Read Southern Kisi Ma̍kī 15 Bible Online

Ma̍kī 15 - Southern Kisi bible

Ma̍kī 15

¹Ī dīi̍yo̍ pu̍u̍ŋ, mi̍ wānāā bɛ̄ndūāā sōlīāā lāsa̍lāa̍, a̍ lāŋgba̍ā kālla̍, a̍ wānāa̍ pɛ̍ɛ̍kū wa᷅ŋnda̍ sāwāla̍ Mɛ̄lɛ̄ka̍la̍ŋ nda̍, a̍ wānāa̍ ki̍a̍lū ya᷅ma̍ŋnda̍ kpo̍u̍, a̍ kɛ̍ɛ̍sīāā a̍ ndi̍ o̍kɔ̄ɔ̄ hɔ̄lāā tūlu̍. O̍ ko̍ŋ kɔ̍ɔ̍lī ma̍ yīī Chi̍i̍su̍ po᷅ŋ ma̍ kūā a̍ ndu̍. Ma̍ yɔ̄ŋgū ndu̍ nāa̍ Māsāa̍ Pa̍i̍le̍ chu̍ā.

²Mi̍ Pa̍i̍lē nyu̍nā ndu̍ āā, “Nu᷄m cho̍ māsa̍ Chu̍ūwa̍ ni̍?” Mi̍ Chi̍i̍sū mu̍lūl ndu̍ āā, “Nyɛ̄ ŋ̄ dīmi̍ wo̍ chō tōnya̍.”

³Mi̍ wānāā bɛ̄ndūāā sōlīāā lāsa̍lāa̍ lo̍ wa̍, ā nyīīndūū ndu̍ sɔ̄ɔ̍ŋ ta̍u̍.

⁴O̍ ko̍ŋ, mi̍ Pa̍i̍lē nyu̍nā ndu̍ vɛ̄lɛ̄ āā, “A̍ nɔ̍ di̍ōm mā mu̍li̍ le̍? Ā tūēī sɔ̄ɔ̍ŋ fa̍ŋgāŋ nda̍ chɔ᷄m nu̍m chōo̍ wo̍ŋ.”

⁵Kɛ̍, Chi̍i̍sū mu̍li̍ nyɛ᷅ o̍ nyɛ̄ chēle̍ŋ te̍. Mi̍ kɔ̄ndɔ̄fi̍llo̍ bīī Pa̍i̍lē.

⁶Ī wa̍ māā ka̍ā ndā, māā pɛ̄ŋgu̍ o̍ pɛ̄ŋgu̍ bɔ̄ŋa᷅ŋ lōōna᷄ŋndo̍ a̍ hīōūwɔ̄ɔ̍ chōo̍ o̍kɔ̄ɔ̄ ndu̍ o̍o̍ fu̍u̍lu̍u̍ pɛ̍, mɛ̄ɛ̍ mī Pa̍i̍lē ndu̍ o̍o̍ ma̍l wānāa̍ cho̍ o̍ bīyɔ̄ɔ̍ ni᷄ŋ nda̍ ō pīlɛ̍ ō wāŋnda̍ nyu̍nā le̍ mālɔ̄ɔ̍ wo̍.

⁷Bōōndi̍i̍ ke̍ŋ po̍ pi᷅lɛ̍ wa̍ mā vēēlū ndu̍ āā, Ba̍lu̍a̍bāā. Nda̍ wa̍ o̍ bīyɔ̄ɔ̍ ni᷄ŋ le̍ chīēīyo̍ a̍ kɔ̍mɛ̍tīi̍yo̍ ni̍. Mi̍ Ba̍lu̍a̍bāā ko̍ŋ dīī wāŋnda̍ a̍ pūm o̍ chīēī kōŋ ni᷄ŋ.

⁸Mɛ̄ɛ̍ wāŋnda̍ chūūŋgi̍āŋ ku̍ndā, ma̍ kāndū Pa̍i̍lē dīmūllo̍ māā ō tōsa̍l nda̍ nyɛ̄ o̍ to̍sāl nda̍ pāāndū o̍ te̍le̍ŋ wa̍ā nu̍a̍ā o̍ wɔ̄sīo̍o̍ ni᷄ŋ ndo̍.

⁹O̍ ko̍ŋ, mbo̍ nyūnā nda̍ āā, “Lā hɛ̄nāŋ mī I̍ me̍l nya̍ Māsā Bɛ̍ndū Chu̍ūwa̍?”

¹⁰Kāni̍, ō sīna̍ ndi̍ cha̍la̍ŋ māā nɛ̄īyɔ᷄ŋ Chi̍i̍sōo̍ wānāā bɛ̄ndūāā sōlīāā lāsa̍lāa̍ lo̍ wa̍, nda̍ a̍a̍ nɔ̍ ni̍, māā le̍la̍ŋ nda̍ hīŋ a̍ ndu̍ nāa̍ ndu̍ chu̍a̍ ni̍.

¹¹Kɛ̍, mi̍ wānāā bɛ̄ndūāā sōlīāā lāsa̍lāa̍ lo̍ wa̍, tōsā mi̍ fāŋgāa̍ nyūnā Pa̍i̍lē le̍ Ba̍lu̍a̍bāā mālɔ̄ɔ̍ yɔ̄ŋi̍ o̍ ma̍l Chi̍i̍sū.

¹²Mi̍ Pa̍i̍lē nyu̍nā nda̍ vɛ̄lɛ̄ āā, “Ō yɛ̄ɛ̍nɛ̍ ya̍ I̍ yɔ̍ŋ yɛ̍ a̍ po̍ nya̍ vēēlu̍ ho̍ō āā Māsā Bɛ̍ndū Chu̍ūwa̍ wo̍?”

¹³Ma̍ dēŋī vɛ̄lɛ̄ āā, “Ba̍ŋ ndu̍ o̍ yɔ̄m sīŋgāfīlāa̍ chōo̍ mā dīī ndu̍.”

¹⁴Kɛ̍, mi̍ Pa̍i̍lē nyu̍nā nda̍ āā, “Vɛ᷅? Ō yɛ̄ɛ̍nɛ̍ o̍ yɔ̍ŋ yɛ̄?” Kɛ̍, ma̍ chɔ̄ɔ̄lū dēŋī chōo̍ cho̍o̍ kpe̍le̍ŋ āā, “Ba̍ŋ ndu̍ o̍ yɔ̄m sīŋgāfīlāa̍ chōo̍ mā dīī ndu̍.”

¹⁵Pa̍i̍lē ndu̍ o̍o̍ hɛ̍na̍ŋ mī ndu̍ o̍o̍ nɛ̍ŋi̍ fāŋgāa̍ kɔ̄l, le̍ sa̍bū kōŋ mbo̍ mēl nda̍ Ba̍lu̍a̍bāā. Mbo̍ tōsā ma̍ lūāā Chi̍i̍sū. O̍ ko̍ŋ kɔ̍ɔ̍lī mbo̍ māl ndu̍ so̍vɛ̄i̍ya̍ o̍ bā le̍ mā ba᷄ŋ ndu̍ o̍ yɔ̄m sīŋgāfīlāa̍ chōo̍ mā dīī ndu̍.

¹⁶Mi̍ so̍vɛ̄i̍ya̍ kūā a̍ Chi̍i̍sū o̍ chīɛ̍i̍ Māsāa̍ Pa̍i̍lē wo̍. Ma̍ vēēlū ku̍ndā so̍vɛ̄i̍ya̍ kpo̍u̍ na̍a̍ pi᷅lɛ̍.

¹⁷Ma̍ chūā dōmā bɛ̍ndū sīāŋāa̍ ō pūm mā wōū ndu̍ māā dōma̍ lēmāsā. Ma̍ lūā yɔ̄ɔ̍ŋ fi̍ŋɔ̍ɔ̍ ma̍ wōū ndu̍ o̍ lēbōl māā mɔ̍si̍l lēmāsā.

¹⁸Ma̍ kāndū ndu̍ yīlɔ̄ɔ̄ nu̍a̍ā wānā a̍a̍ cha᷅ āā bɛ̄ɛ̄le̍ŋ nda̍ wa̍ ndu̍ kīo̍o̍ ni̍. Ma̍ dīmī āā, “Māsā Bɛ̍ndū Chu̍ūwa̍, vi̍o̍u̍ na̍a̍ chōo̍ kɛ̍ndi̍a̍a̍.”

¹⁹Ma̍ mūli᷄ŋ ma̍ lūāā ndu̍ bōlle̍ŋ a̍ yɔ̄mndo̍ mā lūāā. O̍ ko̍ŋ kɔ̍ɔ̍lī ma̍ tūfū ndu̍ lɔ̄lūa̍ŋ chōo̍. Ma̍ bāŋ ndu̍ wūla̍ŋ o̍ lābɛ̄ŋgu̍ ni̍ŋ.

²⁰Mɛ̄ɛ̍ nda̍ chīi̍, ma̍ sōlī ndu̍ dōmā bɛ̍ndū sīāŋāa̍ lēkɔ̄ɔ̍ ma̍ mīŋgī ndu̍ nyɛ̄lā ndɔ̄la̍ ndu̍ pi̍la̍ la̍ŋ lēkɔ̄ɔ̍. Ma̍ kūā a̍ ndu̍ le̍ ndu̍ bāŋɔ̄ɔ̍ o̍ yɔ̄m sīŋgāfīlāa̍ chōo̍.

²¹Mɛ̄ɛ̍ nda̍ wa̍ kɔ̄la̍ŋ le̍ ndu̍ bāŋɔ̄ɔ̍, ma̍ kōmāl po̍ pi᷅lɛ̍ dīōla̍ŋ āā Sa̍i̍mɔ̄ŋ, wānā wa̍ā Sāīlu̍i̍nī chi̍e̍e̍. Ndu̍ wa̍ fi̍nyāa̍ Ālɛ̄kīsa̍ndā nda̍ Lu̍fɔ̄ɔ̄ ni̍. Ndu̍ o̍o̍ chɛ̍ŋ o̍ chīɔ̍ɔ̍ŋ ni᷄ŋ mbo̍ wā hūnɔ̄ɔ̍ o̍ chi̍e̍e̍ bɛ̍ndōo̍ ni᷄ŋ. Kōmāllo̍ ndu̍, mi̍ so̍vɛ̄i̍ya̍ bīī ndu̍ le̍ mbō chu̍a̍ yɔ̄m sīŋgāfīlāa̍ Chi̍i̍sōo̍.

²²Ma̍ kūā a̍ Chi̍i̍sū o̍ fo̍ndāŋ pīlɛ̍ dīōla̍ŋ āā, Kɔ̍ɔ̍kɔ̍tā. Ko̍ŋ cho̍ ni̍, fo̍ndāŋ lākpōkpōo̍.

²³Lo̍ŋ nda̍ ke̍ ndu̍ mūɛ̄īmā pūm ni̍ mūūli̍āŋndo̍ ma̍ŋ a̍ nyɛ̄ pūm mā vēēlū ndu̍ āā, mɔ̍ɔ̄. Kɛ̍, ō ko᷄l te̍.

²⁴Ma̍ bāŋ ndu̍ o̍ yɔ̄m sīŋgāfīlāa̍ chōo̍. Mɛ̄ɛ̍ nda̍ ba᷄ŋ ndu̍, ma̍ pīɔ̄ūvi̍āŋ nyɛ̍lā ndɔ̄la̍ŋ. Ndu̍yɛ̍, ma̍ wūū kōo̍ŋ le̍ sīnāa̍ mɛ̄ɛ̍ wānā pi᷅lɛ̍ sɔ̄lā la̍ŋ yɛ̍.

²⁵A̍ te̍le̍ŋ yɛ̄ɛ̄ŋnde̍ŋ īdīi̍yo̍ nda̍ ba᷄ŋ ndu̍ ni̍.

²⁶Ma̍ pōōnyīāā dīōmnda̍ŋ āā, “Māsā Bɛ̍ndū Chu̍ūwa̍.” Ma̍ hāndū ndu̍ o̍ bōlle̍ŋ chōo̍ o̍ yɔ̄m sīŋgāfīlāa̍ chōo̍.

²⁷Ma̍ bāŋ vɛ̄lɛ̄ vīīya̍ ā ŋīɔ̍ɔ̍ŋ lātūlu̍ nda̍ Chi̍i̍sū wa̍ā. Mɛ̄ɛ̍ nda̍ ba᷄ŋ ho̍ō o̍ bā ndɔ̄ kɛ̄ndɔ̄ɔ̍ chōo̍, ma̍ bāŋ ō pīlɔ̍ɔ̄ o̍ bā ndɔ̄ mi̍āllo̍ chōo̍. [

²⁸Mi̍ ī yɔ̄nu᷄ŋ mɛ̄ɛ̍ dīo̍m Mɛ̄lɛ̄ka̍a̍ dīmi̍ yɛ̍, māā ma̍ chūā ndu̍ māā wānā wɔ̍ɔ̍ŋndo̍ ō pīlɛ̍ o̍ cho̍ ni̍.]

²⁹Mi̍ wānāa̍ wa̍ hīōūwɔ̄ɔ̍ o̍ nɛ̄ī ya̍ ā yīōū Chi̍i̍sū ta̍u̍ ta̍u̍. Ma̍ mām ndu̍ ma̍ dīmī āā, “Nūm te̍ di̍mi̍ māā ā chō chīɛ̍i̍ Mɛ̄lɛ̄ka̍a̍ pīɔ̄lɔ̄ɔ̄ mā mi̍ŋgi̍ ndu̍ tāŋgūl o̍ pālɛ̍i̍ ya̍a̍ bɛ̍ŋgu̍ le̍? Pīŋi̍ ni̍ko̍ nu᷅m pi̍la̍.

³⁰To̍l lɔ̍ nāa̍ ŋ̄ chō ka̍ŋ o̍ yɔ̄m sīŋgāfīlāa̍ chōo̍ wa̍.”

³¹Mi̍ wānāā bɛ̄ndūāā sōlīāā lāsa̍lāa̍ lo̍ wa̍, a̍ wānāa̍ pɛ̍ɛ̍kū wa᷅ŋnda̍ sāwāla̍ Mɛ̄lɛ̄ka̍la̍ŋ nda̍ mām Chi̍i̍sū. Ma̍ dīmu̍la᷅ŋ āā, “Ō nɔ̄lā mbō pīŋi̍ chāāŋnda̍, kɛ̍, ō nɔ̍lā mbō pīŋi̍ ndu̍ pi̍la̍ le̍.

³²Ki̍li̍ti̍, nu᷄m cho̍ Māsā Bɛ̍ndū I̍sɔ̄lūɛ̍i̍ya̍ wo̍, to̍l ni̍ko̍ o̍ yɔ̄m sīŋgāfīlāa̍ chōo̍ mī ŋ̄ chē. Ko̍ŋ to̍sā ni̍ mī ŋ̄ lāāla̍ŋ a̍ nūm.” Mi̍ wānāā nda̍ ba᷄ŋ lātūlu̍ nda̍ nda̍ wa̍ bɛ̍ɛ̍, mā yīōū ndu̍.

³³Mɛ̄ɛ̍ pāa̍le̍ŋ lē si᷄m o̍ bōlle̍ŋ chōo̍ ki̍nɛ̍i̍, mi̍ nyūmnda̍ŋ mā tūāl kpi᷅ŋgbi̍ o̍ lɛ̄ŋndē lēŋ ni᷄ŋ kpo̍u̍. Mi̍ mā lō mā tūālāā ha̍a̍a̍ mbo̍ kūā ha̍vɛ̄i̍la̍ŋ lā yāa̍.

³⁴A̍ bōōndi̍i̍ pɛ̄ŋgī lāwa̍li̍ ki̍nɛ̍i̍, mi̍ Chi̍i̍sū de̍ŋī chōo̍ cho̍o̍ kpe̍le̍ŋ. Mbo̍ dīmī āā, “I̍la̍i̍, I̍la̍i̍, la̍ma̍ sa̍ba̍ta̍nī?” Ko̍ŋ cho̍ ni̍ āā, “Mɛ̄lɛ̄ka̍ nūu̍, Mɛ̄lɛ̄ka̍ nūu̍, vɛ᷅ ya̍ mālɔ̄ɔ̍?”

³⁵Mi̍ wāŋnda̍ ā pūm a̍ wa̍ lo̍ŋ nda̍ tūɛ̄ī dīōm o̍ di̍mi̍ wo̍. Ma̍ lō lo̍ŋ ma̍ dīmī āā, “Lā ya᷄ŋ ni᷅la̍ŋ, ō chō Īla̍a̍chā vēēlōo̍.”

³⁶Mi̍ wānā pi᷅lɛ̍ nyāānu᷄ŋ mbo̍ kɔ̍ ma᷅l nyɛ̄ fɔ̄fɔ̄ūwo̍ ō pūm o̍ mūɛ̄īmā wāālɛ̍i̍ma̍ pu̍m ni᷄ŋ. Mbo̍ yīī o̍ sīōndōōle̍ŋ mbo̍ hēēlū le̍ mbō kē Chi̍i̍sū mbō ko᷄l. Mbo̍ dīmī āā, “Ŋ̄ chūmnu᷅ŋ ndɔ̄ mī ŋ̄ chē tē Īla̍a̍chā hu᷅ŋ ni̍ŋ mbō tūsi̍ ndu̍ o̍ yɔ̄m sīŋgāfīlāa̍ chōo̍.”

³⁷Mi̍ Chi̍i̍sū de̍ŋī chōo̍ cho̍o̍ kpe̍le̍ŋ. O̍ ko̍ŋ kɔ̍ɔ̍lī, mbo̍ mālnu᷄ŋ kɔ̍l.

³⁸Mɛ̄ɛ̍ Chi̍i̍sū ma̍lnu̍ŋ kɔ̍l, mi̍ kōlā bɛ̍ndu̍ wa̍ ō lāndāā o̍ chīɛ̍i̍ Mɛ̄lɛ̄ka̍a̍ ni᷄ŋ ndo̍ cha᷄ŋ a̍ tɛ̄ndāa̍ mālūāŋ mbo̍ fūūlūū lɛ̄ŋ di̍.

³⁹Wānā bɛ̍ndū so̍vɛ̄i̍ya̍ o̍ wa̍ īsīsi̍ o̍ yɔ̄m sīŋgāfīlāa̍ hɔ̄lndɔ̄. Mɛ̄ɛ̍ o̍ tu̍e̍ī dēŋī Chi̍i̍sū dēŋī wo̍, mbo̍ chā mɛ̄ɛ̍ o̍ vi᷅ yɛ̍, mbo̍ dīmī āā, “Po̍ Mɛ̄lɛ̄ka̍a̍ lēkɛ̍ndɛ̍ī pōo̍ ho̍ō ō wa̍ ni̍.”

⁴⁰A̍ bōōndi̍i̍ ke̍ŋ wāŋ lāāndūa̍a̍ ā pūm ā wa̍ lo̍ŋ. Ā wa̍ īsīsi̍ kɔ̍ɔ̍lī kɔ̄ɔ̄lī mā tōfā. Wāŋ lāāndūa̍a̍ wa̍ o̍ ku̍ndā kōŋ tɛ̍ɛ̄ŋ nda̍ ā ti᷄ŋ a̍ cho̍ ha̍ā ni̍. Mēēle̍ Māŋgāli᷅ŋ, a̍ Sālo̍mī, a̍ Mēēle̍ o̍ ve̍lū Chēmi̍si̍ pɔ̍mbɔ̄ a̍ Chōo̍sɛ̍ wo̍.

⁴¹Wāŋ lāāndūa̍a̍ ha̍ā nda̍ wa̍ Chi̍i̍sū kɔ̄ɔ̄lī ni̍ mī nda̍ a̍a̍ ma̍lā ndu̍ a̍ nyɛ̄ o̍ nyɛ̄ ndu̍ o̍o̍ ha̍ū bā lɔ̍ɔ̍ o̍ wa̍ o̍ lɛ̄ŋndē Kāli̍līle̍ŋ ni᷄ŋ ndo̍. Wāŋ lāāndūāā chēle̍ŋ a̍ hi᷅ŋ hɔ̄lāā tūlu̍ a̍ ndu̍ Chūlu̍sɛ̄lɛ̄m nda̍ bɛ̍ɛ̍ ā wa̍ lo̍ŋ ta̍u̍.

⁴²O̍ pāa̍le̍ Chi̍mɛ̄i̍le̍ŋ chōo̍ sɔ̄ɔ̍ŋ mu᷅ŋ yɔ̄nu̍ŋ ni̍. Ndu̍yɛ̍, le̍ŋ le̍ wa̍ pāa̍le̍ bɛ̍ɛ̍ndīa̍ŋnde̍ŋ ni̍. Pāa̍le̍ŋ nde᷅ŋ lē hīāū fɛ̍lɛ̍ŋ mālāŋ pāa̍le̍ pɛ̍ŋgīāālē Chu̍ūwa̍ lē fūūlūū. Po̍ pi᷅lɛ̍ wa̍ dīōla̍ŋ āā Chōo̍sɛ̍ Ālīmāti̍a̍ā. Wāŋnda̍ nda̍ a̍a̍ ke᷅ ndu̍ bɛ̍ɛ̄le̍ŋ ta̍u̍. Ō wa̍ wāŋndo̍ ō pīlɛ̍ wānāa̍ ki̍a̍lū ya᷅ma̍ŋ ndā tɛ̄ɛ̄ŋ. Ndu̍yɛ̍, ndu̍ bɛ̍ɛ̍ ō wa̍ chūmndo̍ le̍ hūnɔ̄ɔ̍ Māsāle̍ Mɛ̄lɛ̄ka̍le̍ŋ. A̍ pāa̍le̍ yɔ̍ŋga᷄ŋnde̍ŋ fɛ̍ɛ̍, mi̍ Chōo̍sɛ̍ bi̍ī kɔ̄llo̍ mbo̍ kūā nāa̍ Pa̍i̍lē chu̍a̍ mbo̍ pīɛ̄ī ndu̍ dīāllu᷄ŋ Chi̍i̍so᷄ŋ.

⁴³

⁴⁴Mi̍ kɔ̄ndɔ̄fi̍llo̍ bīī Pa̍i̍lē le̍ tūēīyɔ̄ɔ̍ māā Chi̍i̍sū vi᷅ ni᷅ŋ bɛ̍ɛ̍. Mbo̍ vīām le̍ wānā bɛ̍ndū so̍vɛ̄i̍ya̍. Mbo̍ nyūnā ndu̍ tē te̍le̍ŋ Chi̍i̍sū vi᷅ wō ndu̍ o̍o̍ ba̍ndu̍ ni᷅ŋ.

⁴⁵Mɛ̄ɛ̍ Pa̍i̍lē tu̍e̍ī wānā bɛ̍ndū so̍vɛ̄i̍ya̍ o̍ sōndō māā Chi̍i̍sū vi᷅, mbo̍ chɛ̄l māā Chōo̍sɛ̍ chu̍a̍ di̍a̍llūŋ ndɔ᷄ŋ.

⁴⁶Mi̍ Chōo̍sɛ̍ pi̍a̍ndū fe̍ŋgbɔ̍ɔ̍. Mbo̍ tūsī dīāllo̍ŋ o̍ yɔ̄m sīŋgāfīlāa̍ chōo̍ mbo̍ sīmbū mu̍ŋ o̍ fe̍ŋgbɛ̍ ko̍ŋ ni᷄ŋ. Mbo̍ wōū mu̍ŋ o̍ sɛ̄īyo̍ ni᷄ŋ ō nda̍ a̍a̍ to̍ū o̍ pōūwo̍ ni᷄ŋ māā būūlū wo̍. Mbo̍ pīmbūl pōū bɛ̄ndōo̍ mbo̍ hāndū ndu̍ o̍ sɛ̄īyo̍ ho̍ō sōndōo̍.

⁴⁷Mēēle̍ Māŋgāli᷅ŋ a̍ Mēēle̍ kālāa̍ Chōo̍sɛ̍ ā wa̍ tōfāa̍ ma̍ chā nāa̍ nda̍ yāmbu̍ dīāllu᷄ŋ Chi̍i̍so᷄ŋ ndā.