Read Southern Kisi Ma̍kī 2 Bible Online

Ma̍kī 2 - Southern Kisi bible

Ma̍kī 2

¹Pālɛ̍i̍ ti᷄ŋ hīōūwɔ̄ɔ̍, mi̍ Chi̍i̍sū mi̍i̍ŋgū Kēpa̍a̍nīɔ̄m chi̍e̍e̍. Mɛ̄ɛ̍ o̍ mi̍i̍ŋgu̍ Kēpa̍a̍nīɔ̄m, mi̍ tɔ̍ɔ̍ ndɔ̄ɔ̍ tīū māā ō mīīŋgu̍ o̍ ndu̍ lo̍ Kēpa̍a̍nīɔ̄m.

²Mi̍ wāŋnda̍ chūūŋgi̍āŋ na̍a̍ pi᷅lɛ̍ ma̍ hūŋ nāa̍ o̍ wa̍ chīɛ̄ī ni̍ŋ nda̍. Fo̍ndāŋ o̍ fo̍ndāŋ ve̍ chi̍ɛ̍ī ni̍ŋ te̍, o̍ dīō bɛ̍ɛ̍ wāŋnda̍ wa̍ ā pīāā. Mi̍ Chi̍i̍sū dīmūl nda̍ Yōōŋgū Kɛ̄ndɛ̍ Mɛ̄lɛ̄ka̍a̍.

³Mɛ̄ɛ̍ o̍ wa̍ nda̍ Yōōŋgū Kɛ̄ndɛ̍ Mɛ̄lɛ̄ka̍a̍ dīmūllo̍, mi̍ pūa̍a̍ ā hīɔ̍ɔ̍lu̍ hu᷅ŋ a̍ wānā bɛ̍vɛ̍i̍yo̍ nāa̍ ndu̍ chu̍a̍.

⁴Kɛ̍, pūa̍a̍ ha̍ā sɔ̄la̍ fo̍ndāŋ o̍ fo̍ndāŋ le̍ lūɛ̄īyɔ̄ɔ̍ chīɛ̄ī ni̍ŋ mā kōma̍l Chi̍i̍sū a̍ pōo̍ ho̍ō le̍. Fo̍ndōle̍, a̍ fāŋga̍ wa̍ chīɛ̄ī ni̍ŋ ndo̍. Mi̍ pūa̍a̍ ha̍ā hēl o̍ chīɛ̄īyo̍ chōo̍ ma̍ būlī kāa̍ nāa̍ Chi̍i̍sū wa̍ chīɛ̄ī ni̍ŋ nda̍. Ma̍ tūsī ndu̍ o̍ mbōōmāa̍ ni᷄ŋ o̍ yūe̍i̍.

⁵Mɛ̄ɛ̍ Chi̍i̍sū che᷅ mɛ̄ɛ̍ kpɛ̍ nda̍ lāāla̍ŋ a̍ ndu̍ yɛ̍, mbo̍ dīmūl po̍ bɛ̍vɛ̍i̍yo̍ āā, “Pōo̍, yɔ̄ŋndā nūmnda̍ wɔ̍ɔ̍ŋnda̍ŋ lā chō lā mālna᷄ŋ.”

⁶Wānāa̍ pɛ̍ɛ̍kū wa᷅ŋnda̍ sāwāla̍ Mɛ̄lɛ̄ka̍la̍ŋ nda̍ ā pūm ā wa̍ īchāli̍ chi̍ɛ̍ī ni̍ŋ lo̍ŋ. Ma̍ kāndū yīya᷄ŋndo̍ nu̍a̍ā, ma̍ dīmī o̍ kɔ̄ltā ndāla̍ŋ ni᷄ŋ āā,

⁷“Vɛ᷅ mī pōo̍ ho̍ō sūāā sūɛ̍i̍ wa̍ā nu̍a̍ā? Wānā o̍ wānā cho̍ mbō ma᷄l wānā le̍ yɔ̄ŋndā wɔ̄ɔ̍ŋnda̍ŋ te̍ mɛ̄ɛ̍ Mɛ̄lɛ̄ka̍ ndu̍ pīlɛ̍ kpe̍. Vɛ᷅ mbo̍ wā dīōla̍ Mɛ̄lɛ̄ka̍la̍ŋ tɛ̄ɛ̄mbūūwo̍?”

⁸Mi̍ Chi̍i̍sū si̍nā yīya᷄ŋnda̍ o̍ kɔ̄ltā ndāla̍ŋ ni᷄ŋ le̍ pi᷅lɛ̍ kpe̍. Mbo̍ nyūnā nda̍ āā, “Vɛ᷅ mi̍ yīya᷄ŋ wa̍ā le̍ndo̍o̍ wā nya̍ o̍ lākɔ̄l?

⁹Tōsāa̍ mī wānā bɛ̍vɛ̍i̍yo̍ ō kūɛ̄, a̍ dīmūllo̍ ndu̍ āā, ‘Yɔ̄ŋndā nūmnda̍ wɔ̍ɔ̍ŋnda̍ŋ lā chō lā mālna᷄ŋ,’ o̍ kūɛ̍ɛ̍nɛ̍ hi̍o̍ū yɛ̄ wā bɛ̍ɛ̍ŋ le̍ mī wāna̍ chi̍o̍o̍ tōsa̍? Dīmūllo̍ ndu̍ āā, ‘Yɔ̄ŋndā nūmnda̍ wɔ̍ɔ̍ŋnda̍ŋ lā chō lā mālna᷄ŋ,’ ndu̍ hi̍o̍ū wā bɛ̍ɛ̍ŋ.

¹⁰Le̍la̍ŋ, I̍ cho̍ pōo̍ ho̍ō sīŋgī mī lā sīna̍ māā wāna̍ nda̍ vēēlū ho̍ō āā Po̍ Wānā Pɔ̍nɔ̍ɔ̍ wo̍ nɔ̄ kpāāyāa̍ o̍ chi̍e̍ēŋndo̍ chōo̍ mbō ma᷄l wāŋnda̍ le̍ yɔ̄ŋndā ndāla̍ wɔ̍ɔ̍ŋnda̍ŋ.” O̍ ko̍ŋ, mbo̍ dīmūl po̍ bɛ̍vɛ̍i̍yo̍ āā,

¹¹“Mī di̍mu̍l nu̍m, chɔ̍ŋ mā chu̍a̍ mbōōmā nu̍mndo̍ mā kūɛ̄nu᷄ŋ o̍ nūm ndo̍.”

¹²Mbo̍ cha᷄ŋ nya̍ mbo̍ chūā mbōōmā ndɔ̄ɔ̍. Mi̍ wāŋnda̍ kpo̍u̍ a̍ cha᷅ ndu̍ kɔ̄la̍ŋ. Nda̍ kpo̍u̍ mi̍ kɔ̄ndɔ̄fi̍llo̍ bīī nda̍. Ma̍ sāŋgālā Mɛ̄lɛ̄ka̍. Ma̍ dīmī āā, “Kāni̍ bɛ̍ɛ̍, ŋ̄ chi̍ wɔ̍ i̍ wa̍ā nu̍a̍ā le̍.”

¹³Mi̍ Chi̍i̍sū ku̍ā vɛ̄lɛ̄ o̍ mɛ̄ŋmā ībūŋga᷄ŋ īkɛ̄i̍. Mi̍ fāŋgā bɛ̍ndōo̍ chūūŋgi̍āŋ nāa̍ ndu̍ chu̍a̍. Mbo̍ pɛ̄ɛ̄kū nda̍.

¹⁴Mɛ̄ɛ̍ o̍ hi̍o̍ū lāchī, mbo̍ chā Li̍vāī, po̍ A̍fa̍a̍sī wo̍. Ō wa̍ īchāli̍ o̍ chīɛ̄ī kɔ̍sɔ̄ŋndo̍. Mbo̍ dīmūl ndu̍ āā, “Hu̍ŋ mā sīmnu᷄ŋ bu̍ɛ̍ī nī.” Mi̍ pōo̍ ho̍ō cha᷄ŋ mbo̍ tūāl ndu̍ kɔ̄ɔ̄lī.

¹⁵O̍ ko̍ŋ kɔ̍ɔ̍lī, mɛ̄ɛ̍ Chi̍i̍sū wa̍ nyɛ̄ dīa̍a̍ dīo̍o̍ nda̍ bu̍ɛ̍i̍yāā ndūa̍a̍ o̍ Li̍vāī lo̍ chi̍ɛ̍ī ni̍ŋ, mi̍ kɔ̍sɔ̄ŋāā chēle̍ŋ ta̍u̍ a̍ to᷅l ndu̍ kɔ̄ɔ̄lī wa̍ a̍ wānāā yɔ̄ŋ wɔ̄ɔ̍ŋāā chēle̍ŋnda̍, ma̍ chāl nyɛ̄ dīa̍a̍ kōŋ dīo̍o̍ lātūlu̍ nda̍ nda̍ā.

¹⁶Mɛ̄ɛ̍ wānāa̍ pɛ̍ɛ̍kū wa᷅ŋndā sāwāla̍ Mɛ̄lɛ̄ka̍la̍ŋ nda̍, a̍ cho̍ o̍ ku̍ndā Fālīsi̍īya̍ ni᷄ŋ nda̍ chē ndu̍ nyɛ̄ dīa̍a̍ dīo̍o̍ nda̍ kɔ̍sɔ̄ŋnda̍ a̍ wānāā yɔ̄ŋ wɔ̄ɔ̍ŋnda̍, ma̍ nyūnā bu̍ɛ̍i̍yāā ndūa̍a̍ āā, “Le̍ yɛ̄ɛ̍nɛ̍ Chi̍i̍sū cho̍ yɛ̄ nyɛ̄ dīa̍a̍ dīo̍o̍ nda̍ kɔ̍sɔ̄ŋnda̍ a̍ wānāā yɔ̄ŋ wɔ̄ɔ̍ŋnda̍?”

¹⁷Mɛ̄ɛ̍ Chi̍i̍sū tu̍e̍ī sūɛ̍i̍ he̍ī, mbo̍ dīmūl nda̍ āā, “Wānāa̍ cho̍ kɛ̍ndi̍a̍a̍ wa̍, ā hēu̍ ba̍ a̍ wāna̍ chi̍ɔ̍ū wa᷅ŋnda̍ wo̍ le̍, mɛ̄ɛ̍ wānāā cho̍ a̍ nāāla̍ŋ nda̍. I̍ hi̍ŋ le̍ wānāā sa̍kpō vēēlū le̍. I̍ hi᷅ŋ māhūnāā le̍ wānāā yɔ̄ŋ wɔ̄ɔ̍ŋnda̍ vēēlōo̍.”

¹⁸Ō wa̍ a̍ te̍le̍ŋ pu̍m Chɔ᷄ŋ Wānā Yi̍ŋāa̍ bu̍ɛ̍i̍yāā ndūa̍a̍, a̍ ku̍ndā Fālīsi̍īya̍, ā wa̍ su᷅mndo̍ bīyɔ̄ɔ̍. Mi̍ wāŋnda̍ hūŋ nāa̍ Chi̍i̍sū chu̍a̍ ma̍ nyūnā ndu̍ āā, “Vɛ᷅ Chɔ᷄ŋ Wānā Yi̍ŋāa̍ bu̍ɛ̍i̍yāā ndūa̍a̍ ni̍, a̍ bu̍ɛ̍i̍yāā Fālīsi̍īya̍ mā bīī su᷅mndo̍, kɛ̍ nūm bu̍ɛ̍i̍yāā nūmnda̍ ā bi̍ī su᷅m te̍ nɛ̍?”

¹⁹Mi̍ Chi̍i̍sū lo᷅ lo̍ŋ mbo̍ mūlūl nda̍ āā, “Ō bɛ̄ndā pa̍ mī mīālāa̍ hu᷅ŋ wa᷅na̍ cho̍ la̍nɔ̍ɔ̍ chūa̍a̍ wo̍ o̍ bɛ̄ŋgu̍ cho̍o̍ wa̍, mā wa̍ a̍ yīa̍a̍ŋ? Tē wāna̍ cho̍ la̍nɔ̍ɔ̍ chūa̍a̍ wo̍ chō wɔ̄ nda̍ tɛ̄ɛ̄ŋ pɛ̍, mīālāā kāŋ ā nɔ̍ ku̍e̍e̍ mā bīī su᷅m kpo̍so̍ŋ te̍.

²⁰Kɛ̍ ndu̍yɛ̍, te̍le̍ŋ cho̍ fūūlūū mā fāŋa̍ wāna̍ cho̍ la̍nɔ̍ɔ̍ chūa̍a̍ wo̍ nda̍ tɛ̄ɛ̄ŋ. Tē ā fāŋa̍ ndu̍ nda̍ tɛ̄ɛ̄ŋ pɛ̍, ā bīī ni̍ŋ su᷅mndo̍ o̍ pāa̍le̍ le̍ŋ chōo̍.

²¹“Wānā be̍ŋūl tɛ̍ɛ̍ŋgēi̍ o̍ dōmā pa̍a̍ndōo̍ a̍ pɛ̄ŋgɛ̍i̍ kōlā sɛ̍nɛ̄īye̍ le̍. Tē wānā ba̍ŋu̍l a̍ ndi̍ pɛ̍, tē ō lo̍ o̍ ko̍ŋ mī pɛ̄ŋgɛ̍i̍ kōlā sɛ̍nɛ̄īye̍ ī ŋɔ̄ūnu᷄ŋ pɛ̍, dōmā pa̍a̍ndōo̍ chɔ̄ɔ̄lu̍ kīōlū. O̍ ko̍ŋ, tɛ̄ɛ̄ŋgēi̍ ī hīōū māā pāāndū.

²²Wānā do̍ū yɛ̍ŋgīa̍ŋ o̍ bɔ̄lɔ̍ yāu̍ vīsīo̍o̍ ō pāāndōo̍ ni᷄ŋ tē. Kāni̍, tē ā dɔ̄ū pɛ̍, yɛ̍ŋgīa̍ŋ mā chō hēlɔ̄ɔ̄ mī mā kīndu᷄ŋ. O̍ ko̍ŋ, mī mā būli̍ bɔ̄lɔ̄ ka̍lāa̍, mī mūɛ̄īmā kāla᷄ŋ mā tāmbu̍ŋ, mī bɔ̄lɔ̄ɔ̍ bɛ̍ɛ̍ ndu̍ ta̍mbu̍. O̍ bɔ̄lɔ̍ yāu̍ vīsīo̍o̍ ō sɛ̄nɛ̄īyo̍ ni᷄ŋ wānā du̍a̍ū yɛ̍ŋgīa̍ŋ ni̍.”

²³O̍ pāa̍le̍ pi᷅lɛ̍ pɛ̍ŋgīāālē Chu̍ūwa̍ chōo̍, Chi̍i̍sū nda̍ bu̍ɛ̍i̍yāā ndūa̍a̍ ā wa̍ kɔ̄la̍ŋ ma̍ wā kēēkōo̍ o̍ chīɛ̄ī pūm ni᷄ŋ. Tɔ̄lɔ̄ɔ̍ wa̍ o̍ chīɛ̍i̍ he̍ī ni᷄ŋ ndo̍ ā vēēlu̍ ndu̍ āā, wi̍t. Mi̍ bu̍ɛ̍i̍yāā ndūa̍a̍ kāndū tɔ̄lɔ̄ɔ̍ ho̍ō yōmɔ̄ɔ̍.

²⁴Ku̍ndā Fālīsi̍īya̍ ā pūm ā wa̍ lo̍ŋ. Ma̍ nyūnā Chi̍i̍su̍ āā, “Vɛ᷅ mi̍ bu̍ɛ̍i̍yāā nūmnda̍ ā wā sūɛ̍i̍ wānā to̍sā o̍ pāa̍le̍ nāāle̍ pɛ̍ŋgīāāle̍ŋ chōo̍ le̍ ve̍ tōsāa̍?”

²⁵Mi̍ Chi̍i̍sū nyūnā nda̍ āā, “Lā chi̍ wɔ̍ o̍ Yāu̍ Mɛ̄lɛ̄ka̍a̍ ni᷄ŋ a̍ nyɛ̄ Māsāa̍ Dēēve̍ ndu̍ o̍o̍ to̍sa̍ wo̍ o̍kɔ̄ɔ̄ le̍? O̍ bōōndi̍i̍ ke̍ŋ ni᷄ŋ, Ābīa̍a̍tā wa̍ wānā bɛ̍ndū so̍lī sa̍lāa̍ o̍ Mɛ̄lɛ̄ka̍ lo̍ wo̍ ni̍. Nyɛ̄ dīāā ve̍ Dēēve̍ o̍ bā le̍. Dēēve̍ ni̍ nda̍ wānāa̍ wa̍ ndu̍ kɔ̄ɔ̄lī wa̍, mɛ̄ɛ̍ yīa̍a̍ŋ mā wa̍ nda̍ nɛ̄īyo̍, mi̍ Dēēve̍ lu̍ɛ̍ī o̍ chīɛ̄ī Mɛ̄lɛ̄ka̍a̍ ni᷄ŋ. Mbo̍ di̍ā bēe̍dīi̍ wa̍ ō yɔ̄ŋga᷄ŋ le̍ Mɛ̄lɛ̄ka̍ wo̍. Mbo̍ chūā o̍ ti᷄ŋ mbo̍ kē wānāa̍ wa̍ hɔ̄lāā tūlu̍ a̍ ndu̍ wa̍. Wānā che᷅le̍ŋ ndu̍ o̍o̍ nɔ̍ mī ndu̍ o̍o̍ de᷅ bēe̍dīi̍yo̍ ho̍ō le̍, mɛ̄ɛ̍ wānāā sōlīāā lāsa̍lāa̍.”

²⁶

²⁷Le̍la̍ŋ, mi̍ Chi̍i̍sū dīmūl nda̍ āā, “Pāa̍le̍ pɛ̍ŋgīāālē Chu̍ūwa̍ lē wa̍ lē tōsa᷄ŋ le̍ wāna̍ chi̍o̍o̍ mālāa̍, kɛ̍ wāna̍ chi̍o̍o̍ ndu̍ ve̍ o̍ to̍sa᷄ŋ le̍ pāa̍le̍ pɛ̍ŋgīāālē Chu̍ūwa̍ mālā lē.

²⁸Le̍la̍ŋ, wāna̍ nda̍ vēēlū āā, Po̍ Wānā Pɔ̍nɔ̍ɔ̍ wo̍, ndu̍ cho̍ wāna̍ kɛ̍ɛ̍sīāā nyɛ᷅ wānā to̍sā o̍ pāa̍le̍ nāāle̍ pɛ̍ŋgīāāle̍ŋ chōo̍ wo̍ ni̍ a̍ nyɛ̄ wānā to̍sā le̍cho̍o̍ le̍ wo̍.”