Read Southern Kisi Ma̍kī 5 Bible Online

Ma̍kī 5 - Southern Kisi bible

Ma̍kī 5

¹Ma̍ fūūlūū o̍ mɛ̄ŋmā ībūŋga᷄ŋ lēe̍lōo̍ o̍ lɛ̄ŋndē Kɛ̄lu̍a̍sāle̍ŋ ni᷄ŋ.

²Mɛ̄ɛ̍ Chi̍i̍sū fu̍la̍ o̍ dɛ̄ndɔ̄ɔ̍ ni᷄ŋ, mi̍ po̍ nyi̍nā wɔ̄ɔ̍ŋndo̍ a̍ kɔ̄ɔ̄lī wo̍ fūlā nāa̍ nda̍ chɔ̄ wa᷅ŋ vīlɛ̍i̍ya̍ wa̍. Mbo̍ kōmāl Chi̍i̍sū.

³O̍ sɛ̄īla̍ tɛ̄ɛ̄ŋ ndu̍ o̍o̍ lɔ᷅l ni̍. Wānā o̍ wānā ndu̍ o̍o̍ nɔ̍lā ndu̍ yīī le̍, ā yɔ᷄ŋ bɛ̍ɛ̍ a̍ yɔ̄lɔ᷄ŋ.

⁴Kāni̍ fo̍ndōle̍, ā ba᷄ŋ ndu̍ ni᷅ŋ pāāndū o̍ kpɛ̍ɛ̍la̍ŋ ma̍ yīī ndu̍ a̍ yɔ̄lɔ᷄ŋ. Mbo̍ kīlī kīlī yɔ̄lɔ᷄ŋ. Mbo̍ bɛ̄ɛ̄ŋūū kpɛ̍ɛ̍la̍ŋ. Mbo̍ yīmī yīmī la̍ŋ. Wānā o̍ wānā ndu̍ o̍o̍ nɔ̍ kpa̍a̍yā le̍ ndu̍ bīyɔ̄ɔ̄ le̍.

⁵Īpāla̍ ni̍, īchɔ̄l ni̍, ō wānu̍ŋ o̍ sɛ̄īla̍ŋ tɛ̍ɛ̄ŋ a̍ o̍ pēmbo᷄ŋ tɛ̍ɛ̄ŋ mbō dēŋī cho̍o̍ cho̍o̍ mbō sūūsīāā ndu̍ pi̍la̍ a̍ pōūta̍ŋ.

⁶Mɛ̄ɛ̍ o̍ che᷅ Chi̍i̍sū la̍nda̍ŋ mbo̍ nyāānu᷄ŋ, mbo̍ kɔ̍ ba᷅ŋ ndu̍ wūla̍ŋ o̍ lābɛ̄ŋgu̍ ni̍ŋ.

⁷Mbo̍ dēŋī chōo̍ cho̍o̍ kpe̍le̍ŋ. Mbo̍ nyūnā Chi̍i̍sū āā, “Chi̍i̍sū, Po̍ Mɛ̄lɛ̄ka̍ Bɛ̄ndōo̍, vɛ᷅ sōndōo̍ wōūwo̍ o̍ sūɛ̍i̍ nīi̍ ni᷄ŋ? Mī di̍mu̍l nu̍m, Mɛ̄lɛ̄ka̍ o̍ hɔ̄l kpe̍nde̍ke̍le̍, yāndi̍i̍ to̍sā mī I̍ bi̍ī mɔ̍nɛ̍i̍ le̍.”

⁸Ō dīmi̍ le̍nde̍ fo̍ndōle̍, kāni̍, Chi̍i̍sū ndu̍ o̍o̍ chi̍i̍ ni᷅ŋ nyi̍nā wɔ̄ɔ̍ŋndo̍ dīmūl āā, “Fa̍ŋa̍ŋ po̍o̍ ho̍ō kɔ̄ɔ̄lī.”

⁹Mi̍ Chi̍i̍sū nyu̍nā ndu̍ āā, “Ɔ̍ɔ̄ dīōlā nūmnda̍ŋ?” Mbo̍ mūlī āā, “Dīōlā nīla̍ŋ āā, Fāŋgāa̍, fo̍ndōle̍ na̍a̍ nyi̍nāā wɔ̄ɔ̍ŋnda̍ ŋ̄ chō ta̍u̍.”

¹⁰Mbo̍ nyɔ̄ɔ̄lū Chi̍i̍sū āā, “So̍lī nda̍ o̍ lɛ̄ŋnde̍ŋ nde᷅ŋ ni᷄ŋ te̍.”

¹¹O̍ te̍le̍ŋ ko̍ŋ ni᷄ŋ, pēūwāā chi̍e̍e̍ni̍ŋ nda̍ ā wa̍ di̍o̍la̍ŋ ku̍ndā bɛ̄ndōo̍ o̍ pēmbēi̍ īkɛ̄i̍.

¹²Mi̍ nyi̍nāā wɔ̄ɔ̍ŋāā kāŋ ā nyɔ̄ɔ̄lū Chi̍i̍sū āā, “Yɔ̍ŋ na̍a̍ pēūwāā kāŋ kɔ̄ɔ̄lī mī ŋ̄ tōl nda̍ kɔ̄ɔ̄lī.”

¹³Mi̍ Chi̍i̍sū chɛ᷅l. O̍ ko̍ŋ, mi̍ nyi̍nāā wɔ̄ɔ̍ŋnda̍ ha̍ā fāŋa᷄ŋ po̍o̍ ho̍ō kɔ̄ɔ̄lī. Ma̍ tūāl pēūwa̍ kɔ̄ɔ̄lī. Pēūwāā kāŋ ā wa̍ wāa̍la̍ŋ lā tīɔ̍ɔ̍ŋ. Ma̍ tūāl kɔ̄ŋgɔ̍ fe̍ke̍ fe̍ke̍ ko̍ŋ a̍ kīlta̍ŋ. Ma̍ dēlī o̍ mɛ̄ŋmā ībūŋga᷄ŋ ni᷄ŋ. Ma̍ wū kpo̍u̍.

¹⁴Mi̍ wānāā māndāā lāpēū wa̍ nyāānu᷄ŋ ma̍ kɔ̍ di̍mūl wāŋnda̍ o̍ chi̍e̍e̍ bɛ̍ndōo̍ ni᷄ŋ a̍ o̍ lɛ̄ŋndē lēŋ ni᷄ŋ a̍ ndi̍ o̍kɔ̄ɔ̄. O̍ ko̍ŋ, mi̍ wāŋnda̍ cha᷄ŋ ma̍ hūŋ le̍ mā chē nyɛ̍ yɔ̍nu̍ŋ ndo̍.

¹⁵Ma̍ hūŋ nāa̍ Chi̍i̍sū chu̍a̍. Ma̍ chā po̍ nyi̍nāā wɔ̄ɔ̍ŋāā fāŋgāa̍ ā wa̍ kɔ̄ɔ̄lī wo̍. Ō wānu̍ŋ īchāli̍ a̍ nyɛ̄la̍ŋ ndu̍ lēkɔ̄ɔ̍. Ndu̍yɛ̍, ō wa̍ ni᷅ŋ ō kīāndāā kɔ̄l nyɛ̄ kɛ̄ndɛ̍ī. Mi̍ sīōōŋnde̍ bīī wāŋnda̍ ha̍ā.

¹⁶Mi̍ wānāa̍ che᷅ sūɛ̍i̍ he̍ī ya̍ kūā ma̍ kɔ̍ di̍mī nyɛ̍ yɔ̍nu̍ŋ a̍ pōo̍ ho̍ō wo̍ a̍ nyɛ̍ yɔ̍nu̍ŋ pe̍ūwa̍ wo̍.

¹⁷Ma̍ nyɔ̄ɔ̄lū Chi̍i̍su̍ le̍ mbō fāŋa̍ŋ o̍ būŋgɛ̄ī ndɛ̄i̍ ni᷄ŋ.

¹⁸Mɛ̄ɛ̍ Chi̍i̍sū wa̍ lūɛ̄īyɔ̄ɔ̍ o̍ dɛ̄ndɔ̄ɔ̍ ni᷄ŋ, mi̍ po̍ nyi̍nāā wɔ̄ɔ̍ŋnda̍ wa̍ kɔ̄ɔ̄lī wo̍ nyɔ̄ɔ̄lū Chi̍i̍sū le̍ mā kūɛ̄ nda̍ ndu̍.

¹⁹Kɛ̍ mi̍ Chi̍i̍sū kɛ̍ɛ̄. Mbo̍ dīmūl ndu̍ āā, “Kɔ̍ o̍ nya̍ lo̍ nāa̍ wānāā nūmnda̍ chūā, mā kɔ̍ di̍mūl nda̍ a̍ mɛ̄ɛ̍ kpɛ̍ Māsānɔ̄ɔ̍ tōsa̍l nu̍m yɛ̍ a̍ mɛ̄ɛ̍ o̍ tūīīnu̍ŋ nu̍m īnyīɛ̍ɛ̍ yɛ̍.”

²⁰Mi̍ pōo̍ ho̍ō kūā mbo̍ kɔ̍ ka̍ndū dīmīo̍o̍ mɛ̄ɛ̍ kpɛ̍ Chi̍i̍sū to̍sa̍l ndu̍ yɛ̍ o̍ lɛ̄ŋndē Dɛ̄ka̍pɔ̍līīle̍ŋ ni᷄ŋ, ko̍ŋ cho̍ ni̍, lɛ̄ŋndē chi̍e̍e̍ŋ bɛ̍ndūŋ tɔ̍le̍ŋ. Mi̍ kɔ̄ndɔ̄fi̍llo̍ bīī wāŋnda̍ kpo̍u̍.

²¹Mɛ̄ɛ̍ Chi̍i̍sū ta̍ŋ o̍ mɛ̄ŋmā ībūŋga᷄ŋ vɛ̄lɛ̄ lēe̍lōo̍ o̍ dɛ̄ndɔ̄ɔ̍ ni᷄ŋ, mi̍ wāŋnda̍ chūūŋgi̍āŋ fa̍ŋgā bɛ̍ndōo̍ nāa̍ pi᷅lɛ̍. Ma̍ bālū ndu̍ si̍lɔ̍ o̍ mɛ̄ŋnda̍ŋ īkɛ̄i̍.

²²Mi̍ pōo̍ ō pūm hūŋ, dīōla̍ŋ āā, Cha̍līɔ̄ɔ̄. Nda̍ wa̍ wānāā bɛ̄ndūa̍a̍ lo̍ŋ le̍ chīɛ̄ī Chu̍ūwa̍ pīɛ̄ī Mɛ̍lɛ̄ka̍ wo̍ ni̍. Mɛ̄ɛ̍ o̍ che᷅ Chi̍i̍su̍, mbo̍ dēl ndu̍ o̍ lābɛ̄ŋgu̍ ni̍ŋ.

²³Mbo̍ nyɔ̄ɔ̄lū Chi̍i̍su̍ mbo̍ dīmī āā, “Chūāāmbɔ̄ nī la̍a̍ndōo̍ chō tēndu̍ pīɔ̍m. Hu̍ŋ mā kɔ̍ ha̍ndū ndu̍ bāla̍ŋ chōo̍. Ko̍ŋ to̍sā ni̍ mbō sēŋgū, ō vi᷅ lɛ̍ lē.”

²⁴Mi̍ Chi̍i̍sū ku̍ā hɔ̄lāā tūlu̍ a̍ ndu̍. Mi̍ fāŋgā bɛ̍ndōo̍ tūāl ndu̍ kɔ̄ɔ̄lī. Ā wa̍ nyīīnda᷅ŋndo̍ ā bālāā ndu̍ si̍lɔ̍.

²⁵Chūa̍a̍ pūm ō wa̍ lo̍ŋ, ndu̍ o̍o̍ nɔ̍ nāā ŋ̄wāŋ lāāndū wɔ̄ɔ̍ŋ pūm. Le̍ wɔ̄sīla̍ŋ tɔ̍ a̍ lā tīɔ̍ɔ̍ŋ nāa̍ ho̍ō chō ndu̍.

²⁶Mbo̍ bīī ni᷅ŋ mɔ̍nɛ̍i̍ wānāā chīɔ̄ūwāā fāŋgā fa̍ŋgā o̍ bā. Mbo̍ pīsī nyɛ̄ o̍ nyɛ̄ fe̍e̍ ndu̍ o̍o̍ nɔ̍ o̍ bā. Kɛ̍ sīōŋgɔ̄ɔ̄ bɛ̍ɛ̍, nāa̍ hīōūwɔ̄ɔ̍ lāchī kɛ᷅.

²⁷Mbo̍ tūɛ̄ī a̍ Chi̍i̍su̍ o̍kɔ̄ɔ̄. Mbo̍ hūŋ ndu̍ a̍ mākɔ̄ɔ̄ o̍ fāŋgā bɛ̍ndōo̍ ho̍ō tɛ̄ɛ̄ŋ mbo̍ pīla᷄ŋ ndu̍ dōmāa̍.

²⁸Kāni̍ fo̍ndōle̍, mbo̍ yīya᷄ŋ māā, ō wa̍ bɛ̍ɛ̍ do᷅ma̍ Chi̍i̍sōo̍ si̍i̍ o̍ pi̍la̍ŋ ni̍ māā ō nɔ̄lā mbō sēŋgū.

²⁹Le̍ he̍ī, o̍ pi̍la̍ŋ do᷅ma̍ Chi̍i̍sōo̍ ni̍. Ndu̍yɛ̍, mi̍ nāā ndɔ̄ɔ̍ pɛ̄ŋgī o̍ lē pīlɛ̍ ni᷄ŋ kpe̍. Mbo̍ sīna᷄ŋ di̍a̍llūŋ ndɔ᷄ŋ māā nāā ndɔ̄ɔ̍ sēŋgū.

³⁰Mi̍ Chi̍i̍sū si̍na᷄ŋ ndu̍ pi̍la̍ māā kpāāyāa̍ fūla̍ ndu̍ o̍ ŋ̄dīāl. Mi̍ Chi̍i̍sū mu̍li᷄ŋ mbo̍ mɛ̄ɛ̄ndīa̍ŋ fa̍ŋgā bɛ̍ndōo̍. Mbo̍ nyūnā āā, “Nɛ̄ɛ̍nɛ̍ pi̍la̍ŋ yɛ̍ dōma̍ nūu̍?”

³¹Mi̍ bu̍ɛ̍i̍yāā ndūa̍a̍ dīmūl ndu̍ āā, “Ā chō chɔ̄ɔ̍ mɛ̄ɛ̍ fāŋgāa̍ chō nu̍m ā bālāā ma̍ wā nyīīnda᷅ŋndo̍ yɛ̄ fa̍ū, mā nyūnā āā, ‘Nɛ̄ɛ̍nɛ̍ pi̍la̍ŋ yɛ̍ ya̍?’ ”

³²Mbo̍ hīāū lāchī a̍ tōfāa̍ le̍ sīnāa̍ wāna̍ pi̍la̍ŋ ndu̍ wo̍.

³³Kɛ̍, mɛ̄ɛ̍ chūa̍a̍ ho̍ō sīna̍ nyɛ̍ yɔ̍nu̍ŋ ndu̍ wo̍, mbo̍ fūlā ō chō nyīīyāa̍ le̍nde̍ a̍ sīōōŋnde̍. Mbo̍ bāŋ wūla̍ŋ Chi̍i̍sū o̍ lābɛ̄ŋgu̍ ni̍ŋ. Mbo̍ dīmūl ndu̍ nyɛ̄ o̍ nyɛ̄ fe̍e̍ yɔ̍nu̍ŋ ndu̍.

³⁴Mi̍ Chi̍i̍sū di̍mūl ndu̍ āā, “Chūā nūu̍, tīīnda᷄ŋ ŋ̄ dɔ̄ū o̍ Mɛ̄lɛ̄ka̍ ni᷄ŋ ndo̍ tōsa̍ ma̍ sɔ̄lā sīōŋgɔ̄ɔ̍. Kɔ̍ a̍ kɔ̄l kɛ̄ndɛ̄, mā lo̍ ō sīāŋgāā.”

³⁵Chi̍i̍sū lo̍ sūɛ̍i̍ mi̍ wāŋnda̍ ā pūm ā fūlā o̍ chīɛ̄ī wānā bɛ̍ndōo̍ Cha̍līɔ̄ɔ̄ wo̍. Ma̍ hu᷄ŋ di̍mūl Cha̍līɔ̄ɔ̄ āā, “Chūā nūmndo̍ vī. Pālā yɛ̄ɛ̍nɛ̍ ŋ̄ chō yɛ̄ vɛ̄lɛ̄ Ti̍chā?”

³⁶Kɛ̍ Chi̍i̍sū sāāla̍ŋ nyɛ᷅ nda̍ dīmi̍ wo̍ le̍. Mbo̍ dīmūl wānā bɛ̍ndōo̍ āā, “Yɔ᷅ŋ īsīōōŋ te̍. Nūm nɔ̍ la̍a̍la᷄ŋndo̍ su̍e̍e̍.”

³⁷Chi̍i̍sū chɛ̍l mī wānā che᷅le̍ŋ tōl ndu̍ kɔ̄ɔ̄lī le̍, mɛ̄ɛ̍ Pītɛ̍, a̍ Chēmi̍si̍, a̍ Chɔ᷄ŋ, pɔ̄mbɔ̄ɔ̍ Chēmi̍si̍.

³⁸Mɛ̄ɛ̍ nda̍ fūūlu̍u̍ o̍ chīɛ̍i̍ Cha̍līɔ̄ɔ̄wo̍, mi̍ Chi̍i̍sū cha᷅ wāŋnda̍ bɔ̄ɔ̄lūūwo̍ a̍ cha᷄ŋnda̍ŋ a̍ yi̍e̍e̍la̍ŋ chōo̍ cho̍o̍.

³⁹Mɛ̄ɛ̍ o̍ lu̍ɛ̍ī chīɛ̄ī ni̍ŋ, mbo̍ nyūnā nda̍ āā, “Vɛ᷅ mi̍ lā wā bɔ̄ɔ̄lūūwo̍ mi̍ lā wā cha᷄ŋnda̍ŋ? Chūāāmbɔ̄ɔ̍ vi̍ le̍. O̍ lūa̍a̍ŋ o̍ cho̍ ni̍.”

⁴⁰Mɛ̄ɛ̍ o̍ di̍mi̍ le̍nde̍, ma̍ sa̍āŋ ndu̍ māmɔ̄ɔ̍. Mbo̍ sōlī nda̍ o̍ bɛ̍ɛ̄ kpo̍u̍, mɛ̄ɛ̍ fi̍nyāa̍ chūāāmbɔ̄ɔ̍, a̍ kāla̍ ndɔ̄, a̍ wānāa̍ wa̍ hɔ̄lāā tūlu̍ a̍ Chi̍i̍sū wa̍. Ma̍ lūɛ̄ī nāa̍ chūāāmbɔ̄ɔ̍ wa̍ wa̍.

⁴¹Mi̍ Chi̍i̍sū sa̍ā ndu̍ bāa̍. Mbo̍ dīmūl ndu̍ āā, “Tāli̍tā, kɔ̄m.” Ko̍ŋ cho̍ ni̍, Chūāāmbɔ̄ɔ̍, mī di̍mu̍l nu̍m, Chɔ̍ŋ.

⁴²Mi̍ chūāāmbɔ̄ɔ̍ cha᷄ŋ le̍ pi᷅lɛ̍ kpe̍, mbo̍ kāndū kēlāa̍. Ō wa̍ wɔ̄sīla̍ŋ tɔ̍ a̍ lā tīɔ̍ɔ̍ŋ. Mɛ̄ɛ̍ he̍ī yɔ̄nu̍ŋ, mi̍ kɔ̄ndɔ̄fi̍llo̍ bīī nda̍.

⁴³Mi̍ Chi̍i̍sū sīlā nda̍ ō kālā ka̍lā āā, “Wānā che᷅le̍ŋ ō si̍nā su̍ɛ̍i̍ he̍ī le̍.” Mbo̍ dīmūl nda̍ āā, “Lā ke̍ ndu̍ nyɛ̄ dīa̍a̍ mbō dē.”