Read Southern Kisi Ma̍kī 3 Bible Online

Ma̍kī 3 - Southern Kisi bible

Ma̍kī 3

¹Mi̍ Chi̍i̍sū lu̍ɛ̍ī vɛ̄lɛ̄ o̍ chīɛ̄ī Chu̍ūwa̍ pīɛ̄ī Mɛ̍lɛ̄ka̍ wo̍ ni᷄ŋ. Pōo̍ wa̍ lo̍ŋ a̍ bāa̍ ndu̍ ō vēsɛ̍i̍.

²Wānāā pūm ā wa̍ lo̍ŋ, nda̍ a̍a̍ hɛ̍na̍ŋ mī nda̍ a̍a̍ ho̍l Chi̍i̍sū sūɛ̍i̍. Le̍ he̍ī, ma̍ chāl ndu̍ ni̍ko̍ to̍fāa̍ māā tē ō sīŋgī ni̍ŋ pɛ̍ wa᷅ŋnda̍ o̍ pāa̍le̍ ndāle̍ pɛ̍ŋgīāāle̍ŋ chōo̍.

³Mi̍ Chi̍i̍sū ve̍e̍lū pōo̍ ho̍ō āā, “Hu̍ŋ la̍chi̍ na̍nu᷄ŋ.” Mi̍ pōo̍ kūā nāa̍ ndu̍ chu̍a̍.

⁴Mi̍ Chi̍i̍sū di̍mūl wānāa̍ wa̍ lo̍ŋ nda̍ āā, “I̍ hɛ̍na̍ŋ mī nyu̍nā nya̍. Yɛ̄ɛ̍nɛ̍ sāwā na̍a̍ dīmi̍ yɛ̄ māā na̍a̍ ŋ̄ tōsa̍ o̍ pāa̍le̍ nāāle̍ pɛ̍ŋgīāāle̍ŋ chōo̍? Sūɛ̍i̍ kɛ̍ndɛ̄i̍ wāŋndo̍ tōsāllo̍, ɔ̄ɔ̄ sūɛ̍i̍ wɔ̍ɔ̍ŋnde̍ ndu̍ tōsāllo̍?” Mbo̍ nyūnā vɛ̄lɛ̄ nda̍ āā, “Ō nāŋ mī ŋ̄ pīŋi̍ yōōmū wāŋndo̍ bāā ō nāŋ mī ŋ̄ tɛ̄ɛ̄mbu̍u̍ yōōmū ndɔ̄ɔ̍ o̍ pāa̍le̍ŋ nde̍ŋ chōo̍?” Kɛ̍ mi̍ wāŋnda̍ ha̍ā ā mēī do̍ŋ.

⁵Mi̍ Chi̍i̍sū nu̍ā nda̍ a̍ hɔ̄lla̍ ā tūū kpɛ̍i̍. Mi̍ mɔ̍nɛ̍i̍ bīī ndu̍ le̍ kɔ̄ltā ndāla̍ ve̍sɛ̍i̍la̍ŋ. Mbo̍ dīmūl po̍ bā vēsɛ̍i̍yo̍ ho̍ō āā, “Pōo̍ si̍ɛ̍ndi̍ ba̍ nūmndo̍.” Mi̍ pōo̍ sīɛ̄ndī bāa̍. Mi̍ bā ndɔ̄ɔ̍ mīīŋgū ndu̍ yɔ̄nɔ᷄ŋ nyɛ̍ kɛ̄ndɛ̍ī.

⁶O̍ ko̍ŋ kɔ̍ɔ̍lī, mi̍ ku̍ndā Fālīsi̍īya̍ ha̍ā ā fūlā lē pīlɛ̍ kpe̍, ma̍ kɔ̍ bi̍ī bɔ̄ŋa᷅ŋndo̍ a̍ ku̍nda̍ Hɛ̍lɔ̄ɔ̄wo̍ hɔ̄lāā tūlu̍ le̍ mɛ̄ɛ̍ nda̍ lōōkū mā dīī Chi̍i̍sū yɛ̍.

⁷Mi̍ Chi̍i̍sū nda̍ bu̍ɛ̍i̍yāā ndūa̍a̍ fāŋa᷄ŋ ma̍ kūā o̍ mɛ̄ŋmā ībūŋga᷄ŋ īkɛ̄i̍. Mɛ̄ɛ̍ nda̍ kūɛ̄, mi̍ fāŋgā bɛ̍ndōo̍ fūlā o̍ lɛ̄ŋndē Kāli̍līle̍ŋ ni᷄ŋ ma̍ tūāl nda̍ kɔ̄ɔ̄lī. Mi̍ fāŋgāa̍ fūlā vɛ̄lɛ̄ o̍ lɛ̄ŋndē Chūdi̍a̍āle̍ŋ ni᷄ŋ,

⁸a̍ Chūlu̍sɛ̄lɛ̄m chi̍e̍e̍, a̍ o̍ lɛ̄ŋndē Īdu̍mīāāle̍ŋ ni᷄ŋ, a̍ o̍ lɛ̄ŋnde̍ŋ Chɔ̍ɔ̍dāŋ le̍e̍lōo̍, a̍ Ta̍a̍yā chi̍e̍e̍, a̍ Sa̍i̍dɔ̄ŋ chi̍e̍e̍. Fāŋgā bɛ̍ndū bɛ̍ndōo̍ wa̍ ho̍ō ni̍. Ma̍ hūŋ nāa̍ Chi̍i̍sū chu̍a̍. Sa̍bū fāŋgāa̍ ho̍ō hīŋ nāa̍ Chi̍i̍sū chu̍a̍ wo̍ cho̍ ni̍ māā ā tūēī a̍ wa̍lta̍ o̍ wa̍ tōsāa̍ la̍ŋ o̍kɔ̄ɔ̄.

⁹Mi̍ Chi̍i̍sū dīmūl bu̍ɛ̍i̍yāā ndūa̍a̍ māā ā bɛ̄ɛ̄ndi̍a̍a̍ pɔ̍ɔ̍ dɛ̄ndɔ̄ɔ̍ le̍ ndu̍ yɔ̄ŋi̍ fāŋgāa̍ nda̍ a̍a̍ ŋɔ̍ɔ̍ndi̍a̍a̍ ndu̍.

¹⁰Kāni̍ fo̍ndōle̍ le̍ sīŋgi̍ o̍ si̍ŋgi̍ wāŋnda̍ ta̍u̍ ta̍u̍ wo̍, wānāā lānāāwa̍ ā wa̍ nyīīnda᷅ŋndo̍ kpe̍e̍kpe̍i̍ le̍ ndu̍ pīla᷄ŋndo̍.

¹¹Ndu̍yɛ̍ te̍le̍ŋ o̍ te̍le̍ŋ tē nyi̍nāā wɔ̄ɔ̍ŋnda̍ chē Chi̍i̍su̍ pɛ̍, ā de᷄l lɛ̄ŋ ndu̍ o̍ lābɛ̄ŋgu̍ ni̍ŋ ā dēŋi̍ chōo̍ cho̍o̍ āā, “Po̍ Mɛ̄lɛ̄ka̍a̍ ŋ̄ chō ni̍.”

¹²Kɛ̍ lē pīlɛ̍ kpe̍, mī Chi̍i̍sū kpa̍a̍ nda̍ āā, “Lā chɔ̍ɔ̍mūū ya̍ le̍.”

¹³Mi̍ Chi̍i̍sū ku̍ā o̍ pēmbo᷄ŋ tɛ̍ɛ̄ŋ. Mbo̍ vēēlū wānāā ndu̍ o̍o̍ ye̍e̍ma̍ wa̍. Mi̍ wāŋnda̍ ha̍ā hūŋ nāa̍ ndu̍ chu̍a̍.

¹⁴Mi̍ Chi̍i̍sū hɛ̍lī ŋ̄wāŋ tɔ̍ a̍ wānāā ŋīɔ̍ɔ̍ŋ le̍ wāa̍ hɔ̄lāā tūlu̍ a̍ ndu̍. Mbō kē nda̍ dīōla̍ŋ āā, wānāā Chi̍i̍sū ve᷅m hɔ̄ltē ndɔ̄ wa̍. Mbo̍ vīām nda̍ sūɛ̍i̍ Mɛ̄lɛ̄kɛ̍i̍ dīmīo̍o̍.

¹⁵Mbo̍ kē nda̍ kpāāyāa̍ le̍ nyi̍nāā wɔ̄ɔ̍ŋnda̍ tōūwɔ̄ɔ̍ wāŋnda̍ kɔ̄ɔ̄lī.

¹⁶Dīōlā ŋ̄wāŋ tɔ̍ a̍ wānāā ŋīɔ̍ɔ̍ŋāā o̍ hɛ̍li̍ ka̍ŋ nda̍ la̍ŋ la̍ cho̍ la᷅ŋ ni̍. Sa̍i̍mɔ̄ŋ ō Chi̍i̍sū kē dīōla̍ŋ āā, Pītɛ̍ wo̍,

¹⁷a̍ pūa̍a̍ Sɛ̍bɛ̍dīī, Chēmi̍si̍ nda̍ Chɔ᷄ŋ pɔ̍mbɔ̄ ndɔ̄. Mi̍ Chi̍i̍sū ke᷅ pūa̍a̍ ŋi̍ɔ̍ɔ̍ŋnda̍ ha̍ā dīōlā chēle̍ŋ āā, Būa̍na̍chīī. Le̍ sa̍bū o̍ ke̍ nda̍ dīōla̍ŋ nda᷅ŋ ndo̍ chō ni̍ māā pūa̍a̍ ha̍ā nda̍ a̍a̍ nɔ̍ ka̍a̍ māā lēta᷅ŋ.

¹⁸A̍ndūlū, a̍ Fi̍li̍pī, a̍ Bātɔ̄lɔ̍mīū, a̍ Māa̍ti̍u̍, a̍ Tɔ̄mɔ̍si̍, a̍ Chēmi̍si̍, po̍ A̍fa̍a̍sī wo̍, a̍ Ta̍a̍dīɔ̄ɔ̄, a̍ Sa̍i̍mɔ̄ŋ wāna̍ sɔ̍ŋgā le̍ lɛ̄ŋndē ndɔ̄la̍ŋ bāŋāa̍ wo̍,

¹⁹a̍ Chu̍dā Īsīka̍a̍līɔ̄ɔ̄ o̍ pi̍si̍ ho̍ō Chi̍i̍su̍ wo̍.

²⁰Mɛ̄ɛ̍ he̍ī hīōū, mi̍ Chi̍i̍sū ku̍a̍nu᷄ŋ o̍ ndu̍ lo̍. Mi̍ wāŋnda̍ chūūŋgi̍āŋ vɛ̍lɛ̄ fāŋgā bɛ̍ndōo̍ nāa̍ pi᷅lɛ̍ nāa̍ Chi̍i̍sū chu̍ā. Chi̍i̍sū nda̍ bu̍ɛ̍i̍yāā ndūa̍a̍ ā sɔ̄la̍ fo̍ndāŋ o̍ fo̍ndāŋ le̍ nyɛ̄ dīa̍a̍ dīo̍o̍ le̍.

²¹O̍ ko̍ŋ kɔ̍ɔ̍lī, mi̍ wāŋnda̍ wā dīmīo̍o̍ āā, “Ō chō ko̍ sɔ̍ɔ̍ŋ tōsāa̍ māā wānā se̍e̍mɛ̍i̍.” Mɛ̄ɛ̍ yu̍ŋgu̍ Chi̍i̍sōo̍ tūēī, ma̍ kūā le̍ Chi̍i̍su̍ sōlīo̍o̍ nda̍ tɛ̄ɛ̄ŋ.

²²Mi̍ wānāa̍ pɛ̍ɛ̍kū wa᷅ŋnda̍ sāwāla̍ Mɛ̄lɛ̄ka̍la̍ŋ nda̍ ā pūm a̍ fu̍la̍ Chūlu̍sɛ̄lɛ̄m chi̍e̍e̍ ya̍ dīmī āā, “Bɛ̄ɛ̍si̍bɔ̄ɔ̄, o̍ cho̍ māsa̍ nyi̍nāā wɔ̄ɔ̍ŋnda̍ wo̍, ndu̍ cho̍ Chi̍i̍su̍ kɔ̄ɔ̄lī ni̍. Le̍la̍ŋ, a̍ kpāāya̍ māsa̍ nyi̍nāā wɔ̄ɔ̍ŋnda̍ o̍ tu̍a̍ū nyi̍nāā wɔ̄ɔ̍ŋnda̍ wāŋnda̍ kɔ̄ɔ̄lī ni̍.”

²³Mi̍ Chi̍i̍sū ve̍e̍lū nda̍ mbo̍ nyūnā nda̍ o̍ tāle̍la̍ŋ ni᷄ŋ āā, “Vɛ̄ɛ̍nɛ̍ Sēta̍nā māsa̍ nyi̍nāā wɔ̄ɔ̍ŋnda̍ lōōkū yɛ̍ mbō tōū ndu̍ pi̍la̍?

²⁴Tē lɛ̄ŋnde̍ŋ lē pīɔ̄ūvi̍āŋ ku̍ndāla̍ŋ pɛ̍, mā sāa̍ sɔ̍ŋgɔ̄ɔ̍ vēllāa̍ vēllē pɛ̍, lɛ̄ŋndē lēŋ lē si᷅m te̍.

²⁵Tē yu̍ŋgo̍o̍ pīɔ̄ūvi̍āŋ ku̍ndāla̍ŋ pɛ̍, mā sāa̍ sɔ̍ŋgɔ̄ɔ̍ vēllāa̍ vēllē pɛ̍, pīɔ̄llo̍ yu̍ŋgu̍ ko̍ŋ ō pi̍ɔ̄l ni̍.

²⁶Ndu̍yɛ̍, tē māsāle̍ Sēta̍nā māsa̍ nyi̍nāā wɔ̄ɔ̍ŋnda̍ lē pīɔ̄ūvi̍āŋ ku̍ndāla̍ŋ pɛ̍, mī lā sāa̍ sɔ̍ŋgɔ̄ɔ̍ vēllāa̍ vēllē pɛ̍, māsāle̍ ndɔ̄le̍ŋ lē si᷄m te̍. Ndu̍yɛ̍, mɛ̄ɛ̄lu̍la̍ ndɔ̄la̍ŋ la̍ wa᷅ la̍ŋ ni̍.

²⁷“Le̍ wānā o̍ wānā mā lūɛ̄ī o̍ wāna̍ dīāllūŋ kālāa̍ lo̍ chi̍ɛ̍ī ni̍ŋ mā chu̍a̍ nyɛ̄m ndɔ᷄ŋ kpo̍u̍, mɛ̄ɛ̍ mā bīī ndu̍ fɛ̍lɛ̍ŋ mā yi̍i̍ ndu̍ po᷅ŋ bɛ̄ndū. Tē ō cho̍ ko̍ŋ te̍, wānā nɔ̍lā mā lūɛ̄ī mā chu̍a̍ nyɛ̄m ndɔ᷄ŋ te̍.

²⁸“Mī di̍mu̍l nya̍, mī Mɛ̄lɛ̄ka̍ ma᷄l wānā le̍ yɔ̄ŋ o̍ yɔ̄ŋ wɔ̄ɔ̍ŋ ŋ̄ tōsa̍ a̍ nyɛ̄ o̍ nyɛ̄ wɔ̄ɔ̍ŋ ŋ̄ dīmi̍.

²⁹Kɛ̍, wānā o̍ wānā a̍ di̍mi̍ dīōmndā wɔ̍ɔ̍ŋnda̍ŋ a̍ Nyi̍na̍ Mɛ̄lɛ̄ka̍a̍ pɛ̍, fɛ̍ɛ̍ŋ a̍ fɛ̍ɛ̍ŋ a̍ sɔ̍lā ma̍lɔ̄ɔ̄ le̍. Yɔ̄ŋ nu̍m wɔ̍ɔ̍ŋndo̍ chō wā le̍ fɛ̍ɛ̍ŋ a̍ fɛ̍ɛ̍ŋ.”

³⁰Chi̍i̍sū di̍mi̍ he̍ī fo̍ndōle̍, ā dīmi̍ āā, “Nyi̍nā wɔ̄ɔ̍ŋndo̍ cho̍ ndu̍ kɔ̄ɔ̄lī ni̍.”

³¹Mi̍ Chi̍i̍sū kāla̍ ndɔ̄ a̍ pɔ̍mbūāā ndūa̍a̍ hūŋ, ma̍ sīm o̍ bɛ̍ɛ̄. Ma̍ vīām wānā nāa̍ Chi̍i̍sū chu̍a̍ le̍ ndu̍ vēēlōo̍.

³²Fāŋgāa̍ wa̍ īchāli̍ a̍ ba̍lāā Chi̍i̍sū. Ma̍ dīmūl ndu̍ āā, “Kālā nu̍m nda̍ pɔ̄mbūāā nūmnda̍ ā chō o̍ bɛ̍ɛ̄. Ā hɛ̄na̍ŋ mā chē nu̍m.”

³³Mi̍ Chi̍i̍sū nyūnā nda̍ āā, “Nɛ̄ɛ̍nɛ̍ cho̍ yɛ̄ kāla̍ nūu̍? Ndu̍yɛ̍, o̍ nɛ̄ɛ̍ni̍a̍ā cho̍ yɛ̄ pɔ̄mbūāā nīa̍a̍?”

³⁴Mbo̍ mɛ̄ɛ̄nda᷄ŋ fa᷅ŋga̍ wa̍ ndu̍ ō bālāā wo̍. Mbo̍ dīmūl nda̍ āā, “Ha̍ā cho̍ kālāa̍ nīa̍a̍ ni̍. Nda̍ cho̍ pɔ̄mbūāā nīa̍a̍ ni̍.”

³⁵Mbo̍ dīmī āā, “Wāna̍ o̍ wāna̍ to̍sa̍ hɛ̄na᷄ŋ Mɛ̄lɛ̄ka̍a̍ pɛ̍, mɛ̄ɛ̍ ndu̍ cho̍ pɔ̄mbɔ̄ nūu̍ ni̍, mɛ̄ɛ̍ ndu̍ cho̍ yēma̍ nūu̍ ni̍, mɛ̄ɛ̍ ndu̍ cho̍ kāla̍ nūu̍ ni̍.”