Read Southern Kisi Ma̍kī 16 Bible Online

Ma̍kī 16 - Southern Kisi bible

Ma̍kī 16

¹Mɛ̄ɛ̍ pāa̍le̍ pɛ̍ŋgīāālē Chu̍ūwa̍ lē hīōū, mi̍ Mēēle̍ Māŋgāli᷅ŋ, a̍ Sālo̍mī, a̍ Mēēle̍ kālāa̍ Chēmi̍si̍, a̍ pi̍a̍ndū si̍ɛ̍ndīi̍ma̍ nda̍ sūū wa̍nāā vīlɛ̍i̍ya̍ wa̍ŋ, le̍ mī nda̍ a̍a̍ kɔ̍ su̍ū o̍ dīāllu᷄ŋ Chi̍i̍so᷄ŋ.

²Mɛ̄ɛ̍ pāa̍le̍ŋ lē kāndu̍ fūlāa̍ īdīi̍yo̍ pu̍u̍ŋ o̍ pāa̍le̍ Kpu̍yālē lēŋ chōo̍, ma̍ kūā o̍ sɛ̄īyo̍.

³O̍ kɔ̄lā ndāla̍ŋ ni᷄ŋ ma̍ nyūūni̍āŋ āā, “Ō nɛ̄ɛ̍nɛ̍ cho̍ yɛ̄ na̍a̍ pōūwo̍ fēŋāl o̍ sɛ̄īyo̍ sōndōo̍?” Ndu̍yɛ̍ pōū kālāa̍ wa̍ ō bɛ̄ndū bɛ̍ndū. Kɛ̍ mɛ̄ɛ̍ nda̍ kɔ̍ nu̍ā, ma̍ chā māā pōūwo̍ ho̍ō chō ō fāŋa᷄ŋ.

⁵Mɛ̄ɛ̍ nda̍ lūɛ̄ī o̍ sɛ̄īyo̍ ni᷄ŋ, ma̍ chā po̍ chu̍a̍ pīāāndo̍o̍ ō pūm. Ō wa̍ īchāli̍ o̍ bā kɛ̄ndɔ̄ɔ̍ chōo̍ a̍ dōmā hu̍mbū vīlɛ̄īyo̍ lēkɔ̄ɔ̍. Mi̍ kɔ̄ndɔ̄fi̍llo̍ bīī nda̍.

⁶Mbo̍ dīmūl nda̍ āā, “Kɔ̄ndɔ̄fi̍li̍ bi̍ī nya̍ le̍. I̍ si̍nā māā Chi̍i̍su̍ chɛ̍ŋ ho̍ō Na̍a̍sa̍lūɛ̄ī chi̍e̍e̍ wo̍ nya̍ chō nūūvīa̍a̍ ni̍, ō nda̍ ba᷄ŋ o̍ yɔ̄m sīŋgāfīlāa̍ chōo̍ wo̍. Ō mīīŋgu̍ yōōmū. Ō cho̍ lɛ̍ na̍nu᷄ŋ te̍. Lā hu᷄ŋ mī lā hu᷄ŋ to̍fā nāa̍ o̍ wa̍ o̍ yāmbāā wa̍.

⁷Lā kɔ̍ mī lā kɔ̍ di̍mūl bu̍ɛ̍i̍yāā ndūa̍a̍ a̍ Pītɛ̍ fa̍ū māā ō chō kɔ̄la̍ŋ pɔ̄ɔ̄ nya̍ lāchī Kāli̍lī. Lo̍ŋ nya̍ chō ndu̍ chɔ̄ ni̍ mɛ̄ɛ̍ o̍ di̍mu̍l nya̍ yɛ̍.”

⁸Ma̍ fūlā o̍ sɛ̄īyo̍ ni᷄ŋ ā kīlta̍ŋ. Ā wa̍ nyīīyāa̍. Mi̍ kɔ̄ndɔ̄fi̍llo̍ bīī nda̍. Kɛ̍, ā dīmu̍l wa̍nā nyɛ̄ o̍ nyɛ̍ le̍. Fo̍ndōle̍, sīōōŋnde̍ wa̍ nda̍. [

⁹[3]Mɛ̄ɛ̍ Chi̍i̍sū mi̍i̍ŋgu̍ yōōmū īdīi̍yo̍ o̍ pāa̍le̍ Kpu̍yālē lēŋ chōo̍, Mēēle̍ Māŋgāli᷅ŋ fɛ̍lɛ̍ŋ o̍ chɔ̍mnu̍ŋ. Ndu̍ Chi̍i̍sū ndu̍ o̍o̍ to̍ū nyi̍nāā wɔ̄ɔ̍ŋnda̍ ā ŋɔ᷄mmɛ̍ū kɔ̄ɔ̄lī ni̍.

¹⁰Mi̍ Mēēle̍ Māŋgāli᷅ŋ ku̍ā mbo̍ dīmūl wānāa̍ wa̍ hɔ̄lāā tūlu̍ a̍ Chi̍i̍sū wa̍ yōōŋgōo̍ ho̍ō. Mɔ̍nɛ̍i̍ wa̍ nda̍ ta̍u̍, ndu̍yɛ̍ ā wa̍ cha᷄ŋndo̍.

¹¹Mɛ̄ɛ̍ nda̍ tūēī māā ō chō yōōmū, ndu̍yɛ̍ māā Mēēle̍ Māŋgāli᷅ŋ che᷅ ndu̍, nda̍ a̍a̍ la̍a̍la̍ŋ ā ndi̍ le̍.

¹²O̍ ko̍ŋ kɔ̍ɔ̍lī, mi̍ Chi̍i̍sū chɔ̍mnu᷄ŋ wa̍nāā ŋīɔ̍ɔ̍ŋāā chēle̍ŋ. Ā wa̍ kɔ̄la̍ŋ īnɛ̍.

¹³Ma̍ mīīŋgū ma̍ dīmūl bu̍ɛ̍īya̍ ā pīli̍a̍ā. Kɛ̍, nda̍ bɛ̍ɛ̍ ā lāāla̍ŋ a̍ nda̍ le̍.

¹⁴O̍ mɛ̄ɛ̄lu̍la̍ŋ, mbo̍ chɔ̄mnu᷄ŋ bu̍ɛ̍i̍yāā ŋ̄wāŋ tɔ̍ a̍ wānā pi᷅li̍a̍a̍, ā wa̍ nyɛ̄ dīa̍a̍ dīo̍o̍. Mbo̍ pɛ̄ɛ̄sā nda̍, kāni̍ fo̍ndōle̍, le̍ mɛ̄ɛ̍ nda̍ lāāla̍ŋ te̍ yɛ̍. Ndu̍yɛ̍, mbo̍ pɛ̄ɛ̄sā nda̍ le̍ mɛ̄ɛ̍ kɔ̄ltā ndāla̍ŋ lā wa̍ lā kālā le̍ lāāla᷄ŋndo̍ a̍ wānāa̍ che᷅ ndu̍ mīīŋgū o̍ mi̍i̍ŋgu̍ yōōmū wo̍ wa̍ yɛ̍.

¹⁵Mbo̍ dīmūl nda̍ āā, “Lā kɔ̍ o̍ chi̍e̍ēŋndo̍ ni᷄ŋ kpo̍u̍ mī lā dīmi̍ Yōōŋgū Kɛ̄ndɛ̍ Mɛ̄lɛ̄ka̍a̍ nāa̍ wānā o̍ wāna̍ chi̍e̍e̍ chu̍a̍.

¹⁶Wānā o̍ wāna̍ la̍a̍la̍ŋ a̍ Yōōŋgū Kɛ̄ndɛ̍ Mɛ̄lɛ̄ka̍a̍ mbō sɔ̄la̍ pūlɔ̄ɔ̍ Mɛ̄lɛ̄ka̍a̍ pɛ̍, ō chō wā ō bāŋa᷄ŋ. Kɛ̍, wānā o̍ wāna̍ la̍a̍la̍ŋ a̍ Yōōŋgū Kɛ̄ndɛ̍ Mɛ̄lɛ̄ka̍a̍ le̍, ō chō wā ō pɛ̄ɛ̄sāā.

¹⁷Ka̍a̍ma̍āla̍ŋ nda᷅ŋ wānāā lāāla᷄ŋnda̍ tōsā ni̍ŋ ni̍. Ā chō nyi̍nāā wɔ̄ɔ̍ŋnda̍ tōūwɔ̄ɔ̄ a̍ dīōlā nīla̍ŋ. Ndu̍yɛ̍, mā sōō sɔ̄ɔ̍ŋ ma̍ŋgālāŋ chēle̍ŋ.

¹⁸Ā chūā ni̍ŋ kɛ̍ūwa̍ a̍ lābā. Ndu̍yɛ̍, ā ko᷄l bɛ̍ɛ̍ nyɛ᷅ di̍ī wa̍nā wo̍ nyɛ̍ o̍ nyɛ̄ yɔ̍nūŋ nda̍ le̍. Ā chō wānāā lānāāwa̍ bāla̍ŋ hāndɔ̄ɔ̄ chōo̍, ndu̍yɛ̍ mā sēŋgū.”

¹⁹Mɛ̄ɛ̍ Māsānɔ̄ɔ̍ Chi̍i̍sū su̍u̍ki̍āŋ a̍ bu̍ɛ̍i̍yāā ndūa̍a̍, mbo̍ hēl ɛ̄chɛ̍nɛ̄. Ndu̍yɛ̍, mbo̍ chāl o̍ fo̍ndāŋ lēbīɔ̍ɔ̍ o̍ bā kɛ̄ndɛ̍ Mɛ̄lɛ̄ka̍a̍ chōo̍.

²⁰Mi̍ bu̍ɛ̍īya̍ kūā ma̍ dīmī Yōōŋgū Kɛ̄ndɛ̍ Mɛ̄lɛ̄ka̍a̍ bā o̍ bā fe̍e̍. Ndu̍yɛ̍ mi̍ Māsānɔ̄ɔ̍ Mɛ̄lɛ̄ka̍ mālā nda̍. Mbo̍ pēēlū Yōōŋgū Kɛ̄ndɛ̍ Mɛ̄lɛ̄ka̍a̍ kpe̍e̍kpe̍i̍ a̍ ka̍a̍ma̍āla̍ yɔ̍nu̍ŋ o̍ te̍le̍ŋ ko̍ŋ ni᷄ŋ nda̍ŋ.] [ Mɛ̄ɛ̍ yāu̍wo̍ ho̍ō ndu̍ o̍o̍ pōōnyi̍a̍ŋ si̍ndɛ̄ o̍ mɛ̄ɛ̄lu̍la̍ŋ yɛ̍ [4] Mi̍ wāŋ lāāndūa̍a̍ kūā sa̍kpō nāa̍ Pītɛ̍ a̍ chāāŋāā ndūa̍a̍ chūā. Ma̍ kɔ̍ chɔ᷅m nda̍ a̍ nyɛ̄ ki̍i̍la̍a̍ Mɛ̄lɛ̄ka̍a̍ dīmu̍l nda̍ wo̍ o̍kɔ̄ɔ̄. O̍ ko̍ŋ kɔ̍ɔ̍lī, mi̍ Chi̍i̍sū pi̍la̍ vi̍ām nda̍ le̍ mā kūɛ̄ bā o̍ bā fe̍e̍ o̍ chi̍e̍ēŋndo̍ ni᷄ŋ. Mbo̍ dīmūl nda̍ le̍ mā kɔ̍ di̍mūl wāŋnda̍ yōōŋgu̍ chɛ̍ŋ ho̍ō o̍ Mɛ̄lɛ̄ka̍ lo̍ wo̍. Ndu̍ cho̍ yɛ̄ yōōŋgu̍ pi̍ŋī wa̍nā le̍ fɛ̍ɛ̍ŋ a̍ fɛ̍ɛ̍ŋ ndo̍ ni̍. Ndu̍yɛ̍, ō cho̍ yo̍ōŋgu̍ ta̍mbu̍ le̍.]