ŋndo̍ ho̍ō wa̍, ā cho̍ chu̍wɔ̄ɔ̄ wu̍ le̍ ha̍a̍a̍ mī sɔ̄ɔ̍ŋ mu᷅ŋ kpe̍de̍ ŋ̍ yɔ̍nu̍ŋ.

³¹Ha̍la̍a̍ a̍ chi̍e̍ēŋndo̍ ā fāŋāŋ, kɛ̍ dīōmndā nīla̍ŋ lā fe̍ŋāŋ le̍cho̍o̍ le̍.”

³²Mi̍ Chi̍i̍sū hi̍a̍ū lāchī a̍ dīmīo̍o̍ āā, “Wānā o̍ wānā si̍nā pa̍a̍le̍ wāna̍ nda̍ vēēlū āā, Po̍ Wānā Pɔ̍nɔ̍ɔ̍ wo̍ ō chō hūnɔ̄ɔ̄ le̍, kɛ̄lɛ̄ŋgāā ni᷅ŋ te̍ ha̍vɛ̄i̍ ko̍ŋ. Ki̍i̍la̍a̍ Mɛ̄lɛ̄ka̍a̍ bɛ̍ɛ̍, ā si̍nā le̍. Po̍ Mɛ̄lɛ̄ka̍a̍ pi̍la̍ bɛ̍ɛ̍, ō si̍nā le̍. Mɛ̄lɛ̄ka̍ fi̍nyā nāa̍, ndu̍ pīlɛ̍ kpe̍ si̍nā ni̍.

³³Le̍la̍ŋ, la̍ wa᷅ ā pūɛ̄ya᷄ŋ te̍, kāni̍ fo̍ndōle̍, lā si̍nā lɔ̍ɔ̍ te̍le̍ŋndo̍ chō fūūlūū wo̍ le̍.

³⁴Ī chō māchūāā mɛ̄ɛ̍ wāŋndo̍ ku̍ā nu̍a̍ā ī nɛ̍ mbō mɛ̄i̍ chīɛ̄ī ndɔ̄ɔ̍ bu̍ɛ̍i̍yāā ndūa̍a̍ o̍ bā yɛ̍. Mbō chɔ᷄m nda̍ wa̍li̍ nda̍ nɔ̄ le̍ tōsāa̍ ā pīlɛ̍ŋ pi̍lɛ̍ŋnda̍ wo̍. Mbō dīmu̍l po̍ ma̍ndā di̍o̍o̍ wo̍ le̍ mɛ̄ŋgɛ̄lāa̍.

³⁵Le̍la̍ŋ, lā wa᷅ ā pūɛ̄ya᷄ŋ te̍. Kāni̍ fo̍ndōle̍, lā si̍nā ni̍ŋ lɔ̍ɔ̍ wāna̍ chīɛ̄īyo̍ chō hūnɔ̄ɔ̄ wo̍ le̍, tē īchɔ̄l ni̍, ɔ̄ɔ̄ tē a̍ dītɛ̍ɛ̄ŋndo̍ ni̍, ɔ̄ɔ̄ tē te̍le̍ŋ sɔ̄ɔ̍ tāso̍o̍ ō kōōwā wo̍ ni̍, ɔ̄ɔ̄ tē īdīi̍ ni̍.

³⁶Lā wa᷅ ā pūɛ̄ya᷄ŋ te̍, yɔ̍ŋi̍ o̍ ko̍ma̍l nya̍ o̍ mālɔ̄, tē ō hīŋ pɛ̍.

³⁷Nyɛ̄ ya̍ I̍ di̍mu̍l nya̍ pɛ̍, I̍ di̍mi̍ ndu̍ le̍ wānā o̍ wānā, ‘Lā wa᷅ ā pūɛ̄ya᷄ŋ te̍.’ ”