Read Southern Kisi Ma̍kī 4 Bible Online

Ma̍kī 4 - Southern Kisi bible

Ma̍kī 4

¹Mi̍ Chi̍i̍sū ka̍ndū pɛ̄ɛ̄kōo̍ o̍ mɛ̄ŋmā ībūŋga᷄ŋ īkɛ̄i̍. Mi̍ wāŋnda̍ chūūŋgi̍āŋ fa̍ŋgā bɛ̍ndōo̍ nāa̍ pi᷅lɛ̍. Ma̍ bālū ndu̍ si̍lɔ̍. Le̍ he̍ī, mi̍ Chi̍i̍sū lu̍ɛ̍ī o̍ dɛ̄ndɔ̄ɔ̍ ni᷄ŋ. Mbo̍ chāl o̍ dɛ̄ndɔ̄ɔ̍ ho̍ō ni᷄ŋ o̍ mɛ̄ŋnda̍ŋ chōo̍. Mi̍ fāŋgāa̍ sīm o̍ mɛ̄ŋmā ībūŋga᷄ŋ īkɛ̄i̍ o̍ kɔ̄ŋgɔ̍.

²Mi̍ Chi̍i̍sū pɛ̍ɛ̍kū nda̍ sɔ̄ɔ̍ŋ bɔ̍ɔ̍ bɔ̍ɔ̍ o̍ tāle̍la̍ŋ ni᷄ŋ. Mɛ̄ɛ̍ o̍ wa̍ nda̍ pɛ̄ɛ̄kōo̍, mbo̍ dīmī āā,

³“Lā ya᷄ŋ ni᷅la̍ŋ. Pōo̍ chɛ̍ŋ ni̍ mbo̍ kūā wāa̍ o̍ chīɛ̄ī ndūɛ̍i̍ ni̍ŋ. Mɛ̄ɛ̍ o̍ sa̍ŋ yɛ̄i̍ye̍, mi̍ ī pūm ī dēl o̍ nɛ̄ī kɔ᷅llo̍. Mi̍ ī pūm ī dēl o̍ lɛ̄ŋndē ba̍ndi̍la̍le̍ŋ chōo̍, nāa̍ lɛ̄ŋndē bɔ̄ɔ̍ le̍ cho̍ le̍ wa̍. Mi̍ ī pūm ī dēl o̍ lɛ̄ŋndē ŋ̄yɔ̄le̍ŋ. Mi̍ ī pūm ī dēl o̍ lɛ̄ŋndē kɛ̄ndɛ̄le̍ŋ chōo̍.

⁴O̍ ko̍ŋ kɔ̍ɔ̍lī, mi̍ yōūwa̍ hu᷄ŋ chɔ̍ɔ̍vīāā yɛ̄īyi̍i̍ de̍l o̍ nɛ̄ī kɔ᷅llo̍ ve̍.

⁵Yɛ̄īyi̍i̍ de̍l o̍ lɛ̄ŋndē ba̍ndi̍la̍le̍ŋ chōo̍ ve̍, mi̍ ī kēlēŋā wūlɔ̄ɔ̄. Kāni̍ fo̍ndōle̍, lɛ̄ŋnde̍ŋ lē ve̍ le̍ bɔ̍ɔ̍ lo̍ŋ te̍.

⁶Kɛ̍ mɛ̄ɛ̍ pāa̍le̍ŋ lē fūla̍ mi̍ lē lūāā ndi̍, mi̍ ī nyāmālā mi̍ ī vēsa᷄ŋ, kāni̍ fo̍ndōle̍, pūūndo̍ŋ ŋ̄ ku̍e̍ lɛ᷅ŋ la̍nda̍ŋ te̍.

⁷I̍ de̍l o̍ lɛ̄ŋndē ŋ̄yɔ̄le̍ŋ nde̍, ndi̍ ndi̍ mi̍ ī wūl hɔ̄lāā tūlu̍ a̍ yɔ̄ɔ̍ŋ. Mi̍ yɔ̄ɔ̍ŋ sɔ̄ɔ̄ŋgūū mi̍ ŋ̄ kāyā kāya᷄ŋ ndi̍, mi̍ ī kɛ̄ɛ̄ le̍ chūūlōo̍ mi̍ ŋ̄ dīī ndi̍.

⁸Mi̍ i̍ de̍l o̍ lɛ̄ŋndē kɛ̄ndɛ̄le̍ŋ chōo̍ ve̍ ī nāŋ ta̍u̍ ta̍u̍. Mi̍ ī pūm ī kūām yāsāla̍ŋ be̍le̍-ya̍a̍, ī pūm yāsāla̍ŋ be̍le̍-ŋɔ̍mpu᷅m, ī pūm yāsāla̍ŋ kɛ̄mɛ̄.”

⁹Mi̍ Chi̍i̍su̍ di̍mī āā, “Nūm o̍ nu᷄m nɔ̍ nīlā tūɛ̄īyāā īsɔ̄ɔ̍ pɛ̍, mɛ̄ɛ̍ lā ya᷄ŋ ni᷅la̍ŋ mī lā tūēī mī lā sīna̍ pɛ̄ŋgu̍.”

¹⁰Mɛ̄ɛ̍ fāŋgāa̍ pīɔ̍l, mi̍ wānāa̍ wa̍ Chi̍i̍su̍ kɔ̄ɔ̄lī wa̍ a̍ bu̍ɛ̍i̍yāā ŋ̄wāŋ tɔ̍ a̍ wānāā ŋīɔ̍ɔ̍ŋnda̍ ā lō hɔ̄lāā tūlu̍ a̍ Chi̍i̍sū. Ma̍ nyūnā Chi̍i̍su̍ a̍ tāle̍lā o̍ di̍mi̍ la̍ŋ o̍kɔ̄ɔ̄.

¹¹Mi̍ Chi̍i̍sū di̍mūl nda̍ āā, “Nya̍ Mɛ̄lɛ̄ka̍ chɛ᷄l le̍ mī lā sīna̍ sɔ̄ɔ̍ŋ wa̍ ŋ̄ vīāŋna᷄ŋ a̍ māsāle̍ Mɛ̄lɛ̄ka̍le̍ŋ o̍kɔ̄ɔ̄ wo̍ŋ ni̍. Kɛ̍ o̍ tāle̍la̍ŋ ni᷄ŋ, sɔ̄ɔ̍ŋ kpo̍u̍ ŋ̍ di̍mu̍lu̍ŋ wa̍nāā chēle̍ŋ nda̍ ni̍

¹²le̍ hāli̍ kpe̍ŋ, ‘Mā nu̍a̍, kɛ̍ ā chi᷅ le̍. Mā ya᷄ŋ nīla̍ŋ mā tūēī, kɛ̍ ā si̍nā pɛ̄ŋgu̍ le̍. Kɛ̍, tē nda̍ a̍a̍ che᷅ pɛ̍ ndu̍yɛ̍ mī nda̍ a̍a̍ tu̍e̍ī, ā wa̍ mūli᷄ŋ nāa̍ Mɛ̄lɛ̄ka̍ chūā, mī nda̍ a̍a̍ sɔ̍la̍ mālɔ̄ɔ̍ le̍ yɔ̄ŋndā ndāla̍ wɔ̍ɔ̍ŋnda̍ŋ.’ ”

¹³Mi̍ Chi̍i̍sū di̍mūl nda̍ āā, “Mɛ̄ɛ̍ nya̍ sīna̍ tālo̍o̍ ho̍ō pɛ̄ŋgu̍ le̍ yɛ̍, vɛ̄ɛ̍nɛ̍ nya̍ sīnā yɛ̍ ni̍ŋ tāle̍la̍ŋ lā pīlɛ̍la̍ŋ pɛ̄ŋgu̍ kpo̍u̍?

¹⁴Wānā sa̍ŋāa̍ sa᷄ŋ Dīo̍m Mɛ̄lɛ̄ka̍a̍, mɛ̄ɛ̍ wānā sa᷅ŋ yɛ̍i̍ye̍ yɛ̍.

¹⁵Yɛ̄i̍yi̍i̍ de̍l o̍ nɛ̄ī kɔ᷅llo̍ ve̍, ī chō māchūāā wāŋnda̍ ā pūm a̍ tu̍e̍ī Dīo̍m Mɛ̄lɛ̄ka̍a̍ wa̍. Mɛ̄ɛ̍ nda̍ tūēī, o̍ lē pīlɛ̍ ni᷄ŋ kpe̍ mi̍ Sēta̍nā, māsa̍ nyi̍nāā wɔ̄ɔ̍ŋnda̍, ō hu᷄ŋ po̍o̍ndā ndu̍ nda̍ o̍ lākɔ̄l.

¹⁶Yɛ̄i̍yi̍i̍ de̍l o̍ lɛ̄ŋndē ba̍ndi̍la̍le̍ŋ chōo̍ ve̍, ī chō māchūāā māā wāŋnda̍ ā pūm. Tē ā tūēī pɛ̍ Di̍o̍m Mɛ̄lɛ̄ka̍a̍, ā chɛ᷄l ndu̍ a̍ kɔ̄l kɛ̄ndɛ̄ lē pīlɛ̍ kpe̍.

¹⁷Kɛ̍, mɛ̄ɛ̍ pūūndu᷅ŋ tɔ̄lɔ̄ɔ̍ ŋ̄ nɔ̍lā lu̍ɛ̍i̍yɔ̄ɔ̍ la̍nda̍ŋ o̍ lɛ̄ŋndē ba̍ndi̍la̍le̍ŋ te̍ yɛ̍, le̍nde̍ ko̍ni̍ wāŋnda̍ ha̍ā chō ni̍. Dīo̍m Mɛ̄lɛ̄ka̍a̍ ō lu̍e̍ī nda̍ o̍ lākɔ̄l di̍ le̍. Mī wāŋnda̍ ha̍ā ā lāāla̍ŋ le̍ te̍le̍ŋ bi̍ŋgī. Kɛ̍, tē nyɛ̄ kīndīlāa̍ ō hīŋ nda̍ chōo̍ pɛ̍, kɛ̄lɛ̄ŋgāā mī wāŋnda̍ ā tūsi̍ nda̍ nyɛ̄ pālāa̍ chōo̍ le̍ mɛ̄ɛ̍ nda̍ chɛ᷄l Dīo̍m Mɛ̄lɛ̄ka̍a̍ yɛ̍ pɛ̍, ā ma᷄l bɛ̍ɛ̍ di̍ōm kālāa̍.

¹⁸Yɛ̄īyi̍i̍ de̍l o̍ lɛ̄ŋndē ŋ̄yɔ̄le̍ŋ nde̍, ī chō māchūāā māā wāŋnda̍ ā pūm a̍ tu̍ɛ̍ī Di̍o̍m Mɛ̄lɛ̄ka̍a̍ wa̍,

¹⁹kɛ̍ ndu̍yɛ̍, ā vīōū pɛ̍ kpɛ̍ɛ̍, būūla᷄ŋ nyɛ̄m chi̍e̍ēŋndo̍ŋ, a̍ yēēmɛ̍i̍ sūllo̍, a̍ yēēmɛ̍i̍ nyɛ̄m chēle̍ŋndo̍ŋ ŋ̄ lūɛ̄ī nda̍ o̍ lākɔ̄l. O̍ ko̍ŋ, mī ŋ̄ kāya̍ ka̍ya̍ŋ Di̍o̍m Mɛ̄lɛ̄ka̍ nda̍ tūēī yo̍, mɛ̄ɛ̍ yɔ̄ɔ̍ŋ ŋ̄ kāyā kāyāŋ tɔ̍lɔ̄ɔ̍ yɛ̍. O̍ ko̍ŋ, mī dīōm kālāa̍ ō fōōfi̍ nda̍ ni᷄ŋ, mɛ̄ɛ̍ tɔ̄lɔ̄ɔ̍ ō fōōfi̍ nu̍a̍ā yɛ̍.

²⁰Yɛ̄īyi̍i̍ de̍l o̍ lɛ̄ŋndē kɛ̄ndɛ̄le̍ŋ chōo̍ ve̍, ī chō māchūāā māā wāŋnda̍ ā pūm a̍ tu̍ɛ̍ī Di̍o̍m Mɛ̄lɛ̄ka̍a̍ wa̍. Tē ā tūēī ndu̍ pɛ̍, ā chɛ᷄l ndu̍. O̍ ko̍ŋ, ā chɔ᷄m tɔ̄nɔ̄ɔ̍ mɛ̄ɛ̍ yɛ̄i̍ye̍ o̍ lɛ̄ŋndē kɛ̄ndɛ̄le̍ŋ chōo̍ i̍ yɔ̍ŋgū kɔ᷅mnde̍ŋ yɛ̍. Ō pūm mbō yɔ̄ŋgu̍ kɔ̄mnde̍ŋ be̍le̍-ya̍a̍. Ō pūm yɛ̍ mbō yɔ̄ŋgu̍ be̍le̍-ŋɔ̍mpu᷅m, ō pūm kɛ̄mɛ̄.”

²¹Mi̍ Chi̍i̍sū nyu̍nā nda̍ āā, “Le̍ yɛ̄ɛ̍nɛ̍ nda̍ lūēī yɛ̍ la̍mbūi̍yo̍ chīɛ̄ī ni̍ŋ? Bāā le̍ kɛ̄sīo̍o̍ o̍ kpɛ̍ɛ̍nɛ̍i̍ bɛ̄ŋgu̍, ɔ̄ɔ̄ le̍ kɛ̄sīo̍o̍ o̍ kpēlōo̍ bɛ̄ŋgu̍? Ō cho̍ na̍a̍ te̍ma̍a̍ le̍ o̍ nɔ̍ le̍ wāa̍ le̍?

²²Nyɛ̄ o̍ nyɛ̍ cho̍ ō vīāŋāā, ō chō hūnɔ̄ɔ̄ chɔ̄mnɔ᷄ŋ kpe̍nde̍ke̍le̍. Ndu̍yɛ̍, nyɛ̄ o̍ nyɛ̍ cho̍ ō kūmbāā, ō chō hūnɔ̄ɔ̄ wā ō kūmbīa̍ŋ.

²³Wānā o̍ wāna̍ nɔ̍ nīlā tūɛ̄īyāā īsɔ̄ɔ̍ pɛ̍, mɛ̄ɛ̍ lā ya᷄ŋ ni᷅la̍ŋ mī lā tūēī mī lā sīna̍ pɛ̄ŋgu̍.”

²⁴Mi̍ Chi̍i̍su̍ di̍mūl nda̍ āā, “Lā kɛ̄si̍ŋ nyɛ᷅ nya̍ tūēī yo̍ o̍ kɔ̄l. Nyɛ̄ nūm tūūlūl chāāŋnda̍ lēni᷄ŋ ndo̍, lēni᷄ŋ ko̍ni̍ Mɛ̄lɛ̄ka̍ tūūlūl nu̍m ni̍, ndu̍yɛ̍ mā sɔ̍la̍ mbō hīōū bɛ̍ɛ̍ le̍nde̍.

²⁵Wānā o̍ wāna̍ nɔ̍ o̍ bā, wānā ko̍ŋ ndu̍ Mɛ̄lɛ̄ka̍ chɔ̄ɔ̄lū ke᷅ ni̍. Wāna̍ nɔ̍ o̍ bā le̍ wo̍, ō pɔ̄mbɔ̍ o̍ nɔ̍ wo̍ bɛ̍ɛ̍, Mɛ̄lɛ̄ka̍ chō ndu̍ pōōndā o̍ bā.”

²⁶Mi̍ Chi̍i̍sū di̍mī āā, “Māsāle̍ Mɛ̄lɛ̄ka̍le̍ŋ le̍ chō māchūāā mɛ̄ɛ̍ wāŋndo̍ sāŋ yɛ̄i̍ye̍ lɛ̄ŋ yɛ̍.

²⁷Tē ō sa᷄ŋ pɛ̍ mā tōl pɛ̍, ō kɔ̍ hi̍nī, lē sɛ̄ pɛ̍, ō chɛ᷄ŋ. Tē he̍ī lo̍ yɔ̄nɔ᷄ŋndo̍ le̍ pālɛ̍i̍ ī ti᷄ŋ pɛ̍, yɛ̄i̍ye̍ he̍ī ī sōli̍ yɛ̄ɛ̍ŋnda̍ŋ, ī hīndū. Kɛ̍ wānā ko̍ŋ ō si̍nā mɛ̍ɛ̍ i̍ yɔ̍nūŋ te̍.

²⁸Lɛ̄ŋnde̍ŋ lē nɔ̄lā mī le̍ŋ pi̍la̍ le̍ to̍sa̍ mī yɛ̄i̍ye̍ ī hīndū mī ī kōm. Tē ī hīndū pɛ̍, ī mɛ̄, ī chūūlu̍, ī nɛ̄ɛ̄ŋgu̍ŋ.

²⁹Tē ī vēsa̍ pɛ̍, ō kāndu̍ kōūwɔ̄ɔ̍ a̍ mūɛ̍i̍, kāni̍ fo̍ndōle̍, te̍le̍ŋ ku̍a̍u̍wāa̍ fu̍u̍lu̍u̍ ni̍.”

³⁰Mi̍ Chi̍i̍sū nyu̍nā āā, “A̍ yɛ̄ɛ̍nɛ̍ na̍a̍ ŋ̄ tūū yɛ̍ māsāle̍ Mɛ̄lɛ̄ka̍le̍ŋ? Tāle̍ yɛ̄ɛ̍nɛ̍ na̍a̍ ŋ̄ dīmī yɛ̍ mbō bɛ̄nda̍ a̍ le̍ŋ?

³¹Lē chō māchūāā māā nyɛ̍ yɔ̍nu̍ŋ o̍ tālo̍o̍ ho̍ō ni᷄ŋ ndo̍. Tē wāŋndo̍ chu̍a̍ pɛ̍, ku̍lu̍ tɔ̄lɔ̄ɔ̄ pūm mā vēēlu̍ ndu̍ āā, mɔ̍si̍tāā, ō tɔ̄l ndu̍ lɛ̄ŋ. Ku̍lu̍ tɔ̄lɔ̄ɔ̍ ho̍ō yɛ̍, ndu̍ hi̍o̍ū mɛ̄sɛ̄lā a̍ ku̍lu̍la̍ŋ kpo̍u̍ o̍ chi̍e̍ēŋndo̍ ni᷄ŋ.

³²Kɛ̍, tē ō wa̍ pɛ̍ mā tɔ̄l ndu̍ mbō vīl ō hīndū, ō hīōū tɔ̄lɔ̄ɔ̍ o̍ tɔ̄lɔ̄ɔ̄ kpo̍u̍ o̍ fo̍ndāŋ kōŋ, ndu̍yɛ̍ mbō sōli̍ lɛ̄ūwo̍ŋ ŋ̄ vīlɛ̄ī. O̍ ko̍ŋ, yōūwa̍ bɛ̍ɛ̍ mā tāŋgu̍l wāa̍ŋnde̍ o̍ wūndu̍ma̍ lɛ̄ūwūŋ ndɔ᷄ŋ.”

³³Mi̍ Chi̍i̍sū di̍mūl wāŋnda̍ yōōŋgū kɛ̄ndɔ̄ɔ̍ o̍ tāle̍lā ka̍ ka̍ wa̍ā nu̍a̍ā ni᷄ŋ, tūu̍le̍ nda̍ sīnā pɛ̍ŋgu̍ le̍ŋ.

³⁴Ndu̍yɛ̍, ndu̍ o̍o̍ su̍ū fo̍ndō nāa̍ nda̍ chūā le̍, mɛ̄ɛ̍ mbō dīmi̍ tālo̍o̍. Kɛ̍, tē ō lo̍ nda̍ bu̍ɛ̍i̍yāā ndūa̍a̍ kpe̍e̍le̍ pɛ̍, ō chɔ᷄m nda̍ nyɛ̄ o̍ nyɛ̄ fe̍e̍.

³⁵O̍ pāa̍le̍ pi᷅lɛ̍lē lēŋ chōo̍, mɛ̄ɛ̍ pāa̍le̍ŋ lē de᷄l, mi̍ Chi̍i̍sū di̍mūl bu̍ɛ̍i̍yāā ndūa̍a̍ āā, “Ŋ̄ tāŋnu᷅ŋ o̍ mɛ̄ŋmā ībūŋga᷄ŋ lēe̍lōo̍.”

³⁶Ma̍ lūɛ̄ī o̍ dɛ̄ndɔ̄ɔ̍ ni᷄ŋ nāa̍ Chi̍i̍sū wa̍ īchāli̍ wa̍. Ma̍ mɛ̄ī fāŋgā bɛ̍ndōo̍ o̍ kɔ̄ŋgɔ̍. Ma̍ chūā Chi̍i̍sū ma̍ kūānu᷄ŋ. Dɛ̄ndɛ̄la̍ che᷅le̍ŋ lā wa̍ hɔ̄lāā tūlu̍ a̍ nda̍ o̍ mɛ̄ŋnda̍ŋ chōo̍.

³⁷O̍ ko̍ŋ kɔ̍ɔ̍lī, mɛ̄ɛ̍ nda̍ wa̍ kɔ̄la̍ŋ o̍ mɛ̄ŋnda̍ŋ chōo̍, mi̍ hūēīyīī bɛ̄ndūe̍i̍ sūŋgū hɔ̄ŋndo̍ ta̍u̍ ta̍u̍. Mi̍ mɛ̄ŋnda̍ŋ mā kāndū hīīlɔ᷄ŋndo̍. Mi̍ mā lūɛ̄ī o̍ dɛ̄ndɔ̄ɔ̍ ni᷄ŋ. Mi̍ mā kāndū dɛ̄ndɔ̄ɔ̍ pīɔ̍ɔ̍.

³⁸Kɛ̍, Chi̍i̍sū ndu̍ wa̍nu̍ŋ i̍hi̍ni̍ o̍ dɛ̄ndɔ̄ɔ̍ a̍ mākɔ̄ɔ̄ o̍ lūa̍a̍ŋ mbo̍ yāmbū bōlle̍ŋ o̍ pi̍lēi̍yo̍ chōo̍. Mi̍ bu̍ɛ̍i̍yāā ndūa̍a̍ kūā ma̍ kɔ̍ ti̍ndī ndu̍. Ma̍ nyūnā ndu̍ āā, “Ti̍chā, nūm ā yɔ᷄ŋ bɛ̍ɛ̍ mī ŋ̄ wa̍ pīɔ̍mndo̍ a̍ bu̍u̍la̍ŋ te̍?”

³⁹Mi̍ Chi̍i̍sū ti̍a̍ndū. Mɛ̄ɛ̍ o̍ te̍ndū, mbo̍ kpāā hūēīyīi̍ wa̍ hɔ̄ŋndo̍ ve̍. Mbo̍ dīmūl mɛ̄ŋmā ībūŋga᷄ŋ āā, “Pɛ̍ŋgi̍ hi̍i̍lɔ᷄ŋndo̍.” Mi̍ hūēīye̍ ī pɛ̄ŋgī hɔ̄ŋndo̍. Mi̍ mɛ̄ŋnda̍ŋ bɛ̍ɛ̍ ma̍ pɛ̍ŋgī hīīlɔ᷄ŋndo̍.

⁴⁰Mbo̍ lō lo̍ŋ mbo̍ nyūnā nda̍ āā, “Sīōōŋīī yɛ̄ɛ̍nɛ̍ nya̍ chō yɛ̍? Lā nɔ̍ la̍a̍la᷄ŋ te̍?”

⁴¹Mi̍ kɔ̄ndɔ̄fi̍llo̍ bīī nda̍. Ma̍ nyūūni̍āŋ nda̍ pi̍la̍ āā, “Wāna̍ māāvɛ̄ɛ̍nɛ̍ cho̍ yɛ̄ ho̍ō? Hūēīye̍ bɛ̍ɛ̍ a̍ mɛ̄ŋnda̍ŋ, tōsāa̍ nyɛ̄ o̍ di̍mī wo̍.”